رسالة الي ست الدار

[عمر معتصم]

رائعة حميد ست الدار بصوت محمد النصري ارجو ان تنال اعجابكم


تحميل الملف من هنا (http://up4.m5zn.com/download-2009-8-14-12-0syir0wra.mp3)

[الملكة اسماء ( ام محمد )]

سيمفونية

اخي العزيز ارجو التآكد من الرابط

لك الشكر والتقدير

[عمر معتصم]

متأسف كتير يوجد خطأ في رفع الرابط مشكوره الاخت ملكه القلوب علي ملاحظتك الجميله
لضيق الوقت سوف اصحح الرابط لاحقا

[عمر معتصم]

متأسف كان هناك خطأ في رفع الملف وده رابط الاغنية


http://file14.9q9q.net/Download/21382248/-------..-------------------.mp3.html

[الملكة اسماء ( ام محمد )]

شكرا لك اخي على هذا الاهداء الرائع
وهذه هي كلمات الاغنية :

باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن
شن خلولنا بلا حجار
الله يصرف الخواجات
بينات جعفر والمحجوب
والمحجوب والخواجات
طقت حجي .. العمدة طفاها
باقي الناس الجات للفرجي
قنبو قيلو شبعو لحوم ..
والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار
والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين
وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين
كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات
والحيكومة السمها فاير

أم أولادك ست الدار بت أحمد جابر

[عمر معتصم]

لك التحية الاخت ملكة القلوب علي مرورك مشكوره كتير

[عاشق النجمه]

الاخ الغالى عمر معتصم
اليك التحيه وكل التحيه لكل ال علقم وانت تكتب
عن (حميد ) ولقد لاحظت بان كل من زكر هذه الرساله اتى بها كما تغنا بها الفنا محمد جباره
ولاكن نقف كلنا فى هذه الرساله واقدمها اليك كما كتبها الشاعر الفد محمد الحسن سالم حميد

