المساعد الشخصي الرقمي

مشاهدة النسخة كاملة : الاتجاه المعاكس



درديري كباشي
20-08-2009, 07:42 AM
بمناسبة الشهر الكريم
واذا سمح رواد النفاج طبعا بقيادة العاقب
سنقدم لكم برنامج اسبوعي
على نفس نسق وفكرة برنامج الاتجاه المعاكس الشهير بقناة الجزيرة

في هذا البوست سنتناول شئ من واقعنا السوداني يقف الناس حوله موقفين متاقضين


اولى حلقاتنا ستكون عن المائدة السودانية .. احد الضيفين يتحيز الى مكوناتها التقليدية

والضيف الثاني يرى انه مائدتنا فقيرة غذائيا.ز


وفي الاسبوع التالي نتناول موضوع اخر ربما الكرة السودانية

ارجو ان يكون البرنامج خفيفا عليكم
والى الحلقة الاولى

محمد الواثق
20-08-2009, 07:50 AM
رمضان كريم
ونحن في الانتظار
استاذنا درديري

درديري كباشي
20-08-2009, 07:50 AM
شاشة منتديات ودمدني .. قناة النفاج تقدم



الاتجاه المعاكس


الدكتور /زكي مقدم البرنامج


من ناحية اولى
- هل ترى المائدة السودانية لازالت تحتفظ بمكوناتها القديمة
- هل ترى لازالت المائدة السودانية تحتوي المخبوزات الشعبية زي الكسره المره والقراصة والفطيره والعصيده
- هل الاجيال الجديدة من النساء تعرف الطبائخ الشعبية القديمة من الباميه المفروكة ملاح الورق ملاح السبروك ملاح النعيمية ملاح ام تكشو التركين الفسيخ ملاح القاورمه
- هل المواطن السوداني لازال يتذوق هذه الاطعمه ويشتهيها مثل ما كان يفعل اآبائه من زمان ام اصابه الملل واصبح يبحث انواع اخرى في موائد الاخرين
من ناحية ثانية:
- هل الاطعمه السودانية بصورتها القديمه تمثل مصدرا كافيا للسعرات الحرارية ام هي السبب الرئيسي في ضعف وفتور وكسل المواطن السوداني كما هو يتهم عادة .
- هل الاطعمة السودانية جديرة بمد الجسم بالفاتمينات والبروتين الكافي لبناء الاجسام ام هي محتاجة لمسانده من موائد الاخرين
- هل تعلق الناس بالاطعمه الغربية هو تنكر للاصل وانفصام في الشخصية السودانية وادعاء الحضارة ام هو اعجاب حقيقي نابع عن رغبة حقيقية
للاجابة على التساؤلات اعلاه معنا في الحلقة على يميني الدكتور حمد الغرقان وهو سوداني مقيم في امريكا ويعمل في منظمة الامم المتحدة ضمن برنامج الغذاء العالمي . كمناصر لتغيير المائدة السودانية واستبدالها بالاكلات الغربية.
كما معي على يسار الشاشة الاستاذ كمال ادريس الشهير بكمال كسره كمناصر متعصب لبقاء بل الحفاظ على المائدة السودانية كما هي دون اي تغيير او زياده
قبل ما يبدا دكتور الغرقان في عرض وجهة نظره فاصل اعلاني ونعود
[/size]

درديري كباشي
20-08-2009, 07:59 AM
رمضان كريم
ونحن في الانتظار
استاذنا درديري

سلام يا واثق .. حيكون الرد عليك بمثابة الفاصل الاعلاني في الحلقة .. فلذلك نرجوك ( اشر ميرندا وانت طالع .. لو ما لقيت ميرندا اشر ايرلندا) .. رمضان كريم وشهر مبارك

الملكة اسماء ( ام محمد )
20-08-2009, 08:00 AM
ابو الدر
منور النفاج والاقسام المجاورة والله

