شاكر شبك

[درديري كباشي]

-فك
- ماابفك
-يا زول انت مجنون ما تفك الجلابية دي
- ما بفك انت الجابك بيجاي وخلاك تعفص لي خرطوش الموية شنو ؟؟؟
-يا خي ما قلنا ليك معليش ما كنت شايف الخرطوش -يا شاكر ما تفك الراجل دا ما قال ليك ماشايفك بترش بالخرطوش
- وانت يا مختار الدخلك شنو ما شايف الراجل عفص الخرطوش لحدي ما انا عاينت للخرطوش اشوف الموية قطعت ولا لا والموية جات رشتني بلت هدومي وعاوزني افكه كمان .
-

- يا شاكر ما قال ليك معليش وبعدين دا راجل غريب ما من الحلة وما بيعرفك والا لو كان عارفك كان عمل حسابه ومشى بعيد منك ..


- تقصد شنو انت يا مختار يعمل حسابه يعني انا كلب ولا مرفعين ... يعمل حسابه مني ..
-يا شاكر يعني فكيت الراجل الغريب وشبكت فيني يازول انت بصحك فك الجلابية دي ..

- وانت عشان انا خليتكم من الشكل والدق قايلني بقيت اخاف منكم .. وانت زمن ما اخذت ليك بنية مني ..
- شاكر اعقل ياخ بطل الهبالة .. اهو صاحبك الكنت ماسك فيه اهو اتخارج منك وجرى ..
- بس جرى بسببك ما انت فكيته مني الليلة الا تجيبو راجع ..
- يا اخوان دي مصيبة شنو واجيبه من وين ...؟؟؟
- ما انت عامل لي فيها مصدر صلح ورجل البر والاحسان فكيته الليلة الا تمشي تجيبة ..


**************************************************

اشوفكم بعد المويات اقوليكم شاكر دا منو لكن هسع نتخارج براحة قبل ما يتشبك فيني انا كمان .... مختار الله معاك ... بنرسل ليك بلحة تحلل بيها الصيام

[درديري كباشي]

لقيت لي فرصة جيت راجع سريع

شا كر دا يا اخوان براحة جيبو اضانكم ما يسمعنا ::

هو ولد يعني شبه متخلف .. اها ربنا اداه بسطة في الجسم وعقل طفل .. دا قاليك من كان عمره خمسة شنوات قدر يرفع امه من الارض تتخيلوا ... .اها على كده قس ... فتوة احمق عقله صغير حقار و قوي جدا .. وكان اتشبك فيك يحلك الحل بلة ... محتلي الحلة كرهنا الكورة .. في الحفلة يمشي يجر اجمل بت من وسط الناس يقول ليها الا ترقصي معاي ... في التمرين كان ما لعبت ليه باص انت رحت فيها ... ويمكن يشنكل ليه واحد والحكم يفوتها لانه لو حسب فاول ضد شاكر معناها راح يبيت في المستشفى ..
هسع زي ما شفتو جا ود حلتنا مختار بطيبته خلاه فك الراجل الغريب ... وهو لغاية الحين شايفنه ماسك في تلابيب مختار واي واحد يمشي يفك منه مختار راح يتشبك فيه هو ..

[فراس]

ابو الدر سلام من علي البعد

لانو خايفين من شاكر

لكن شاكر مالو والحاصل عليه

ومادام بعزل اسمح بنت في الحلقة

ماطلع زول نصييييح ومفتح كمان

وطبعا لومارقصت معاه الله قال بي قولا

ياخي دا احسن زول كل طلباتو مجابه

لكن انا بعد دا متوسم فيه الخير

لازم اكون عندو ايجابيات وانا متاكد من كده

بس انت تعال تم لينا الباقي عشان

الجهجه حاصلة منتظرين

تسلم يارائع

[ود الجعلي]

-فك
- ماابفك
-يا زول انت مجنون ما تفك الجلابية دي
- ما بفك انت الجابك بيجاي وخلاك تعفص لي خرطوش الموية شنو ؟؟؟
-يا خي ما قلنا ليك معليش ما كنت شايف الخرطوش -يا شاكر ما تفك الراجل دا ما قال ليك ماشايفك بترش بالخرطوش
- وانت يا مختار الدخلك شنو ما شايف الراجل عفص الخرطوش لحدي ما انا عاينت للخرطوش اشوف الموية قطعت ولا لا والموية جات رشتني بلت هدومي وعاوزني افكه كمان .
-

- يا شاكر ما قال ليك معليش وبعدين دا راجل غريب ما من الحلة وما بيعرفك والا لو كان عارفك كان عمل حسابه ومشى بعيد منك ..


- تقصد شنو انت يا مختار يعمل حسابه يعني انا كلب ولا مرفعين ... يعمل حسابه مني ..
-يا شاكر يعني فكيت الراجل الغريب وشبكت فيني يازول انت بصحك فك الجلابية دي ..

- وانت عشان انا خليتكم من الشكل والدق قايلني بقيت اخاف منكم .. وانت زمن ما اخذت ليك بنية مني ..
- شاكر اعقل ياخ بطل الهبالة .. اهو صاحبك الكنت ماسك فيه اهو اتخارج منك وجرى ..
- بس جرى بسببك ما انت فكيته مني الليلة الا تجيبو راجع ..
- يا اخوان دي مصيبة شنو واجيبه من وين ...؟؟؟
- ما انت عامل لي فيها مصدر صلح ورجل البر والاحسان فكيته الليلة الا تمشي تجيبة ..


**************************************************

اشوفكم بعد المويات اقوليكم شاكر دا منو لكن هسع نتخارج براحة قبل ما يتشبك فيني انا كمان .... مختار الله معاك ... بنرسل ليك بلحة تحلل بيها الصيام

دريري
الله يكفينا شر المشاكل والشبك ................ وشر شاكر:d

[درديري كباشي]

ابو الدر سلام من علي البعد

لانو خايفين من شاكر

لكن شاكر مالو والحاصل عليه

ومادام بعزل اسمح بنت في الحلقة

ماطلع زول نصييييح ومفتح كمان

وطبعا لومارقصت معاه الله قال بي قولا

ياخي دا احسن زول كل طلباتو مجابه

لكن انا بعد دا متوسم فيه الخير

لازم اكون عندو ايجابيات وانا متاكد من كده

بس انت تعال تم لينا الباقي عشان

الجهجه حاصلة منتظرين

تسلم يارائع


سلام يا فراس لاني كنت فاطر بر البيت وبعيد من النيت ما رجعت الا هسع عشان اكمل ليكم قصة شاكر .. وحكاية مختار كيف اتخارج منه بدون ما ينال منه المعلوم من لكمة لكمتين او بونية زي ما قال شاكر .