باسم الحاضر والمستقبل
ست الدار بت أحمد تكتب
ليك يا الزين ود حامد شوقنا
أما بعد المبعوتة المنك وصلت
ورح فكيت الطلب الفوقنا
وباقي الدين يا الزين خلصتو
وقدر الفاضل مصروف راشد والتومات
والجايات من جاي لي جاي
وزي ما قتلك قبال دا شهر أتنين
حا نطهر راشد شهر إتنين المدرسة تجز
الله يبعد العارضي تجينا
وراشد حالف ما يطهر
إلا أبوه وعمتو تحضر
وإلا يجيبو الغنايين شان
الشوق بت سرنا ترقص
قتلو نجيب المداحين طن طن
أنا جاي من الحج ؟
وعارف راشد لما يطنطن
كالدنيا الفي تطنطن
غايتو بشر بس ربو يهون
ربو يهون ،،،،،،،،،،
وما كلمتك بالتومات أول البارح
جني يرطنن قالن نحنا الخواجات
إتبسملت مرق حصلت
لقيتلك جعفر زارد البيت بالخواجات
يبقى حداشر وخواجية
ناس البلد الكسروا عليهن
صدوا يقلبو في إيدهن
عدمانين من أسم حكيم
واللا خبيرا للمشروع
علماء آثار فضلت في آثار
ما خموها الجونا قبلكن شن
خلولنا بلا حجار الله يصرف الخواجات
في الله يصرف الخواجات
بينات جعفر والمحجوب
والمحجوب والخواجات
طقت حجي العمدة طفاها
باقي الناس الجات للفرجي
قنبو قيلو شبعو لحوم
والخواجي يصور ساكت
صوروا بت الجنفاوي
طالعي تكسر في الواقود
شافع الحلب أبو ضلعا بره
إيدو تدمم وجارلو عود
والخواجي الكلو لقود
وكنا نصور في البوبار
ويا بوبار العمدة وبزخو
ست خرفن وتيس وإنسلخو
ست خرفن وفي فد يوم
المعدوم أشكال وألوان
أي خدار في اليوم داك في
كملن رف كمين دكان
صاطو السكر شوالين
يا سوق أسود جات من وين
لولا اللعب الفي التموين
والتموين أحزان ما كفن
تالتت جدك عالم الله
إلا الجاها من الجيران
وبعض الناس درشوا الكرملة
الناس في الفيها
قمار بي جيها وطار بي جيها
ومره يدعن ومره نديها
وكان أول يوم في عمر الزاوية
إنو تقيل دون آذان وإنو الناس
ما صلوا جماعة الناس في الفيها
البيت غنمو القوى يوم داك
الرفض الطاعة البقى ينكرفن
وكل راس ساعة تخش صينية
وراء صينية وراء صينية
أول كفوا الخواجات الترجامة
وناس أغراب جيش المجلس
والمشروع عقب الطلبة
وباقي الناس حتى الشفع والحروم
الناس في الفيها
قمار بي جيها وطار بي جيها
ومره يدعن ومره نديها
الناس في الفيها ،،،،،
الدهشان حدر طاقيتو
شان خواجي أداهو سجارة
ود الخير ودر يوميتو
وشوق شدتلها ست جرارة
شيخنا محمد قالب حسو
طه مكفكف وحازم نصو
وموسى الفطقة مودر شبطو
وفطت عكفة مع الخواجة
الخواجة يقوم عكفة يصفق
يقعد عكفة يصفق يرطن يسكت
طق طق عكفة يصفق قام العمدة
وشيهو أتغير حمر فيهو
عيونو وطير صفق
عكفة العمدة أتحير
وشيخ عثمان ينقدف
وكان أول يوم في عمر الزاوية
إنو تقيل دون آذان وإنو الناس
ما صلوا جماعة ،،،،،،
وكل الدنيا مدودي ملاري
أي بشر يخدم صايداه
خلق الله طول ليلا تساري
حمى الشارع من تبداء
من راس داك تلب فوق دا
المستشفى زيارتك زفة
الإهمال وبعوضة تنقد
رقد خرج خرج رقد
خمس حقن بندول ودرب
وباكر ترجع طب ما طب
حمى غريبة الأغرب وين
قامت ندوة قبل يومين
وكان يا الزين راي ناس الدين
إنوقدر مكتوب ويصيب
قلنا سمح نطرأ الله يختانا قريب
قالوا أكلوا ذبيب
بيض كبدة حليب
قالوا أكلوا التين
أكلوا الزيتون أشربوا عرديب
وكل الحسبوك باكر جلبوك
جابوك من وين من وين جابوك
شوف عينا التين شوفنا الزيتون
كرتون كرتون زي طور سنين
علب البف باف أصناف أصناف
والمطعم جيب بيض كبدة حليب
جنس أساليب جنس ألاعيب
وبعدين يا الزين يا الزين
لمتين لإف قريش
تملانا هريتي بنوك العيش
تنفضنا فقر ندقس شقيش
بيغادي كتر وبي جاي الديش
معقول دا قدر معقول دا الدين
صلوا مصلين ذكوا مذكين
أصبروا صابرين
قصرنا في إيش يا الزين
معليش ،، معليش ،، معليش
يا الزين أنا أقول
قول بت حمدين
يوم لقت القش مسروق حوضين
قالولا قدر يا حاجة أراد
غامتالا قدر هاجة يا ولاد
أيوه الله أراد نعم إحنا عباد
لكن دا أتر يبقى الله بشر
ما ما معقول شايلالي يمين
لا مع الله في زول
والزول بيبين لا بد بيبين
بيبين يا الزين
ما أتونسنا معاك يا الزين
كيف أخبار المغتربين
المدة آ الزين طالت مالا
سلِّم لينا على العذابة
وأي إنسان النار صالا
من سور كوبر ولي شالا
قلوا صحانتك بكرة تفت
هي يا الزين زغرد ما قتلك
بت تامزين جابتلها بت
ست قصاف حتان البت
وأخدو نورا الحاج بالدق
وباكر دور ما خش عليها
نورا القنا تكون دكتورة
نورا ،،، دموعة
يسوِّن طق ،، طق ،،،طق‏‏

[الفخيييم]

راشد طنطن والتومات يتكلمن خواجاتي
والدنيا طنطنت الله غالب00
لك التحية علي تلك الروائع يا ودمعتصم
تقبل مروري00

[هشام سلس]

الاخوة الأعزاء أهدي لكم النص كامل وهو عبار عن تلغرافات بين ست الدار بت احمد وزوجها الزين

رسائل ست الدار بت احمد جابر
للزين ود حامد
(تلغرافات)

محمد الحسن حسن سالم (حميد)
(جواب أول)

