خربشات شعرية [الأرشيف] - منتديات ودمدني

أشرف صلاح السعيد

23-08-2009, 11:00 AM

مدنى درة بلد

مدنى يا درة بلد
يا ندوة لامة ومنارة ضاوية
عتق الزمان بُعد الأمد..
حلقة ذكر ومسيد كبير
لالوب سبح جلاليب تدور
ومجدوب شرد..
مدنى يا السنى الجليل
رفض السحر وكل الفتن
يشهد عليو نهر الرهد..
يا خليط فريد
ضم القصيد وكل الضواد
بنسق جميل بيو إنفرد..
حويتى الجمال وسمح الخصال
إنتى الحنان صدر الأمان
للبعيد قبل الولد..
صغتى الحُسن لوحة أدب
نسيمك أريج نداه الشعر
بانِّك يميل ثملان يقين
ولمن يجف يخطو فيو صورة الصمد..
الأزرق يدندن مع الأصيل
ترقص مراكبو
والقبة ترقب فى طرب..
مدنى يا أبوى الفقير
لين الطباع
خُلق الكرام
سطوة أسد..
ياكى الملاذ
ياكى الجوار
والنصرة لكل الورد..
الجامع الكبير ياهو الدليل
نادى الجميع صحى الضمير
الكل زهد والكل حمد..
سقانا اليقين من زمن الأمين
فطام تقى فى كل كبد..
وواصل المسير محمد سعيد
إمام جليل ساد العُمد..
مدنى يا الحضن الكبير
يا يمة الحنون
مارضيتى ضيم
وقفتى للمحتل وتد
بالمؤتر شحذت الهمم
طلعت شرارة عمت ربوع
جابت ارجاء البلد
ياكى القيادة
ياكى الريادة
و ياكى الجلّد
ودفاك معانا من المهد حتى اللحد..
فى صدرك تتمازج عروق
حتى الغريب وعابر السبيل
جواك ما ينفرزو من ود البلد..

بقلم : أشرف صلاح الدين السعيد

أشرف صلاح السعيد

23-08-2009, 11:12 AM

مدنى يا..
مدنى ياسودان كبير
فيكى المِلَّل..كل التلاوين
من ربوع ارض الملايين
زنتى المزيج طعم العدل
وكنتى للسودان ضمير
بتطبطبى للكل جراح
بتهدى للكون الصلّاح
بتضوى للعميان طريق
بتسمعى الطرشان نشيد
وكنتين جمالك فيهو الكتير
همسك سماع
وغضبك صداع
بكسر اعتاو جبين
عشان يستبين
مايستكين وقت الصراع
وجواك كتير لساو كتير والله كتير
وفى إستراع..

بقلم /أشرف صلاح الدين السعيد

أشرف صلاح السعيد

23-08-2009, 11:19 AM

شوقى ليك..
مدنى ياجواى حنينة
البوم ذكريات وورق قصاصة
ياسبيل لموية باردة
بغربتى اكوسك كواسة
متين ارجع ليك تانى
والقى فيك احلى الوناسة
تعرفى يايمة الحبيبة
حاسى بسجن معاو حراسة
غريب تايه بحبستو
زى المصلى وطى للنجاسة
او اغيبشن القفة همو
ملّ كل الوان السياسة
اللقيمة بقت هميمو
زى النجاح وقت الدراسة
زى المنتظر وقت الاذان
يسمع بدالو صدى انتكاسة

بقلم / أشرف صلاح الدين السعيد

أشرف صلاح السعيد

23-08-2009, 11:29 AM

رأيت صورة بجنوب البلد فيها وليد من الجوع سجد..
ووراهو انتظر العقاب عشان يبقى ليو ود الاحد..
زعلت ليو ومن الجميع وقام القلم يسرد سرد..

والله حرام..

شفتو الوليد كوم العضام
وعقاب راجيو يكون طعام..
صورة أغرب من خيال
وبعازة بيحصل ده الكلام!!
شنو السبب وشنو العلاج
كيفن نرمم إنسان حطام؟
أما السبب مفضوح عيان
تاجر حرب ومعاو خدام..
عبدو القرش عيشة القصور
غشو الجميع بدون إعلام..
شغلونا بهم الرغيف
وكيفن نندد بالنظام..
ورغم كبر الكروش
إدسو فى وسط الزحام..
وكان للعلاج معروف بيان
ما هو الهتاف بصوت تمام..
وأُلوف تسير تردد نشيد
ودموع تسيل على ده الغلام..
القصة أعمق من كده
ميراث طويل خمسون عام..
يوم داك لمن طلعو الإنجليز
وقلنا ودعنا الإنهزام..
بس للأسف ما ودعنا الشتات
وآلام نفوس سر الخصام..
وقالوها أولاد الجنوب
شنو الجديد ووينو العلام..
سيدن مشى وجانا الجديد
ماالملك ما بيفضل دوام..
القصة عشعش فينا خوف
نضل نتوه ما نحقق مرام..
وشنو المرام؟ الله أعلم
يمكن يكون نعيش وئام؟
وبرضو فشّلنا الحلم
والكل بيفتش عن مُلام..
مرة الظروف مرة القفوف
والكل يشير على الحكام..
ونيسنا من بيناتنا إحنا
بيتخلق كل النظام..
وإنو الخلل جوانا نحن
ومن جوانا بجى السلام..
ماهو اغانى وتجمهرات
وخطاب حماسى وطِيّير حمام
يا اخوانا أبحثو عن يقين
واعرفو الحلال من الحرام..
وكل الحرام وعين الحرام
الطفل بينا يكون ركام..
بقلم / أشرف صلاح الدين السعيد

أشرف صلاح السعيد

23-08-2009, 11:32 AM

والله حرام 2
ياوليد حليلك كتير
راجى الرغيف؟
ماتستنى بطول انتظارك
ماالكل بطابور السلطة بيقيف
كيمان شايلين سلاح
وكيمان محتارة بالمذكرة والتوقيف
مااتلخبطت اتجاهات الطريق
لاشرطى بينظم مرور ولا عريف
والكل بدفس فى شبكتو
وبيتسابقو الشتران حتى الحريف
قوم يا وليد ناسك نسوك
كل المشاهداتلونت بلون مخيف
لون الطمع لون الضياع لون الأنا
جو النفوس داكن مخفيف
قوم ياوليد اتخطى الالم
لملم شتاتك اوقف نزيف
كترو عقبان للبلد الجريح
المابعافو الفطيس او حتى جيف
قوى القليب املاو عزم
ما بيناتم بيتعفص القلب الرهيف
مابراعو احن المصاب
لابينجو منهم البصير ولا الكفيف
قوم ياوليد ماتفقد امل
ربك رحيم خلاالجفاف وراو خريف
خلق الضواد بكل زمن
بوسط اللصوص بيعيش شريف
عز السموم وعز الحموم
بيجى الرشاش باحراهو صيف
قوم ياضمير كفاك خوف
كفاك نوم بكل بيت وبكل ريف
قوم ياضمير سيب الاستكانة
بالظلال وبالحوارى وبالرصيف
قوم ياوليد نسند بعض
انا زاتى زيك شالنى خوف ماقادر اقيف

بقلم /أشرف صلاح الدين السعيد

أشرف صلاح السعيد

23-08-2009, 11:50 AM

أشرف صلاح السعيد

23-08-2009, 11:53 AM

وقلت فيها..

فيّض الفرح..
قالو الفرح بيحويه شعور
إلا بيك عم المدائن والثغور..
يتنسم الياسمين شذاك
تبسم تشع كل الزهور..
أما المسيد ولهان ذكر
خالط الفرح عطر البخور..
رفض الكنارى يحط رحال
زان الفضا يصول يدور..
وكل الحياة طعمت سمو
إنهزم الحزن عم السرور..
وإتغيرت صور الدروب
كساها الوميض زى البدور..
كل الورى تنهل فرح
ولسه الفرح ما فيو كسور..
كيف تنتقص أو ينكسر؟
وإنتى النبع لكل الحبور..
تتشابا ليك كل القلوب
تهديها منك أحلى العطور..
غاب البدر قايدو الخجل
كيف للنجوم معاك حضور..
وحاشاى ما عرفت الحسد
لما السحر كسر جسور..
ثملان أنا مشبع عشق
عايز مزيد مدمن شعور..
مشتاق كتير رغم اللقا
كيفن يكون لحظ الفتور..
أمنان أنا فى عشرتك
ما بحضرتك بتتلاشا الشرور..
وكيفن تحل غيمة كدر
والطيبة روية منك بحور..

بقلم/ أشرف صلاح الدين السعيد

أشرف صلاح السعيد

23-08-2009, 11:56 AM

سألونى عنك..

سألونى عنك كيفن اجيب؟
ووينو الحرف البملى مساحات جمال
مزروعة فيك
وينو اللحن ؟
وينو الشعر البوصف الحسن العجيب
كيفن اجيب؟
احكى روع الحضور؟
احكى احساس الذهول؟
احكى لمن ارتمى بحضنك نعيم؟
كيفن بتبدد ظلامات الغيوم
وبترتحل كل عصابات الهموم
ولا احكى عن الحبيب
كيف الحكى
ووين الكلام البيتلقى
ماكل الكلام بيكون ممل
بيكون رتيب
وأرد اقول
انتى الهبة
و خير من نعم الحمر
زى ماقال الرسول
ارد اقول
انتى السبب لكل الرضا
ويكفينى بيك للفجر بقوم
ارد اقول
انك معاى يكفينى قول

أشرف صلاح الدين السعيد
__________________

أشرف صلاح السعيد

23-08-2009, 12:00 PM

لما زعلتها قلت..

برغم سماحك حاسى الأسف..
آه ياأسف لو كنتا بتفيد
تقدر لذرة ألم من قلبو التشيل
كنت طولت السهر
و إعتذارى مستمر صبح وليل
عشان حبيب شديد قريب
بسكن معاو بدنيا الغرام
إلا من غير قصد زعلت الخليل
كيفن حصل مادا المهم
ورينى كيف ابدد حزنو النبيل
ياريت تقول او حتى التشير
كيف بنغسل ذنبى الكبير
كيفن ارجع للزمن
واوقف كل المواقيت
عشان اقول فيو بس نشيد
لذنبى ماارجع أعيد
عشان مايحس الألم
أفديهو بقلبى البريد
أحذف لحظ الحزن منو
ورينى كيف ماتقول مستحيل
خليهو طيب هو اليقول
كيف لخلاصى بكون طريق
خليهو يتمنى الخيال
يطلب كل أنواع المحال
بلقى المحال حواليو ذليل
بقيت معاو بحس بخجل
وبعينو بحس الغرق
بعد ما كانو الرمال
لشط أمان فيهو النخيل
فيهو السفن من غير شراع
بترسو فيو من غير دليل
آه ياأسف كم بكرهك
بقيت أعرفك
بقيت أحسك
بقيت اشوفك
بعد غياب زمنا طويل
والواجعنى منك
بقيت بتكبر
وخايف اوالفك
مااقدر أخالفك
تملكنى أطيافك
وتبقى ادمان
تبقى جواى تقيل..

أشرف صلاح الدين السعيد

أشرف صلاح السعيد

23-08-2009, 12:06 PM

أشرف صلاح السعيد

23-08-2009, 12:10 PM

الناس فقدت المنطق واليقين ..
خربشت وقلت:

ليه الشفقة؟؟
هاااى يازول تعال بيجاى
مالك جارى زى السعران؟
شنو البتفات
غير الثعلب ابو سبع لفات
فى زولن مات؟
رزقك قاعد وهو برجاك
زى الموت الحتما ابدا ماحيختاك
سيب الجرسة
سيب الشفقة
كان للسترة وكان للقفة
مابتجيبن شلهتا ولا حتى الوقفة
اصلو القصة ماعايزا الهلعة
سمعت بيوم كترت البرجسة جابت سفة
ولا عريس نفض الكيس بحتة خلعة
بالايمان
تقى القلبان
وحسن الظن بالرحمن كلو بيكون
وياها السنة عمق ازمان
كان الارزاق بييد انسان
ولا مهمة كمان للجان
ليك الحق وكل الحق تكون قلقان
تكون سهران وشديد مهموم
وكمان حيران
بس يازول ماياهو كلام
وكل الحق اسمعو تمام
كل نفيسة ليها نصيب
ليها رزق ماهو بغيب
وغير مكتوبا مابتصيب
ماالتوزيع بيد العادل الحنان
ووزع رزقو قبل ماتخلق يا انسان
عطاؤ كتير
عطفو كبير
مااصلو كريم
اهدا وروق حس بأمان
استغفر ربك
واتفل تلاتا بيسراك على الشيطان
__________________

أشرف صلاح السعيد

23-08-2009, 12:16 PM

اخوكم اتخيل واحدة طولت لسانا عليو..

