تشاهد يوم العيد شيه وشربوت وشامبيون( بوست معايدة)

[ود سعدابى]

الخروف ما اتفك يطلق صرخاته بااااااااع ميييييييييييع ( صرخات غير معروفة السبب أهي إحتجاج على التضحية به ولا إستغراب لإنتقاله لمكان غير زريبته المعهودة و فراقه لأحبابه من الخراف و الكباش ).

شفع البيت يدخلون و يمرقون و هم ( يتاوقون ) و يقدمون له البرسيم

أطفال الجيران في مقارنة بين خرفان الأضاحي :

خروفنا أكبر

خروفكم ما عندو قرون و صوفو منتف

خروفنا من امبارح ابى ياكل بس بيشرب موية و يكورك

جردل المخلل مستف بالعجور و الباذنجان و الليمون و البنجر و الفلفل الأخضر خلاص اعلن تخلله

الام تدخل و تاخذ حبة عجور و تخرج و لعابها يسيل و في خاطرها ام فت فت و الكمونية و الشية و الربيت
الاب يدخل و يغرف قطعة من الباذنجان و يخرج و في خاطره الشربوت الذي ضج المطبخ برائحته النفاذة ( فهو قد زاد عمدا كمية من الخميرة عشان ينعم بتعسيلة بعد أن يلتهم الكبدة النية ).

البنت تاخذ حبة و تخرج

و الولد يأخذ حبة و يخرج

الكل فى إنتظار الغد الذي سيأتي بالخير العميم

( المبرد ) و ين يا اولاد ؟ الساطور الكبير امشوا جيبوه من عند ناس عمك علي من يوم الكرامة حقتهم ما رجعوه

أبوى الخروف قطع الحبل

نفيسة ما تنسي بكرة ناس كلتوم ديل السنة دي حزنانين بموت ابوهم اول حاجة بكرة قبال نضبح نمشي ليهم و ما تنسي الكوم حقهم
سمح سمح يا الحاج

سلام يا ناس البيت حاجة نفيسة القابلة في عرفات
جمعا يا الرضية

انا ماشة السوق اجيب البهارات و البصل

اصبري بمشي معاكي يا الحاج كدي ادني قروش
انتي مش أمبارح أخدتي قروش و ديتيها وين ؟
اجي يا الحاج مش قلت ليك اديت الدلالية باقي قروش الملايات و إشتريت جزمة للبت و إشتريت جركانة زيت ؟

يا سلااااااااااااااااااااام الحبوبة تستف المبخرة و تجوب البيت تنشر دخان بخور التيمان و هي تتمتم بادعية و اوراد والصالحين
و اصغر الأولاد يتشبث بطرف ثوبها و هو يمص اصبعه فهو يخاف الخروف وما بقدر يقرب منه

الخرفان تطلق صيحاتها طوال الليل و كانها تودع عالمها

تباشير العيد السعيد ( الله أكبر ،، الله أكبر ،، لا إله إلا الله ، إن الحمد و النعمة لك و الملك ،، لبيك اللهم لبيك )
دعاء التلبية السرمدي ، منذ أن وضع إبراهيم الخليل عليه السلام لبنة البيت العتيق و إلى يوم يبعثون

و ينتشر الجزارون السكاكين في ( ضراعاتم ) نافرة لي ورا من اكمام العراريق و في الايدي شوالات فارغة لزوم الجلود و النيفة ( رؤؤس الخرفان ) .

و تتصاعد وتيرة السواطير و هي تهوي على العظام كبجك كن كن
أمسك كويس يا جنا ، أوع السكينة تلحس أصبعك

الحبوبة توصيهم بان لا ينسوا لحمة الربيت ( و خيره ما جاور الشحم )

و يطقطق الفحم فوق المنقد و يتطاير الشرر من الكوانين و المناقد
و تخرج الحلل الكبيرة من ( فوق رؤؤس الدواليب ) و من المخزن
و تدمع أعين البنات من تقشير البصل و تقطيعه
و ينطلق صوت الفندق و يد الفندق في تناغم إيقاعي محبب إلى النفس
و تتصاعد رائحة الشواء

و رويدا رويدا تهدأ الضجة في البيوت
عمك احمد سيد عمل الشربوت في راسه العمايل
و تلك متخمة بالمرارة و أم فت فت
و ذاك قد فعل ثوم المخلل به ما فعل

الكل في تعسيلة قبل ان يبدا تبادل اجمل جملة





القابله على امنياتكم
وينعاد علينا وعليكم بكل خير

[moh_alnour]

