من مفكرة طفل رضيع

[درديري كباشي]

انا يا اخواني عفوا يا ابائي عمري فقط اربعة شهور ... ما تستغربوا او تفتكروا هو ذا عمري الفني كما يقول الفنانين ... انا اقصد عمري من يوم ما اتولدت وحتى الان .. طيب حتقولوا كيف عرفت تعمل مذكرات ... سيبكم من التفكير السلبي دا حاليا ... المهم عايزكم تعيشوا معاي معاناتي .... تخيلوا انا في العمر دا طبعا محرم علي اذوق اي شئ سوى الحليب ومن مصدرين فقط اما امي او مرات يجيبوا لي حليب بدره بالرضاعة طعمه مقرف واظنه بنكهة الجمكسين .. ما تتخيلوا حجم القرف الانا عايش فيه كرهت الحليب ... عاوز اغير يا ناس ... تلاقي امي واضعاني في رجليها وتعطيني ارضع من ثديها وهي جالسه مع الناس التانين في صينية الغداء او العشاء او الفطور ... يتناولوا في اللحوم والشطة والليمون وانا مكمود بالحليب ..... مره واحده سللت يدي تحت يد امي ودخلتها في الشطة وكان نفسي اذوقها ... بصراحة لونها مغري احمر وجميل ... لولا صرخات المتطوعين .... الحقي مودي يا ماما يدوا جات في الشطة .. صرخو كلهم لمن انا اتخلعته .... وبكيت شديد جدا لاني ما عندي اي وسيلة للتعبير غير البكا ... كان نفسي اشاكلهم واقول ليهم ما تسيبكم في حالكم يا اغبية والشطة بتحرق الواطيها وانتو مالكم ومالي ... لكن طبعا ما راح اقدر اطلع عبارات مفهومه سوى همهمات ...
كله كوم وعندنا بت جيرانا بايره كدا كوم تاني ... مستهبله عامله فيها بتريدني انا ..... وتجينا من الصباح تكورك ..... وتظبط مواعيدها مع وقت الفطور ..... : وحمودي وينه يا ناس ... مشتاقه ليه والله .... وانا اكان ما شفته من الصباح بتجيني حاله ..... المصيبة انا من ما اسمع صوتها ... ابدا افرفر رجولي عاوز اجري اتخارج منها لكن طبعا ما في طريقه غير الفرفره في مكاني... واكون عاوز اقول ليها ابعدي مني يا بايره وسيبيني في حالي لكن للاسف هي وناس البيت يفسروا حركاتي دي بانها ريد وحب لها ..... وهي كمان يرتفع عندها معدل الهبل ( والعواره ) لدرجة انه الحروف عندها تتبدل الحاء تقلبها عين ... وانا مذكر تناديني بصيغة الانثى ... وتعالوا شوفوا :
(عمودي انتي شحيتي وا علاتوا يا ناش واعلاتوا يا ناش ... دايلاني اشيلك .... جايياك يا عسوله انتي ... وياعلوة انتي ) .....
وانا خلاص اقرب استفرغ ما في بطني لمن اشوفها جايه علي وازيد في معدل الفرفرة اقول عسى ولعل واحد من ناس البيت يفهمني ... المصيبة ولا امي نفسها فاهمة انه انا قرفان من المره البايره دي .... وكمان هي تمردقني مردقه وترميني فوق وتتلقفني تاني ... لمن بطني تقلب ... والمصيبة انا احاول اتكلم لكن كلامي ما يطلع الا في شكل همهمات ... المصيبة اهلي و هي يفسروها بانها ضحك ... وانبساط ....
اوفففف واخخخخخخ اهه زي ما بيقول المصريين جبنا سيرت الاط ... جا ينط ... اهو صاحبتنا وصلت ..... ما اقول ليكم مع صينية الفطور ختوها هي فتحت الباب ... طبعا عاملاني انا السبب ... عامله تفتش علي ..... الليلة وين حمودي يا ناس مشتاقه ليه ,,
امي : نايم في الصاله جوه
قلت : يسلم فمك يا ماما
هي : لا لا لا لا لازم اصحيه انا الليلة بتحصل لي حاجة اكان ما شفته من الصباح ..
... يا وليه ما تبطلي النصب بتاعك دا اضربي فطورك واتخارجي امشي دايره بي شنو ... انا ما اتمنيت اكبر واجري برجولي سريع الا عشان المخلوقه دي ..لكن يا دوب عمري اربعة شهور .... يعني اصبر على الاقل سنة عشان اقدر اتخارج منها ,,, يا رب يجيها عريس يرحلها مننا يوديها السعودية وكفيله تاني ما يديه اجازة ويحجز جواز مرته كمان ..
برجع

