المساعد الشخصي الرقمي

مشاهدة النسخة كاملة : للاولاد وبس (الجركاسه)



ضياء الدين احمد
19-11-2004, 04:58 PM
امكن اكون الموضوع غريب شويه وهو عن (الجركاسه) او (اللباده) وهي عباره عن اسفنج او قطع اقمشه محشوه وتخاط مع بعضها البعض واحيانا قد يذهب التفكير لمشاركة شارع الظلط في ايطارات السيارات حيث يُستخدم اللستك الجواني كجركاسه بعد ان يشقق الى شرائح حتى لا تُصدر صوت ويُفتتضح امرها ‘ والجركاسه مهمتها عزل الألم او تخفيفه من وقع السوط علي الجسد ‘ويكثر استعمالها دائما يوم السبت ذالك اليوم الذي يكثر فيه الجلد بسبب وبدون سبب ففيه يكون تفتيش الكراسات والملابس وحل تمرين الحساب والاسبلن وعدم دفع الرسوم ايضا ‘اذا هو يوم الاستهلاك والتداول للجركاسات وهنالك نوع معين من الطلبه تتواجد معه باستمرار وهذا النوع تجده ماهر جدا في صناعة اللبادات القطنية منها والجلديه يهتم بها اكثر من اي شئ آخر وغير قابله للتسليف نهائياً فهو بحاجة لها دائما كما تجده (سايكلوجست) درجه اولى اذ ما ان يبتدئ المعلم في ضربه حتى تجده يضع يديه في مؤخرته ويذهب جيئة وذهابا في الفصل امام السبوره متصنعا الالم الشديد وذلك حتى لايفتضح الاستاذ امره لانه ان حدث ذلك فالعقاب سيكون مضاعف ‘وقد تمر ايام تكون فيها (كشه ) عامه للجركاسات شبيهة بكشة ستات العرقي وسرعان ما تكوّم باعداد كبيره امام السبوره ودائما ماتكون للصفوف الاخيرة نصيب الاسد في ذلك وكل الجركاسات التي صُودرت هي من النوع المتحرك او المؤقته اذ هنالك نوع دائم مخاط على الردا وذلك لايستخدمه الا المحترفين. فهل يوجد منكم ياشباب من كان محترفا او هاويا ام انكم من اصحاب المقاعد الاماميه ارجو ان يكتب كل منكم عن تجربته ان وجدت او مواقف طريفة حدثت كما ارجو ان تفكروا معي في جركاسه تقينا من سوط اللسان فهو اشد ايلاماً وخاصة بعد الزواج فدعونا نعد العدة قبل ذلك ولكم تحياتي

aborawan
19-11-2004, 10:14 PM
انا غايتو ما عندي اى ذكريات مع اللبادة لاني قريت بره السودان :):)

مشكور اخوي

عماد الصادق
20-11-2004, 04:57 AM
أخي .. صراحة نحن من ناس الصفوف الأولى!!!!
لكن بدي أعرف .. للعلم .. ولأني مهتم .. المراحل الدراسية
التي درسها خارج السودان .. يمكن نلقى ليهو أولاد دفعة!!!
مع التحية أبو أشوااااق

ضياء الدين احمد
22-11-2004, 04:09 PM
والله تلقاك يا عماد من النوع البخيطها في الردا وبعدين انت لو قاعد في المقاعد الاماميه ناس لؤي وهيثم اقعدوا وين؟

عماد الصادق
23-11-2004, 05:48 AM
يا ضياء الدين .. يا أخي العزيز إسمي عماد ومن مواليد 1958 وعاوزيني أكون في الصفوف الخلفية!!! على كل مازلت في انتظار الرد من أبوروان .. اللي درس بره .!!. وين في بلاد بره ؟؟؟ بدنا نعيد الذكريات!!! بعدين في زمنا كانو بيقولو ليها الكركاسة .. على ما اعتقد .. وجركاس ده كان يطلق على الكلب .. الله يكرمك ويكرمنا .. وتحياتي أبوأشواق

ابو الدهب
24-11-2004, 01:04 PM
يا ضيااء ايه الجركسانة واللبادة دا كلام الشمامشة خليك حضاري وقول جربكس ولبااااااااااانة

عزيزي
تحياتي
الذهبي

ضياء الدين احمد
24-11-2004, 01:59 PM
والله يا بو الدهب قالوا لي لو مشيت السودان ما حتفهم اي حاجه الكلام كلو بقي مصطلحات يعني الواحد اكون قاعد مع شله ادوروه وهو الغبيان اضحك‘ الله استرنا من الدوير

أبوبكرحامد
01-03-2006, 02:37 AM
دى ذكريات تصلح لبرنامج من الأمس

مكتول مدنى
03-03-2006, 07:19 AM
الله انا ماجربتها فى الاساس لكن مرة مرة كدة فى الثانوى وفى الصف الثالث بس الواحد بخت الكراس لان انا كنت هاوى ما محترف ومرات كدة يلبس ليه 5 اردية تحت البنطلون

rasheed
04-03-2006, 12:13 AM
والله يا ضياء أمرك عجيب !!! يا أخوي أنت قريت وين ؟؟ والله أنا لما قريت الموضوع أعتبرتوا اللباد بتاع سرج العجلة والجركسانة يعني الجركس بتاع جنزير العجلة يعني أعتبرت الموضوع كلو عن العجلة 00 لكن يا خ بالغت عديل 00 وبعدين نحن كنا جعليين عديييل وما بنخاف من الجلد وزي ما حكيت قبل ده في ذكريات الأهلية (أ) أنو ما خد 18 سوط في يوم واحد ،، بس أسبوع ما قادر أقعد ،، لكن الظاهر عليك من الحلب يا ضياء وقريت في فريني ولا الدرجة ما عارف وبعدين تميتها في شدو والله حكايتك دي ما بحكيها زول ساكن الدرجة ،، كنت تخليها لينا نحن ناس حي البان ولا جبرونا ولا المزاد يعني الأحياء المغلوب على أمرها في ذلك الزمن ولا كيف يا ود المأذون ؟؟؟؟ بعدين عماد قرأ بالردا صحي صحي ما تشوفوا ،، وكان ود تجار وبعدين كانوا كبار رجال عديل كده يعني الواحد كان بارى ناس أبوه في السوق كان يكون عندو زي سبعة أولاد وثلاثة بنات كده ،،

سواااح
04-03-2006, 11:36 AM
الجركاسة من تراث الطلاب الذي لا يمكن التنازل عنه مهما تقدم الزمن
وحتي ان تطورت اساليبها فان المسمي يبقي واحد

مشكور استاذ

ضياء الدين احمد
09-03-2006, 05:08 AM
او آسف كتير جدا علي عدم الرد لفتره طويله وهي بسبب غيبتي عن المنتيات او النت بصوره عامه وشكري الي الاخ مكتول هواك بس سؤالي ليهو الكراس البختو بتاع شنو؟ كما يسعني جدا ان التقي باخي مجددا رشيد ويارشيد انا قريت في الدرجه بس الشطار ما بخلو من الجلد وغايتو في اليوم داك بنستلفها من الشفوت القاعدين وراء
وايضا شكري لسوا 7 ولكم ودي