ذكريات الأحمر وبنات الكورة ( ما تنططوا عيونكم ده ما المريخ )

[بنت الرفاعي]

زمان لما كنت في الإعدادية ( المتوسطة ) يعني في سنة ثامنة ، كان 3/4 الفصل بشجعوا فريق الريان وكان مقابله فريق إسمو السد ، كانوا زي المريخ والهلال كدة ، طبعا زي ماعارفين المريخ أحمر ده برضو أحمر لكن بأسود ، وكان البنات في كل البلد زي الأولاد أغلب همهم الكورة ، كرهونا المدرسة وفي البيت الجماعة كلهم تامين الباقي ، وطبعا موقعي من الإعراب أكيد لازم يكون عندي إنتماء للريان لأني ريّانية وكدة ( ما ريّانية أختي ) ;) ، ياخي البنات ديل اللي بشوفهم ويسمعهم بيتكلموا عن الكورة يحلف يقول بيمشن الاستاد كل يوم ، والعجب لو في مباريات ، الواحد بالله لو بيكره الكورة قدامو واحد من حلين إما يغيب وإما يحبها غصب !!
والغريبة بالرغم من إني كنت بشجع الريان لكن ماكنت بحب أتفرج على مبارياته ولا بعرف اللعيبة كدة ( زي ما أنا مابعرف أفرق بين لعيبة الهلال ولا المريخ لأنو كلهم مافارقين كتير لأنو .........! :( ولا أقول ليكم مافي داعي للمشاكل) ،
المهم والبنات كل يوم يجو يفلقوني فلقة اللاعب داك عمل كدة وداك كدة ، حفظوني الأسامي بدون ما أعرف شكل اللاعب ، مع إني عارفة أشكالهم لكن ماعارفة أساميهم ، أها بقيت زي الأعمى حافظ إسم وماعارف شكل ، ومن ناحية تانية ، زي الأطرش ( زمان لما كان الأطرش أطرش ) عارفة أشكال من دون أسامي مع إنو مرات بيحاولوا يوروني بالصور ده منو وده منو ( مع إني ماعارفة يعني حأستفيد شنو من ده ) ماقلت ليكم : بيجيبوا الجريدة الرياضية المدرسة علشان يتدارسوا أمر المباراة واللعيبة !:p
عارفين بنات فصلي ديل من شدة ما جنّوا بالكورة وفريق الريان ، كان عندنا مسابقة أجمل فصل ، طبعا زي ماعارفين لازم ترتيب وتلوين وتجليد طاولات ، وخليكم منتبهين إنو الفريق بالأحمر والأسود ، شوفوا البنات عملوا شنو :
أول شيء لما تجي داخل الفصل مابتفهم حاجة ، بالله الفصل كلو أحمر بأسود ، ( كانت عاجباني الفكرة لأنو فيها تغيير وإبداع )
الطاولات نصها أحمر ونصها أسود ( الطاولة الواحدة يعني نصها أحمر والتاني أسود ) ، البوردات على طول الفصل أسود بأحمر،( والله كانوا ناويين يصبغوا الفصل أحمر بأسود:p ، مامتذكرة صبغوا بي شنو ) ، الفصل كان حديث المدرسة وزي المعرض أي أستاذة وطالبة عايزة تشوفوا ( بيقولوا أحمر ممكن لكن أسود ؟!) ، ومايفوتكم طلبوا من أمي إلا تعمل ليهم ورود بالأحمر والأسود :p:p وفي واحدة بتشجع السد زي أخونا هيثم قالت عايزة وردة أسود بأبيض ( بالله في وردة بالأسود :eek::p ) ، والغريبة في المدرسة بنلعب كرة سلة وقدم وطائرة ويد ، إشمعنى ما بنلعب كرة قدم ؟! (مع إني كنت بلعبها مع أولاد خالتي لما كنت صغيرة ) ، ياحليل زمان .
بالمناسبة برضو مابحب أحضر كورة في السودان إلا تكون بين الهلال والمريخ فقط ، (لكن مرات بحضر الكورة إجباري لكل الفرق العربية والأجنبية ، زمان كان أبوي بنحضر معاهو ، لكن في السنوات الأخيرة مرات دبُل ياسر بيحضروني معاهم نظام مجاملة وكدة ).

ياترى الزمن ده البنات لسّة بيشجعن زي زمان ؟!

