بعض الظواهر السالبة للمغتربين

[عباس الدسيس]

السقوط الاخلاقي انواعه كثيره الذي نحن بصدده التفكك الاسري في دول المهجر والظواهر السالبه لبعض الاسر بقينا نخجل منها كنا بنسمع والسمع دائما احتمال اكون صاح احتمال غلط بتقول اهو ونسه اما تمر بيك مواقف تدعم السمع دي التاكيده للاشاعات.... ما دام احنا في غربة انا بفتكر الناس تمثل بلدها خير تمثيل ... طيب خلينا من كلام الخطب السياسية ده ... معروف في غالبية دول المهجر احياء سودانية تضم اسواق زي العندنا هنا في غبيرا وما ادراك ما غبيرا فيها اسواق منتجات سودانية دائما النساء تتواجد بسوق غبيرا كنت مع المدام في زيارة تسوق استكشافيه وهي تعني ان المدام تكون زهجانه تقول ليك ارح السوق عندي حاجات عايزه اشتريها انت ما بتسأل المشتريات شنو لسبب سوق غبيرا مافيهوا استعمال فيزا والتي يتم استقلالها خير استقلال من قبل المدام بتفتكر الفيزا دي بلاش .... وقفنا في السوق احيانا انا بنتظر في السيارة اذ معاها والدتها بعاين من خلال الزجاج هي بتاخذ معاها العيال انا بتهرب من العيال وذلك تفاديا لاشكالات الاطفال ... امسك الولد ما اكسر الزجاج ... الولد دفق العصير خرب لي الناس الدكان ....... انا واقف بره المحل فجأة جات بت وقفت جمب باب السيارة سلمت علي طبعا انا بسرعه رديت علي البت قلته احتمال عايزه تسأل عن وصف أي سؤال تاني العبدلله متبرع بالمساعده قلته احتمال تاني ممكن تكون البت بتعرفني.... اقول ليكم وصف البت لابسه عبايه من تحت الازرار مفككه تشوف بنطلون الجنز الطرحه مجدوعه جدعه لو دققت تشوف العجب احسن ما ندقق .... قلته اشوفا عايزه شنو البت... عليك امان الله ما قلته كلمه غير السلام كان اشوف ليك المدام فتحت باب العربية تلزلز في الشفع معاها امها... كانت مفاجأة بعد ما ركبت... الجو اتكهرب..... بدون مقدمات خشت المدام... خير يا بت عايزه شنو كنت مفتكر المدام تنتظر البت ترد ولا انا اقول حاجه.....تاني في زول بتكلم ما خلاص الكلام اسيادوا جو....... قالت ليها اسمعي يا بت يا مطلوقه.... البنيه الظاهر ما فاضيه ليها تسمع كلاما ولا الحاصل شنو ما عارف فص ملح ذاب..... بقيت انا الفضلته قلته ليها ليه كده امكن البت عايزه تسال امكن بتعرفنا المدة طالت انا ما قدرت اعرفا ليه العدائية دي... قالت لي اسمع تعرفك من وين دي حالة زول بتاع عرفه بعدين انت كل مره شابكني الزول ده سلم علي بكون شافني في محل قبل كده انت خاشي في وهم عجيب اشتغلت ليك في تلفزيون مدني متعاون اربعة شهور وفصلوكم عايز تعمل لي اوبرا الولد مشهور هو تلفزيون السودان احنا بنعرف فيهوا مذيعين غير بتاع اسماء في حياتنا عرفناهوا لانوا كل ما واحد اموت الناس اقولوا ده كان مع عمر الجزلي قبل كم يوم والله ده كلام عجيب... كمان مرات عامل فيها كنت بتلعب كوره وين في نيل مدني حسي يوم واحد ما سمعنا جابو فريق في التلفزيون اسموا نيل مدني ولا قدر ظروفك .....بعدين هي كان ما شافت العربية الجديدة دي بتقيف ليك بس انت ما اكون مفتكر نفسك وجيه زي الفيس الفنان الامريكي غايتو احيانا عندك وهم غريب.. اقيف لينا هنا جمب الدكان ده ....ولا اقول ليك كلام خلي الاولاد ديل معاك هنا اعمل معاهم لقاء تلفزيوني لو حكيت ليهم زكرياتك الرياضية اكون احسن........ قلته ياخي خليك دي بتاعت مشاكل.... عندي زوج اختي بمشي بقعد معاهوا في غبيرا زي ساعة نص ساعة وامشي منوا عندوا مخابز كنت بقابل راجل علي طول امام المخبز راجل مهندم شكلوا ظريف وجيه وناس.... نشأت بنا علاقة ونسه مرة حكي لي مشكله انسانيه في ايجار السكن بعد مقدمات طويله في النهاية عايز سلف الف ريال إسدد الايجار بعد شهر ارجعها لي ....الراجل من شال مني القروش عيك تاني ما شفتوا سألت نسيبي منوا اخذ ليهوا ضحكه انشغل بي موضوع تاني..... بعد كم يوم وقفت اشتري مويه من بقالة لقيت صاحبي جوه البقالة من شافني بي الاحضان اهلين وين انت الحي بيك ... انا والله انت الماظاهر ....... ياخي انا سالت منك كم مره اتعاقبنا الظاهر الليلة وقت لميت فيك لازم تمشي معاي البيت دي صدفه جميله بعدين لازم تأخذ حقك... انا قلته الراجل ظلمتوا فعلا كان عندوا ظروف أهو عايز ارجع لي قروشي والله قروش حلال دفعت حق المويه ريال بتاع البقاله حاسبوا بي 35 ريال قلته ما دام برجع لي حقي نتظارف شويه دفعته ليهوا حساب البقالة مشينا لي بيتوا دخلنا جوه الراجل قعدني في المجلس مشي جاب لي عصير من الحاجات الدفعتها انا في البقالة؟؟؟؟؟ قعدنا نتونس بعد شويه سمعنا ست البيت الشاي جاهز الراجل جاب الشاي قال لي اسمع الشاي لازم بي بسكويت انا نسيت اجيبوا من البقالة واجي قلته ليهوا امشي معالك قال لي لا يا زول البيت بيتك البقالة قريبة زي ما شايفه ........ الراجل طلع قفل علي الباب بعد خمسة دقائق جاتني واحده لابسه فستان بدون توب سلمت قعدت تتونس........ قلته والله كلام المدام صاح انا موهوم وهم ياهو ده حقي العايز اشيلوا.......... بقيت زي حكاية الراجل البسأل فيهو ولدوا قال ليهوا : بابا حنا من وين جينا ؟
فكر الأب إنه يقول للولد عيب عليك ولما تكبر تعرف كل شي .. لكنه قرر إنه يعطي الولد درس في الثقافة الجنسية ؟؟؟؟
ويعلمه الحكاية من أولها لآخرها عشان مافي واحد يضحك عليه ..
وقعد يشرح له بالتفصيل .. إن الله خلق الناس ذكر وأنثى .. ورجال ونساء .. وعلشان نحافظ على السلالة البشرية
لازم يتكاثروا .. وعشان يتكاثروا لازم يتزوجوا .. وبعدين أنا وأمك تزوجنا و ..... الخ .
وفي النهاية سأل الأب ولده : بعد ما عرّفتك على كل شيء ليه بتسأل هذا السؤال يا حبيبي ؟؟
قال الولد :
لأن صديقي الجديد في المدرسة " ناصر " قال هم جايين من الفاشر!!

