حكاية ود دفع الله

[وداحمرعين]

حكاية ود دفع الله من طقطق للسلام عليكم

ود دفع الله
زول مسكين قدر حالو
لا زول قلنا لا قالوا
كان طيّاني في الحِلّة
ودّر عمرو في الجالوص
يعين الناس علي السترة
يبني جدار ويسقف بيت
ويلْتَخ درقة مخروبة
ويسَوْ ان دُرْتَ راكوبة
لا بقطع ولابْفاصل
البتجيهو برْضابا
ان خلوهو مابطالب
وانْ ادّوهو مابيابا
زيّو غلابا عارْفَ الناس

كان ودناس وكان ونّاس
وكل حكاية عندو ليها طقوس
لا بقرا ولا بِكْتِبْ
بس لاكين معدول راس
يحكي ليك عن الصين
تقول شافا
والجولان وعن يافا
وام الدنيا واريافا
وعن كوبا وعن تكساس
لا مكتوب ولا كرّاس
زول طيّاني ما اكتر
بس ممحون وسيد طُرْفة
الا عديل زي الخيط
وساسا ً مابِخَزْلْ الحيط
يلَقْلِقْ يقولّك دا افرنجي
ويرْطُن مرّة طلياني
ويحْكي هندي والماني
ونِحْنَ صغار نستغرب
كيف يارب قِدِر يعرف
واَصْلو الحلة مافاتا

نفسو كبيرة
لابنافق ولا بداهِن
لا بيحسد ولا بشاحن
ولا بتمني حق الناس
راسمالو كان عباس
وفوق عباس جاتو بتول
ربّاهن بدم قلبو
لا بدسْدِس ولا بيبخل
ولا من فقرو كان بِخْجل
ولا بِمْشي قاصد زول
يومَنْ في ويوم مافي
يعشيهن وينوم جيعان
يكسيهُن ويمِشْ حافي
قرّاهُنْ وكانوا نجاب
لا في شينة انْدقّوا
ولا في غياب
بي نفسو قرّاهن
كيف الزول يصون قدْرو
ويجلّ القبْلو والقَدْرو
وكيف رايك تقولو عديل
وكيف تعدل بنايا ً يميل
بي نفسو ورّاهُن
كيف الزول يشيل بلدو
جوّه عيونو زي ولدو
وكيف يدّي دون مايشيل
وكيف يتقاسموا النبقة
وكيف يتجاوزوا العقبة
وكيف الناس فِرِدْ رقبة
تقيف ماتلين ولا ترْكع
كانوا نجاض وكانوا نجاب
لامِنْ خاب ولامن عاب
ولا واحدا ً مشي اتْسكّع


( يتبع )

[أشرف صلاح السعيد]

ود دفع الله حليلك وين؟
تشوف حالن اتبدل
وقلب بحب الدنيا اتكحل
وتفتش ليك سنين وسنين
عن قلب فيهو يقين..

ود دفع الله فاتو الناس
ناس الحارة وناس الحلوة
واتغير جوانا قليب
اتحير واتجرس
مرة يتوه ويتودر
ومايقدر يتصبر على المكتوب
وبقى محتاس..

عدمو الناس
واحتلت لمدن اجراس
طول الوقت تتمختر
تزنزن بعقول حراس
رجو الدينار والدولار
زى أفراس
تتسابق فى وصول مزيوف
تعدى هناك
تاركا احساس

ود دفع الله تعال يازول
عشان نتعلم ونتيقن
ونعرف الخوف من بعدين
من الشبر الفيهو الهول
عشان نتعلم حسن القول
ونتثبت مايصيبنا زهول

ود دفع الله وين نلقاك
تشوفنا نعيب للأزمان
ونسينا الدهر رحمن
ونتشعلق فى التبرير
واتفننا فى التزوير
وعملنا الحجة فى السلطان
ولعلنا وزير
نهتف جهرا للتغيير

ود دفع الله ليك سؤال
دحين يوم داك من وين الكسوة؟
وقافلة مليانة بالتيبان
توزع للحجيج إيمان
تزقى فى داك
وتطرد قرصة الجيعان
وعملت عدة من ابيار
ورجعت بعد مابنت بنيان

ود دفع الله ياخ معقول!!
من دارفور!!
أسرد كمل الموال
على الدينار!!
الله عليك ياسلطان
عملتا العزة للسودان

ود دفع الله بقيت متحيّر
من دارفور!!
ا كان دا الخير؟
طيب وين الغلط هسع
وشنو بدارفور الاتغيّر؟

[abomazeen]

يا سلام على الكلام الجميل ...

