ديوان أشعاري (همسات علي أوراق الورد)

[خالد علونى]

عايز اوصفك
ارسم ملامحك واحفظك
واسكب علي نور طلعتك
زحمة حروف تستوعبك
ارتاح علي نور وجنتيك
واتوسدك
جواي فرح
مشوار موشح بي المرح
لمة حروف
ورموش بتجرح وتنجرح
بس المحك
ولكني قبال التقيك بستحلفك
طالب الامان من نظرتك
من وجنتيك من طلعتك
من ليلك القاسي وحنين
من هيبتك
من نور صباح بشرق مسا
ومن جبرتك
طالب لقاك لو يبقي طيف
لو تحتجب عني الحروف
واصبح دموعي تسيل جروف
واسكب عصارة شعري
في طيفا ولوف
بس المحك
القاك جواري وما سراب
فرحا يسوق الليل رضاب
ووعدا بباكر يكون سعيد
مكتوب عليه مرحب حباب
واتاملك
اتامل الليل والنهار
في لحظه تجمع بين يديك
كل المحال
وانظر عيان في طلعتك
كل التناقض في حوار
يحمل الوف المعجزات
وكتين تسكن الطيبه دار

[خالد علونى]

انسي
لملم باقي الشوق الفيك
وخبي جراحك
وامسح باقي الدمع النازل
وعيش فب براحك
انسي الجرحك
ولملم فرحك
وسيبا الحلوه
خليك من ريدا الضامر وجعك
وقاصد يسكب فيك الاهه
انسي عيونا الاسره فؤادك
وانسي الكان في يوم جواها
وسيب عينيها تقاسي العشتو
وزي ما بكيت وريها الاهه
لابتستاهل دمعة عينك
لا اللهفه السابقه عليها ايدينك
لا الاهات الطاله تشابي
ولا الزفرات الحامله حنينك
لا الكلمات القلتها ليها
ولا الدمعات الفي خدينك
لا بسه تطل
لا قولا يبشر وفرحو يهل
لا وجعا بحرق جوه الجوف
لاحرف الباين فيه الخوف
لا الريح لا النسمه
لا النور لا العتمه
لا شعرا بزرع فيها البسمه
لا القول الواضح لا التلميح
لا نظما قلتو بيان وفصيح
لا الجوه الجوف
لا الزيف لا الخوف
لا ندي بيطوف
لا زهرا يعطر جوه خريف
لا شتا لا صيف
لا بتستاهل كلمه حنينه
لادمعة حب تتهادي وانينا
بيزرع في عينيك الخوف
لملم باقي الجرح النازف
وودع روضا
خليها تجرب معني الوحده
اساها وشوقا
وتساهر زي ما انت مساهر
وتحسب نجم الليل من فوقا

[خالد علونى]

ايه الحصل
ايه الحصل بعدك
لا الدنيا اتهدت
لا حبل الوصال فارقني
لا النسمه من بعدك
رحلت وسابتني
لا اللهفه والاشواق
بتطفي شعاع شعري
لا عيني جفت النوم
لا الفرحه ضلتني
لا كثره الترحال
هدت عزيمة الشوق
لو فاكره انو هواك
مالك زمام امري
او قايله من بعدك
بيطول ظلام فجري
شان تقسي وتغيبي
وتقولي سبتي هواي
ونسيتي حبي الكان
في الدنيا نبراس نور
يهديك ضي عمرك
تبقي انتي مخدوعه
وما عارفي ايه قدرى
خليك في تيهك
واصلي العناد وامشي
وخليك في دربا
هدد كمال بدرك
ما ني البضيع في وراك
لا بضنيني طول هجرك
لا بتقدرالايام تمسح كلام معسول
نسجتو من اعماق
كانت منابع حب يوماتي ليك ترحل
لا بتقدر الاحزان
تكسر شعاع وصلك
لا كتره الاهات بتجيبني في دربك
بنساك مهما كان
لاعشتي فيني نغم
ولا دمتي ذكري انسان

[خالد علونى]

