حــاجه عــجيبه [الأرشيف] - منتديات ودمدني

محمد الجزولى

15-08-2009, 05:06 AM

فعلا قصه عجيبه ... ....
رن جرس التلفون فى منزله ... رفعت زوجته الخط .. جاءها صوت انثوى ... تخنقه العبره ... يكاد ان يجهش بالبكاء ...
الو .. عبير .. معاك ندى صاحبة نانسى صاحبتك ...
اهلا يا ندى .. مالك انشاء الله خير ؟؟؟
خير من وين يا عبير !!! عاينى ... انا عارفه نفسى ازعجتك بالمكالمه دى ... لكن معليش ما عندى زول تانى غيرك .... ممكن تجيبنى اسى .؟؟؟
والله شفقتينى يا ندى !!! مالك ؟؟؟ الحاصل شنو ؟؟؟؟
كدى انتى لما تجى بى تعرفى الحاصل شنو !!! واعملى حسابك انا ح ابيت معاكم الليله
يا ستى تشرفى انشاء الله ... البيت بيتك ...
انهت عبير المكالمه واتصلت مباشرة على زوجها
الو ... احمد انت وين ..؟؟؟
انا جايى فى السكه ... خير فى حاجه ؟؟؟؟
لا لا مافى حاجه بس ندى صاحبة صاحبتى نانسى ... اظن عندها مشكلة وعاوزانى امشى ليها .
وانت دخلك شنو ؟؟؟ انتى اساسا ما بى تعرفيها ولا بلا تعرفى بيتها !!!
بى نسال يا احمد ياخى .. عليك الله ما تعقدها ياخى ....
حاضر يا ستى انا قربت خلاص يلا اجهزى!!!
انطلق احمد وعبير الى حيث ارشدتهم ندى عن مكان تواجدها وفى الداخل الجمتهم المفاجاءه .... كانت ندى تبكى بكاءا مرا ووجهها منتفخ واثار ضرب مبرح تظهر فى جميع اجزاء جسمها
ده شنو ده يا ندى ؟؟؟ الحاصل شنو ؟؟؟
ضربنى يا عبير !!! ضربنى وقال عاوز يقتلنى !!! انا عاوزه امشى ناس ابوى ؟؟؟؟ ودونى ليهم اسى!!!
تدخل احمد فى الموضوع مخاطبا ندى : كدى استهدى بالله يا بت الحلال ... وهو بى سلامتو وينو اسى ؟؟؟
فى البيت !!!
ذهب احمد الى زوجها فى بيته وحاول ان يفهم الحاصل منه الا ان روايته كانت مختلفه تماما ... المهم اقنعه احمد بان يترك ندى تبات عنده اليوم وبكره النفوس تهدأ شويه ويمكن مناقشة الامر سويا ... اصطحبا ندى الى منزل احمد ... ثم اكرموا مثواها ... وجهزو لها مكان تنام فيه وتأخد قسطا من الراحه ...

فى الصباح الباكر وقبل ان يذهب احمد الى عمله سمع جلبه عظيمه ... وصوت بكاء ونواح .... نادي على زوجته ليعرف الحاصل منها .... دى ندى يا احمد الظاهر عليها جاته نفسيات ..
لا حول ولا قوه الا بالله ... مسكينه والله ... ياخى راجله ده ما عندو لا نخوه ولا شهامه ... كيف يوصل زوجتو للمرحله دى ؟؟؟؟!!!
وبعدين العمل شنو يا احمد ؟؟؟؟؟ انا خايفه عليها !!!
معيش حاولى تهديها شويه وانا ح اتصل بى زوجها وح اتصل بالاسعاف ... احسن حاجه يدوها حقنه مهدئة ....
مع مرور الوقت ازداد بكاء ندى واخذت تكسر كل ما يقع بيدها ... اجتمع الجيران لمعرفة الحاصل ... جاء الاسعاف على عجل ... ثم اسعاف اخر .... تجمع عدد كبير من افراد الشرطه ظنا منهم ان بالامر مخالفة ما ..
. تتطور الموقف بسرعه كبيره .. وكل هذا وزوجها لم ياتى بعد !!! .اخيرا تمكن رجال الاسعاف من السيطره على ندى وادخالها عربة الاسعاف بينما اقنع احمد افراد الشرطه بان المساله لا تتعدى حالة نفسيه انتابت ندى للظروف التى مرت بها فى الايام الاخيره
.... .بينما احمد عائد الى منزلة بعد مغادرة الاسعاف لفت نظره تجمعات من الناس حول منزلة ... وقف بالقرب من اول تجمع وسمع همسا دائرا

تصدق ياخى الزول صاحب البيت ده قالوا مرتو كانت عاوزه تنتحر ... ضربت نفسها بالسكين ... ابتسم احمد فى سره وواصل المسير للتجمع الاخر

يا زول قالوا ليك ناس البيت ديل كلهم دخلهم جن !!! ما خلى ليك واحد فيهم نصيح !!! ياخى قالوا ليك الرجل يفلع والمره تفلع وحتى بتهم الصغيره بقت تفلع !!! زادت ابتسامة احمد وواصل سيره حتى وقف عند تجمع نساء ليسمع هذا الحوار:

وحات الله يا اختى قالوا ليك الراجل حلف يعرس فيها .... اها جاته نفسيات وبقت تتكلم بره من ارسه !!!!!
زادت ابتسامة احمد وواصل سيره حتى وقف بالقرب من تجمع اخر : ياخى قالوا ليك لقو منشورات سياسيه فى بيتو ... وكمان اسلحه ومتفجرات .... هنا سرت فى جسمه رعشه ... وانتابه خوف شديد ... جري الى منزله وهو يهزى .... كلو الا المنشورات ..... كلوا الا الجماعه ديل ...

