حنين لود مدني

[سماحة]

صباح الخير أحبائي
في هذه اللحظات اجتاحني شعور ( لا اعرف ازعجني ام ريحني)وهو حنين غريب لودمدني !! فجلت بخاطري في الجامعة والبنشات و شارع النيل ودار الأطباء ونادي الجزيرة والسوق الشعبي وكل الاماكن التي كنا نراودها ... وسرحت بخاطري كثيراً الا ان نادتني احدي الطالبات يا استاذة .. وددت ان لا ارجع من هناك؟؟؟؟ وددت لو كنت هناك !!
حنين فى خواطرنا
حنين لم يزل طفلاً
برغم تعاقب الايام يرضع من أمانينا
إنه حنين يجعلنا نعود بشريط ذكرياتنا إلى الماضي الذى نتمنا دائماً أن يعود0

[ابوالنور]

حنيني ليك وليل الغربة اضناني وطيف ذكراك بدمع القلب بكاااني
واقول يا ريت نعود تاني من تاني
سماحة ربنا يرد غربتك
يا بت مدني دي اصلا كده تديها ضهرك يوم واحد تفقدها

[nehroo]

والله يا سماحة عندما أحضر للسودان في الإجازة
من المطار لشارع مدني لا أتفاوض مع المستقبلين
رغم الدعوات ياخ ما .......
وأنا في الطريق وبعد خروجي من منطقة سوبا
حقيقة أكون في موقف آخر ...
وإن شاء الله مافي زول يشوفني .

[المسافر]

والله يا سماحة أنا مشتاق ( للأقشى )
في السوق الجديد بطريقة غريبة

[سماحة]

أخي المسافر ما تزيد أشواقي أنا عاوزاكم تخففو عني وبمناسبة الاقاشي كنت بركب مخصوص وبمشي الدباغة او الجامعة عشان أجيب اقاشي وباكلو يوم او يومين ( كل الوجبات).

[سماحة]

أخي ابو النور شكرا لك ودعواتكم لنا أن يرد الله غربتنا سالمين تامين

[سماحة]

الاخ nehro رد الله غربتنا جميعا

[الزونية]

أختي سماحة

مدني دي حبيبتي تختلف عن كل الدنيا ..
وسنين تواجدي بالسودان قليلة...

محمد الأمين دوماً هو سيد إستماعي..وودمدني عشقي في كل ترحالي عبر المطارات والمواني..
أحكي قصة..
توفى والدي وانا خارج الوطن...
تعبت كثيرا حتى تمكنت من عمل إجراءاتي ..وكان سفري للعودة متضمناً كل سبل الترحال سفن وطائرات...وقطارات..وأخيرا طريق مدني الخرطوم...ببص سياحي
......وكنت لوحدي.. أحمل غربة روحي وغربة الآتي لدار ليس فيها أبي...

ولكن ماحدث لي عند مدخل ودمدني كان مدهشاً ..
والله أحسست أن مدني تحضن قلبي ..
وانا أنظر من شباك البص أحسست الدموع بللتني ودخلت في حالة من الهستيريا ..صرخت صرخت صرخت..
والتف حولي الجميع وهدأت ...وعلم الكل ماأنا بصدده وكثيرون شاطروني حزني...واوصلوني للبيت..
بالله عليك اي قوم نحن ولأي مدينة (أم ) ننتمي؟

[أبو جودي]

لكم الحب والود يا ناس مدني ،،، واطالع البوست اجد الجميع لديه نفس الأحاسيس ونفس الشعور ،،، بمجرد ما يلوح أريل التلفزيون ،،، ومدبغة الجزيرة ،،، نفسها هي الأحاسيس والمشاعر ،،،، سبحان الله ،،،
فهنيئاً لكم أهلها وناسها ،،، نسأله أن يرد كل من تغرب عنها ،،، إما سالماً لأرضه ،،، وإن انقضى الأجل ،،، أن تضمه في ترابها ،،، لكم التحية والود أخواني وأخواتي

[أشرف صلاح السعيد]

سلام اختى سماحة وكل أحباء مدنى ولتسمحو لى ان اشارككم بالحنين فى هذه النافذة الجميلة..

