شورى الشفع تحت الجميزة..

[أشرف صلاح السعيد]

كلما أراد محمد ..البلولة..ماجوك..آدمو..أوشيك..ساله "صالح"..وبعشوم اللعب أو التسامر يلتقون تحت ظل الجميزة المترامية الأطراف التى زرعت بعهد الأتراك ولكن بيد جناينى سودانى قبل ما يفوق المائة عام..الجميزة توسطت منازل أسر تلكم المجموعة من الأطفال بأعمارهم مابين الخامسة والسابعة..

"الشعار":


يا جميزة خلاص اتلمينا شايلين أحلامنا بريسينا
والكورة دوام بين رجلينا وبنحب الناس تعاين لينا
خلينا بيوتنا وحيشانا ما اللمة بتحتك بتنده علينا

[ود الجعلي]

نتابع في صمت



تخريمة : تاني .........بعشوم

ووين...... وائل ولؤي وهاني من التشكيلة

[أشرف صلاح السعيد]

نتابع في صمت



تخريمة : تاني .........بعشوم

ووين...... وائل ولؤي وهاني من التشكيلة


بعشوم دا ما اساسى يااخ وكل الشفع المذكورين من قبلك بتلاقيهم ..
لا تستعجل ديل بيكونو شافع زائر وشافع جديد فى الشلة والجميزة بتسع كل الشفع..

[ابوخالد]

كلما أراد محمد ..البلولة..ماجوك..آدمو..أوشيك..ساله "صالح"..وبعشوم اللعب أو التسامر يلتقون تحت ظل الجميزة المترامية الأطراف التى زرعت بعهد الأتراك ولكن بيد جناينى سودانى قبل ما يفوق المائة عام..الجميزة توسطت منازل أسر تلكم المجموعة من الأطفال بأعمارهم مابين الخامسة والسابعة..

"الشعار":


يا جميزة خلاص اتلمينا شايلين أحلامنا بريسينا
والكورة دوام بين رجلينا وبنحب الناس تعاين لينا
خلينا بيوتنا وحيشانا ما اللمة بتحتك بتنده علينا





دومآ متجدد أخى المبدع ,,,

أشرف ود السعيد ,,,

أسماء المتسامرون ,,, خليط من كل بقاع السودان ,,, تقريبآ ,,

فدعنى اُطلق مسمى البوست ,,, كفكرة ,,,

تحت جميزة البرلمان ,,, يحلو السمر والتوهان ,,

وواصل ياريس ,,,

متابعين ,,,

[عوض الكريم الخواض]

محمد ..البلولة..ماجوك..آدمو..أوشيك..ساله "صالح"..وبعشوم :::

تعرف يا أشرف ...

الشباب ديل ...
الله أعلم يتلمو تانى ... :cool::cool:
ولو اتلمو الا يتلمو فى شكلة أو فى ( حرب ) :(:( .

[moh_alnour]

تعرف يا أشرف عنوان البوست ذكرني حديقة وقيع الله
عندما كان الصبية يجتمعون في محلات بيع الكُتب و الألغاز و المجلات
في زمن كان فيه الكتاب خير جليس

[نسمة صباح]

البلولة..ماجوك..آدمو..أوشيك.."..وبعشوم

نطق الاسماء دي بيعمل وجع حلق:p



حجزنا مقعد للمتابعه

[أشرف صلاح السعيد]

دومآ متجدد أخى المبدع ,,,

أشرف ود السعيد ,,,

أسماء المتسامرون ,,, خليط من كل بقاع السودان ,,, تقريبآ ,,

فدعنى اُطلق مسمى البوست ,,, كفكرة ,,,

تحت جميزة البرلمان ,,, يحلو السمر والتوهان ,,

وواصل ياريس ,,,

متابعين ,,,
تحياتى ابو خالد..
يااخوى ما التوهان دا زاتو الجنن بوبى قبل بقر ناس اوربا السميين داك..
والله التوهان الا حاصل لكن ليس بدنيا الاطفال الا ان استشرى وتعمق السرطان..

[أشرف صلاح السعيد]

محمد ..البلولة..ماجوك..آدمو..أوشيك..ساله "صالح"..وبعشوم :::

تعرف يا أشرف ...

الشباب ديل ...
الله أعلم يتلمو تانى ... :cool::cool:
ولو اتلمو الا يتلمو فى شكلة أو فى ( حرب ) :(:( .