امل
وغبتي عني
رغم اني لسه حافظ ليك زكري
سبتيني لي الشوق والعواطف
تايهه بين اعماق ومرسي
ورغم قصتنا الكانت
باقيه في قلبينا غرسه
ورغم ضعف اللهفه والشوق والتصالح
الا انتي في قلبي لسه
ما لانك كنتي دنياي
ولا لانك لسه جواي
ولا عشان عينيك كانت
تهدي لي لحظات صفاي
ولا عشان ذكري بتالم
لما اتزكر بعادك
ولا لاني انا كنت قابع
جنه في اعماق فؤادك
بس لانك كنتي انتي
انتي بي بوجودك وذاتك
كنتي في الاعماق مواسم
وكنتي لي الافراح مراسم
وكنتي لي اللقيا احلي قاسم
الا بعدك هو المحير
سبتيني لي الشوق البسهر
وخليتيني في ابعاد مسافه
لا بتوصل لا بتودر
وقلت باكر علي تهلي
تزيلي همي وتبقي ضلي
وانتظرتك دنيا جايه
باني فيها كل املي
حكيتا لي الليل والقمر
ورويتا لي النيل والشجر
وسقيتا من حرفا معني
وغنيتا في الاهات وتر
لكين لقيتك يا حياتي
غابه في سكة ضياع
لا فيها املا بي الرجوع
لا فيها قلبا لي يبر
ولو كان بينفع اني اقولك
عودي لي يا نور حياتي
كنت قلت
لكنك انتي اخترتي بعدي
وقلت لازم تنسي بدري
قبل رما قصتنا تطول
ويبقي صعب عليك هجري
بديك خاطرى
غيبي زي ما عايزا وانسي
قولي هو الظالم وناسي
وقولي حبيتو وبقاسي
لكني يوم ماتهلي بقبل
اني ارجع ليك تاني
لانك انتي كل حاجه
دنياي وافراحي وسهادي
وحته مني ومن سعادتي
واملي اللباني عليه حياتي

[خالد علونى]

غلطه
بتقولي ما قال فيني شي
وانا يا هواي خطيت وما خليت حرف
وسقيت وما خليت جرف
ووهبت ما هماني شي
واجي في النهايه القاك
مجرد شي بيلوح من بعيد
لا انتي انتي
ولا الحروف المترعات
بي الشوق تجود
لا اللقيا تفتح باب امل
لا العين توادع في الهجود
النسمه صبحت ريح عتيه
والبسمه صبحت صرخه جواي
والقلوب المشبعات
بي الالفه صبحن زي تكيه
وانا في هواك
تهت وشكيت
وكتبت في حسنك كلام
ما قالو زولا قال شعر
دررا تلاحق في الدرر
انوار صباح
بتضوي في الكون من فجر
غنيتك احلي صباح عيون
وسقيتك النبع الحنون
وسحرت ما خليت فتون
وبهرت ما خليت سكون
واجي في النهايه
القاك مجرد شي
بيلوح من بعيد
لا اللقيا تفتح باب وداد
لا حرفك يشتل فى الكلام
زهرات وصال لا شوك بعاد
وبرضى فيك ما قلت شى ؟
معليش خلاص
قاسى الدروب انا كنت فاكروا
بلاك تب ما بتمشى
لكني يا حب السنين
بقدر اسير من غير هواك
مشوار فرح
نديان وزاهى ومنتشيى
ولو كنتيى فاكره هواك رسن
بتقودى بيه حرفى العصى
مجبور اقول ليك يا خداع
فرقتك هى اهم شى
لا عاد مهم شوفة عينيك
لا بسمتيى
ولا دمعتي
وما عاد فى قلبى مساحه
ليك يا حلوه انتى اصبحتيى
فاى
فى دنيتى

[خالد علونى]

بدون اسباب
بدون اسباب
تغيب عنا وتجافينا
تقطع لي حبال الوصل
تنسانا وتعادينا
نتوه لا نلقي سكه ريد
ولا عينيها تهدينا
ويوم نلقاها صدفه تحن
وتسال وين اراضينا
تقول ليه سبنا عينيها
وهى الدئما في عينينا
وتشكى توسد الاشواق
وما عارفه الحصل لينا
ولما نقول ليها انتي جفيتى
بديتى الفرقه لما نسيتى
وسبتينا لى رياح الشوق ونار البين
تخاصمنا وتعادينا
وتزرف فى الدموع امطار
تحيرنا وبتشقينا
وتقول وحياة صباحاتكم
انتوا الديمه فى الخاطر
ساكنين الفؤاد والروح
بشوق ماليه حد واخر
ترجعنا وقلوبنا الحيره مالكاها
ما بين الفراق والشوق
وطول الغيبه والاهه
وطيب اللقيا والكلمات
وروح الفرحه عاماها
وماسات القلوب وكتين
تكون فاكره الحبيب ناسى
وتلقاه فى الدموع غرقان
وحيلتوا الدمع افناها

[خالد علونى]

مدخل
كل الكان بيناتنا انسيه
لاكى الكلمه
ولاك الشوق
لاكى الوعد المستنيه
شيلى فواصل الحرف المنك
وعد الريده البينا اخفيه
وغيبى وحاتك
من غير رجعه
ايه المنك
شان ابكيه