كتب وقال:

أدب الرجال..
صبر الرجال كان حد ..الجاية ما معروفا
ياحرمة لزمى حدود قارورة ماهى بخوفا
وصانا حبيبنا رسول ووصيتو ما بنعوفا
الرفق بيك مطلوب الرجالا ما مألوفا
ما بستقو ع النسوان بكلمة قايدا حروفا
والسافرة ببقالا غطا عينيا ما بتشوفا
انا للحرابة ترس للحارة بسيوفا
حاشاو كلامى جرس للعايرة والمكشوفا
ودمدنى زولا كلس كلماتو ما مكسوفا
اسألى عنو البلد صحراها وجروفا
طبيعتو فيها الادب والعيبة ما بلوفا
كلمتو فيها دهب برميها ما محدوفا
وكان للجراءة اسد صيدتو ما معيوفا
ونارو باقة لهب للقبيلة بضيوفا
*************************
يالسمحة اعرفى مانى بكشيف الحال
وفى الشينة مانى البقضعو وصال
وليكى منىنصح ما تكررى الموال
خلى الاخوة تدوم وماتقطعيها حبال
نتلاقا فى الافراح واديك كمان شبال
اصلو القليب الحر ماتهمو قيل وقال
وودمدنى زولا جد تريان وما قدال
راضع الشهامة تد ود عزيز الرجال
داقى الرجولة وتد بصخرة ما برمال
طبعو الامان بجد اصلو ما بشكال
بس للحقارة كعب ان وقفو قصادو جبال
يالسمحة روقى تب مانى بهوين حال
اخوك بالله فحسب اقصرى اللسان الطال

معانى الكلمات:
ودمدنى: اخوكم الكلس (بس فى منتداكم يظهر سبقنى زول للاسم)

بقلم /أشرف صلاح الدين السعيد

أشرف صلاح السعيد

23-08-2009, 12:22 PM

حنين مغترب..

عازة يا أحلى كلمة
طالعة من جوايا غنوة
يا حلاة معناها لو عدت ليك يمة..
ما كى الأمان وسط الشرور
وكل الحنان
فرحة عروس يوم المتمة..
فيك الكرم ماليو حدود
بطرانة جد
كلك سبيل بدور لى جغمة..
تزيل عطش كل السنين والإغتراب
مشتاق خلاص أدينى ضمة..

أشرف صلاح السعيد

23-08-2009, 12:24 PM

خربانة الزايلة..

هاى يا زول الزم الجابرة
كشف الحال
شين القول..ماهو تمام..
كترة الغيبة
سيرة الناس
اكان بالدين كلو حرام..
وين المتعة برد النبزة
وشتمة بشتمة
وسب الغير كأنو لزام..
ماهى غنيمة رد الشينة
كلمة شر بكلمة شر
وشجار وشتام..
ووين الحكمة ازعل زول
اشرشح فيو
امسخر فيو ونعيش فى خصام..
اطرا الآخرة
واذكر ربك
عمل الخير ولو بى بسمة تلقاو قدام..

بقلم / أشرف صلاح الدين السعيد

أشرف صلاح السعيد

23-08-2009, 12:26 PM

فلاحة الدنيا..

هاى يا شاب شمر ساعدك
فلاحة الدنيا بتدورلها همة..
زود نفسك عزيمة قوية
وسيب القعدة وناس اللمة..
كل سعاية ليها عداوة
كرب صبرك وما تهتمة..
شد مجدافك بالإيمان
يقينك بهزم قول الرمة..
وكان للدنيا ياهى دول
مرة سعادة ومرة فى غمة..
وكل الناس بيها جلل
ماكا براك يا ود اب عمة..
على مقامك بالصلوات
وبجهد إنسان بتقود للأمة..
لمن يصحى جواك ضمير
بجى حوليك صاحب الذمة..
ممكن تتعب حبة كمان
بس بسعيك بتصل القمة..
ونجاح انسان رهنو كفاح
مهما طال مشوار الظلمة..
بقلم/أشرف صلاح الدين السعيد

أشرف صلاح السعيد

23-08-2009, 12:29 PM

لقاء عازة..
عازة لو إتأخر لقانا
بعزمنا ممكن نبدر..
المهم إرادة عيالك
باقى الكلام لا بقدم لا بأخر..
الزمن إن ترسو سارع
البتزرع لابد بيثمر..
ماالمستحيل حجة ضعيف
لو النوايا عدمة معكر..
والسبيل ماليهو تالت
يا يقين يا بيهو نكفر..
والإرادة طبع أصيل
ولو المعاول فيها تكسر..
والصدق كنز الحياة
مابيوازيو ألف متجر..
يا زمن لف ودور
إحنا برضو ما حنفتر..
والزمان مهما طال
بذر الإرادة لابد بيزهر..
لو عقدنا العزم نية
قطاف حصادنا ما بيودر..
لا ندم يعرف طريقنا
لا كأابة تحل تعسكر..
تشعر الورقاء هديل
ترقص الياسمين تعطر..
وينجب الحلم الحقيقة
موعد لقانا بيكون مبكر..

بقلم/أشرف صلاح الدين السعيد

أشرف صلاح السعيد

23-08-2009, 12:31 PM

بوش مصلح (حلمنتيش)
يا بوشاً على الطلسِ
تصلحا و بالجِبّانِ تظبطا..
مكسياً بمبشور الدِحاحِ
فزاد الخليط تألُقا..
علاك سمسم متقطرا
كأنه الثريا مُتلألئا..
إرحم لعابىّ وهيبتى
فغدوت بين البرية مُتهبلا..
السمسم دغدغ منخرى
فأردانى ومنخرى مُتسطِّلا..
أدرى بأنك صارعى
فكيف الهرب بكرشٍ مُتهدلا..
حزوتنى ببصل أخضرٍ
والجكس أعيتهُ الهرولا..
لوكسُ وكامى ونيفيةٌ
ما ضيعوه ولاتسويكة السِجنَّلا..
برغمه أعشق أكلك
فلا تسمم فيك و لا تلتلا..
يشهد التاريخ لك
لم يمت بك أحداً مُجندلا..
بل نديم الفقراء
فلغيرك لن نٌحيد أو نُبدلا..

أشرف المتبوش

أشرف صلاح السعيد

23-08-2009, 12:36 PM

البشير قد نختلف أو نتفق معه، لكن الا تتفقون معى أن قضاينا ومشاكلنا الداخلية هى شأننا الخاص ؟ ولا شنو الراى؟

لا للغرباء بيننا..

نحنُ قد أمنا ولن نُلدغ نوبة أُخرى
ففطنةُ المؤمن تقيه شر ذاتِ الحفرة
سُلبنا الحق أمساً من شعوبٍ غير حرة
لذنبٍ ما جنيناه سوى عتمة البشرة
فرنجة جاؤوا غزاةً نهبوا النهر والخضرة
ثم جاروا وتمادوا فاستعبدوا الناس قصرا
أرسلوهم بالبحر غرباً بلا ماء لا زادٍ و لا سترا
وبعد أحقاب الزمان أتونا ليعاودوا الكرة
بتهيمات زائفات لحثالات ليسو ببشرا
بأنّا إغتصبنا نساؤنا وعِثنا بأرضنا شرا
وأحاجىُّ ملفقات لا تحمل من الحق ذرة
وتناسوا سرقة الأطفال ووئد محمد الدُرة
أبو غريب تشهد على كل أطياف المعرة
حاكموا العربى علناً وبنى الفرنجة سرا
بدساتير إبتدعوها كأنهم ملكوا المجرة
حللوا الحرمات إفكاً وحقروا الأديان جهرا
يأتون الرجال دناءةً كأنهم لا يصنعون فجرا
تحت مسمى الحضارة جعلوا القذارة طهرا
هيهات دارفور لكم فما لكم بها قدرة
و لا بفاروق البلاد فلتستبعدوا تلكم الفكرة
بالأمس دحرنا جحافلكم بتكبير وعشرة
واليوم أقسمنا من البشير لن تمسوا الظفرا
فإن هلك الرجال فنساؤنا له نصرا
فمن نصر الإله فلن تصيبه العسرا
ومهما توالت خطوب فنحن لها دخرا
فنحن قد أمنا إن مع العسر يسرا

بقلم / أشرف صلاح الدين السعيد

أشرف صلاح السعيد

23-08-2009, 12:48 PM

كان يا ماكان..

لابد نسير..

ياقليب ودع خلاص
زولك نساك لعهدو باع..
ركب السفين ما هو بحزين
كان الربان فك الشراع..
مخر السفين دوى الصفير
بليل بهيم من غير وداع..
يا قليب لملم شتاتك واستبين
كفاك حداد وهم إلتياع..
كل دى السنين لساك حزين
لازلت تطعم عبرة وداع!!
خمس سنين ما فقدت الامل
يمكن يلوح فى البعد شعاع..
زى داك فقير
الكسرة همو لما جاع..
فك الخيام وإرتحل
وإن إهترى كل المتاع..
أصلو الرجا قبيل إنهزم
زبل الشعر خرس اليراع..
وإتبدلت كل التياب
وإتبدل أمن الأمس ضاع..
يا قليب حرام كفاك
هلكو المُحِبة من غير صراع..
ودع الحلم الجميل
زولك نساك لعهدو باع..
أنسى لازم ده المهم
أكسر جواك حس الضياع..
ماالدنيا لابد تسير
ولو إنكشف مليون قناع..

بقلم / أشرف صلاح الدين السعيد

أشرف صلاح السعيد

23-08-2009, 12:51 PM

ديل ناسى..

يا عظمة الشعب البعانى
لما يدس همومو ورا الهظار..
وما ينتظر على القضبان
يفرفر فى إنكسار للقطار..
ياسلام عل اهلى الغبش
لما يسعو للرزق طول النهار..
فاس يسهل سلوقة تبذر
وينقلب حال البوار لعمار..
سيد اللبن ينده يغنى
ترقص معاو تُمن الحمار..
فتاح عليم رزاق كريم
إترشرش شوال الخضار..
أهلى الغبش ناس حااارة جد
وغوث البنادى مالو نظار..
هداك البحر أسألو
يوم جنا سجنوهو بجدار..
بالمتاريس ملكوكة بعرق
الصغار قبل الكبار..
ما الشهامة بتتولد
مع الرضيع قبل الطُهار..
ياهو شعبى البعرفو
ولو كساو مليون غبار..
بينكشف حرم قريب
ويبقو للناس منار..

بقلم: أشرف صلاح الدين السعيد
__________________

أشرف صلاح السعيد

23-08-2009, 12:54 PM

قصة شاكوش (حلمنتيش)
كل المحن جيانا من داك الجميل
ويشهد التاريخ كم من عبر خطاها صاحب القد الرشيق
واول خطا عرفو البشر كان الغواية من الرجيم
يا حوا ليه ما عندك صبر
تبيعى الرخيص بخلد الجنان
وتطبعى الجايات وراك ما نطوق معاهم طعم امان
يبيعو فينا زى دواب
يا زول تعال بكم تبيع؟
ابيع شنو؟ ما معاك هداك احلى شاب!
فاهم غلط..
تقصد هناى؟ انا وهو يادوب صحاب..
بين يوم وليلة إتباع هناى برخص التراب..
أصلو الجديد عرف الخليج
تعب كتير وشد الحزام
سوى الوفر ترك الطعام
عشان يعود راكب الجديد
ونزل البلد بعد سنين
نسي فيها زولو القديم
الباعو يوم داك لمغترب..
ويتكرر اليوم من جديد
يا بت انا ما زول عرس
الود خلاص عامل شفت..
راجع بعد شهر للدوام
وترد عليو:منو الجاب سيرة العرس؟
ظرافتك بتساعد نكون جوز حمام..
وإتخدر المطعون قبيل بحلو الكلام
أدمن الوش الصبوح
وإتجهجه كتير لدنو الاوان
طبعا خلاص راجع هناك
للبيداء والبترول والخيام
ممكن اقول
تقول شنو ؟
ما تدللي عارفه شنو ورا الكلام
فاجئتني
بعدين تعال
ما قلت مالاعب قبيل
شنو الحكاية ؟
كان معاك ورق شين
ما تقلبي الموضوع هزار
رايك شنو : يكون متين ؟
يكون العقد قبل الرحيل ؟
أرجع انا وأرسل ليك الاستقدام ؟
بالسرعه دي؟
تكون خطوبة ونجرب بعض
ويسافر هناي المغترب
ويمطر سماها بالهدايا وبالعلب
شي دهب وكمان هدم
وقروش مطر وشوقا لهب
الو الو اهلا سلام
شوفي الزمن وبيقينا والله جوز حمام
رسل الشيله وكمان ريال
ومرت سنين ولف عام
ومن المطار للسمحة ست الحسان
اتبدل العش القبيل لقصر رخام
وصيوان كبير وحديد زحام
وتوقف التكسي العتيق
نزل الظريف فارس همام
شق الحشود والفين سؤال
اللمه دي وفنان تمام ؟
وبلفته خاطفة كان الزهول
برك الجمل سقط الحسام
ودمعه حاره فوق الخديد
الفرده كانت هي العروس
ضاع الشقى وشد الحزام
لحق العتيق واداهو لزه
ياعم طويل للمطار
وفي الغربه واكب كل شريط
عساهو يلقى فردة حمام

بقلم أشرف صلاح الدين السعيد
__________________

أشرف صلاح السعيد

23-08-2009, 12:59 PM

الود عاقد ومشمشتو ادللت عليو ..