[درديري كباشي]

اقول يا اهلنا اكثر شئ انا بكرهه ومضيق علي الدنيا هو الاختراع الفاشل المبتلننا بيه واسمه بامبرز ... هو اخترعه الخواجات ونحن اهلنا تقليد اعمى بداوا يستوردوه بالكميات عشان يعزبونا بيه نحن ... واصبح منه انواع كثيرة ودعايات مثلا يمنع التسرب ويحمي طفلك ..شوف النفاق كيف هو يمنع التسرب بمعنى انه انو الاوساخ تكون محبوسة معانا جوة ونكون نحن في حماية .... هو الناس الكبار ديل لو الواحد لقى اي بلل في فرشه يتجنن ويخلق منها قضية انسانية اما نحن .. لا في حماية لينا ولا حد شاعر بينا .. وعاملين جمعيات لحقوق الحمير والحيوانات ونحن البمبرز مظلطنا ومطلع عينا ولا جمعية ولا يحزنون ..
المهم صحيت تاني يوم الصباح بمقص شديد قدر ما اتململت في النهاية ما لقيت اي حل غير اني اصرخ .. وفقعتها ليك صرخه وانا كل ما اصرخ يزيد المقص علي ... امي دي قامت مفزوعة ... وسجمي ياناس ولدي ماله .. ورفعتني في كتفها ... وانا لسع اصرخ ... كنت حاسس انه صراخي راح يلفت نظر جارتنا البايرة سعاد .. وهي كانت تجي بدون سبب اكيد لمن تسمع صراخي حا تجي جارية .... فعلا بعد شوية رفعت راسها بالحيطة ....
سعاد : حمودي مالو ياخالتي مريم سلامتو ..
امي: تسلمي يا سعاد يابتي ... ما بعرف ماله فجاه قام من النوم يصرخ منه وليه ...
سعاد : يكون عنده مقص اغلي ليه حرجل مع يانسون مع حب القرع وانا جايه بالباب اشوفه .
قلت : بالسرعة دي شخصتي المرض وكتبتي الروشتة بالحيطة يا ملقوفة .هو انت لو كنت دكتوره الدكتور اخر حاجة يقررها هي نوع الدواء انت علاجك يبدا بالدوا ؟؟؟ الله يخارجني منك انت .. فعلا بعد شويه بدا الباب يطرق .. واكيد هي وصلت ...
وفعلا جات جاريه علي وبنفس هبلها ....
( سلامتك يا عشولة شحروك شحروك الما بشبهوكي ... ما تستاهلي والله ) وانا قلت ما في زول سحرني وبهدلني غيرك انت .

