الفاصل التاني مدهش

[الفخيييم]

جمعتني مكالمة هاتفية مع احد اصدقائي00بعد ان طمنته وطمني علي الاحوال 00اخذنا نتجاذب اطراف الحديث00حكي لي عن مناسبة زواج لاحد جيرانهم بالحي00قام احد الشباب بتقديم الحفل بصورة رائعه وقد كان اول المتقدمين للفاصل الاول الفنان منير حسن الشهير بمنير البحوث وهو معروف انه يتغني باغاني جميلة وطرب اصيل يزكرك بالزمن الجميل 00الاغنية الاولي كانت خمسة سنين والتانية اربعه سنين روائع الاستاذ الموسيقار ابواللمين00وكانت اغلب الاغاني علي هذه الشاكلة00المدهش فعلا انو اغلب الحضور تسرب اليهم الملل والنعاس منهم من غادر برفقة اسرته ومنهم من نام علي الكرسي00المهم الفاصل الاول انتهي بخيره وشره00تعالو شوفو العجب وطمبل كمان00قام نفس الشخص بتقديم الفنان الاستاذ كمان يدعي حمادة بت00استوقفت صديقي اثناء محادثته لي يا اخونا انت قلت حمادة ومعاهو بت قال لي معقولة ما عارفو حمادة بت ياخ قلت ليهو اسمو كده قال لي اي قلت ليهو نسأل الله السلامة 00واصل واتحفنا طبعا الحضور في الحفل كانو قمة من ذوي الجلاليب والشالات والعمامات الكبيرة حينما تراهم يتبادر الي ذهنك انهم فتحو شيكان او صنعو تأريخنا00المؤسف انهم جدعو شالاتهم وهاك يا رقيص مع اغاني حمادة الكان طابعها كلها ورا ورا وقنبلة وسجم المرة وكده من انواع المهازل والسقوط في الفن الاصيل00هل ممكن تسمح بانو يغنو ليك اغاني زي الشاكلة دي في بيتكم؟ والرجال الكبار عمادة اسرهم بتراقصو كأنهم ابناء العشرين ربيعا ديل يقولو عليهم شنو اولادهم شايفنهم بيتراقصو ح يطلعو شنو هم وتساؤلات لا حصر لها افيدونا الله يديكم العافية00

[esmat]

شكلك يا اخوي طولت من السودان كحالنا
ونحمد الله ان استمتعنا بالاغاني الجميلة
يترنم بها المبدع عمر جعفر ونسمع كثراً
عن تدهور الاغاني وتداول الهابط منها واتجاه
الناس له فقد فقدت الشارع السوداني حسن
الاستماع للاغاني إلا قليلا ونخاف من ان تندثر
هذه الحقبة وتأخذ مكانها (كما تفضلت) وتشجيع
(فناني الورا) وموت العمالقة إلا من شرائط الكاست
إن وجدت فأخاف ان يتم مسحها لتسجيل الجديد فيها
فهي لم تعد تواكب (الشحم دا)
الفخيم حبيب الروح مشتاقين

[الملكة اسماء ( ام محمد )]

اسمح لي سيدي ان احجز الكراسي القدام في( الحفلة ):eek::confused::p اقصد في النقاش:p
تطرقت لموضوع مهم جدا
الاغاني الهابطة والتدني الواضح في مستوى الاغنية السودانية عموما
للاسف اصبح هو اللون السائد , والمؤسف اكثر ان الاجيال الحديثة كلها لا تحفظ كلمات اغاني عمالقة الفن ولا تحفظ من باب اولى الكلمات الاصيلة واللائقة , واصبح جزء اساسي من الحياة اليومية ( جديد الغناء) الذي لا يمت للطرب بصلة

مع الاعتذار الشديد لوجهة نظرك حول فنان الحفلة اسمح لي اديك معلومة , للاسف الشديد فعلا اغاني عمالقة الفن ( بتنوم ) في حفلة يفترض فيها البهجة والانغام السريعة , فتخيل معي ان تكون قاعد وبتستمح لاغاني تليق مع من يفضلون الاستماع والتآمل في الكلمات ...