كبا الجرسا وقال:

مشمشه

مشمشه

يامشمة سيبي الجفا
خليها تطلع من شفا
فيها السعادة المترفا
قوليها مافيها الشفا
وما تخافي ابدا احرفا
بيها المحنة نولفا
ننبذ اناتنا نكتفا
تعسكر موده ونعرفا
تسري السكينه مع الدفا
تصبح ارواحنا مرفرفا
وحاشانا ابدا نخالفا
*******

قوليها وسيبي الاختشا
معذوفا حلوه مدندشا
تطفي ليهبا بالحشا
تحضن حواس وترعشا
تزيد الحماس وتحرشا
نصل القمرا ونهبشا
نتسامر معاها ندردشا
وامرح معاك في فرفشا
واهتف بحبك مشمشا
ما القلب بيك انتشا
وودع ايامو الموحشا
***************

قوليها وسيبي الوسوسا
كرامتك باقيه مترسا
حاشايا قطعا ادنسا
اظلل عليها واحرسا
صرح وقولا و اهمسا
خلي الخجل والدسدسا
ارحم شعوري ماتجرسا
كانت قويه متمرسا
معاك عايزه تدرسا
وعن حياتك تحدثا
تمعن ملامحك تفرسا
تملاها رقه تهندسا
تخلد معاك تهامسا
قولا اوعك تحبسا

بقلم اشرف صلاح الدين السعيد

أشرف صلاح السعيد

24-08-2009, 02:16 AM

انتى فى روحى جوه..

انتى فى روحى جوه
زى يقين ماليهو آخر
زى قناعات السنين
بتدعو بكل المنابر
بالمساجد والكنائس
فيها حق باين وظاهر
زى الصدق أكوان ضيا
قايدا للعميان مساير
اتيقن أمان بخطوتو
تابع خطاك لوين تسافر
أبقى جوه
ولسه جوه
وجوه جوه فى المشاعر
أبقى غنوه
وغنوه حلوه
والأمانى لكل شاعر
يكون غناهو قالو هوا
وباقى الحكى يسكن مقابر
انتى فى روحى جوه
زى يقين ماليهو آخر
انتى ماجواى ضمير
وين اكون بلقاهو حاضر
كل التعاريج بيو تستقيم
ماانتى للخط المساطر
انتى مازعيمة كل قبيلة
وللمكارم وللعشائر
انتى ماللكون غنيمة
والفضيلة ليك تشاور
انتى سكنة كل مواسم
مراسى شط للمواخر
انتى ماكل المكاتب
والدوايات والمحابر
للحكايات الجميلة
والدهشة من عينيك خواطر
انتى الفهم لكل طالب
حتى لو كان مامذاكر
ديما برسى بشواطئك
وبتحتوى الجوايا ثائر
زى جنون الريح وموج
بتنهزم طرف الجزائر
انتى مااستراحات السفر
وفرحة لقا للكان مسافر
انتى فى روحى جوه
وجوه جوه
وأحمدك ياربى شاكر
لعطاءات الروائع
البيها أبدا مانى ناكر..

ابوخالد

24-08-2009, 07:35 AM

اسلام فرح

24-08-2009, 08:12 AM

أشرف صلاح السعيد

24-08-2009, 09:51 AM

اخى أشرف ..

الروعة ذاتا مكملا ... عقد من اللآلئ منضوم بالحروف

الراسمة لوحة شفافة ... خطوط ناعمة وأنيقة ...

لله درك أخى أبدعت كلمات تمطر دعاش يتساقط

علينا بردآ وسلامآ يغير الآجواء الرمضانية الحارة

الى ضباب يرطب حرارة الجوف ... ينعش الأرواح

بمعانى غاية فى الإبداع ....

صديقى موعودون بشلالات من الأشواق الى حرفك

الدافئ الرصين .... فلا تبخل علينا بين لحظة وأخرى

بمدنا بما تفيض به قريحتك علينا .....

ودمت بألف خير أخى

ورمضان كريم

عوافى اخوى ابوخالد ..

رغم انها خربشات فقد سعدت خجلا بانطرابك لها وان كان الانطراب مجاملة..
اخربش ولست ضليعا ببحور الشعر وانما اللحن السماعى فلذا عذرا ان نشذ اللحن حينا واصاب حينا..
يسعدنى مرور من مثلك من مرتجزى الكلم لحنا سلسا وعذوبة ..فمرورك يشبع كل غرورى ويصلنى الى اقصى حدوده ولما لا وشاععر كلمة قد اعلن باعجاب لى من كلمة..
كن قريبا دوما فاستمد منك كل شجاعاتى الادبية ..
يديك الف عافية ورمضان كريم عليك وعلى اسرتك الكريمة ياعازف عذوب الكلمة..

أشرف صلاح السعيد

24-08-2009, 09:54 AM

صدقته يا اشرف ومدني تستاهل احلى القصيد بارك الله فيك

وبارك فيك اسلام فرح..
شكرا لمرورك الانيق ..
ورمضان كريم عليك وعلى من يهموك والمسلمين جميعا..

ودالعمدة

24-08-2009, 09:55 AM

أشرف صلاح السعيد

24-08-2009, 12:35 PM

الله عليك ياأشرف ياود صلاح السعيد

ابداع لدرجة الامتاع بل لدرجة الاشباع

وتخالنى أحمل سيفاً أعرض به مابين أبياتك

وبيوت ودمدنى قبابها أزقتها حواريها وننشد معك :

(حتى الغريب وعابر السبيل
جواك ما ينفرزو من ود البلد )

ودالعمدة محمد سعيد الباشمهندس ياسر عوافى عليك وعلى كل الاهل الطيبين..
ليك وحشة ابن عمى الجليل المرحوم محمد خير وابن عمتى الحبيبة بثينة..
اتعرف ان عمى محمد خير رحمة الله عليه هو من اوجد حب القصة بنفسى الفقيرة..
كم من المرات قصنى الحكاوى ..ادمنتها منه وانا طفل لم يتجاوز السادسة..
آه من مدنى وكل كبارها وصغارها الرائعون..
ليتنا نعرض جميعا بها وقد ازدانت كسابق عهدها بالجمال الداخلى والخارجى الملمح..
ونكون بها كما كان الرائعون بالعلم والدين وكل العلوم من قبلنا ونسير بخطاهم المتعملقة فينا الى اللحد..

رمضان كريم ولنا لقاء ان شاءالله بالعيد..

أشرف صلاح السعيد

24-08-2009, 12:39 PM

صمت الخجل..

تتذكرى يوميها داك
لما الخجل حبس الكلام..
ورحت أشكيك للقمر
كيف اتحرمتا من الغرام..
وسردت لليل والنجوم
عن العشق السور عظام..
لفاها وبقى ليها اللحم
لما العشق بقى ليو قوام..
ياالسمحة عذبنى الصمت
ومناهدة الولهان دواام..
اياما ماعرفت السهر
وصحبتنا دامت الف عام..
وماخلصنى غير اللقا
وبشير فرح تم المرام..
حتى اللقا كحلو الخجل
وقتلتا أنا من بدر التمام..
أصبت من قوس العيون
صريع أنا بأحلى السهام..
الموت جريمة وماحلال
بس موتى بيكى ماحرام..
صيبينى ديما بسهامك
وكان فيها موت أنا الملام..

أشرف صلاح السعيد

24-08-2009, 12:40 PM

حكى العشاق..

أحلى كلام حكى العشاق
لما الحس يتقل بقلب ولهان
بتبقى الكلمة كايسة الباب
تخفف عن قليب تريااان
تصل للجميل مقصود
لو آهة او جمل ألحان
حكى العشاق حنين والله
بخلط الدمعة مع الاشجان
بحكى القصة بعفوية
فيها المعنى للإنسان
واصل احكى يامشتاق
بنسمع حسك وبإمعان..
عشان نتعلم الريدة
رغم الريدة بس عطيان
قولك ببرد حشا الحبيبة
ويمكن يرد خطى التوهان
احكى الرعشة والغمة
احكى الحكمة والسرحان
ابنى طريق معاهو مسيد
يلم اللابس والحفيان
تهيم اللمة فى ملكوت
يذكرو الخالق الرحمن
ويشرد لهناك مجدوب
تحلق روحو والوجدان
احكى وقول حكاوى الريد
بنسمع نحن بتحنان
نعرف الريدة ماهى صنم
ندور حوليهو فى طوفان
نعرفو حلم فيهو علم
فيهو عمل وبإتقان
نعرفو بصيمة محال تكرارا
وإن إتشابهو الحبان
احكى وقول كلام الريد
فيهو عبر مرور ازمان
افصح وبين الانواع
نعرف الدرب عيان وبيان
احكى وقول كيف بنتوه
لما الريدة تسيب ايمان
كيف الفتنة فينا تكون
واحكى حكاية التيمان
لما غراب دفن لغراب
لما العشق قتل اخوان
احكى وقول كل الحاصل
وترخ لعشق ازمان

أشرف صلاح السعيد

24-08-2009, 12:42 PM

قليب غريب..

زعلان شديد من خجلتى
السجنت جواى قبُل لجبهتك
يوم السفر الحار شديد
واتفارقت وجهتى من وجهتك
كنت عايز اقبلك
او احضنك
او احتويك للحظة بحنتك
كنت عايز الغى الحضور
ومااشوف غير سحنتك
ارتمى بحضنك سنين
او نرجع سوى واقنعك
انو السفر ماليهو داعى
ومابسوى حتى لدمعتك
وحمانى قلبى العنيد
كيفن تهونى ومااسعدك
ماتشوفى امك لا ابوك
وتزورى حتى لغرفتك
شوفى القليب كيفن غريب
مقتول هواكى وببعدك!!
بضحى بيى وبيو كمان
عشان تقصى لبسمتك
لمن تعودى من الحنان
تحكى السعادة بسفرتك

أشرف صلاح السعيد

24-08-2009, 12:44 PM

17 اغسطس..
بدأت حياة لطفلة غرة
فرحت معاها أسرة صغرى
جات البنية معاها بسمة
ووليد هناك ببلدة اخرى
ماعندو بيها اصلو فكرة
مرت سنين ويوم وبكرة
وكان اللقا احلاها ذكرى
واتفقت قلوب تبداها رحلة
رقصت عروس بديك سهرة
وشبال وقع وقون وفركة
باركو الخلق بيت مال وسترة
وبدت سعادة للوليد
الكان قبيل ببلدة اخرى..

أشرف صلاح السعيد

24-08-2009, 12:46 PM

9 مارس..

كان الزمان غير الزمان
حتى الصباح تريان امل..
بمذاق لذيذ فيهو السمو
فيهو السعادة طعم قبل..
كان الحوار عزف فريد
ايقاع طرب عميق الجمل..
9 مارس تاريخ بداية
شارة بدء لأحلى الرحل..
بداه الحبيب بكلمة سحر
"انا برضو" قالا وبخجل..
رقص القليب طربان سعيد
مالىّ زمان عايز اصل..
إتحقق الحلم الجميل
تم الوفاق الغيث هطل..
إتشبع صباح بالبسم
زخ المطر طعمو عسل..
أخد الطلاوة من الحبيب
من رقتو وشواطى المقل..
9 مارس بقى ليا عيد
مليان بشر عليا هل..
مخاض جديد لعشق فريد
ينعش عمر لباقى الأجل..
أمو الحنان والدو الفهم
وكل المكارم ليو أهل..
"أنا برضو" جواز سفر
لكل المدائن ولوين أصل..
نجمة سما تقود للأمان
بين الربا ولسفح الجبل..
"أنا برضو" واتوقف زمان
لجم القليب بيها انذهل..
روح سمت لتلاقى روح
حزن السنين عنى ارتحل..
9 مارس كان اللقا
فجر جديد لليل انسدل..
"مشمشة"وأنا بدينا الخطى
ومعاها إن شاء الله أصل..
ننجب الحلم الحقيقة
بقلبو اليقين جواهو إنشتل..

درديري كباشي

27-08-2009, 01:27 PM

سافرت زوجتى فشعرت بغربة وشجن..

وقلت:

إنتى قايلا بلاكى ببقى..

إنت قايلا بلاك ببقى
أو بضوق الراحة حبه..
كيفن أضوقا أو أشوفا
ومصدر هناى عنى غبّا..
بلاك إنت الغربة مرة
ولو معاى ألف صحبه..
ما إنت لىّ كل حاجة
بأعلى بيك كل رتبه..
تايه زمان قبل أعرفك
ما سماى ما فيهو نجمه..
بلاك إحتار الدليل
وين النجيم يكشفلو دربه..
ودونك إتعرت دروب
حتى الرياض يبسانه جدبه..
ودع يمام فارق بلوم
خاف المكان يبقالو تربه..
حتى الخرير لجمو السكون
جمد حراكو الفيهو شبّه..
أما القمر مخنوق هزيم
راجى الشمس تفرجلو كربه..
ما بلاك بتنعكس الضواد
وكل العلوم بتبقى كذبه..
وتختل موازين البحور
حتى المفردة بتبقى صعبه..
إنت قايلا بلاك ببقى
أو بضوق الراحة حبه..
بقلم/ أشرف صلاح الدين السعيد

انا عاوز استلف دي منك وارسلها للجماعة يمكن يلحقوا العيد هنا .. ماشي رمضان وبلعناه .. كمان العيد؟؟؟؟؟؟؟؟؟؟؟؟؟؟

أشرف صلاح السعيد

27-08-2009, 05:10 PM

أشرف صلاح السعيد

28-08-2009, 11:18 AM

هى قصيدة أستدعيت من قبل قصيدة وداحمر عين "حكاية ود دفع الله" الرجل البسيط الامى الواعى..

ود دفع الله حليلك وين..