[عبدالرحمن مدثر]

هاهاهاهاااااااااااااااااااااااى

ابوالدر ياروعة

ياخ ضحكت لمن جوعت اكتر

طالبك وجبة دليفرى كقضاء او كفارة لفعلتك تلك


قلت لى المردغة دى كلها عشان تفطر عليهم

لكن ياصاحبى مرات بحس فعلا انو الاطفال ديل عندهم

حاجات دايرين يوصلوها لينا بس فى فجوة عدم فهم

عباطة زائدة ....فى حاجة غلط المهم


ابو الدر داير انداااح هنا

لكن النصيحة كدا جيعااااااااان

وكان مارمضاان بعاين فينا


كان جيت دقيت باب بوستيك دا

وفتشت لحموووووودى


وااااااااااحلاتنو يانااااااااااااس

[درديري كباشي]

هاهاهاهاااااااااااااااااااااااى

ابوالدر ياروعة

ياخ ضحكت لمن جوعت اكتر

طالبك وجبة دليفرى كقضاء او كفارة لفعلتك تلك


قلت لى المردغة دى كلها عشان تفطر عليهم

لكن ياصاحبى مرات بحس فعلا انو الاطفال ديل عندهم

حاجات دايرين يوصلوها لينا بس فى فجوة عدم فهم

عباطة زائدة ....فى حاجة غلط المهم


ابو الدر داير انداااح هنا

لكن النصيحة كدا جيعااااااااان

وكان مارمضاان بعاين فينا


كان جيت دقيت باب بوستيك دا

وفتشت لحموووووودى


وااااااااااحلاتنو يانااااااااااااس



تعرف في الوقت الانت فيه مع حمودي بيجاي انا كنت بقرا في جرستك بهناك ,,,

لكن بصراحة موضوعك داك الا بالليل اسع انا من قبيل ناسي انه صايم يا دوب اتذكرت انه انا عطشان ... خلينا مع حمودي وسعاد البايرة ... قال تجي تتنحل وعاملاه هو السبب .

[حاتم مرزوق]

صاحب
السهل الممتنع /درديري

لسانك الفصيح تعبر به عن طفلك الصغير ،،،،،،

ليس الصمت مبررا كافيا للتعدي علي الحرمات... وفي الذاكرة مشاهد مثيرة للدهشة نراها بأم اعيننا صباحا ومساءا تعد انتهاكا صارخا لحقوق الطفل.


شاهدنا من يحمل بيده اليمني طفلا وباليسري سيجارة!!!

شاهدنا من لا يراعون عوامل الطقس ويخرجون الأطفال بملابس غير ملائمة!!!

شاهدنا من يدخن بالسيارة وهي مليئة بالأطفال!!!

كم تمنينا ان يهب الله الأطفال السنة فصيحة في المهد كما وهب عيسي ليدفعوا عن انفسهم في وجه المجتمعات التي تعودت الغاءهم واقصاءهم.

[حاتم مرزوق]

انتهاك حقوق الأطفال موضوع شائك وطويل وها انت قد فتحت بابا طال ايصاده ولا شك ان اطفالنا محرومون من ابسط حقوقهم الأنسانية والمعيشية.

شاهدنا الأطفال يأكلون فضلات الكبار وشاهدناهم مهملون بملابس بالية وشاهدناهم وهم يعملون في الأسواق وعربات النقل وقد حرموا من التعليم.

مشاهد كثيرة لا استطيع ان احصيها نراها منذ زمن بعيد ولكن هذه الوقفة لو لم نخرج منها بشئ خرجنا بكسر حاجز الصمت.

لك جزيل الشكر اخي درديري علي هذه الصرخة الداوية.

وانه لموضوع جدير بتصدر قائمة التثبيت في المنتدي العام غير انك اردت له ان يبدأ بالنفاج.

[درديري كباشي]

انتهاك حقوق الأطفال موضوع شائك وطويل وها انت قد فتحت بابا طال ايصاده ولا شك ان اطفالنا محرومون من ابسط حقوقهم الأنسانية والمعيشية.

شاهدنا الأطفال يأكلون فضلات الكبار وشاهدناهم مهملون بملابس بالية وشاهدناهم وهم يعملون في الأسواق وعربات النقل وقد حرموا من التعليم.

مشاهد كثيرة لا استطيع ان احصيها نراها منذ زمن بعيد ولكن هذه الوقفة لو لم نخرج منها بشئ خرجنا بكسر حاجز الصمت.

