مشاهدة النسخة كاملة : ***لقيمات ** كل عام وانتى بخير *** توجد خميرة ***
العاقب مصباح
19-09-2009, 01:24 AM
فى بعض قرى الجزيرة
التى تعتمد على الروث المخمر
اتخيل لى كلمة الروث افضل حالا من الكلمة التانية
بقيت مثقف صح
دا كله من السر قدور
قصدت بالتخمير تجهيز طلية خفيفة
البعض يفضلها فى الخارج
والبعض فى الداخل
والبعض ارضيات
لا يهمهم كم متر السيراميك
وتلك الفتيات الرشيقات اللواتى يتمايلن عن عرض المنتج فى التلفزيون
اذا تلك تخميرة
لا تحتاج لكثير عناء
او وصفات
تقوم به فى الغالب النسوة
والرجال فى مكان اخر
خال من الرائحة
امراة تتحزم وتتلزم
وتقوم بالواجب الانسانى واكتر كمان
ورائحة التخمير تجيب الضهبان
الا انه عند الانتهاء
تشعر تلك الفتاة بالرضا عن نفسها
وعن ذاك الروث
فحينما لم يستطعن تحويله الى طاقة كهربائية او حرارية فضلن استخدامه فى هدر طاقتهن للحصول على منظر مرضى للزوار
خميرة اخرى تظهر صبيحة الغد او بعد الغد
هى الخميرة الاصلية
للقيمات يقمن ما بنا من عطش
لا اعرف ما هو السر فى اختيار اللقميات فى صبيحة عيد الفطر بالذات
افى ذلك سر
لا ادرى
ولكنى افضلها
وافضل تناولها وهى حافية القدمين
وعارية الا من السكر
تدخلها فى فمك ثم تتبعها جغمة من اثر الشاى وحينها تبصر ما لم يبصر القوم
فتصير مثل السامرى للحظة
اعشق اللقيمات
واحبها
احبك يا لقيمات
ولن انسى ان اقول هذه المرة
كل عام وانتى بخير
كل عام وانتى فى الزيت معطونة
و بالسكر ترتدين حلة زاهية
فهلا تمنينا لها الخير
انها تلك اللقيمات
وفى رواية اخرى زلابية
عبدالرحمن مدثر
19-09-2009, 02:21 AM
لسه بتذكر فى موضوع فى البلاغة
بربط ليك قطعة اللقيمات لما ترميها
فى طش الزيت .. يقارن بين هذه
وبين حجر ترميه فى بركة ماء سااااكنة
البعجب من المشهدين مابعد الرمية
والدوائر التى تروح وتاااتى
وبين اللقيمات (ولقمة القاااضى ) والزلابية
نفس الملامح والشبه
بس بقولوا فى فرق بسيط بكون مافى المقادير
ولا العجينة
الفرق فى السكر النااااعم الذى يغطى جسد اللقيمات
ولايكون فى الزلابية موجود
اتاثرت للزلابية وهى تعيد بدون هدوم جديدة (سكر نااعم )
ومن هنا من خلال هذه الاحتفائية الجميلة برمز من رموز
الفرحة الكبرى فرحة الافطار وقدوم عيد الفطر المباااااارك
اعاده الله علينا وعليكم وعلى الجميع بالخير واليمن والبركات
والزغااريد المتوجة بقدوم موااسم الافرااااااح
اجمل مافى اللقيمات اللمة الصباحية لعلها تكون خير ختام
لتجمعات البروش فى امسياات رمضان .. ومااحلى اللقيمات
مع الونسات المسكرة فى الصباحات الندية .. من هنا تكون صناعة
الفرحة ممكنة والونسة ليها لونا ونكهتا..
ايضا اللقيمات كراابط اجتماعى فى قرانا فى الريف يكون لها
سحر القعدة الصباحية فى مناسبات الافراح عقب صلاة الصبح مبااشرة
وبعد مايضبحوا تور المنااسبة ويلتف الجميع حوله يتساامرون
(ويقطعون الضلع )
وحول تلك الدائرة تدور صبايا اللقيمات فى الق خاص
مع رشفات الود من الشااااى .. ومااروعها عندما تكون (مقننة)
شفت ياصبحى اللمة الحلوة دى كيف
عيد
ولقيماااااااااات
وزلابية
وفرحة كبرى
كل عاااام والجميع بخير
ودائما تااااامين ولاااااامين
خربشة ..
قلت لى توجد خميرة ... ماتخليها براها يمكن تبقى خميرة عكننة
أبوبكرحامد
19-09-2009, 08:46 AM
ببركة هذه الأيام المباركة يا العاقب ود المصباح العيد الجايى إنت وود الجاك وعصمت متهنين بى بيوتكم ومع النصف الحلو الذى يزيد الحياة بهجةً على بهجتها ، تتحكّر وسط البيت وأمام صحن اللقيمات وشاى مقنن على راى ودمدثر وأبو عركى البخيت يصدح:
ساوّا ليكم بى إيدينا شاى
وثق ياصديقى أن رفيقة الدرب تجعل حياة الغربة أقل رهقاً وتشبه الغصن ذو الشوك الرحيم ذاك الذى عناه عاطف خيرى حين أنشد:
خوفو إذا إطير
لا إلقا قبلة
لاطفل فى إيدو نبلة
لاغصن ذو شوك رحيم
.................................................. .................