[مرتضى التوم]

أكيد الكلام ده كان زمن الريان ريان بس اسى والله الرجال خلو الريان حتى انا رحلت منو وجيت السد وبقيت سدااااااااااااااااااااااااااوى

[بنت الرفاعي]

أكيد الكلام ده كان زمن الريان ريان بس اسى والله الرجال خلو الريان حتى انا رحلت منو وجيت السد وبقيت سدااااااااااااااااااااااااااوى


آي والله كان زمان ، وأسي ماعارفة الحصل شنو في الكورة ، لكن في شهر 6 الفات لقيت عمي بيتفرج في بطولة قطرية ولا كأس ماعارفة ، المهم إتفاجأت بأنو الفرق اللي زمان كانت صغيرة بقت كبيرة ماشاءالله ، وكمان تتعادل وتهزم مع اللي كانت زمان ما بتقدر تجيب فيها ولو واحد !!!
بقيت سداوي؟؟ يعني السد لسة محافظ على مستواهو؟؟!!

[هيثم عبدالعال]

أنا لفيت في الإنديه وبعدين ركيت في السد الزعيم
أول ما جيت الدوحه إنجذبت للريان لأنو كان فريق ليهو هيبه ولاعبينه ملانين حماس ( بس كان عنده عقده إسمها الأهلي ) وكمان لأني جيت في نهاية الدوري

بعدها ولفتره كان يعجبني الإتحاد (الغرافه الآن) لأنو كان فريق شاب وطموح وكمان في الأول لأنو كان بلعب فيهو اللاعب أحمد بهجه المغربي وكنت معجب بيهو جداً .

أما الزعيم فهو الزعيم واللون بذكرني سيد الأتيام عشقي

فصل أحمر بأسود ؟ لو كنت المدير كان عاقبتكم

[بنت الرفاعي]

أنا لفيت في الإنديه وبعدين ركيت في السد الزعيم
أول ما جيت الدوحه إنجذبت للريان لأنو كان فريق ليهو هيبه ولاعبينه ملانين حماس ( بس كان عنده عقده إسمها الأهلي ) وكمان لأني جيت في نهاية الدوري

بعدها ولفتره كان يعجبني الإتحاد (الغرافه الآن) لأنو كان فريق شاب وطموح وكمان في الأول لأنو كان بلعب فيهو اللاعب أحمد بهجه المغربي وكنت معجب بيهو جداً .

أما الزعيم فهو الزعيم واللون بذكرني سيد الأتيام عشقي

فصل أحمر بأسود ؟ لو كنت المدير كان عاقبتكم

ماشاءالله لفيت لف شديد :p
حلوة ركّيت دي , والرهيب معقولة للدرجة دي إنحدر للهاوية ؟؟:confused:


المديرة تقدر تعمل شيء ؟!! والله كنت في فصل أنسى بس, ياخي ناس الوزارة كان عندهم تقييم إسبوع في مدرستنا المديرة إشتكت فصلنا ليهم , لما جو علشان يفهموا الحاصل مننا , هم ذاتهم عملوا نايمين ( ناس الوزارة ) , عارف اللي خلّى فصلنا مميز شنو ؟؟ ( بمعنى إنو ما قادرين يسألونا , ومرّات كدة بيتغاضوا عن الفصل ؟ وبيحبونا والله) إنو فصلنا كان الأفضل دائما في كل شيء ( بإستثناء الهدوء ) , يعني الشاطرين وأوائل المدرسة بتلقاهو فيهو , والمبدعين والمتميزين فيهو , والساخرين والمرحين برضو فيهو , يعني صف متحرك من جميع النواحي علشان كدة كان محبوب من قبل المدرسات , وتقول لي تعاقبنا ؟!!!;):rolleyes::p:p:p:p:p

[مرتضى التوم]

والله انا اصلا ما عندى انتماء حقيقى لنادى معين هنا بس صراحة بميل للسد جدا لانه فريق محترم وكبير بس اوع تكونى ريانية لسة

[بنت الرفاعي]

والله انا اصلا ما عندى انتماء حقيقى لنادى معين هنا بس صراحة بميل للسد جدا لانه فريق محترم وكبير بس اوع تكونى ريانية لسة

وييين أكون ريّانية لسة ؟؟
كان زمان قبل ما أفارق البلد دي , وأبقى بجيها ضيفة وأمشي , و تنسيني أمور الحياة الكورة , و حاليا ماعارفة أي شيء عن الفرق دي , لكن يبدو لي لو حصلت مباراة بين السد والريان , حتى ولو بقى الطيش حأتمنى هو يفوز ( الريّان ) :rolleyes:;)

[الحمزاوي]

ايام المتوسط والثانوي كان ارتباطي الكروي محدود وهو تشجيعي للاحمر الوهاج وثقافتي الكروية ذلك الزمان قليلة جدا وفي احد الايام وانا في السوق وتحديد موقف العام (مدني)راكب حافلة وكانت في بنتين خارج الحافلة بتكلموا عن الدوري الممتاز والسنتر لييغ والفرق الهبطت للدرجة التانية والله انا خجلته من روحي عديل كدة يعني البنات في الكورة احسن مني وكنت مستغرب جدا ذلك الوقت .فما في استغراب بالنسبة لي من تشجيع البنات