لك جزيل الشكر اخي درديري علي هذه الصرخة الداوية.

وانه لموضوع جدير بتصدر قائمة التثبيت في المنتدي العام غير انك اردت له ان يبدأ بالنفاج.


اشوفك توغلت في عقلي الباطن يا استاذنا حاتم ونكشت اسباب الموضوع الخفية الكامنة منذ الازل .. وفعلا اهمها حكاية الاطفال ياكلوا بعد الكبار ..او بعد الضيوف .. وهذه كانت ليست لها علاقة لا بغنى او فقر .. نحن في زمن كان عندنا الضيف مقدس .. لاتاكل الا يصل هو ولو كان ضيف ثقيل دمه تقيل معزوم غداء يجي الساعة اربعة نظل نحن الصغار نتلوى جوعا في انتظاره .. ومن ثم تاكل بعد صينية الضيوف ترجع .. ولو احتجيت بالجوع ماشي يسخنوا لك من باقي ملاح الفطور .. هي تراكمات ناتجة عن تقاطعات ومفاهيم خاطئة للشهامة والمروة واكرام الضيف وغايبة عنها تماما حقوق الصغار وفي كل كبد رطب اجر ... فالطفل لا يسير الشفقة الا اذا مرض ... هذه ما جعلت الصغار يدمنون الصراخ حتى بلا سبب عسى ولعل يزيد جرعة العطف عليه قليلا .

[درديري كباشي]

عدنا لمفكرة البيبي:

آخر حاجة وقفت فيها يا ابائي واعمامي وعماتي وخالاتي الاعزاء هي قصة المقص .. وجات جارية جارتنا المهووسة سعاد .. وقال ايه عاوزة تعمل لي خلطة فيها شمار وكذبره ورز . المره المجنونة عاوزة تعملني محشي ما عارف .. بس الحمد لله امي ما سمعت كلامها وخطفتني وجري على المستوصف ... المصيبة جارتنا اصرت قالت الا تمشي معانا .. انا مش عارف المكشكشة دي السلطة علينا منو .. المهم راحت معانا وركبت معانا في الركشة .. وانا بطني مولعة نار ما صدقت هدت شوية قلت نبطل البكا .. قامت الهبلة دي تكلكل فيني .. يمين ختت يدها في بطني صرخت صرخة لامن بتاع الركشة انخلع وقرب يقلبها بينا .. لكن امي سلختها ليك سلخ لامن انا اتكيفت قالت ليها : حرام عليك يا سعاد نحن ماصدقنا سكت تجي تكلكليه في بطنه الواجعاه .. الكذابه قالت ما كلكلته كنت عاوزة اعرف بطنه سخنة ولا باردة .. وانت مالك ومال سخانتها انت دكتور دواك والحمد لله قالوا ليك ما بينفع جاية مباريانا مالك .. غايتو انا لوكنت قادر اتكلم كان المره المتلبطة دي عملت لها نفسيات .. بس لكن برضو ما قصرت صرختي خلت بتاع الركشة ذاته اداها علي راسها .. قاليها يا ولية انت هبلة ولا شنو هسع خلعتينا وقربنا نعمل حادث بسببك ..

المهم وصلنا المستوصف والدكتور قال بسيطة عنده غازات .. والسبب الظاهر انكم بتعاملوه بعنف ودا طفل صغير ما بيتحمل اللعب العنيف دا بيخلي الهوا يدخل في بطنه ويعمل له نفاخ .وانا قلت ظهر الحق ينصر دينك يا دكتور بس يا ريت امي تكون انتتبهت لكلامك عشان تخارجني من المره دي .. ياخي دي كرهتني بيتنتا عديل كدا .