لاكى الضى
لاكى الضى
ولا شمسا بتشرق
فى ولا فرحا
غزلتوا وغاب
ولا الريد اللمالكنى
بلم الفينى واتناسا
عشم ريدك بخلى اسى
اسطر فى الفؤاد افراح
الون حرفى بى البهجه
يسيل موج الحزن
وينزاح
واغنى معاى
عشم ريدك
صبح منفى
وكل البى ما لهفه
ولا اشعار ولا اوزان
اخت فى خانتك الوجعه
واسد فى وشى
باب رجعه
واقول مرحب
اذا الافراح معاك وبس
حباب الاهه والدمعه
اذا انتى الشمس والضى
حباب العتمه واللوعه
واذا ما سكتك احضان
حباب فى بعدك المنفى
وببقى بلاك
اكف وهج الشمس
بى القول
تعدى على ياما فصول
معتفه بى جمال باكر
يسيل منى الكلام معسول
وارحل فى مدائن الريد
اخلى هواك فى المجهول
لانو هواك
لاهو الضى
ولا شمسا
بتشرق فى
ولا فرحا
غزلتو وغاب
ولا الريد اللمالكنى

[خالد علونى]

خاطر الوفاء
شلتك على خاطر الفرح
ياغاليه رغم البى
من اهات هواك
داريت غرامك
فى الفؤاد
سكنتوا حرف الاغنيات
ورسمتوا فى العينين فرح
مشوار بطول
ويقصر معاك
وسقسيوا
من نبع الوصال
كت فاكروا
اوفى من الملاك
لكنوا جازانى الدموع
عود ليالى السهر
بكانى لامن ارتويت
من دمعه فى الخدين تمر
وادانى بدل الابتسام
اهات تمر مر الدهر
هدهدتوا لو بنفع حنين
عاتبتوا لو بجدى العتاب
سامحتوا رغم انو القسى
ومشيتلوا فى جمر الصعاب
وزرفتوا فى الوجدان دموع
وياريتا
لو ردت هواك
انا ظنى فيك
كان تبقى لى
القاك فى مشوار هواى
تبقيلى فال
وابقاك ضى
نمشيه دربنا بى الحنان
نرويه
من كلماتنا رى
القاك شمس الله التهل
تبقيلى
فى غنواتى دل
تشكيلى من طول الطريق
وكتين ادينا بتنفصل
وابقالك الكون بى صفاء
فرح السنين الاختفى
وعمرا بشيلوا
عشان هواك
تلقيه فى الايام دفا
وانا ظنى فيك
كان غير كدا
لكنوا خاب الفى الفؤاد
جازيتى حلمى معاك
جفاء
شيلينى فى ايام مضت
انا لسه دنياك بعرفا
زكراك فينى
محال تغيب
حت لو ضياك
منى اختفى
انا لسه شايلك فينى زاد
شيلينى
فى خاطرك وفاء

[خالد علونى]

فجاءه اختفى
ماكنت فبلك مستريح
لا لوعه لاحب لا جفا
متوسد الفرح الجواى
نظرات عيونى وبعرفا
خلتنى اهواك واصطفيك
دمعات عيونى اكفكفا
واجتر ذكراك فى شجن
يا دنيا كانت مترفه
لقيتك انتى جواى فرح
واحساس غناى بيك اكتفى
وهويتك انتى
عشقت فيك صوتك معاى
انى القاك فى جواى
ترنيمه فى شعرى وغناى
فى ضحكتى وولهى وبكاى
فى بسمه تتغلغل فى جواى
فى اهه بتزيد من اساى
فى قسوتى وضعفى وشقاى
فى خطوتك ترتاح معاى
سقت الخطاوى عليك فرح
جاييك يا سعدى وشقاى
خاتيك فى ثغرى ابتسام
جواك متوسد هواى
ولقيتنى جواك نور عيون
مسكونه بى حسى وهواى
وفجاءه اختفى
كل الحنان الفى العيون
الالفه والريد والوفاء
مدة يديك
نظرات عينيك
صوت همستك
الشوق وكلمات بعرفا
كل البينا صبح عدم
فى لحظه والوهج اختفى

[خالد علونى]

سكة هواك
غيبتك الطولتى فيها
معقوله ما جاوبت نبضك
ولا ماسهرت عينك
وطيفى ما زارك فى بعدك
ولا ماحسيتى بى
وانا كت بتوه
علشان اصلك
وبعد ما عادت خطاك
ونورت دنياى شمسك
غايبه ليه وحياة جلالك
وشايله من عينى فرحك
ويوم خطاك جات
بى طريقنا
لو وصلت ديارنا مالك
عينى ما شافت وحاتك
الا حسيت بيها جيتك
كان مناى انا بس اشوفك
ما الحنين اسرنى برضك
وكت بمنى يزول اساى
يوم تسالم ايدى ايدك
والعزاب الفينى طول
يوم اعاتبك بمحى ريدك
والليالى الفيها جافا
النوم عيونى عشان صدودك
تمضى زى قولة
بحبك
لما تفلت فى ردودك
وما بعاتبك
الا قاسى على وحاتك
انى احسك
انتى جنبى
ونبضى نبضك
ولما اقول اشكيك لقلبك
بلقى طيفى بناجى بعدك
ويانى فى سكة هواك
ولسه مستنيها جيتك

