المساعد الشخصي الرقمي

مشاهدة النسخة كاملة : أمونة00


الفخيييم
02-09-2009, 09:36 AM
نواصل مع الشاعر المبدع القدال00



ماضهبت اقول لقيتك
وانتي في كل الخواتم والمياتم
والنجيمات والعواتم
ماحزنت اقول بكيتك
نحن في حزن المخاليق
والمغنين المطاليق
الفرح جاييك وعد
غنوة اولادالتحاريك
السعد ولاالبعد
البعد ولا السعد
كنتي في ليل الخوابي
تهاتي بينات الطوابي
تحاكي جقليب السعي
الجنيات خلو حجرك ريح يفوفي
وعين مزرزرة من شقي الفرح المرابي
ومنية الوعد الدعي
يادياري الوين000 أني
تور عفين الشين أني
مااضينة وزين اني
تورعفين الشين اني
وانت في شوفك تخاتل رفة الطير والحفيف
انت في خوفك تكاتل عينة الجلبت خريف
وانت في لالاوبة مصلبة البنيات
النسيمات الهفيف
وانت في لالاوبة مشنقة الوليدات
ناس نجومي ومحبس النفس الرهيف
بطنك كرشت غي البنات نافي
دقنك حمست جلدك خرش مافي
وكت الوهم نافيت00 صدق الوعد جافي
وكت العلم جافيت مر الصدق وافي
وكنا بنشيل الغبائن والاناشيد
جهدية الاورطية
جهدية الحلبونا
شدو جمالم جونا
حلبنا ليهم سمسم والسمسم ما كفاهم
جلبنالهم سعية
وجينا للبقعه ام قبايل
سيل من الوادي الكبير
الكفيف شايل الكسيح
ياعيون ودالضكير
واحدة من توشكي تقلع
تاني تقلع في المطامير
ياجبة الدرويش
البابا بسل العيش الله بسلا
والبابا خدمة الديش الله بسلا
البابا القول بشويش
ياعيون ودالضكير
عماك في حقك دية
لي زمنا موجهدية
جهدية الاورطية
جهدية الحلبونا
شدو جمالم جونا
وحلبنا ليهم سمسم
والسمسم ما كفاهم
جلبنالهم سعية
ياعيوني شن بتشوفي
وياأمونة شن بتشوفي
شدرا تال اليمامة
ولا الصقر الحمامة
ولا البطن التفوفي
يا امونة شن بتشوفي
وياعيوني شن بتشوفي
جهدية وسيف وراية
تبروقة وخيل وشاية
اذان بالجوع اذن لي
ام خوفك فايت خوفي
يا امونة شن بتشوفي
ويا عيوني شن بتشوفي
تلت التلاتة شلق
تاني التلات محلق
والتالت جا يبشرني
سرقوهو الدايرين حتوفي
ياامونة شن بتشوفي وياعيوني شن بتشوفي
شايفة الدموم واللمة
بين الدقون والعمة
ولاني فوق معلق
صقر الحدي مندوفي
ياعيوني شن بتشوفي
ويا امونة شن بتشوفي
سانتو
02-09-2009, 11:10 AM
ياخ والله انت جدجد فخيم ورائع ياخ ربنا يديك العافيه
المبارك ود إبراهيم
02-09-2009, 12:15 PM
القدال يا جميل والجاب شعرك هو زاتو جميل ما أروع حرفك أخي القدال وما أروعك أخي الفخيييم في نقل هذا الأبداع ودائما إبداع الشعراء إقترن بالأسماء القديمة الأصيلة مثل آمن وأمونة وزينوبا،
آمنة الفي الضمير ماذيني ما شـــفتوها يا خلاني.
والمجنن عقولنا وأّذانا شفت عيوني في سيقانا.
أشرف صلاح السعيد
02-09-2009, 01:34 PM
الفخييم عوافى..
ابدعت فى جلب البدائع والمبدعين..
الاشعر قمة..
الغنى قمة..
وخلى المستمعين يبقوا قمم..
مش زى كلام الطير الفى الباقير وشغل الطقطقة والقرد والخ..
يديك الف عافية اخى الفخييم يااصيل..
الملكة اسماء ( ام محمد )
02-09-2009, 02:34 PM
وانت في شوفك تخاتل رفة الطير والحفيف
انت في خوفك تكاتل عينة الجلبت خريف


وكت الوهم نافيت00 صدق الوعد جافي
وكت العلم جافيت مر الصدق وافي

يا امونة شن بتشوفي
وياعيوني شن بتشوفي
جهدية وسيف وراية
تبروقة وخيل وشاية



ياامونة شن بتشوفي
وياعيوني شن بتشوفي
شايفة الدموم واللمة
بين الدقون والعمة






تكمن الروعة في عدة اشياء
فرائع ان ننتقى مانسمع وما نقراء

ورائع ان نختار مايجعل للقراءة طعم الشهد
ورائع هو شاعر تربى على الاصالة
ورائع هو من اختار لنا روائع تفرد بها القدال

ابيت الكلام المغتغت وفاضى
وخمج
ولادك قصادك شعاع التحايا
يضوّوا الشقوق التلم الدوابى
يوروا الدورب للقلوبهم عمايا

تحياتي