فى الليالى الشاتية يكون للقيمات عدة أغراض فهو يقيم صلبك ويزيل غبشة جلدك وزردية لبطنك حتى يحين موعد الإفطار .
أبوبكرحامد
22-09-2009, 08:23 PM
[quote=أبوبكرحامد;396563]ببركة هذه الأيام المباركة يا العاقب ود المصباح العيد الجايى إنت وود الجاك وعصمت متهنين بى بيوتكم ومع النصف الحلو
[size="6"] أها يا العاقب أخوى شوف دعواتنا ماشة زى الورد ، عصمت يوم الجمعة زواجو ، يلا اتلحلح وسوى ليك همة ومعاك ود الجاك 999 ( الرقم ده إخلع):)
عبدالمنعم الصديق(خدرا)
22-09-2009, 09:05 PM
العاقب ودالمصباح
كل سنه وانت طيب
وربنا يحقق ليك كل الامانى المستعجلة والمؤجلة
ياخى والله الزلابيه واللقيمات دى انا كاسره مسمار عشقها جوه قلبى
حتى اسأل دعوب ؟؟؟؟؟؟
وزى ماقلت أجمل حاجه انك تقوم يوم العيد الصباح وتلقى ليك شاى لبن مقنن ومعاهو (عضه) صحن زلابيه كارب وبعده سفه مدنكله من كيس العيد المختوت فى التلاجه من امس
كل سنه وانت طيب
وربنا يجعل ايامنا كلها اعياد
العاقب مصباح
22-09-2009, 09:36 PM
لسه بتذكر فى موضوع فى البلاغة
بربط ليك قطعة اللقيمات لما ترميها
فى طش الزيت .. يقارن بين هذه
وبين حجر ترميه فى بركة ماء سااااكنة
البعجب من المشهدين مابعد الرمية
والدوائر التى تروح وتاااتى
وبين اللقيمات (ولقمة القاااضى ) والزلابية
نفس الملامح والشبه
بس بقولوا فى فرق بسيط بكون مافى المقادير
ولا العجينة
الفرق فى السكر النااااعم الذى يغطى جسد اللقيمات
ولايكون فى الزلابية موجود
اتاثرت للزلابية وهى تعيد بدون هدوم جديدة (سكر نااعم )
ومن هنا من خلال هذه الاحتفائية الجميلة برمز من رموز
الفرحة الكبرى فرحة الافطار وقدوم عيد الفطر المباااااارك
اعاده الله علينا وعليكم وعلى الجميع بالخير واليمن والبركات
والزغااريد المتوجة بقدوم موااسم الافرااااااح
اجمل مافى اللقيمات اللمة الصباحية لعلها تكون خير ختام
لتجمعات البروش فى امسياات رمضان .. ومااحلى اللقيمات
مع الونسات المسكرة فى الصباحات الندية .. من هنا تكون صناعة
الفرحة ممكنة والونسة ليها لونا ونكهتا..
ايضا اللقيمات كراابط اجتماعى فى قرانا فى الريف يكون لها
سحر القعدة الصباحية فى مناسبات الافراح عقب صلاة الصبح مبااشرة
وبعد مايضبحوا تور المنااسبة ويلتف الجميع حوله يتساامرون
(ويقطعون الضلع )
وحول تلك الدائرة تدور صبايا اللقيمات فى الق خاص
مع رشفات الود من الشااااى .. ومااروعها عندما تكون (مقننة)
شفت ياصبحى اللمة الحلوة دى كيف
عيد
ولقيماااااااااات
وزلابية
وفرحة كبرى
كل عاااام والجميع بخير
ودائما تااااامين ولاااااامين
خربشة ..
