رشـــــــــفة .. بعض من الوجــــع المـُـــر

[ود الضو]

موجه ...
سيف الدين الدسوقي ... البلابل ..
*****
مافي إنسان يحكي ليكم عن دموع الناس وحبات العرق ..
يروي غربة زول موالف عمره لا راح لا مرق ..
أصبح الشوق في حروفه نار على صفحة ورق ..
ما في يا ناس قلب يسأل عن غريق شبعان غرق ..
....
شفتو لما الليل يروح والفجر يفرد جناحه
والعيون الساهرة تغمد والقلب تهدأ جراحه
نحن يا دوب يومنا يبدأ ما ضروري يطل صباحه
....
انحرمنا من الحبايب وعشنا في الغربة البعيدة
كل موجة حزن تمضي بكره موجة تهل جديدة
لا خطاب يحمل محبة لا وصية ( بت ) نريده
لا أمل ينعش قلوبنا ولا خيالاتنا السعيدة..

[ود الضو]

مافي إنسان يحكي ليكم عن دموع الناس وحبات العرق ..
يروي غربة زول موالف عمره لا راح لا مرق ..
أصبح الشوق في حروفه نار على صفحة ورق ..
ما في يا ناس قلب يسأل عن غريق شبعان غرق ...
.......
اصلو لما تصحي من الصباح وتشعر بان الحنين شغال فيك جـــرِف
ويدحرجك ذات اليمين وذات الشمال .. ابحث لك عن موسيقي هادئة جدا وصوت
يقدر يزيح منك شوية من الشجون التي قد تاورتك لحظتها ..
لا ادري مابي اليوم وليس كالعادة عندي عندما اعلنت بداية يومي هذا
وكل شيئ يتراءي لي وكانه باكي , احسب اني اري كل شيئ امامي حزين
بدرجة الاغماء ومحجوب بشيئ من الضبابية التي امقتها في علم الاشياء
وكيفية تفسير حالتها ..
حركة الغيمة :
ويح نفسي عندما امرتها او امرتني ذات سنة بان تعلن الغياب من تلك الوجوهـ السمر
وارضنا البتول , زفة مطر , ريحة دعاش , حزمة غيم تكسو السماء وتتحرك بطلاقة ,
كل تلكم تنحر فيّ رغم الموات , استنشق الاكسجين كما علمونا سابقا ومن المفترض
ان يتبع ذلك عملية الزفير تلك التي ان لم ابالغ انها غابت وان وجدت فهي لبقايا
انفاس الدخان ويتبعها كم ( أف ) و ( تف ) لاي شيئ ...

[ود الضو]

مافي إنسان يحكي ليكم عن دموع الناس وحبات العرق ..
* هو مشرع للحلم فسيح .. ؟؟
الناس في بلدي اغلبهم ( اهل حبة عرق ) كادحون , بسطاء , كلات موانئ
حشاشين قصوب , لقاطين قطن , مزارعية ...
استوقفتني ( حبات العرق ) الان , والفصل خريف , والارض قد كستها الخضرة
واولئك السمر قد حملوا الكدنكة والسلوكة والملود والطورية , تخرج منهم
حبات العرق دلالة ( البحث عن الرزق الحلال ) .. يزرعون ويتعبون ليحصدون
بعد ان تفتك بهم البعوض و ( الملاريا ) تلك التي احسب انها لاتعرف الا ان
تصيب التعابي الغلابة العايشين ( بالقطارة ) .. بعيدا عن التعقيم والتلطيف
والتخدير والتنعيش والاستكانة وكامل الدسم وغيرها ...
صفق النيم , وقطعة مبللة يربط بها الرأس , ويد اخشوشنتها الايام تمسك
علها تزيل قليلا من ناتج قساوة الايام وكيد السنين العجاف .. يسمعون ب
الفحوصات الدورية , والاشعة المقطعية , والليزر , وغيرها , وبلا دهشة
همسا ( هي الحاجات دي بسووها للزول المرضو شنو ؟؟؟ ) ماعلينا ,
صرخات وآهات وآلام وغصص تقف في الحلوق ( الطب عندهم عشبي فقط )
والوصفات العشبية بعد ان تستخدمها يقيم معك الطعم وفي حلقك الي ان ( تتاورك )
الملاريا او الخبيثة مرة اخري حتي لاتستغرب من الطعم وانت تتذوقه من جديد ..
فترة حصـــــــــــــــــــاد :
هو ثمن لكل تلك حبات العرق التي سالت , ولكل تلك القزازات من الدم التي
شطفتها البعوض , ولذاك الطعم الذي تم ابتلاعه لتخفيف الالم ولم يزل له باقي
في العميق من الاعضاء .. حاجة آمنة لازمها توب جديد وسفنجة وفستان
وشيئ من الزيت الصافي حتي تعيد بعضا من نعومتها وملمسها الانثوي ,
حتي تكون حضورا في زواج ود العمدة وبكامل زينتها ..
وذاك الشقي احمد ( عريان ) لازمه عراقي وسروال طويل وجلابية وسديري وشبشب ,
وبعض الجنيهات نقدا حتي يستطيع السفر وزيارة اخته في ركن ما في الدنيا ..
والبت عشــّــة , مثيلاتها يتجنززن ويتكتكتن ويتجلجلن لذا هي التي تأخذ من وارد
المحصود شيئا كثيرا , اها ياعشة قولي واكتبي طلباتك ؟؟؟ وعشة ماها الغرقانة
في التمني والحلم البعيد المستحيل , كل طلباتها ممكنة وسهلة التناول من اقرب
راكوبة قماش , بعيدا عن المسرة للتياب او خورشيد للبلوزات وشريكاتها من
الاسكيرتات , او عصمت للعطور والاكسسوارات وادوات الزينة , عشة زولة
اوقع من الواقعية ( ان صح التعبير ) يكفيها توبا من النوع الرخيص
ماهو ساتر وهي غير السترة كايسة شنو ؟ وقطعة فضفاضة تحت التوب حتي
تسهل حركتها في البيت او المطبخ وعند تنام , ...
اما باقي الشفع لهم قطع من الفنايل حتي يفرحوا بها يوم العيد مع اطفال القرية ..
سيد ( المشــورة ) الاب الذي احتطب الصبر منه قطعة , تكسوهـ الفرحة ..
ويحسب سرا في كمية الحصاد , ياربي بجيب كم ؟ كلها 3 جدعات ونص ,
نقول 25 شوّال طيب , ( المــُــونة ) البنخزنها كم ولي من الاطفال 7
وانا وامهم ؟؟ لالالا ياخ 45 دا كان بطل ؟ طيب المونة والكساوي والموجب
لي انا وام العيال في عرس ود العمدة وسفرة البت للقراية في سنار
ااااهـ نسيت ناس ( الضرائب ) ناس الحيكومة عايزين حقهم كمان ...