[درديري كباشي]

دريري
الله يكفينا شر المشاكل والشبك ................ وشر شاكر:d

يا
ود الجعلي كيفك يا مشوكش الشروكي .. ومال خاتي صورته لشنو ؟؟

راجع ليكم لفلم شاكر يا زول اسكت شايف الشلخة دي والفقله دي .. ياخي خليها ساي بس

[درديري كباشي]

عدنا لشاكر ..
كما ذكرت تركنا شاكر ماسك في تلابيب صاحبنا مختار ورحنا الى بيوتنا يقتلنا الشوق لنعرف كيف تخلص مختار من شاكر ..
في المساء رحنا الى عمود النور حيث نتجمع كاصدقاء نتونس عن احداث اليوم ..اول ما وصل مختار بادرته انا يلا يا مختار الحق نحن منتظرين نعرف الحصل ؟؟
مختار : امشو يا جبناء وانت بالذات يا عمر دا كان العشم والحالة عامل فيها صاحبي ..
قلت : وكنت عاوزني اعمل شنو ما راح يفك منك ويمسك فيني انا انت مش عارفه هو زي ابو اللصيق .
قال : كنت على الاقل تمشي تكلم له ابوه انت عارف هو بيخاف من ابوه ..
قلت : يا سلام اكلم ابوه ياخي انت جديد في الحلة ولا شنو اسال عاطف دا قول ليه الكسر ليك سنونك منو وبسبب شنو ؟؟
عاطف : ياخي يا عمر اشكت خليها شاي ما تذكرنا ..
مختار : ما تقول لي كسرهم ليه شاكر ..
قلت : تعرف السبب انه شاكر كان بدق لي في واحد من اولاد حلة الفحامة ديك وخلاص الولد اغمى عليه وشاكر لسع راميه في الواطاه وطالع في صدره ويكفت فيه ... تعرف عاطف جرى لبيت ناس شاكر وجاب ابو شاكر وجو جارين مع بعض .. كمان ابو شاكر اهبل من ولده جا شايل عكاز ووقع ليك في شاكر ضرب لمن خلا جسمه دا كله دم .. بش شاكر كان بين الدموم والدموع عاين ليك لعاطف وقال له اصبر ,
اها عاطف دا شهر كامل ما شاف الشارع .. المدرسة الا يوصلو ابوه ويرجع الساعة اثنين يرجعه. لغاية ما لم فيه يوم غافل واقف في البقالة .. بس مسك ليك عاطف دا وجراه على الضلمة وجانا عاطف عامل كدا بلا سنون وخشمه كله دم .. طبعا ما في طريقه شكوى لانه جراه في الظلام وما في اي شهود .ز ولا عاطف نفسه يجزم انه ضربه شاكر .
مختار : يا خي معقولة الحلة دي كلها ما فيها راجل قدر على الشيطان دا ولا ابو عاطف .
قلت : كيف ياخي الحلة ما شاء الله كلها رجال بشنباتهم لكن صاحبنا دا فات حد الرجالة بهناك ... يعني خارج المنافسة ..
مختار : ياخي حوة ولادة بيلاقي اليحسمو .قلت :. ياخوي هي حوة دي ليها خمسة وعشرين سنة ما قدرت تولد ليها انتي فايروس لشاكر دا ؟؟وانت لسع ما وريتنا كيف اتخارجت من شاكر ..
مختار ياخي بكل بساطة هو خانقني ومشدد الخناق وخلاص غمت يدو عاوز يلصق لي البونية بس ابوه جا .. وساله : ولد ياشاكر انت بتعمل شنو .. قال لابوه لالا يابا قعد احكي ليه قصة الفلم بتاع امس ..وانا ما صدقت فك جلابيتي وانسحبت براحة على بيتنا وهو راح بيتهم مع ابوه .
المهم نحن في ونستنا دي يظهر لينا هادم اللذات ومفترك الونسات شاكر بنفسه بعيونه الحمراء وصدره المشعر واسنانه المفرقه هو عبارة عن غوريلا في شكل انسان او العكس ..
شاكر : يلا قومو ارحكم
قلت : نروح وين يا ابو الشكور ( نظام ترقيد وكدا)
شاكر : حايكون وين يابليد ما السينما .
مختار : لكن الفلم دا ما مكرر ودخلناه عشر مرات معاك .
شاكر بدا يتهيج : انا قلت راح ندخلو يعني ندخلو قوموا .
قلت : انا ماعندي قروش اروح اكلم ناس البيت واخذ منهم فكة .
شاكر: متين انا قعد ادخلكم السينما بقروش ما انتو عارفين ابواب السينما بتفتح براها لمن تشوفني انا وشلتي ( طبعا هو صادق وقصة السينما دي لوحدها قصة ) المهم غصبا عن الخلفونا مادام ما قادرين يحمونا .. العندو مذاكره والعندو امتحان كلنا رحنا السينما نسوي شنو بس ؟؟

[مدنيّة]

عارف يادرديري

زمنا دا كله بقي شاكر

غايتو ترا شاكرك دا بسببه
ياربي بقية شاكر ديل يكونوا مالهم ؟!!!

[درديري كباشي]

ت يشرفني ان ازيع واقول ان هذه القصة جديدة لنج واول حروف لها وضعتها على منتدى ود مدني مباشرة دون طريقتي عادة في ان اكتب القصة على الورد وبعد عدة مراجعات انسخها في المنتدى .. اكراما لهذا الصرح الجميل الذي وجدت فيه نفسي .. وجدت فيه عشرة لاناس حقيقيين يسبقنا الشوق قبل العينين للتعرف بهم .. وكل يوم نفوذ بالتعرف شخصيا على شخص جديد .. ونجد ان المنتدى يعكس قليل جدا من روعته اخرهم بالامس الشاب الاستاذ محمد حسين ابو حمزة .... قضينا ساعات مع بعض كانت اسرع من البركان في اذابة الجليد من الحواجز واصبحت كاني اعرفه من سنين ..
ونعود لشاكر ( بس شاكر ما عنده علاقة بمدني ما تفهمونيش غلط)

[أبو حمزة]

وهذا إبداع آخر أخي درديري.. لكن صدِّقني شاكر ده في كل حلة موجود...!!

وأنا أتحدَّى أيِّ واحد مستمتع مثلي..!!..وإن لم تكمل لي موضوع السينما لن تنام..

اللَّهم إلا إذا أغلقت جوالك..

[درديري كباشي]

عارف يادرديري

زمنا دا كله بقي شاكر

غايتو ترا شاكرك دا بسببه
ياربي بقية شاكر ديل يكونوا مالهم ؟!!!


زي منو كدا يعني يا مدنية

اتكلمي عديل وختي النقاط فوق ( الخروف) وانا قاصدها ما يجي محمد نور يمسح النقطة.

[درديري كباشي]

وهذا إبداع آخر أخي درديري.. لكن صدِّقني شاكر ده في كل حلة موجود...!!

وأنا أتحدَّى أيِّ واحد مستمتع مثلي..!!..وإن لم تكمل لي موضوع السينما لن تنام..

اللَّهم إلا إذا أغلقت جوالك..


تمام يا ابو حمزة كنت طالع مشوار لكن عشانك قعدت وحا اكمل ليكم حكاية شاكر مع السينما وكيف صنع لنفسه شخصية دوبلماسية يدخل السينما مجانا هو ومن يصحبه في اي وقت يشاء .

[أبو حمزة]

يا صديقي اللذيذ.. أنا أسلوب التشويق هذا لا يجدي معي..

كمِّل (الأبنص).. للنهاية.. وطبعاً كلمة بسمع بيها.. ولا أدري أين البوري حتى..!!

ما علينا ماذا دهاك ؟؟ أين ذهبت..؟؟!!