ود دفع الله حليلك وين؟
تشوف حالن اتبدل
وقلب بحب الدنيا اتكحل
وتفتش ليك سنين وسنين
عن قلب فيهو يقين..

ود دفع الله فاتو الناس
ناس الحارة وناس الحلوة
واتغير جوانا قليب
اتحير واتجرس
مرة يتوه ويتودر
ومايقدر يتصبر على المكتوب
وبقى محتاس..

عدمو الناس
واحتلت لمدن اجراس
طول الوقت تتمختر
تزنزن بعقول حراس
رجو الدينار والدولار
زى أفراس
تتسابق فى وصول مزيوف
تعدى هناك
تاركا احساس

ود دفع الله تعال يازول
عشان نتعلم ونتيقن
ونعرف الخوف من بعدين
من الشبر الفيهو الهول
عشان نتعلم حسن القول
ونتثبت مايصيبنا زهول

ود دفع الله وين نلقاك
تشوفنا نعيب للأزمان
ونسينا إنو الدهر رحمن
ونتشعلق فى التبرير
واتفننا فى التزوير
وعملنا الحجة فى السلطان
ولعنّا وزير
نهتف جهرا للتغيير

ود دفع الله ليك سؤال
دحين يوم داك من وين الكسوة؟
وقافلة مليانة بالتيبان
توزع للحجيج إيمان
تزقى فى داك
وتطرد قرصة الجيعان
وعملت عدة من ابيار
ورجعت بعد مابنت بنيان

ود دفع الله ياخ معقول!!
من دارفور!!
أسرد كمل الموال
على الدينار!!
الله عليك ياسلطان
عملتا العزة للسودان

ود دفع الله بقيت متحيّر
من دارفور!!
ا كان داك الخير؟
طيب وين الغلط هسع
وشنو بدارفور الاتغيّر؟

المبارك ود إبراهيم

29-08-2009, 12:50 AM

أشرف صلاح الدين
رجل مسكون بعشق مدني والتي هي أهل لهذا العشق.
قصائد رائعة باقة ورد مليئة بألوان الدفء والحنان.
أتمني من الإدارة تثبيت هذا الجدول الرقراق لكي نرتوي من معينه العذب.

أشرف صلاح السعيد

29-08-2009, 10:27 AM

أشرف صلاح الدين
رجل مسكون بعشق مدني والتي هي أهل لهذا العشق.
قصائد رائعة باقة ورد مليئة بألوان الدفء والحنان.
أتمني من الإدارة تثبيت هذا الجدول الرقراق لكي نرتوي من معينه العذب.

اخى المبارك رمضان كريم عليك..

كيف مااتسكن والروح فيها جنود
تتوالف محنة بين خلايق المعبود
وودمدنى الرحم ولدت دررالعقود
و بيها اتدفن قلبى العاشق المريود

شرفتنى طلتك البهية ودعوتك الكريمة وهى تكفينى لادرى بانى اخط كلم يستهوى شخوص بقامتك السامقة المتكشفة لى من دعواك النبيلة..
ود أبراهيم كن مجاورا استمد عزمى من كلمك الطيب وتشجيعك الاخوى النضير..

المبارك ود إبراهيم

29-08-2009, 11:20 AM

اخى المبارك رمضان كريم عليك..

كيف مااتسكن والروح فيها جنود
تتوالف محنة بين خلايق المعبود
وودمدنى الرحم ولدت دررالعقود
و بيها اتدفن قلبى العاشق المريود

شرفتنى طلتك البهية ودعوتك الكريمة وهى تكفينى لادرى بانى اخط كلم يستهوى شخوص بقامتك السامقة المتكشفة لى من دعواك النبيلة..
ود أبراهيم كن مجاورا استمد عزمى من كلمك الطيب وتشجيعك الاخوى النضير..

ود الســـــــعيد البي زين الخصال محمود
ما بفرط في الدين وما بتعدي ليهو حدود
ود مدني العـــــــــريقة رصيدو منها جدود
كتـــــــــبوا التاريخ وأصبح بالعيان مشهود.

أشرف صلاح السعيد

29-08-2009, 11:40 AM

ود دفع الله بملاريا ماتت بنيتو بتول بعد ماغلبن يعالجوها بالقرية..
وواحد من ناس القرية مسجون سنة عشان سرق سخلة مطرفة وكان ماعندو التكتحو..
وداحمرعين عمل القصيدة واستخرج كلامى دا:

آه يابتول ياالمختوفة بيد مجهول
ساب وددفع الله براو مذهول

وسجلو الميتا على التهميش
وعلى سوء تشخيص
ومقدر كان
وبيموتو الوف بكل مكان
بالخرتوم
وديم مظلوم
وطبيعى يموتو ناس دراويش

الفاتحة ياناس
على الدكتور
على الديتول
على درب معمول
والمسؤل ابو حراس

الميتة قدر ومابناباو
وودفع الله رضا مكتوب
وسكّت لقليب مكلوم
يطرف دمعة
فيها الأنة
وخاف اتشاف يكورك ووب
وتتعذب معاهو بتول
ماكفاها عذاب من طعين
من تلتيق
ودربات
واتجرح حلق بحبوب

ود دفع الله لجمو الخوف
خاف من ربو
يقابلو هناك
يوم الشردة
يوم الزرة
يوم تتساوا فيهو رؤوس
وعرقا فاض للحلقوم
كيف يتجرس من المحسوب

ود دفع الله طمع فى بكرة
بس بطمعو كبرو جيوب
وباعو بتول
بالتقسيم
بالترسيم
ووينا حدو لداك جنوب

باعو بتول
بالجلسات
وباختلاسات
وبلوليا للشالو سلاح
الدخلو العاصمة فى نص اليوم
الركبو جيوب!!

واكان للسخلة
يستاهل زولك الغبيان
يسرق سخلة!!
وبتكبيرة للحكام تجيو قطعان

هداكا هناى
أكان حفيان
أكان جربان
امشى وشوفو بقى غنيان
مظللة كامرى بنص البيت
عفوا وآسف بوسط القلعة
مااصلو البيت مابكون طبقان
وعلامة الساعة
واضحة صريحة
تطاول عربا بالبنيان

يسرق سخلة!!
صحى تعبان
ويستاهل حبس مظبوط
وماكفاية عليو سجن مشروط
لازم مؤبد ورا القضبان
لما تاكل فيو ديدان
لأنو سخيف
لأنو ضعيف
ماعارف يهتف ورا السلطان!!
بالتطبيل
بالتصفيق
باسم الدين
كان الاهبل ملا دكان

الفاتحة ياناس
الثعلب فات
وكمانو مات
واتولد تمساح
يتقدل
يتفدع
ويتهدل
ويمد فى لسان
لو دفع الله
وللمسجون بسخلة
وللمقتول فى عازة
عشان مايبقى فيها أمان

أشرف صلاح السعيد

29-08-2009, 11:42 AM

ود الســـــــعيد البي زين الخصال محمود
ما بفرط في الدين وما بتعدي ليهو حدود
ود مدني العـــــــــريقة رصيدو منها جدود
كتـــــــــبوا التاريخ وأصبح بالعيان مشهود.

عوافى اخى المبارك..
استسمحك بنقل ردك الى نافذة دوباى وجر النم..
فارجو قبول دعوتى هناك..
ولك كل الود..

تغريد

29-08-2009, 11:44 AM

خربشاتك نقشت دربا علي قلوبنا يا اشرف وملاتنا بالروعة تسلم يدك

أشرف صلاح السعيد

29-08-2009, 12:01 PM

خربشاتك نقشت دربا علي قلوبنا يا اشرف وملاتنا بالروعة تسلم يدك

تسلمى اختى تغريد ورمضان كريم عليك..
لايرى الروعة الا من اتحف بنفس رائعة..
سرنى مرورك الانيق وكلمك الذى زادنى ثقة..
شكرا لك ولمرورك المشجع ومحفز..

ابوخالد

30-08-2009, 01:50 AM

انا عاوز استلف دي منك وارسلها للجماعة يمكن يلحقوا العيد هنا .. ماشي رمضان وبلعناه .. كمان العيد؟؟؟؟؟؟؟؟؟؟؟؟؟؟

حبيبنا هى ليس للاستلاف فليس لها صاحب واحد..
هى همس الجميع لمن يعشق وأراك عاشق..
يسعدنى مرورك الخفيف كطل مصحوب بدعاش لا تدرى استمتع بالشم ام دغدغة القطرات..

يااخى ما تسلفا ليهو ... الراجل شغلتو باين عليها خربانة ...
تصدق الليلة درديرى ما نزل قصة ولاحتى تعقيب ماعقب !!!!!!!!!!

يااخى ما تسلفو ... وبطل لياقة .... ملاح ويكاب بس ..

يااخوى كباشى سيبك منو .. أمشى إختار أى عروسة من الدر المكنون

وحرم كان ترجع تانى ....

أشرف صلاح السعيد

30-08-2009, 05:27 AM

حبيبنا هى ليس للاستلاف فليس لها صاحب واحد..
هى همس الجميع لمن يعشق وأراك عاشق..
يسعدنى مرورك الخفيف كطل مصحوب بدعاش لا تدرى استمتع بالشم ام دغدغة القطرات..

يااخى ما تسلفا ليهو ... الراجل شغلتو باين عليها خربانة ...
تصدق الليلة درديرى ما نزل قصة ولاحتى تعقيب ماعقب !!!!!!!!!!

يااخى ما تسلفو ... وبطل لياقة .... ملاح ويكاب بس ..

يااخوى كباشى سيبك منو .. أمشى إختار أى عروسة من الدر المكنون

وحرم كان ترجع تانى ....

ابوخالد عوافى..

والله انتا بتاع فتن ومشاكل ..هسى كلامى ماوضح هى ماللسلف هى ليو ولكل عاشق ..والله انك بتاع مشاكل وعايز تخرب بينى وبين ابوالدر...ماااافى ليك..

أشرف صلاح السعيد

30-08-2009, 01:10 PM

حب وجنون..

ياهى الحكاية ونفس الرواية
اتنين يحلمو بالعديل
وهب شليل مايتلقى بليل ضليم
واكيد هنايا ما تتلقى
ويقعد هناى فى جرستو
يلك الرواية بصوت هزيم
معقول كدا معقول تطير!!؟
ايوا بتطير
ياالقضيتا ونسة وحب عظيم
نسيت الزمن لافى بيك
وقايلا المراد برجاك كتير
ايو بتطير
يامنشول قبيل بقيفة البحر
مابين محبة وبين زعل
ياناسج مليون بيت خيال
ورحت تسمى فى العيال
ومنو البشجع معاى هلال
وسرحت ببت عز الرجال

و سرحتا انتا بلحظتك
وينو الشليل؟
شليل وين راح؟
شليل ماراح
لاهو انخطف
لكنو ملّ الانتظار
اعياو تعب
من احلام ظلوط
وكتر الوعود
رحل و اغترب

ونسيت كمان الحفلة ديك؟
لمن شليل ضو المكان
وكمل هجيجو مع الخلان
والكل سعيد عاش الطرب
نسيت قوام !!

ووينوشليل؟
اشلشل راسك المنحوس
فوق يا هبيل شليل انتفض
بعد ما ارتعب
بعد مامل من انتظار
ولقى قصتك زى الصنم
يلف يدور أضناو تعب
كان مشتهى لبكرة دوم
يتوسط احلاه قوم
وزغرودة من كل إتجاه
تعلن تمام لاحلى يوم

لساك بتسأل عن شليل!!
وسط الكوش
وسط الكراتين والعفش
ماعايز تصدق القصة انتهت
بتردد سؤال على المشاة
بعد بقيت من الحفاة
وعقلك عن العالم انطرش

فوق ياحزين
ودع شليل
بقى تاريخ قديم
وللصدمة إياك تستكين
وابدأ رجوع للعالمين..

littlestar

30-08-2009, 03:03 PM

إبداع وإمتاع
ونحن هنا متحكرين ومسجلين حضور

تلويده:
تعرف حقو ندى الشكرانيه لأبو خالد
لأنو دلانا عليك
بحملتو الإعلاميه المجلجه

ودمتم بكل الآصالة المعتقه بحبور وجدانكم
إخوتى

أشرف صلاح السعيد

31-08-2009, 10:13 AM

إبداع وإمتاع
ونحن هنا متحكرين ومسجلين حضور

تلويده:
تعرف حقو ندى الشكرانيه لأبو خالد
لأنو دلانا عليك
بحملتو الإعلاميه المجلجه

ودمتم بكل الآصالة المعتقه بحبور وجدانكم
إخوتى

اختى النجمة الصغيرة رمضان كريم..
عسى ان تكرهوا شيئا وهو خير لكم..الحمدلله كشف حال حبيبنا ابوخالد جابك هنا..
شكرا لطلتك الكريمة وان شاءالله تلاقى الإمتاع بين اسطرى المتواضعة دائما..
يديك كل العوافى وشكرا للإطراء المشجع لبوحى بالمزيد..

