حكاية السرة بت عوض الكريم......حميد

[فتحي همام]

دى من القصائد التى القاها شاعرنا المبدع حميد فى الدوحة
غايتو يا تغريد إحترت انزلها فى الثقافى و اللا الأغانى
و اتوكلت على الحى الدائم و نزلتها فى الثقافى
و بعد ده انتو مخيرين تودوها محل ما دايرين
:p:p;);):p:p





http://www.youtube.com/watch?v=1Tg6cStcBzw

[فتحي همام]

جزء 2


http://www.youtube.com/watch?v=gJwIoXVYh6s

[فتحي همام]

الجزء الثالث



http://www.youtube.com/watch?v=PJu7hYIcTnI

[فتحي همام]

الجزء الرابع



http://www.youtube.com/watch?v=roafnAGbIO4

[تغريد]

[QUOTE=فتحي همام;477617]
دى من القصائد التى القاها شاعرنا المبدع حميد فى الدوحة
غايتو يا تغريد إحترت انزلها فى الثقافى و اللا الأغانى
و اتوكلت على الحى الدائم و نزلتها فى الثقافى
و بعد ده انتو مخيرين تودوها محل ما دايرين
:p:p;);):p:p



شكرا جزيلا أخي فتحي علي هذه القصيدة الجميلة جدا لشاعرنا الجميل محمد الحسن سالم حميد التي تحوي سردا واقعيا لحياة المقهورين من أبناء الوطن كلمات جميلة معبرة تدخل القلب مباشرة بلا حواجز

قصيدة جميلة مكانها القسم الخاص بالفيديو الا أذا نويت ان تجعل من هذا البوست يحوي كل أعمال الشاعر القدير من قصايد وشعر مكتوب عندها فقط سيبقي في القسم الأدبي من الثقافي

تحياتي يا همام وحقيقة انت همام جدا ومشاركاتك أنيقة

[فتحي همام]

[quote=فتحي همام;477617]
دى من القصائد التى القاها شاعرنا المبدع حميد فى الدوحة
غايتو يا تغريد إحترت انزلها فى الثقافى و اللا الأغانى
و اتوكلت على الحى الدائم و نزلتها فى الثقافى
و بعد ده انتو مخيرين تودوها محل ما دايرين
:p:p;);):p:p



شكرا جزيلا أخي فتحي علي هذه القصيدة الجميلة جدا لشاعرنا الجميل محمد الحسن سالم حميد التي تحوي سردا واقعيا لحياة المقهورين من أبناء الوطن كلمات جميلة معبرة تدخل القلب مباشرة بلا حواجز

قصيدة جميلة مكانها القسم الخاص بالفيديو الا أذا نويت ان تجعل من هذا البوست يحوي كل أعمال الشاعر القدير من قصايد وشعر مكتوب عندها فقط سيبقي في القسم الأدبي من الثقافي

تحياتي يا همام وحقيقة انت همام جدا ومشاركاتك أنيقة


شكراً أستاذتنا تغريد على كلماتك الجميلة
و يا ستى ولا يهمك و سأجعل هذا البوست يحوى قصائد كثيرة و جميلة لشاعرنا المبدع و الجميل حميد
و طلباتك أوامر ;););)
تسلمى

[فتحي همام]