[العاقب مصباح]

مرام الريانية
اخوك والحمد لله لسه ما شجع ليهو فريق غير الهلال
وخاصة الدورى القطرى دا بشوفه مسيخ مسيخ عشان ما فيهو جمهور بيحب الكورة
لكن طبيعى الواحد بينجذب لللون الابيض ريال مدريد ..الزمالك .... بشويه حب عند الفوز وشويه حزن عند الهزيمة..
والله زمان فى السودان كان الهلال اتغلب بتلقينا فى البيت ساكتين ساى وقاعدين كل واحد مدى وشو للحيطة .... عشان ناس البيت اغلبهم هلالاب....
والعشاء دا فى وقت الهزيمة مافى نهائى ولا ما ليهو اى طعم ....

[بنت الرفاعي]

ايام المتوسط والثانوي كان ارتباطي الكروي محدود وهو تشجيعي للاحمر الوهاج وثقافتي الكروية ذلك الزمان قليلة جدا وفي احد الايام وانا في السوق وتحديد موقف العام (مدني)راكب حافلة وكانت في بنتين خارج الحافلة بتكلموا عن الدوري الممتاز والسنتر لييغ والفرق الهبطت للدرجة التانية والله انا خجلته من روحي عديل كدة يعني البنات في الكورة احسن مني وكنت مستغرب جدا ذلك الوقت .فما في استغراب بالنسبة لي من تشجيع البنات


الكرة ليست واجب على إنو كل الرجال يعرفوها , لأن لكل شخص ميول , و ما لأنها مشهورة للرجال ده معناه لازم تستهويك , فأنا مثلا ماكل هوايات البنات , وبعض الأشياء التي تستهوي الفتيات تستهويني .
شكراً لك أخي الحمزاوي على مشاركتك لنا :)

[بنت الرفاعي]

مرام الريانية

اخوك والحمد لله لسه ما شجع ليهو فريق غير الهلال
وخاصة الدورى القطرى دا بشوفه مسيخ مسيخ عشان ما فيهو جمهور بيحب الكورة
ده كلو وماعندو جمهور؟؟!:eek:

لكن طبيعى الواحد بينجذب لللون الابيض ريال مدريد ..الزمالك .... بشويه حب عند الفوز وشويه حزن عند الهزيمة..
والله زمان فى السودان كان الهلال اتغلب بتلقينا فى البيت ساكتين ساى وقاعدين كل واحد مدى وشو للحيطة .... عشان ناس البيت اغلبهم هلالاب....
والعشاء دا فى وقت الهزيمة مافى نهائى ولا ما ليهو اى طعم ....



زمان زمن كنت صغيرة كنّا بنشجع البرازيل , تاني كبرنا ونسينا الكورة .
و حاليا ماعارفاهم إذا كلهم متفقين على الريان ولا في إنفصال !!!

بالمناسبة إنت لما يكون في دوري مابتطلع الشارع , وتشوف الإحتفالات والجوطة اللي بيعملوها مشجعو الفريق الفائز ؟؟!!:confused:

[مرتضى التوم]

ليه يامرام انتى رجعتى السودان يعنى ولا مشيتى دولة تانية ؟؟
عموما زى ما قال اخوى العاقب الهلال اولاً وثانياً وثالثاً بعد كده طبعا الريال الملكى بس هنا فى قطر بجد بميل للسد الزعيم لانى فى السودان بشجع الزعيم

[بنت الرفاعي]

ليه يامرام انتى رجعتى السودان يعنى ولا مشيتى دولة تانية ؟؟
البلد دي بقيت أجيها في السنة مرّة , وبالكثير 3 أسابيع , وبجي زي الغرباء مابعرف الحاصل وأرجع طوالي , علشان كدة بقت خبرتي في البلد دي زي خبرتي في أمريكا ;) , مامعروف المرّة دي كيف ؟؟ غايتو الله يهون .
عموما زى ما قال اخوى العاقب الهلال اولاً وثانياً وثالثاً بعد كده طبعا الريال الملكى بس هنا فى قطر بجد بميل للسد الزعيم لانى فى السودان بشجع الزعيم

يعني بتشجع الزعيم القطري علشان تشابه أسماء وكدة , أو علشان اللعب حقو؟؟:rolleyes::confused:

[مرتضى التوم]

عشان زعيم ونحن ما بنشجع الا الزعيم

[بنت الرفاعي]

عشان زعيم ونحن ما بنشجع الا الزعيم

الحمدلله إنو لسة باقي زعيم .
طيب الريان مستواه إنحدر لييه ؟؟!!!!