خلدون

01-09-2009, 11:29 AM

خربشاتك

على جدران ديوانى رسمت دائرة ضوء

وانت قادم من نن العين

تحمل قنطار حروف

فكيف تمدحنى وانت بذات المدح موصوف

فحين تعود ستخجل حروفى وتختبىء

خلف دائرة الضوء

فعذرا

أشرف صلاح السعيد

01-09-2009, 11:47 AM

خربشاتك

على جدران ديوانى رسمت دائرة ضوء

وانت قادم من نن العين

تحمل قنطار حروف

فكيف تمدحنى وانت بذات المدح موصوف

فحين تعود ستخجل حروفى وتختبىء

خلف دائرة الضوء

فعذرا

استاذنا المبدع خلدون عوافى..
حبوى بين خطاوى من مثلك قد توصل وقد ترى..ولكن هيهات للمحاول ان يصل اطراف العملقة..
دمت رائعا نخلص من كلمك روائع السرد والافكار ونحاول ان نكون او نمنى النفس يوما ان نصنف بذيل قائمة الكبار..
حضورك الى هنا اشبع كل غرورات النفس وان ادعت رفض الغرور وشجبه..
حاشا ان تعتذر وبين جعابك تخرج درر الكلم ورقى الافكار..
شكرا لك من الاعماق..

أشرف صلاح السعيد

02-09-2009, 01:07 PM

أختنا بت نفاش سألت النيل وينو والناس تتفسح وين..
وسألة الانجليز عمرو والحكومة...............عملت شنو..
وناس الحكومة شغالين شنو..
والتعليم والصحة وين..
والكهربا دافعين حقها وبتقطع ليه..

رديت عليها والله يستر قلت ليها:

بت نفاش اصبرى شوية
سيبى اللخمة
وسيبى الجوطة
وبجاوبك هسع من غير زيطة

الكورنيش بقى حصالة
ترمى جنيه تشوفى الموية
وتانى جنيه تشوفى القيفة
تانى جنيه بتجيك نسيمة
بس مخلوطة بشواء سمكاية
و عشرة جنيه تجيك سمكاية
ويمكن تلقى جواها الخاتم
اصلو الخاتم بقى بقروش
وناس الدولة منعو بروش
عشان تتزاحم فيها وشوش

قايلا النيل فوضى وزحمة؟
وتِضهِب ناس بعد لخمة
تدعو فى صلاتا تشوف اللحمة
تسأل مولى ماتجيهو الوحمة
من سمسار عدم الرحمة

يابت نفاش بقيتى غشيمة؟
احمدى ربك بضل النيمة
النيل بقى حكر للتمساح
والبلطى حليلو مابنداح
وحليل النيل نجيو سواح..

وتانى سؤالك شايفو هظار
كيفن تقارنى بين محتل وبين ثوار
عايز تشرفى ورا الاسوار
وتخلينا نلف وندور وكمان نحتار
ويمكن نهتف لن ننهار
ووحاتك ثانية جوا الدفار
وتبقى اللمة بسبب اعمار

اما تالتك بودى التوج
الناس شغالة مابتروج
ابشرو يقدلو وفنان مرجوج
عشان نتذكر عرس تاجوج
الناس شغالة بالاعلام
حتى اسمعى باستفهام
بقى سودانا حاجة تمام
كِمل الورا وراميين قدام
وورا المرتزقة مابقو خدام
وقالو جنوبنا فيهو سلام
تمنو ارامل وكوم ايتام
تمنو مناصب ونواب حكام
وثراءً فاحش كلو حرام
ودعوة تشجع لانقسام
وودو الخرطة لخواجة رسام

بتسألى انتى عن التعليم؟
وعن الصحة والتطبيب؟
هاى يازولا طرحك جد
غريب وعجيب
ماكفاية الركشة بسوقا خريج
ماكفاية الصيادلة عملو طريق

وكان للكهربا وين المشكل
لما الشركة تدور توفير
لا لا ابدا وكلا للتبذير
يسقط يسقط التنوير
يعنى شنو الناس دافعين
وعيبى ليا موية الزير
وفحم المكوة مافيهو الخير
ورش الحوش والبنابير
الكهربا بتجى والشفقة تطير
وتحيا وتعيش محبوبة الجماهير
الجابت لينا الف وزير
وعملت فرصة لالف غفير
وحاربة فينا كل تبذير..

عبدالرحمن مدثر

03-09-2009, 12:14 AM

قرت القصيدة وتبسمت..

قلت:

مامرورك فيهو الجمال بخطوتك
فيهو الحنان شايل كتير من حنتك
فيهو السماحة اتجملت من سحنتك
فيهو السكينة توشحت من سكنتك
فيهو العبير اسكر شعور بس من طلتك
خليك قريب بملكنى الفرح من فرحتك ..

شرفة الحرف الندى

هاقد جيئنا الى السعيد بكل الفرح

الذى تملكنا ونحن نرحل مع عصافير حروفك هنا

فى اجمل بستااان

تسجيل حضور ياصديقى

معااااك ببقى الفرح حااااضر

أشرف صلاح السعيد

03-09-2009, 01:53 AM

شرفة الحرف الندى

هاقد جيئنا الى السعيد بكل الفرح

الذى تملكنا ونحن نرحل مع عصافير حروفك هنا

فى اجمل بستااان

تسجيل حضور ياصديقى

معااااك ببقى الفرح حااااضر

اخى عبدالرحمن المتدثر بالجمال رمضان كريم..
ياخى ماعارف عندى شعور بعرفك ..ويمكن دا من دخلاتك الخفيفة والمريحة وكسرها لرتابة التحايا وقوالبها..
يسعدنى مرورك وحضورك ولاتطيل الغيبات بين المرورات..
كن بخير ..

أشرف صلاح السعيد

03-09-2009, 11:04 AM

بقيت وحيد..

ملهوف قليب للقيتك
ماجد طالت غيبتك
متين الأواب من سفرتك
مل القليب تيه انتظار
بقى زى حبيس راجى القرار
ونحل الجسم من السؤال
وعارفة الاجابة فى رجعتك
بتزيل عن الدنيا السقام
والإلتياع وكل عوالم للهيام

اتوقف ترس الزمن العنيد
واتقلب حال الكان سعيد
يجتر بذكراه ويعيد
يحلق بالحقيقة البقت خيال
مصاحب معاو الفين سؤال
متين يهل عليهو عيد
وإتوسد اللقا من جديد
آه يالرحلت وبقيت بعيد
أضنا المحب قلبو البريد

الزونية

05-09-2009, 02:19 AM

ود دفع الله بملاريا ماتت بنيتو بتول بعد ماغلبن يعالجوها بالقرية..

وواحد من ناس القرية مسجون سنة عشان سرق سخلة مطرفة وكان ماعندو التكتحو..
وداحمرعين عمل القصيدة واستخرج كلامى دا:

آه يابتول ياالمختوفة بيد مجهول
ساب وددفع الله براو مذهول

وسجلو الميتا على التهميش
وعلى سوء تشخيص
ومقدر كان
وبيموتو الوف بكل مكان
بالخرتوم
وديم مظلوم
وطبيعى يموتو ناس دراويش

الفاتحة ياناس
على الدكتور
على الديتول
على درب معمول
والمسؤل ابو حراس

الميتة قدر ومابناباو
وودفع الله رضا مكتوب
وسكّت لقليب مكلوم
يطرف دمعة
فيها الأنة
وخاف اتشاف يكورك ووب
وتتعذب معاهو بتول
ماكفاها عذاب من طعين
من تلتيق
ودربات
واتجرح حلق بحبوب

ود دفع الله لجمو الخوف
خاف من ربو
يقابلو هناك
يوم الشردة
يوم الزرة
يوم تتساوا فيهو رؤوس
وعرقا فاض للحلقوم
كيف يتجرس من المحسوب

ود دفع الله طمع فى بكرة
بس بطمعو كبرو جيوب
وباعو بتول
بالتقسيم
بالترسيم
ووينا حدو لداك جنوب

باعو بتول
بالجلسات
وباختلاسات
وبلوليا للشالو سلاح
الدخلو العاصمة فى نص اليوم
الركبو جيوب!!

واكان للسخلة
يستاهل زولك الغبيان
يسرق سخلة!!
وبتكبيرة للحكام تجيو قطعان

هداكا هناى
كان حفيان
كان جربان
امشى وشوفو كيف غنيان
مظللة كامرى بنص البيت
عفوا وآسف بوسط القلعة
مااصلو البيت مابكون طبقان
وعلامة الساعة
واضحة صريحة
تطاول عربا بالبنيان

يسرق سخلة!!
صحى تعبان
ويستاهل حبس مظبوط
وماكفاية عليو سجن مشروط
لازم مؤبد ورا القضبان
لما تاكل فيو ديدان
لأنو سخيف
لأنو ضعيف
ماعارف يهتف ورا السلطان!!
بالتطبيل
بالتصفيق
باسم الدين
كان الاهبل ملا دكان

الفاتحة ياناس
الثعلب فات
وكمانو مات
واتولد تمساح
يتقدل
يتفدع
ويتهدل
ويمد فى لسان
لو دفع الله
وللمسجون بسخلة
وللمقتول فى عازة

عشان مايبقى فيها أمان

أخي أشرف تابعت بشغف كل مداخلاتك في كل البوستات منذ دخولك المنتدى فوجدتها ملئت روحاً من الصدق والجدية..
والآن وانت تفتح هذا البوست بهذا التيار المتدفق عشقاً لمدني أرضاً وسماءً وأحباباً ..وتستنطق الكلم من أجل الحبيبة والوطن...وللضعفاء والكادحين في بلادي ..

لله درك ...ودمت بخير

أشرف صلاح السعيد

05-09-2009, 10:51 AM

أخي أشرف تابعت بشغف كل مداخلاتك في كل البوستات منذ دخولك المنتدى فوجدتها ملئت روحاً من الصدق والجدية..
والآن وانت تفتح هذا البوست بهذا التيار المتدفق عشقاً لمدني أرضاً وسماءً وأحباباً ..وتستنطق الكلم من أجل الحبيبة والوطن...وللضعفاء والكادحين في بلادي ..

لله درك ...ودمت بخير

اختى الزونية رمضان كريم عليك وعوافى..
كلماتك الروائع إقشعر لها بدنى لما فيها من بديع وصف وصدق كلمة وتشريف لشخصى الضعيف..
ليس غريب على ابناء وبنات مدنى أزر بعضهم وتشجيعهم لبعض لتخرج مكنونات النفس الجميلة عشقا وفخرا بست المدائن وقاطنيها البررة الكرام..
مداخلتك حقا تشريف وحافز للإستمرار فى عشق الحبيبة والعمل لرقيها وإن كان بكلمة تخرج علها تمحى غشاوة أو تطبطب على كليم أو تزرع بذرة لفكرة قد تغير للأجمل لحظة ما..
اختى الزونية ارجو ان اكون عند حسن الظن والا تكل عزائمى فيحبط من توسم بى خيرا ايها الخيرين الكرام..

أشرف صلاح السعيد

11-09-2009, 12:06 PM

استرسالا لحكاية ود دفع الله وبعد موت ابنته بتول جراء الاهمال يأتى مجروس خدمة إلزامية ياخد ابنو عباس وهو راجع من عملو كطيانى ليجمع مصاريف الجامعة التى يدرس بها..وبدون أى إتاحة فرصة له لتبليغ أبوه يؤخذ للمسكر ومنها الى العمليات ليستشهد هناك..

هاااى ياناس وين عباس؟
قالا الوالد الميمون
بعد مااحتاس
وفكرو الجابلو وجع الراس
بعد مااتأخر المبروك
وكان تأخيرو مالو اساس
حتى الشينة أكان وقعت
بجيهو صداها زى اجراس
وكان زفوها كل الناس

ود دفع الله إتساءل
بعد زول شمسا لعرق ملكوك
والود عباس دوام مظبوط
مامن عادتو يتأخر
وبالطرقات يتلكك
ولصلاة المغرب يتمهل

ود دفع الله جرا بروش
أكان عباس بيلفاها من الحوش
بعد مايملى كل ابريق
يزيل غبار بين الفروض مفروش
زى حوش بتول القبيل مقشوش

وين عباس أشالو جنوب؟
وبكرة الجامعة اللمالا قروش
ودوهو العزة؟
وكيف العزة ويكون مخطوف؟
ويكون مجبور او مغشوش؟
لا إعلان ولا استئذان
ولا استعلام ولا استفهام
وبالمجروس جدعوهو توش!!

يااسياد ليا سؤال
بعباس بتغيرو حال؟
الطايع بمشى ببقى شهيد
المؤمن بيكم ببقى شهيد
بس عباس قتلتوهو فطيس
وكانت موتو بالمجروس
قبل الغابة والتجييش
قبل وداعة الابو الدرويش

إتنين ياناس بنفس العام
يموتو بلاش فداك يانظام
وينكم انتو ياالحكام؟؟؟؟
تشوف كلابكم السعرانة
تخطف فى نفوس غلبانة
وحتى العاشو عرفو اهانة
وما كل البموت بجبخانة
ناس بتموت بالديانة
وناس بتموت من السلخانة
وهلكو كتير فى الشفخانة
غير ميات جوا الزنزانة
وألوف اتوفو حشة قلب
معاها سخانة
ولسه كلابكم ورا وساكانا
من مانشوفا يصيبنا الخوف
بلاكم جانا ومايغشانا..