سيرة السرة بت عوض الكريم
ــــــــــــــــــــــــــــــــــــــــــــــــــ ــ
جات داخلِة
زيْ مرقة غضبْ
من جُوف حليم
في زمن صعبْ
رمت السلام
زي شنطة
من كتف المسافر
بي تعبْ
زي رُدْخَة
رٌبْ
الله يا رب
قعدت على طرف
العِنْيقرِيب
المحاذي الواطة
ضايرت التراب
كُسَر العَوِيش
الفوقُو
شالت بإصبعَه
وشختت شخِيت
الله يا رب .
عاينّا فيها
نكُوس سبب
للكفرنة
وفورة الزهج
من دروة البال
الوهيط
ما عودتنا
تدس عوج
تكتم فرح
زي حالة
الزول البسيط
صنقعنا
في قعدتنا
راجعت الوشوش
دنقرنا
عند رفعة وشيها
المُتعَب
الجاد
الرحيم
الطيِّب
السمح
المعافى
رِهاب .. رهاب
ينشاف وسيم
إنوهطت
فوق العنيقريب
القديم
ومن تاني
ضايرت التراب
كُسَر العويش الفوقو
شالت بإصبعه
وشختت شخيت
وقالت ..
تصدِّقوا ؟!
يا ولادي
بقيت أبيت الليل
ممحَّنة في التميرات
القُدر فوق رأسَه
ما خمّت سبِيط
غلبَه الجرُورة
الفوق ضهرنا
تنزِّلَه
وتطلُق وشينا
مع الجماعة
إشِن دهانا ؟!
دي كم سنين ؟
والحال وقف
قطَّ وحلف
ما فيهُو لَو نُقَّاط بسيط
كان بوشنا
في حشَّ التمور
الليلي دُوشنا
معَ اللقيط
أي لا حِكت
هِي ولا بِقت
ما كُنّا قايلين
في حياتنا
يجينا أقسى من المضى
ساعة مروق الإنجليز
قُلنَّا الظُلم فات وإنقضى
تاريهُو كَمْتَر
وقام دقون !
حلْفِي !
وعُشر !
مَعَيُوقَة !
نال ؟!
دِمْسِيسْ !
ضِرِْيسِي ؟
وشوك جُمال ؟!؟
...
...
الله يارب
كُربَك كُرب
عاوْلِي التمور
الأرضِ بُور
الناس حطب
باجُور شهور
غلبان يدور
ما فيش مطور
ويجيك بعد دا
علِم طَلَب ؟!
...
...
الله ..
يا ربَّ
العالمين
الما جحدنا نِعِمْتُو
في الشُوف والسمع
راحة الولادي
ولا قلوبنا عِمَن
ولا غيَّرنا دين !
في الجابُو
ما قصَّر حَمُد
في الشالُو
ما قلنَّا لُو
وين
ماشيبو ؟
وين ؟!
...
...
عدَلت نعال
مقلوبة
في الجيهِة اليمين
حدَرت يسار
زمناً مو دا
الحيكومة
كانت بت حلال
بي حالَه
بي حرب الجنوب
بي قِلَّة المال
في الجيوب
كانت رخيِّة العيشِة
إلاَّ تَرَا العوِين
الكِبْرُوا
كِبْرُوا مليَّسِين !؟
عِلِمُن يطير !؟
إن كان هُو
ما صلَّح عوج
ما فادنا شي
ومحَق القبيل
لمِّينا
هِينْ × هِين × هِين
آ حليل رجالاً
سكّتن
غدراً غشاهن بالقفا
ولليلِة سيفُن في الجفير
يهرِج سنين ؟!
...
...
دا زمن قواسي
زمن ضلالة
أوانطجية
زمن حقارة
زمن مُهين
لاقين هواكُن
ضرُّوا
ضرّ يا عسكرياً
ما اتَّعظ
كتل الرُقاب
بيودِّي وين !؟!
ضرِّي آجلاليباً رُهاف
زمماً خُفاف
ضرَّ يا ضرَر
ضرَّ يا دقين !؟
منسلبطين عَرَق النبي !
وبالنار بتلعبو
يا عَوين
للحُول قريب
درب السلامِة
تخوجُو
بي درب الحرب !
غطيي قلب ؟
ولاَّ الحرب
بقرة حلِب
والأرض صين ؟!
ما كان عمل
ما كان دا دين !
يا أرزقيِّة
تخمجوا دم
والدم مُو
مُويا
ومانا طين ؟
منسلِّطين في الناس
دَحِين
لامِن يجي
اليوم الفصِل
والحق يبين
وين
تمشُوا
وين
تنسلُّوا
وين ؟!؟
وكان طال
وكان قِصر الزمان
الحين بحين
كَب يا رجالاً
سكّتُن
غدراً غشاهُن بالقَفا
ولليلِة سيفُن
في الجُراب
يهرجِ سنين ؟!
...
...
وإتاوَّهت ..
وحسِّيت
بأعماق الشوارع
والتواريخ المجيدة
إتأوّهت
وأدَّتني عين !
صنَّت شِوَيْتِْين ..
كُوركَت ..
يا بت ..
شمشنا إندهدَهَت
هُوي
يا بِنيِّة وِكتنا راح
شُوفِيلي
شافِع بت فطين
جاء من الطحين ؟!
الله !!
فترنا من الطحين !!؟
...
...
وكان الوكت
زالَف عصر
عين الشمش
مشدوهة
بي دوْشَة سحاب
عرَق المراكبيِّة
البعاد
راحِل
معَ ريحة التساب
ما تدري مارقِة
من البيوت
الحلِّة
ولاّ من التراب !؟
التاس تقول
مدقُوقَة
طالعِة على الحُقاب
مفلوقة
بي حجر الصعاب
المُرَّة
نازلِة على البحر
مشروقة
بي موية السراب
الفرَّ
مشنوقة عقاب ؟
يا الحُرَّة
كيف بِقت الرُقاب
مسْيوقة
بي قيد السلاب
وإنشرَّ
من نشر الحجاب
في عروقَه
أشكدِّي الخراب ؟!
من بعدِ
ما انبلج الفرج
من ضِْيقتا
خدعوها بي حيلة كتاب
رفعوهو فوق
سِن الحراب
ودهت الهزائم
خِلْقَتا
فالناس بدَل
عن نِقَّتا
التلقى فكَّة ريقتا
وبدل القصور
الفي الخيال
التبقى ماهلِة
كِرِْيرْقَتَا !!
وما جاتَه راحةً
طَلَقَتا
إلاَّ التعمِّر
طَلْقَته
في بندقيةً
حقَّتا
وبي ها الشوارع
وبقَّتا
تنسدَّ منَّك
دقَّتا
ودم فلْقَتا
ومُر شرْقَتا
ونار شنْقَتا
يا دقن
دينك سرْقَتا !!؟
قطعَت وضوها
إنشرَّفت
مسحَت وشيها
إنشهَّدت
قالت نِست
ما تاقت الأوضة التحت
عند مرْقَتا !؟
دارت تقوم
جَبَد العَنيقريب
الحنيِّن
طِرْقَتا
عند نتْقَتا
رجَفَت بِشيش
رجفت بِشيشي
من الغضَبْ
ولاَّ من التعَبْ ؟
فتَر السنين ؟
ولاَّ الكُبر ؟
دا الما قِدِر
يمْسَح
سماحة خِلْقتا ؟!
زي نِيَّتا البيضاء
الشَعَر
وموِّيج بحر
كان الجبين ؟!
...
...
مدِّيت يميني
أساعِدَه
ردَّت يسارَه
تباعِدَه ؟!
وقالت لِي
أبوي ..!
وفِّر ضُراعك
للبلد ؟
وأدخُر مُرُوَّتَك
آولد
لي يوم بحين !
أحفض كرامتك
تحفضك ؟
الموت !
ولا العيش المهين ؟
الموت
نَفاد الما نَفَد
الموت
حياة الميِّتين
أَخَتاها جنِّة
معَ الفِقَر
وأدخُل
جحيم المتعَبين
وإن ما قِدرْتَ
علي دا
أبوي !
رب لك دقين ؟!
وضحكت ..
حمدنا الله
الحنون
جِيدَن خَلَقْنا
بلا دقون !!؟
وضحكنا زين
!!؟
؟؟!
وتاقَت حديثَه
على الخراب
الشُوفتُو
ما دايرا لَه عين
عقبت متاقاتَه
الرياح
رفعت قُران
شوكة سنط
ساسُويِي
جايي من المراح
يا خيري ودَّ
دي المستراح !
والشوكي
تحت الدُوكي
يا
داك الركين
الشوك بَمُرْقَ الشوك ؟!
وشوكاً فينا شين ؟
مرّاقو ربَّ العِزّة
شعباً ماب يلين
الجايي
حيكومتنا
لكن الزمن
دِبُّويي
داير النهمِة
وينكن !!
يا الخزين ؟؟
ما قلَّ حاشا صَبُرْنا
لَكِن لا مِتِْين ؟!؟
دعكت عيونَا
التوَّّعت
مسحت وشيها
وصنْقَعَت
كان الغيوم
إنجمَّعَت
تِقْلَت على الريح
النصيح
كان المطور
شوَْْوْوْ
ترَّعَت
زي باكي
فوق دمَّ الحِسين ؟!
لكن دا وين !؟
والتاني وين!؟
وإتلوَّعت
معقول !
في ناساً ما وِعت؟!
لليلِة
بالن بيَن بِْين !!
وكيف
وإنتو نوحنا
من الدَعَت
مؤمنَّا
من جُحر الدقون
الكاكي
يلدَغ مرَّتين
والتالتِة
قرْصَة أبُو الحِصين !
وحسِّيت بأنها
دمَّعت
شهقت عيونّه
الدمعتين
حسِّيت بأنِّي
مِتل حجر
جدعوهو
في نُصَّ البحر
قام البحر
بنَى فوقُو طين
حسِّيت
بأعماق الشوارع
والتواريخ البعيدة
إتأوَّهت
وأدتني عين !
...
...
ومرقت ..
...
...
متِل دخْلَة
غَضَب
صدر المسامح
والحليم
في أيام عجاف
كرَمَت ..
صداها ..
قفا السنين
...
"الجايي
حاكومتنا
كيف !
ومتين !
وين ‍‍‍‍؟"
...
ومرقت ..
مَرَاة
مرَقت
مرَاة
...
...
دي السُرَّة
بت عوض الكريم
مرَاة ..
ماب تلاوِز
لاب تخاف
زي الضفاف
الماب تهاب
ضَنَب التماسيح
والكلاب
قُومة البحر
ولاَّ الجفاف !
مَرَاة من قديم
مَرَاة بت قبائل
قالوا
لا
واختاروا في الحق
الجحيم
ومن رِفقة الفَسِل
الخلاء
وكانت نَعم
تدِّي النعيم
...
مرأة من صميم
ضَهَر الغلابى
الماب تنكِّس رأسه
غير ساعة الصلاة
أو ترمي تيراب
في التراب
أو تستشِف
وجهَ الأديم
...
...
السُرَّة
بت عوض الكريم
ما فيها
من عادة الحريم
غير السماحة
القدَّمت
قُدم الدهب
حافضنو
في حُقاً قديم
في أقصى كِيم
ما فيها
من طبع الرجال
غير الأيادي
الخشْنِة
زي قولة النصيحة
وكت تعكِّم
في الصميم
ساعة يكون
الحُكمِ ضِيم
...
...
...
تسعين سنة ؟!
ويا السُرَّة
بت عوض الكريم
بصرِك بصير
سمعِك سميع
نضمِك نضيم
بالِك محلُّو
صبي وسليم
تسعين سنة ؟!
وعُودِك أمدَّاً
ما انحنَى
شامخ
بلا البان القديم
تسعين سنَّة !
ومن فِتنتِك
إستغفر الله العظيم .؟!
...
...