[esmat]

عباس الدسيس

ياخ متعتني متعة غريبة

انا تاني ما بقراء ليك وانا في الشغل

عايز تفصلني ولا شنو ياخ

[عباس الدسيس]

حبيبنا عصمت متع الله عمرك بكل جميل ومتشكرين علي المرور

[GREY MAN]

يا سلام يا عباس ........
رااااااااائع

[عباس الدسيس]

Grey man متشكر يا رائع بمرورك الكريم

[moh_alnour]

الحبيب ود الدسيس
أسلوبك مشوق في السرد و التطرق لموضوعات عديدة داخل البوست الواحد
و لكن أتمنى ألا تكون الصورة بهذه القتامة
فما ذكرت من مواقف هي ممارسات فردية لا يمكن تعميمها على كل السودانيين بالمملكة
اللهم أحفظنا في مالنا و عرضنا و ديننا و أنفسنا و أهلينا
اللهم أسترنا في الأرض و تحت الأرض و يوم العرض

[عباس الدسيس]

حبيبنا ود النور اكيد ليس هنالك تعميم ومن عنوان البوست ذكرنا بعض الظواهر السالبة والبعض هو جزء ليس مكمل وربنا احفظنا في غربتنا زي ما قلته انت .... اللهم امين... مع خالص شكري وتقديري لمروركم الكريم