أشرف صلاح السعيد

03-10-2009, 07:43 AM

هى قصيدة رد على قصيدة الاستاذ عصام عموش "كيف يسطر الدم قصيدة"..حكى فيها قصة حماد الذى ضغطته الظروف وباع تورو عشان يشترى لزوجته ام الحسن توبين وخلى ليها بعض قروش للزمن ثم سافر للعاصمة وبعد جهد جهيد شغلو نفر عسكر وهو ماشى شايل الحلم يدهسو باص شمبات..ويكتب دمو حلمو الراح لإسعاد أم الحسن..

الرحمة لأم الحسن
أصلو حماد مات إستراح
لابفيد من بعدو البكى
ولا بفيد بعد غيبتو النواح
سرقو الزمن فى غربتو
لمن حلم بتوب وشاح
الرحمة لأم الحسن
كيفن تزود و ضاع السلاح
الرب كريم ودا الأكيد
وبرحمتو بتطيب الجراح
ندعوك بس ياكريم
تحرس طريقا من السفاح
البسرق احلام الغلابة
وعلى الجثث قعد إستراح
لاهمو قرصة جوع شديد
لا وليد رضيع غلبو النباح
من وين الشطر يديو حليب
وكيف للحليب يكون متاح
وأمو يبست فيها الدموع
والدم فقر من عدم الملاح
كيفن تدر للحليب
ومن فجعة مامرق الصياح
حماد هداك داسو العجل
لبص قديم فقد الصلاح
منو الملام ياخلق هوووى؟
ماتقولو القتيل الداك طاح
ومرحوم غلط قطع الطريق
ومن بلادتو دمو ساح
ولاتقولو السايق العجل
برضو الكلام ماببقى صاح
أصلو التعابة مابعرفو شر
ومفطوم قليبن بالسماح
وهديك أم الحسن دليل
عافت الدية فى الزولا راح
اللقمة كيفن بتنبلع
بقروش تمن مقتول صباح
كل إرثو خمسطاشر قرش
لا تجيب كفن يسترو بنجاح
البركة فيك ياأم الحسن
والرب بيرحم عرجى المراح..

أشرف صلاح السعيد

03-10-2009, 08:06 AM

أبو حمزة

03-10-2009, 08:20 AM

أول مرة أشوف الكلام ده..!! وقرأته من الألف للياء..!!

بس ده إبدااااااع حقيقي..!

تقول لي عشوشة؟

يا سبحان الله ..!! لكن فعلاً أنا ولوووف... تخيل بجي بفتح بالتحديد ( الركشة .. السر .. بعشوميات .. وكدة.. يعني بحاول أشوف الكلام الحلو والرد الممتع .. يعني ما بحاول أشتت انتباهي للكثرة بل بالقيمة.. يا أخي ده فلسفة أنا ذاتي ما مقتنع بيها..) لكن أقول ليك حاجة .. أنت رجل غير عادي.. آآي .. قاصد كدة أنا ..!!

بس كمان فيك صراحة .. وعشق حلال .. حتى حبك مستور.. يا زول .. أنا فيك منك بيك فخور..

كلَّك على بعضك ورود و شموع وزهور ..
بس منو الإكتشفك .. الحب ولا الأولاد ( ربنا يحفظهم ليك .. ويحقق في الحياة أمانيهم وأمانيك)..ولا التعلُّم ولا الأيام..!!

فيك كل يوم سر.. ربنا يحفظك .. وأنا أمي رباطابية.. وعاوز أستعمل عيون القبيلة وأسحرك.. رأيك شنو..؟؟

أشرف صلاح السعيد

03-10-2009, 08:47 AM

حبيبنا ابوحمزة والله لما اقرأ كلامك اقرب اصدق انى كدا..
وكدا وكدا وكدا كدا يااخى مالى ومال كدا..
المشاعر جميلة ومؤكدا..
بس ياابو حمزة كمان ماقدر كدا..
ان بقيت زى مابتقول وقدر كدا..
راسى مابكبر اكبر من كدا..

ابوحمزة شكرا للكائن العفوى الجميل الذى يسكن بك ولم تؤثر فيه قبائح المحيطات به..
الله يعطيك كل العوافى ويظل بقلبك الاخضر الجميل رغم اصفرار القلوب بأزمنة الجفاف التى يأبى أن يرتحل عن عوالمنا بحاضرنا الذى شوهنا فيه كل جميل..
لك تحية وتحيات وبطل نفخ ممكن اصدق..

ABUZAID

03-10-2009, 10:24 AM

سافرت زوجتى فشعرت بغربة وشجن..

وقلت:

إنتى قايلا بلاكى ببقى..

إنت قايلا بلاك ببقى
أو بضوق الراحة حبه..
كيفن أضوقا أو أشوفا
ومصدر هناى عنى غبّا..
بلاك إنت الغربة مرة
ولو معاى ألف صحبه..
ما إنت لىّ كل حاجة
بأعلى بيك كل رتبه..
تايه زمان قبل أعرفك
ما سماى ما فيهو نجمه..
بلاك إحتار الدليل
وين النجيم يكشفلو دربه..
ودونك إتعرت دروب
حتى الرياض يبسانه جدبه..
ودع يمام فارق بلوم
خاف المكان يبقالو تربه..
حتى الخرير لجمو السكون
جمد حراكو الفيهو شبّه..
أما القمر مخنوق هزيم
راجى الشمس تفرجلو كربه..
ما بلاك بتنعكس الضواد
وكل العلوم بتبقى كذبه..
وتختل موازين البحور
حتى المفردة بتبقى صعبه..
إنت قايلا بلاك ببقى
أو بضوق الراحة حبه..
بقلم/ أشرف صلاح الدين السعيد

الاخ الفنان المبدع - اشرف صلاح السعيد

قرأت الكثير
وسمعت الكثير
الفصيح منه والدارجي

استوقفتني جملة في هذه المشاركة
غيبت سماء الليل في دجاى
وسمت بفؤادي كما لم يسم من قبل

وبرغم مرارة الغربة
برغم قسوتها وتبلدها
وبرغم الهموم اللامتناهية للعودة منها
اراك تجدها وكأنها كانت جنة وارفة قبل الفراق في قولك

بلاك إنت الغربة مرة

بلاك إنت الغربة مرة

قد تتساقط كل الكلمات وهى تحس بهذا المعنى اللامنتهي التفسير

تحياتي

ABUZAID

03-10-2009, 10:44 AM

وهنا أرد على قصيدة ود أبوزيد سكة سفر..

وقريت معاك كل السطور
ولسة بقرا وبفتكر
راجى البقية واللقا
وبرجاك انت وبنتظر
بحرفك يتلاشى الحزن
ويحلى معاك باقى العمر
الرقة موقع بخطوتك
يرقص معاها داك خصر
تتهادى ليك كل اللحون
يثمل معاك كل البشر
أما العيون خيال جنون
تاخدنا نوصل لأبعد جزر
كيف يوصفوك أو يرسموك
واللون بيعجز فى السحر
حتى الحروف تحتار معاك
تتحول رقم سمو الصفر
يكفينى بيك بعرف الجمال
وحتى الجمال معاك فتر
كيفن يجارى فى روعتك
والحسن بعدك جد عقر
مقتول غرامك وطلتك
ما بطلتك بعدم وزر
بنسى الضلال وكل الفساد
وبقدس إله بصلى الوتر
أداكى ليا دون الخلق
كيفن أجحد فى الشكر..

بدون مقدمات

اول ما قرأته وشغفت به وسهرت عليه الليالي وحفظته عن ظهر قلب
وكنت حينها في المتوسط
( اغاني الحياة ) - ابو القاسم محمد الشابي

عذبة انت كالطفولة كالاحلام
كاللحن كالصباح الجديد

ثم :

يالها من رقة تكاد يرف الورد
منها في الصخرة الجلمود

ثم :
انت تحيين في فؤادي ماقد
مات في امسي السعيد الفقيد

وتشيدين في خرائب روحي
ما تلاشي في عهدي المجدود

ثم
كل شئ فيك موقع حتى
لفتة الجيد واهتزاز النهود

وقبلها :

(انت . . . . ما انت ! ! ! !
انت فجر من السحر
تجلى لقلبي المعمود)

ثم مجنون ليلى - قيس بن الملوح وهو يقول :

اراني اذا صليت يممت نحوها
بوجهى وان كان المصلى ورائيا

وما بى اشراك ولكن حبها وعظم
الجوى اعيا الطبيب المداويا

ثم قال :

واخرج من بين البيوت لعلني
احدث عنك النفس بالليل خاليا

ويردف :-

واني لاستغشي ومابي نعسة
لعل خيالا منك يلقى خياليا

ويواصل :

هى السحر الا ان للسحر رقية
واني لا الفي لها الدهر راقيا

وحتى يصل الى ختامه :-

خليلى ان ضنوا بليلى فقربا لي
النعش والاكفان واستغفرا ليا

حميت القوافي في خاطري
وتدفقت بحور الشعر تناطق لساني

وفي فترة التسعينات . . . .
نظمت العديد من الشعر
فصيحا يخاطب الاعشى
ودارجيا يناطق العامية

واليوم تجدني اقف على الطلل
وابكي ضياع الكثير من مؤلفاتي
وكان ذلك في فترة الجامعة

واغتربنا
ثم ضعنا
وغرقنا

فلم يعد يرضيني الا الطلل

واستذكر قول الشاعر الذي سخر من كثرة الوقوف على الاطلال:

قل لمن يبكي على رسم درس
واقفا ماضر لو كان جلس

جلست ولم يجد الجلوس بعد الوقوف على الاطلال

أشرف صلاح السعيد

04-10-2009, 03:42 AM

اخى ابوزيد تحياتى..
سرنى تطوافك بين متواضع كلماتى ..
هى محاولات قابلة للتعديل والتشذيب والقولبة فمن مثلك أنتظر التصحيح والتدقيق..
فلا تحرمنى توجيهك إلى حيث يمكن للكلم التطبيب ليخرج كما يليق..
لا تطيل الغيبات واكثر من الطلات والمناصحات فكل كلماتى تستنى لك لتقوى التراص والصنعة..

أشرف صلاح السعيد

14-10-2009, 03:36 AM

هى قصيدة ترد على رائعة اخى العاقب مصباح "نحو مقصلة الشوق"..

وجدتك للشعر مرتجزا
ولعمرى به احلى ما قيل الورى
فيه الشعور تحدث صدقا
بعد وداد إذ أوردته ظلمات الثرى
أسكب من دنان الحس فيك
فما حسبت الظمأ فيا قد إرتوى
وكيف للظمآن إكتفاءً
من رحيق زلل من بحور للهوى
ومن وفاء لمحب بقلبه
وكيف للخير بالقلوب قد استوى
فما الحب البريئ تغابنا
إن أفل الحبيب بطيفه أو سرى
فيكفى الحب أن يعلمنا
مروءة الخلق و وفاء قد سمى
فالنبل إحدى مناسكه
وبمحرابه يسمو الوضيع للعلى
فليهنئ الأحبة بحملهم
فالحب لا يحمله إلا من إرتقى

أشرف صلاح السعيد

18-10-2009, 12:18 AM

هى رد على بوست سماحة بالعام..

" لو حتى نبدى من الصفر الركشة لازم تستمر"

إن كنت قاصد ركشة بتشوِّف دروب
أو يقظة بتنور قلوب
تدعونا نعدِّل للعيوب
فالركشة لازم تستمر حتى لآخر العمر

بس الركشة ما بيت القصيد
والرؤية ما لازم تحيد
عن إعوجاج متحدى وعنيد
بنتعامى عنو ومستمر

الركشة نفاضات غبار
بتكشف وجائع وانهيار
وعلل جسام بقت هظار
عشان نستفيق و ناخد قرار
يمكن يجى معاو العمار
ونخفف لهب الحياة المستعر

ركشة واحدة ما كفاية
إن طال زمان بتجف دواية
وبنرجع بكرة للمحاية
وللفكى يبعد أذايا
وبالقليل يزيل الوصايا
ونلقى الزمن رجع قصر

الركشة ما بتزيل بلم
لو إرتضينا نكون غنم
همو العليق والنهم
والراعى عدمان للفهم
والكل توهان فى العدم
بيبقى القطيع اكيد خسر

أشرف صلاح السعيد

19-10-2009, 05:53 AM

أكتوبر فات بس ما مات..

فى اكتوبر كان ثوار
كان النور وكان النار
وكان ميلاد فجر جديد
ممهور بدم لا بجوعار
حلف الشعب ما بنحيد
ما الحرية ماهى شعار
ولا تطبيل ولا تصفيق
ولا حتى خنوع لديك كبار
الحرية فطرة أكيدة
والبغباها أصلو حمار
يشيل الشيل لأسفار
ولمن يحرن ليو تحتار
مافجأة بقيف بدون إشعار
وحاشا الشعب يكون حردان
بدون أسباب بدون أخطار
فى اكتوبر كانت زفة
لعرس مشهور لا مسيار
عروسو عتق من أسوار
من جنزير ربط أفكار
من شيطان عيونو شرار
يوسوس فينا ليل ونهار
ومن مرتزقة بقو تجار
وسوق نخاسة للأحرار
كان اكتوبر بداية ثورة
وبنحلف يكمل المشوار
بضرعاتنا وبألبابنا
وما هامينا عدمنا عقار
الحرية فداها الكل
وبلاها ابدا ما لينا خيار
قوم يا شعب اسمع صوتك
خلى الظالم يموت ينهار
قوم يا شعب جدد مجدك
كفانا ركود كفانا بوار
قوم يا شعب كمل دربك
دروب النور ما فيها هظار
والحرية رقما صاح
مافيهو أجزاء ولا أكسار
ولا تعتيم ولا أسرار..