[خالد علونى]

زمان قلت
زمان ما قلت بتريدنا
شنو الخلاك تنسانا
شنوالبدل ملامح الحب
وخلى فؤادك يسلانا
بعد ماكنت نور العين
واحلى غرام
فى دنيانا
مواسم من فرح غامر
امل فى دروبو ودانا
والق راسم ملامحك ضى
فؤاد عايش بى زكرانا
زمان قلت المحال انك
تشوف غير ريدنا
ليك دنيا
وحاة ريدتانا
ياغالى
كتير انك تبدلنا
ونشوفك زى حلم عابر
سراب مر مرو
هو الحالى
ونلقاك فى العيون افراح
موشحه بى الاسى البالى
زمان ما قلت
نحن هواك
ونور دنياك وامالا
وشلتنا فى فؤادك ضى
غناوينا
وحكاوينا
ومعزتنا
تساوى الدنيا بى حالا
واتنكرت لى الريده
سقيت عزة هوانا اسف
رسمت الاهه فى غنانا
عرفت تجور وتجرحنا
وتعاند انت لى هوانا
وتشيل من ريدنا
ليك احزان
وتهدم انت دنيانا

[خالد علونى]

ماعليك
مايهمك جرحى منك
لا العزاب العشت فيه
لا الحنين الفينى ليك
لا لقاك المشتهيه
وما عليك لو تهت
بعدك
والحزن ادمنت فيه
والفؤاد عشق الجراح
ودمعى سال
يلطم وشيهو
والشجن جواى تعمق
دربى
مجبور امشى فيه
يا عشق مالكنى حتى
انى حبيت جرحى فيه
انى ابقى اسير جراحو
وطيف عيونك ارتجيه
واستميل قاسى القوافى
والقا زيك
فى رويهو
وامشى بى درب المواجع
وبرضى راضى
بسعيى فيهو
يا معتقه بى الجفا
قلبى يوم ما ترحميهو
والحنين الفينى ليكى
ابقى ديمه اتجاهليه
ولو فؤادك
جابا سيرتى
خاطر الريد اجرحيهو
والسلام المنى ليكى
ابقى ديما اتجاهليهوا
اصلى راضى اكون معنى
وجرحى
فى دربك بجيهوا
بس تاكدى
انو ريدك
لحظه ما فرطت فيهوا
وسيرتك الدائما بجيبا
باقيه فينى وباقيه فيهوا
والاسى الدعب فؤادى
عشت طول عمرى
ارتجيهوا
ما الفؤاد علشان يحسك
راجى ظلمك
يوم يجيهوا

[خالد علونى]

مديت على سكة هواك
يا غاليه
كلمات من اسى
احرف على الزمن الذى
توهنى بين عل وعسى
وختاك فى البال زكريات
لكنو لى وصالك نسى
وبقيت
اصارع فى الحنين
دمعاتى فى العين احبسا
اتوسل الاحرف تجود
ترحم فؤاد النوم نسا
راكب خيال الشوق دوام
مسكون
وساكنو الفيو سلا
واقف على شفة الضياع
لو مره منك طيف غشا
او حس انو هواك رحل
واحلامو هداها الاسى
تلقيهو فى الزكرى التمر
بى الحسره
زى النرجسه
وكتين يطول بيها الحنين
لى قطره
من ندى تنعشا
تديها احساس الوجود
وتدينى
احساس الرثا
مديت على دربك خطاى
لو القى فى الامال
ملاذ
اقدر الون
بى الحروف
كمين من الافراح رزاز
وارسم على وعد اللقا
بدل الخصام الفى الحراز
دنيا
بتنور بى الامل
والقاك يالون الفرح
رغم البى من العزاب
الوحشه
والضنى
والاسف
اللوعه
والخوف
والبعاد
الدمعه فى الطرف الكسير
والخاطر البيك محتفى
كل ما النسيم منك يخف
الاهه
والنوح
والوقوف
فوق الجراحت الترف
مدة اياديك فى السلام
وخطاك ماشه على تزف
كل الاهازيج والغنا
الق المواسم والمنا
قطبة حوجبك فى العتاب
ضمة شفايفك والسنا
كل الحنين الفينى ليك
سكة مشاويرك وانا

[خالد علونى]