[درديري كباشي]

عدنا لكم بورقه ثانية من مذكراتي :

المهم يا اهلنا في اليوم داك الدكتورة كتبت لي دوا نقط وفعلا بعد كم نقطة شعرت انه بطني ريحتني شوية ونمت في كتف امي ارتحت شديد .. واهم نتائج المشوار دا انه سعاد الهبله حذروها وقالو ليها تاني ما تلعبي معاه لعب عنيف .. ياخي البت دي كل يوم قاطعة قلبي ..يا خي ترميني فوق وتتلقفني انا اقول خلاص وقعت واعصابي تبوظ .. اضطر اضحك ليها ضحك خوف اقول يمكن ترحمني شوية وهي تلاقيها مواصلة وناس البيت سامعني بضحك ليها فاكرني سعيد هم ما عرفني انا عايش في رعب مع المره المجنونة دي .
اول ما دخلناا البين انا صحيت على صوت احلى بني ادم في الدنيا وهي الجدة حبوبتي مره رايعة انا بريده ريد شديد .. وهي بتغني لي وتلعبني لكن لعب لذيذ ما زي لعب سعاد المتعب .. بس شافتني ..
مالو دقلوشتي ( كان بتقول لي دقلوشتي رغما عن انه انا عارفه اسم شين لكن حبيته عشان طالع منها هي ) وفعلا اول ما شافتني صحيت اتلقفتني من اامي وبدت تكلمني بكلامها الحنين داك ( مالو دقلوشتي مالو عسولتي مالو الحبيب سحروة لي ) كنت عاوز اقولها كله بسبب الهبلة الواقفة جمبك دي لكن طبعا كالعادة الكلام طلع همهمات كدا مع ضحكتي هي تحس انها فهمتني لانها عصرتني عليها بشدة وقبلتني .. يا خي حبوبة دي رايعة بشكل ..

[أشرف صلاح السعيد]

ابوالدر عوافى..
تعرف حسيت انى باشاهد احد افلام سلسلة "look who is talking" بس نسخة سودانية ولا اروع من كدا..سألتك قبل كدا لكن السؤال عايز يطلع "كنا بتلفها" يااخى شوفنا ماممكن مانبوظ الابداع ولازم نربطو بالسطلى!!
جد خيال وخيال..خيال الحوار وخيال التوقع..يااخى ماعارف اقول شنو حقيقى "انعل ابو الابداع" ماقلت ليك الابداع دا يانربطو بسطلة يابى نبزة!!
خلينى الارجع وانداح بالقراءة..
لكن بااااالغت والله يخلى سعاد البايرة عشان عمودى بعوارتا يتجدع ويبدع "العوارة برضو مع الابداع"..
رائع ابوالدر مع مرتبة الشرف..

[درديري كباشي]

ابوالدر عوافى..
تعرف حسيت انى باشاهد احد افلام سلسلة "look who is talking" بس نسخة سودانية ولا اروع من كدا..سألتك قبل كدا لكن السؤال عايز يطلع "كنا بتلفها" يااخى شوفنا ماممكن مانبوظ الابداع ولازم نربطو بالسطلى!!
جد خيال وخيال..خيال الحوار وخيال التوقع..يااخى ماعارف اقول شنو حقيقى "انعل ابو الابداع" ماقلت ليك الابداع دا يانربطو بسطلة يابى نبزة!!
خلينى الارجع وانداح بالقراءة..
لكن بااااالغت والله يخلى سعاد البايرة عشان عمودى بعوارتا يتجدع ويبدع "العوارة برضو مع الابداع"..
رائع ابوالدر مع مرتبة الشرف..



نشكرك يا باشمهندس

بس ايه حكاية السطلي دي انا في مكان آخر سمعت نفس التعليق وفي اكثر من موضوع .. وهي نقطة تحتاج لنقاش طويل جدا وفيها خطا مش علي انا فقط هو اننا اعتدنا ان نربط الابداع بالمخدرات ... ونحن نعرف ان الابداع هو قمة العطاء البشري والبشر يميزهم عن باقي الخلق العقل ولا يمكن المخدرات التي تذهب العقل يكون لها مساهمة في الابداع .. على كل حال النقاش سيطول ونفرد له موضوع احسن

[ابوخالد]

وكائن ترى من صامت لك معجب ٌ زيادته أو نقصه فى التكلمِ ....

