التلت الاخير

[almaknemer]

نجمة التلت الأخير
كل إنتى العام بخير
من عرفتِكْ ما ذرفتك دمعة
ما شفتكْ مصير
قدرما اتلفتَ تهتَ
مالقيت منك أَخيرْ
يكفى مااتعلمتو منك
يوم أحلق بيكْ أطير
وأكتبك فى كل حـته
حتى فى الطير البطير
فى حصا الدرب البوصل
فى نجوم تلتاً أخير
يالعيونك بحر نابع
من حِلِمْ أسرارو بير
أعلنك فى الشوق قصائد
وأشتلك فى الدنيا خير
كل إنتى العام بخير

روح جمالك كم تحلق ما بتضاريها السحابة
وكلمة من لهجك تزغرد تهدم أركان الرتابة
فضوة الروح تملا منك ما يعينا على الرحابة
أكتبى وزيدينى خطوة ما السفر جوايا غابة
قولى خلى الغصن يشْبُكْ فى قميص الشوق كتابة
ويوم أقيف قدام جمالك ورى عين آمالى بابا
كم خيول الدهشة تسبق رؤيا طشت فى اغترابا
كل إنتى العام بخير

الزمن ما خلا حاجة إلا شيلا سر عيونك
والوتر خت السلالم لى طلوع روعة لحونك
وِقْفَنْ النغمات حيارى كيف تلاقى الناس بدونك
كُل أحلامنا ومكانا إشارة فى غمضة جفونك
يا مداين عدى صوتك والحقى الشمس التكونِكْ
قارنى بين صبرى ووريدك تلقى صبرى وصل جنونك
كيف تقولى نسيتَ وخنتَ إلا قلبى معاك يخونك
وكل إنتى العام بخير
أسأليها خطى الأماسى يوم بدت فى الريد طوافا
كم توقع لحن تايه كان يفتش فى المسافة
يوم لقاك اتمد مرسى وعمر أيام وانعطافا
وعيدت أحلامو جنبك بادية بيك آخر مطافا
وعيك البصر المفتح كل ناحية جميلة شافا
وإنتى معنى وطن بيكتب فى تواريخنا الإضافة
ضلك الوارف ممدد فى نفوسنا واعترافا
لو نقرب واللا نبعد مافى سكة تجيك نخافا
وكل إنتى العام بخير