قريب منك
وبسال يا صباح الخير
اذا وعد الهوى نسينا
اذا الافراح بقت فى الناس
كلام فى لحظه بتلاشا
يغيب فجر الامل
يرحل
ويزبل فى العيون الحب
ويكون
درب الجراح ممشى
ويغيب القا سكن فينا
بتقدرى يا حلم باكر
تبقى انتى الامل والفال
وعاطفه حنينه جياشه
تهب نسمة حنين
تنساب
وفى الايدين تبين رعشه
تنوم فى خاطرك الافراح
واجيك شايل
فواصل القول
اصابحك بى فرح منساب
واخت هم همى
فوق همك
اقالدك
ويبتسم جواى
بعد طول الغياب قلبى
واغنى مع النسيم الهاب
ادوزن بى الوصال نظمى
واشيل من رقتك لمحه
واشوفك فى البعاد
كلمات
تداعب فى الامانى الجات
بعد كتر العزاب فرحه

[خالد علونى]

طافت بخيالى زكراك
مع انى لا املك سببا
يوحى للقلب بزكراك
وتسائلت
لماذا انت
فى القلب حضورا براق
تشتاق اليك
حروف الشعر
وتوقظ فى نفسى الاشواق
وبرغم الناى
وبعد العين
الا انك فى قلبى
اشتاق اليك
ولا ادرى
علام الشوق وانت هنا
انا لا اكتب
حين بانك عندى
وحضورك يتلالا فرحا
لكن حين احس ببعدك
تنداح الاشعار وتترى
فى حضروة بعد الاحداق
احن اليك
فياتى النظم
بجلالة شوقى وفراقى
استلهم منك قوافى الشعر
اخط بدمعى اشواقى
يسالنى الناس عن الاشعار
وعن حزن
يبدوا فيها
انا لا اعرف سببا
يجعلنى فى عين الناس
غريبا او مجنون
اشتاق وفى شوقى شوق
وتطل من عينى شجون
قالوا
لم لا تكتب فى الافراح
وفى لحظات ادمنك فيها
لم لا اهتف بحبور طاغ
وحروفك جهرا ابديها
ولماذا هواى
سجين الشوق
فبماذا اجيب
ااجيب بانى
اهوى النأى
اشتاق لبعدك ياعمرى
ام شخص مجنون لاه
يهوى يا زاتى الاحزان
يخشى ان يفرح يوما
فيغيب عن الافراح زمان
ام اخشى قربك يا زاتى
حتى لا يبعث
فى نفسى
اشعار الفرح الرنان

[خالد علونى]

عندك شئ يبهرنى
يشجينى يملاء اكوانى
بعبير وردى اللون
باحلتى تزدان بهاءا
فى حضرة اجلال العين
عندك شئ ياخز منى
كل حروفى
يجمعنى بالفرح
القادم من اوراقى
يدخلنى دوامة عشق
تاخزنى فى كل مدار
فيك سحابات من شوق
تمطر فى اوقات الصيف
تتنزل قطرات تسقى
عطش الايام مع طيشى
تدفعنى فوق الكلمات
تزرع حبك فى قلبى
اشياء من زمن ات
تلهب حبك مثل رياح عصفت
بالغصن الباكى
عندك شئ يزهل حسى
حين يلوح
يستنجد منه القلب
حين يداعب عمق الروح
يستجدى كلمات غرام
تتابى حيث يكون البوح
عندك شئ قيد
الاف الكلمات
يزيع الصمت
على ابواب الدهشة
حيث يكون
ويثير كوامن اشعارى
حين تفارقنى العينين
عندك شئ زلزلنى
كبل انغامى
ادهشنى
الجم اقلامى
وتركنى
كغريب ضاعت
من دنياه امانى
صرت بلا عنوان ابدوا
ووراء تيار يعيينى
اعدوا
استلهم لحظات وصالى
من عمق التحنان البادى
من خلف عيون اثقلها
بعد الحب
وكثر السهد
بجريرة مجنون لاه
لايعرف للحب مكانا
عندك شئ ضيع ودى
بين قوافى الاشعار
ضيع منى
نبع الكلمات الجارى
اخفى عنى كل حروفى
حين اطل بلا استئزان
انبت فى اعماقى غرسا
ملك القلب مع الوجدان
عندك شئ لا اعرفه
يملاء قلبى احساسا
بانى قد اغرسك حروفا
تنبت يوما يا اشجان

[خالد علونى]