درديري كباشي
20-08-2009, 08:01 AM
دكتور الغرقان
اولا اشكرك يا دكتور ذكي على هذه الاستضافة الجميلة ونحن نستعرض جزء هام جدا لا يتعلق فقط بتراث او ارث شعبي انما هو جزء مهم جدا من تكويننا الجسماني والزهني على مر الاجيال .
انا اعتقد ان المائده السودانية فقيره في مكوناتها كما ونوعا وحتى ذوقا . انا مش فاهم كيف يتحمل الانسان انه ياكل كسره حامضة لعدد ثلاثة وجبات في اليوم وهذه لحالها سبب رئيسي في قرحة المعدة وانتفاخات القولون والتي يصاب بها معظم السودانيات نتيجة لكمية الخمائر الكبيره الموجوده في الكسره . ومعروف أي سوداني يصاب بالمصران العصبي اول نصيحة من الطبيب المعالج ابعد عن الكسره . وهذا مثال بسيط . اما الاطعمه الثانية التي ذكرتها يا دكتور مثل التركين والملوحه والفسيخ والكول هي اصلا مستودعات جرثومية ..... هنا يحصل تقاطع صوتي
كمال كسره : يا راجل اختشي جرثومية انت ما بتخاف ربك . ماكان رقدنا المقابر كلنا ..
د ذكي : يا استاذ كمال دقايق استاذ كمال لوسمحت ..... حا اديك الفرصة
كمال : انت راجل متملق عشان عايش في امريكا انت انت عايز شنو نحن من جاتنا الشاورما و البرقر بتاعة اسيادك دا حتن عرفنا السرطانات والامراض قال جرثومية قال .
د- ذكي استاذ كمال ارجوك ...... يا مخرج .... فاصل اعلاني ونعود

درديري كباشي
20-08-2009, 08:12 AM
ابو الدر
منور النفاج والاقسام المجاورة والله

سلام يا ملكة انا نادر الخروج من المنتدى العام في اي مكان رحت ليه .. لكن اليوم جيت اتضهب بالنفاج وعجبني جدا افكاره ومواضيعه وحسيت ممكن اقدم شئ يناسبه

الملكة اسماء ( ام محمد )
20-08-2009, 08:25 AM
سلام يا ملكة انا نادر الخروج من المنتدى العام في اي مكان رحت ليه .. لكن اليوم جيت اتضهب بالنفاج وعجبني جدا افكاره ومواضيعه وحسيت ممكن اقدم شئ يناسبه


مشكور والله يا ابو الدر
وصدقني ناس النفاج ديل لذاذ بشكل
يعني ممكن تبدا قصة يتموها ليك خيال سااااااااي :p

اتمنى ليك اقامة ممتعة معانا وتشرف وتآنس ياسيدي

درديري كباشي
20-08-2009, 08:37 AM
عدنا :

واصل يادكتور الغرقان

د/ الغررقان : ونحن حا نمشي بعيد لي ما هو قدامك اللاعب السوداني اذا قارنته باللاعب الافريقي الان معظم اندية العالم والاوربية تحديدا تستعين باللاعب الافريقي لانه قوي البنية . وقارنه باللاعب العربي ايضا . يا خي اللاعب السوداني تلاقيه جاري ويشنكل روحه ويقع وبعدين يكورك ياحكم ما فاول ياخ ؟؟

د/ ذكي : عفوا يادكتور كيف يعني يشنكل ما معنى الكلمة لو سمحت

د/ الغرقان : يشنكل بمعنى يكعبل ودا كله نتيجة للياقة البدنية المتدنية وهو ياكل في الخيز بموية الفول والكسره بملاح الويكة .

د/ ذكي " خلاص شكرا يا دكتور والان يا استاذ كسره عايزين وجهة نظرك

كمال كسره :

شاكرين لك يا دكتور على الاستضافة . وانا حا ابدا من اخر نقطة زمان ناس صديق منزول وناس قاقرين وجكسا كانوا بيعرفوا الهانبرقر والشاورما والبيتزا . صديق منزول دا كان بيفرتك عراضة الخشب بشوته من النص لغاية ما اضطر الاتحاد الدولي يبدلها بحديد لحدي الان.

د/ الغرقان : دللللللللللللللللللللل

كمال كسره : يعني انا كذاب يا منافق ... يعني دا اسلوبك انت تغلفو باسلوب علمي يا منافق ..... يا متملق الخواجات

د/ذكي : مالك يا استاذ الراجل ما قال انت كذاب

كسره : انت ما عارف يادكتور كلمة دلللللل عندنا معناها انت رميت قنبلة كبيره يعني كذبه .

