المساعد الشخصي الرقمي

مشاهدة النسخة كاملة : لماذا تفشل مشاريع المغتربين في السودان - للنقاش



ود الجعلي
13-09-2009, 12:21 PM
لماذا تفشل المشاريع الصغير التي يقوم بها المغتربون ومثال على ذلك :

1- مطعم او كافتريا
2- مزرعة دواجن
3- مخبز
4- تجارة محاصيل
5- اسبيرات عربات
6- محلات زيوت
7- حافلة
8- دفار
9- سيارة نقل كبيرة
10- تجارة شنطة
11- مغلق مواد بناء
12- ركشة
13- مدرسة خاصة او معهد كمبيوتر ولغات
14- مباني
15- مكاتب خدمات تجارية ومقاولات وخدمات مهنية محاسبة وتدقيق واستشارات
16- وكالات سفر ودعاية واعلان
17- غير ذلك من المشاريع

هذه المشاريع وغيرها بعضها ناجح لاسباب عديده وبعضها فشل فشلا" ذريعا وذلك لعدة اسباب مختلفة ولكن نسمع بالفشل كثيرا وبعضهم يسوق ذلك الى قلة الخبرة والدراية بالمجال والمشروع وبعضهم يعزي ذلك الى فقدان الثقة في بيئة الاعمال السودانية وعدم وضوحها وانتشار المحاباة والمحسوبية مع التضخم ايضا" من ضمن الاسباب الجوهرية المساهمة في هذا الفشل

نود من أخواننا ان يسردوا لنا القصص التي حدثت معهم او مع احد من معارفهم واقربائهم في مشروع ناجح او فاشل بالتفصيل الممل للاستفاده منها
اتمنى التفاعل مع هذا الموضوع لانه يفيد اكبر شريحة من الاخوة التجارب والخبرات الناجحة والفاشلة في المشروعات التجارية

monim
13-09-2009, 12:57 PM
شكرا أخي ود الجعلي على هذا الموضوع الهام والذي حرك فيّ أشجان وذكريات أليمة

أنا لي تجربة انشاء دكان جملة نصحني به أحد الاصدقاء .... استهوتني الفكرة وانا خارج من صدمة الفصل التعسفي من وظيفتي التي قضيت بها 14 سنة .... رميت كل مكافا’ ما بعد الخدمة في هذا الدكان الذي ملأ بالكراتين للسقف وبدأ بداية مبشرة ، وما هي الا سنة حتى بدأ في العد التنازلي وبدا يتقهقهر الى أن ( ساح ) كما لوح الثلج وفقدت كل رأسمالي الذي هو حصاد عمل 14 سنة من عمري .

صفيته وجيت طيران على هنا ( السعودية ) وانصح كل صاحب مبلغ أن يبعد عن مثل هذه المشاريع قصيرة الاجل التي مصيرها الى زول قريب

مع تحياتي

أشرف صلاح السعيد
13-09-2009, 01:05 PM
ود الجعلى سلامات..
والله موضوع خطير جد وبجيب زعل علا الواحد حسبو انو بيقول الفى ضميرو وبخلى للباقين باقى الكلام..
باختصار المشاريع بتفشل لإنعدام الأمانة والشفافية حتى فى المقربين..أنا جربت اعمل مشروع قبل الاغتراب دخلت فى الزراعة لقيتا قمار عديل كدا..دخلت فى التجارة الزمم الاستك بكتف واحد بتلاقى نفسك برا السوق..يعنى حكاية تكون فى موقع الاحداث ممكن تفشل زيى وحبيبنا منعم..
اى مشروع لمغترب بيفشل لعدم وجود المغترب بمكان المشروع..يعنى تعمل ليك مشروع وتمسكو لفلان او علان انسى..وعندى صاحب ليا قال تعرف لو قسمونى نصين ..نص فى السودان ونص هنا نصى الفى السودان حياكل نصى الهنا..والمعنى واضح..

mutasim
13-09-2009, 01:32 PM
تجربتى بعد اغتراب 14 سنه

اولا تاكسى
مخبز
صيدليه
بقاله
محل زيوت بالمنطقه الصناعيه
بطيخ طماطم فواتير وقربت ابقى حرامى لكن الله ستر وسبب الفشل الامانه وانى مش من الجماعه
وبعدها عدت للغربه وهسه قنعان من اى اسنثمار فى السودان وربنا يستر