وتركتنى شبح
من الاشواق يقزفه النوى
تتراكم الكلمات فى قلبى
ويثنينى الجوى
واحط اشرعتى
على انقاض مملكة
تبددت فيها معالم الافراح
وانتزع الهوى
وانا هنا
بين قضبان المشاعر
كبلتنى ازرع الاهات
فى زمن تتجدد الكلمات فيه
بلا عائق
يسترد فيه الشعر قوته
وتنعدم المشانق
وتطل من افاقه
بيارق الامال
نتطفئ الحرائق
لكن يؤرقنى سؤال
واحد يثنى مخيلتى
عن التفكير فى الكلمات
تنتصب العوائق
هل فؤادك
مازال ينبض بالحنين
هل رقة الكلمات
مازالت على العهد القديم
هل انت مخلصة
ومؤمنة بان تبقى
على حبى على مر السنين
الا تغيرك الحوادث والظنون
ونظل ننثر شوقنا
فرحا يقويه النوى
ان صح ان الناى
لا يسلى المحبين
انا فى يراعى رقة
عفرتها قوة الاهات
فى الزمن الحزين
انا فى هواك
كقطرة الماء المحبة للحياه
تترجل من اعاليها
لتوهبك الحياه
شعرى من الزمن القديم
لان قلبى قد احب البحترى
طافت عوالمه باشعارى
والهمنى الحنين
واخزت من عينيك
رقتها
وجرئتها
وسكبت فيها من حروفى
ما اضاء لها الطريق
لتسير فى زهو
تقول بانها
الهام هذا الشعر
قوته
ونظرته
وجراته
وكل ما ينداح فيه
من الحنين
تشتاقنى الكلمات
ان حل المساء
وتصوغنى فى الصبح
اشعارا تكون بها الحياه
وقد وهبتك من حروفى
ما تنوح له المقل
وزرعتك فيه زهرا
ومروجا تنتقل
كلما اضنانى الشوق
واغوتنى القبل
لكن برغم ما قلت من الكلمات
الجمك الجوى
واخزت من قلبى
مزامير الهوى
وتركتنى
شبح من الاشواق
يقزفه النوى

[خالد علونى]

عام مضى
وانت تقبعين
فى قياهب النوى
تسهدين طرفى الحزين
تزرعين فى الفؤاد
خوف ان يطول
بى الجوى
عام مضى
وانا اصارع الحروف
اغالب الدموع
ارتوى فظاعة
اطوع الحروف
كى تعالج الذى
توسد المقل
وازجر الفؤاد عندما احسه
قد اسدل الستار حائرا
يغالب الاهات تارة
وتارة يكفكف الدموع
من على الخدود
معلنا نهاية الترحال
عام مضى
بلا جديد
مز رحلت يا ملاكى الفريد
يابريئه
كلون موجة تداعب النسيم
يا انيقة
كزرقة السماء
كاللجين
كالربيع
كالذى سكبته
من مقلتاى
كالورود حين تنثر العبير
عام مضى
وانا الملم الاوراق
باحثا عن الذى
قد هده الهوى
وشاع انه اضحى غريبا
بقلبك الحبيب
مكبل الخطى
يصارع السهاد والنوى
ويطلب الخلاص من هواك
كى يعاود الرحيل
من رباك عائدا
لمقلتيك يا محبة النوى

[خالد علونى]

قالت اكتب شيئا عنى
سطر اسمى فى الاشعار
انقش بحروف ولهى
اسمى فى سفر التزكار
ضم فؤادى
بين سطور العشق الساكن
فى اعماق
تحيا
ترقص
تسبح
فرحا ليل نهار
تصرخ
تبكى
تحزن
من اعماق النفس وتشكى
للانجم ظلم الاخيار
نحن اناس
لم نتعود
يا سمراء الزيف
نكتب حين نحس الحرف
تغلغل فى اعماق الروح كطيف
فارق جفن الحب زمانا
ثم اتاه بشوق يسرى
فى الاوصال كنسمة صيف
نكتب حين نحس
الناس تطير الينا
او قد بان عليهم زيف
حين تجيش بنا اشواق
تسرى فينا مثل الطيف
او كشعاع البرق ضياءا
حين يلوح حبيب الروح
لم اتعود يا سمراء
رياءا فى كلماتى
لم اتعرف معنى الخوف
لكن عندك شئ خارق
شئ فيك يشد اليك
يلزم حرفى
ان يتعم معنى الخوف
حين يصاغ لمثلك انت
وحين يداعب فيك بهاك
ويمثل عندك مثل الطيف
حين يمنى الروح بوصل
يسكن عمق الروح صداه
حيث الصمت يكون كلاما
بفهم لكن يبقى سرا
فى الاحداق
وكما الاشياء الحلوة
تسكن روح الروح
بلا استئزان

[خالد علونى]