[فتحي همام]

سوقني معاك يالحمام
... ...
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ما المحنة
وأيادي تقطّر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حباب الحبان في بابه
وتدخلوا عليّ الحرام

فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقرايي
خزين مدخور للجِسام
تتمر نيتو التخايي
إلاما مذهلل إلام

درب من دم ماب يودي
حرِب سُبّه .. حرب حرام
تشيل وتشيل مابيِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
خباري بحمر في اخويا
وطراوة الخوة إبتسام
... ...
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساطا أحمدي كم يشيلنا
وتشهِّلنا على الدوام
نَقِل لينا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام

[فتحي همام]

أملأ قلبك


أملأ قلبك بالوطن ... بالصُّغارْ
قومة العمال دَغَش ... بالنّضارْ
المزارعية الغُبُش .. بالجنود الوين تخش في سبيلك كالنهارْ
بالمداد الما بيغُش .. بي وتر جاء من الجحيمْ
أملأ قلبك بالنسيمْ
ملِّي بالطير الرطنْ
طيبة والعالم قديم ... ينسى كالريح ... المحنْ
خلِّي بالَك مستقيم دغري وإن مال الزمنْ
راحل الليل البهيم والبصيرات ما عِمَنْ
الظروف الليلي أبن ... طيبة لا خوف لا حزنْ
باكر التِّقْيات تنورق وتنملي الضرعات لبنْ
طيبة يا صمت الحنين كلما طفاهو همْ
لا في آهة ولا أنين لا بيروع ليح ودمْ
من مرارات السنين من عصارات الألْم
بيمرق الشوق الدفين بي كعنكيل العشمْ
احكي ليك يا طيبة حكوة
ذات زمان من ضيق وقسوة
وكل يوم من بارحو اسوأ
والمراحات قاطي قطْ
فجأة في قلب السماء ... غيمة غيمتين .. غيم ربطْ
كتمة حتى الطين عِرِقْ
والشجر قرب يَبِقْ
إلا يا طيبة الخَلِقْ ... من بدل تفرح تَنِقْ
الشِّكايات ... السخط .. لا السُّحب دارت تَصُبْ
لا الهبوب داير تَهُبْ
نسمة نسمة آ رب هبوبكْ
من شمالك من جنوبكْ
الهبوب يا رب هبوبكْ
من شروقك من غروبكْ
من تحت من فوق هبوبكْ
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خش آ حول في حول ...
ظاهر الحال ماهو مخفي ....... وقولنا فيك ما فيهو قول
نسمة كل راس ساعة تكفي ....... نسمة واحدة لألف زول
ينطلي الجو بالَحمَارْ
فجأة من حر لي غبارْ
الطشاشات الدّوارْ
السبابات النِّقارْ
نقة الضيق تنطلقْ
قلنا فاقت باتت أزحمْ ...
الغبار من كتمة أرحمْ ...
أرحم الحر البيلحم ... لا ده لا ده ولا فرق
طيبة تمي الحكوة قولي
الصّبرُ خلقوهو هولي
الزمن يقسى ويَرِقْ .. وانتي يا كتمات تطولي
اليطول بال الخلق .. طَرِّقْ الغنوات يا زولي
عدّ فات الريح شَرِقْ من بعد ما جاب سحاب
من بعد قشّ التراب ... مشط القش والشجر
رجّع الطير للوكرْ
ها البرق شال البرق .. الرعد ريحة الدعاش
ابشروا بالخير نقطت أي والله المطر

[فتحي همام]