من الواجب الإعتراف بالحقيقة ولكن الأكثر وجوبآ هو التمسك بها .....

قمة الإبداع ....ونقص ذاك الوصف لقلة حروفى ...

قمة الإبداع أخى درديرى ... وصف الحرف للزول الوصفة فاق حد الوصف ...

أخى عندما يكون للفكرة نهاية ...

نكمل إبداعنا إلى ما لانهاية ...


عزرآ أخى ... الصلاة

[درديري كباشي]

وكائن ترى من صامت لك معجب ٌ زيادته أو نقصه فى التكلمِ ....

من الواجب الإعتراف بالحقيقة ولكن الأكثر وجوبآ هو التمسك بها .....

قمة الإبداع ....ونقص ذاك الوصف لقلة حروفى ...

قمة الإبداع أخى درديرى ... وصف الحرف للزول الوصفة فاق حد الوصف ...

أخى عندما يكون للفكرة نهاية ...

نكمل إبداعنا إلى ما لانهاية ...


عزرآ أخى ... الصلاة



نشكرك يا باشمهندس والابداع منكم يستمد ( يعني جارين لينا سلك من جنريتراتكم ) وخاصة الجنريتر بتاع اشرف .

[درديري كباشي]

عدنا للمذكرات

طبعا اليوم داك كان احلى يوم .. قيلت معنا حبوبة جدتي ولعبنا انا وهي وضحكت وقضيت احلى ساعات .. انا مستغرب هي ليه بتغيب مننا ما بتسكن معنا للابد .. وفعلا في المساء لاحظت ليها لبست توبها وجات قبلتني شديد .. وانا عرفت معناها هي نوت المغادره .. وهي رايحة ناحية الباب بكيت انا وصرخت وفرفرت رجولي وكله ما جاب نتيجة .. وبقيت انا مع الالم والضنا وسعاد البايره .. وجاتني سعاد تتعاور ( انتي دايلة تمشي مع حبوبتك .. عايزة تخلينا يا عشولة ) كنت متمني انطق في اللحظة دي زي المسيح عشان اقول ليها ماتنكشحي كدا ولا كدا يابايرة تشوفي ليك راجل يلمك .. على كل حال اخذتني امي في كتفها وهزتني ودارت بي في الحوش .. الى ان هديت .. مش لاني اقتنعت بغياب حبوبة فقد لاني شفقت على امي وحسيت انها تعبت .. عشان كدا هديت حتى نمت في كتفها من جديد .

[littlestar]

يامن تخطت روعته حدود الوصف والتعبير
أديبنا الأريب أبو الدر
واصل ونحن متابعييييييين
وأنت تمر بسحابك إلى سما النفاج
وتمطرها بوابل إبداعك
وتغدقها عطاء
ليس لدى ما أقوله سوى
***حفظك الله***

[الملكة اسماء ( ام محمد )]

هكذا انت حين تتقمص الدور وتُلبسنا معك ثوب الدهشة
وكآنك تعيش داخل عقل هذا الرضيع الحائر بين واقع عجزه عن التعبير والرضا بوجود من تعكر صفو يومه كل صباح
ثم نقلتنا لاروع الاحضان حين يلتقى احساس الحنان والانتماء الحقيقي لايادي تربت عليها قلوب من حولنا


ابو الدُر .. يجلس متآمل لما حوله ويقراء ابجديات التفكير فيعيش مرة في عالم الصراصير واخرى في قفص دجاج والان رضيع بين يدي سعاد المتطفلة والحبوبة العطوف والام الحنون
عفوا ..دعني اتطفل واسال سؤال لابو الدُر الوالد
هل تعتقد ان قراءتك لعقلية طفل شي طبيعي ؟ يعني من المعروف ان الاباء عموما لا يحبذون متابعة الاطفال او مراقبة تصرفاتهم الا فيما ندر
اعتقد ان عقلية المتدبر والمتآمل تسيطر عليك بشكل يجعلك تعيش الدور وكانك فعلا بطل القصة


