قصــــــــــــة@كلب الســــــــــــرة @تصرفاتو واصل الاسم [الأرشيف]

Eng\Megdad Taha

19-11-2009, 12:07 PM

حكاية كلب السره

كلب السره ليس مجرد كلب يعوي او ينبح فهو كلب ذكي بالفطرة
نشأ وترعرع وسط اولاد السره اذا اكلوا جلس على بعد ياردات ينظر اليهم يتابع كل لقمة تخرج من الصحن الى الحلقوم كان يحب الاب والام خاصة الام لانها لا تاكل كثير وتقوم من المائدة اول زول
ولكنه كان يكره ترتاره لان كان يتدحرج من صحن الى صحن ولا يقوم الى اخر الناس بعد ان يمسح كل الصحون وعندما يتبقى قليل من الاكل وبعض الفتات يبلع كلب السره ريقه خوفا وترقب ويطلق نبحتين
سريعتين للفت انتباه ترتاره الذي يخاطبه قائلا اصبر بعد ما اخلص بكب ليك الباقي ----- الباقي هنا يقول كلب السره في نفسه الباقي باقي ثم يضع راسه في يديه وهو ينظر الى ترتاره بنظرة رجاء وحزن وياس
وعنما يقوم تارتاره من الصينية يهب كلب السره واقفا وهو يحرك زيله في بلبصه واضحه وهو يتبع ترتاره والصحن الشبه فارغ وبعد ان يتناول ما جاد به عليه ترتاره يتنهد باسى ويذهب ويجلس قريب للسره
فتخاطبه شكلك جيعان وتقوم باخراج عظمه من الحله وهنا يعلن كلبها راضاه بنبحتين مع تحريك الذيل ذي مساحات السيارة وياخذ عظمته ويذهب بعيد في طرف الحوش فهو يعلم ان ترك باقي العظم في وسط الحوش
فستصرخ بنت السره غاضبه وتقول يا امي بترمي الاكل للكلب وسط الحوش بعفن لينا الواطه وانا البنضف في النهاية
لذلك فان كلب السره يذهب طرف ياكل عظمه ولحمه وما تبقى يحفر له في ركن قصي ويدفنه ولسان حاله يقول احذر غدر الدنيا والايام العجاف --- والعظم القديم المدفون ينفع في اليوم الاسود---
كان كلب السره لا يشرب الماء الوسخ او الراكد في الارض ولا حتى ماء الصحن الذي وضعته له السره في طرف البيت تحت شجرة الليمونه كان دائما ينتظر بنت السره لتقوم بملي الزير او برش الحوش العصرية
وهو من متابعته لها يعرف انها ستنشغل باشياء اخرى وتنسى الماسوره مفتوحه في الجردل الا ان تتدفق الماء وتجري عبر الجول الى شجيرات قريبه من الماسوره زرعتها السره وهنا ياتي ليشرب ماء صافي عذب رايق
متدفق من حوض الماسورة وبعدها يخرج للشارع امام الباب طلعت العصرية ليمارس هوايته المحببه في مراقبة الناس
ديك عشه جارتهم وهي حوائمه ودائما ما يشاهدها وهي داخله خارجة باستمرار من بيت لي بيت ذي الكديسه ام خيط وكلما تشاهده تنظر اليه شذرا وكانها تعرف انه يراقبها وكان هو لا يعيره انتباه عندما تمر به يوميا ويشيح
بوجهه عنها ولكن اول ما تتجاوزه يتابعها بنظره الى ان تدخل الى بيت من بيوت الجيران فيقول في نفسه اها دخلت ناس ريا اكيد دايره تشحد ليه شوية روب وبتقول ليهم داير لي رواب لانهم عندهم البقر كتير في الزرائب