عوض الكريم يااخوى الله يكضب الشينة..لأنو الشينة المرة دى ما بتجى براها بجى ضقلا بكركب..
نسأل الله السلامة..

[أشرف صلاح السعيد]

تعرف يا أشرف عنوان البوست ذكرني حديقة وقيع الله
عندما كان الصبية يجتمعون في محلات بيع الكُتب و الألغاز و المجلات
في زمن كان فيه الكتاب خير جليس


أيام يا ود النور لا بتتنسى ولا أظن بتتعوض..المكتبة الخضراء..ميكى..الألغاز..مجلة ماجد..ووووو..تحت شجر الزونية والحلاقة على الهواء مباشرة "هسى الحلاقة والقراية علاقتم شنو؟..يااخى فى علاقة الناس تخفف راسا عشان القراية تلقى مكان فاضى..بايخة مش كدا؟"..
اياااااااااااام والله يجيب الاحلى منها لكل البنوت والصبيان وحليل عمك تنقو..

[ابوخالد]

تحياتى ابو خالد..
يااخوى ما التوهان دا زاتو الجنن بوبى قبل بقر ناس اوربا السميين داك..
والله التوهان الا حاصل لكن ليس بدنيا الاطفال الا ان استشرى وتعمق السرطان..




إنت تقصد أطفال زمان والا هسع ,,,,

باين عليك طولت من البلد ,,,


لكن منتظرين ,,, بالقديم والا الجديد ,,,

[أشرف صلاح السعيد]

البلولة..ماجوك..آدمو..أوشيك.."..وبعشوم

نطق الاسماء دي بيعمل وجع حلق:p



حجزنا مقعد للمتابعه


نسمة صباح حبابك ياالحنكوشة..يااخى مالا هسى الاسماء دى يااخ؟؟..لافيها خاء لا فيها قاف وكلو حروفا برانية ياااخ..
ماتخافى بنرمى ليك كم دانى وهانى ورامى واسماء كدا برانى..

[أشرف صلاح السعيد]

مشهد..

نلعب شنو؟؟..

الشفع ملمومين تحت الجميزة محتارين يلعبو شنو..أستغفرالله الكضب العلى شنو؟..قصدى محتارين يختارو ياتو لعبة لانهم اصلو مابيغلبن يلعبو شنو..

ماجوك : الليلة دى تأالو نلأب شددت..

البلولة : هووى ياماجوك عليك الله ختينا لعب المدافرة حقك دا بتكسر لنا مخروقة..وأكان بتدور المداوسة هى المداوسة دى بتدورلها تنطيط؟..

ماجوك : أليك الله هسأ دا لو الزول نفخ فيك مابتقأ خلى يأمل مأاك دُكشُمان..

آدمو : شكيش تعزلو فوقين اللعب وحداكم؟..شوفو دلا كو!!

أوشيك : تعالو نلعب مبارزة..

بعشوم : ليه ما نلعب كوراااا؟..

ماجوك : ياهووى ما تأملو لينا حكارة بتاأ ياركوك بتاء مندوكورو جنا أرب دا..انا اول واهد أزلتا لعب..بتلو حكارة دا..

صالح : هليل البلد وتليب البهر ياهى..دى وقأت آيه اللى وقئنا فيها دى يااهى..آيه اللئب المهبب دا ياأهى!!..

البلولة : اقوللكم قولا..انحنا عقب اولت أمس دحين ما لعبنا السك سك؟..خلنا النلعب الدس دس "شوفو التواكيد دى يااخ"..أها شن قولكم ياالجنيات..

بعشوم: المع الشددت يرفع يدو..فرد واحد..المع الدسد دس يرفع يدو..كمان فرد واحد..المع المبارزة..برضو واحد..طيب المع الكورة يرفع يدو..واحد اتنين تلاتا اربعة ..وانا خمسة..عليكم الله شوفو الناس ديل طيب من قبيل ما تقولو كورة بس وتريحونا..

صالح : ما إهنا كدا إلا نجى بهناااك ..تأرفو الولد مهمد كان مأنا كان من قبيل لئبنا وهلسنا كمان..يلا يا ماجوك شوت البتاءة دى خلينا النلأب..