العاقب مصباح

19-10-2009, 07:03 AM

رأيت صورة بجنوب البلد فيها وليد من الجوع سجد..
ووراهو انتظر العقاب عشان يبقى ليو ود الاحد..
زعلت ليو ومن الجميع وقام القلم يسرد سرد..
يا اخوانا أبحثو عن يقين
واعرفو الحلال من الحرام..
وكل الحرام وعين الحرام
الطفل بينا يكون ركام..
بقلم / أشرف صلاح الدين السعيد

كثيرون هم من راحت لحمة جلدهم فداء لأطماع بنى جلدتنا سادتنا ووارثى حكمنا

أصبحت أجسادهم مكشوفة العظام والأضلع

لا يحتاجون ليخوت ولا لجلسات فى برج القذافى

يحتاجون كسرة خبز

وماء ليس نقى

ليس مهما ما تفعله البلهارسيا

فهى أخف وطأة من بلهارسيا الحكم

دعهم يموتون بالتخمة

وأترك لنا الجوع عنواناً وهوية

رائع كعادتك

وانت تبصر ما لا يبصرون

فقد اصبحوا أعمياء حين أصبحوا أثرياء

خلدون

21-10-2009, 08:05 PM

ودتابر

21-10-2009, 08:37 PM

أشرف صلاح السعيد

21-10-2009, 09:50 PM

كثيرون هم من راحت لحمة جلدهم فداء لأطماع بنى جلدتنا سادتنا ووارثى حكمنا

أصبحت أجسادهم مكشوفة العظام والأضلع

لا يحتاجون ليخوت ولا لجلسات فى برج القذافى

يحتاجون كسرة خبز

وماء ليس نقى

ليس مهما ما تفعله البلهارسيا

فهى أخف وطأة من بلهارسيا الحكم

دعهم يموتون بالتخمة

وأترك لنا الجوع عنواناً وهوية

رائع كعادتك

وانت تبصر ما لا يبصرون

فقد اصبحوا أعمياء حين أصبحوا أثرياء

حبيبنا عقبة تحياتى..
بعهد الرئيس نميرى كانت هناك مقولة نسبت إليه ولا أعلم مدى صحتها "اخير اخلى السرق وشبع من اجيب حرامى جيعان ولسة حيبدى يسرق"..وإن لم يقلها فقد قالها كل من رددت تلك المقولة السمجة المستسلمة..بعهد مايو آمن البعض بأن حرامى شبعان خيرا من حرامى جيعان وغفلو أن السرقة كبيرة وحدها قطع اليد للسارق وإن كانت فاطمة بنت محمد عليه أفضل الصلاة والسلام..ومن هو الحرامى لا ذاك الفقير ولا المسكين بل وزير..
وصدقنى لم أبصر مالم يبصرون فدعواهم إستندت على الدين وإنهم به لحافظون ولكن غير عاملون ومستعميون ومستغفلون تلك الزمرة ذات اللنشات..
نعم قد تعاموا بعد إذ غدو أغنياء مال وفقراء يقين..
ونسأل الله أن يزيح عن البلهاريسيات وطفيلياتها بالترع وقصور الحكم..
يااخى مالك عايز تودينا التوج ؟؟..
تحياتى لك وما تورا فينا نشيل الطوب ونفلع فالغضب فى ذرواته أحيانا لا يفرق بين عربيات التماسيح والوارثين..

أشرف صلاح السعيد

21-10-2009, 10:36 PM

خربش اشرف بعبش
بين اكوام الحروف
طلع حرفا ضايع بيه نعنش
زاكرة تخوم
اقذف حرفا نحو الشمش
يجيناشعاعا مبلل بالغيوم
خربش اشرف وشوش
صدفات البحر
يكذب من قال ها تتحقق ف المشمش
أحلام تدوم
رتب حرفا حرف عشعش
فوق اغصان النجوم

أخربش وأبعبش بيقولو مدروش
ناس البرج والفارهات اللونا بيرقش
وزعماء أحزاب بيمضو قرار إنى مكشكش
ومنتحلين للبروليتاريا حيقولو بدردش
ما بخافو الحق وعرفوهو بتشتش
و بفضح تنظيرم من واقع بيطفش
وبكشف تزوير بالنفس معشعش

أخربش وأبعبش بيقولو مدروش
لمن أحكى عن الطفيلى الجيبو بيكشكش
عن متسلق فوق جثامين من غير ما يرمش
عن متعفف بين طغيانم بقى بيدقش
عشان ما يهزم الجبروت ودروب بتعطش
عشان مايبقى الشارع أمان ما لتمساح فينا بنتش
فى الحيين ولقبور ميتين حتى بينبش

أخربش وأبعبش بيقولو مدروش
لما السوط للسمسار يبقى بيهبش
لما أقول بالحرية والمساواة لازم نبنى ولازم نعرش
لما أنادى الوعى يغيثنا ويغيث العقل البقى بهترش
لما أقول ضاع النور وللصيوان بس بيزركش
وإنو الجوع وصل العقل وليهو بيحرش
وإنو الحكم تخطى أطراف وحتى للقلب بقى بيهمش
اليقولو مهترش واليقولو مكشكش
كل هامينا نرتب بيتنا وليهو ننظم وليهو نفرش

21/10/09

أشرف صلاح السعيد

21-10-2009, 10:43 PM

الراائع دوما أشرف صلااااااااااح

ساتابع مندهشا .. حتى استفيق سأعود من جديد

فهنا يأتلق القصيد .. ميدعو هذا النهر الدافق .. وقصائد من حرير

هنا وجدت مايقوما .. وطربت للسقيد .. وسرح فكري مع السر عثمان الطيب

وانتعشت ذاكرتي ورجعت لأحد ليالي المايقوما التي حلق فيها المبدعون

عزيزي .. أشرف .. هنا ترقص الكلمات لتعبر عن الشرف النابع من أشرف

لك مني كل التحية والتقدير .. ولي عودات أخر

أستاذى سيد الحرف والفكر الرصين ودتابر تحياتى..
أراك قد نفخت ببالون خيلائى حتى انفجر لجعلى قرين بروائع نفر أضافوا لحيتنا طرب السعادات والأفكار فشكرا لك..
إن قلت أسعد لحضوراتك البهية فلن أوفى شعورى حقه ولن أوفى حضورك رونقه..
أبقاك الله متواضع شفيف وحانى علينا أيها الرجل الأمة..

أشرف صلاح السعيد

28-10-2009, 11:21 PM

بحلم بشمعة..

بحلم تكون كل الشموع زى الشموس
ثابتة ما بطفيها ريح
وتنخمد مع النسم المريح

شمعة
تعلم للأولاد القراية
وتحرق عوالم للمحاية
والدساتير الوصاية
تدوب ربطات الخشوم
تصهر وهم ما ليو لزوم
الزى ثمار من زقوم

بحلم بشمعة
فيها الجفاف لكل دمعة
بتجيب لقيمة
بتضيف فهيمة
بتزيل تخيمة
البتمنع جقيمة
ترتكز فى لب جريح
تمنع رجيف
وإحساس مخيف
بإنو الزمان ما عاد أمان
وإنو النجاة بحويها قيف
ونتجرس نعوم
أو نتمشى بطرف البحر
ويبقى البحر ل بس حريف

نفسى الشمعة تبقى والعة
ما يكون خمودا محتوم نهاية
وبعدو نشرب أنخاب أمانى
ونلقى العيون ليها دامعة
ما يبدأ السرور بعد إنطفاءة
وبعد موت لشمعة لامعة
ما الضو يا ناس هو أصل الفرح
وعكسو بيكون الطرح
ما غريبة بنصفق دوام
لمن نطفى للشموع
وتلقى القليب فرح وانشرح؟؟؟

بحلم بشمعة تعيد الفهم
ترجع مفاهيم شالا العدم
كانت حقايق وبقت وهم

بحلم بشمعة تطهر عقول
زى نار بتطرد خبث الحديد
تهزم الغبى البينا بيجول
تهدى الأمل من جديد
نرجع نعرف شنو المعقول

أشرف صلاح السعيد

02-11-2009, 09:08 AM

مشتاق ليك يا يمة..
متين ألقاك قريب يمة
أتوسد فروق تحنان
إتراكم بشكل وألوان
مرة دموع
مرة شرود
ومرة مقص معاو طمة
وكتير هذيّان
وحُمى كمان
دا غير سرحان
ووسواس شيطان
وتجينى الزمّة
يمة الغربة حارة خلاص
وبتزيد الحرة بلاك أكوام
بلا الدعوات بعد صلوات
بلا الحضنات بعد وجعات
و بعد فرحات وسط لمة
يمة بشوفك كل اليوم
من ما اقوم
بعد النوم
قبل النوم
وسط النوم
متين ما اتعب
و يضيق الكون
أقعد أصلى وأتمنى
تمررى ايديك بصدغى
و يتلاشى بلحظ همى
أبسم بعد ما أبكى
يجينى شعاع يمحى ضلمة
مشتاق ليك كتير يمة
كتير والله كتير يمة..

الرياض 03/11/09

أشرف صلاح السعيد

15-11-2009, 09:54 PM

صباحكم خير ياالزينين

صباحكُم خير ناسى أنا
ناس السبحة والتبروكة
ناس التُمنة والنِّجامة
ولبن صبَّاحى والسلُوكة
صباحكُم خير اهلى انا
لمة شاى وجبنة راس
ودعوة نصرة من المبروكة

صباحكم خير يا الساعين
للصُناعع وللزُراع وللعُلام
للتجار ابوات ذمات
وللنفض كسلو هبا وقام
للإتيّقن ذكر رحمن
بكل خطواتو ووين ما حام

صباحكم خير ناسى انا
وين ما كنتو وكيف ما رطنتو
كيف ما سخيتو وما اتجابنتو
كيف ما اخلصتو وكيف ما بنتو
كيف ما انتجتو وما اتكاسلتو

صباحكم خير ياالزينين
يا السمحين ياالعابدين
وكمان آمنين ومؤتمنين
صباحكم خير ياالذاكرين
ولرحمة الله جد شاكرين

صباحكم خير أهلى أنا
أهل الفزعة ناس الحوبة
بدور ضواية وين كانت
وين ما سارت جد معتدة بتوبة
قاسمة الزاد بيناتا
يتبادلو المصة فى لالوبة
لبسو جلاليب للفرسان
بأول دقة فى النوبة

صباحكم خير أهلى أنا
صباح الفل والياسمين
يعطر سما الزينين
صباحكم خير ياالزينين..

سماحة

15-11-2009, 10:05 PM

صباحكم خير ياالزينين

صباحك خير الرائع ذو الروائع
جميلة خربشاتك
واصل...

أشرف صلاح السعيد

16-11-2009, 12:50 AM

صباحك خير الرائع ذو الروائع
جميلة خربشاتك
واصل...

اختى سماحة الهادية للاخوان سماحة سلام اكوام اكوام..
أسعدنى أن تكون خربشاتى جميلة لديك ..
أشكرك للزى وتشجيعى فبدون تشجيعكم ربما يجيئ الخمول..شكرا لك ولعبورك الراقى..

أشرف صلاح السعيد

24-11-2009, 12:05 AM

بذرة وموية وخطة..

الزراعة دايرة موية
طورية ساربة
وخطة تحمى ملجة زايطة
ودورات زراعة بلخمة جايطة
اتحاد مزارع ناسو سايطة
يا نشاف يا بندورة شايطة
ودايرة الأمان لأب كسرة بايتا

لا مؤتمر كيفن يقام
وربط أعناق تعمل زحام
و خطيب ينمق فى كلام
ولا والى فجأة بقى سفير همام

المزارع جوة راقد
بس بالنظام خلوهو كاسد
لا حموهو لا ادهو ساند
بات القوى عدم المساند
من سياسات من معاند
شلت ضراعات خضر السواعد

داك مشروع سمو الجزيرة
بأمسو داك لبس الحريرة
والغبش جلطولو الضريرة
و خيرو عما بكل سيرة وكل مسيرة
كان البرنجى للقطنة تيلا
بقاها من قصرا طويلة
كان العضد لبلدن كبيرة
ولما انكسر دسو الجبيرة
خلو ناسو عدمو الخميرة
آه للبلد الإتساوى ناسا بحميرة
الرياض 24/11/09

أشرف صلاح السعيد

29-11-2009, 12:49 AM

عازة قومى كفى..

عازة قومى كفى
قليبنا مات بعدما احتفى
بعدما هج الخواجة
وعن أراضينا اختفى
يوم داك ما فرحو الأهل
قالوا الوجع عنا ارتحل
وسلم القليب جاهو الشفى
جانا الصبح بعد الرجى
طعِم الجلِد شمس الدفى
وقبل ماتطيب فينا الجراح
دبابة جات متلحفى ومتخفيا
فى ليل بهيم قبل الفجر
سرقت سعاداتنا المترفا
ليمر زمان ما بين فر وكر
بين سياد وعسكر متحرفة
بين تخمات الجيوب
وخم شديد بالتدين و بمقرفة
بين تجارب للنظم
ماسلمت ثوابت بقوها مردّفة
وبعد الحلم من جديد
وكوم العيال بقو متصوِّفة
بمحاريب للعلاج وللقفوف
يتطحنو برحات المخوَّفة
إحباط كبير جرى فى الدموم
إن كترت هموم إتدمدمو بالألحفة
إقتنعو المشاركة أضغاث حلم
وكل النواتج بتبقى محرفة
وبتباكو على الفرح النقص
وأسطرو حتى الحقوق المنصفة
بقو زى قطيع داهمو الأسد
قايداو ظنونو المُتلِفة
ما بين شتات وبين هواجس
وخداع قلوب من مُرجِفة
الله يشدك يا بلد
نشيّد طريق أساسو اليقين والمعرفة..