[الخواض محمداحمد خواض]

شى مؤسف ياود الدسيس إذا كانت فعلاً قصه حقيقيه

[ابوالنور]

تسلم يا ود الدسيس علي السيرد الرائع بروعتك

[عباس الدسيس]

الاعزاء الخواض - ابو النور شكرا مربع علي المرور مع خالص تحياتي

[محمد الجزولى]

اوفي النهاية سأل الأب ولده : بعد ما عرّفتك على كل شيء ليه بتسأل هذا السؤال يا حبيبي ؟؟
قال الولد :
لأن صديقي الجديد في المدرسة " ناصر " قال هم جايين من الفاشر!!

هههههههههههههههه
مبالغه يا عبس
والله بضحك لى نص ساعه
يديك العافيه ايها الرائع
فقلمك ملئ بالتوابل التى تجعل للقراءه متعه ..

[عباس الدسيس]

شكرا يا الحبيب محمد الجزولي علي المرور

[saadabi]

والله ربنا يحفظ الجميع

[محمد النويري-الفقراء]

اجبرتني اخي عباس بهش قصتك حرفا حرفا .. جد كلام مرات كتيرة بشوفو لما امشي غبيرا حاجات تحير وحاجات ترفع ضغط القلب للدرجة القصوي وللاسف بعض ذكرتني مرة كنا معزومين مناسبة وانت عارف الحفلات السودانية ( المختلطة ) بعشوائية في بعض الأحيان والله دخل علينا واحد معاهو زوجتو وبنتين من بناتو . لو شفتهن بتقول ديل ماعندهن والي او واحد اهديهن من طريقة مشيتهن ولبسهن وللاسف ابوهن في نصهن !!!!!!! تركنا الحفلة والكلام دا بدون نفاق لان الحفلة اصبحت غير تلك الحفلات التي تعرفها .. تقبل مروري

[عباس الدسيس]

الاعزاء سعدابي - محمد النوير
سلامي وتحياتي متشكرين علي المرور والاضافة

[عبدالله محمد العقاد]

... انت خاشي في وهم عجيب


ههههههههههههههههههه

الرائع ود الدسيس

الحريم عندهم مقدرات عجيبة على احباط الشباب منا أذا جازت كلمة شباب

ذكرتني كلما احكي لام محمد ايام الشباب و مغامرات و كيف كان بنات الفريق معجبات

طوالي تقول لمحمد الله يديه العافية

محمد قوم في مية ريال في الدولاب جيبها خلي ابوك يفكها لينا ريالات

قاصدة انا فاكيها في روحي شوية

بوست رائع اخوي عباس و لكن هذه ليست مظاهر سالبة للمغتربين و انما نحن كسودانيين لما اغتربنا حملنا معنا مجتمعنا بكل ايجايباته و سلبياته

أذكر مرة في نهاية الثمانينات خالي اداني عربيته و قال امشي مع مرته السوق تشتري اغراض من عمارة ناس عبدالله احمد عبداللطيف في اتجاه واحد
اتفقت معه ح انتظرها في العربية
و انا منتظر في العربية في اتجاه واحد بعد المفرب كدة
فجاة باب العربية يفتح و تركب بت شابة
انا افتكرتها من بقية اهلى و عرفت العربية و جات على هذا الاساس
و بعد ما ركبت العربية و عاينت في وشها

قلت ليها بعد ما استوعبت الحاصل : عايني انا منتظر أمي

البت ضحكت و نزلت و قفلت الباب

فالمشكلة مافي المغتربين و انما المشكلة في مجتمعنا كسودانيين

تحياتي

[عزيز عيسى]

انت كل مره شابكني الزول ده سلم علي بكون شافني في محل قبل كده انت خاشي في وهم عجيب
عزيزي الأخ عباس الدسيس الزول الحكاي،
صدفة غريبة تصدق نفس الكلام دا دائما بسمعه من المدام لما إلتقي
لي بواحد يسلم علي وأقول ليها ما بعرف إسمه لكن بيكون شافني
في محل قبل كدا.
إفتكرت نفسي(خرفت) وشخصي الوحيد بيقولوا ليه الكلام دا..
لكن الحمد لله لقيتك معاي في الهم سوا.