كفى ...فقد ثقل علي حلو السرد

==== === ====
سلمت يدلك وداحمر عين
ولله درك أشرف صلاح الدين

[وداحمرعين]

[font="book antiqua"]( حكاية بتول )

بتول الفي الفريق فرْضة
كانت وَرْدة شالت دوب
وكانت مضرب الأمثال للعفة
للأخلاق ولي العِرْفة وكلّ جميل
قط ماوصفوها بي خِفّة
وِلي القشّة البشيلا السيل
لامن قال ولامن قيل
كانت في شموخ النيل
في يوم منحوس
بتول جات صادّة ميرودة
انجدعت فوق عنقريب هبّاب
فوقو ملاية مقدودة
جابوا الفَرْده غطّوها ماكفّت
تكورك يمة برْدانة ماادفّت
شالْتَ الليل علي اكتافا
ورغم انّو الحكيم شافا
الاالحمّي ما خفّت
قالوا ملاريا نوعا جديد
هروها ابَرْ هروها حبوب
بس نيرانا ما طفّتْ
أخير يمْشوبا للخرتوم
ود دفع الله مااتردّدْ
ولا فكّر يجيب من وين
ولا في شرْعو ابدا ً دين
داكْتَ الحزّة قصد السوق
باع عنْزو وبناتا اتنين
ودّي بنيتو للخرتوم
سريع وافوها بالمحلول
معاه دواء
وبدل الحال يمِشْ معدول
بتول صبحت كلاما كُتُر
وحالا ً بيها تبْ مابْسُر
بتول الحمّي من جاهلة بتجيها
شنو الجدّ !!؟؟
وكلّ الناس
شنو الكِسْبوه غير وِرْدة !!؟؟
لا مرْيوق لِقي الياكْلو
و لا ملهوف قدِر يهْدا
لا مكتول دِرَي الكاتْلو
ولا حيران عِرِفْ مبدا
دا مو معقول
ماشفنا حمّي كتلت زول
شنو الجدّ !!؟؟؟؟؟؟؟؟؟؟

تالت يوم بتول فاتت
وكان في الركب معاها كتار
وبائع الموت اخد حقّو
قبض فاتورتو بالدولار
تمن سما ً قرض آلآف
ودخل غابتو
لامن سمع ولامن شاف
ياما دقون تغطي جبال
وياما دقون تنيص اهوال
وياما دقون خاربة بيوت
وياما دقون رمَت ملقوط
وياما دقون أخير قوم لوط

ود دفع الله بِلع الوجعة في بطنو
و رضي بالجاتو في بنيتو
المحلول ما بكتل تمّ اليوم
وفات الغول نفد من تار
وحشا الأمّات مولّع نار

حكاية عجيبة تب ياناس
ود الزين في سجنو
تمّ الحول في سخلة
لقاها مطرّفة وساقا
كان يومين بطنو خلا
تب الحبّة ماضاقا
دا قانون وين ياامّة !!؟؟
ودالزين شان سرق سخلة
فوق الحول هداك محبوس
وزول شغّال دهِجْ في الناس
يلقي حسابو جاه وفلوس !!؟؟؟؟؟؟؟
زول يكتل يسووا وزير
وزول سافل يودّوا سفير
وزول نصّاب تشوفو مدير
وزول مقْضي يكون قاضي
وزول مفتوت يقوم يفْتي
بركة المتّي يمة زمان
وما شفتي الشفناه في الدنيا !!![/font


( يتبع )

[أشرف صلاح السعيد]

وداحمرعين رمضان كريم..