د/ ذكي : عيب يادكتور نحن في برنامج محترم وبعدين اسنخدم اللغة العربية وبلاش المصطلحات السودانية دي

د/ الغرقان : حقيقية انا اسف ودون قصد طلعت مني .

د/ذكي : خير يا استاذ كسره واصل

درديري كباشي
20-08-2009, 08:42 AM
يواصل كمال كسره :

بعدين لو كان نحن اكلنا ما طاعم ليه القصور الملكية طباخينها كلهم سودانيين ومعظم امراء الخليج . ملاحظة ثانية حتى في المسابقات التفزيونية والتي تتعلق بالطبيخ دايما تفوز بيها مره سودانية . لييه لانه المراه السودانية يدها طاعمه . ثم انه انت عاوز تقنعني انه بيتزا بالجبنة طعمها الذ من قراصة بالدمعة كدا معها بصله مقطعة وشطة حمراء وليمون . مافي أي مقارنة وانا اعتقد لو ذاقها أي خواجة هو بنفسه كان فتح ليها سلسلة مطاعم عالميه زي الانت عاجباك ومبهور بيها دي . ثم انه خلي الخواجات ديل حتى اخوانا العرب ديل سرقوا ماكولاتنا وعدلوا اساميها يعني مثلا الرقاق باللبن سموه ام علي على دا مين الله اعلم . وكذلك مديدة الحلبة سموها المهلبية

والشئ الثاني شنو اليخلي اكلنا فقير غذائيا واكل الخواجات غني ما هي نفس المكونات القمح واللحم والخضارواللبن والسكر والملح. وحتى الويكة المعاجباك دي هي اصلا باميه والخواجات يموتوا في الباميه ويسموها اصابع النساء (لادز فنقر ) من شدة ما عجباهم بس كل النحن علمناه انه جفنناه ودقيناها وخزناها وانشاء الله العملناه نحن في الويكة يعملوا فيكم الخواجات

د /ذكي شاكرين يا استاذ كمال كسره ما قصرت وسؤال ليك يا دكتور هل انت فعلا في برنامج الغذاء العالمي عملتوا دراسات على مكونات المائدة السودانية ولا انت بتعرض رايك كانسان متذوق فقط . وانا ما عايزك ترد علي الحين خلينا نروح فاصل اعلاني ونعود اليكم مره ثانية

درديري كباشي
20-08-2009, 09:12 AM
شاكر جدا يا دكتور ذكي للفرصة الثانية وبالنسبة لسؤالك هل انت فعلا في برنامج الغذاء العالمي عملتوا دراسات على مكونات المائدة السودانية ولا انت بتعرض رايك كانسان متذوق فقط.
حقيقية يا دكتور ذكي انا استطيع ان اقول انه الاحتمالين واردات . بمعنى انه موقفي الشخصي والذوقي من المائدة السودانية ويقيني التام بانها فقيره جعلني اطرح هذه الرساله على اسرة برنامج الغذاء العالمي وتحليل الاكلات السودانية المعروفة امثال موية الفول والويكة والكسره والطبائخ الخضراء هل هي كافية بان يعيش عليها انسان طول عمره دون ان يدعمها باي شئ آخر . والدراسة اطبقت فعلا واخذت العينات والتحليلات .
د / ذكي : المهم النتيجة وصلتو لشنو ؟؟؟
كمال كسره متدخلا : يعني حا يصلو لشنو يا دكتور ذكي ما القمح الموجود في القراصة هو نفسه الموجود في البيتزا يعني حا يقول برضو القمح صناعة محلية . ما القمح دا لو زرعتو في القمر حيقوم قمح برضو .
د/ ذكي : انا اؤيد راي استاذ كمال وعايزين نعرف النتاج التي توصلتوا لها
د الغرقان : اولا يجب ان نضيف ان الدراسة لم تشمل القمح باعتبار ان القمح والارز هم غذاءا عالميا . ولكن شملت الذره الرفيعة ومنتجاتها مثل الكسره والعصيده ومديدة الدخن والاوراق المطبوخة مثل السبروك وهو ورق شجر البامية وملاح الورق وهو ورق شجر اللوبيا وكذلك ورق الملوخية . وهذه حتى لاتحتاج لدراسة لانها ورقيات والورقيات هي اطعمه عشبية تخص الحيوانات العشبية و الحيونات العشببية طورت الجهاز الهضمي بتاعها لكي يهضم هذه الاعشاب . لو تلاحظوا في الخروف يوجد مصران عملاق يطلق عليه شعبيا (كبير اخوانه ) هذه المصران ضمر في الانسان حتى اصبح بلا فائدة فيما يعرف بالزائدة الدودية . لذلك اكل هذه الاعشاب يجعل الزائدة الدودية تتضخم ربما تنفجر..
د/ ذكي : شاكرين يا دكتور ونحن بعد ذلك سنطرح فرصة للمداخلات الخارجية على المشاركين الاتصال على الارقام 99999 9999 999 او الارقام 787878 7878 7878