مدنى يا درة بلد
يا ندوة لامة ومنارة ضاوية
عتق الزمان بُعد الأمد..
حلقة ذكر ومسيد كبير
لالوب سبح جلاليب تدور
ومجدوب شرد..
مدنى يا السنى الجليل
رفض السحر وكل الفتن
يشهد عليو نهر الرهد..
يا خليط فريد
ضم القصيد وكل الضواد
بنسق جميل بيو إنفرد..
حويتى الجمال وسمح الخصال
إنتى الحنان صدر الأمان
للبعيد قبل الولد..
صغتى الحُسن لوحة أدب
نسيمك أريج نداه الشعر
بانِّك يميل ثملان يقين
ولمن يجف يخطو فيو صورة الصمد..
الأزرق يدندن مع الأصيل
ترقص مراكبو
والقبة ترقب فى طرب..
مدنى يا أبوى الفقير
لين الطباع
خُلق الكرام
سطوة أسد..
ياكى الملاذ
ياكى الجوار
والنصرة لكل الورد..
الجامع الكبير ياهو الدليل
نادى الجميع صحى الضمير
الكل زهد والكل حمد..
سقانا اليقين من زمن الأمين
فطام تقى فى كل كبد..
وواصل المسير محمد سعيد
إمام جليل ساد العُمد..
مدنى يا الحضن الكبير
يا يمة الحنون
مارضيتى ضيم
وقفتى للمحتل وتد
بالمؤتر شحذت الهمم
طلعت شرارة عمت ربوع
جابت ارجاء البلد
ياكى القيادة
ياكى الريادة
و ياكى الجلّد
ودفاك معانا من المهد حتى اللحد..
فى صدرك تتمازج عروق
حتى الغريب وعابر السبيل
جواك ما ينفرزو من ود البلد..

آآآآآآآآآآه يامدنى لما يتاورنا الحنين ليك..

[أشرف صلاح السعيد]

صدق النوايا يامدنى دفنتيو بالقلوب
واولادك وليدات رضا والكل بيك مجدوب
سبحن عطى واحسان ماهو باللالوب
حرم اكانى مامنك ابدل عشانك توب
************************



تسلم بطونن الجابت رجالا كيك
تربان محنة يا مدنى روحم ليك
لآلئ بجيدك عطاهم ما بيوفيك
أسود الخلا بيحمو العرين الفيك

[أشرف صلاح السعيد]

المشاركة الأصلية كتبت بواسطة محمد الجزولى

يا ود صلاح سمح النضم فى حضرة جلاله نذوب
ست المدن ...تاج الملوك .. سرجت لى جماله دروب
شوف عينى الدمعه من عينيها سال ينبوع ..
فرحانه تغزل للمحنه قلوب
ست الاسم -- مدنى الجمال ...بالعفه لابسه الثوب

ودالجزولى اخوى :

امحمد اخوى قالو كتير النضم معيوب
ان مازانو الفهم والعلم أكانلو التوب
او ماكان فى مدنى الآسرة فينا قلوب
ست المدائن جت البفوتا بصرخ ووب
************************
ود مدنى الجمال والدرة للاوطان
درارة فوارس كك ولّادة للنجبان
فيها البنية دهب بطبعن مابخمجان
و دمدنى أم الكل و الكل بيها أمان

[سيف الدين الامين]

الأحت ســـماحة
لا أشك أن الله تعالى قد فطـر قلــوب جميــع أهـل مــدني علي شيء واحد الا وهــو حب هذه المدينــة ولا اخفيك ســرا ان قلت لكي أنني أحب هــذه المدينــة أكثر من عيــوني فأنا أعيش بعيــدا عن محبوبتي ( مدني ) فزاد عشقي وهيــامي وتعلقي بهذه الحروف الثلاثة البسيطة في ظاهرها الكبيرة في محتواهاوحتي لا تغيب معشوقتي عن ناظري طرفة عين وضعت كلمة ( مدني ) الجمال كخلفية لجهاز اللاب توب الخاص بي و جهاز الكمبيوتر الخاص بالعمل وبالطبع هنالك الكثيرين من هم يهيمون بعشق هذه المدينة أكثر مني .
فهنيئاً لنـا بمدني وهنيئـاً لمدني بنــا ومزيداً من العشق الهيــــــــــــــام .