[درديري كباشي]

حكاية شاكر مع السينما :
رغما عن انها هي قصة جانبية ليست اساسية في مسار القصة الحقيقي لكن بناء على رغبة الاخوان سنحكيها . لكن حكايتها انه شاكر منذ كان عمره عشرة سنوات اعتاد عمه انه ياخذه الى السينما وخاصة الافلام الهندية التي كان يدمنها العم .. وبعد ذلك اغترب العم وترك شاكر متعلق بالسينما لا يكاد يغيب عنها .ولان شاكر كان وحيد والديه ومدلل ( علي العليه)فكانت ام شاكر ووالده يغرون ابناء الحي الكبار في ان ياخذوا شاكر للسينما مع دفعهم هم للتكلفة كاملة وخاصة لان والد شاكر هو تاجر وميسور الحال وشاكر كان مولود بعد معاناة مع الاطباء والدجل والشعوذه .بدا شاكر يكبر وينمو مع ادمانه للسينما يكاد لايغيب الا في الافلام العربية لانه كان يعتقد انها ما افلام رجال كلها مياصة وحب ورقيص وقلة ادب ( معاه حق) وكان يحب الافلام الهندية وافلام الكراتيه وافلام الاكشن الامريكية والافلام الحربية ..ولان شاكر تعثر عليه الاستمرار في المدارس لصعوبة فهم الدروس اكتفى بالمرحلة الابتدائية بعد ان مكث بها عشر سنوات .. واخذه والده للعمل معه في السوق .. وخاصة ان تجارة والده سهلة وهي المحاصيل الزراعية وهي طبعا كلها شوالات حسابها سهل وتحميلها ايضا سهل بالنسبة لشاكر وقد افادته في بناء جسمه ايضا اضافة الى العامل الطبيعي .. لانه كان يحمل شوال الزرة مثل المخدة ..
قصة السينما انه شاكر يوم ما اتهمه الحارس في بوابة السينما انه تذكرته مزورة .. واستدعى له الشرطة .. وشاكر اصلا لم يفهم ما المقصود بمزورة .. وبعد التحري والتحقيق تبين ان التذكره صحيحة ورسمية .. ولكن بعد ما فهم شاكر قصة الحارث اتلحه .. واصبح يرتب له علقه يومية وبصورة ثابته .. كل يوم ينتظره في طريق السينما ويعطيه الراتب كانه بائع اللبن .. بواب السينما مسكين لم يستطع ان يتحمل هذا الوضع .. لم تفلح بلاغات الشرطة ولا الحراسة لانه ( بيني وبينكم ناس الشرطة انفسهم يتفادونه).. وكذلك والد شاكر لم يستطع ان يوقف هذه العلقة المرتبة .. الا اخيرا صاحب السينما جاء وجلس مع شاكر واقنعه واتفق معه في ان يدخل السينما مجانا كل يوم متى ما يشاء ومع من يشاء من اصحابه .. هذا العرض الوحيد الذي جعل شاكر يدخل السينما يوميا ويترك علقة الحارس .. والمصيبة مع الزامنا نحن مع دخول كل الافلام التي يرغب شاكر في دخولها ..
والفلم الحالي الذي سندخله الان للمره العاشرة هو فلم هندي شاكر اعجب به لان صاحب البطل قوي ومتخلف وشجاع جدا لا يعرف الخوف .. واعتقد ان شاكر وجد نفسه فيه ..
وسنعود لكم مع شاكر وكرة القدم التي جعلنا نعتزلها قبل ان نبدا اي نوع من الاحتراف او حتى الهواية في الاندية

[أبو حمزة]

مشكوور كده ممكن ننوم راضين عنك.. بس باكر بدِّر .. ولك التحية أخي العزيز..

[أشرف صلاح السعيد]

ابوالدر سلام..
اول حاجة شاكر جنبك؟
والله شاكر دا زكرنى صاحبنا فى الابتدائى هو مامتخلف لكن خرخار فى الكورة كدى ابقى راجل اقطع الكورة منو..راشيك راشيك..وانا كنتا جنى وجن الحقارة تعال شوف التكسر والكراتيه..الشباب عرفو القصه البينا وهو زاتو "الحقار" عرف انو لو استمرا معاى حيفقد كتير من هيبتو فبقى بيعزلنى معاو "الكبتن رغما عن انف اجعص واحد فينا" ..بس وحاتك لغاية ماوصلنا للهدنة اخوك كل يوم راجع البيت عارج..
الله يكفينا شاكر وكبسور والفتوات لانو "فى الحالتين أنا الضاايع أنا الضاايع"..
وواصل من دون فواصل..

[درديري كباشي]

ابوالدر سلام..
اول حاجة شاكر جنبك؟
والله شاكر دا زكرنى صاحبنا فى الابتدائى هو مامتخلف لكن خرخار فى الكورة كدى ابقى راجل اقطع الكورة منو..راشيك راشيك..وانا كنتا جنى وجن الحقارة تعال شوف التكسر والكراتيه..الشباب عرفو القصه البينا وهو زاتو "الحقار" عرف انو لو استمرا معاى حيفقد كتير من هيبتو فبقى بيعزلنى معاو "الكبتن رغما عن انف اجعص واحد فينا" ..بس وحاتك لغاية ماوصلنا للهدنة اخوك كل يوم راجع البيت عارج..
الله يكفينا شاكر وكبسور والفتوات لانو "فى الحالتين أنا الضاايع أنا الضاايع"..
وواصل من دون فواصل..


ابو صلاح انا مش عارف احيي فيك الحاسة السادسة ولا انت عارف قصة شاكر فعلا .. لانه شاكر توجد شخصية في مدني تتشابه معه كثيرا انا شخصيا ما شاهدته لكن حكوا لي زملانا من ابناء مدني عن هذا الشخص .. تقريبا في اشياء كثيرة ربما تراكمت في ذاكرتي ولدت عندي خامة لهذه القصة

[أشرف صلاح السعيد]

ابو صلاح انا مش عارف احيي فيك الحاسة السادسة ولا انت عارف قصة شاكر فعلا .. لانه شاكر توجد شخصية في مدني تتشابه معه كثيرا انا شخصيا ما شاهدته لكن حكوا لي زملانا من ابناء مدني عن هذا الشخص .. تقريبا في اشياء كثيرة ربما تراكمت في ذاكرتي ولدت عندي خامة لهذه القصة


خرخار الكورة وين مامشيت فى السودان بتلاقيو "الله غالب" وانتا قايل سبب فشلنا الكروى شنو..ماجنس الكسارين ديل ..بيكونو قضو على 90% من الكان ممكن يغيرو مستوى الكورة السودانية لكن حليلم اربطتم وانكلتم زمااان بوشت..
هو شاكر دا كان فى مدنى؟وقصتو مشهورة للدرجة دى؟ اخوك ساعات بتظبط معاو عميانى وكدا..
بالله واصل وماتضيع الزمن فينا..

[درديري كباشي]

شاكر والكرة :
كما ذكرت انه رغما عن حبنا لكرة القدم وعشقنا لها كاي شباب سودانيين .. ولكن كرهنا شاكر كرة القدم .. وذلك اول شئ كان هو يتولى التقسيمة .. وكان يختار الناس الحرفاء في جانبه هو ويترك الفريق الثاني لانصاف المواهب .. وبهذ ه الطريقة تجد التمرين ما فيه توازن وبايخ وفريق يفوز على الثاني عشرين وخمستاشر لذلك نحن كرهنا الكره لانها لاتوجد فيها اي متعه او تشويق . ولكن لا نستطيع ان نقول نحن كرهنا الكره وما عايزين تمرين .. لان شاكر رغما عن افتقاده للموهبة الا انه يحب الكره وهو في اختياره للحرفاء الى جانبه ليس حبا في الفوذ وانما كرها في الخسارة .ز فهو لن يتحمل دخول اي هدف في مرماه حتى لو كان فريقه فايز عشرين صفر .. وكثيرا ما حمل الحارس خطا الهدف ورقعه علقة .. لذلك يكره اللاعبين خانة الحارس في فريق شاكر .. عنف شاكر كره فينا ناس الاحياء الثانية كرهت كل الاحياء المجاورة لعب الكرة معنا .. لانه اي مبارة بين حي جديد تنتهي بشكلة او حتى كارثة ...
وام الكوارث لو اقتلع احدهم الكرة من شاكر او راوقه ... واو احد زملاؤه ناداه شاكر ليلعب له الكره وتجاهل نداءه .. هنا شاكر سينسى الكرة ويجري خلف اللاعب وربما اصابه باصابه بليغة ..
وانا مستغرب ولا اجد اي تفسير هو كيف يستمتع شاكر بكرة القدم وهو قاتل فيها كل عناصر التشويق والاثارة ..

