المساعد الشخصي الرقمي

مشاهدة النسخة كاملة : الحــبيبة الأيقظــــت نبـــــض الحــــروف ,,,


ود الضو
17-10-2009, 11:08 PM
ياخي الهادي حامــــــــــــد ( ود الجبل ) دا جميل كيف ؟
والله ماتقدر تخيل زاتو قدر شنو ؟
البوست دا لغناء الهادي الجبل
ومعاه زولا جميل رحل لكنه موجود في ( شجنا )
وفي كل الدروب الخضراء ( عثمان حسين )
مشاققات في دروب الحبيبة البتفتح الروح ضلفتين ...
ود الضو
17-10-2009, 11:25 PM
بفرح بيها
البنيه الهاجده في احضان خواطري ..البشتهيها
بفرح بيها ..
البنيه اللامست ايد السعاده .. وضجّت الاشواق عليها
الحبيبه .. الايقظت
نبض الحروف .. في قلوب صدر الكلام
القريبه .. الزّيي لي
في عيونها برتاح الهيام
دي الشوقها نص الليل بصحي
غامض الغمضه وجليها
وبفرح بيها
ليها بتحن القوافي ... فيها تندس المرافي
الجمال الشايفو فيها
في رحاب دنيتنا مافي
جايه من فوق البنيه
ولامست إيد السعاده .. وضجت الأشواق عليها
بفرح بيها .. بفرح بيها
...
بعد ماتقرأ الكلام الفوق دا ,, دايرك تتلفـّح دا :
بعدك أماني هواي ياما جنيت علي
ولاعرفت صديق لي قلبي غير الهــم
كم غيري يشدو سعيد وانا بي هــواك مغــرم
ما اظني يوم انساك ومن العذاب اسلم
وتبقي النهاية وئـــام ...
....
بعد ماتتلفح دا ( صححني ) لو في كلمة غلـــط
لان الكلام دا سمــح وجميل ...
ود الضو
17-10-2009, 11:38 PM
نأخد لينا شوية وقفـــة هنا :
البنيه الهاجده في احضان خواطري ..البشتهيها
بفرح بيها ..
البنيه اللامست ايد السعاده .. وضجّت الاشواق عليها
الحبيبه .. الايقظت
نبض الحروف .. في قلوب صدر الكلام
القريبه .. الزّيي لي
في عيونها برتاح الهيام
...
الشاعر دا قطــع شك متيّم لامن تتيمو مدفق وقام خـتّ قدامو
الـ 28 حرف بتاعة العربي وقعد يعزِل فيها ويلصق دا مع دا بعناية
تفوق الفائقة بخيال صافي بعيد عن ضجيج النفس المليانة ريد للحبيبة
البتغزل في الخيوطـ بالوانها الخاصة عشان تكوِن منديل عربون للحبيب ,,
كل ما اقول الشاعر دا خيالو واسع الاقي واحد تاني اوسع خيالاً
حيرتونا بالواضح كدا ...
ود الضو
17-10-2009, 11:39 PM
امسك عندك وقول تلاتة وشوف محمد يوسف موسي
كتب شنو هنا في الدرب الاخضر :
تهيم خطواتي نشوانه تعانق دربك الاخضر
وحات اللوعة والاهات يامشوار ماتقصر
.. الهيام بي نشوة ,, والمعانقة ,,( مكتملة ) ومادايرة اي زيادة
علي ما اظن , وحات اللوعة والاهات دي لو ما اخاف الكضب زي
(الخصّمتك ) بي كذا وكذا ( بان ) تقصر , وهو قاليك اللوعة والاهات
دي ساهلة ( من اللوعة والاهة ) ماهو قاتل .. نواصل
علي دربك زرعت الحب جمال وكمال رياض وزهور
غزلت صبابة العشاق اغاني كتير صباح وعطور
وشلت اللهفة والاشواق رياض وسلام منابع نور
مواكب روعة وابداعات ملاها خيال وصاغها شعور ...
.. هسي الواحد يتكلم عن شنو ويقول شنو وسط كوم الجمال
المرسوم هنا دا ؟ زراعة الحب , جمال وكمال رياض وزهور ,
اكتمال للمعني بشكله الصحيح , وانتقاء اروع الكلمات لذاك
المسمي الرهيب العجيب ( الحب ) ,, غزلت صبابة العشاق ,
وجع عديل , مواكب الروعة , ملاها خيال وصاغها شعور ,
ياخي والله مليتها خيال لامن الخيال زاتو اظن فتر من خيالكم الجميل دا ...
ختم الكلام دا بي شنو :
فيض ياشوقي ماترتاح ياريت افضل دوام سائر
معاك فرهد شباب الحب ,,
فيضان الشوق دا دلالة الكمية المغموسة جوة الجوة بوفرة تامة
حتي يصل الي درجة الفيضان ,,
وتعال شوف الكلام دا كله لما عثمان حسين يقوم يلبِسو توب بتاع
لحن من الحانو الخاصة ديك , والموسيقي المكبوبة جوة البتاعة دي ,,
والله امتاع حد الدهشة بجد ....