استسمحك أن اخرج ما تخرجه كلماتك عنوةً منى..

آه يابتول ياالمختوفة بيد مجهول
ساب وددفع الله براو مذهول

وسجلو الميتا على التهميش
وعلى سوء تشخيص
ومقدر كان
وبيموتو الوف بكل مكان
بالخرتوم
وديم مظلوم
وطبيعى يموتو ناس دراويش

الفاتحة ياناس
على الدكتور
على الديتول
على درب معمول
والمسؤل ابو حراس

الميتة قدر ومابناباو
وودفع الله رضا مكتوب
وسكّت لقليب مكلوم
يطرف دمعة
فيها الأنة
وخاف اتشاف يكورك ووب
وتتعذب معاهو بتول
ماكفاها عذاب من طعين
من تلتيق
ودربات
واتجرح حلق بحبوب

ود دفع الله لجمو الخوف
خاف من ربو
يقابلو هناك
يوم الشردة
يوم الزرة
يوم تتساوا فيهو رؤوس
وعرقا فاض للحلقوم
كيف يتجرس من المحسوب

ود دفع الله طمع فى بكرة
بس بطمعو كبرو جيوب
وباعو بتول
بالتقسيم
بالترسيم
ووينا حدو لداك جنوب

باعو بتول
بالجلسات
وباختلاسات
وبلوليا للشالو سلاح
الدخلو العاصمة فى نص اليوم
الركبو جيوب!!

واكان للسخلة
يستاهل زولك الغبيان
يسرق سخلة!!
وبتكبيرة للحكام تجيو قطعان

هداكا هناى
أكان حفيان
أكان جربان
امشى وشوفو بقى غنيان
مظللة كامرى بنص البيت
عفوا وآسف بوسط القلعة
مااصلو البيت مابكون طبقان
وعلامة الساعة
واضحة صريحة
تطاول عربا بالبنيان

يسرق سخلة!!
صحى تعبان
ويستاهل حبس مظبوط
وماكفاية عليو سجن مشروط
لازم مؤبد ورا القضبان
لما تاكلو فيو ديدان
لأنو سخيف
لأنو ضعيف
ماعارف يهتف ورا السلطان!!
بالتطبيل
بالتصفيق
باسم الدين
كان الاهبل ملا دكان

الفاتحة ياناس
الثعلب فات
وكمانو مات
واتولد تمساح
يتقدل
يتفدع
ويتهدل
ويمد فى لسان
لو دفع الله
وللمسجون بسخلة
وللمقتول فى عازة
عشان مايبقى فيها أمان

[وداحمرعين]

يا سلام على الكلام الجميل ...

كفى ...فقد ثقل علي حلو السرد

==== === ====
سلمت يدلك وداحمر عين
ولله درك أشرف صلاح الدين


مرحب بيك ألف ابومازن وتشكر علي الطلة...يديك العافية

[وداحمرعين]

[QUOTE=أشرف صلاح السعيد;379400][right][size="3"][center]وداحمرعين رمضان كريم..

استسمحك أن اخرج ما تخرجه كلماتك عنوةً منى..


[SIZE="3"]كل سنة وانت طيب أشرف وكتر خيرك كتير علي حلو الكلام...تسلم وتطيب أيامك.

[وداحمرعين]

(حكاية عباس )


وداب الحول عليها بتول
كان عباس يعد مشغول
قبض يوميتو يادابو
لسه ترابو في ايديه مااتغسل
و لا اتغدّي
كان مبسوط ماشّي براه يتبسّم

حيلو انهدّ من المونة والملطم

رسوم الجامعة دوب تمّت
يوم يومين ويجي الملبوس
لسه الباقي اسبوعين
كمان مصروفو بتدبّر
مو شتّن بيقطع راس
وعندو هناك باقي حساب
في الحفّير ودك الساس
شاف اللمة في دربو
ناس واقفين وامّة تحوص
وشاف بهناك كم مجروس
قافلة السكة قدّامو
ماسك دربو مالفّ
لا راوغ ولا انزفّ
حافظ صم دروس والدو
درب العيبة مابقالدو
ولا النَيّة من ناسا
نفسو عديلة من ساسا