باسم الحاضر والمستقبل
ست الدار بت أحمد تكتب:
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
وباقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قتلو نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
اتبسملت.. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
صورو بت الجنفاوية طلعة تكسر في الواقود
شافع الحلب اب ضلعاً بره ايدو تدمم وجارلو عود
والخواجة الكلو لغود وكنا نصور في البوبار
ويا بوبار العمدة وبذخو
ست خرفن وتيس انسلخو
ستة خرفن وتيس ما كفن
ستة خرفن وفي فد يوم
المعدوم أشكال وألوان
أي خدار في اليوم داك في
كملن رف كمين دكان
صاتو السكر شوالين
يا سوق جات من وين
لولا اللعب الفي التموين
والتموين احزان ما كفن
تالتة جدك عالم الله
الا الجاها من الجيران
وبعض الناس درشو الكرملة
الناس الفي الفيها ... قمار بي جيها وطار بي جيها
ومرة يدعن .... ومرة نديها
الدهشان حدر طاقيتو
عشان خواجة اداهو سيجارة
ود الخير ودر يوميتو
وشوق شدتلها ستة جرارة
الناس الفي الفيها ...
وشيخنا محمد قالب حسو
وطه مكفكف وحازم نصو
وحاج عثمان ينقندف وكان اول يوم في عمر الزاوية
انو تقيل دون أذان وانو الناس ما صلوا جماعة
الناس في الفيها .. البيت غنمو القوى يوم داك
السابا سقايتو ... الخلى قرايتو
الرفض الطاعة .... البقى ينكفرن
وكل راس ساعة تخش صينية وراء صينية وراء صينية
أول كفو الخواجات الترجامة وناس اغراب
ديش المجلس والمشروع
بعدو العمدة وصمد الساقية
عقب الطلبة وباقي الناس
حتى الشفع والحروم
ستة خرفن وتيس إنصفن
ستة خرفن و في فد يوم
شختها بختها بت كلتوم
تسكت تخبز طول اليوم
لمن حرقت الكفاي
قنبت المسكينة تدعي
الله يصرف الخواجات
الناس الفي الفيها ...
ومرة يدعن .... ومرة نديها
وموسى الفطقة مودر شبطو
وفطة عكفة مع الخواجة
الخواجة يقوم عكفة يصفق
يرقد بقعد عكفة يصفق طق طق طق
يسكت يرطن عكفة يصفق طق طق طق
قام العمدة وشيهو اتغير حمر فيهو عيونو وطير
الخواجة مرق يتسير صفق عكفة
العمدة اتحير
وغاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
دمع وسب والأمريكان
جنس بدع
زولك ده يحير
ينزع توب فوق توب ويغير
توب الفلهمه تلقى يجرجر
توب الدين شفاف وقصير
تقع الحارة مراكبو تغرب
عند الجد كان أده ينقنق
وقت الفارغة يشيل ويبعزق
وكل الحلة مدودي ملاريا
أي بشر يخدم صايدا
خلق الله طول ليلا تساري
حمى الشارع من تبدأ
من راس داك تلب فوق ده
و المستشفى زيارتك زفة
الاهمال وبعوضة تنقد
رقد خرج ... خرج رقد
خمسة حقن بندول ودرب
وباكر ترج طب .. ما طب
حمى غريبة والاغرب وين
قامت ندوة قبل يومين
وكن يا الزين راي ناس الدين
انو قدر مكتوب ويصيب
قلنا سمح نطرى الله يختانا قريب
قالوا اكلوا زبيب
بيض كبدة حليب
قالوا اكلوا التين اكلوا الزيتون
رشو الحشرات واشربوا عرديب
وكل الحسبوك باكر جلبوك
جابوك من وين ومن وين جابوك
شوف عينا التين شفنا الزيتون
كرتون .. كرتون زي طور سنين
علب البف باف اصناف .. اصناف
والمطعم جيب بيض .. كبدة .. حليب
جنس اساليب جنس الاعيب
وبعدين يا الزين يا الزين لمتين
لي ايلاف قريش تملانا هريتي
بنوك العيش تنفضنا فقر
ندقش شقيش بغادي كتر
وبجاى الديش
معقول ده قدر ؟
معقول ده الدين ؟
صلوا مصلين .. زكوا مزكيين
اصبروا صابرين
قصرنا في ايش ؟ يا الزين معليش
معليش .. معليش
يا الزين انا اقول
قول بت حمدين
يوم لقت القش مسرق حوضين
قالولا قدر يا حاجة اراد
غامتلا حجر هاجت يا ولاد
ايوة الله اراد نعم احن عباد
لكن ده اتر يبقى الله بشر ؟
ما معقول
شايلا لي يمين
لا مع الله في زول
والزول بيبين
بيبين يا الزين
الله حي والعبد حنين
إنذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
ليك سنتين يا الزين اشمعنا
ما لميت في بيت يجمعنا
اختك قالت جاية متين
وكيف اخبار المغتربين
المدة ا الزين طالت مالا
سلم لينا على العزابة
واي انسان النار صالا
من سور كوبر ولي شالا
قولو صحانتك بكرة تفت
أي يا الزين زغرد ما قتلك
بت تام زين جابتلها بت
ست قصاف حتان البت
كيف الناس والحالة عموم ؟
والعزابة الكحيانين
سيد البيت عل ما كشاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بالحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
المحجوب ينشد من خبرك
شافعو محسب من يومين
التومات طيبات ونصاح
إلا هباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
وداعة الله
أوعى البشغل والعربات
والحيكومة السمها فاير