مازلت أحتفظ في ذهني بالصورة المثالية التي كان يتمتع بها السودانيين
في المملكة عامة أيام زمان والسمعة الطيبة التي يمتازون بها دون بقية
الشعوب الأخرى التي تقيم في المملكة.. أما الآن إختلف الوضع وأسمع
من وقت لآخر عن بعض التصرفات الفردية التي تشين سمعة السودانيين
ككل وأحزن لما آل إليه الحال.. نسأل الله السلامة والستر.

[عباس الدسيس]

العقاد - عزيز ... يا حبايب متشكرين علي المرور والاضافة الجميلة مع خالص ودي وتقديري

[أبوحراز]

أخي عباس
كل البيوت التي بها مثل هذه الظواهر تفتقر للرجال
ويؤسفني بعض المغتربين ينامون بالبيت بينما تخرج الزوجة للحنة وغيرها 00
وليس جميعهن على خطأ فمنهن من تعمل داخل البيت
بينما بعضهن يعملن خارج البيت في ظروف مريبة
كذلك بعض الرجال يعرف انه ليس له دخل
ولكن المراة تأتي بكل شيء هذا شيء مؤلم
قابلت احدهم 00 اعرفه واعرف زوجته بالسودان وليس هنا
كنت اراجع أحد الصرافات الخاصة
جاء صاحبك طول وعرض وشوارب
وحينما أخبره الصراف بان المبلغ لم يصل زهج لدرجة غير عادية
وكاد يكسر كل ما بالمكتب
زوجته تعمل هنا وقالت انها تعمل شاي داخل البيت
وتعبيه في سرامس وتوزعه للمطاعم
كلام لايركب في الراس نهائيا
يعني حتى لو قالته لحمار برضو حايهز ضنبو
الزولة دي بنت البيت والثلاجات كبير وصغير طويل وعريض
اما الذهب فيا حسرتي
وحينما تأتي للسودان تخرج الحادية عشر مساء
وولدها في الجامعة سمعته بأذني يقول لها { يمة جيبي لينا معاك باسطة }
00هناك مع هذه الظاهرة توجد بعض العصابات من بعض النساء السيئات
يعني الواحدة تأتي للسعودية وتكون بت ناس
تلم فيها الملعونة دي وتغير ليها كل مفاهيمها
قبل فترة عريس لم يمض على زواجه شهرين طوالي سفر اولاده نهائياً
لأنو واحدة سيئة حاولت تغريها
المهم فكت الكثير من شفرات العروس
ولكن تدارك العريس الموقف حينما شم بعض الأخبار
وحينما واجه العروس اعترفت بذلك

في مدينتنا سمعت قبل فترة بان سودانية حضرت الينا
ومنطقتنا محافظة وهي صغيرة جداً
حضرت هذه السودانية برفقة سعودي وسوداني
اتوا بها من أجل أن يكسبوا من ورائها
اتصل علي رئيس الجالية وأخبرني بالموضوع
وحينها عملت كل احتياطاتي للتأكد من الموضوع وتسليمها للشرطة هي ومن أتوا بها
فطلبنا من صاحب وايت التأكد من ذلك لأنه يصب الماء لنفس البيت
وبالفعل أتته وفتحت له الباب وكان ذلك بعد اسبوع من حضورها
وتأكد من كل المعلومات وذكرت له أن السعودي يريد أن يتزوجها عن طريق القنصلية
المهم ابلغني بذلك وقررنا قبل الذهاب للشرطة ان نلتقي بالسعودي
ونعرف كل مايحدث وهل هناك عقد رسمي ام لا
وتردد اخونا كثيرا
وفي اليوم التالي غادرتنا نهائياً
أخي يجب علينا ان نحارب مثل هذه الظواهر فنحن الرجال لدينا دور كبير في ذلك


لكن المشكلة هنا الا تجيب اربعة شهود
ولو ما اتيت بهم مثل صاحبنا امام المسجد الذي بلغ عن جارة لهم تقوم بهذه الأعمال
ومنحه القاضي شهر كامل لياتي بشهوده
وفي النهاية لم يستطع رغم أنه يعرف الزبائن الذين ياتون اليها بأسمائهم الحقيقية
وكلهم أنكروا في النهاية
واخيراً ذهبنا الى الجامع الكبير حيث قرر القاضي جلد الإمام 80 جلدة بتهمة القذف
قسموا له الجلد على اربع مرات كل جمعة يتم جلده عشرون جلدة
باقي ليك صاحبنا حايبلغ تاني ؟؟

[ام قبس]