وبيتهم مليان لبن وهنا سال لعابه فقد تذوق لبن ناس ريا عدة مرات عندما تسوي السره شاي الصباح باللبن الذي تشتريه من ناس ريا ومرتبه منهم بالشهر فكلما تتذكره السره وتنظر اليه في الصباح وهي تعرف انه ينظر اليها ومنتظرها ان تجود بالموجود فهو كلبها الودود فتقوم وتنظر اليه وتقول عارفك حارسني قوم تعال ويذهب خلفها الى صحنه في طرف البيت فتصب له قليل من اللبن ورغم انه يقرف من صحنه لانه متسخ باستمرار ومعرض للتراب والغبار الا ان اللبن لا يستطيع ان يفوته ولو صبته له السره في التراب

في المساء كلب السره يدبر حاله ويدخل البيت وذي البقول الدايرني ولا القاصدني يجيني جوه لا بتهمل ولا بقعد بي بره
كان كلب السره يعرف ان فترة المساء رجل الناس ماشه كتيره هو ماله ومال الشغله الفارغه يقعد ينبح في كل واحد ماشي ولا جاي فوق كم
الماشي يجيب فول لعشاء اولاده والعزبه في الدكاكين لامين بوش ووفول ومع دخلتوا للبيت شاهد ثلاثة اها ديل جماعة اصحاب طوالي ذي المواعيد ماشين الدكان بوش وفول
وموية جبنه وزيت حالتهم تحنن شفتهم مره وانا ماشي مع السره الدكان متلمين في صحن الفته لفيت فيهم تلاته لفات ما حد فيهم عبرني بعد ما قاموا عاينت للصحن لقيتوا
نضيف اتقول غسلنوا باومو التلفت شمال ويمين لمن ما لقيت لي زول بعين لي اخدت لي منه لحسه النفيسه الله يلعنه لقيتها ملح ساكت
كان يجلس مقاصد الباب في المساء وعندما ياتي احد ويدق الباب يكون قريب ليعرف من القادم لزوم الشمشره واذا دفر اي زول الباب ودخل توش بعاين ليه من بعيد لانه اكيد ده من ناس البيت البجي داخل توش بلا احم ولا دستور بس لمن يجي ود اخت السره داخل بدون ما يدق الباب وبدون استئذان بقوم ينبح نبحتين عشان السره او ناس البيت ينتبهوا انه في زول جاي وهو يقول ليه بوبي انت ما عرفتني ولا شنو --- عارفك يعني انت اصلك منو عامل لي حابي بي خالتك وهي ما معبارك بس محترماك ساكت عفيت منها بت تمام
لمن كلامه يكتر بتقوم تشوف ليها حاجة تشغله لانه دمه تقيل وما بتهضمه هسع العوير ده كان بجي بدق الباب ويستأذن ويجي داخل بذوق كده كان امكن انتبهت ليه واهتمت بيه شويه لكن لمن يجي داخل توش لا احم لا دستور لمن المسيكينة تجري جري تحصل ليها توب ولا طرحه قبل ما يصل لي جوه وهو يصيح هوي يا ناس البيت ---
هوي يا ناس البيت وانت ماشي لي جوه ما تقيف جنب الباب ما دام انت دخلت خلاص وتصفق وتقول هوي يا ناس البيت خالتك ما عندها مشكلة لكن ذنب بت خالتك شنو امكن تكون قاعدة بجلابيته ساي او راقده مرتاحه تجي داخل عليها ساي ما عيب منك عشان كده دائما انا لمن اشوفه داخل بنبح نبحتين تلاته وبده عين حاره وكان علي اديه عضه
لكن خائف من زعل خالته ساي والسره انا ما بدور زعله لانها مره تمام تديني اكل وتعتني بي ذي اولاده وبتها تمام وهو العوير ود خالته ده ذاته كويس بس مشكلته داير ليه شوية توجيه وشكلها كدي بت السره واقعه فيه واقعه فيه لانه كل يوم ناطي عندهم وابوها بدي مرات نظرات حاره
بعد الليل ما دخل وراجل السره قام قفل الباب ودكره بالعود هنا يبدى عمل كلب السره يقوم على حيله ويتمطى وينظر لراجل السره وهو يحرك ذيله شمال ويمين وكانه يقول له