ود سعدابي كل عام و أنت و الجميع بألف خير و عافية و ربنا يحقق أماني الجميع
و نسأله تعالى أن يتقبل من حُجاج هذا العام حجهم و سعيهم و أن يغفر لهم جميع ذنوبهم
حقيقي مرّ في خاطري شريط من الذكريات الجميلة من خلال طوافك الجميل عبر هذا البوست
فقد عُدت بنا إلى أرض الأهل و الأحباب في المليون ميل و هم يحتفلون بهذه المناسبة العظيمة
من خلال هذه التفاصيل و الطقوس الحبيبة و التي لا تكتمل فرحة العيد بدونها و التي حرمتنا الغربة من حضورها في ست أعياد متوالية

[النويري]

جميل أخي هذا السيناريو يدخلك في عالم غريب وعجيب شكراً كثيراً فلقد أستمتعنا كثيراً بهذا العمل الرائع

لك مني خالص الشكر والتقدير

[littlestar]

و تتصاعد وتيرة السواطير و هي تهوي على العظام كبجك كن كن

القابله على امنياتكم
وينعاد علينا وعليكم بكل خير


ود سعدابى لك التحايا النواضر
أينما كنت
ما أجمل حرفك الناطق
وهو ينقلنا إلى صور حميمة لا نفتأ أن نكررها فى كل عام
هى صدقاً... لقطات ومشاهد
سبكتها دقة عدسة حرفك اللاقط للأحداث
بحرفية كاتب متمكن من ناصيته

أكثر ما أضحكنى صوت السواطير وهى تتهاوى
قلت لى كيف :p:D:D:p؟


حفظ الله لك قلمك أخى
وكل عام والخير يقدم بين يديك طوفاناً من الإبداع النابض
كل عام وأنت والأسرة الكريمة
بكل الخير والمنى

[حنونة.]

اخى الفاضل كل عام وانت وكل الاهل والاحباب والقريبين والبعيدين باجمل عافية وخير ويارب تجعل كل ايامنا اعياد وفرحة وبهجة وسرور

[أبو جودي]

أخينا ود سعدابي والله نقلتنا لعيد الأهل والسودان في ليالي عيد الاضحى
وأسمح لي أخي أن أحييك بعيد الأضحى المبارك أعاده الله عليك بالخير واليمن والبركات
وعبرك أخي أحي كل أخواني وأخواتي بالمنتدى وأهلنا الطيبيين بالسودان بعيد الاضحى المبارك
ونسأل الله أن يعيده على وطننا الحبيب بالرفعة والمنعة والسلام

[ابوخالد]

نفيسة ما تنسي بكرة ناس كلتوم ديل السنة دي حزنانين بموت ابوهم اول حاجة بكرة قبال نضبح نمشي ليهم و ما تنسي الكوم حقهم
سمح سمح يا الحاج

سلام يا ناس البيت حاجة نفيسة القابلة في عرفات
جمعا يا الرضية



أعاده الله علينا وعليكم باليمن والبركات

أجمل ما فى العيد فى السودان

هو التواصل اللامتناهى ,,, للأرحام والجيران ,,

وزيارة القبور ,,, والترحم على الأموات ,,,

ووداع الحُجاج قبل العيد ,,,

وفرحة الصغار ,,, ولمتم حول ساحة الصلاة ,,,

وحول الألعاب ,,,

ومسلسل الخروف المعاد فى كل عام ,,, والشربوت ,,,

والركلسة المُقننة ,,,

جميلٌ هو العيد فى بلادى ,,, وسط الأهل والأحباب ,,,

لك الشكر أخى

ودسعدابى


وكل عام والجميع بألف خير

[amino]

كل سنة وانتوا طيبين وربنا يحقق كل امانيكم

تخريمة:
ودسعدابى والله اخوك السنة دى ماعندهم شربوت خلى لى معاك كوز بى جنبة ...
<input id="gwProxy" type="hidden"><!--Session data--><input onclick="jsCall();" id="jsProxy" type="hidden">

[mohd.dafalla]

ودسعدابى


وكل عام والجميع بألف خير

[okasha]

مسطول اشترى خروف ضعيف شديد ..ابوهو قال ليهو دا شنو الخروف الضعيف ده قال ليهو ماتشوف الجسم شوف العيون كيف؟

[okasha]

سلامات يا ناس ها

[النويري]

حلوة يا عكاشا

[amino]

سلامات يا ناس ها


وعليكم السلام الخروف ماشاء الله بى كم دا؟؟؟


<input id="gwProxy" type="hidden"><!--Session data--><input onclick="jsCall();" id="jsProxy" type="hidden">

[ود سعدابى]

