المساعد الشخصي الرقمي

مشاهدة النسخة كاملة : .... من الشباك


abulwafa
04-10-2009, 07:31 AM
للوهلة الثالثة ربما يعتقد البعض أن العنوان يخص إحدى روائع المبدع محمد الأمين .. أو شىء قريب من ذاك ..
وربما للوهلة الثانية يعتقد أحد أو آحاد آخرون يعتقدون أن الكلمة هى شباك 0جمع شبكة) يعنى ما شباك بتاع بيت ولى حاجه ..
أما الوهلة الأولى والتى هى ما أقصد أنه وبعد تسجيلى المتأخر جدا جدا فى منتديات ودمدنى والتى تمثل الوجهة الأولى والأخيرة كمحطة لايتثاءب بنا بعدها طريق ..
دخلت فى تخف وبديت (أتاوق) وقلت بعد حوامة أكتر من عشر سنوات فى ممرات الشبكة العنكبوتية ومعظم المنتديات التى كانت وبعضها ما يزال صامدا .. قلت كدى النتاوق يمكن ألقى لى زولا بعرفوا من ناسا مابحبوا تغيير أسماءهم حتى (المستعارة) قمت لقيت لى درديرى كباشى وشوية ود السنى وبعدين عموشين وآخرين ..
دخلت وبقيت أتلفت وأظننى أكتفيت بما وجدت لمايسمح لى بطول البقاء
عبدالله محمد العقاد
04-10-2009, 08:18 AM
الحبيب ابووفاء

حياك الله والدار دارك و نتمنى لك طيب البقاء بين أهلك واصدقاءك
العاقب مصباح
04-10-2009, 11:49 AM
يا معاين من الشباك

يا احلى زول شفناك


مرحب بيك وحبابك الف

نورت منتديات ود مدنى
ابوخالد
04-10-2009, 12:16 PM
تعال بى شباكك ... وكان عندك خمسة جيبهم معاك ....

النفوس طيبة ... والقلوب صافية ....

وأقعد بالعافية ...

أخوك درديرى ... مشغول شوية اليومين ديل ...

فروقات نوم وكده ...

وأخونا ود السنى مشغول بيعد ويحسب فى الخرفان ...

وجهز زريبته .... إلا بجيك ...

وأنحنا كان المكان ما شالك بنشيلك فوق رموش العين ...



أخونا أبو الوفاء ...
moh_alnour
04-10-2009, 04:00 PM
أخي أبو الوفا
تشرفنا بأنضمامك لنا و نتمنى أن تطيب لك الإقامة بيننا لتفيد و تستفيد
كما نتمنى أن نارك حضور دائم بالمنتدى لتُعطر صفحاته بطيب مشاركاتك
تفضل فالدار دارك و يقيني أنك ستجد أخوة أعزاء على قدر كبير من جمال الخصال و المواقف
سؤال برا المقرر و أختياري كمان ( يعني لو ما عايز تجاوب ما تجاوب ) أنت أبو الوفا عازف الأورغ المعروف أم تشابه أسماء ؟
abulwafa
07-10-2009, 11:27 PM
سؤال برا المقرر و أختياري كمان ( يعني لو ما عايز تجاوب ما تجاوب ) أنت أبو الوفا عازف الأورغ المعروف أم تشابه أسماء ؟

سلاما جميلا
وشكرا كتيرن لكل الواقفين على بوابات الدخول
وبديت بود النور (من الآخر يعنى) بتاع الأورغ .. أطول بقليل وأنا أقصر بكثيييير .. ولو جابتك عصريات على محظة حجر حتلقى (عادل تاج السر) ممسكا بريشة الفنان وأنا أصدح إيقاعا على طبل مهووس .. تحية ليك ياغالى ..

ثم العقاد .. وود مصباح وكلكم مصابيح إذ تعثرت بنا مطايا الوصول

وللعزيز أبو خالد (عملت لى فيها زى الألفا) ألفا بتاع الفصل يعنى وماشاء الله عليك فى الحضور والغياب تسجيلا وابتدارا .. ودرديرى بعد مايصحى خليه تانى ينوم .. وود السنى الزريبة دى لخروف درديرى ولى عشان الضحية قربت والزريبة القديمة سيعاد فتحها لأن الكريبة بعيده شوية على ناس محمد النور

كنت أمنى النفس بأن أثرى المساحات .. لكنها المشاغيل يبعدنا كثيرا عن أحبة وقوم عزاز وحتما إن سمحت أيامنا سنستميح الأعزاء عبد الحليم سر الختم وبابكر صديق عذرا أن نسرق عنوان أبرز إبداعاتهم لنكتب به وفيه وعنه هنا .. ولعل البعض مازال يذكر ذلك البرنامج الرائع (فى محراب الآداب والفنون) وإن عجزت عن ذلك سأسلك طريق العابرين بالسكة حديد أو شارع النيل وأشرع بعدها فى استجداء ماكان مؤتلفا من حروف الوصل فلعل الأشواق تبقينا بساحات المنتدى زمانا وريفا
شكرا سادتى ..