آه يا غبش



آه يا غبش
ما عندي ليكم غير نغيم .. برجوه ينفض لي غبار زمن القسا .. الكتاحة
يهد عرجون نخل صبر الغلابة الطال ..
يحت يخرت .. تباريح الأسى الممدودة فوق نور الدغش
يا نورة آه ..
يحرد كنائسنا المسيح .. يعرش مدارسنا الصدى
ييبس يباس حلق العصافير الوديعة من البكا
إندردر الصوت البعيد أسيان تصر من دون صدى
ينكفرن الفجر الصبوح .. يحمي الزهيرات الندى
تختا الدراويش الضريح .. يسكن خلاوينا الجنون
يهجر جوامعنا الإله
يا نورة آه
تطرح غيوم الشوق تئن .. تشرق تموت خيل كلمة الحق التناهد في الشفاه
يعقر بسيمة الصح مع لوبي الجروف
تغرز ضريعات الحروف
ينشف مراح الأمسيات .. تتمطق الأرض المروق والأغنيات
اللي الشروق .. والأرض والحب والمطر
تضهب تتوه .. وكتين يضيع عرق الجباه الشم .. شمار في مرقة
آه يا نورة آه
من دربك التور نفس خيل الصبر .. فتر خطاوي الشوق وراه
يا نورة آه
ساعة الشموس الغر .. تهضلم تلحق الصح في المغارب
تدفر الضو الكهارب
وفي وشيك تدفر المدن الضبابية السرابية الكآبة
وحائط التيه والطشاشات فوق قفيك
يا أم عوارض .. مو دعاشة .. ماها شبورة وتقيف
جاي ليك يا نورة غيمة .. تملا ماعونك خريف
يملأ عينيك ويفضل .. يروي جواك العطاشة
مو دعاشة
يا مطر عز الحريق
يا مصابيح الطريق
يا المراكبية البتجبد من فك الموج الغريق
يا الجزاير النتحويبا .. لما إنشعوز بحرنا
يا المراسي النتحويبا .. لما إنشعوز بحرنا
يا نشوق روحنا ودمرنا
يا المحطات الحنينة القصرت مشوار سفرنا
يا ما شايلك بين حايم
أيوة شايلك بين حائم
في الأرض تكون قضية .. في السما الاحمر غمايم
بي برد نغما السلامي .. رطبت حلق الحمائم
طنبر النخل التبلدي .. راقص الأبنوس وصفق
لعبت الصقرية موجة
خلت النيل هاجلو هوجة
بشرت بالخير بلدنا .. شالت الشبال نسائم
جددت زلفي القديم .. أمشي بالماشيبو أقاوم
لا بتكبر راسي فورة .. لا بتصغرني الهزائم
جنس يا نورة ابن آدم حلمو في عالم مسالم
لا الليالي الماها ليا .. لا الشماتات العليّ
لا البنوك المخملية
لا تفاهات الحضارة ..
لا عفاريت المدينة .. لا العمارات السوامق .. فوق ضهر ناساً فقارى
لا الهتاف الفاوة ضارى
غطى بالي من الفوارق .. لا الألوف الطمطمية
لا البرندات الوسيمة .. ولا الأسامي الأجنبية
بتمحى من عيني ملامحك .. وإنتي جاية المغربية
جاي دايخي المغربية ..
وشك المقبول مكندك .. سامسونايتك زمزية
كونشبر .. مرزبة مقطع
ريشة فانوساً مدردح
قلت بيهن لي زمانك .. يا زمان الحجة عندك
يا زمان الآفة حدك .. لا تطا الوردة الصبية
يا نفس فجر القصائد .. يا بلادي
القطع قلب الروادي
باللواج الجاي وغادي
ده ما هو صوتك .. لاها صورتك
دي بترقش ناديي فوق صدر الجرائد .. ماها صورتك
لا هو صوتك .. لاها صورتك
إنتي يا الفي إطن الصحارى
شفع العرب الفتارى
البفنو الشايلا إيدن .. ويجرو كابسين القطارة
يجرو باريين القطارة
لا سراب الصحراء موية .. لا حجار سلوم موائد
إنتي في الغابة اليصارع .. جوفو للآهات تلكي
يا مدفق غيم رجاهو .. لكن الأيام كركي
في خلا حالنا اليمحن .. ويملأ بالسهد الوسائد
إنتي غيمة .. شديرة .. خيمة .. إنتي جاهنا ..
والتقا الطلقت وشينا .. فرقت غمة جباهنا
فرجت في الحارة ضيقنا
فرحت شفع فريقنا
والمواعيد الحزينة .. وإتجاهنا
يا النغيم البقّ فينا .. وشدّ لي وتر إنتباهنا
يا تباشير يا بشارة
إنتي يا ضرعاً تكرمش .. شان يرضعني الجسارة
إنتي في منفاي رفيقة .. وفي حشا الأشواق حرارة
يا هدى الناس الحيارى
يا ندى الفجر اليبلل صور عوينات الفقارى
جاي ليك .. آه جاي ليك .. يا نورة آفة
آفة للسوس الجا ينقر .. عود عشيماً داخرو فيك
وأصلي لمن أدور أجيك .. لا بتعجزني المسافة
لا بقيف بيناتنا عارض .. لا الظروف تمسك في إيدي
ولا من الأيام مخافة
يا نفس فجر القصائد .. ما ضهب في بعدي عنك
واصلي متغرب عشانك .. راضي بالبيجيني منك
ما بكيت شح الليالي
لا شكيت نُح .. شلتو حالي
رغم إنو الحال بيفسخ .. إلا كُت في الحارة بنده
يا وطن عز الشدائد

[فتحي همام]

أشايل
ــــــــــ
وأشايل
بي فرح عينيك
ترح دنياي
عساي أقدر
وأكون لائق
معَ السكة
العليها خطاي
*** ***
وأمش صابر
كمان خابر
شنو الجرح
النتح جواي
شنو الحاريهو
لو باكر
مرق بالصحصحن
ضوَّاي
*** ***
وأجيك في مقتبل
عشقي
وأوجَّ الشوق
وأصابر لي تراب
راجي السحابة
الفوق
أصنقع للتريا
يرقرقن عينيا
أنا المحروق
أنده يا مطر
حس الشدر
مخنوق
والطين إنهجر
قمرينا حِرم القوق
*** ***
لا تسقي البحر
تدشر رعود
وبروق
لا تروي العشر
ورمت الخلا
المعيوق
لا قوات بشر
لاب يشتهنوا
النوق
ترِّع في متر
كاشحين لها
الماروق
وفسراع يا مطر
صبر الرُخص
ممحوق
من قبل الفِقر
وما يحوطك
مخلوق
أنزل يا قدر
يا رحمة الله
الفوق
*** ***
بدور يا قوس قزح
من لونه
طير جَني
وأدور شبَّال فرح
ودعاتو رجني
جارات بالطرح
جارات سبق
جنِّي
يسالمن في مرح
يحكن معاي
عني
إيدين للبلح
وإيدين بيسقني
باب الحن فتح
ما سدَّ ريح مني
*** ***
وأدخل
من فَرِحْتي
تقول
عريس مشيول
يهز بسّام
فرع ليمون
مع النسّام
أقلِّب فوق
ضهور الشوق
وأغني سلام
سلام يا اهلي
البتيربوا السام
يقوم نفاج
وصال ووئام
سلام يا أهلي
البتنحر نوق
إذا ما زاره
ضيف في منام
*** ***
سلام
يا عِزة يا تاريخ
ويا روعة غلابة
قُدام
سلام يا البركل
المسكون
وحارساتنو
كم ضرغام
سلامات
يا الكُرو
ويا خيول بعانخي
الحُرة
دون لجّام
سلام
يا نوري والطربول
ويا مروي القديمة
سلام
ويا أرضِ قريره
ورِّت خيره
برت طيره بالأنغام
و يا أم الشمشِ
وين ما تمشي
ليك الغيمة
ترعى غرام
وتتحراك
تمرق فينا
من بين لاونا
من قرقابنا
من شّمّارنا
من إحرام
من ليمونة
في الأماتونج
لا زيتونة
في أرضِ الشام
هبّاد القميري ..
سلام
سلام بالصِح
سلام الله
وهيط
والخطوة لي قدّام
*** ***
بلد زي نيله ..
باله طويل
بلد حانان ..
بلد راحام
وكَدِي فوق
الرضي
السالام
وزوله يي زوله
مافي كلام
أمان مو أصيل
أمان مو عديل
أماني وأماني
ماهو تمام
وأمان مو غتيت
ومو النجّام
إذا ضاقت خليقتو ..
وقام
وشعبِ متل دا
لاب ينغش
ولاب يهقلوا
الحكّام
ـــــــــــــــــــــــــــــ
كان زول
زمانو لوَى
الإيد دوم
في الإيد
ليل ما انفرقنا
سِوى
الجوف يدورلُو
غميد
الفينا هُوّ ..َ هُوَ
في أم باشِّي
ولاَّ مسيد
…. …. ….
تشتا
ونبيتَه قَوَى
بالفي تكولنا
أكيد
أولى الفراشو
حَوى
أغراب وعربان
بِيد
نلفح قدحنا
هوا
لي ضيفنا
نرتى شديد
"وجابلي التمرجي
دوا
أُكُل إنتَ
ماني شديد"
…. …. ….
نمشي الرعيِّة
سَوى
نسرح بعيد
وبعيد
مالين قِربنا
رَوى
والفي الكواري
جديد
في الوادي
هبَّ هَواء
بقت الرحاطة
جريد
حالاََّ رويسنا
لَوي
وعينينا غادي
تحيد
بنوت فريقنا
نَواة
وكركارته إحنا
أكيد
النفسو فيها
هَوَى
داير المحنّة
تزيد
…. …. ….
يا أمّو روّح وين
شن شال
سنين العز
مين جرّح البحرين
جنّح حنين الوز
…. …. ….
وينا البلاد
أم زين
خيراً يهز ويرز
الشي التوالفو
العين
يا كم فراقو
يعِز