ملاك مدني
13-09-2009, 02:51 PM
انا عندي ليكم استثمار ناجح وجدا كمان ومجرب


ابنوا ليكم بيوت واجروها وبس وصدقوني ح تكسب ما سمعتوا بي المثل البيقول((العقار ابن بار)) غير كدا اتفكروا تكسبو

الاميره
13-09-2009, 03:13 PM
فشل المشاريع سببه الاول عدم وجود الخبره فى المجال المعين.. وكذلك عدم عمل دراسه دقيقه للمشروع ومدى نجاحه اقلاها خمسه سنين...كل شخص يجد مشروع مربح بفرح وطوالى يعمل فيه وهذا الخطاء بعين ...الامانه (بقت عمله نادره )وما فى اى شخص يستطيع يعمل لغيره بأخلاص..

الاميره
13-09-2009, 03:17 PM
انا عندي ليكم استثمار ناجح وجدا كمان ومجرب


ابنوا ليكم بيوت واجروها وبس وصدقوني ح تكسب ما سمعتوا بي المثل البيقول((العقار ابن بار)) غير كدا اتفكروا تكسبو

الاخت او الاخو / ملاك مدنى والله جد فكره جميله ولكن هنالك الكثير ممكن نستثمر فيه وبنجاح فقط كل شىء يكون مدروس..

الزبير محمد عبدالفضيل
13-09-2009, 10:15 PM
مشكور أخي علي هذا الطرح الجيد


اولا نجاح المشاريع الاستثماريه في السودان بحد ذاتها ناجحه اذا كانت لها لهذه الاشياء


1- دراسة جدوي ماديه واداريه

2- الدعم والتشجيع من جهاز المغتربين

3- تكوين راس مال يكون بقدر تكوين المشروع

4- دراسة السوق دراسه مستفيضه حتي تقدر تقيم قيام المشروع

الجندي المجهول
13-09-2009, 10:41 PM
1/ عدم الدراسة والتخطيط
2/ الكل يطمع في المغترب ويحاول ان يستفيد منه باي طريقة ( يعني لو عاوز تعمل تصديق ولا اي حاجة تلقى الجماعة مضخمين ليهو الشغلانة ولازم تدفع ) وما إلى ذلك .
3/ المغترب بيجي وفي اشياء غائبة عن ذهنه ( ناس الجريح والشهيد والقيمة المضافة والضريبة والنفايات وما ادراك من دفعوات لا خدمات لها
4/ السودان الان غير مهيأ ابدا لشخص (نزيه) ان يقيم فيه مشروعاً
5/ الاجواء ملوثة وخانقة جداً ويوجد تكبيل بدلاً عن التسهيل
6/ وحتى لا تبدأ عملك بالحرام اي رشوة محسوبة عليك وعلشان تبدأ اي عمل بالسودان مهما كان حجمه او نوعه ستمر بهذه التجربة غصباً عنك ( تقديم الرشوة)
7/ العندو قروش الان يلمها عليهو ( على حسب راي الخاص ) ولا يمشي ويكون هو المسؤول عما يحدث له .

المكاشفى
13-09-2009, 11:08 PM
مالا توادعو وادعك

اخوك بياكلك

داير تستثمر اقعد فى الواطه دى وانجز
والا لو ماداير تستقر الجأ الى الاستثمار الجبان
زى ماقال ملاك مدنى العقارات والاجارات ونحوها


ويالجندى براحه على البلد

المكاشفى
13-09-2009, 11:18 PM
وبرضو اقسام وحظوظ
كدى شوف عربيتى الجميله

http://www7.0zz0.com/thumbs/2009/09/14/08/828062077.jpg



حالتها تحنن
http://www7.0zz0.com/2009/09/14/08/954591169.jpg (http://www.0zz0.com)

خطاب العبيد
14-09-2009, 12:35 AM
والله ياشباب الكلام القلتوه مية المية
بس وين نلاقى الشخص الامين الممكن تعتمد عليه فى إدارة اى مشروع
والحاجة التانية اهم شيء دراسة الجدوى لاى مشروع وتكون خاشى المشروع وانتاعارف انو ناجح ولوحتى لخمس سنوات زى ماقالت الاخت الكريمة وبى صراحة فى عدم جدية بالذات فى الناس الموجودين فى السودان واقرب مثل لماتراجع فى اى ادارة او عاوزتخلص معاملتك سواء فى المغتربين ولافى الالزامية او فى اى مكان بتلاحظعدم الجدية فى اى شيء يبقى المشكلة فى حد ذاتهافينا نحن

