ادونا رايكم

[نعناعة]

ياشباب ياراقين .
عايزه اعرف رايكم في اولاد الزمن ده بحبوا دايماً البت البتظهر ليهم مشاعره بالحب والريده بدون خجل ..
ولا البت البتكون تقيله ورزينه .......

انا اديكم راي شنو ...
مادام في حب وريده انا مابحب حركات الاولاد لمن الواحد يتقل علي البت لمن يعرف انها بتريدوا شديد ...في النهاية دي مشاعر واحاسيس صادقه مابتستحمل الحركات دي ..

[الجندي المجهول]

ياشباب ياراقين .
عايزه اعرف رايكم في اولاد الزمن ده بحبوا دايماً البت البتظهر ليهم مشاعره بالحب والريده بدون خجل ..
ولا البت البتكون تقيله ورزينه .......

انا اديكم راي شنو ...
مادام في حب وريده انا مابحب حركات الاولاد لمن الواحد يتقل علي البت لمن يعرف انها بتريدوا شديد ...في النهاية دي مشاعر واحاسيس صادقه مابتستحمل الحركات دي ..

الحياء والخجل والبنت من غيرهم كشخص يجلس في فناء الدار في فصل الشتاء من غير غطاء او نار للتدفئة والخجل عنوان الادب عند البنت والبنت الما بتخجل (العينها قوية) دي ما مشكورة

تخريمة
اخرم اقول شنو ؟

[عبدالله محمد العقاد]

نعناعة ان عندي راي و لكن انا خارج دائرة الاختصاص باعتباري راجل مرة هل ممكن اشارك و ان تقبلوني اسثناءا كشاب

[علي النعيم محمد نور]

النعناعه . . .
إنت ماكان تقولي ( الشباب) والحجاج والله كان (عرفتي حاجه ). . . ووريناك عجائب من زمن الحقائب . . .
علي كل حال . . . كنت بقول (لأم الأولاد) . . .
عود لينا ياليل الفـــــــرح
داوي القليـــب الإنجــرح
خليهو يفـرح مره يـــــوم
طول عمرو ناسيهو الفرح
كيفن تعود والليل يتوشح ضفائر حبي زي طفلا" صغير شايلنو شيل . . .

[ود حنتوب]

العزيزة نعناعه

لك التحية

لست ادرى لم اصبح نصيبك فى هذا البورد من العجائز
فنحن لا نستطيع ان نفتى فى هذا الامر قطعا
لانه زمننا كان غير الزمن ده ياخى
وما كان فى بت بتصرح بى ريدها ابدا
كنا نحن دائما المكسرين
لكن دائما وفى كل زمن التقل صنعة يا بتى
والخفة بهدلة

يعنى البت ما تخلى نفسه رخيصه كمان وتعرضها لليسوى والما يسوى
لو تأكدت انه زولها ده بريدها صحيح فلا ضير ان تلمح له وتحركه قليلا
بعضهم زى ابو الهول محتاج دفرات

يديك العافية يا ستى

[moh_alnour]

اولاد الزمن ده بحبوا دايماً البت البتظهر ليهم مشاعره بالحب والريده بدون خجل ولا البت البتكون تقيله و رزينه

ما زال الرجل الشرقي يُفضلها رزينة ( مثل صيني ) ;)



من فوق النضارة :
يعيش المرء ما أستحيا بخير و يبقى العود ما بقى اللحاء
فلا و الله ما في العيش خير و لا الدنيا إذا ذهب الحيــاء

من تحت النضارة :
يا رزينة وصي عينيك الحنينة تنشر الفرح المهاجر في عيون كل المدينة

[نعناعة]

التحية ليك ياكرومبو ويا محمد النور وياود حنتوب

يااستاذ عبدالله محمد العقاد انته مابتستأذن البوست كلوا تحت أمرك

يااستاذ علي النعيم بالجد ابيات شعر رائعه رائعه اديك العافية ....