الاخ عباس القصة حركت مياة كثيرة راكدة فالغربه البقت ماسترة حال
ورغم انك اضحكتنا كثيرا ولك سريعا ماتحولت تلك الدموع الي حزن علي انصاف الرجال الذين يرضون باشياء لا الله ولا رسوله يقبلون بها
ولكن هذا ليس في الخارج وحدة فقد تغير الحال بالسودان ايضا وصارت هنالك ظواهر غير حميدة
ولا اعني اللبس او عمل المراة في الحنة او شي من هذا القبيل
فكل هذا الاشياء اعتبرها شخصية بحته والمعايش جبارة
ولكني عنيت الابتزال والتقليد لاشياء تضر اكثر مما تنفع تنتقل من العالم الخارجي الي عالمنا بسرعة البرق
وربنا يحفظ بناتنا وقبلهم اولادنا وجميع اهلنا الطيبين

[مدنيّة]

لا حول ولا قوة الا بالله

فعلا يادسيس
بنسمع بالعجب العجاب

ربنا يحفظنا وجميع المسلمين

[سلسول]

لا حولا عليك الله جد الحكاية دى ولا قصة بس؟؟؟؟؟؟؟

[سودانية وافتخر]

سلمت يداك اخيـ ... وربنا يهدي الجميع يارب

[عمران حسن]