الرياض 29/11/09

أشرف صلاح السعيد

05-12-2009, 07:09 PM

هى تداعية ورد على قصة الأديب الجهبز ودتابر "ثقوب فى ثوب العيد"..

عيد خروفو غايب..

يا أم أحمد حالنا اتشقلب
أحمد حائر وحلمو غايب
جانا حكم أنيابو صفر
يمص الدم من البسالم
ساب الأغبش داير حايم
يا أم أحمد راجلك بتعب
بزاحم بدافر فى المصايب
وولى الأمر قاعد يخمش
ورجعنا ورا لزمن الراتاين
فاتورة الكهربا تمن بهايم
وراتب الدولة ما بجيب عمائم
ومشروع حضارى ماليهو ركاين
غير جوعار وعرضة لنايم
وعبد المقصود مخنوق بهزايم
خايف أحمد تكسرو زرايب
يجيهو العيد بخروفو الغايب..

أشرف صلاح السعيد

05-12-2009, 07:22 PM

دول هايصة ..

بعض الحكام قال : أنا الدولة
بعض المعترضين قالوا: أنا الدولة
والشعب يؤكد هو الدولة
والوحدة فينا تتوارى
سارت فينا دول تتوازى
لا نقطة تلاقٍ بينهم
لا محطة فكرٍ تجمعهم
ولا أذن لغير النفس صاغية
والكل تعامى أو أُعمى
أعلنا بأن الحاكم طاغية
أحزاب الشعب متهاوية
وجموع الشعب الساكت لاغية
فلا تحسب إلا الامم الواعية
أو نفر دخلو الغابة ساعية
لتحرك مدرعة تتمختر
وراجمة بين الموت تزمجر
لتجعل كل الاعين باكية
أرامل ثكلى ويتامى
وأعراس شهيد لزعامة
والقاتل والمقتول علامة
لفوضى الدول المتوازية
لعهر قلوب متضارية
وشيطنة سكوت بوصاية
لتباع الروح بمشروع
لطفل يرقبه الموت بجوع
ولقلب يستسلم لخضوع
ولأنين البار الموجوع
ولموت الكل بمشروع
وبالمشروع أيضا دول متوازية
سلطة.. وإدارة و حاشية
ثالثهم مزارع مصروع
لا فرق لديهم بالجربوع
لاهم لهم ان يغدو حتى موجوع
فتظليل المركبة عماء آخر
ونظارة شمس تعمى اكثر
تحجب شعاع الحق الاكبر
وكل الحق على فكر أغبر
وسكوت أدهى وأمر
و عشق للكرسى الاصغر
إذ جعل الجالس أقزم أقذر
وتناسو الطوفان اذا أهدر
سيشتاقو يوما للبنبر..

الرياض 9/11/09

أبو حمزة

06-12-2009, 02:41 AM

ده شنو ده..ّّ!!؟؟
ما بقتبس أيّ مشاركة.. ( يعني أشيل شنو وأخلي شنو؟؟)
إنتَ مدوِّر لسع دي؟؟؟..!
يا أخي نحن نلقاها منك ولا من ود السجانة ..!!؟؟ أبوقرجة مشى السودان وخلى الخربشات ونام في العسل.. بس النسأل أسماء تؤام الملكة هو السودان فيهو عسل..؟؟!!
ما علينا .. أنا قائل روحي سحرتك..!! بس الظاهر ناس أمي الرباطاب ما شائفين شغلهم..
بس دائر أعرف حاجة.. يوم داك شفتك في محل الباسطة .. وشائل ليك عيييييييييك كم كم كليو..!! ولا والله ده إنت كنت بتحاسب في حق صواني..وكمان موزعها على قوالب وصحون كبيرة..( يعني خائف من حق الأمنية للصواني)؟؟ بس وريني مشيت أنا البقالة و أجي ما ألاقيك..!! إنتو ده عيد لحم ولا عيد ميلاد..!!؟؟
كان كدي ليك حق تخربش..!! أظنو هرسوك..شاااي(مع إبدال السين شين مفخَّمة والعكش)..!!
يا أخانا مبدع.. وخطير.. ورااايق وكتَّاب كبير.. يا ريت بس ما تقصِّر مع عشوشة والمظلوم بعشوم..!!

أشرف صلاح السعيد

06-12-2009, 05:00 AM

الحبيب ابو حمزة سلام..
الباسطة وصاية وماشة المدينة المنورة يعنى ما فى زوغة من الامنية ولا حاجة "بهتنى بهت"..
الرباطاب اهلك ما بياكلوا عيش مع التحصين يااخوى آخر البقرة ساااى بتعمل ليهم قصر نظر هههههه..
يااخى انا اتلفتا يمين وشمال مالقيتك قلت ابو حمزة دا زاغ من الدفع ولا شنو؟؟..
واستنيتك نمشى الجمعية لكنك كبيت الزوغة..عيد اللحم دا قالو بس يدفسوها شية ما التنويع سمح يااخ..
مشتاقين وبعشوم ما بنظلمو تب بس ابوهو نعمل فيو شنو؟؟؟..
سلام يا صاحبى..

أشرف صلاح السعيد

20-12-2009, 03:53 AM

إلى ابنٍ ينشد التغيير..

يا بُنى كنت مثلك
أبحث عن كبدٍ للحقيقة
متمردٌ على بالِ موروث
أنشد التجديد بالحديقة
بلا موانع بلا قوالب
كُن عندى كالهزيمة..

يا بُنى كنت مثلك
أبغض إستنساخٍ للرعايا
أدفع غباء الإرث عنى
وكل إرهاص ٍ للوصايا
كنت أنشد زرع بذرى
بأرضى أستمتع بالسقايا
حتى أنى كدت أوئد
كلِم أجدادى والدوايا
كنت ألقاها كالطواطم
طلاسم دجالٍ بمحايا
ورحت أدعو للإنتفاض
أنقُضُ أحكام القضايا

يا بُنى غدوت مثلك
أمقت كل أنواع الرزيلة
أجاهد النفس صدقا
أن أهجر حدودا للفضيلة
ولازلت أكره مثلك
كل الخضوع إلى القبيلة
لكنى أدركت أمرا
أنى قد كبرت القضية
كيف ألبس أو كيف أبدو
فخارجى لا يُصيرنى ضحية

يا بُنى عشقت فكرك
وتحرر روحك عن السرية
إرجع ومازج بين ذاتك
ولبنِ أجداد سوية
فبعين نفرى أجد صورى
وكل طفولاتى الشقية
ألقى أمى وحضن أمى
وكل رضعاتى الهنية
ألقى تاريخى ودربى
يوم كنت بلا هوية
يوم ساعدنى أبى
كيف أخطو فى روية
وقد أشار إلى الطريق
و كيف أخطو إلى الحرية

الرياض 20/12/09

abomazeen

21-12-2009, 04:44 AM

لقد أثبت لي فعلياً بأن ( الحلوة ما بخلص )
كلما قلت انتهى هذا الإندياح الراقي
فإذا به من أول جديد يعود
ويحى قلبي وقلمي

أشرف صلاح السعيد

05-07-2010, 06:29 AM

لقد أثبت لي فعلياً بأن ( الحلوة ما بخلص )
كلما قلت انتهى هذا الإندياح الراقي
فإذا به من أول جديد يعود
ويحى قلبي وقلمي

الجميل أبومازن سلام و أشواق ..
يااخى كلامك السمح دا زاااتو يردو عليهو كيف ما عارف ..
الله يديك العافية وحقيقى إنت الراقى ..

محمد الجزولى

05-07-2010, 09:20 PM

مييين؟؟؟
اشرف السعيد شخصيا !!!
والله منور ومنور ومنور
مليون حمدا لله على سلامتك

أشرف صلاح السعيد

05-07-2010, 09:32 PM

مييين؟؟؟
اشرف السعيد شخصيا !!!
والله منور ومنور ومنور
مليون حمدا لله على سلامتك
المبدع الجميل ود الجزولى سلام و أشواق ..
الله يسلمك و المنتديات منورة بيك و بالجميع ..
يااخى و الله المنتديات بقت لى صعبة خلاص و ما عارف عشان الغيبة ولا التنسيق الجديد ليها ..
جد مشتاقيين و إن شاء الله مداومين معاكم يا حبيب ..
و مبروك نجومية يناير تستاهلك فأنت من يشرفها و ليس العكس ..

محمد الجزولى

14-07-2010, 10:39 PM

أشرف صلاح السعيد

14-07-2010, 11:08 PM

المبدع اشرف
ونحلم معاك زادنا العشم
ضحكاتنا ترجع زى قبيل والبسمه ترجع تترسم
والالم الكان قبيل نلقاهو اصبح مندثر
ونحلم معاك .. ونحلم معاك بى وجهه ضاحك ومبتسم
تحياتى لهذا الابداع عزيزى اشرف
وواصل بدون فواصل

الحريف و وريف ود الجزلى سلام ..

الحلم معاك بيزيد و بيبنى للهمم
بيشحذ معاول تحارب العدم
معاك اخوى بنرجع الحلم التمنى
و بنعيد شعاع ضعف إنهزم
ترجع تقوقى كل هدايل
بخضر الغصون و قيم قمم
ايد بايد بنلين حديد
بنذيب جليد
بنجدد دماء حتى الهرم
بالتفاؤل و رسم البسم
بندرك محطات الوصول
و المهم نبدا مشوار و لو بالقدم
نهزم ال لو و لكن
وكل مفردات الفشل
ما نكون قنوط لا نكون غنم ..

ود الجزولى سلام ..
وينك و ين ايامك يا اخ ؟؟..
جد عامل شغل و حركة و حراك للثقافى ..
كن كما أنت كلك حلو ..

محمد الجزولى

20-07-2010, 11:54 PM

عازة قومى كفى..

إحباط كبير جرى فى الدموم
إن كترت هموم إتدمدمو بالألحفة
إقتنعو المشاركة أضغاث حلم
وكل النواتج بتبقى محرفة
وبتباكو على الفرح النقص
وأسطرو حتى الحقوق المنصفة
بقو زى قطيع داهمو الأسد
قايداو ظنونو المُتلِفة
ما بين شتات وبين هواجس
وخداع قلوب من مُرجِفة
الله يشدك يا بلد
نشيّد طريق أساسو اليقين والمعرفة..

الرياض 29/11/09

اصلو البلد يا ود سعيد حالو العلى ما بسر احد
الظلم والضيم والفساد
استشرو زى مرضا خبيث
والنبل والخلق الجميل دفنوهو فى ود اللحد
فى كل صباح تسمع عجب
كمين سؤال ما تلقى رد
ومحمد احمد قام هج ومرق
قطع البحر ... ركب المراكب واللجج
قال يمكن يكون فعلا صحيح من ( كد وجد)
وزولنا يا حليلو ما قدر يضع لى معاناتو حد
لا ارتاح هنا ولا لقى راحنو فى جوه البلد
تحياتى استاذ اشرف
ولك كامل الاحترام على هذه الخربشات الممتعه

أشرف صلاح السعيد

21-07-2010, 11:00 PM

اصلو البلد يا ود سعيد حالو العلى ما بسر احد
الظلم والضيم والفساد
استشرو زى مرضا خبيث
والنبل والخلق الجميل دفنوهو فى ود اللحد
فى كل صباح تسمع عجب
كمين سؤال ما تلقى رد
ومحمد احمد قام هج ومرق
قطع البحر ... ركب المراكب واللجج
قال يمكن يكون فعلا صحيح من ( كد وجد)
وزولنا يا حليلو ما قدر يضع لى معاناتو حد
لا ارتاح هنا ولا لقى راحنو فى جوه البلد
تحياتى استاذ اشرف
ولك كامل الاحترام على هذه الخربشات الممتعه
يا ود الجزولى الحال اتقلب
عازة عادت من جديد
لزمن سحيق
لفرنجى عاث و اغتصب
و اولادا ما بين الصراع
و بين الشتايم و الخطب
أحزاب هنا و أحزاب هناك
و الكل بيدفع بالسبب
كأنو السبب إنجاز خطير
من بعدو بيزول تعب
و كيفن يزول ما هامى زول
يمكن يكون بالكافينول ؟؟..
و لا حتى الباندول ؟؟
شحدة من برا الحدود
أو شعار خطير نارو لهب
و محمد أحمد بس بتوه
إن ظلا جوه أو إغترب
ما مصيرو بكرة يرجع يعود
بعد العزم جواهو انسلب
بيعرف الزمن اللى راح
ضاع سدى منو اتسرق
يا ريتو لو قعد إحتطب
و الوليدات القبيل إتيقنو
و اكتشفو جواهم دهب ..

لك السلام أستاذ محمد " السدة بالردة" و كل الود و الإحترام وسرتنى مناضمتك يا رائع ..