قلت لى توجد خميرة ... ماتخليها براها يمكن تبقى خميرة عكننة
ود مدثر
كل رمية زلابية وانت بخير
ربنا يمد فى عمرك وايامك
ويكتر ليك ناعم سكر لقيماتك
وينفخها ليك نفخة قربة
ويجعلها سهلة القرمشة
لها صوت حنين
كصوت عوض احمودى وهو يمسك بالعود
ويجعل لك بجانبها سيرمس شاى
شاى سادة ساى
ومسيخ
بس جنبك السكرية
وتشيل وتكب
وتكب سكرك
وتسوط
وبوخو يلوى
وتحلف على الغاشى والماشى
والشمس يا دوبا طالعة
وتعاين ليك بى طرف عينها اليمين
ما تمشى بعيد
قاصد عين الشمس يا ابوى
مش فى زول بيقول ليك ضربتنى عين شمس
اها من هنا جات العين
وبعد تشبع تب تلقى ايدك فيها باقى السكر الناعم
ياخى لمن تغسلها حاجة حلوه خلاص
عشان الزيت ما بيطلع بى سهولة
وزمان كنا بنمسح بيهو وشنا
عشان نحتفظ بالنكهة لاطول فترة ممكنة
اها هسع ناس الخبيز والكعك ديل ما جايبات همهن
اخير عدمهن
العاقب مصباح
22-09-2009, 10:10 PM
ببركة هذه الأيام المباركة يا العاقب ود المصباح العيد الجايى إنت وود الجاك وعصمت متهنين بى بيوتكم ومع النصف الحلو الذى يزيد الحياة بهجةً على بهجتها ، تتحكّر وسط البيت وأمام صحن اللقيمات وشاى مقنن على راى ودمدثر وأبو عركى البخيت يصدح:
ساوّا ليكم بى إيدينا شاى
وثق ياصديقى أن رفيقة الدرب تجعل حياة الغربة أقل رهقاً وتشبه الغصن ذو الشوك الرحيم ذاك الذى عناه عاطف خيرى حين أنشد:
خوفو إذا إطير
لا إلقا قبلة
لاطفل فى إيدو نبلة
لاغصن ذو شوك رحيم
.................................................. .................
فى الليالى الشاتية يكون للقيمات عدة أغراض فهو يقيم صلبك ويزيل غبشة جلدك وزردية لبطنك حتى يحين موعد الإفطار .
أها يا العاقب أخوى شوف دعواتنا ماشة زى الورد ، عصمت يوم الجمعة زواجو ، يلا اتلحلح وسوى ليك همة ومعاك ود الجاك 999 ( الرقم ده إخلع):)
اييييييييييييييييييييك
كل عام وبخير
وكل صاج لقيمات وانت بكامل وموفور الصحة
ربنا يحقق كل امانيك يا ود المازون
ومالك علينا
داير تنسينا صحن اللقيمات المدوعل
وتبقينا فى الغصن ذو الشوك الرحيم
ونتمناها غابة
ويا دوبك فهمت وردى
لما قال من الدوش :- بتطلعى انتى من غابات ومن وديان
الناس دى متفقة
على الغصن
رغم انو الغصن بيخربش
بس بى وصفك
ووصف خيرى
النتخربش ساى
ان شاء الله تخلى ريشنا كوم
وما احلى دعواتك
ولكنها اخذت مسارا واحدا
يعنى يا شيخ ابوبكر سرك باتع لشخص واحد
دعوتك دى كان كبرتها شويه هسع كان نكون جوة الصاج
قصدى جوة الجك
ونكون اتجرتقنا
وسرنا على الجماعة
ومعانا الحُلالة
ونضبحها
ونتطفرها
وبقول ليكم فى اللحظة ديك مع السلامة
ونردها ليكم فى الافراح
اها مع السلامة يا ابوبكر اخوى انا سرت خلاص:d:d:d
العاقب مصباح
22-09-2009, 10:51 PM
العاقب ودالمصباح
كل سنه وانت طيب
وربنا يحقق ليك كل الامانى المستعجلة والمؤجلة
ياخى والله الزلابيه واللقيمات دى انا كاسره مسمار عشقها جوه قلبى
حتى اسأل دعوب ؟؟؟؟؟؟
وزى ماقلت أجمل حاجه انك تقوم يوم العيد الصباح وتلقى ليك شاى لبن مقنن ومعاهو (عضه) صحن زلابيه كارب وبعده سفه مدنكله من كيس العيد المختوت فى التلاجه من امس
كل سنه وانت طيب
وربنا يجعل ايامنا كلها اعياد
جميل هذا العيد
ان اتى بصاحبى عبد المنعم
كل عام وانت بخير عبد المنعم اخوى
والله افتقدنا طلتك المميزة
ومنتظرين من جديد الهايس
ويومياتك
اوعدنا بيها
وليك على صحن لقيمات مدنكل
من السوق المركزى
وجنبه لبن مقنن قنانتو ضاربة السماء
وبوخو يلوى
وفى كباية شب
مسروفة تف
ياخى العشاء لمن يكون لقيمات ليك مرات ما تشبع
تاكل ساى
لكن بس بتحس بى روحك فترت وتعبت من العض والعضيض
وربنا يجعل ليك فى كل خطوة ست لقيمات
ست اللقيمات زمان
بتصحى من الصباح
بتشيل صحنك وتمشى عليها
وكان ما لقيت ليك صحن بتشيل ليك غتا حلة وتجرى
كان ما لقيتها ما بتشرب الشاى
بتعمل فيها حردان
زمن الجامعة كان الحساب بتاع اللقيمات بيطلع اخر الشهر خمسين الف
وعديت لى زمن بدرس فى مدرسة
كان معاى استاذى
نشيل ونرمى ساى
لمن عملنا لينا جضيمات
كل عام وانت بخير
وصحة وسعادة
كل المودة
ونورت من جديدك
وبركة فى العضة الجابتك راجع لينا :d:d:d
Powered by vBulletin® Version 4.2.5 Copyright © 2025 vBulletin Solutions, Inc. All rights reserved, TranZ by Almuhajir