وانقطع الحرف
اقسم الا ينساق لحبرى
تجمد فى الاعكاق
وعاند مجرى حرفى
كان كشلالات النيل
هديرا يجرى
ثم توقف
سكن كصوت
صدر بملئ الفيه واخرص
قال سلوت الحب وانى
صوت الحب الحانى المرهف
انين القلب
المنبع عندى
وبالنظرات ترانى مشقف
استنطق بسمات الاحباب
ازوب على الليل المسدول
واوصف معنى العشق
بلا كلمات
حين تكون صفى الروح
وقلبك مرهف
وعند الناى اقول وداعا
زاك زمان ولى مجحف
قلت بربك لطفا حرفى
اسمع قولى
هل انت سواى
اترانى سواك
يكفيك تقشف
ما الحب سوى روض
زبلت فيه الزهرات
وسكن سماه
الليل الموقل فى الوحشة
دون توقف
خان الحب عهود هوانا
ظلم فؤادى دون تلطف
قتل البسمة ياروحى
علمنى معنى النسيان
ارهقنى بالليل شجونا
ابكانى بجريرة حبى
اسقانى كاس الحرمان
الجم صوتك
حرك فى الخوف الكامن
علمنى كيف الانسان
بلا سبب يظلم انسان
كيف الدمعات بلا حزن
تسكن خدان
عاشا زمنا
بين الاهة والحرمان
ثم تجيئ بكل القسوة
تهجرنى
تتهم فؤادى بالنسيان
وتصادق ذاك البدر
الظالم
تستاثره بحلو القول
تخفى عنى وزن الاشعار
تناى عنى
وانا علمتك ياهذا
معنى الاشعار
معنى الكلمات ورقتها
علمتك كيف يكون البوح صراحا
دون ستار
علمتك كيف تكون جريئا
كيف تعاند ياحرفى
مجرى التيار
علمتك ان الحب طريق
ما اختلف اثنان عليه
الا ضلا
علمتك ان الحب جراح
ومتى الناى يكون مباح
ومتى الهجر يكون لزاما
ومتى الدمع يصير رياءا
وكيف الكلمات بلا وزن
تبقى اشعار
وكيف الانسان بلا قلب
يصبح تزكار
علمتك هذا
وتقول بانى غير جدير بهواها
لم تتعلم يا حرفى شيئا
اسفى على ما قلت صراحا
لكنى لن اتوقف
سافارق روضة احبابى
فكفاك فؤادى
كفاك تلطف
سنجد سواها
مهما طال الليل ستعرف
ما الفرق بين ان نهوى
لنعيش
وبين العيش لكى نهوى

[خالد علونى]

يوما ساعتزل النساء
يوما سارحل
من ديار البؤس
والحب الخواء
يوما ساركل
كل ما فى الحب
من شح النساء
دارا ولجت براحها
فى لحظة استهتار
وسكنت جنتها
فامست نار
وكتبت فيها جل ماينتابنى
عصفت بزاكرتى
واشقانى الدوار
مجروحة ايام عشقى للنساء
تدمى كما الدمعات
تخترق الفؤاد
وتنتهى دون ارتواء
ملعونة كل الحروف
المرسلات الى معزبتى
هباءا فى فناء
مرسومة فى حائط الزكرى
تهيجنى كما ريح الشتاء
ملعونة كل النساء
صنف تلون مثل حرباء
يداهمها الحياء
مثل التماع البرق
مثل الخنفساء
خداعة مثل البريق الكازب
مثل انتصاف الارض
يلفحها الضياء
مثل اقتباس النور
من نفس الشقاء
مثل المواجع والظنون
والكلمة الصماء
فى القلب الحنون
مثل التبرج
دون حسن او رياء
ملعونة كل القصائد
حين تخرج دون
ما شئ يداعبها
وينسيها الضنى
حين تمشى
فى ازقة عشقى المسجون
فى وكر العناء
حين تصعد سلما
فى الارض اسفله
وقمته هباء
يوما ساركل
كل اصناف النساء
واخط فوق دفاترى
عنوانى المولود
من رحم الشقاء
كل الكلام يموت
الا ما كتبت عن النساء
ملعونة كل النساء

[خالد علونى]

انت منى
كل حين فيك
بعض مواهبى
اصداء فنى
انت منى قطرة
نظرات تهمس بالحنان
ايام صيغت فى خيال الشعر
اوهام التمنى
انت منى بسمة
طبعت على ثغر الزمان
برق من الياقوت شع ثناه
اثلج صدر حزنى
قيدك المحبوب صنع مواجعى
وكلامك المعسول
رقتك اليريئة
شى من هواى
وبعض دنى
انت منى
ضحطة الافراح
وشوشة الحروف
على وريقات الندى
همسة النسمات
فى قلبى الحنون
وطيش فنى
كل حسن فيك منى
رقة النظرات
بسمتك التى تسترد السعد
الى قلب سقاه الدهر
الام الجوى
وبكاه لحنى
بدرك الوضاء
خديك ثغرك
ليلك المسدول
تحت خمار ثوب
العفة الزهرى
خطوك والتجنى
كل هذا بعض جرحى
لحظة طبعت على
وريقات الزواكر
انك كل المباهج والفتون
وكل افراحى
لكنك من انت سجنى

[خالد علونى]

