عرب مدني

[hwida]

أخواني في المنتدي
السلام عليكم ورحمة الله وبركاته
اولاً سمعت لي معلومة بتقول ان القسم الاول مخطط علي العلم البريطاني ياتري الكلام دا صاح ولا غلط ؟
ثانياً اذا كانت ناس الخرطوم بقيسوا الحضارة كدا؟ نفتخر كل الفخر اننا نكون عرب الجزيرة وعرب مدني كمان
قصتي مع عرب مدني مع واحدة من بنات اهلي ساكنة في الصحافة وهي ماشة في السوق العربي واحد سرق الموبايل بتاعها وجري .......... طبعاً قريبتي صرخت مافي زول جاب خبرها الا واحد شهم جري ورا الحرامي ولحقه وضربه ورجع ليها الموبايل كان جزاه انو واحد من عرب الجزيرة رجع لي موبايلي (طلع الواحد دا من اولاد مدني حي دردق بالتحديد ) ماهو مقاس الحضارة عندكم يا ناس الصحافة ؟؟؟؟؟ انا فخورة جداً جداً جداً باولاد مدني العرب واتحدي بيهم كل المتحضرين
ياتري ماهو مقياس الحضارة عندهم ؟؟؟؟؟؟
معليش قريبتي ما بمتثل كل الصحافة لكن استفزتني

[عوض الكريم الخواض]

وهل هنالك ( فخرٌ) ...
أكبر من أن نوصف نحن بخير (جنس خلق فى الأرض) ...
انهم ( العرب) ...
وقد اختصهم المولى بخير الرسل ...
ويا فخرنا بعروبيتنا ...

والتحية لأخى ( العربى ) الذى لبى ندآء الشهامة والرجولة والنجدة ...
فهكذا أهل مدنى والجزيرة أهل خير ومروءة .

[سيد البلد]

أكثر الذي لاحظته في سكان العاصمه
هو ضعف صلاتهم ببعضهم , فلا نجد عندهم ما نجده عند " العرب "
أو ناس " الولايات " على حد تعبيرهم .
فلا يعرفون ما هو النفير , ولا الفزعه , ولا " عصر الفراش " ولا صينية " البكا "
ولا عمود " المستشفى "

ومن الأشياء التي يفتقدها مجتمعنا , مع إنها ما زالت موجوده مع قلتها
المروءة التي عرف بها السودانيون عامةَ وأهل " العوض " بصفة خاصة

[المكاشفى]

هيع هيع هيع
والله عربى نجيض جنص نجاضه
وعلى قول العربى قولى لى ناس السخافه
انتو كان مستعربننا نحن متحنكشنكم ... وبس

فخرنا وعزنا ياهويده فى عروبتنا وزى ماقالو
اخوانى الفوق الماخلولى شيتا اقولو

موووزه:- البت دقوها ولا لسه

[علي محسن]

اختي ... ناس مدني اصيلين
والخرطوم دي مافي زول اصلو من الخرطوم اسالي اي واحد اصلو من وين ....
وزي مافي عرب الجزيره في عرب الخرطوم وعرب عطبره بلدنا كلها عرب ... الا من ابا اللشوف اصلو شنو ومن وين ... ونسأل الله السلامه

[الخواض محمداحمد خواض]

عربى وافتخر

الاخت هويدا

لك منى التحايا

اريد ان اوضح لك بان الانجليز وضعوا خريطة علمهم فى كل مدن السودان إبتداءاً من الخرطوم ومدنى وكوستى ومدن اخرى وفى مدنى وحدها علمان واحد بصينية بنك الشمال والآخر بتقاطع مدنى السنى .

اما بالنسبه لموضوع عرب الجزيره بكل اسف الواحد منا عندما يقولوا ليهو عربى بيزعل والمفروض كل واحد منا يفتخر بكونه عربى ليس لى شى إلا لكون سيدنا محمد صلى الله عليه وسلم عربى . فنحن عرب الجزيره طيب ناس الخرطوم خواجات شنو

لك شكرى

[بنت الرفاعي]

عرب عرب عرب.
ناس ماعندها فهم اللي بتتكلم بصيغة ده عربي وده .......... وده ........!:confused::eek:
لأنو نحن في الآخر شي واحد منه وإليه.
وإذا جينا على حكاية عرب الجزيرة زي مابيقولوا ليهم بصفة عامة يعني , فأكيد أكيد في الشهامة في العاصمة مابتلقى زيهم من أولاد العاصمة إلا من رحم ربي.!!!

[محمود (أبو وضاح)]

هى ليست بالصفة المزمومة لأنها أصل هذه الأمة المسلمة فالقرآن نزل بلسان عربى وليس أى لسان آخر ، وحتى لا يسمعونا أهل جنوبنا الحبيب حجتهم بأنه الصراع أصلا صراع (عرب وأفارقة) ، ومن هناك أهل الغرب أيضا هو اختلاف (عرب - زرقة) ، فنقول يكفينا فخرا أننا عربا حتى ولو لم يعترف بنا الآخرون من الجنسية العربية بحكم بشرتنا السمراء (لبنان على وجه الخصوص) !!!
أما ما يتفوه به أهل الخرطوم فهو عار من الصحة لانهم خليط مهاجرين من مختلف الأقاليم والولايات بل والقرى والآرياف (لحم رأس) بالبلدى .

[ابوخالد]

عرب عرب عرب.
ناس ماعندها فهم اللي بتتكلم بصيغة ده عربي وده .......... وده ........!
لأنو نحن في الآخر شي واحد منه وإليه.
وإذا جينا على حكاية عرب الجزيرة زي مابيقولوا ليهم بصفة عامة يعني , فأكيد أكيد في الشهامة في العاصمة مابتلقى زيهم من أولاد العاصمة إلا من رحم ربي.!!!
]

تسلمى اخت moram...

ومشكورة على الثناء الرقيق هذا..
ـــــــــــــــــــــــــــــــــــــــ

ومشكورة أخت hwida.... على الموضوع الرائع الذى يعكس

حبك وغيرتك على أبناء الجزيرة بصفة عامة ..........

بالنسبة لتخطيط القسم الأول .. تم التخطيط على أساس إنشاء

حى نموذجىBritish style ..... بعنى مراعاة الإشتراطات البيئية

ـ العناية بأعمال التشجير ـــ توسعة الشوارع ــ عمل الحدائق العامة

والمنتزهات لسكان الحى ... مثله ــ الحى السودانى وبركات والبحوث

الزراعية ــ يعنى الخواجات كانو بيفتكروا إنهم خالدين أبدآ ....

وكما ذكر أخى الرائع / الخواض

تصميم بعض الدوارات (الصوانى) كشكل العلم البريطانى .. وأضف عليها

دوران بانت جوار زاوية الختمية ..

ولكم جميعآ عاطر الود والإحترام