امشي خلاص ادمدم ونوم وخت في بطنك بطيخه حمراء ذي لون فريق المريخ اها حكاية الهلال والمريخ دي حكاية بتذكر يوم قامت شكله عديل بين ود السره المريخابي وود خالته الهلالابي في شنو ما عارف لكن انا بس سامع قون لا ما قون رشاشات صهاينه وصيف لا ما وصيف هي يا جماعة الدنيا صيف مشاكلين فوق كم جنون وفنون
كلب السره وهو يحدث نفسه ---اقوم بعد ده اشوف شغلي الناس ديل كان انسرقوا برفدوني وما بعيد يطردوني المعايش جبارة اها دي سهره لي الصباح
اخد لفه على السور ما يكون فيه واحد ولا ضل واحد وبعد داك ارقد تحت شجرة الليمون دي لانها في حته مظلمه وافتح عيوني كبار ذي الريال ابو عشرة وكان تعبته انوم بي عين واحده واخلي التانية مفتحة وفجاة يرى كلب السره ضل في الارض جاي من الحيطه ويقوم بشويش وهو يزحف وتجيهو شوية خوفه ويقول في نفسه انا خواف لكن اسوي شنو
ما دي شغلتي بعدين لا بصارع لا بعضي كفاية علي انبح لمن نفسي ينقطع يا روح ما بعدك روح ايمكن يكون شايل ليه مصيبه
مشى بشويش لمن قرب لقاه كديسه نبح فيها اتخلعت لمن وقعت بي بره جأ راجع يتضرع بت الذين حالته دي نبحه واحده كان نبحتين كان جاته سكته قلبيه ورقد تاني في محله لمن صبح الصباح قام قرب على غرفة السره وقعد قدام الباب منتظره تطلع تسوي الشاي عشان يشرب شوية اللبن ويلهط ليه حبتين لقيمات ويمشي ياخد نومت الضحويه

الضحوية لايضيعها كلب السره فيدخل تحت شجرة الليمون وينجدع ينوم ولكنه اذا خرجت السره الضحوية ومع صوت الباب يفتح ويقفل يقوم يتنفض في كسل ويفتح عينيه في تراخي ويراقب البيت حتى عودتها خاصة ايام المدارس البيت فاضي الا من السره
وهي كان طلعت ما بتمشي بعيد اياها بتكون تفتش ليها لي لي حطبه حطبتين للعواسه ولا لي كركريبه
او ماشى تشرب القهوة مع التايه خاصة قهوة يوم الاحد الفيها الجبنه الحامضه اللذيذة
يوم يتلمن عند السره بقعد بعيد بعاين ليهن لمن يحنن علي ويرمن لي حتة جبنه
اتلحس فيها وريقي يجري ليمونه بس مالحه
وكان ما طلعت السره بياخد نومته بالكامل وهو عارف لو الباب فتح بتكون واحده من الجيران جايه يا تعوس في ضهر السره بي باقي نار العيدان يا جايه فلانه شايله ليها شمار وسواطه ما قادر تصبر عليه سمعت من جارته بالحيطه تزيد من عندها حبه وتجي تحكيها للسره
السره زاتها بتزيده حبتين لو جاته واحده تانيه تقوم تسأله عرفت الحصل لو هي عارفه بتقول ليها عرفته مش فلانه قالوا ....... اها هنا السره تجيه غمه شوية وتصر وجيهه
لانها ما لقت فرصة تفت فيها شمار السواطة الجابته ليها فلانه الحوامه وتاني تفره وجهها
وتتعوض الله في الفرصة الراحت
كلب السره واعي وفاهم وعارف بسوي في شنو لو دايره السره يمشي معاها مرات بتنادي ومرات بمشي معاها براه لو دايره بتخلي ولا قالت ليه جر ارجع البيت محل ماشى الاولاد بالحجر بضربوك
وهو بسمع الكلام لكن مرات مرات بالليل بياخد زوغه ويخلي الحراسة ويفوت خاصة يوم الخميس في عزابه في اخر الشارع بكونوا مخمسين عشاء كارب وونسه ولمه ومرات كوتشينه هو ما بدخل ليهم بي جوه بخاف منهم يضربوا بمصيبة يكسروا رجله لكين بكون
