المساعد الشخصي الرقمي

مشاهدة النسخة كاملة : الزولــة البتفتـــح الروح ضلفتــــين ..


ود الضو
20-12-2009, 09:01 PM
زولة تفتح الروح ضلفتين
تخشك ... وتمرقك
عــــــادي ..
تخشك ... وتمرقك ...
ما بتقفل الباب من وراها
بل تساسق بين شفقتك ... وحرقتك
ما بتأذنك ...
ما روحها نفاج غربتك
هي البنية ... الساكنة أسرار فكرتك
هي الشايلة ... حســـــك وسترتك
زولة ... كما النورس تجــي
تنزل شواطي الإلفة والزمن الشفيف
وأنا زي مكتف في الرصيف
مربوط علي حبل السفن
في الضلمة والليل المخيف
بتجيني تدخلني وتقيف
شرشرت تيبان السكات
على أرض رويانة وخريف
زولة بتعرف تدخلك
وتقفلك وتغفلك
تقعد على ناصية هواك وتشغلك
وإنت بتحنس غمام كي تجعلك مطرة ودعاش
طاير تحلق في السماء وأرضك فراش
هذا الفــراش بيطير على نضرة رحيقا
وخدرتا ...
ومحبتا ... أو ضحكتا ... وسخريتا
وتقعد تهضرب ياولد من حمتا
لو تسألك وتحلفك في ذمتك أو ذمتا
وإلى متى هذا الجنون ... وإلى متى
كل التفاصيل لمـــتا ...
هذي البنية قد أتت ...
وإنت ذاتك كالورق
كيف تنجو إنت من ذاك الغرق
من ذكرياتك تنجو وين ...
وين مهـربك ... من دفترك
من مظهرك ... من جوهرك
من حرقة الجـوف والعـــرق
هـذي البنية تفتح الروح ضلفتين
وعلى ضفتين
في نهر أحزان الزمن
تقعد تلًوِح باليــدين .....
*****
وحــاة الله جمال حسن سعيد دا خطير عديل كدا ..
عليكم النبي القصيدة دي ماخطرية ..
abomazeen
21-12-2009, 04:39 AM
ود الضو يا أخوي ... والله قصيدة خطييرة جداً
والأخطر من ده نقلك الجميل لهذه الخطــورة
وقلت لي أنت ...وإنت ذاتك كالورق كلام خطير
عوض الكريم الخواض
24-12-2009, 12:50 AM
زولة تفتح الروح ضلفتين
تخشك ... وتمرقك


ود الضو ...
ابداااااااااااااااااااااااااااااااااااااع ...
وكفى .
من بيكة
24-12-2009, 12:54 PM
الخطير باين من صلعتو يا ود الضو
ابو الجيلى
24-12-2009, 01:45 PM
يا ود الضو
يعنى جمال حسن سعيد دة صلعتو دى مليانة

والله منتهى الروعة (والخطرية)