[ود الضو]

شفتو لما الليل يروح والفجر يفرد جناحه
والعيون الساهرة تغمد والقلب تهدأ جراحه
نحن يا دوب يومنا يبدأ ما ضروري يطل صباحه
****
مشاققات :
يعني الكلام دا معناهـ شنو ؟ لو انا اصلا فهمتو صاح ياناس ؟
الناس دي رغم كل شيئ ؟ وكل شيئ ختوا تحتها خطين بالاحمر
يعني بتستحمل وضع اي معاناة وبكل لذة ..
وبرضو هم مرتاحين لافي جراح قلب عشان تهدأ
ولا في عيون بتساهر وبتحسب في النجوم وتبرم في خصلات الشعر
يعني مافي كسير تلج ولا لقيط ورق ( يافلان وفلانة ) ...
ناس الله ساي ديل ياااااخ ..
اليوم يبدأ من الفجر ( ماتابع للبركة في البكور بتاعة جماعة كدا )
دا بركة في بكور خاصة جدا ومعروفة لديهم منذ سابق العصور
وربطوهـا معاهم في المخالي والقفف ومشت معاهم وين مايمشوا ...

[ود الضو]

الخـــــــــــــــــــــــــــاتمة : من موجة ؟
**
انحرمنا من الحبايب وعشنا في الغربة البعيدة
كل موجة حزن تمضي بكره موجة تهل جديدة
لا خطاب يحمل محبة لا وصية ( بت ) نريده
لا أمل ينعش قلوبنا ولا خيالاتنا السعيدة..
***
بالله الدسوقي دا قبيل قلنا لاكسير ولالقيط ورق ياخ
اتاريك جائي بي هنا وفاتو فت الخلاء والشدر
غايتو بتحيروا الزول عديل انتو يا الشعراء ...
انحرمنا من الحبايب .. حرمان شديد والله ,
لاحبة لبيني او كباية شب من يد الحاجة ؟
ولا قعدة حنينة في الهباب مع الحاج صباحا
ولا احتضان طفل يحبو ويتعلم في الكلام دابو ؟
ولا ولا ولا ؟
ولامرقة عصرية ,
ولاقدلة ضحوية , ولاقعدة في ضل ضحي في شارع
موازي لشارع الماسورة او المدرسة الثانوية ,
لاقزقزة في قندول فريك او حزمة عنكوليب ,
وموجات من الحزن والوجع المر تتجدد يوماتي
وكل واحدة اسوأ من سابقتها ...
(لا خطاب يحمل محبة لا وصية ( بت ) نريده )
انت في الخطاب ياحبيبنا ؟؟
مسكولات ساي بقت مافي يااااخ ؟
ولمتين يلازمك في هواك مر الشجن ؟؟؟
لمتين ..
واصبر واصبر ...

[أشرف صلاح السعيد]

ود الضو رمضان كريم..
استيديو التحليل ماعندك..
اختيار موفق للقصيدة ..وكنت اكثر توفيقا فى تفلية القصيدة..
واصل وخلينا نسرح بهموم الناس البسيطة يمكن نحس فى يوم ما وننتفض مع قصيدة..