[moh_alnour]

http://file9.9q9q.net/local/thumbnail/94393398/600x600.jpg

مدني تتيه اليوم في سربالها كعروسة في أول الأعياد
مدني نواة الغد في سوداننا أهدت إلى البلاد خير أياد
هي قلبه الخفاق يدفع معنى الحياة لحاضر و باد
هي قبلة للوافدين و قلعة ضد الدخيل المستبد العاد

http://file9.9q9q.net/local/thumbnail/94393398/600x600.jpg

[محمود (أبو وضاح)]

كثيرون منا يتعلق شوقهم لرؤية برج تلفزيون الجزيرة وعندها فقط تهدأ النفس ويأتى عبق الذكريات لكل المراحل الدراسية والحياتية ، حتى الذين داخل السودان يتحلقون بهذا الاحساس ، مدنى الكمال كما قال المساح - عليه رحمة الله -.

[سماحة]

شكرا الاحبة الاعزاء على المرور
وجميل جداً ان تجد من يشاركك الاحساس
ومشكور أخي أشرف على روائعك

[سماحة]

مشكور أخي الزونية وربنا يخفف عنك الغربة و انشاء الله مدني تخفف عنك آلامك وتحتضنك وربنا يتقبل الوالد ويحسن اليه

[حنونة.]

عزيزتى سماحة لك كل الود والحب واتمنى ان نراك قريباً بيننا ونعزمك داك يا الاقاشى جنباً
واسمحوا لى ايها المحبين ان اشارككم لانى والله حاسة بيكم لانى لما اكون مسافرة وادخل مدنى بحس انى مشتاقة لكل حتة فيها لدرجة انى بحس انى دايرة اقرع الأبواب واسلم على كل زول فى مدنى لان حبها يجرى فى عروقنا

[سماحة]

شكرا حنونة على مرورك الكريم
وما تنسي تسلمي علي اي زول بلاقيك
وبرضو العزومة ما بننساها لما نجي حنوريك .. جهزي القرشات

[معتصم عيدروس]

مدينتنا انثى في خضابها وفي كامل زينتها .. يعجبني قول الشاعر محمد محيي الدين المدينة وهي تغتسل في النهر .. يحفها الازرق الدفاق .. يلفها الليل بسكونه .. وبألفة أهلها تنم المدينة مطمئنة ..
مدني أرتال من الجمال جمعت في مكان واحد عنوانها الألفة .. المحبة .. الرباط السري بين اهلها .. الوفاء والحنين عنوانهم فيما بينهم .. كالجسد الواحد اذا اشتكى منه عضو تداعى له باقي الجسد بالسهر والحمى ..
في كل حي قصص ونوادر عن التكاتف والترابط الاجتماعي اؤكد بانها غير موجودة في أي بقعة من بقاع السودان ..
يكفي في مدني ان لا تعرف ما هي قبيلة جارك .. ولن تهتم بهذا الأمر لأن الذي يجمعكم هو اسمها "ودمدني"
مؤكد ان دعوة صالحة من شيخنا مؤسسها محمد مدني السني ومن بقية شيوخها من سعدابي لي قنديل لي شاطوط للجعلي وغيرهم هي ما جعلت سكان المدينة يكنون لبعضهم البعض كل هذا الحب وكل هذه الصداقة.
-------
مساهمة بسيطة يا سماحة قد تزيد الشوق .. ولا تبله

[ود سعدابى]

سماحة
بدءا، هاك الإمتنان كله وبما حمل، ياتيك مناغزيرا وكثيرا، مثل موج يتلاطم على ضفاف النيل لكى يسقى جروف حنتوب كما بشارات الخصب، ووعد الإيراق

ومثله التقدير والشكر لى اشرف صلاح سعيد ، أن عطرت كلماتك الأرواح بسحرها الأبيض والأخضر، وطاب باريجها المعنى

ونيابة عن كل هذا الحشد الملون الجميل، لك إنحناءة وبداخلها المعزة تنحنى أيضا، عرفانا وود

ودمتى سماحه

[معاوية اسماعيل]

ما حا اقدر اقول ولا كلمة عن الشوق لي مدني

خليكم انتو البعاد

ياخي نحن الهنا في الخرطوم منجضين

ولما تجي بتفكر متين ترجع قبل ما تصل الخرطوم

وتحسب باقي ليك لكم يوم

وكم كباية شاي وكم وجبة

عشان ما ترجع مدني