أم أولادك ست الدار بت أحمد جابر
****************



إلي ست الدار....
ست الدار بت أحمد كيفك
جاني جوابك مفتوح شارع
جاني جوابك وانا بتذكر
في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس ؟
كمره وهيصة وخواجات ؟
جعفر وعمدة وفراجات ؟
ست الدار تتوهدبي ليه
يا ام الناس تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان
أي عوج مبدي ومختوم
صوتنا هناك وهنا مكتوم
ومافي فرق في الوقت الراهن
بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك
فوق الطلحة الأمريكية
يا خرطوم .. أوه خرطوم .. أوه واشنطوم
طن ..طن ..طن لفتك فجراً
يسطع .. يقطع ...رحطك
ست الدار سامعاني كويس ؟؟
مرتي و اخيتي وامم الكل
أنا بندهلك من شارع الله ..
الفوقي هجير والتحتي بقل
سبي معايا الشردو راجلك ..
والحرمونا شوية الضل
سبي الحالة العالة علينا ..
حتى احكيلك بالتفصيل
حاصل الحاصل يا بت أحمد
جاني وفد في المصنع زاير ..
وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين .......
مافي العارض واللا اترجى
العمال من سمعوا احتجوا ...
سيرو موكب صامد وصامت
إتضامنا معاهم سرنا ..
أب عرام دور عربيتو ..
العربية الامريكية....
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة ..
والعمال أصحاب الحق
هي البتقرر والتتولى
هي البتحدد سير المصنع
يد العامل هي العاد تنتج
مو المكنات الأمريكية
زيت العامل ياهو البطلع ..
مو المكنات الأمريكية
وسكن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي ..
وكل وجوه الراسمالية
وأشرف من ..............
داك الحين المصنع هاج
جات عربات اللات بوليس ..
فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتحريض والتخريب والشيوعية
البوليس صاقع شيوعية
وفاكر نفسو بنبذ فينا
آيا بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالن شاهد
شوق وسلام الزين ود حامد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولن صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت ..لمت .. كان ما لمت
أنا جاييكم وما ندمان
*********************


(بعد الحاصل والإتحصل ست الدار بت أحمد تكتب) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض ..بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليش يا الزين بتوصي عليا
ليش ... ليش ...ليش
بتوصي عليا
وانا بت احمد ست الدار
ام اولادك وهم صغار ..
ام اولادك وهم صغار
ثم اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
وعارف ام راشد والتومات ..
مرتاً دغري وغلباوية
آه يا الزين .. لو كنت معاكم ..
كنت بقيت النوباوية
اسبوعين قضيتن جوه
يبقي غصب زادنك قوة
ما تهتم يا الزين بالحاصل
واصل سعيك .. سعيك واصل
واصل سيرك ............
لو ما كنت الزين ود حامد
كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو ..
فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو فاتوا الديش
غزّا بكانا اتنين رطانة
صاقع كلو من اسماعين
هو الفسل لهن الشغلانة
ويا اسماعيل
ما كان الديش شقّ مسيمعك بالجبخانة
لو المجلس قبل اوراقك ..
أو في الثانوي لقيت لك خانة
لكن قدرك يا إنسان ..
بلداً هاص هيصة جبانة
طالو الناس التريانين ..
ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك
وقال جاييك في أول بص
البرسيم طهرنا البارح
نعجة راشد صبحت والدي
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزال السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد
راشد
راشد
راشد