الى كان يوم و كانت قاصمة الظهر التي صنعت نقطة التحول في حياة شاكر وسنعود لها وانتظرونا .

[درديري كباشي]

خرخار الكورة وين مامشيت فى السودان بتلاقيو "الله غالب" وانتا قايل سبب فشلنا الكروى شنو..ماجنس الكسارين ديل ..بيكونو قضو على 90% من الكان ممكن يغيرو مستوى الكورة السودانية لكن حليلم اربطتم وانكلتم زمااان بوشت..
هو شاكر دا كان فى مدنى؟وقصتو مشهورة للدرجة دى؟ اخوك ساعات بتظبط معاو عميانى وكدا..
بالله واصل وماتضيع الزمن فينا..


ياخي انا قلت اصحابي من اولاد مدني ايامنا في الجامعة كانوا بيحكوا لي عن شخصية مشابهة تماما لشاكر .. يعني شخص قوي متخلف وحقار وحتى الشرطة يعملون له الف حساب .. انا قلت ربما عشعشت هذه القصص في دماغي واصبحت خلفيه او خامة للقصة ...... تصحصح معانا ما توديناش في داهية.

[درديري كباشي]

نقطة التحول :
طبعا استمر حالنا هكذا ندخل السينما كل يوم وحسب مزاج شاكر ونتمرن بالعصر بالتقسيمة التي يراها شاكر .. وكثيرا ما يحضر هو متاخر من السوق ويجدنا قمسنا اللعب فعلا .. ولكن يعترض ويجمعنا في الوسط ويعيد التقسيم من جديد ..
الى ان كان يوم .. سكن في احد بيوت الحي ساكن جديد وهو مدير جديد للمدرسة الابتدائية بالحي . وهو الاستاذ عبد الرحمن .. وكان للاستاذ عبد الرحمن ولد من دورنا اي في نفس عمرنا اسمه حسام وقد كان حسام هذا نحيف البنية جدا اضافة الى انه لم يكون طويل القامة اي متوسط الطول .. و لكن يبدو انه حسام شخص كرونجي يحب كرة القدم من اول يوم لبس الزي الرياضي وجاء للميدان باحثا عن التمرين .. ولانه بنيته هزيلة بطبيعة الحال شاكر وزعه في الفريق المضاد اي الفريق الذي اعتاد ان يهزمه بالعشرات كل يوم ,,
لكن المصيبة المدهشة انه الولد حسام طلع حريف جدا يكاد هو لوحده ان يحقق المعادلة بين الفريقين .. لانه كان ياخذ الكره وهو كان يحمع بين السرعة والحرفنة وكان يشق لاعبي فريقنا وهو فريق شاكر بكل سهولة وسلاسة .. وفعلا بدا يحرز فينا الاهداف ونحن نعاين لوجه شاكر نجده بدا يتلون ويتشكل وبدا عليه الغضب .. لكن لان لعب حسام جذب مشاهدين جدد لبراعته في الكره .. استحى شاكر ان يوقف التمرين ويحول حسام لصالحه .. والمصيبة حسام لم يتوقف من التهديف في مرمانا وحتى اثر في زملاؤه من ( الكيشة) اذا تجلت لهم بعض الحرفنة والبصات الجميلة كما جذب المشجعين حول الميدان وكل ما رواغ حسام احدنا وعمل فيه لقطة جميلة انفجر الجمهور ضحكا وتصفيقا له... شاكر كاد ينفجر بالغضب ولكنه كظم غيظه لاول مره خاصة عندما لاحظ ان والده ايضا انجذب للميدان وجاء ليتفرج .. الى ان حدثت اللقطة التي لم يتحملها وهو جاء في مواجه مع حسام ليقلع منه الكره اذا يفاجا بان حسام ممر له الكرة بين رجليه بكل سهولة وعندما حاول ان يلتفت يعالج المواقف تفاجأ بن حسام غرف الكرة اعلى راسه مره ثانية مما اثار موجه عالية من ضحك المشاهدين فلم يتمالك شاكر نفسه سوى انه مسك حسام من وسطة والقى به ارضا بعنف مما افقده الوعي .. وربما شك الناس في انه حدثت كارثة لحسام وسنعود .

[درديري كباشي]

ونتابع :
كماذكرنا وقع حسام مغشيا عليه نتيجة للضربة العنيفة التي تلقاها من شاكر.. وطبعا توقف التمرين وحملوا حسام الى منطقة الظل وبداوا يحركون حوله الهواء الى ان ذهب احدهم ليحضر الاسعاف ... ابو شاكر هاجم ابنه اراد ان يضربه لهذه الحركة .. الا ان الرجال التفوا حوله ومنعوه .. وقال اولا نحاول ننقذ هذا المصاب . وذهب احدهم ليحضر سيارته لاخذ حسام للمستشفى .. وبعضهم كان يرش حسام بالماء .. واخيرا وقبل ان تاتي السيارة فتح حسام عينيه وبدا يتلفت باستغراب يحاول ان يضغط ذاكرته ليعرف اين هو ومن هؤلاء .. اخيرا فاق وجلس في مكانه .. تحت فرح الباقين .. وتلفت واخيرا وقف على رجليه .. وارد ان يتحرك نحو بيته .. مسك فيه الاعمام مترجنه للاطمئنان عليه الا ان اخبرهم انه بخير ويمكن ان يمشي .. وهو ماشي فجاة توقف والتفت ناحية زملائه اللاعبين .. وتلفت كانه يبحث عن شخص معين .. وفعلا عندما وقعت عينه على شاكر نظر اليه طويلا ورمقه بنظره نارية لم يفهمها احد ولم ينشغل بها احد لان اصلا حجم حسام لا ينبئ عن شئ ممكن ان يحدث اكثر من الذي جرى .. توجه حسام نحو البيت .. وترك الجميع متجمعين في حلقات حلقة للاباء وحلقة للابناء .. الاباء وجدوا فرصتهم في ابوشاكر واستعرضوا له معاناة ابنائهم مع ابنه المتهور والمتخلف شاكر وكل واحد يذكر الاصابة التي تلقاها ابنه من شاكر .. وفي وسط ميدان الكره يجلس شاكر وسطنا ونحن نلتزم الصمت لا احد يقول شئ .. الى ان ظهر حسام من جديد وكان في هذه المره يمشي مسرعا ناحية حلقتنا نحن .. اول ما اقترب منا موجها كلامه لشاكر :: انت عامل فيها الراجل الوحيد في الحلة دي انا الليلة بوريك حدك .. شاكر اول ما سمع هذا الكلام وقف على طوله غاضبا متوجها ناحية حسام .. وحسام عندما شاهد شاكر واقف جرى ناحيته بسرعة شديد كانه لا يريد ان يترك فرصة للحجازين .. اول ما وصل حسام قرب شاكر تناوله شاكر ورفعه للاعلى مره اخرى كانه يحمل عود من القصب .. ولكن حسام وهو في اعلى استخرج سكينا وطعن بها في كتف شاكر مما جعل شاكر يرميه في الارض ويمسك كتفه وهو يصرخ من الالم .. وحسام لم يكتفي بذلك اذا تناول عصا من احد الجلوس .. وامطر بها شاكر في كل مكان .. لم تردعه لا دماء شاكر ولا صرخاته .. واخيرا لم يتمالك شاكر سوى ان يجري ناحية بيتهم .. وحسام يجري من خلفه وكل ما اقترب منه ضربه بالعصى في ظهره ..
الكل شلتهم الدهشه اول مره يشاهد شاكر يجري مطارد .. ومن من ؟؟؟ من ولد لايزيد وزنه عن الستين كيلو .
والمفاجاه خرجت في الباب ام شاكر وبدات تثكل لاول مره في تاريخ الحي ياما ثكلت امهاتنا ..
ادرك الرجال حسام بعد ان فاقوا من الدهشة ومسكوه وسيارة الاسعاف التي كانت من المفترض ان تاخذ حسام اخذت شاكر .. وحضرت الشرطة واخذوا حسام ناحية الحراسة .
وسنعود