--------------------------------------------------------------------------------

درديري كباشي
20-08-2009, 09:55 AM
/ ذكي: يبدوا انو معانا اتصال نعم نعم نعم منو معاي . وطي صوت المنتدى لو سمحت نعم كدا شاكرين

المتحدث : ازيييك يادكتور ذكي ..,نحن بنحبك شديييد وبرنامجك دا بنرجاه من العصر ... اها نقعد نحرس التلفزيون عشان قنا يبقى نغافلنا وتجي بدري مره .
د/ ذكي : متشكر لو سمحت اسمك والسؤال للضيوف
الضيف : انا محمود ابو سنينات من الكرابة ريفي المعيلق قرية ودابرق وسعالي للدكتور .. انت يا دكتور اهلك بعد ما ربوك بموية الفول والكسره وقروك وعلموك جايي الان تتنكر لاكلنا وتباري الخواجات عاجبنك يعني . شوف هنا نحن اللكل القلته دا كله ماهو داخل دماغنا لا تقولي بسة ولاتقولي كديسة ونحن كان ماطمسنا يدينا ديل في ملاح الخدره لعين كوعنا ما بنشبع ولا بنعرف السودان السواك راجل ودكتور انت ليه ماعلمت الخواجات ياكلو الاكل اليلنا دا ؟؟؟؟

العاقب مصباح
20-08-2009, 09:59 AM
الو الو

دكتور درديرى سلام عليك

وطلتك خلت النفاج جنة

وحبابك والله

وكيفنك

ممكن اشرك ,.... من الشركة بتاعة الطير عشان الناس ما تمشى بعيد :d

اها ممكن اشترك

عندى سوال كدا :-

انا بحب الويكة شديد رغم إنها لايوقة لياقة ما عادية ....

هل ممكن تشرح لى مكوناتها شنو وتستصحب معاك السودانى المشى امريكا وقبضوا عليهو عشان شايل ويكة ...

اها فى انتظارك عشان نلايقها ياخ

:d:d

العاقب مصباح
20-08-2009, 10:01 AM
وعندى كمان حبة سعال تانى

ليه نحن بنسمى الأسود لما نعمله ملاح ملاح اسود ...

وليه لما نعمله سلطة برضو بنسميها سلطة اسود

هل هى أزمة مصطلحات أم أزمة ملحات

مستصحباً معك إنى بريد سلطة الاسود وكدا ... ودائما عامله لى حيرقاااااااااااان:d:d

درديري كباشي
20-08-2009, 10:02 AM
قسم : خلاص خلاص خلاص عمنا ابوسنينات سؤالك وصل وواضح للدكتور ناخذ اتصال ثاني ايوا الو الو الو منو معاي
المتصل : ازيك يادكتور انا عبدوش من سودان الغلابة والكسرة بالمويةد/ ذكي : نعم يا عبدوش وسودان الغلابة دا وين لشندي فوق ؟؟؟
عبدوش: قريب مننا علا ما ها بعيده خالص وسؤالي للدكتور القدو قدو وهي اكله افريقية معروفة في غرب السودان تصنع من طحين الدخن ومما قمنا سمعنا انها بتقوم العضلات عشان كدا بياكلوها الناس الشغلهم يحتاج لجهد عالي زي العتالة او الحمالين وكمان عندنا ام جنقر وهي مصنوعة من السمسم على ما اعتقد . وماتنسى الاقشي وهو لحم مشوي بطريقة شهية يخلي الواحد ياكل نص خروف وما بيحس بالشبع . اها راي دكتور الغرقان شنو في الاكلات دي.