الحسن اولى ان يجل ويتقى
وما خلت حسنك يتقى ببيان
كملت حتى ما انتقصت بزرة
وسموت ليس بالامكان
ان يستشف الحرف بعض محاسن
فالنور لا يحويه قط مكان
وصفوت كالياقوت والعقل انتفى
وغررت بى والكل طوع بنانى
اسرجت رحلى فى هواك مهاجرا
ذادى الهيام ووجهتى تنهانى
الله قدر ان اكون متيما
اضع الحروف على شفاء النيران
سبحان من رحم العوالم بالذى
ضم المحاسن خلقة ومعانى
وهدى الاوائل والاواخر كلهم
شمس العلوم وفتنة الازهان
الصادق المحمود احمد سيدى
روح الوجود وقبلة الاحسان
سبحان من خصاك دون عباده
بالقرب والتكليم والقران
وزكرت والرحمن فى سقف السماء
وسموت حتى نلت سبع مثانى
رحماك ربى ان عقلى مجهد
كيف الوصول الى عظيم الشان
انى وقفت بباكم متوسلا
فبحق احمد مهجتى ارعانى
وانعم بفضلك بالفضائل كلها
واملاء فؤادى بالهوى الربانى
انى انا العاصى اقر والتجئ
وجلالكم يارب زد فى بيانى
وانعم بعلمك يا عليم فما ارى
غير العلوم معظما للشأن
ثم الصلاة عليك يا خير الورى
ما ناح ورق او شدى اذان
او هاجت الزكرى على قلبى الذى
عشق المدينة دون كل مكان
او طاف بالمعمور عبدا راجيا
هبة العظيم لعبده الانسان

[صلاح سر الختم علي]

كنتي في الاعماق مواسم
وكنتي لي الافراح مراسم
وكنتي لي اللقيا احلي قاسم


اي نهر هذا الذي من اقصي الغابة يندلق؟

الحبيب المبدع خالد علوني

تعجبني العامية السودانية حين تصاغ شعرا جميلا
فهي عصية الا علي المهرة

توقفت كثيرا عند اكثر من قصيدة وبيت وتعبير وصورة
اعجبني القاسم المشترك: عناد وقوة ارادة حتي في لحظات الضعف البشري
اعجبتني القصائد العامية اكثر
لك محبتي

[خالد علونى]

كنتي في الاعماق مواسم
وكنتي لي الافراح مراسم
وكنتي لي اللقيا احلي قاسم


اي نهر هذا الذي من اقصي الغابة يندلق؟

الحبيب المبدع خالد علوني

تعجبني العامية السودانية حين تصاغ شعرا جميلا
فهي عصية الا علي المهرة

توقفت كثيرا عند اكثر من قصيدة وبيت وتعبير وصورة
اعجبني القاسم المشترك: عناد وقوة ارادة حتي في لحظات الضعف البشري
اعجبتني القصائد العامية اكثر
لك محبتي

استاذنا صلاح سر الختم
كل التحايا ولالود لك وانت تتفرد بمرورك علي هذه الزاوية أو الركن القي الذي انزوت فيه اشعاري باحثا بين ثناياها عن مفردة قد تكون معبرة



العامية لغة جميله لو احسن لتعامل معها وصيغت بالصورة لمطلوبة وكم تمنيت لو كانت كل اشعاري بالعامية لاني اجد نفسي فيها اكثر من الفصحي ولكن الكاتب لا يختا اللغة التي يكتب بها ولكن الحالة تفرض عليه للغة



ختاما لك مني كل الود ودمت

[تغريد]

خالد علوني

قصايدك جميلة خصوصا العامية كما تكرم أستاذنا الكبير صلاح سر الختم

فالمعني خلالها يظهر أكثر سلاسة

وتخرج الأحرف طائعة

ولا يلغي هذا جمال القصائد بغير العامية

أكتب دوما ونحن سنقرأ لك بشغف

فقد تعودنا وجود حروفك

تحياتي

[خالد علونى]

لك مني كل الود علي هذه المشاركة التي كت أتمني أن تكون أكثر تعمقاً في المختارات

[خالد الزين]

استاذي خالد
عطرات المعزة والتقدير
كثيرا جدا ماانقب عن حروف واشعار ندية تروي عطشي للجمال
وهنا كل الجمال

[همسات]

علوني كلي دهشه وانبهار
ماذا عساني ان افعل
غير التصفيق فخرا بهذاالقلم
بهذا الاحساس وبهذا الاسلوب المتفرد
في السرد وفي الكلمات وحتي في الاحساس
وفي العمق الذي يجتاز فينا مواقع الحس
الي ماهو اكبر ...........
تحياتي واحترامي

[الملكة اسماء ( ام محمد )]

اين انا من هذا الفيض الشفيف

لي عودة باذن الله وبلا شك