[أبو حمزة]

درديري.. تعود وين..

تعاااال.. يعني الباقي نتمو خيااااال... (أوعه من الهوا)..

حقيقة ربنا وفَّقك بجمال الاسلوب.. وسلاسة التدرج.. ربنا يحفظك..

وسر.. ونحن في استمتاع.. والخميس قرَّب..!! ولا شنو؟؟

[حسام التنين]

لالالالالالالالا

كده ماصاح انا متابع من قبيييييل ولا امبارح

ياخ تعال نحن مستننك

ابو حمزة اديني رقم درديري ليك علي موش ماينوم

مايفطر زاتوا :eek::eek::eek:

[درديري كباشي]

درديري.. تعود وين..

تعاااال.. يعني الباقي نتمو خيااااال... (أوعه من الهوا)..

حقيقة ربنا وفَّقك بجمال الاسلوب.. وسلاسة التدرج.. ربنا يحفظك..

وسر.. ونحن في استمتاع.. والخميس قرَّب..!! ولا شنو؟؟


سلام يا ابو حمزة .. معليش قبيل النت قطع مني عشان كدا ما كملت الحصل شنو لكن بواصل دقائق بس

[درديري كباشي]

لالالالالالالالا

كده ماصاح انا متابع من قبيييييل ولا امبارح

ياخ تعال نحن مستننك

ابو حمزة اديني رقم درديري ليك علي موش ماينوم

مايفطر زاتوا :eek::eek::eek:

سلام يا تنينانا والله قبيل كنت ناوي اكمل القصة في المكتب لكن النت قطع وبقينا خارج الشبكة .. لكن لحظات وتشاهدون الحلقة الاخيرة .. اوعى بس الكهربة تقطع
همسة ( اسمك صعب والله )

[درديري كباشي]

رجعنالكم
لازالت الناس مندهشة ولم تستوعب المفاجاه وحقيقة زي ما يقول المثل عنتره قتله اعمى .. في ذلك اليوم بات حسام الولد النحيف الوديع الحريف في السجن .. بات الوحش الذي اغلق منامنا بالسنين في المستشفى ينازع الموت ..... هكذا ابتدر عمنا طاهر ابو مختار الحديث ونحن نجلس حلقة امام دكان عم صالح في امسية ذلك اليوم ..حقيقة كان يوم اختلطت فيه كثير من المشاعر المتناقضة .. ابتسامات فيها فرح وشماته خفية بكسر شوكة هذا الفرعون .. بل انا لاحظت الى امهاتنا كادت ان تفلت منهن زغرودة وهن يشاهدن ام شاكر تثكل لاول مره .. بل لم يستطعن ان يخفين تلك الابتسامات الخبيثة ورغما عن ان الامر يمكن ان يصل الى درجة الموت .
في ذلك اليوم بعد ان حضر ابو شاكر من المستشفى تحركنا نحوه للاطمئنان على شاكر ويخيل لي بعض الناس دار في داخلهم السؤال بالصيغة التالية ( لعله ما راح يعيش ثاني ؟؟) لكن ابو شاكر قال لهم ابشركم ان اصابة شاكر رغما عن انها عميقة الا انها لم تصل الاجهزة الحساسة مثل الرئتين والقلب ولكن سياخذ في المستشفى اسبوعين ..
وفعلا بعد ذلك قال ابو مختار لابي شاكر طالما انك اطمئنيت على ابنك الواجب اننا نروح مركز الشرطة ونخرج ولد الاستاذ وماتنسى انه ابنك هو المخطئ وكاد يقتله في الاول ..
وفعلا بعد ذلك تحرك الوفد نحو مركز الشرطة وتم استخراج حسام بعد ان تنازل والد شاكر دون ان يتركوه يبيت يوما بالحراسة .. وكانت بادرة طيبة من ابي شاكر ازالت كثير من الغبن نحوه ونحو ابنه ..
ظلت الحادثة حديث المجالس طيلة الاسبوعين التاليين .. وقد كانت نقطة تحول فعلا فيها ذقنا الاستمتاع بكل شئ حتى كرة القدم اصبحت لها متعة مع وجود حسام الحريف والذي تولى هو كبتنية الفريق بطبيعة الحال.. ومن خلال حرصة على التقسيمة العادلة اصبحت هنالك متعه لكرة القدم بيل اصبح لنا رواد ومتفرجين من الاحياء الاخرى معظمهم حضر ليستمتع بمهارة حسام .. تلك الفترة والتي غاب فيها شاكر جعلتنا ننساه بالتدريج .. بل اصبحت حياتنا تتغير في اتجاه ايجابي وانا يخيل لي مات فينا خوفنا من شاكر .. والمسالة ليست عملقة وعضلات .. تذكرت شئ كنا انا وصاحبي مختار ذات مساء مارين قرب الدكان سمعنا احد الاعمام يتحدث قائلا .
- الحكاية ما عضلات وجسم الحكاية حرارة قلب وبس ..
- قلت انا لمختار خلي بالك عمك دا بيطاعن فينا .. اضحكني مختار قائلا : يا سلام ؟؟ هو ناسي نفسه تذكر لمن شاكر كان يدق في ولده وهو من بعيد يقول له براحة حرام يا شاكر يا ولدي دا برضو زي اخوك الصغير .. هسع في اب يهرسو في ولدو قدام عيونه ما يشيل ليه طوبه يفرتكها في راس المعتدي وتقول لي يطاعن فينا ..
عدت تلك الخمسة عشر يوم التي قضاها شاكر في المستشفى مسرعة كايام العيد .. وكلنا دار الفكر في راسنا غدا سيخرج شاكر من المستشفى ماذا بعد ؟؟؟؟؟
سنعود

[هيثم عبدالعال]

دريري صاحب الملكة المدهشه ... سلام
اتابع منذ فترة روعة الإبداع وغزارته
لك الشكر على على هذه السياحة والصور الدراميه الواقعيه التي تتحفنا بها كل مطلع شمس ومغربها فننهل كل يوم ونحن في قمة الإستمتاع .