هو صحى البصوت مرة ليه ما بصوت تانى زى الشفع ديل؟؟؟

[ابوخالد]

أشرف ودالسعيد ,,,

بداية جميلة ,,, والتصويت خشم بيوت ,,,

******
ياربى السااااااعة كم !!!!!

[moh_alnour]

هو صحي البصوت مرة ليه ما بصوت تاني زي الشفع ديل ؟؟؟


المكرفون مع الأخ عبد الله محمد العقاد ;) خلي يجي ينجر ليك إجابة للسؤال دا :eek:

[أشرف صلاح السعيد]

إنت تقصد أطفال زمان والا هسع ,,,,

باين عليك طولت من البلد ,,,


لكن منتظرين ,,, بالقديم والا الجديد ,,,


صباحو خير ابو خالد..
صدقنى السواد الاعظم من الاطفال لسة ببراءتهم ولم تفلح اسقاطات الكبار فيهم..
اما بخصوص اللماضة والتفلهم فديل مقرونات بابناء المدن وناس الفضاءيات ولا اخالهم السواد الاعظم والغالبية من الاطفال..فالمدن تحمل ربما اقل من سدس اطفال البلد وحتى ليس بحقيقة بأن كل اطفال المدن قليصين ومتقلصين ..

[أشرف صلاح السعيد]

أشرف ودالسعيد ,,,

بداية جميلة ,,, والتصويت خشم بيوت ,,,

******
ياربى السااااااعة كم !!!!!


والله من حيث أنه ومما يبدو عليه وانطلاقا واستنادا على الواقع "من وقعة" والحاصل يبدو أنه التصويت الحيانى "على أول اولاد بمبة" هو سيد الموقف وعلى المتضرر اللجوء للبحر..بس المشكلة كمان ما يطلع ليو تمساح الكبلو الضارب الليّة ويجليهو والناس تسائل المجلى عنه مليون سؤال يقوم يرجع تانى البحر ويدخل للمذكور آنفا تمساح الكبلو ويرقد ليو قدام خشمو..
هو فى شنو؟؟..مالو اتأخر علينا ولا احنا اللسة ما عارفين الساعة كم؟؟..ولا هو فى شنو..

[أشرف صلاح السعيد]

[size="4"][color="black"]المكرفون مع الأخ عبد الله محمد العقاد ;) خلي يجي ينجر ليك إجابة للسؤال دا :eek:


قلت كدى؟..الناخدلنا ساتر..الجنا دا كلامو مرات كدا بيجيبلو رايش..
تعرف خايف المرة دى الله يستر لو طلع لينا اولاد المغتربين بالسعودية "لُتُخ" ..أها يا ود النور العرس زاتو بيمسخو ليك وتانى لا بينفع تدابا لبيت الجماعة ديلك ولا تزرزر ابو عمر عن البنية الضيفة فى حلتم.."لقيتنى كيف؟"..

[أشرف صلاح السعيد]

مشهد..

ابو تنبلة..

شافعان من الشفع وهما البلولة وماجوك كانا تحت الجميزة بانتظار باقى الشفع..ويظهر من على بعد بعشوم دافر..

البلولة : عليكم الله شوف الجنا بعشوم دا لازى تنبلتو "بطنو" قدامو كيف..

ماجوك : انتا والله "بنهايتها ياء ولاادرى لم تلكم الياء بنهاية اسم الجلالة" زول واهد تخلى فى هالو مافى..يااخى انتا هسع دا مالك ومال تنبلا بتاؤ؟..

البلولة : الكترابة هو اصلو الزول لا يوصف لا يتوصف !!..شن قلتا انا هسع دى؟..الجنا ما عندو تنبلة !!..

ماجوك : وتيب ما إندو أين وكرائين ليه ما قلتو؟..

البلولة : والله يا الطويل الزول علا تبلعو كلامو فى حشاو..

ماجوك : انا تويل يا بئاو "بعيو"..التول ما أهسن من قسرك دا هسأ..الكورة تتير فى الشجرا ما تقدر تنزلو..

البلولة : بعيو انا؟..ما احسن من الطول طول النخلة والعقل عقل السخلة؟..

ماجوك : والله "بنهاية الياء المحشورة" انتا دا قسير وأقلك أنبلوك أديل كدا..

بعشوم : شنو من قولة تيت متداوسين..فى شنو؟..

ماجوك : التيرا "الطيرة" دا قال أليك ابو تنبلة وانا لما شاكلتو زئل "زعل"..

البلولة : عليكم الله شوفو الجنا الطويل الفتان دا..

بعشوم : هو الفتان ولا انتا القطاع "مغتاب"؟..هو قال الكلام قدامنا الاتنين لكنك بتتكلم فى ضهر الزول..

البلولة : انتا اصلك طوااالى بتقيف معاو..