ود سعدابي كل عام و أنت و الجميع بألف خير و عافية و ربنا يحقق أماني الجميع


و نسأله تعالى أن يتقبل من حُجاج هذا العام حجهم و سعيهم و أن يغفر لهم جميع ذنوبهم
حقيقي مرّ في خاطري شريط من الذكريات الجميلة من خلال طوافك الجميل عبر هذا البوست
فقد عُدت بنا إلى أرض الأهل و الأحباب في المليون ميل و هم يحتفلون بهذه المناسبة العظيمة

من خلال هذه التفاصيل و الطقوس الحبيبة و التي لا تكتمل فرحة العيد بدونها و التي حرمتنا الغربة من حضورها في ست أعياد متوالية


كم عدد الريالات التي حصدها رفاقي وهم يجوبون طرقات الحلة
وسكر الكعك يملأ خشومهم طفولةً و أعياداً ؟؟

واية الدنيا غير دعوة من والدين وقبلة بين طفلين

ارد الله غربتك اخى وجمعك مع اهلك تتقاسمون فرحة العيد

شكرن على مرورك المعايد

القابله على امانيك

[ود سعدابى]

جميل أخي هذا السيناريو يدخلك في عالم غريب وعجيب شكراً كثيراً فلقد أستمتعنا كثيراً بهذا العمل الرائع

لك مني خالص الشكر والتقدير

نويرى :
جميله هى طلتك فلقد اعطتنى شوكلاتة ليوم عيدى

متعك الله بالصحه والعافيه

واعاده الله علينا باليمن والخير والبركات

ولك منى كل المحبه

[ود سعدابى]

ود سعدابى لك التحايا النواضر
أينما كنت
ما أجمل حرفك الناطق
وهو ينقلنا إلى صور حميمة لا نفتأ أن نكررها فى كل عام
هى صدقاً... لقطات ومشاهد
سبكتها دقة عدسة حرفك اللاقط للأحداث
بحرفية كاتب متمكن من ناصيته


أكثر ما أضحكنى صوت السواطير وهى تتهاوى
قلت لى كيف :p:D:D:p؟



حفظ الله لك قلمك أخى
وكل عام والخير يقدم بين يديك طوفاناً من الإبداع النابض
كل عام وأنت والأسرة الكريمة
بكل الخير والمنى


ليتل إستار

شكرن كتير وادام الله لكى البسمة

بتدينى جلد خروفكم بقولا ليك تانى:eek::D:p

شكرن كتير كل عام وكل الامانى الممكنه تصبح حقيقه كل عام واللتيل استار يصبح بق استار

كل عام والقمرة حدا ونحن الشفع نلعب شليك بى ضيها

[ود سعدابى]

اخى الفاضل كل عام وانت وكل الاهل والاحباب والقريبين والبعيدين باجمل عافية وخير ويارب تجعل كل ايامنا اعياد وفرحة وبهجة وسرور

حنونه كل سنة وانتى فايضه حنان وزايدة كمان

وكل سنة وانتى رائعه

وادام الله افراحنا

شكرن والقابله على امانيك

[ود سعدابى]

أخينا ود سعدابي والله نقلتنا لعيد الأهل والسودان في ليالي عيد الاضحى

وأسمح لي أخي أن أحييك بعيد الأضحى المبارك أعاده الله عليك بالخير واليمن والبركات
وعبرك أخي أحي كل أخواني وأخواتي بالمنتدى وأهلنا الطيبيين بالسودان بعيد الاضحى المبارك

ونسأل الله أن يعيده على وطننا الحبيب بالرفعة والمنعة والسلام


اعاده الله على كل وربنا يخلى ليك وجدى

اها وصيهو ما يكتر فى الكعك لانو مع اللحمه بتغلط عليهو

عشان ما تتبقص فرحتو وكل سنة وانتى الطيبه الساكنه ديارنا

[ود سعدابى]

نفيسة ما تنسي بكرة ناس كلتوم ديل السنة دي حزنانين بموت ابوهم اول حاجة بكرة قبال نضبح نمشي ليهم و ما تنسي الكوم حقهم

سمح سمح يا الحاج


سلام يا ناس البيت حاجة نفيسة القابلة في عرفات
جمعا يا الرضية




أعاده الله علينا وعليكم باليمن والبركات


أجمل ما فى العيد فى السودان


هو التواصل اللامتناهى ,,, للأرحام والجيران ,,


وزيارة القبور ,,, والترحم على الأموات ,,,


ووداع الحُجاج قبل العيد ,,,


وفرحة الصغار ,,, ولمتم حول ساحة الصلاة ,,,


وحول الألعاب ,,,


ومسلسل الخروف المعاد فى كل عام ,,, والشربوت ,,,


والركلسة المُقننة ,,,


جميلٌ هو العيد فى بلادى ,,, وسط الأهل والأحباب ,,,


لك الشكر أخى


ودسعدابى




وكل عام والجميع بألف خير




ابو خالد :