.. لانه شاكر توجد شخصية في مدني تتشابه معه كثيرا انا شخصيا ما شاهدته لكن حكوا لي زملانا من ابناء مدني عن هذا الشخص ..

همسه : الحمد لله أن هذا الشاكر لا يجيد الإبحار في عوالم النت وإلا كانت ليلتك شديدة السواد وإن صادفك نهاراً فأكد أن النجوم ستترائ لك عياناً بياناً .
من قصص شاكرنا الحقيقي : في بطولة رسميه كانت تقام سنوياً لتخليد ذكرى واحد من الأسماء التي عطرت ميادين الكره ، وكان شاكراً هذا يصر على تمثيل الحي الذي يقطنه رغم أن علاقته بكرة القدم سيئة للغاية ، تصادف أن أحتسبت ضربة جزاء لصالح فريقه فأصر على أن يلعبها وكما هو متوقع ضيعها .. وأصر على إعادتها ورضخ الحكم وفي الإعاده طيرها بره وبعين حمراء قال للحكم أها كمان قول آوت !!

[أشرف صلاح السعيد]

يوضع سرو فى اضعف خلقو..
والله الواحد مابيدعو للعنف بس "ينصر دينك ياحسام الجقتا شاكر"..
وفى انتظار البقية..لكن حسام ماود راجل..قلت ليا سكاو ..تلاقيكم كلكم انبسطتو الاخد ليكم تاركم"عالم جبنات بشكل" ..
ومنتظرين البقية..حسام ماولد لكن..

[درديري كباشي]

دريري صاحب الملكة المدهشه ... سلام
اتابع منذ فترة روعة الإبداع وغزارته
لك الشكر على على هذه السياحة والصور الدراميه الواقعيه التي تتحفنا بها كل مطلع شمس ومغربها فننهل كل يوم ونحن في قمة الإستمتاع .



همسه : الحمد لله أن هذا الشاكر لا يجيد الإبحار في عوالم النت وإلا كانت ليلتك شديدة السواد وإن صادفك نهاراً فأكد أن النجوم ستترائ لك عياناً بياناً .
من قصص شاكرنا الحقيقي : في بطولة رسميه كانت تقام سنوياً لتخليد ذكرى واحد من الأسماء التي عطرت ميادين الكره ، وكان شاكراً هذا يصر على تمثيل الحي الذي يقطنه رغم أن علاقته بكرة القدم سيئة للغاية ، تصادف أن أحتسبت ضربة جزاء لصالح فريقه فأصر على أن يلعبها وكما هو متوقع ضيعها .. وأصر على إعادتها ورضخ الحكم وفي الإعاده طيرها بره وبعين حمراء قال للحكم أها كمان قول آوت !!


سلام يا هيثم والله شرفتنا

وشهد شاهد من اهله

بس سؤال شاكر مدني لسع عايش

تعرف فقعتها مع قصة البلنتي ضحكة فجاه اتذكرت انا براي قلت الجيران حيقولوا الراجل جن

[درديري كباشي]

يوضع سرو فى اضعف خلقو..
والله الواحد مابيدعو للعنف بس "ينصر دينك ياحسام الجقتا شاكر"..
وفى انتظار البقية..لكن حسام ماود راجل..قلت ليا سكاو ..تلاقيكم كلكم انبسطتو الاخد ليكم تاركم"عالم جبنات بشكل" ..
ومنتظرين البقية..حسام ماولد لكن..


هو نحن برانا اكان ما الخجل ما كان ( النسوان تزغرد والرجالة تقول الله اكبر)

هو مجلس اباء الطين نفسه مبسوط

[أبو حمزة]

اقتباس:
المشاركة الأصلية كتبت بواسطة أشرف صلاح السعيد




يوضع سرو فى اضعف خلقو..
والله الواحد مابيدعو للعنف بس "ينصر دينك ياحسام الجقتا شاكر"..
وفى انتظار البقية..لكن حسام ماود راجل..قلت ليا سكاو ..تلاقيكم كلكم انبسطتو الاخد ليكم تاركم"عالم جبنات بشكل" ..
ومنتظرين البقية..حسام ماولد لكن..



هو نحن برانا اكان ما الخجل ما كان ( النسوان تزغرد والرجالة تقول الله اكبر)

هو مجلس اباء الطين نفسه مبسوط

في الحقيقة أنت وأشرف ما طبيعيين ... كدة يوم الخميس بتأكد من الموضوع ده..!! وبحاول أفتُّ الموضوع لأبي خالد.. والله العظيم بعد ما قرأت تعليق أشرف ضحكت بصورة أكبر من ضحكتك يا درديري..

[درديري كباشي]

ابو حمزة وهيثم عبد العال انتو ساكين موضوع شاكر دا مالكم .. الراجل هرشنا .. الا نقولها بالواضح كدا يعني لازم تحرجونا ..

بعدين يا ابو حمزة ايه الخميس دي انا مش فاكر فكرني

[أشرف صلاح السعيد]

ابو حمزة وهيثم عبد العال انتو ساكين موضوع شاكر دا مالكم .. الراجل هرشنا .. الا نقولها بالواضح كدا يعني لازم تحرجونا ..

بعدين يا ابو حمزة ايه الخميس دي انا مش فاكر فكرني

انا زاتى ساكى الموضوع..والله ماتمو الا امشى لشاكر فى الاستبالية وافت ليهو انتا بتقول عنو شنو..

الخميس فى افطار جماعى فى استراحة التفاصيل مع ابوخالد وكل واحد بيجيب معاو حاجة..والناس تتلما وكدا..

حجز:
بما انو العيال مافى انا حاجز اجيب فول مصلح وطعمية..
اها انتا حتجيب شنوووو؟؟؟

[درديري كباشي]

يوم عودة شاكر والنهاية

وصلنا الخبر نحن اصلا كنا متوقعنه انه شاكر شفا تماما وسيخرج اليوم عصرا من المستشفى .. امه فرحانة اخبرت امهاتنا .. انا صحونا من اشياء كثيرة فجاه اكتشفنا انه ما في واحد فينا زاره في المستشفى .. بل كنا نرى ان الخمسة عشر يوم مرت كالبرق ..كنا تحس التوتر في وجوهنا وان كان لم يفصح اي منا عن هذا التوتر ,,
عدى نهار اليوم كالعادة
الى ان جاء العصر وذهبنا التمرين كالعادة وكل منا يتلفت ناحية شارع المستشفى متوقع في كل مره وصول شاكر ..
الغريب في الموضوع الشخص الوحيد الذي كان غير مشغول بالموضوع ولا حتى سال هو حسام نفسه .. حسام كنا اكثر شخص خائفين عليه .. كنا متوقعين ان شاكر بمجرد ما ينزل من السيارة اول شئ سيجري ناحية حسام ويخنقه .
وفعلا ذهبنا الى تمريننا كالعادة وكابتنا حسام قسمنا الى فريقين كالعادة ايضا ..وبدا التمرين واندمجنا في اللعب .. ونسينا موضوع شاكر

وفجاه نجد شاكر وقف في نص الميدان وانتهز مرور الكره بقربه وتناولها ووقف ...