اقيف يازول دربك وين !!؟
واحدا ً أحَم وليه دقين
وواحدا ً نيْ مسيخ وعفين
عباس : دربي عديل علي الحلة
الأحم : شغال وين ؟
عباس: طالب بقرا في الجامعة
النّيْ : في الجامعة وكلّك طين
طالب مين يااخونا!!؟
قال عباس في حرقة :
ابوي طيّاني ود طيان
وبيت من طين مو فيلا
بس راضين بي حالنا
تب ما بنشكي من قلّة
شغل المونة قط مو عيب
عيب الزول يكون عالة
وعيب الزول يقيف علة
فتّش مالقي بطاقة..
قبيل ختّاها في الطاقة
ساعة ماشّي يتوضا

في الجنيات أكان فرْضة
غير محمودة مابرضي
اركب هناك يازول !!
من ميسو طفّر فوق
ولدا ماعرف عاقة
ضهر الشاحنة كان زي سوق
لقي الكمساري والعتّال
والشائل خدارو معاه هسع جايّ من السوق
واحدا ً يبكي داقنّو
وواحدا ً دمّو شار مفلوق
وواحدا ً قدرو في سنّو
وواحدا ً شال همومو جبال
وواحدا ً ماشفع جنّو
وواحدا ً لا نضم لا قال
عباس بالو كان مشغول
يتاوق كان يلقالو زول حلة
يوصيه لي اهلو
يقول ليهن وداعة الله
شايل هم ابوه هناك
يقوم يصدم وينشلّ
جرح بتول فيه مااتّاوي
لسه حولو ماهلّ
قدر ماتاق ماشاف زول
لامن شلّعو اللمة
وكانت اول مرة لعباس
يمِشْ لي حاجة دون همّة


ود دفع الله ماخلّ
مكان في الجابرة ماكاسو
وكان كاسو جهاد وقهر
لاعباس لقالو اتر
ولا من زول عدل راسو
لاهدّن ولا قيلل ولا لاقَي
ولا من وجعة ماضاقا
شهر بي حالو لافّي يكوس
لامن يوم جاهو وليد
كان فكّوه بي واسطة
قال لاقاهو في المجروس
وكانوا سوي في معسكر
ناسو الفيه مُن عسكر
ناس ربّاطة مااكتر
يسوقوا الناس للأحراش
يجاهدوا هناك
في بلدا ً تشوفو طشاش
ود دفع الله شاف الدنيا زي خاتم
وكل الكون قلب عاتم
كورك هاش
بطول حسّو :_
هاناس :
عباس ماتخلوه في جهادو
زول مسكين قدر حالو
عباس مولود و طوريتّو في ايدو
يجابد في لقمة العيش
بحال عباس عليم سيدو
وليد يا اخوانّا كان زي ديش
يجاهد جيهة في فقرو
وجيهة يجاهد البطّال
سلاحو همّتو وصبرو
كتابو في يمينو نصال
عباس ياناس لحافو الخيش
زولا ً عيشتو في ضراعو
بجيب مصروفو من زندو
زولا ً ساعة ماعندو
جهادو الفيه كان كافي
وهمّو الفيه كان وافي
مو محتاج جهاد ادغال
من مولود نصيبو كتال

وكان عباس والمتلو
دِرْوة زاحفة في الواجهة
مرق من موتة في الأولي
وسِلِم من ضربة في التانية
الا التالتة ماجلّت
فات عباس من الفانية
جات الطلقة زي صاقعة
وقبل الروح تفوت مارقة
مرق الصرّة من جيبو
زي ماهي ماانحلّت
كان دخريه للجامعة
شالا ادّاها للجنبو
وآخر كلمة قال يابا
شالا الريح مشي يدنْدن
وبقت انشودة في الغابة