بت مارنجان
14-09-2009, 01:43 AM
4- دراسة السوق دراسه مستفيضه حتي تقدر تقيم قيام المشروع

الاستاذ الزبير :
انت قلت خلاصة القول .. من دون دراسة للسوق والوضع الاقتصادي الحالي ...
واتجاه السوق ماشي علي وين ... ومراقبة اسعار العملة برضو ليها تاثير ...

يعني مثلا المغترب بيجي يسال فلان ولا علان ياخوانا عندي قريشات اسوي بيهن شنو
يقولو ليه ياخ جيب ركشة الركشة سمحة ولا بتعبك وصيانتها رخيصة ...
في حين انو لاقدر الله لو اتعمل حادث تاني علبة كبريت مابتنفع ... وحتي لو اتعطل فيها شي
مابتتحرك ....

وبالنسبة لحتتة الامانة زي مالجميع اشتكو ... يخوانا حقك مافي زول بحافظ ليك عليه
الا سيد الحق ... لانهم ماتعبانين فيه ... تعبت انت في قرشك لمن جبتو ومسكتو ليهم
اكيد لاحيحافظو ولا حيراعو ...

انا مع الاخت ملاك ... انسب استثمار " عقار " ...
لو جيت تبني في شركات رمسية بتمسك البيت وتسلمك ليه في وقت محدد جاهز من اي
لو عايز فرش بفرشو ليك ... وبالنسبة للايجار تشوف محامي معروف يتابع اجراءات
الايجار ... ويحول المبلغ بتاع الايجار لي حسابك في الدولة الانت قاعد فيها
وتريح راسك من الركشة عملت حادث ... والدكان راح شمار في مرقة .....
وعلي فكرة انا كتير من اقربائي المغتربين عملو كدة ... لانو استثمار العقار دة ماشي
في السودان بصورة رهيبة وخاصة مع الاجانب ... تاجر البيت لاجانب ...

ود الجعلي
14-09-2009, 02:10 AM
شكرا أخي ود الجعلي على هذا الموضوع الهام والذي حرك فيّ أشجان وذكريات أليمة

أنا لي تجربة انشاء دكان جملة نصحني به أحد الاصدقاء .... استهوتني الفكرة وانا خارج من صدمة الفصل التعسفي من وظيفتي التي قضيت بها 14 سنة .... رميت كل مكافا’ ما بعد الخدمة في هذا الدكان الذي ملأ بالكراتين للسقف وبدأ بداية مبشرة ، وما هي الا سنة حتى بدأ في العد التنازلي وبدا يتقهقهر الى أن ( ساح ) كما لوح الثلج وفقدت كل رأسمالي الذي هو حصاد عمل 14 سنة من عمري .

صفيته وجيت طيران على هنا ( السعودية ) وانصح كل صاحب مبلغ أن يبعد عن مثل هذه المشاريع قصيرة الاجل التي مصيرها الى زول قريب

مع تحياتي

منعم صباح الخير
وربك كريم بيعوض انشالله والله تجربة ثرة ومفيدة ونتمنى ان نستفيد منها وهي عدم الدخول بكل ما تملك في اي مشروع
تحياتي

صهيب البصير
14-09-2009, 02:49 AM
موضوع جميل اخى ولك الفضل فى ذلك

عدم نجاح مشاريع المغتربين فى السودان الخصها فى ثلاته اشياء

1- عدم وجود الخبره الكافيه وعدم معرفه ظروف البلد
2- اى شخص يريد ان ياخذ من المغترب
3- نكته محمد موسى واحد مغترب ببنى فى بيت فى السودان اخوه مشرف على البنيان كل مره رسل رسل رسل رسل لالمغترب زهج قال لى اخوه البنيان دا وصل وين قال لى متر من الواطه قال لى ازقف على كدا

عبدالله الصديق
14-09-2009, 02:57 AM
كنت قد طرحت موضوع مشابه على هذا الرابط
http://www.wadmadani.com/vb/showthread.php?t=25764