ــــــــــــــــــ

من (في القهوة)
لو ألقى
بندقيَّة
حأكتِّل البنادق
إذا تخون
قضيَّة
وشعاعاً أصلو
شارق
عشان حشا
البنيَّة
يدفِّي ما يدافِق
وبدل خطى
أرزقية
يجي المطر
يساسق
لكل مشرقيَّة
خندق من
الخنادق !
ــــــــــــــــــــــــــــــــ
من (لَوْ ألقى بندقية)
يا بطن البلد
البطراني ..
مطراني ..
مرطبي ..
سفّايي
محروسة أنفاسا
من أبنوسه
وعقبان لي آخر
خلفايي
…. …. ….
كم قهوة شوفتك
راماني
وحاماني عوارض
لوّايي
وقندول الشوق
عد مالبّن
دندح حبَّايي
وحبّايي
الطير ورياحاً
قد هبّن
ينفزعوا ويرموا
الحاحايي
…. …. ….
لكين وأنا حيّاً
ينتبّن
يا نسمة..
إن صبّت
يي الجايي
…. …. ….
كجنت اللنجي
الأفرنجي
بايركس
تصاوير
وهوايي ؟!؟
داير أهلي
وسهلي
وشيت جهلي
يا رحمة خلقة الله
كِفايي
…. …. ….
الخلا بأبيارو
وبأزيارو
غدرانو التترارَى
مرايي
شوك غابو
الحاني على
أطيارو
قش الله ..
الوين زيّو ملايي
وفوق عزِّي مكرّم ..
ما دِلاَّ …
وأنا حر في بلدي
وفي رأيي ..
…. …. …. ….
الحاري حقيقيتو ..
ولا الساكت
متعشم
في الوهم
الجايي
ــــــــــــ.
من (ساحراني عيونك يا نيل)
ومرت الأيام
درايش
وحمتو محتار
كيف هو عايش ؟؟
جاري في الأرزاق
يحاوِش
رُبْ وقع بيناته
دايش
حمتو مات بين
المعايش
حمتو مات مع
إنُّو عايش
وما بكت غير
الحدادي
مات وماطقَّالو
صايح
لا خبيرو طقش
لُو رادي
مات وما نعتو
الجرائد
لا بقت لو قبير
بلادي
مات وسبَّلتو
الحدادي
ونعشو شيعتو
الأنادي
مات وكت قوق
الحمائم
نتَّفو الصقر
الرمادي
والجرب صاد البهائم
قاطع الغيث
البوادي
لامن النيل
بينَّا صقَّر
في الحفائر
مويتو صادي
وماشي صدََّ
حِرِد بلدنا
طاش يلوص ..
كايسلو وادي
مات
وكت ماتت مثلنا
واقعي لاحيله
وتنادي
ولمّا صوت الرب
تكسَّر
والقيم باتت
قلادي
مات مع الإنسان
وسطنا
ويوم صِبِح
عالمنا مادِّي
ولامن الصلاَّي
يتوِّع
في قفا الجامع
عبادي
عاش وما عاش
إعتيادي
مات وما مات
إعتيادي
وحمتو في الآخرة
ويعاين
للبيوت
روق الجنائن
وحمتو حد ما يوم
يعاين
للبيوت
روق الجنائن
زي لويمبة
وسط رتاين
حمتو بس
يسكُت يعاين
بس يعاين
بس يعاين
بس يعاين .
ـــــــــــــ
ـــــــــــــ
من (حَمْتُو)
عدن الخيل الحواجز
ـــــــــــــــــــــ
يا عصافير ..
الحدية
والعصافير ..
في غناهِن
صحت ..
هوبيت
بي إيديا
وأيِّ حاحاي
ما عناهن
فالعصافير ..
يا الرضية
تاري حاضنات
عش جناهن
زي قلوب
فوق القضية
مستخفات
بي عناهن
*** *** ***
ما العصافير يا حدية
ماب يسيبن لك
بلاداً
ضمتن حاني وندية
وبي غناهن
ليها جادن
واسع الكون
ما شوية
والضعويفات
حين تنادن
هبّتن صابت
قوِّية
وصر عروش الظلم
أبادن
*** *** ***
العصافير ..
يا حديات
والحديات في غباهن
بس بلا دغش
الشويَّات
غطّن الجَوْ
لمّا أباهن
والحديات الحسيرات
فار نفس واحد
هباهن
مين يراهِن
في بصيرات العصافير
وإنتباهن
*** *** ***
زيكُن زي العصافير
يا مغنِّين
غنوة غنوة
لمّا تنبهِل الطنابير
والحناجر العطشى
تروى
من بواجير ..
ترعة ..
من بير
يربىعود الشتلة
يقوى
واليباب الفي العتامير
كلّو باكر
يبقى حكوة
*** *** ***
نحنا أصحاب العصافير
والشدر حبّانو
وإخوة للصباحات
التباشير
والمطر
وإشراقة حِلوة
شعب مخضر
الأسارير
شهمِ طيِّب
وكلُّو نخوة
ما انكسر
رغم الأعاصير
لا فتر
لا جاب لُو رخوة
*** *** ***
من عوارض ليل
ومدفع
هامتو أرفع
وصاحي صحوة
يدرع العري
والمرقّع
ولا يدلِّي الرأس
لكسوة
متكي يصنع
ولاَّ بزرع
أو خشوع
والروح بتهوى
ويا بيرفع طفلِ
صنقع
شابَى للأحضان
بنشوة
أيوا تاتي
ولمّا توقع
ضُم عليك أرضك
بشهوة
*** *** ***
حاني هادي الأرض
حلوة
واسعة رغم الضيق
وقسوة
نشقى نكدح فيها
أيوا
وفي الأخير
تبقالنا مثوى
دون أرض
شن نحنا نسوى
والأرض شِن دونَّا
تسوى
ويْ وطن
ويْ نحنا
بي خير
والزمن طوّعنا عنوة
ونبني نتعلّم
من الطير
قشّة قشّة
وغنوة غنوة
الكلام من حرفِ
يبدا
والطريق تفرعلُو
خطوة
ياما زائر قضّى مدّة
وكان قبيل
في بالو غشوة
*** *** ***
يا وطن
بستان ملوّن
وكل نبتة
وليها حكوة
ليها طعمِ
وطيب مكوّن
فارقت طينا
إِش بتسوى
*** *** ***
الأرض
عِشق العصافير
التدُور
بين شوق غناهن
للحديات .. المناقير
والجناحين
فوق جناهن
*** *** ***
ويْ وطنْ
وي نحنا بي خير
فالليالي
رجع ضياهن
والعتامير
بقّوا خدِّير
والحيا الغابات
حياهن
عدّن الخيل
الحواجز
والطشاش
الكان كباهن
المهيرات تاتو
يا عز
والتواريخ
كب يباهن
نحنا يانا
قلوبنا زادن
طيبة ،،
عادن
زي مُو ياهِن
والطريق الليهو
رادن
عنّو
ما حادن خطاهن
العصافير استمخن
بين ربوعن
وخير مياهن
لي غناوي الحلم
ضخّن
لا حِديْ
لا خوف عياهن
*** *** ***
همّهن سَوى
ماب يخونن
دمّهن واحد
ضياهن
وين شرق
في الكون
يكونن
زي عموم خلق الله
ياهن .