السقوط الاخلاقي انواعه كثيره الذي نحن بصدده التفكك الاسري في دول المهجر والظواهر السالبه لبعض الاسر بقينا نخجل منها كنا بنسمع والسمع دائما احتمال اكون صاح احتمال غلط بتقول اهو ونسه اما تمر بيك مواقف تدعم السمع دي التاكيده للاشاعات.... ما دام احنا في غربة انا بفتكر الناس تمثل بلدها خير تمثيل ... طيب خلينا من كلام الخطب السياسية ده ... معروف في غالبية دول المهجر احياء سودانية تضم اسواق زي العندنا هنا في غبيرا وما ادراك ما غبيرا فيها اسواق منتجات سودانية دائما النساء تتواجد بسوق غبيرا كنت مع المدام في زيارة تسوق استكشافيه وهي تعني ان المدام تكون زهجانه تقول ليك ارح السوق عندي حاجات عايزه اشتريها انت ما بتسأل المشتريات شنو لسبب سوق غبيرا مافيهوا استعمال فيزا والتي يتم استقلالها خير استقلال من قبل المدام بتفتكر الفيزا دي بلاش .... وقفنا في السوق احيانا انا بنتظر في السيارة اذ معاها والدتها بعاين من خلال الزجاج هي بتاخذ معاها العيال انا بتهرب من العيال وذلك تفاديا لاشكالات الاطفال ... امسك الولد ما اكسر الزجاج ... الولد دفق العصير خرب لي الناس الدكان ....... انا واقف بره المحل فجأة جات بت وقفت جمب باب السيارة سلمت علي طبعا انا بسرعه رديت علي البت قلته احتمال عايزه تسأل عن وصف أي سؤال تاني العبدلله متبرع بالمساعده قلته احتمال تاني ممكن تكون البت بتعرفني.... اقول ليكم وصف البت لابسه عبايه من تحت الازرار مفككه تشوف بنطلون الجنز الطرحه مجدوعه جدعه لو دققت تشوف العجب احسن ما ندقق .... قلته اشوفا عايزه شنو البت... عليك امان الله ما قلته كلمه غير السلام كان اشوف ليك المدام فتحت باب العربية تلزلز في الشفع معاها امها... كانت مفاجأة بعد ما ركبت... الجو اتكهرب..... بدون مقدمات خشت المدام... خير يا بت عايزه شنو كنت مفتكر المدام تنتظر البت ترد ولا انا اقول حاجه.....تاني في زول بتكلم ما خلاص الكلام اسيادوا جو....... قالت ليها اسمعي يا بت يا مطلوقه.... البنيه الظاهر ما فاضيه ليها تسمع كلاما ولا الحاصل شنو ما عارف فص ملح ذاب..... بقيت انا الفضلته قلته ليها ليه كده امكن البت عايزه تسال امكن بتعرفنا المدة طالت انا ما قدرت اعرفا ليه العدائية دي... قالت لي اسمع تعرفك من وين دي حالة زول بتاع عرفه بعدين انت كل مره شابكني الزول ده سلم علي بكون شافني في محل قبل كده انت خاشي في وهم عجيب اشتغلت ليك في تلفزيون مدني متعاون اربعة شهور وفصلوكم عايز تعمل لي اوبرا الولد مشهور هو تلفزيون السودان احنا بنعرف فيهوا مذيعين غير بتاع اسماء في حياتنا عرفناهوا لانوا كل ما واحد اموت الناس اقولوا ده كان مع عمر الجزلي قبل كم يوم والله ده كلام عجيب... كمان مرات عامل فيها كنت بتلعب كوره وين في نيل مدني حسي يوم واحد ما سمعنا جابو فريق في التلفزيون اسموا نيل مدني ولا قدر ظروفك .....بعدين هي كان ما شافت العربية الجديدة دي بتقيف ليك بس انت ما اكون مفتكر نفسك وجيه زي الفيس الفنان الامريكي غايتو احيانا عندك وهم غريب.. اقيف لينا هنا جمب الدكان ده ....ولا اقول ليك كلام خلي الاولاد ديل معاك هنا اعمل معاهم لقاء تلفزيوني لو حكيت ليهم زكرياتك الرياضية اكون احسن........ قلته ياخي خليك دي بتاعت مشاكل.... عندي زوج اختي بمشي بقعد معاهوا في غبيرا زي ساعة نص ساعة وامشي منوا عندوا مخابز كنت بقابل راجل علي طول امام المخبز راجل مهندم شكلوا ظريف وجيه وناس.... نشأت بنا علاقة ونسه مرة حكي لي مشكله انسانيه في ايجار السكن بعد مقدمات طويله في النهاية عايز سلف الف ريال إسدد الايجار بعد شهر ارجعها لي ....الراجل من شال مني القروش عيك تاني ما شفتوا سألت نسيبي منوا اخذ ليهوا ضحكه انشغل بي موضوع تاني..... بعد كم يوم وقفت اشتري مويه من بقالة لقيت صاحبي جوه البقالة من شافني بي الاحضان اهلين وين انت الحي بيك ... انا والله انت الماظاهر ....... ياخي انا سالت منك كم مره اتعاقبنا الظاهر الليلة وقت لميت فيك لازم تمشي معاي البيت دي صدفه جميله بعدين لازم تأخذ حقك... انا قلته الراجل ظلمتوا فعلا كان عندوا ظروف أهو عايز ارجع لي قروشي والله قروش حلال دفعت حق المويه ريال بتاع البقاله حاسبوا بي 35 ريال قلته ما دام برجع لي حقي نتظارف شويه دفعته ليهوا حساب البقالة مشينا لي بيتوا دخلنا جوه الراجل قعدني في المجلس مشي جاب لي عصير من الحاجات الدفعتها انا في البقالة؟؟؟؟؟ قعدنا نتونس بعد شويه سمعنا ست البيت الشاي جاهز الراجل جاب الشاي قال لي اسمع الشاي لازم بي بسكويت انا نسيت اجيبوا من البقالة واجي قلته ليهوا امشي معالك قال لي لا يا زول البيت بيتك البقالة قريبة زي ما شايفه ........ الراجل طلع قفل علي الباب بعد خمسة دقائق جاتني واحده لابسه فستان بدون توب سلمت قعدت تتونس........ قلته والله كلام المدام صاح انا موهوم وهم ياهو ده حقي العايز اشيلوا.......... بقيت زي حكاية الراجل البسأل فيهو ولدوا قال ليهوا : بابا حنا من وين جينا ؟
فكر الأب إنه يقول للولد عيب عليك ولما تكبر تعرف كل شي .. لكنه قرر إنه يعطي الولد درس في الثقافة الجنسية ؟؟؟؟
ويعلمه الحكاية من أولها لآخرها عشان مافي واحد يضحك عليه ..
وقعد يشرح له بالتفصيل .. إن الله خلق الناس ذكر وأنثى .. ورجال ونساء .. وعلشان نحافظ على السلالة البشرية
لازم يتكاثروا .. وعشان يتكاثروا لازم يتزوجوا .. وبعدين أنا وأمك تزوجنا و ..... الخ .
وفي النهاية سأل الأب ولده : بعد ما عرّفتك على كل شيء ليه بتسأل هذا السؤال يا حبيبي ؟؟
قال الولد :
لأن صديقي الجديد في المدرسة " ناصر " قال هم جايين من الفاشر!!



موضوع قيم

اسال الله ان يهدينا جميعا