استان باي وقريب للحيطة بتاعت الزقاق بتاعهم لانه عندهم واحد طويل لمن يتعشوا ويخلصوا يقوم برمي باقي العشاء والفضله والعضيمات بالحيطة الجنب الزقاق اها بلقى
كلب السره كم لحمه وكم عضمه بعد شكله وكوراك ونبيح مع الكدايس بي جيهه
ومع كلب ناس الجيران وكتير بتفقوا وكل واحد ياكل نصيبه بس اهم حاجة قبل الاكل نبحتين لتطفيش الكدايس خاصة فيهم واحدة ماكنه وعندها الظاهر وليدات دي ما بتجري ولا بتخاف تنفش شعرها وتتمطى لي فووق وتبقى كبيرة وتشخط وتصرخ وما بتفوت الا تخطف ليه حته
كلب السره في قرارة نفسه بخليه وبرخي ليها شوية عشان تخطف حته وتجري
لانه في قلبه رحمة
كلب السره يخت عضم كبير جنبه ويقعد ياكل في غيره لمن يخلص يشيل عضمه ويرجع البيت ويدخل بنفس الدرب الطلع بيه الفرقه الصغيرة المعى الباب ومرات بنط بالحيطة عديل اصلها قصيرة وهو رياضى واصلوا ما قاعد ياكل كتير -- هو في اكل الحاله بقت ما ذي اول الناس تعبانه وجيعانه وحالته تقرف كان لقى لقمة ومعاها عضمة يحمد عليها الله كم مرة سمع السره تشكي وتحكي السوق بقى غالي وتجار السوق ذاتهم يشكوا
من الضرائب الزكاة ورسوم ايه وايه ويرفعوا الاسعار ويخلصوها من المواطن التعبان
حتى في البيت كم مرة بجي واحد يدق الباب تساله السره منو -- يقول ليها رسوم الصحة ونقل النفايات صحة هو في صحة هم كان شغالين صح العزبه برموا باقي اكلهم بالحيطة الحشرات ماليه البيوت والفيران والباعوض بالليل وبالنهار ضبان بتروح وين جباية الصحة يا حبان
تاني واحد يجي يقول رسوم تحسين المويه كلب السره بكرهم كراهيه يقعد ينبح فيهم
لمن يوم بتاع رسوم النضافه قال للسره كلبك ده ما مطعم ضد السعر كان ما لقيت في رقبته الطوق الفيه بطاقة التطعيم بعمل ليك غرامة وبكلم الشرطة
اها من اليوم داك لمن يجي الموظف يقول رسوم النضافه كلب السره من تحت شجرته ما بطلع ماله ومال الشقاء جماعة الحكومة نشفوا ريق الناس الحيوان كان قصدوه بسوه فيه شنو يا روح ما بعدك روح

كلب السره ليس ككل الكلاب لان السره اعتبرته روح وهو في ذمتها فيجب ان تعتني به وتطعمه وذلك مخافة لله وامتثالا لقول الرسول الكريم صلى الله عليه وسلم
-- في كل كبدة رطبه اجر ---
كلب السره كان لا يفوت موعد غروب الشمس فمع قرب الغروب يطلع الشارع ويجلس بزاوية جنب الباب عشان كان انزنق ولا شي الباب يبقى قريب ويتفرج على خلق الله
يشوف الناس الجايه من الشارع الطويل بعضها ماشي عديل وبعضها يخيط في الشارع تخييط تاكد كلب السره ان هذا النوع من البشر سكران عديل وبالتالي ما واعي وقد سمع الكلمة تترد من كم واحد في الشارع وهو يشاهد مثل هذا النوع من البشر وقد اقترب مرة كلب السره ليعرف اكثر سبب ترنح البعض وبعضهم يقع ويقوم وبعضهم يصرخ وبعضهم يغني وعندما اقترب مرة من احدهم شم رائحه غريبه تنبعث منه اشبه بالشي المخمر
وتذكر كلمة الخماره فهل هي نفس الكلمة الا انه استدرك الامر لان هذه الرائحة يطلق على صاحبها كلمة سكران فاذا كانت الخمارة التي تاتي بعض الجيران لشحدتها من السره تعني ذلك ابقى الكسره بتسكر وكان بعد الغداء قاموا ناس البيت كلهم يترنحوا