حقيقة اقراء لك وفي كل مرة يزداد اعجابي بقلمك وسردك السهل الانيق
سيدي الفاضل
هنيئا لنا بك

[درديري كباشي]

يامن تخطت روعته حدود الوصف والتعبير
أديبنا الأريب أبو الدر
واصل ونحن متابعييييييين
وأنت تمر بسحابك إلى سما النفاج
وتمطرها بوابل إبداعك
وتغدقها عطاء
ليس لدى ما أقوله سوى
***حفظك الله***


سلام يا نجمة يا كبيرة وخايفة من عيوننا..

نحن نستمد طاقتنا من حضورك لاننا شغالين بالطاقة الضوئية بس قللي الغياب .

[درديري كباشي]

هكذا انت حين تتقمص الدور وتُلبسنا معك ثوب الدهشة
وكآنك تعيش داخل عقل هذا الرضيع الحائر بين واقع عجزه عن التعبير والرضا بوجود من تعكر صفو يومه كل صباح
ثم نقلتنا لاروع الاحضان حين يلتقى احساس الحنان والانتماء الحقيقي لايادي تربت عليها قلوب من حولنا


ابو الدُر .. يجلس متآمل لما حوله ويقراء ابجديات التفكير فيعيش مرة في عالم الصراصير واخرى في قفص دجاج والان رضيع بين يدي سعاد المتطفلة والحبوبة العطوف والام الحنون
عفوا ..دعني اتطفل واسال سؤال لابو الدُر الوالد
هل تعتقد ان قراءتك لعقلية طفل شي طبيعي ؟ يعني من المعروف ان الاباء عموما لا يحبذون متابعة الاطفال او مراقبة تصرفاتهم الا فيما ندر
اعتقد ان عقلية المتدبر والمتآمل تسيطر عليك بشكل يجعلك تعيش الدور وكانك فعلا بطل القصة


حقيقة اقراء لك وفي كل مرة يزداد اعجابي بقلمك وسردك السهل الانيق
سيدي الفاضل
هنيئا لنا بك



تعرفي يا ملكة كالعادة اسئلتك في الصميم وخلقت عصار ورغوة في راسي .. لكن انا وكالعادة ايضا سارد بامثلة من الواقع لاني اعتقد ان الواقع سيعبر عن نفسه اكثر مني ..

تعرفي يوم عشرين يونيو الماضي هو يوم سفر عيالي للسودان .. وكان معاي عباس الدسيس لكي يوصل معي العيال للمطار بسيارته البرادو ( ما شاء الله) ونحن من اللخمة وشفقة عباس وانا ادخل واخرج استعجل في الجماعة عندي بنتي الصغيرة سمر عمرها سنة وشهرين تقريبا يادوب تتعلم في المشي والكلام .. هي ملبسنها لبسة جديدة وجزمة جديدة وروحها عاجباها .. وانا داخل وخارج ما شغال بيها وهي شغالة تنبه فيني بالكلمتين اللاتي تعرفهن( بابا الااااااااااااااااه) الا انه امها قالت سمر بتلفت فيك انت ما علقت على لبستها لييه .. ثم بعداك انتبهت طبعا شلتها وتاثرت شديد .. هي همها وعقلها الصغير شاف انه انا كان لازم ابدي اعجابي بلبستها واعتقد انه هي كانت شايفه هذه هي اهم نقطه في كل هذا الموضوع ..والى الان كل ما تذكرت عباراتها تاثرت وندمت.. مش هو مثال بسيط يبين لنا انه الطفل الذي يبلغ من العمر عام واحد له نفس الشعور ونفس الحوائج التي نحتاجها نحن الكبار تماما .. عبارة مدح كانت كل طموح هذه الصغيرة .
حا ارجع بمثل ثاني من عالم الحيوان .