كلنا سكتنا وعاينا له بعيوننا الجاحظة في الاول حسام لم ينتبه

الا ان وقف حسام على الموضوع وبكل جراه مشى ناحية شاكر وخلع منه الكره وساله بدون ما يكسر عينه عنه .
ماسك الكرة ليييه .؟
شاكر: عايزين نعيد التقسيمة من جديد التقسيمة دي ما عجباني ..
حسام : ما بكيفك واول شئ اطلع لينا من الميدان دا بسرعة ( حسام كان ينهر في شاكر باعلى صوت عنده دون ان يكسر عينه عن عين شاكر .. في الاول بادله شاكر بنفس النظره الحادة دون ان يرتكب اي عنف ...
ونحن كنا ننظر الى الاثنين واجمين نترقب ماذاا سيحدث طبعا كنا نتوقع انه شاكر سيحمل حسام مرة ثانية في الهواء ويضرب به الارض كما في المره السابقة ..

وظلينا متوترين نراقب في هذين الذين يرفض اي واحد منهم ان يكسر عينه عن عيون الاخر ..

واخيرا وتحت دهشتنا جميعا كسر شاكر عينيه ونظر ناحية الارض . وخرج من الميدان يجر رجليه جرا .... وجلس في حجر ضخم خارج الميدان مع المتفرجين ....

لتبدا فعلا مرحلة جديدة في حياتنا ونقلة نوعية ضخمة لم تستوعبها مداركنا لفترة طويلة .. هل تخلصنا من الاستعمار الايستطاني الذي اسمه شاكر .. هل حررنا حسام من سطوة هذا الجبار المسلط المتسلط ..

حسام لم يكتفي بذلك بل بصوت عالي اذا كنت ترغب في التمرين ياشاكر .. انتظر حتى يفتر احد من الفريقين حتى تبدله ..
هنا هتف صديقي مختار قائلا انا فترت يا كابتن ممكن اغير مع شاكر .. طبعا انا ما فوت الموقف دا من مختار وقلت له يا جبان نحن ما صدقنا انه عين شاكر انكسرت .. حاول مختار يبرر موقفه في انه تاثر لكسرة شاكر اصبح مثل الاسد المكسر الاسنان فهو لن يرهب معزة .. وقلت له يعني هو لمن كان يكشنا امامه في المدرسة الابتدائية مثل الاغنام ما كنا محننين احد..
تعرف انا جاتني رغبه انه احمل عصى واجري اكسرها في شاكر انتقاما لقهر كل السنين التي مضت ..

اصبح حالنا زين
ندخل السينما وقت ما دايرين
والفلم الذي يعجبنا

واستمرت حياتنا بعد ذلك حياة عادية مبنية على الحرية واتعلم شاكر كلمات جديدة من نوع عن اذنك ولو سمحت زادت ايامنا جمالا ...... والسلام ......

[درديري كباشي]

انا زاتى ساكى الموضوع..والله ماتمو الا امشى لشاكر فى الاستبالية وافت ليهو انتا بتقول عنو شنو..

الخميس فى افطار جماعى فى استراحة التفاصيل مع ابوخالد وكل واحد بيجيب معاو حاجة..والناس تتلما وكدا..

حجز:
بما انو العيال مافى انا حاجز اجيب فول مصلح وطعمية..
اها انتا حتجيب شنوووو؟؟؟


القال ليك منو يا حبيب انا عزابي زيك ... انا مستلف لي عايلة ( نظام شدة)
اولاد اختي والوالدة حيكونوا معاي.

[فراس]

سلامات ابو الدر
يعني لو ماحسام دا شاكر اكون كاشيكم لحدي هسي :rolleyes::rolleyes:
انا غايتو تاني لو ماعرفت انو القصة اكتملت مابدخل خالص
ياخي بنتجهجه شديييييد ...
تسلم يارائع

[حسام التنين]

سلام يا تنينانا والله قبيل كنت ناوي اكمل القصة في المكتب لكن النت قطع وبقينا خارج الشبكة .. لكن لحظات وتشاهدون الحلقة الاخيرة .. اوعى بس الكهربة تقطع
همسة ( اسمك صعب والله )

همستك جميلا جدا

تنين انا : :p:p:p:p:p:p

تابعنا لحدي الحلقة الاخيرة







بالمناسبة اسمي الحقيقي حسام

[أبو حمزة]

شكراً جداً أخي درديري .. وفي انتظار الجزء الثاني.. وهذا طلب خاص..

وبصراحة / أداء جيِّد

سرد سلس

حبكة ممتازة

جمال حقيقي..
دمت ب 1000 خير .. وفقك الله تمتعنا بالدهشة .. وتربط بيننا بالجمال العفيف..

[درديري كباشي]

سلامات ابو الدر
يعني لو ماحسام دا شاكر اكون كاشيكم لحدي هسي :rolleyes::rolleyes:
انا غايتو تاني لو ماعرفت انو القصة اكتملت مابدخل خالص
ياخي بنتجهجه شديييييد ...
تسلم يارائع


الله يخليك يا فراس
وحسام انقذ تاريخنا

انا مش عارف لوكان شاكر حضر حتى زواجنا بنفس تلك السياسة كان حيكون وضعنا كيف .

تخيل نوع الحوار..

( هوي يا فراس البت الانت قلت داير تعرسها دي انا كنت شايفها من قبلك .. امشي شيل دلاكينك ودبلتك الجبتهن وخليها لي قبل ما اخلي ليك وشك شوارع وزقاقات )

[درديري كباشي]

همستك جميلا جدا

تنين انا : :p:p:p:p:p:p

تابعنا لحدي الحلقة الاخيرة







بالمناسبة اسمي الحقيقي حسام

متشكرين يا حسام

وخلينا في حسام عليك الله

[درديري كباشي]

شكراً جداً أخي درديري .. وفي انتظار الجزء الثاني.. وهذا طلب خاص..

وبصراحة / أداء جيِّد

سرد سلس

حبكة ممتازة

جمال حقيقي..
دمت ب 1000 خير .. وفقك الله تمتعنا بالدهشة .. وتربط بيننا بالجمال العفيف..


سلام يا ابو حمزة يا رائع
طلبك غالي بصراحة زنقتني جدا بحكاية الجزء الثاني بعد ما قفلت القصة ..
وقفلت قاصد بها انه السبب الذي جعلها قصة تروى قد زال وهو قهر شاكر لاهل الحي ..
وعشان افتح القصة من جديد لازم ازيل السبب الذي ازال القهر .. وهذا يعني الدخول في تراجيديا واحزان..

لا لا لا لا نخليها مقفولة احسن

[بنت الرفاعي]

ماشاءالله عليك أخي درديري وإبداعك المتواصل , نتمنى أن يدوم ولا يقف أبدا:)
وبارك الله فيك.

[أشرف صلاح السعيد]

ابو الدر عوافى..
تعرف اكتشفتنى غريب خلاص..كنتا منتظر اعرف نهاية القصة بشغف كبير ولما انتهت دبرسة جنس دبرساية "عليك الله شوف طرنقاشة دا مايكون لافى لسه بجاى يشرشحنى فى دبرساية دى"..
تعرف شاكر دا بيذكرنى بحكومتنا وحسام بالحركة مع اختلافات كبيرة..لانو حكومتنا ماعويرة ولا الحركة عايزانا نلعب بتقسيمة عادلة..
العيلة الشدة كان بتخارج بكرة دى ببيت مع مع ابوخالد واخليهم يتبنونى..
فى انتظار جديدك الماتع..

[درديري كباشي]

ماشاءالله عليك أخي درديري وإبداعك المتواصل , نتمنى أن يدوم ولا يقف أبدا:)
وبارك الله فيك.