د/ ذكي / شاكرين يا عبدوش خلاص سؤالك وصل في اتصال ثانتي؟؟؟ يبقى يا دكتور الغرقان واصل الرد على الاسئلة

د/ الغرقان :

اولا بالنسبة لسؤال عمنا ابو سنينات هو عاوزني انا اعزم الخواجات على اكلنا السوداني واعلمهم كيف ياكلوه ... تخيلوا انا ممكن اعزم خواجة عشان ياكل عصيدة بملاح شرموط . ايه القرف دا ؟؟ انا مره عزمت خواجة معنا في البيت مره واحدة وكانت الوالده يعطيها الله العافية عامله في الفطور ملاح سبروك بقراصة ..تخيلوا ملاح سبروك.. قدر ما اصريت من الوالدة انها تحزف الصحن دا من الصينية ... هي اصرت وقالت حا يعجب الخواجة . اها الخواجة اول لقمه قطعها من ملاح السبروك (حقيقية بالمناسبة ) رفع يدو لفوق الملاح ابا ينقطع و لازال متصل بخيط طويل مربوط بالصحن بصورة مقرفة . اها الخواجة وقف على طوله ولم ينقطع الملاح اخيرا طلع في الكرسي وبرضه ما انقطع الملاح اخيرا بعد ما اصبح الارتفاع حوالي مترين من الصحن انقطع الملاح ... كان اخواني الصغار معانا بدلا ما يعلموا الخواجة كيف يتصرف ماتوا بالضحك عليه . وانا اتمنيت لو انشقت الارض وبلعتني ...الغريبة انه الخواجة علق قال هي اكلة لذيذة لكن متعبة وانا عشان اكمل صحن قدر دا محتاج ليوم كامل ... المهم الاخوان بعد ذلك علموه كيف يلف يده بعد كله لقمه لغاية ما عدا اليوم دا على خير ومن يومها انا محرم احضر خواجة للبيت ممكن اعزموا في كافتريا خارجية فقط .

اما بالنسبة لسؤال الاخ عبدوش صحيح ان الاكلات التي ذكرها هي فيها قيم غذائية عالية جدا ولكن يجب ان نعرف انها هي ليست اكلات سودانية وخاصة الاقاشي هو من غرب افريقيا وتحديدا مصنف من ضمن الاكلات الشعبية في نيجريا وكونه اصبح ينتشر في السودان هذه محمده كبيره .

د/ ذكي :ماسمعنا راي الاخ كمال كسره في ردوده على المتصلين رايك شنو يا استاذ كمال في الاسئلة وردود الدكتور وشايفك ممتعض جدا .

كمال كسره : اقول شنو يا دكتور في شخص يقول انه يستحي من عرض اكلاته على الخواجات والهم لا يستحون حتى في عرض اعراضهم وعريهم في السينمات والتلفزيونات والبلاجات . هم ماخجلوا من اجسامهم العارية ونحن نخجل من اكلنا نقدمه عليهم وهي دي عايزة تعليق ؟؟؟؟؟.

د/ ذكي : معليش معليش استاذ كمال خلينا في موضوعنا احسن خلينا في الاكل في الكسره والملاح

كمال كسره مواصلا : انا اقر واعترف بان السودانيين نساء ورجال وحتى الطباخين منهم لا يهتمون بشكل تزيين الطعام . بمعنى انها يمكن تجد صحن عملاق مليان قراصة وملاح والقراصة مردمه بصوره مخيفة يمكن شخص غريب لا يعرف انها في الاساس تحمل اكلا ....

هنال يبدا دكتور الغرقان يبتسم ويعقب د/ ذكي : اخيرا شفتك ابتسمت يا دكتور انه في خط اتفاق بدا يظهر .