[ود النمير]

بسم الله الرحمن الرحيم

يعتمد هذا علي وعي الطرف الاخر وسعه أفقه اما اذا كان من نوعيه التي تؤمن بالعرف والتقليد لدرجه لا يمكن التنازل عنها أكيد حتكون حساباته معقده ومثل هؤلاء البشر كل شئ يخضعونه لقانون التقاليد والاعراف حتي وان كانت نشاذاً منفراً وفيها ظلماً بائن للانسان ، اتمني انو الناس تصل مرحله وعي وتفهم لمعني الانسانيه الحقيقيه وكما يقولون "اذا ساء فعل المرء ساءت ظنونه" ، وبعدين البت البتصرح دي بتمسك ليها زول من طرف ساكت وتقول ليهو بحبك اكيد بكون جمعهم عمل او دراسه وأعتقد انو كل واحد عرف الاخر بمافيهو الكافايه فليس بتصريح عن حبها سوف تتغير نظرته لها ، اذا وضعنا المعايير الدينيه والانسانيه نصب اعيننا فلا أظن سوف نستنكر مثل هذه الافعال طالما هي لا تختلف مع المبادئ والاخلاق والقيم ، فلتذهب التقاليد الي الجحيم اذا كانت سوف تنتهك مشاعر انسان حقيقيه ليس لها ذنب غير انها حبت بصدق وارادت ان تحافظ علي الشخص الذي اختارته فقد تكون لمحت له بما فيه الكفايه ولكنه لم يعرها أهتماماً فارادت أن تعرف مصير مشاعرها معه حتي لا تعاني أكثر مما تعانيه فهل هي غلطانه انها تسعي للحفاظ علي نفسيتها واتزانها؟!

[محمد ابراهيم خليفه]

النعناعه

ذى ما قال أخى على النعيم ماكان تحددى ( الشباب ) 0
يوم عقدى قام المأذون سأل وكيل الزوجه هل أخذت موافقة البت فرد عليه

بأنها فى الكوفير فوضع المأذون القلم وقلبى لانى كنت متابع فبادره الوالد

له الرحمه بأنهم ينتظرون هذا اليوم عشره سنوات اعقد ساى وخلصنا هى

اذا ما موافقه كان مشت الكوفير ؟

الصراحه للبتحب ولا الدايره العرس وبس البتكون عينها قويه ياتا ؟

[esmat]

الاخت نعناعة

عايزه اعرف رايكم في اولاد الزمن ده بحبوا دايماً البت البتظهر ليهم مشاعره بالحب والريده بدون خجل .. ولا البت البتكون تقيله ورزينه

التقلة والخفة دي ممكن اقيسها شخص خارج الدائرة
بمعنى انا اصلاً حبيتها فبعداك مهما ما تعطي انابشوف
انها تقيلة مهما تقول عايز اكتر والعكس- انكسر الخجل
ما دام الحب موجو ولكن الاحترام سيظل

[moh_alnour]

اعقد ساى وخلصنا هى اذا ما موافقه كان مشت الكوفير ؟


:p :p :p
و الله عفيت منو الوالد و ربنا يتغمده بواسع رحمته
بالجد و الله ضحكتني يا جنابو


الصراحه للبتحب ولا الدايره العرس وبس البتكون عينها قويه ياتا ؟


هذا هو السؤال الموضوعي
الصراحة راحة و مطلوبة في كل الأمور و لكن في مجتمعاتنا الشرقية فالأفضل
دائما ً أن تأتي المبادرة من الرجل و على المرأة التلميح فقط و بنات حواء ما بغلبن حِيلة
وعندما يكون الأمر جاد فالمشاعر المتبادلة هي المطلوبة و المرغوبة

[محمد حسين (المميز)]

الله يخلي لي أم منــه

حبينا مرّه بـس

قلتي لي الشباب مالهم :D :p

[نعناعة]

ياود النمير كفيت ووفيت ده الكلام الصاح أديك العافية ...

ياesmat
ده الكلام العاوزه اصل ليهو والمفروض الكل يعمل بيهو .................ومليون خط تحت الاحترام ..

[علي النعيم محمد نور]

الله يخلي لي أم منــه

حبينا مرّه بـس

قلتي لي الشباب مالهم :d :p

ود يامميز ياثعلوب . . .
وأنا أقول (منه شلبي) دي سموها علي منو . . . أتاريها . . .

[عبدالحفيظ]

نعناعه
والله انا بصورة خاصة بحب البنت التقيلة و بحاول اتعرف عليها باى صورة
اما الخفيفة و البتبوح بمشاعرة طوالى دى المابتنفع معاى
ودة راى خاص بي انا