تسلمي مرام يا روعة

ودا بس من زوقك الراقي

[درديري كباشي]

ابو الدر عوافى..
تعرف اكتشفتنى غريب خلاص..كنتا منتظر اعرف نهاية القصة بشغف كبير ولما انتهت دبرسة جنس دبرساية "عليك الله شوف طرنقاشة دا مايكون لافى لسه بجاى يشرشحنى فى دبرساية دى"..
تعرف شاكر دا بيذكرنى بحكومتنا وحسام بالحركة مع اختلافات كبيرة..لانو حكومتنا ماعويرة ولا الحركة عايزانا نلعب بتقسيمة عادلة..
العيلة الشدة كان بتخارج بكرة دى ببيت مع مع ابوخالد واخليهم يتبنونى..
فى انتظار جديدك الماتع..


اقسم بالله يا ا شرف حيرتني .... بس مش عارف اقول ليك شنو .... طبعا انا من العصر خارج البيت وبعيد جدا من النت ... ودار حوار كبير جدا وانا خارج البيت حول القصة كنت ناوي ارد على الناس اولا ثم اجيب الحوار والذي تعلق بتسييس القصة .. ولكن انت خلعتني عدييييييييل بردك دا لانك كانك دخلت داخل عقلي بماسنجر تليباثي ...خليني اقوله قبل ما اجن

[أشرف صلاح السعيد]

اقسم بالله يا ا شرف حيرتني .... بس مش عارف اقول ليك شنو .... طبعا انا من العصر خارج البيت وبعيد جدا من النت ... ودار حوار كبير جدا وانا خارج البيت حول القصة كنت ناوي ارد على الناس اولا ثم اجيب الحوار والذي تعلق بتسييس القصة .. ولكن انت خلعتني عدييييييييل بردك دا لانك كانك دخلت داخل عقلي بماسنجر تليباثي ...خليني اقوله قبل ما اجن

قولو يااخوى عشان انا زاتا خفتا..هم الجماعة ديلك ماقالو محبوسين فى رمضان..
يازول ماتخوفنى..

[درديري كباشي]

حوار على هامش القصة ( اشرف اسكت ساي واسمع الحوار )

هذا الحوار يكشف لنا كيف يدور الحوار السياسي في بلادي ( وانا اقول مالها ما عايزة تستعدل)

كيفك يا ابو الدر
الحمد لله انا بخير
يا ابو الدر سمعنا تحت تحت كدا انك بتاع .............. افيال
تقصد شنو وبعدين الكلام دا اتكرر كتير وفي اكثر من منتدى
يعني ما عارف افيال مقصود بها شنو ....
اسمع يا ابو الشباب عشان ما نقعد نلف وندور على بعض انا لا بتاع افيال ولا زرافات ولا حتى وحيد القرن .
امك ظهرت انواع جديدة كمان ..
( طبعا انا شعرت بان ضغطي بدا يرتفع ويبدو انه هذا هو الهدف المقصود)
طيب تنكر يا ابو الدر انه قصة شاكر دي سياسية ؟؟؟
اها سياسية كيف كمان وتقول لي انا بتاع الافيال ..
شاكر دا انت قاصد به حكومة الللللللللللللللللللللل........................... ...
يا راااااااااااااااااااااجل
وناس الحلة الانت واحد منهم ديل يمثلوا الشعب السوداني
طيب حسام يطلع مين ( والدم العلى بنطلون بتاعي جا منين ؟؟)
حسام دا يمثل الامل والحلم الذي سياتي غدا ..

انا شعرت بانه الموضوع جد ..وقلت مادام هو مصر سياسة سياسة احاول اوجهه لاتجاه ثاني وقلت ..
طيب ليه ما يكون شاكر هو الجيش الامريكي في العراق
ونحن تمثل الشعب العراقي
وحسام ممكن يمثل صحوة الحسام العربي ..

قال : كان ممكن التحليل ياخذ هذا الاتجاه لولا انك ادخلت نفسك في القصة كراوي للقصة من واقع الحدث .. وانتت شخص سوداني وبالتالي الحوار سوداني ..

يا اخوانا دي مصيبة شنو ...

لا لا لا يا اخوي انا بتاع افيال .. وانا اكبر راقص على ظهور الافيال ..

الافيال هينة ممكن تحليل الدم ينفيها ..لكن الاتجاه الانت جاريني فيه دا لا اشعة اكس ولا اشعة واي تخارجك ..

والسلام عليكم

تعال تعال يا ابو الدر ..... انا ما جايي شوفوا هنا انا بالف وما حا اقيف والعايز يسمعها سياسة يسمعها والعايز يسمعها مديح يسمعها ...

ما قلت ليكم الزول دا بتاع افيال هسه الدخل المديح شنو ؟؟

[ابوخالد]

والله يا أبوالدر الواحد ما عارف يعلق يقول شنو ....

لكن الله يديك العافية ... وتسلم من كل شر ....

وخلى الوالده تبخرك ( أقصد تدسك من شاكر ) ....

ومدنى دى أحسن تانى ما تجى بى عندا ....

ونصيحتى لو ماشى الخرطوم أحسن ترجع بى

( هيا ـــ عطبرة ـــ الخرطوم ) ...

الحوار السياسى جميل .... لكن خلينا فى حكاوينا القبيل ....

وبكرة بدرى ....

حقيقى الأيام الفاتت كنت مشغول شوية ...

وبدخل النت شوية شوية ...

لقد فاتتنى الروعة وهى طازة ....

لكن عزائى بأن الحلو ما بكمل ....

ولك الفرح ساحات وميادين ...


وسلامى إلى كل من يهواه قلبك ....

الوداد مطلوب ... والزعل مرفوض ( والله من وراء القصد) ....

[نبض المشاعر رووونة]

يا جماعة براحة عليكم الله
يقوم يجينا بيجاي ويسكر لينا عضمنا


ههههههههههههههههههههههههههههههههههههههههه


مشكور على البوست الرائع دا

يسلموووووووووو

[درديري كباشي]

والله يا أبوالدر الواحد ما عارف يعلق يقول شنو ....

لكن الله يديك العافية ... وتسلم من كل شر ....

وخلى الوالده تبخرك ( أقصد تدسك من شاكر ) ....

ومدنى دى أحسن تانى ما تجى بى عندا ....

ونصيحتى لو ماشى الخرطوم أحسن ترجع بى

( هيا ـــ عطبرة ـــ الخرطوم ) ...

الحوار السياسى جميل .... لكن خلينا فى حكاوينا القبيل ....

وبكرة بدرى ....

حقيقى الأيام الفاتت كنت مشغول شوية ...

وبدخل النت شوية شوية ...

لقد فاتتنى الروعة وهى طازة ....

لكن عزائى بأن الحلو ما بكمل ....

ولك الفرح ساحات وميادين ...


وسلامى إلى كل من يهواه قلبك ....

الوداد مطلوب ... والزعل مرفوض ( والله من وراء القصد) ....

مشكور يا ابو خالد يا بركان الروعة الذي لا نتمنى ان يخمد ابدا

[أبو حمزة]

أنا مبسوووط وفرحان .. أولاً كسبت أخوان .. والهلال جاب أقوان .. والعيد على الأبواب وسوف أزور خير البرية شفعينا وسيد ولد عدنان..

[عباس الدسيس]

قصة روعه والله يا ابوالدر