كمال مواصلا : انا اتحدث عن شئ اخر بمعنى انه مائدتنا لا يوجد اي جهد في تزيينها وانا اعتقد انه اهلنا يجزمون بان العين لاعلاقة لها ِبالاكل وهذا هو سر الخلاف . لكن لااظن من ناحية القيم الغذائية انه عندها فرق بل يمكن تفوق الاكلات الغربية لان اكلنا اقرب للطبيعة . بمعنى خضارات طازجة . اما اكلهم خاماتهم معظمها مخزن بالسنين .



د/ ذكي فاصل اعلاني ونعود

الملكة اسماء ( ام محمد )
20-08-2009, 10:03 AM
بريد سلطة الاسود وكدا ... ودائما عامله لى حيرقاااااااااااان:d:d


دنااااااااااوة ماعادية :rolleyes:

العاقب مصباح
20-08-2009, 10:06 AM
دنااااااااااوة ماعادية :rolleyes:



ما فهمتك ياخ :confused::confused::confused:

الملكة اسماء ( ام محمد )
20-08-2009, 10:12 AM
ما فهمتك ياخ :confused::confused::confused:

عايز تفهمني ؟
هسي لو عندك سلطة اسود احشي منها سندوتش كبيييير واكله
واحساسك ح يكون سببه الكلمة الانا كتبتها فوق :p:D:p

العاقب مصباح
20-08-2009, 10:16 AM
عايز تفهمني ؟
هسي لو عندك سلطة اسود احشي منها سندوتش كبيييير واكله
واحساسك ح يكون سببه الكلمة الانا كتبتها فوق :p:D:p




كان فاهمك تقرصنى نملة فى عضم الشيطان حقى
:mad::mad::mad::mad:

الملكة اسماء ( ام محمد )
20-08-2009, 10:25 AM
كان فاهمك تقرصنى نملة فى عضم الشيطان حقى
:mad::mad::mad::mad:


دناوة = نفسك صغيرة

اها دي الا اجيب مترجم درديري بعد كدا :mad:

العاقب مصباح
20-08-2009, 10:29 AM
دناوة = نفسك صغيرة

اها دي الا اجيب مترجم درديري بعد كدا :mad:



انا قدر ما فهمتها كدا استبعدتها لكن

:mad::mad::mad::mad::mad::mad::mad:

الملكة اسماء ( ام محمد )
20-08-2009, 10:30 AM
انا قدر ما فهمتها كدا استبعدتها لكن

:mad::mad::mad::mad::mad::mad::mad:
:p:D:D:D:D:D:D:D:D:p

درديري كباشي
20-08-2009, 10:34 AM
دكتور ذكي /ووصلنا على الايميل الخاص سؤال من المشترك السوداني المقيم بدولة قطر السؤال الاتي الاستاذ العاقب المصباح .
الو الو

دكتور درديرى سلام عليك

وطلتك خلت النفاج جنة

وحبابك والله

وكيفنك

ممكن اشرك ,.... من الشركة بتاعة الطير عشان الناس ما تمشى بعيد :d

اها ممكن اشترك

عندى سوال كدا :-

انا بحب الويكة شديد رغم إنها لايوقة لياقة ما عادية ....

هل ممكن تشرح لى مكوناتها شنو وتستصحب معاك السودانى المشى امريكا وقبضوا عليهو عشان شايل ويكة ...

اها فى انتظارك عشان نلايقها ياخ

:d:d




والاستاذ العاقب بيشكر الاستاذ الذي اعد البرنامج وتجاهلنا نحن المقدمين ما مشكلة بس هو عرف اسم المعد من وين ؟؟
ما علينا انا بوجه سؤال الويكة اولا للدكتور العريان يرد على استاذ العاقب وبعدين نعطي فرصة للسيد كمال كسره ليدلي بدلوه .

الدكتور العريان :: طبعا انا بذكر الحادثة دي تماما حصلت في الثمانينات انه فيه واحد سوداني متخلف تم حجزه في المطار لانه كان يحمل كيس ملئ بالويكة .. والويكة هي بودرة البامية بعد تجفيفها .. يعني شوف الجهل دولة مثل امريكا بحجم قارة متخيل انه يمكن ما يكون فيها بامية .. بس هي كل القصة ..