عليك الله كم صينية خبيز مرقت علي الفرن
وانت بعيد ؟

كم شيالة أتخاتفوها ناس خالد شفع الحلة؟
ما شناة طبع

لكن إحتفال

ربنا يرد غربة الجميع

شكرن

[ود سعدابى]

كل سنة وانتوا طيبين وربنا يحقق كل امانيكم

تخريمة:
ودسعدابى والله اخوك السنة دى ماعندهم شربوت خلى لى معاك كوز بى جنبة ...
<input id="gwproxy" type="hidden"><!--session data--><input onclick="jscall();" id="jsproxy" type="hidden">

وانت طيب وربنا يحقق امانيك

بالجنبة

ياخ انت قايلو شامبيون دا شربوت سودانى كامل الدسم كوز واحد يخلى راكب طوطحانياك مسك الختمام تعلب مع الشفع

لاكن خير مافى مشكلة تستاهل جك مش كوز

[نخيل طيبة]

كل عام وانتم بخير ..وماتنسوا الناس الماضابحين ومامضحيين ادوهم حبة لحم..زي ماقلتوا يا اخواني
وربنا يتقبل وعيد سعيد وعمر مديد اخونا ودسعدابي عيدية جميلة تسلم عليها ...

[ود سعدابى]

كل عام وانتم بخير ..وماتنسوا الناس الماضابحين ومامضحيين ادوهم حبة لحم..زي ماقلتوا يا اخواني
وربنا يتقبل وعيد سعيد وعمر مديد اخونا ودسعدابي عيدية جميلة تسلم عليها ...

نخيل طيبة:

كل سنة وانتى طيبه وربنا يحقق جميع امانيك وزى ما قلتى ما بننسى الوصية انحنا حافظين للوصية

تسلمى كتير على الطله

اها ما تنسى زيت المجموع كبيه فى شعرك عشان يبقى يقوم العيد ناير زى ما بتقول حبوبتى

[ود سعدابى]

كل سنة وكل الامانى الممكنة تصبح حقيقة محققه

وكل سنة ومدينة ودمدنى هى منارة كل مدن بلادى ادامها الله لنا بنضارها ووقارها

كل سنة وكل الاعضاء فى اتم الصحة والنعمة

كل سنى وانتو وانا وجميعا على ما نحب على ما نصبو إليه على ما نتوق مشاهدتة

كل سنة والاخوة البينا تكبر والمحبة تزيد وتكتر


يرفع

فووووووووووووووووق

[سيف الدين الامين]

ود سـعدابي اديك العافية وكل سنة وانت طيب وينعاد عليك يا رب بالصحة العافية
والله سيناريو رائع جعل الواحد فينا يعود للايام الجميلة وسط الاهل والاصحاب
وصدقني نحن في الغربة بقدر شوقنا وحنينا لتلك اللحظات الرائعة ولمه الاهل حوالين صاج الشية ده منشغل بالهبابة وديك تضع التوابل والصغير يلتقط قطعة لحمة من الصاج قبل ما تنضج والاصحاب في الصالون منتظرين الشية والشربوت بقدر شوقنا لكل تلك السيناريوهات المتكررة المتجددة الا اننا اكثر سعادة بسعادة اهلنا واحبابنا واصحابنا وهم يمارسون تلك الطقوس والعادات في ربوع الوطن ولا نملك الا ان نقول لهم هنيئا لكم وربنا يديم عليكم الفرحة والسعادة و ........................................ بنعاد عليكم بالخير والبركة

[العاقب مصباح]

ود سعدابى :-

كل عام وانت الفرح نفسه

كل عيد وانت العيد

جميل ما تناولته

سافرت بنا بعيداً نحو مدن الفرح المقيم

بسكين وساطور وخروف وشربوت وبخور ودعاء الجدات

لك عظيم مودتى على ما أثرته فينا

فنحن داخلين فى بياتنا الغربوى نبحث فقط عن شربوت

فالجمر يكوى لتظهر رائحة شواءنا فى كل حين

عظيم مودتى

[د.شمس الدين]

الاخ ودسعدابى
كل سنة وانت طيب
سافرت بنا من غياهب الغربة الى صادق الزكريات
ايام نتمنى ان تعود ومعها رائحة مكان وجود الخروف واثار الضحية التى تبقى لمدة لاتقل عن اسبوع
بارك الله فيك وجعل ايامنا كلها اعياد وادام الله علينا وعليك دوام الصحة والعافية