حكوة شعرية..

[أشرف صلاح السعيد]

اللقاء الأول..

تابع المحب بصمت خجول
للسمحة من بُعداً قريب
يرقُب حكيها وتفصيل فريد
يسرح معاو ليلاً طويل

السمحة سألت كمان عليو
لم لمس بجواها حس
ووصفُو لقى فيها القبول
فاتعففت راسمة الغباوة
وما ريحت داك المُحب
بحتى خطفة من عيون
رغم الرِعاش الهبش القلوب
زى دُعاش أنعش أُنوف
أو بدأ عزف بنغم الدفوف

كسر الجفى صمت الخشُم
الكان قبيل تقول رسم
ونطق القلب بعد الخِشى
أملان يحس طعم الدفا
قال الكلام لأحلى زول..

قال ليها:
مغروم شديد يا ست البنات
ورينى ليك كيفن وصول؟
ينعِش قلبى الصِرِع
ينتشلو من بحر الضياع
يخفف عليو كتير ذهول
ورينى كيفن أبرِد فُراقِك
أدينى خرطة لدروبِك
أعسكر أرابط أنشُد قبول..

ردت عليهو:
كلام غريب فيهو المُبالغة
رغم إنى ليهو سامعة
متين وصلت كل دا الشعور؟
ويادوب لقيتك من شوية
وما عرفت فيا غير قشور
حتى دى ما القضية
وما كدا بيتقدمو للحُرة الأبيّة
أمشى دُق للباب عديل
كلم أبويّا قول ليهو بيك
أطلب سؤالك بيرُد عليك
الباب هناك ما جنبو باب
مفتوح كبير لل الله جاب
ما بدور كلام وكتر الخطاب
سيب الغزل وسمح الكلام
ما بيهن بيتم مُرام
أصلو الحلال شمساً ضِيا
بتعرفو الطير والحمام

قال ليها:
كلامك زاد فيك الجمال
وانتى ضاوية وواضحة يا بت الحلال
فهمك زوّد فينى الغرام
البيهو جد أنا مقتول
حتى قبل ما تبدى قول
بس
قلبى الرهيف بدور أمان
عايز عهد من ست الحسان
يديهو وعد عليو يعيش
بنظرة حتى من عينيك
شفافة ساحرة بتدِل ليك
معطونة نضرة
مردوفة بسمة
يستقوى بيهن ما عليك
يحجز مكانو بين يديك
يعرف هويتو بين الزحام
يضوق الشوف بعد الظلام
القبل شوفو ليك بسام

يتبع إن شاء الله..مع تحياتى..أشرف صلاح..

[تغريد]

لسيناريوهات الحب في حياتنا حكاوي كثيرة نستمتع ببعضها أيما استمتاع

وسنتابع معك هذه الحكوة الشعرية بأستمتاع مطلق

وهذا تسجيل حضور ومتابعة مبكرين يا أشرف

وفي انتظار بقية الطرح