اد/ ذكي :تفضل يا دكتور كمال كسرة ..
نشكرك يا دكتور
.. اولا الشخص المغرور المفتري بيفتكر انه سوداني شايل زواده مع عفشه عبارة عن غذاؤه في بلد مجهولة بالنسبة له هو نوع من التخلف .. وشئ طبيعي انه الانسان عندما يسافر الى بلد غريب عليه انه يتزود بطعام يكفيه لفترة حتى يبدا بالتدريج التعود على اكل البلد الغريب .. والخواجات انفسهم عندما ياتوا الى بلادنا تكون معهم معلبات من البلوبيف وخلافه ياكلوا فيها حتى يتعودوا على اكلنا ... لماذا لم نقل نحن على اكلهم نوع من التخلف ... هم شككوا في الويكة على اعتبار انها ممكن تكون مخدرات هو دليل على جهلهم هم وليس دليل على حامل الويكة .. اذا كان هم لاتوجد عندهم ادوات تميز بين البامية والمخدرات اذا هم المتخلفون وليس نحن ..

د/زكي مشكور جدا يا استاذ كسرة فاصل اعلاني ونعود

درديري كباشي
20-08-2009, 11:15 AM
وعندى كمان حبة سعال تانى

ليه نحن بنسمى الأسود لما نعمله ملاح ملاح اسود ...

وليه لما نعمله سلطة برضو بنسميها سلطة اسود

هل هى أزمة مصطلحات أم أزمة ملحات

مستصحباً معك إنى بريد سلطة الاسود وكدا ... ودائما عامله لى حيرقاااااااااااان:d:d


د/ زكي / يلا يا جماعة سمعته السؤال الثاني من الاخ العاقب يلا يا دكتور تعليقك شنو
..
د/ العريان : هو دليل على سزاجة اهلنا بالسودان .. لانهم يسمون البازنجان .. الاسود لذلك الطبيخ المصنوع من البازنجان يسموه طبيخ الاسود .. وهم ما يعرفون انه فيه بازنجان لونه ابيض .. لذلك قيل انه سوداني زار مصر واول مره شاهد البازنجان الابيض .. رجع وحكى لاهله قالهم يمين في مصر في اسود ابيض ...
د/ زكي : ها ها ها ها حلوة يا دكتور حكاية الاسود الابيض دي .. رايك شنو يا استاذ كسره ..
استاذ كمال كسرة .. بصراحة انا مستغرب جدا من استخفاف الدكتور العريان من كل شئ سوداني .. ثم انه ما الفرق اذا سمينا البازنجان الاسود او الاخضر هو اسم يميز نوع معين من الخضروات هل تسميتنا للاسود غيرت في طبيعة الاسود بشئ هو مصطلح عندنا يعرفه بائع الخضار والنساء والاطفال والرجال .. ما نحن نعرف انهم في الخليج يطلقون على البطيخ الحبحب.
وسلطة الاسود هي طبخة سودانية تتكون من الاسود المقلي المطحون مع زبدة الفول السوداني .

درديري كباشي
20-08-2009, 11:21 AM
ذكي/ معانا اتصال جديد ايوا منو معانا .. على صوتك لو سمحتى ..... في صوت صغار حولك سكتيهم لو سمحتي ايوا يالا اتفضلي اسالي
الوووووووووو ,,,,,,,,, د0قاسم معاك الحاجة السره عندي سؤال لي اخونا كمال كسرة وبما انو اسمو مرتبط بالكسرة وهو من عشاق الاكلات الكسرية رايك شنو كمال كسرة في الكسرة الحبشية وهل انت من محبيها ؟ مع انها في الاساس اكلة غير سودانية
ولك الشكر