خالد 000 ابقرجة
14-09-2009, 03:04 AM
التحية لكل المشاركين
بس في نقطة صغيرة لمن يدعو بدراسة الجدوي 000

دراسة الجدوي بتكون دايما مبنية علي ثوابت اقتصادية تسير عليها البلد 000



باختصار شديد 000

البلد ما فيها أي ثوابت اقتصادية ممكن تعمل علي اساسا دراسة

أو تقرر في أي مجال تستثمر 000

لأنو كل القرارات تصدر حسب حركة أموال عدد معين من الأشخاص
ما عاوز اكون متشائم واقول أنهم معدودين علي أصابع اليد 000

لكن ما حا تتلخبط لو عاوز تعدهم 000


وكلام كشة حبيب الكل ما تدوهو واطة

لمو قروشكم عليكم 000 كان فضل فيها حاجة بعد ما تطلعوا من جهاز شئون المغتربين 000

احتراماتي ود الجعلي

مهيد ود السفاح
14-09-2009, 04:48 AM
1/ عدم الدراسة والتخطيط
2/ الكل يطمع في المغترب ويحاول ان يستفيد منه باي طريقة ( يعني لو عاوز تعمل تصديق ولا اي حاجة تلقى الجماعة مضخمين ليهو الشغلانة ولازم تدفع ) وما إلى ذلك .
3/ المغترب بيجي وفي اشياء غائبة عن ذهنه ( ناس الجريح والشهيد والقيمة المضافة والضريبة والنفايات وما ادراك من دفعوات لا خدمات لها
4/ السودان الان غير مهيأ ابدا لشخص (نزيه) ان يقيم فيه مشروعاً
5/ الاجواء ملوثة وخانقة جداً ويوجد تكبيل بدلاً عن التسهيل
6/ وحتى لا تبدأ عملك بالحرام اي رشوة محسوبة عليك وعلشان تبدأ اي عمل بالسودان مهما كان حجمه او نوعه ستمر بهذه التجربة غصباً عنك ( تقديم الرشوة)
7/ العندو قروش الان يلمها عليهو ( على حسب راي الخاص ) ولا يمشي ويكون هو المسؤول عما يحدث له .

جندينا الهمام

كلامك 100% ورغم انو حار وبخوف لكن اسمع كلام الببكيك ما تمسع كلام البضحكك

مهيد ود السفاح
14-09-2009, 04:58 AM
المهندس خالد ابقرجه قال نقطه مهمه جداً

دراسة الجدوى وتخطيط المشروع , الانحراف بين دراسة الجدوى و المحقق فعلاً غالباً ما يكون كبير جداً سلباً او ايجاباً وذلك لعدم الاستقرار الاقتصادي ( كل يوم رسوم جديده , ورسوم ملغيه , ورسوم مضاعفه , وضريبه جديده كل شهرين تلاته , اسعار صرف زي كورة التنس تطلع وتنزل , ....و .......و هلمجرا .

عبدالله الصديق
14-09-2009, 05:24 AM
حالنا المغتربيت زي ما وصفها واحد قال زي البوزن في الضفادع كل ما يخت واحدة تنط واحدة لا اللضفادع خلصت ولا الميزان انعدل .. كل ما تلم خمسمائة بجنب يجي طلب من السودان الحل الرجوع ومحاسبة النفس قبل الآخرين . الرازق دائم لا يتغير.. صعدت منا اعمال غير طيبة الى الله فنزلت احوال وفق لذلك

ابوخالد
14-09-2009, 05:25 AM
أقول بصراحة المغترب الى عايز إستثمار

جيد ... يستثمر فى بلد المهجر قبلو ...

والدروب كتيرة ...

ودى نصيحتى لله ...

الأوضاع هناك ما بتطمن ...

يوم فوق ويوم تحت ...

حتى بنوك التمويل الأوروبية ترفض أى دراسة جدوى

لإستثمار فى السودان ..... وده إنما يدل

على عدم الإستقرار ....