ود الضو
17-10-2009, 11:41 PM
القريبه .. الزّيي لي
في عيونها برتاح الهيام
دي الشوقها نص الليل بصحي
غامض الغمضه وجليها
...
اها شفت عشان برضو تمسك عندك وتقول اربعة :
وتحاول تنتحل شخصية الشاعر دا وتخت حبيبتك قدام عينيك
في الخيال طبعا وتقول ( الزّيي لي ) مرتين في سرك وشوف
النتيجة شنو ؟ ماهو الزول البكتب كلام زي دا انا ماعندي ليه وصف
غير انه وصل مرحلة ( بعد اللاوعي ) يعني اتعدي الطبيعية ومرحلة
اللاوعي ووصل الي بعد اللاوعي ( القريبة الزّيي لي ) ,
يعني دا امتزاج ولا اختلاط ولادمج ولاشنو ؟ احسن الدوش
قدّر لينا المسافة حين قال ( قدر المسافة البين عيوني وبين سعاد )
حتي ولو مافي شيئ لكن في مسافة برضو ان شاء الله قدر الحتة
البتكون ( للرمشة ) لكن هنا صاحبنا دا قال لا ولارقراق مافي ( زيي لي ) ..
ومربط الحصان وين من الكلام التاني :
( دي الشوقها نص الليل بصحِي ) , وانت عارف شنو يعني تصحي
نص الليل بفعل ( شوق ) وما اي شوق دا بتاع البنية
المتملكة الواحد كيف ارادت هي ,, لو مصاب بالحاجة دي انصحك
ان تتعود النوم ( نهاراً ) وتترك الليل معاشا ,, حتي لايجرفك شوق
وويتقد بك الحنين وتاني 7 من سنة تامنة مابقدروا يمسكوك .....
ود الضو
17-10-2009, 11:45 PM
وبرضو عشان عينيك وعشان اخليك تلف هنا قبلك داير
اعرِج بيك لي حسين بازرعة وشعره وكلامه وفنه ودنه وجماله ,,
ولو قلنا ان حسين بازرعة هو أشعر شعراء ( الشجن ) بالمقابل
نجد ان عثمان حسين أفنن فنان لكل الكلام الجميل المرتب الموزون ,,
( افنن ) دي صاح ولا ماصاح ؟ المهم جدعتها ,
وتعال نخش بيك في ( شجــــن ) عشان الناقصة عندك تكمل :
ونجي لحتة انو الواحد يكلم قلبه بهدوء ايوة بهدوء تام :
احسن تخليه لليالي وللزمن
يمكن يحس ضميرو ويهديه للصواب
دا طبعا بعد ماقال ليه في البداية :
ياقلبي لو كانت محبتو بالتمن
يكفيك هدرت عمر حرقت عليه شباب
لكن هواهـ اكبر وماكان لي تمن ( والحسرة ) مابتنفع
الكلام دا لي هنا عادي وطبيعي جداً لكن تاني بازرعة قال
دا شنو ياخ الواحد هنا اقل نسية لجملة او عبارة بتودي
المقصود دا في مية داهية :
لكني اخشي عليهو من غدر الليالي
اخشي الاماني تشيب وعشنا يبقي خالي
المربط وين هنا ؟ في غدر الليالي
والاماني البتشيب ,, غدر الليالي معروف لكن الفيهو اللولوة
شنو هو ( اخشي الاماني تشيب ) شفت الخيال وصل لي وين ؟
يعني لو مسكت ( الرأس بيشتعل شيب ) طبيعي طبعاً , لكن
الاماني دي بتشيب متين يعني ؟ لما تكبر وتصل مرحلة ظهور
الشيب ؟ ام ان التُقُلْ من الزول المذكور دا بسبب الشيب ؟
ولا الحب زاتو بعمل الشيب ؟ لكن المعني هو اقرب الي شيبان
الاماني بداعي الكبر في العمر حين رجع وقال :
هو لسة في نضارة حسنه في عمر الدوالي
لسة ( الهوي ) دا يافع في ريعان ومهد الصبا ...
والحاجة الكانت في الزمن الجميل داك وهسة انعدمت
رغم كل شيئ الواحد من اهل الفن في ذاك الزمن الطاعم
يختم بي كلام السماح , والعفو , والدعوة الطيبة , رغم ( الطّقّـــة ) :
اغفرلو ياحنين ياحنين وجاوز من ظلم
ما اصلها الايام مظالم والعمر غمضة ثواني
( عاين كويس للحكمة الهنا دي )
واصبر علي جرحك وان طال الالم
بي جراحنا بي اشواقنا بنضوي الزمان
انا عارفو بكرة بيعود في رعشة ندم
ننسي الحصل بيناتنا والسهر اللكان
( بيطمِن في نفسو صاحبنا )
تصبح حياتنا نغم عشنا يبتسم
وتعود مراكب ريدنا
لي بــــر الامـــان ..
والمعني واضــــح جداً ,,,