ود دفع الله لاكورك ولااتبشّع
لا اتبشتن ولا اتكتّح
لا اتهاير ولا اترتع
كان مدفع
وشال برقا ً في القبل يلكع
ود دفع الله مات واقف
وعينيه في السماء تعائن
ضاب طوريتّو في باطو
لامديون ولا دائن
والجلاد هداك راكع
مكبّل ايدو دم عباس
وكاتم نفسو ظلم الناس
ود دفع الله زي الشمس
فضل ساطع
يقلق راحة الديجور
ويدفق في الغياهب نور
ود دفع الله مات واقف
وكل ماحولو كان هاتف:_

ود دفع الله حي مامات
ولا عباس شهّل فات
بتول بنشوفها في الغيمات
شمِس برّاقة مابتندس
وتارا ً باقي مابينداس
وكل الراحو ريحن جات
عاصفة قوية ياجلاد
لاصرصر ولا ريح عاد
عاصفة عنيدة ياجلاد

[ABUZAID]

اتحفتنا


ومتعتنا


ابكيتنا


وافرحتنا




لك التحية

[وداحمرعين]

اتحفتنا


ومتعتنا


ابكيتنا


وافرحتنا




لك التحية

متّعك الله بالصحة والعافية ابوزيد وشرفتنا بالطلة...كتر خيرك وتسلم

[أشرف صلاح السعيد]

وداحمرعين عوافى..

رغم المآسى والبلاوى المالية سطر الحروف ..
بلاقى ابداعك واقف فوق وماراكع..
بقول فى قصة فيها كثير ولسة مواصلة قيها كتير..
اسجل اعجابى وافتنانى بالشعر القصة الفكرة..

[وداحمرعين]

وداحمرعين عوافى..

رغم المآسى والبلاوى المالية سطر الحروف ..
بلاقى ابداعك واقف فوق وماراكع..
بقول فى قصة فيها كثير ولسة مواصلة قيها كتير..
اسجل اعجابى وافتنانى بالشعر القصة الفكرة..


يديك العافية أشرف ولك التقدير وأطيب المني

[أشرف صلاح السعيد]

هاااى ياناس وين عباس؟
قالا الوالد الميمون
بعد مااحتاس
وفكرو الجابلو وجع الراس
بعد مااتخر المبروك
وكان تأخيرو مالو اساس
حتى الشينة كان وقعت
بجيهو صداها زى اجراس
وكان زفوها كل الناس

ود دفع الله إتساءل
بعد زول شمسا لعرق ملكوك
والود عباس دوام مظبوط
مامن عادتو يتأخر
وبالطرقات يتلكك
ولصلاة المغرب يتمهل

ود دفع الله جرا بروش
وكان عباس بجيبا من الحوش
بعد مايملى كل ابريق
يزيل غبار بين الفروض مفروش
زى حوش بتول القبيل مقشوش
وين عباس شالوهو جنوب؟
وبكرة الجامعة اللمالا قروش
ودوهو العزة؟
وكيف العزة ويكون مخطوف؟
ويكون مجبور او مغشوش؟
لا إعلان ولا استئذان
ولا استعلام ولا استفهام
وبالمجروس جدعوهو توش

يااسياد ليا سؤال
بعباس بتغيرو حال؟
الطايع بمشى ببقى شهيد
المؤمن بيكم ببقى شهيد
بس عباس قتلتوهو فطيس
وكانت موتو بالمجروس
قبل الغابة والتجييش
قبل وداعة الابو الدرويش

إتنين ياناس بنفس العام
يموتو بلاش فداك يانظام
وينكم انتو ياالحكام
تشوف كلابكم السعرانة
تخطف فى نفوس غلبانة
وحتى العاشو عرفو اهانة
وما كل الموت بالجبخانة
ناس بتموت بالديانة
وناس بتموت من السلخانة
وهلكو كتير فى الشفخانة
غير ميات جوا الزنزانة
والوف اتوفو حشة قلب
معاها سخانة
ولسه كلابكم ورا وساكانا
من مانشوفا يصيبنا الخوف
بلاكم جانا ومايغشانا