ودمتم أحبتى بألف خير

ابوسمؤال
14-09-2009, 06:50 AM
موضوع مهم جدا (انا عندي تجربة في تجار العربات في الاول ميه الميه وبعد شوية الشيكان المضروب كترت وتبع الي الحد اليوم بكره هو في البايباي)التجربه فيل السفر

ود الجعلي
14-09-2009, 07:14 AM
ود الجعلى سلامات..
والله موضوع خطير جد وبجيب زعل علا الواحد حسبو انو بيقول الفى ضميرو وبخلى للباقين باقى الكلام..
باختصار المشاريع بتفشل لإنعدام الأمانة والشفافية حتى فى المقربين..أنا جربت اعمل مشروع قبل الاغتراب دخلت فى الزراعة لقيتا قمار عديل كدا..دخلت فى التجارة الزمم الاستك بكتف واحد بتلاقى نفسك برا السوق..يعنى حكاية تكون فى موقع الاحداث ممكن تفشل زيى وحبيبنا منعم..
اى مشروع لمغترب بيفشل لعدم وجود المغترب بمكان المشروع..يعنى تعمل ليك مشروع وتمسكو لفلان او علان انسى..وعندى صاحب ليا قال تعرف لو قسمونى نصين ..نص فى السودان ونص هنا نصى الفى السودان حياكل نصى الهنا..والمعنى واضح..

اشرف
عيدك مبارك
اناعلم سبب عدم توفيقك في العمل التجاري وذلك لانك أديب شفاف ومثلك لا يقوى على مكر التجارة ومرواغة اهلها


ومحبتي

ود الجعلي
14-09-2009, 07:17 AM
تجربتى بعد اغتراب 14 سنه

اولا تاكسى
مخبز
صيدليه
بقاله
محل زيوت بالمنطقه الصناعيه
بطيخ طماطم فواتير وقربت ابقى حرامى لكن الله ستر وسبب الفشل الامانه وانى مش من الجماعه
وبعدها عدت للغربه وهسه قنعان من اى اسنثمار فى السودان وربنا يستر


والله يا معتصم جرجرتك طويلة كل المشاريع دي دي معناة اكيد في حاجة غلط كبيرجدا" في هذا البلد الجميل الغريب يعني تجارب بتاع ناس كتار وتعدد في المشاريع برضو تلقا الموضوع ماجايب حقو فعلا" موضوع يدعو للدراسة والقراءة المتأنية والواعية بموضوعية

ود الجعلي
14-09-2009, 07:18 AM
انا عندي ليكم استثمار ناجح وجدا كمان ومجرب


ابنوا ليكم بيوت واجروها وبس وصدقوني ح تكسب ما سمعتوا بي المثل البيقول((العقار ابن بار)) غير كدا اتفكروا تكسبو

اكيد فكرتك مضمونة وسهلة وانا اول واحد حأفكر بجدية في موضوع العقار
وشكري على المرور

ود الجعلي
14-09-2009, 07:20 AM
الاخت او الاخو / ملاك مدنى والله جد فكره جميله ولكن هنالك الكثير ممكن نستثمر فيه وبنجاح فقط كل شىء يكون مدروس..

الاميرة
كما تثني علي راي الاخت ملاك اثني انا ايضا
وتحياتي وشكرا على المرور

ود الجعلي
14-09-2009, 07:25 AM
مشكور أخي علي هذا الطرح الجيد


اولا نجاح المشاريع الاستثماريه في السودان بحد ذاتها ناجحه اذا كانت لها لهذه الاشياء


1- دراسة جدوي ماديه واداريه

2- الدعم والتشجيع من جهاز المغتربين

3- تكوين راس مال يكون بقدر تكوين المشروع

4- دراسة السوق دراسه مستفيضه حتي تقدر تقيم قيام المشروع

الاستاذ الزبير

قد اختلف معك في رايك الى اقصى مما تتصور وذلك لانني شهدت الكثير من الحالات والنماذج الفاشلة لاسباب تتعلق بضعف وهشاشة بيئة العمل التجاري في السودان من التدهور الاقتصادي مرورا" بغياب الشفافية وانتشار الفساد الاداري والمالي وعدم كفاءة الاجهزة الرسمية و القطاع الخاص وهنالك اسباب كثيرة قد تظهر بالنقاش من اهل التجارب انفسهم