ماجوك : شوفو هُمار "حمار ولا مؤاخذة وماعارف ليه الناس بتتآخذ هو الحمار دا عورة ولا دشة؟"دا تقول أليو بتنبلة ويوقف مآك!!

البلولة : يااخى خلونا من نضميكم الكتير دا أنا زاتى التنبلة الليلتى اكبر من الليلت بعشوم..أها استرحتو؟..

ماجوك : مؤفن تيب ماتسكت من أول ما أأهسن؟..

[أشرف صلاح السعيد]

مشهد ..

النار ولعت منو البيطفيها؟..

جلس لفيف الشفع السبعة تحت ظل الجميزة متأثرين بجو الانتخابات..يتجاذبون أحاديث البعض يرددها كما يرددها الكبار والبعض طاش خارج الشبكة ومتحكر داخل شبكاته الطفولية البريئة النظيفة..

البلولة : إنتو يا الجنيات دحين ليه ما بخلو القدرنا ديل يصوتو؟..

ماجوك : حقارة بتاء "بتاع" ناس كبار سااكت..

صالح : تِئرفو "تعرفو" الإنتهابات "إنتخابات" ديت لعب كبار..والكبار بينبسطو يلأبوها "يلعبوها" علشان يورونا انهم كُبار..

محمد : لا يا صالح الانتخابات دى ابوى قال ليا الشعوب المتحضرة بيعملوها عشان يجيبو بيها الناس الكويسة عشان تحكم وتطور البلد..

البلولة : نان البلد دحين ما بتتطور علا بالإنتخابات؟..طيب ناس البشير ديل جونا هسع دى بالإنتخابات؟..

وجم الاطفال لهذا السؤال التعسفى وانتظر بعضهم لبعض للإجابة..

ماجوك : والله "بنهاية الياء المحشورة حشر" بلد دا إلا ببريم ناس يجى هكم "حكم"..شوف بشير دا هسأ بجى كيف..وقرنق هو زاتو بجى كيف؟..

بعشوم : يعنى هسع دى الولاة ديل عندهم جيش؟..

ماجوك : ياخى ديل بجى من ابو كبير ..ابو كبير يجى بدبابة ويجيب ناس بتاؤ..ماشوفتى هسأ مؤتمر جاب ناسو وهركة "حركة" بجيبو ناس..وناس شرق بجيبو ناسو وناس غرب هسأ أيز "عايز" يجيبو ناسو..

البلولة : أكان كدى يا الجنا النحدس ناس ابوى سااكت يشترو البريمات والرشاشات عشان علا يجيبو ناسم كمان..

صالح : والشمالية دى بنت قردا ولا آيه؟..

ماجوك : هو هكام "حكام" دا كلو من شُمالية..وهو سبب حقارات كلو..

صالح : ناس الجنوب هم اللى عاملين المشاكل وألمو :علمو" السودان كلو الشكل..

ماجوك : يازول يا بليد شمال هو أمل "عمل" هرب "حرب"..

صالح : بليد أنا يا تِقِل "نوع من القرود" ..إنتو متهلفين "متخلفين" وبتلبسو ما فيش ولما عرفتو تلبسو شطهتو "شطحتو" وشيلتو سلاه "سلاح"..

البلولة : الكترابة يالجنيات ..عليكم الله شوفو الرطانة ديل بدورو يقلبوها لينا حرب..

آدمو : والله "بالياء بالنهاية" بكرا نمسكو حكُم تشوفى كيف ناس تحكمى..أدان أبيض دا والله "بياء اخرانية" يأرفو "يعرفو" حاجة..

محمد : هو وينا الاضان البيضة دى؟..انتو يا شفع بتتعاورو زى الكبار وناسين اننا أصحاب وجيران ؟..طيب وقت كلنا كارهين بعض كدا شنو البيخلينا نتلمة تحت الجميزة دى؟؟.....

[ابوخالد]

مشاهد جميلة ورائعة ,,,

السرد غاية فى الإبداع ,,,

واصل ,,, نحنا متابعين ,,,

ولى عودة ,,

أخى أشرف

[أشرف صلاح السعيد]

مشاهد جميلة ورائعة ,,,

السرد غاية فى الإبداع ,,,

واصل ,,, نحنا متابعين ,,,

ولى عودة ,,

أخى أشرف


صباحاتو خير ابو خالد..
تسلم يا الحبيب وتكفينى متابعتك ياجميل "وسوا سوا يا جميل وشارع مدنى نور طويل"..
وفى اتظار عوداتك يا شيخ العرب..