ــــــــــــــ

لو في قسمة

الخدير الشال
وبدّع
لو في قسمة
دا كان خديري
أصلي تربال الله
بزرع
وما حضن سيدابي
خيري
*** *** ***
ياما كم بئراً حفرتو
وإنسبل
ما دِلا بئري
رحمن القرّاع
مترتو
واردي أغراب
أو عشيري
…. …
عمري للحبّان
نذرتو
خدروا الأشواق
دميري
زيي زي غيم
بي مطرتو
ما فرز ضُل
من هجيري
*** *** ***
طين جروفي
المنِّي روّح
شالو
هدّام الدميري
ما بكاهو قليبي
نوّح
ماهُو يوم
بطلع جزيري
*** *** ***
كل زول
من حقّو يحلم
وحلمي يا راحة
ضميري
تبقى هادي الدنيا
أرحم
وخيرا زي الغنية
ميري
*** *** ***
ريدة لله
ريدة أكمل
من جبيري
وحُق ضريري
القمر في سماهو
أجمل
أم هلالاً
بين حريري
ريدة لله يا بنية
قسمتي ..
وحظّي ..
و مصيري
طالما إنِّك
شوف عينيَّ
هيَّ هيَّ
محل تصيري
*** *** ***

ياكي زي الدنيا
ليَّا
مهما يبقى
الخير لغيري
مايهم قلبك
عليّا
واللا ما ياخُد
خبيري
*** *** ***
أولى بيك
لو بالمحبّة
وانتي ماكي
علي كتيري
بس عويدك
مما شبّا
للقلب مزروب لغيري
من رخُص
محضوق لغيري
*** *** ***
ولو ظروف
سابني أقنع
وأنسى حرتي
الساقو غيري
ياتو حاحاياً بيمنع
من يغرِّد فوقو طيري

ــــــــــ
ــــــــــ

هودو وقنودو

القدم ما يعز عليك
إلاّ بأشواكه
العوارض
زاربة من عيني
عينيك
*** *** ***
إلاّ أقدار
لاب تفاوض
لاب تقدِّر
شغلي بيك
بس زمانات عد تعاند
وتستخف
بأشواقي ليك
*** *** ***
يا غناي
المنِّي مارق
يا مناي
الداخرو فيك
يوم خطاي
لابد تفارق
غربته ومنفاي
وأجيك
*** ***
إنت صبحي
الماشي شارق
أو ضحى الضوّاي
وشيك
دام سماي
من قبلي بارق
يبقى صب مطرك
وشيك
*** *** ***
و السحيبات
حين يجودو
الطيور ديلك
بعودو
يخضر الزمن
اللي عودو
حتحت الأيام
ورودو
*** *** ***
في أمان اللِه
نمرح
مافي أمناً
فات حدودو
ويرجع الوطن المدردح
لي زمان هودو
وقنودو
……… …….
بيني بينك
وعدِ أخضر
صبْرِ طيِّب
يا جميل
شوق مكمتر
ريدة
وأكتر
ومو انتظار
المستحيل
*** ***
دي الجروف
لَوْ ما يعكِّر
وما يتوِّر نفسو
نيل
لاب تخدِّر
لاب تنوِّر
لا معَ النسّام
تميل
*** *** ***
انتطرني
قصاد شتيلة
دابه أول شيلة
ليها
التمور صاقعاله
هيلا
والطيور فرحانة
بيها
*** ***
والشتيلة
الشادِّي حيله
هبت الريح
ما عليها
صبّت المطرة التقيلة
قيرة قيرة
تلقي إيديها
*** *** ***
انتظرني قصاده
جايي
أو قصادك أو قصادي
زي تكنِّي
من التخايي
ومن علوق الريح
جوادي
*** *** ***
ياتو فينا
الفي المرايي
إنتَ
ولاَّ قمر بلادي
وتمرة فاقشي
الليل
ترايي
وتبدي
في الهواء
جاي وغادي
*** ***
شفتَ
ما فات الغرابة
واليمحّن
في بعادي
ناس طيابة
نست عقابه
وكان طِيابة
يرف مبادئ
*** *** ***
وشفتك إنت
في كل غابة
وصحراء وأيِّ صعيد
ووادي
يوت تنادي
على الغلابة
ولا حياةَ
لمن تنادي
*** ***
كان رقابه
وراء سحابة
وكان ترابه
يضاضي
صادي
غوررَه الريح
بالحرابة
وحسبنا الله
يا بلادي
غنيوة على الهامش
عوّافي
بقيت في إيد غيرك
جنياتك
تحلم بالقمحة
بالضُل
بالموية
وشار خيرك
مدادي
وواطاتك سمحة
*** *** ***
أماتك وحرماتك
باتن
والدنيا تجاريح
منطرحة
غابات
وشديراتن ماتن
لا مقنع فوقن
لا طرحة
*** *** *** ***
متوسد كوعك
وطني
فرشولك
برشِ منامات
تأكل من جوعك
دغني
درشولك
أرادب كلمات
النيل فوق حجرك
وتسقيك
الترع ..
البئر ..
وغمامات
تنجيك ..
تشفيك ..
وتعافيك
نيتك يا وطني
من الجات
وأنا ضهري مجرِّحة
أياديك
والدفّة في كف الشمّات
ناذر لابدَّ أعديك ...
ها البحر
اللاوي ضلامات
ولابدّ خطايا تلاقيك ...
كان طالع
من لجة سجنك
من حبل المشنقة
جاييك
من حرّك
من تحت الأرض
من برّة ضواحي منافيك
عارفني
وعارف للفيك
ولابدّ خطايا
تلاقيك
ينشايح جرحي
وأغنيك ..
خيرك
عن غيرك
يغنيك ..
متنعلت حاضرك
ماضيك
متجلبب أسمى معانيك
إتقدم
يا جرحي الطيّب
مدن المستقبل ..
ترا .. ديك
*** *** *** ***
يا هدي
يا رضي
بير الحلة
يا الوافي ضراعك
ما كلاّ
شن داعي
قريعتك تندلّى
واللا إنت
عزيزاً تنذلّ
شن نفر الخيمة
المشروطة
ضُل الراكوية
إذا ضلَّ
القوت من غيرك
شن نفرو
وخيرك ما دلاَّ
تحمد الله
*** *** *** ***
تمراً كان جُعت
نكفّيك
قطنك كاسيك
ومدفِّيك
مويتك بتحمِّي
وتسقيك
طيّانة جناتك
يا وطني
وطينايتك وحجرك
ببنيك
*** *** ***
ضو عشمك
وأنظر مافيك
قدمك لي باكر
يا خير
مدن المستقبل
ترا ديك
نتعلم منك
وتتعلم
من ساهلك
ومُر قواسيك
*** *** ***
يا أب سيرة
وطنبيرة
ومدحة
وصفّيرة
وراء ميري
وسَبحَة
يا أب أربل
وواسوق
يا أب قمحة
يا أب ألبل
يا أب نوق
يا أب سرحة
يا ماشي على الشوق
يا أب جرحة
واعد جنياتك
بي عيد
وجنياتك واعدنك فرحة
*** *** *** ***
ربيتني
إتعلى قواديس
وإندلّى من إيديك فأسك
سِبـحـة
إتلالأ أجراس
وفوانيس
وإتوالا مع أنفاسك
نفحة
*** *** *** ***
من فوقك
شلت الحرمان
وأحزانك شلتها
بي صفحة
إخترت
أكون الإنسان
اليدّي مناماتو
ويصحى
*** *** *** ***
رقدت في صدرك
غنواتي
وحصنتك
يا فاطنة السمحة
عقبتني عليكي
السحّارة
ضيعتي وصيتي
وفي لمحة
ومن يومه موهدَب
زي كلمة
ما بين دارجيتك
والفصحى
*** *** *** ***
ونتحمل صيفك
ونار كيّك
شان نسمة
توشوش
في وشيَّك
أو غيمة ترشرش
لي صيَّك
من ميتك طالع
من حيّك
إزيّك يا وطني
إزيّك
وين غيرك
شدراً لي طيرك
ووين أرضاً
ريّها زي ريّك
يا أب ضهراً يسند
وجيويرك
يات وحماً
يصدق بالزيّك
*** *** **** ***
أبشِر لا باشر
وبشِّيرك
فوق عِزّاً
عَزَّ بنات حيّك
والعالم من فضلة خيرك
يوم بوشك
يندشَّى عِشيَّك
إذيك ياوطني
الزيك
الله لا تكلك على غيرك
لا سابك
في رحمة اخيّك

