عباس الدسيس
29-09-2009, 03:15 AM
نعيش في زمن واقعي وممل نحاول نتحاشي الملل والتعايش معه بدون كأبة ونعيش في دنيا الخيال والاوهام ان كانت الاماني لا تتحقق برغم عن بساطتها... الحي الذي نسكن به جوار موردة الحطب كنا نتسكع في اوقات فراقنا بالمورده فكان من يدهشة منظر صانعي المراكب أو عمال قطع الحطب بالطريقة التقليدية واحد فوق طالع والتاني بالمنشار تحت اما عني فكنت اقف بالقرب من سائقي الشاحنات (( القندراني)) وكانت امنيتي لما اكبر ان اكون سائق قندراني مما يعجبني فيهم عند حضور احدهم للمورده ليفرغ الشحنه بعد نزوله من كبينة القيادة وهو يلبس تي شيرت كت (( فانيله يديها قصار)) يجد الكمساري واقف امامه لتلبية طلباته فيقوم بازال العنقريب تحت ضل القندراني ويبدأ في عمل الحله بتاعت الاكل وفي هذا الاثناء تسمع جلالات الشياله وهم يقومون بتنزيل الحطب ...... هيلا هيلا الكمساري الطيره ..... السواق نايم والكمساري حائم .. فكانت تعجبني هذه الجلات التي تمجد السواق واكثر سائق اعجبته به اسمه حريقه لدرجة حاليا اقلده في سواقة السيارة عند ما اكون في الطريق اعمل ابنصات (( اضغط علي البنزين)) لاستمتع بصوت ... ديييييييين .. دييييين ...دييييين اما عن اسم حريقه من اين اتي لا ادري بل ان هنالك احد اقراننا بالحي سمي حريقه علي هذا السائق وكنت احسده وكان يكتب خلف القنداني... عاهدتني انك تكون مخلص لحبي .... اعتقد يقصد القندراني لا الحبيب ومن ذلك الزمن بدأت تنمو هواية قرأة الجمل التي تكتب علي السيارات مثل واحد اكتب ليك في الليلة ويرسم ديك وان كانت هنا في الخليج تختلف حسب الثقافة والبئة فنجد هنا .... الحلوة لما تتدلع تخلي الاسفلت يولع ...... عدي واجري على اخرك وعند كمين الرادار هاقابلك...... بالتقسيط يا عبيط ... ومما ادخل في نفسي الاحباط ان كان هنالك في سوق مدني الكبير احد بائعي الاحذية (( السفنجات)) وهم عادة يقومون بفرش بضاعتهم علي الاسفلت بشارع يسمي اتجاه واحد كان يلقب بحريقه لقد استكثرت عليه اللقب وكنت اتسائل ما علاقة حريقه هذا بحريقه صاحبي سواق القندراني فعلمت ان هذا حريقه لقب بذلك نتيجة لقيامه ببيع سفنجات لحاجة كبيرة في السن وهذه الحاجة بعد ذهابها للمنزل وجدت الفردتين شمال حضرت له لاسترجاعها او استبدالها فرفضت .... قامت الشكله جاء عسكري بتاع مطافي (( قبل الشرطة الموحده)) تتدخل في الموضوع الزم البائع باستبدال السفنجات او استرجاع القروش فتم استبدال السفنجات الحاجة اتبسطت من العسكري ماشه وراهو وتقول .... كدي كدي حكومه .... كدي كدي حكومه.... كدي كدي حكومه والناس متلمه في بتاع السفنجات جاء اخو ليهو كان ما حاضر الاشكال بعد عرف المشكله قال ليهو هوي يا العره ليه رجعتا ليها تغشك بي عسكري المويه اخونا جري وراء الحاجة ختف السفنجات من يدها قال ليها ... كدي كدي.... كلب اكد راسك انتي قايله بتغشيني بي عسكري الحريقه ده.