ثم تبسم كلب السره وقال في نفسه انا ذاتي بلغف باقي الكسره بالمولاح البرموها لي بعد الغداء كله كان بقيت ذي داك الجاي ماشي يمين شمال ذي نداء عساكر الجامية لمن يجوا ماشين بي جاي تلقى واحد فيهم ماشي بي جنب الطابور وهو يصرخ يمين شمال كان ينبسط جدا لمن يجوا عساكر الحامية وهم يجرون او يسيرون بجنب البيت وكان يتبعهم وهو مبسوط وماشي جنب الحيط
الحقيقة هم احسن من ناس البوليس لانهم مرات بقبلوا علينا يقتلونا
فجاة انتبه لواحد قادم وهو يصرخ ويمسك في كل واحد يلقيه ويقوا ادينا الفيها النصيب
الزول ده كان كويس زمان وكان بجي لي راجل السره طوالي يتونس معه الحصل ليه شنو فجاة اتلخبط حاله وبقى شحاد وسكران الحياة فعلا صعبه ولمن تكتر فيها الهموم
الما بتحمل مخه بضرب وببقى مدمن ومخمور وممكن يبقى مجنون
الزول ده ما ولد ناس كويسسين ليه ما يلموه في البيت ولا ياخدوا يعالجه من مرضه
اذا كان مريض انا مالي اعاين بعيوني وادخل بعد المغيب البيت كان القى لي حتة قراصة ولا لقيمات بالزيت وبعد داك لازم اطلع قريب منتصف الليل ازور اصحابي في الشارع التاني خاصة كلبة ناس الجيران وبلع ريقه وبدا كلب السره يسرح كلبة الجيران
صغيرة وحلوة وشعرها مسبسب وطويل بس بتاعت مشاكل ورضاها صعب عديل
بس لانه كلب راقي وواعي وما بدخل في المابعنيه وما بتاع شوارع ذي الباقيين هي بتدي اعتبار خاص ونظره معبره ياريت تكون صادقه معاي وما يكون شماري محروق وانا بتخيل براي
تمطى كلب السره ومشى على الحوض وغطس فيه وطلع اتنفض وبعد داك قعد يلحس في شعره جسمه شمال ويمين لزوم النظافة والهندمة قبل ما يزوغ من البيت ويمشي يشوف كوفي كلبة الجيران الاسم ده جابوا ليها من وين هو ماعارف الكلاب اسمائها جركس ومركس وقطاع ووردة وزرقاء ورادار والعاصفة والسريعة هو ذاته اسموا شنو ما عارف المهم هو كلب السره وبس وبعضهم بنادي بي بوبي والظاهر ده اسم امريكي بتاع مغنيين المهم بوبي بوبي اها ضيعت الزمن في الفاضي
وانطلق كلب السرة الى الشارع الخلفي محل كلبة الجيران
ولم يجدها فحاول ان يقفذ عاليا ويتاوق يشوف حوش البيت ولفه حول البيت كم لفه واخيرا اقتنع بان اهل البيت مافشين واكيد كوفي مشت معاهم لكن مشوا وين
وكوفي تخلي البيت فاضي وتمشي معاهم كيف مش مفروض تقعد تحرس البيت
كان هسع قعد حرسوا معاها ولقى فرصة الونسه المريحه معاها ولا كان واحد من ناس البيت حيقول ليه جر شابكننا كل ما امشي ليها جر جر الكلب ده جانا من وين الناس ديل بالليل بتغابوا فيني العرفه ما عارفين ذي جوع بطنه انا كلب السره لمن مرات بنتهم تجي تتونس مع بت السره ومرات تجيبه شحده -- انا في ود السره بت الجيران دي لمن تجي تتونس مع اخته يقعد يتلكلك ويدلقن واخته تقول ليه انت ما قلته مارق يقول ليه مارق بس عندي حاجة رايحه بفتش فيها ويدخل ويمرق وكانه بفتش في ابره في كوم قش وانا بس اعاين بعيوني الاولاد ديل عليهم جنس حركات
انا مالي هسع كوفي مافي ارجع ريوس للبيت الناشف ده اقعد وحيد لا جليس لا ونيس
يا ربي كوفي فاتت وين