بشارة
ــــــــــــ
بيكي
بشرنا القصيدة
تورت شوق
المدارك
واستحمت
في مدارك
بالمضامين الجديدة

*** ***
نورت بالفرحة
دارك
ناره ضجّت
بانتظارك
ومبخر الحنية
في إيدة
تخرجت ساحات
صغارك
سوُّوا من حلمك
بوارك
ومن ضهور النخلِ
ساتر
كاوُوا مارشات
العساكر
والشوارع فوق
شهيدا
سمعوا السور الجديدة
والأناشيد العنيدة
*** ***
بغَّروا التاريخ
يذاكر
في القميرة
العد تسافر
لي مزارك
قافرِة باكر
لا جوازات
لا تذاكر
لا تبِن بال
في جمارك
لا خراج روح
لي خيالك
إلاَّ وقفة عز
قبالك
ورفة إحساس
بي جمالك
والبشائر هلَّ عيدا
*** ***
مافي دارك
إلاَّ نارك
باشِّي هاشِّي
وناس تبارك
وفي الحناجر
مد مهاجر
بي هتافاتا
ونشيده
ونفرة تستفتح
عوالم
كل ما فيهن
مسالم
والوجود إنساني
حالم
زي منامات القصيدة
*** ***
لينا فألك ...
لينا فألِك
وإنتي فأل
الهامُّو حالِك
لا قرى وضاضت
حيالك
لا مدن تنفض عيالك
لا زمن قال
مالي مالِك
لا جراح
تجلب حسارك
لا رياح
تأخِّر قطارك
لا رمال
تدفن جدارك
في المحطات البعيدة
*** ***
البرق
قشّاش يناور
لي مطر
من قبلي دافر
الرعد قِدّامو
ناظر
لي أفق ما ليهو
آخر
الهبوب عمال
تعافر
فوق تراب بالصبرِ
قاشر
ستّف أشواقو
المسافر
وغنَّى للجيّة الأكيدة
*** ***
غنَّى للشمش
الحقيقة
العمرو ما ضلّت
طريقة
زيها وزي شيخ طريقة
كلِّ أرض الله مسيده
شمشِ
لي كل الخليقة
تمشي
وسع الكون فريقه
شمشِ واحدي
وواحدي واحدي
تمشي
والأيام عديدة
رجمة
في الشمّات
حريقة
ورحمة
للناس التريدة
...
وإحنا ناسَك
شوقنا باسك
قمّة الإحساس
مقاسك
عالي يسلم
فوقنا رأسَك
الديموقراطية ساسك
يا وهيطاً زي قصيدة
*** ***
يا العلي كيفك
في قيفك
تحمد الله
على تسابك
وإن عِسِر ذات مرّة
صيفك
تشكر الله
على عقابك
يا المسوِّي الدنيا
ضيفك
مالي عمرك
بي حبابك
وإن مرق في الحارّة
سيفك
تاني
ماب يرجع جرابك
*** ***
إلاَّ ترسى
على محبة
إلاَّ تمسى
على وئام
كل نبتة
وليها حبّة
مستمخة مع الغمام
يلاَّ رِب الدنيا
ربَّة
تربى في عزّة
وتمام
بي مواريثك معبّا
وي وطن
على مايرام
وهمبريب الرحمة
هبّا
ويا سلام يا ..
على السلام
ـــــــ
طائر طيِّب وصيادين

في إحدى
الجزائر
والعيش مو ضنين
صياد
عن يسار
وصياد
عن يمين
ما شايفين
بعض
في ذات قرصنة
نشَّنوا
نحو طائر
غرقان
في غُنا
الطائر نفد
وطلقة داك
في دا
وراحو
مجنضلين
والطائر النفد
عشُّو الإنقرض
عشُّو
الراح فِدا
بي عرق الجبين
في فد
يوم بنا
ورجَّع
لي غنا
على مر السنين
فألك
يا بلد
بالوضع المهين
إتمايل شمال
إترنح يمين
إترايم
هبد
والشعب الحزين
يفرح للأبد
ــــــــــــــــــ