شكري على مرورك الضافي ونقاطك التي اشعلت حماسة النقاش

ود الجعلي
14-09-2009, 07:25 AM
1/ عدم الدراسة والتخطيط
2/ الكل يطمع في المغترب ويحاول ان يستفيد منه باي طريقة ( يعني لو عاوز تعمل تصديق ولا اي حاجة تلقى الجماعة مضخمين ليهو الشغلانة ولازم تدفع ) وما إلى ذلك .
3/ المغترب بيجي وفي اشياء غائبة عن ذهنه ( ناس الجريح والشهيد والقيمة المضافة والضريبة والنفايات وما ادراك من دفعوات لا خدمات لها
4/ السودان الان غير مهيأ ابدا لشخص (نزيه) ان يقيم فيه مشروعاً
5/ الاجواء ملوثة وخانقة جداً ويوجد تكبيل بدلاً عن التسهيل
6/ وحتى لا تبدأ عملك بالحرام اي رشوة محسوبة عليك وعلشان تبدأ اي عمل بالسودان مهما كان حجمه او نوعه ستمر بهذه التجربة غصباً عنك ( تقديم الرشوة)
7/ العندو قروش الان يلمها عليهو ( على حسب راي الخاص ) ولا يمشي ويكون هو المسؤول عما يحدث له .


كلامك ببصم عليهو بالعشرة

ود الجعلي
14-09-2009, 07:30 AM
مالا توادعو وادعك

اخوك بياكلك

داير تستثمر اقعد فى الواطه دى وانجز
والا لو ماداير تستقر الجأ الى الاستثمار الجبان
زى ماقال ملاك مدنى العقارات والاجارات ونحوها


ويالجندى براحه على البلد



المكاشفي

اولا شكرا" على طلتك يا جميل

عندي عمي يا مكاشفي... كان مغترب معاي .... مشى قعد في الواطة وزرعها.... وحسع اخر انبساط
مع الفاصوليا والفول والبصل وبصل المكاده ...وسط اهلو وجروفو.....مرتااااااااااااااح

اليقين يا الله ...................... آمين

ود الجعلي
14-09-2009, 07:33 AM
والله ياشباب الكلام القلتوه مية المية
بس وين نلاقى الشخص الامين الممكن تعتمد عليه فى إدارة اى مشروع
والحاجة التانية اهم شيء دراسة الجدوى لاى مشروع وتكون خاشى المشروع وانتاعارف انو ناجح ولوحتى لخمس سنوات زى ماقالت الاخت الكريمة وبى صراحة فى عدم جدية بالذات فى الناس الموجودين فى السودان واقرب مثل لماتراجع فى اى ادارة او عاوزتخلص معاملتك سواء فى المغتربين ولافى الالزامية او فى اى مكان بتلاحظعدم الجدية فى اى شيء يبقى المشكلة فى حد ذاتهافينا نحن

الاخ خطاب.............................. " اسم جميل"

على حسب ما اعلمه انو المشكلة في اقتصاد البلد فيهو تضخم تجاوز كل المعدلات العالمية
وده بخلي القروش تاكل نفسها

الله بسهل يا ود العبيد

ود الجعلي
14-09-2009, 07:35 AM
الاستاذ الزبير :
انت قلت خلاصة القول .. من دون دراسة للسوق والوضع الاقتصادي الحالي ...
واتجاه السوق ماشي علي وين ... ومراقبة اسعار العملة برضو ليها تاثير ...

يعني مثلا المغترب بيجي يسال فلان ولا علان ياخوانا عندي قريشات اسوي بيهن شنو
يقولو ليه ياخ جيب ركشة الركشة سمحة ولا بتعبك وصيانتها رخيصة ...
في حين انو لاقدر الله لو اتعمل حادث تاني علبة كبريت مابتنفع ... وحتي لو اتعطل فيها شي
مابتتحرك ....

وبالنسبة لحتتة الامانة زي مالجميع اشتكو ... يخوانا حقك مافي زول بحافظ ليك عليه
الا سيد الحق ... لانهم ماتعبانين فيه ... تعبت انت في قرشك لمن جبتو ومسكتو ليهم
اكيد لاحيحافظو ولا حيراعو ...

انا مع الاخت ملاك ... انسب استثمار " عقار " ...
لو جيت تبني في شركات رمسية بتمسك البيت وتسلمك ليه في وقت محدد جاهز من اي
لو عايز فرش بفرشو ليك ... وبالنسبة للايجار تشوف محامي معروف يتابع اجراءات
الايجار ... ويحول المبلغ بتاع الايجار لي حسابك في الدولة الانت قاعد فيها
وتريح راسك من الركشة عملت حادث ... والدكان راح شمار في مرقة .....
وعلي فكرة انا كتير من اقربائي المغتربين عملو كدة ... لانو استثمار العقار دة ماشي
في السودان بصورة رهيبة وخاصة مع الاجانب ... تاجر البيت لاجانب ...