د/ ذكي السؤال موجه لك يا استاذ كمال

استاذ كمال : انا اشكر الحاجة السره وسؤال فعلا يستحق الاشادة وهي وضعتني في مطب ظاهريا . بما انه انا متعصب للاكلات السودانية وعلى راسها الكسره اذا توجد هنالك كسره اجنبية هي الكسره الحبشية . وانا اضيف انه لها طبيخ خاص يسمى الزقني . وهذا الزقني هو عبارة عن دمعة (او يخني كما يقول العرب) ولكن مستخدمه معه شطة بكميات كبيره والاحباش لهم تركيبتين من الشطة شطة في شكل بودرة مركبة من عدة انواع من البهارات تضاف للشطة منها الزنجبيل والحلبة . لذلك هذه الشطة البودره يعرفها الاحباش باسم (بربري) . كما توجد شطة اخرى بديلة في شكل عجينة تقريبا لها نفس نكهة البربري تسمى شطة (دليخ ). هذا الزقني زائدا الكسره الحبشية وهي تسمى (لحوح) هي الوجبة الرئيسية عند الاحباش والارتريين وخاصة في المناسبات وحتى لا يوجد غيرها . الاحباش في مناسباتهم يجتمع الرجال والنساء في تقطيع الذبيحة حتى لو كانت ثور الى مكعبات صغيرة جدا وتطيخ كل الزبيحة في حلة (طنجره عملاقة ) واحدة في شكل طبيخ الزقني كما ذكرنا . بعد ذلك يقدم للضيوف وهم جلوس في شكل حلقات صينية كبيره عليها طبيخ الزقني والكسره الحبشية فقط . ومريحين بالهم من تعدد الاصناف لا محشي ولا ضلع ولا غيره .

اما بنسبة لردي على االحاجة وهو انا من عشاق الزقني بالكسره الحبشية بل حتى اهاجر له الى مناطق بعيدة وعندما كنت بالمملكة العربية السعوددية بعض الاحيان اذهب الى احياء مثل ام الحمام والناصرية بالرياض وهي اماكن تجمع الاحباش لاتناول الزقني بالكسره الحبشية من مصادره الرئيسية . ورغما عن ذلك لا اعتبر نفسي خالفت خطي بتناولي لاكلات الاحباش لسبب بسيط . وهي اساسا ان الحدود التي فصلت اثيبوبيا عن السودان عن ارتريا هي حدود وضعها المستعمر الغربي نفسه . ولذلك كل اكلات شعوب المنطقة تعتبر ذات مصدر واحد فلا غضاضة في اعتبار ان الزقني والكسره الحبشية ضمن مظلتنا . واضيف لهم الاقاشي والقدو قدو والتي نفى الدكتور سودنتهم . باعتبار انهم اكلات غرب افريقيا . وانا اقول ان كل اكلات افريقيا اولا مصردها من النشويات هو ما يعرف بالزرة الرفيعة . الفتريتة والدخن وقدم الحمام وكل انواع الذره المعروفة . هي تعتبر تحت اسم واحد وهي وجبات افريقية الخامات والمنشا ولا تعتبر اجنبية او دخيلة على السودان

درديري كباشي
20-08-2009, 12:02 PM
ذكي :شايف المخرج اشر لينا على انتهاء زمن الحلقة على كل حال نتقدم بالشكر للدكتور الغرقان والاستاذ كمال كسره ونشكر كل من شاركنا في انجاح هذه الحلقة وموعدنا الاسبوع القادم في حلقة جديدة عن الكره السودانية ما لها وما عليها وكونوا معنا في الاسبوع القادم




مع الاتجاه المعاكس

mandla
20-08-2009, 11:59 PM
[رمضان كريم اقتراحك جميل ونحن في انتظاره بس امرقنا من الكورة وشوف لينا موضوع الابري والرقاق القدت جيوبنا ومن بعد ارجع لينا للسكر الفي الجرايد ب104 وفي السوق 150 وحتي ناس كنانة بشربو الغلابة بالسعر دة

mandla
21-08-2009, 12:06 AM
[رمضان كريم اقتراحك جميل ونحن في انتظاره بس امرقنا من الكورة وشوف لينا موضوع الابري والرقاق القدت جيوبنا ومن بعد ارجع لينا للسكر الفي الجرايد ب104 وفي السوق 150 وحتي ناس كنانة بشربو الغلابة بالسعر دة

سودانية وافتخر
21-08-2009, 07:56 AM
والله برنامجك جمييل خالص ونحنا في انتظار الحلقة القادمة باذن الله