المساعد الشخصي الرقمي

مشاهدة النسخة كاملة : نصائح ام سودانية لابنتها



طائر النورس
03-07-2009, 03:40 AM
والله يا حلوين لقيت الرسالة في بريد ( زوجتي ) ما عارفة لو مرت عليكم ولا لا




نصائح ام سودانية لابنتها ( خرابة بيوت )


يا بت هوي فتحي عينك و ابقي نجيضة وفالحة..... قدر ما اجي


داخله عليكم القاكي .... هي هي هي .... و قر قر قر ..... تضحكي


مع عاطف دا.... الراجل ما تضحكيلو كتير..... يسعالني الله، يحقر


بك....الراجل اديهو العين الحمرا. وان قدرك الله ايدك تلحقيها


ليهو لحقيها...ابقي نجيضة.....آآية..... زي امك.....الله بسعلني


وقت ابوكي يقول حاجة تضحك.... امشي اتحشر في الاوضة


واضحك زيييين واجي مارقة صارة وشي....


وبعدين اوعك واوعك وبعدين تااااني اوعك... تقوليلو الجلابية


دي سمحة والله العمه اللابسها دي سمحة... نفسو تقوم تعجبو


يعرس فوقك.... وبعدين تشربي ما تروي....


واكربيهو بالطلبات.... اوعي تخلي لك قرش يبيت في


جيبو...واوعك تخليهو يشوف ال...... بيخربن الرجال... و وقت


المسلسل داك يبدأ شفتي جيبي فندكك واقعدي دقي أي حاجة


جنبو ويا ريت لوكانت شطة... ولا كان شافعك جيعان وداير


يرضع وبيبكي خليهو في بكاءهو داك لمن المسلسل ينتهي....


وبعدين ما يجى داخل يلقاكى تغنى حتى ان بقيتي دايرة تغ ني ا


وعك من الغنا الخايس ناس حبيبي حبيبي.... امسكي في الغنا ا


لحار زي البيجري نسيبتو و مرتو طلقانة ولا اندب حظي ولا


دفاعنا الشعبي ياهو ديل ولا النار ولعت بقلبي


بطفيها.....اااااااااااي.... عشان تربيلو الزلعة .....والخلعة....بس


اوعك تغني ليه الليلة يوم الرجال.... بيقوم يصدق و يتحنفش


فوقك ساكت........واوعك تشكريلو حاجة جابها.... ان جاب لك


لحم ختي ايدك فوق راسك وقولي ليه ووب علي ووب علي


ووووب علي غشوك وادوك الجلافيط.....وان جاب لك فتيل ريحة


اول ما تفتحيهو وتشميهو طوالي صرى وشك وقبلي غادي


وابزقي وقوليلو دا شنو يا عااااااااطف؟......الريحة المتل ريحة


الفسيخ دي جايبها من وين؟ غايتو انت مغستك تقد.......


وان جنك نسوان ولا بنات....ما تخليهو يقعد


وسطن....ويتونس.... طيريهو من البيت....وان ابى يمرق...


قدرمايقول ليو نكته ولا يخفف دمو قدامن صري ليهو وشيك....


وقوليلو انت يا عاطف ما عندك غير النكتة دي؟ يا خي عملت لنا


بها وجع وش......أصلهم الرجال عارفاهم... الواحد فيهم من


يشوفلو لمت بنات يقعد يخفف في دمو ويعمل فيها


ودنفاش.....وتلقيهو يضحك بلا سبب... حتى ان واحدة قحت


ساكت ... يقعد يضحك ويصفق اديه و....واوعك تخليهو معاهن


وتدخلي المطبخ تسوي لك شربات .....وحات الله بنات الزمن دا


ان غفلت من راجلك دقيقة بس تلقيها عرستو... ااااااى... اسمعى


كلام امك يا بت حشاى .. امك دايرة مصلحتك .. ااااى !!

تغريد
03-07-2009, 04:56 AM
ههههههههههه الله يجازي محنك يا طائر النورس بس جد النصايح دي عجبتني شديد
خصوصا بتاعت الفندك وكت المسلسل يديك العافية ياخ واكييد البت هسة مع امها في البيت بعد طلقوها

طائر النورس
03-07-2009, 05:05 AM
ههههههههههه الله يجازي محنك يا طائر النورس بس جد النصايح دي عجبتني شديد
خصوصا بتاعت الفندك وكت المسلسل يديك العافية ياخ واكييد البت هسة مع امها في البيت بعد طلقوها



مشكورة يا تغريد على المرور الحلو ده

همسة : هس هس هس ما تقولي كده ماااااا بعرسوك

بت أم درمان
03-07-2009, 09:53 PM
البت دي انا بعرفا ياخ وهسي قاااعدة مع امها في البيت والسبب النصائح دي

حسام التنين
03-07-2009, 10:12 PM
ياطائر النورس ... الكلام ده مايكون جاي من ام المدام

والله لو كان كده طيارتك قامت

هههههههههههههههه

محمد النويري-الفقراء
04-07-2009, 01:41 AM
دي نصائح يا الطائر ولا دمار بيت انا بقرأ في النصائح ومتوقع البنت دي لو بدت تطبق فيها من اول نصيحة بتكون رجعت واتحكرت في بيت امها دي .. تقبل مروري يا رائع

بنت النيل
04-07-2009, 04:29 AM
المره دى بتحب بتها شديييييييييد
ودايراها تقعد معاها في البيت طوالي
شكرا ليك ويديك العافيه

محمد السر
04-07-2009, 08:17 AM
هههههههههههههههههههههههههههههي لقيته في الايميل ولا لقيت نسيبتك بتوصي في مرتك

طائر النورس
04-07-2009, 09:44 PM
البت دي انا بعرفا ياخ وهسي قاااعدة مع امها في البيت والسبب النصائح دي



هههههه دي بتكون مش في البيت دي بتكون رجعت الروضة

ومشكورة على المرور

طائر النورس
04-07-2009, 09:46 PM
ياطائر النورس ... الكلام ده مايكون جاي من ام المدام

والله لو كان كده طيارتك قامت

هههههههههههههههه



تعرف ياخي انا قلبي في يدي وبنوم عين فاتحة وعين مغمده

خائف من دق الفندك ومشكور على المرور الجميل ده

طائر النورس
04-07-2009, 09:48 PM
دي نصائح يا الطائر ولا دمار بيت انا بقرأ في النصائح ومتوقع البنت دي لو بدت تطبق فيها من اول نصيحة بتكون رجعت واتحكرت في بيت امها دي .. تقبل مروري يا رائع



تقبلت مرورك اللطيف

تعرف القصة عاوزة المفتش كرامبو عشان يحلل لينا جات من ياتو مصدر

طائر النورس
04-07-2009, 09:52 PM
المره دى بتحب بتها شديييييييييد
ودايراها تقعد معاها في البيت طوالي
شكرا ليك ويديك العافيه


يا بنت النيل انا شائف طريقة المرة دي بتكون عندها بت واحدة بس لانو راجلها بكون طلقها



من زمان بعمايلها دي .

طائر النورس
04-07-2009, 09:55 PM
هههههههههههههههههههههههههههههي لقيته في الايميل ولا لقيت نسيبتك بتوصي في مرتك


ههههههههه والله لو لقيت نسيبتي بتوصي فيها ( ما كان فرزونا الا بــ ............ )


ومشكور على المرور يارائع