اما اسماء الفنانين حديثا فهي فعلا وللاسف لاتليق ابدا بمجتمعنا ( لكن نعمل شنو لو سيد الاسم راااااضي ؟)
وكلمات الاغنية عادة تكون ( فورية التحضير ) يعني تلقى الفنان او الفنانة او بالاحرى ( المغنى او المغنية ) ( بلتقوها ) يعني تسمع كلمات كدا فجاءة تكتشف انه الماسك المايك بتونس بالمشهد القدامه في ( الدارة )


بقي ان نحارب كل تلك الظواهر بتعويد ابنائنا انتقاء الاغنية التي تناسب اعمارهم وتكون ذات دلالات ومعاني واضحة غير خادشة للحياء والذوق العام


واخيرا
اسمح لي ان اشكرك للتطرق لموضوع هو ذو اهمية قصوى ونحن نتجاهله فيما يسمى ( مواكبة للموضة )
تقبل مروري

[أبوحراز]

حفلات مقرفة ياخي
لكن لو انت زول عاقل
بس يوم يكون في حفلة على هذه الشاكلة
تشرب ليك { كورة } لبن
وتبلع ليك حبة اسبرين
وتقفل أبوابك عليك

الناس يعرفون أعراض الملاريا بالطراش والتعرق الشديد
وضعف وهوان في الجسم
لكن صاحبك لديه تشخيصات اخرى
أنا يوم أكون نائم
بتجيني هلاويس غريبة جداً 00 مابشوف شيطان ولا جن
لكن بسمع { القيقم } في أضاني اليمين
والقنبلة في اليسار
اها بصحى مخلوع
تسألني المدام عسى خير مالك
اقول ليها القيقم والقنبلة
طوالي تخت يدها في راسي
وبعديها تمشي الدولاب تأتي لي بالراجمات !!!!
عمري ما مشيت معمل عشان افحص

[الملكة اسماء ( ام محمد )]

عمري ما مشيت معمل عشان افحص


:p:D:D:D:p
غايتو ربنا يديك العافية
ضحكتني يا نجمنا المتالق

وياسيدي ان شاء الله ماتحتاج لمعامل ولا مستشفيات

[أبوحراز]

:p:d:d:d:p
غايتو ربنا يديك العافية
ضحكتني يا نجمنا المتالق

وياسيدي ان شاء الله ماتحتاج لمعامل ولا مستشفيات


شكرا ليك ايتها الملكة
قبل ستة اشهر دعتني المدام لحضور حفل صديقتها
وهي تعلم مسبقاً أنني لا احب مثل هذه الحفلات
وقالت لي عشاني ان شاء الله تقعد خمسة دقائق
مشينا
اول شيء المدام جابت كرسي من محل النسوان وقعد ابوحراز
الفنانة زي الدودة
نحيفة لدرجة ماتتصوريها
ولابسة اصفر
يعني الماعارف يقول دي شريحة { اريبا }
وبعديها انفقع الحلقوم بالغناء
بس ربك رب الخير كان في واحدة جميلة جدا جالسة في الكرسي المقابل
هي تعاين وأنا اعاين
بعد شوية المدام لاحظت
خمونا من الكرسي وقالو يلاك ننوم
دي ذاتا ولابتعرف تغني ولايحزنون
قالت صديقي قالت !!!!
عليك أمان الله مشينا تمينا السهرة باولاد حاج الماحي

[الملكة اسماء ( ام محمد )]

الفنانة زي الدودة
نحيفة لدرجة ماتتصوريها
ولابسة اصفر
يعني الماعارف يقول دي شريحة { اريبا }


الزولة دي لو عاشت ليوم بكرة يكون كويس :p:d:d:d:p

بس ربك رب الخير كان في واحدة جميلة جدا جالسة في الكرسي المقابل
هي تعاين وأنا اعاين

عالم استغلالية بشااااااكل :mad:
بعد شوية المدام لاحظت
خمونا من الكرسي وقالو يلاك ننوم


اظنك عملتها مخصوص :p
عليك أمان الله مشينا تمينا السهرة باولاد حاج الماحي


ياسلااااااام يا راقي
ونعم الاختيار والله

ربنا يديم الافراح
ويرجع للغناء معانيه

[الفخيييم]

ابوحراز00عصمت00الملكة اشكركم علي تكبدكم المشاق وحضورهذا الحفل الغير شيق00شاكرين مروركم يا اخوان00