كلامك مفيد جدا"


شكرا" على المرور بت مارنجان يديك العافية

ود الجعلي
14-09-2009, 07:37 AM
موضوع جميل اخى ولك الفضل فى ذلك

عدم نجاح مشاريع المغتربين فى السودان الخصها فى ثلاته اشياء

1- عدم وجود الخبره الكافيه وعدم معرفه ظروف البلد
2- اى شخص يريد ان ياخذ من المغترب
3- نكته محمد موسى واحد مغترب ببنى فى بيت فى السودان اخوه مشرف على البنيان كل مره رسل رسل رسل رسل لالمغترب زهج قال لى اخوه البنيان دا وصل وين قال لى متر من الواطه قال لى ازقف على كدا

صحيح ما جاء في طرحك صهيب بس برضو حقو الناس توعى شوية زي ماقالت بت مارنجان يعني ما تسمع اي كلام وترمي قروشها في اي مشروع يعني بتشوف الحاجة المناسبة

وزي ماقالت ملاك العقار وبس

ود الجعلي
14-09-2009, 07:40 AM
كنت قد طرحت موضوع مشابه على هذا الرابط
http://www.wadmadani.com/vb/showthread.php?t=25764

استاذنا عبدالله الصديق

تحياتي

صدقني لم الحظ ذلك وسوف يكون الموضوع مكملا لموضوعك نتمنى ن نخرج بنتيجة تفيد الجميع

شكري على المرور

ود الجعلي
14-09-2009, 07:42 AM
التحية لكل المشاركين
بس في نقطة صغيرة لمن يدعو بدراسة الجدوي 000

دراسة الجدوي بتكون دايما مبنية علي ثوابت اقتصادية تسير عليها البلد 000



باختصار شديد 000

البلد ما فيها أي ثوابت اقتصادية ممكن تعمل علي اساسا دراسة

أو تقرر في أي مجال تستثمر 000

لأنو كل القرارات تصدر حسب حركة أموال عدد معين من الأشخاص
ما عاوز اكون متشائم واقول أنهم معدودين علي أصابع اليد 000

لكن ما حا تتلخبط لو عاوز تعدهم 000


وكلام كشة حبيب الكل ما تدوهو واطة

لمو قروشكم عليكم 000 كان فضل فيها حاجة بعد ما تطلعوا من جهاز شئون المغتربين 000

احتراماتي ود الجعلي


كلامك مظبوط خالد وتاكيدا" لكلام مكاشفي

نناشد الجميع على الحفاظ على حصاد الغربة لانو القرش بقا مابجي بالساهل
وشكرا" على المرور ود ابقرجة

ود الجعلي
14-09-2009, 07:44 AM
جندينا الهمام

كلامك 100% ورغم انو حار وبخوف لكن اسمع كلام الببكيك ما تمسع كلام البضحكك



انا شخصيا" باكد على كلام الجندي
وشكري مهيد على المرور

ملاك مدني
14-09-2009, 12:04 PM
الاخت او الاخو / ملاك مدنى والله جد فكره جميله ولكن هنالك الكثير ممكن نستثمر فيه وبنجاح فقط كل شىء يكون مدروس..





انا بت يااميره ياعسل ما ولد يعني الاخت :d:d

ود الجعلي
15-09-2009, 08:25 AM
انا بت يااميره ياعسل ما ولد يعني الاخت :d:d



الاميرة انا لاحظت لرد اخر من ردودك ........ يظهر انو رمضان اثر فيك :d

ابوخالد
16-09-2009, 01:59 AM
أقول بصراحة المغترب الى عايز إستثمار

جيد ... يستثمر فى بلد المهجر قبلو ...

والدروب كتيرة ...

ودى نصيحتى لله ...

الأوضاع هناك ما بتطمن ...

يوم فوق ويوم تحت ...

حتى بنوك التمويل الأوروبية ترفض أى دراسة جدوى

لإستثمار فى السودان ..... وده إنما يدل

على عدم الإستقرار ....


ودمتم أحبتى بألف خير




ود الجعلى ... رمضانك الظاهر سخن شويتين ....