من (طائر طيِّب وصيّادين

يا أمنا

يا أمنا الفِطن
الهجيرة
"يا معلّقة
في النجيمات"
يا مشعْلَقة
من ضفيرة
يا مفرَّقة
في الضُلُمَّات
يا العَكَفْةَ الليل
دَميرا
*** *** ***
لا الزمن من طبعو
جائر
لاكِي خِلقة رب
أجيرة
خلِّي في بالك
حكاوي
وإنتي أحبابك
كتيرة
حقرة الغير
آب تقاوي
نفرة أولاد العشيرة
*** *** ***
نحنا شنّينا
الغناوي
اللي بِنيةً
في ألفِ غيره
نحنا فنِّينا
القصائد
والأناشيد
المصائد
والمواويل
الحسيرة
الترانيم المكاليم
والشعارات
العضيرة
*** *** ***
وشلنا
من شوف المظاليم
الجماهير
الغفيرة
الجاهلة
محرومة
وفقيرة
التقول لا حولَ
زالت !
وهيّ لا زالت
بخيره
شلنا من ناره
البصارة
وقوة العين
والبصيرة
من هبوب سعدا
الطراوة
ومن سحب وعدا
المَطيرة
وبي دا
جينا
يا قسا الزمن العلينا
الدسََّ
يوم عرس الفقارى
الغنية
والحُق
والضريرة
*** *** ***
إلاّ
ما حاروا البصارى
سووُا
كل الدنيا دارة
وقيرة قيرة
طالوا
شالوا
القمرة طارة
الدلاليك .. الرعود
الطنابير .. المِطيرة
لفحة الشبال
بروق القبلي
والترقص .. مهيرة
*** *** ***
غنَّى
صعلوك الدميرة
وقام غطسبك
في الفرح
طلعتك
طلعت جزيرة
خَدرة
متكابي وغزيرة
قرمصِيصك
قوس قزح
رارَى خيط فجرك
جبيرة
وكل ما غنى الخليل
ودَّ الفرح
وأصحابو
ليك
بلاّل وسيرة
*** *** ***
أراك
تبلدية وأراكة
وأراكِي
أبنوسة وتميرة
وأراكي
بحري
وراك جزيرة
وراكِّي طيرة
من الصعيد
على كف شديرة
ملقَّى للمطر
البلا تبدي وترايي
بتدِّي خيره
وبالسلامة
وقيرة قيرة
ترجِّع الطير
المهجََّر
طيرة طيرة

[فتحي همام]

وناسك الطيانة
تفزع
تجدع التبَّانة
ترفع
في صهاديب
الهجيرة
حيطتك الحدادي
حوشه
المافي رباطاً
يحوشا
ولا يجرِّح خاذي
جيرا
حيطة بت ناس
زي أميرة
أمي
علَّمته الضفيرة
وكل أحلام الفقارى
ماهي ربَّتا
فوق حجيرة
وزي ولد
ضكران ضكارة
كِبرت
الحِلِّة الصغيرة
عمرت
الحلّة الكبيرة
المكوَّنة
بالأصالة
الملوَّنة
بالبسالة
الخلاصيَّة البِخيره
والرضية الطافشِّي
عادت
عودتا الدائمِة
الأخيرة
يا مطرِّف
ليها قرِّب
تبقى خوّة
وتلقى جيرة
ويا مخرِّب
لا تتلِّب
جوّة هوَّة
ولاوي كيرة
فالديموقراطية
حيطةً
للحديات
مِي قصيرة ؟!
*** *** ***
يمّة قومي
من الهجيرة
غنِّي
يا خلِّيني أصيح
كسوة الكعبة
الوطن !
...
...
الوطن
كفن المسيح
...
...
مدخل الجنِّة
الوطن
مخرج الذات
الصريح
*** *** ***
الوطن
يا وجه مطروح
ماب يشيح
يا وليد الكلمة
مما قام فصيح
يا قدر يا قسمة
يا واحد صحيح
يا وهيطاً رحمة
يا صدراً فسيح
...
...
الوطن يا نسمة
عايز يستريح
والعصافير دار تغنّي
ودايرِة تبني العش
نصيح
لا مطر
يفجع جناها
ولا في ريح
فالشدر بي صمغو
طول ما الليح
جريح ؟!
*** ***
وإحنا يا نسمة
الغلابة
المن ضهرنا
تجي المدن
بالآفة
والفاقة المجلَّدة
بالحزُن
بالصرمة
والحاقَّة المدلَّجة
بالغُبُن
نحنا العرايا أجساد
حفايا
كما الفضاء
ولا وين قطن ..!؟!
*** ***
كم علَّمتنا التجربة
وعيشة الدارادر
والقساة
ننفض عن النخلة
الأسى
وبودي السنين
المتعبة
وسوس الحُزُن
ويخضرَّ من تاني
وجديد
شدر الصباحات العنيد
هبْشَةّْ غمامة
كتِف غصن !
*** *** ***
الشوق
مساسِير العشم
لي فتلة الفجر
الجديد
نملاهو بي برمِك
نغم
ننشُر على العشق
النشيد
*** ***
نقطع جنازير الوحيح
الحاقبِة إيديات الوطن
يا رتّة
بي منشار صفيح
وأم زين تسوّي
القيد رطن
والصاجة
من جوف الفُرن
ونزف احتمالاتنا
السُخُن
تطلع بدل
-خاذوق- ..
سُفُن
وتطلع يا نيل
في حّزَّتك
رزق الغلابة
اليمسِكن
أو ما يصح
إلاّ الصحيح
في حضرة الزمن
النصيح
لا آفة ..
لا آهة وغُبن
*** ***
يا نسمة
نبهي للفِرج
نحنا إستوينا
على صبُر
صبر المدِينية
أم كُرَج
صبر النبيين
الخُدر
اللا تذامير
لا زهج
...
...
...
ويانا الفي إيدنا
القُدرة
عدّالة العوَج
كم جانا سيل
والدنيا ليل
صرّفنا
والفجر إنبلج
كضَّابة
يا غمّة الخراب
كضَّابة
يا مطر الدلج
كضابة
حيطان العذاب
كضابة
سيطان العنج
هاكن دي
من هادي التراب
يا أرزقية
ولا حرج !؟
*** *** ***
يا نسمة
صلّي على النبي
المن حَبي
ولامِن عرج
ما ختَّ شينِة
ولا عوج
...
...
يا نسمة
صلّي
على الحبيب
مهما العوارض
رجّوا رج
لا تشَّت آه
عين العشم
لا فات بصيراتنا
الوهج
...
...
المترَفَين
داروها دم
من سُوقنا
للزمن الرتج
داروها
إيديِّة
وخمج
بي دين
مع الدنيا إنخفج
…
…
بنصحِّي جوّانا
الشمش
ويا رِْيق نفكك بالوهج
نمرق دغش
متقريفين
آسفين وما متأسِّفين
يا كم فِداكَ
من العفار الفاضي
في وضع إنحلَج
نروي الشوارع
والبهج

دم ..
دم ..
دموم
شقيش تمش
لكنو بعد الدم ..
فرَج ..
فرج السلام
المنّو
كل طاغية
إنزعج
والبيهو
كلِّ وافي
ابتهج
..
..
وإنت العليك
ركَّتنا
هاك جكتنا
سايمين المهج
وأدّينا خاطرك
يا وطن
...
...
ناس في سبيلك
كالغيوم
واشوقنا
للوديان زمن
سكتنا دغرية
وحداك
جاتك بشاراتك
إذن
علِّمنا نستشهِد
فِداك
نحنا البنماوت
سدىً

[تغريد]

رحمة الله عليك يا فتحي الهمام
اللهم أرحمه واغفر له
اللهم يمن كتابه ويسر حسابه
وأسكنه الفردوس الاعلي مع الصديقين والشهداء
اللهم ان كان محسنا فزد في حسناته
وان كان مسيئا فتجاوز عن سيئاته
اللهم لا تحرمنا اجره ولا تفتنا بعده
اللهم اظله في ظلك يوم لا ظل الا ظلك
وتغمده برحمتك وواسع مغفرتك
ان العين لتدمع وان القلب ليحزن ولا نقول الا ما يرضي الله
وانا لفراقك يا فتحي لمحزونون
غفر الله لك يا صديقي
واللهم اهلك وايانا الصبر وحسن العزء