وفعلا دنيا عجيبه

الاميره

15-08-2009, 08:15 AM

الاخ/محمد الجزولى
سبب الجماعه ديل يكون بسبب المشاكل.. كتمان المشاكل لحدى ما اصبحت قنبله موقوته..اما ان تنفجر ويكون انفجار مدوى مما ينتج عنه اصابات او الكتمان مع تنامى الشعور بالغضب مما ينتج عنه امراض عضويه واخرى نفسيه..ويبدو الاحتقان والمشاكل له مدارس مثلا مدرسة الالفاظ تجد الكل فيها له قاموس لغوى من العنف اللفظى,,الذى يراعى فيه انتقاء ماثقلت وطأته وجرح معناه من الكلمات..وهناك مدرسة االفتونه والعضلات وفيها لايحتاج اى شخص الى جهد فى التفكير ولا التريث والتعقل وكل ما تحتاجه وفره عضليه اوتفوق فى الفتونه على الطرف المضروب لضمان النصر عليه وفى الاخر تظهر مدرسة النفسنه والنفسيات وهذه مليانه عقد ولك فرد مترجمه الخاص من كتر التنازع الداخلى اسلاكو ضاربه واصبح لايميز الخير من الشر..الهزار والجد..وابسط كلام لايعجب تقوم الدنيا وتنتهى بكارثه..وكل ذلك للبعد عن العباده والصلاة وانتشار الظن السىء والحقد والحسد وكل ما بشانه تدمير النفس الانسانيه ..نسأل الله العافيه ويشفى كل مريض..وهكذا هى الحياة مدارس.
مع احترامى وتقديرى

moh_alnour

15-08-2009, 04:33 PM

ما أكرمهن إلا كريم وما أهانهن إلا لئيم ، فإما إمساك بمعروف أو تسريح بإحسان

كلو الا المنشورات ..... كلوا الا الجماعه ديل ...

ناس الدنيا ديل ما برحموا يا ود الجزولي ، تقفل بابك عليك وووب تخالط الناس وووبين
لكن بيني و بينك كل شيء و لا الجماعة ديل الواحد أحسن يبعد من الشر و يغني ليهو
الخواف ربى عيالو ;)

المسافر

15-08-2009, 08:59 PM

لا اريد أن أخوض في القصة برغم روعتها
ولا اريد أن أدخل في موضوع الإساءة
للزوجات أو هضم حقوق المرأة ، ولكن
الشيء المستفز هو شمارات الناس
وفضولهم (curiosity) وسرد القصصة الخيالية
ومن الواضح الوضع بالفعل أصبح واقعي
إلى حد كبير .

أها (curiosity) دي ما فلسفة مني ولكن
موقف حصل لي قبل فترة مع واحد هندي
وهم مشهورين بحب الإستطلاع بطريقة
غريبة لدرجة أنو ممكن يقضي يومو كلهو
في الحكاية دي .

محمد الجزولى

15-08-2009, 10:44 PM

الاخت الكريمه الاميره
فعلا عندما تتلاشى لغة الحوار بين طرفين تصبح اللغه السائده هى لغة الغابة ...
لا مراعاة للاحاسيس ولا للمشاعر ... ولا سماع لصوت العقل ...
تسلمى اختى الاميره على مرورك الكريم واضافتك الثره..

محمد الجزولى

15-08-2009, 10:48 PM

ناس الدنيا ديل ما برحموا يا ود الجزولي ، تقفل بابك عليك وووب تخالط الناس وووبين
لكن بيني و بينك كل شيء و لا الجماعة ديل الواحد أحسن يبعد من الشر و يغني ليهو
الخواف ربى عيالو ;)

تسلم اخى محمد النور وهذا ما عنيته تحديدا فى هذا البوست ... فترويج الاشاعات اصبح السمه السائده فى المجتمع ... والخبر يبدأ بى صوره وينتهى بصوره مغايره تماما ...
لكى ودى اخى محمد النور وتسلم على المرور

محمد الجزولى

15-08-2009, 10:50 PM

لا اريد أن أخضوع القصة برغم روعتها
ولا اريد أن أدخل في موضوع الإساءة
للزوجات أو هضم حقوق المرأة ، ولكن
الشيء المستفز هو شمارات الناس
وفضولهم (curiosity) وسرد القصصة الخيالية
ومن الواضح الوضع بالفعل أصبح واقعي
إلى حد كبير .

أها (curiosity) دي ما فلسفة مني ولكن
موقف حصل لي قبل فترة مع واحد هندي
وهم مشهورين بحب الإستطلاع بطريقة
غريبة لدرجة أنو ممكن يقضي يومو كلهو
في الحكاية دي .

الاخ الفاضل المسافر
الشكر لك يا رائع على هذا المرور الجميل
ويا ريت تحكى لينا عن حتة ( الكيوريستى) دى بالتحديد ... ان شاء الله فى بوست منفصل ياخى
عارف حككككككككككككككككككاى

ابوخالد

15-08-2009, 11:32 PM

الرائع / ود الجزولى ....

كما عودتنا دائمآ بالمفاجأت والنهايات الدرامقراطية .... إنتظرنا ...

ولكن جاءت النهاية هذه المرة درامسياسية متجددة .....

القصة جميلة وتشدك للغوص غصبآ عنك للوصول للنهاية ....

فلك الشكر أخى

ومزيد من الإبداع

ودمت بخير

محمد الجزولى

22-08-2009, 12:13 AM