المجموعة الكاملة لابداعات( lyrics) مصطفي سيد احمد (1)

[خالد حمد موسى]

http://www.wadmadani.com/up/pic/4a.gif


ههالمجموعة الكاملة لابداعات( lyrics) مصطفي سيد احمد (1)

عجــــاج البــــحر
حسن بيومي

يراقصني عجاج البحر .. ترعد داخلي الأمطار
يكلمني تراب الأرض .. تشدو قلبي الأوتار ..
أغنيـكـــــــــم .. أغنيكـــــــــم ..
أغني جذوة النار التي فيكم ..
وألعن ذلك البرد المدثر روحكم ..
بـــــــــــرماد موتاكــــــــــــم ..
D D D D D
وأبني في عيون الشمس مملكتي ..
تنـــــــــاديكم ..
نسوراً تعشق الترحال في الأفاق .. تبقى الكون حرية ..
فإن شئتم تعالوا الآن ..
نرقص رقصة البدء ..
ونعلم أن نمد الكف ..
نحو الشمس للدفء ..
تعالوا أيها الجوعى .. تعالوا أيها الفقراء

D D D D D

شهيق
عاطف عوض خيري

نكــــر صــوتك صـــداك ... غــالــطــني الـزمن فيك
شــهرت عــلى الجــفاف ... وعدك بطاقاتنا الخريفيـة
رجــع فاضـي الكــلام مليان ... معــاك إتــبـرجـت غـيـمة
وشهق جوايا صوت جدول ... مـرقت على المطر حفيان
لـقـيـتــك والــرذاذ مــدخـل ...
ونـاديـتـك …
أقـيـفـي مـعاي نشيل كتف الغنى الميل ..
ونتخيل ... ونتخيل حلم دونك بيتحقق ..
وقبلك خيل دماي واقفة علي شرياني تتشهق ..
وبرق صوتك صداك غنيتي ...
D D D D D
رشحت حلقك لي إذاعات الشجر ...
والمنتظر من عودة المدعو المطر ..
وللمسادير و الطنابير ..
واللسة في رحم القصيد ... والدابو هسة وفي سوق عكاظ
بين مزادات الحروف غيبت رسمك وإحتكرتك للظروف
للزمان الجاي واللحظة الفاتت مني هسة ..
يا واقفه بين جرح السحاب وبين شهقة الأرض البكر ..
ما كان ده ريد ..
كان إحتمال تغيير قوانين حركتك ..
ما بين حديثنا ولحظة الفعل الحقيقي ..
وإنتباهك إنت للشارع البيرجع تاني لي نقطة بدايتو ..
و إنحيازك إنت للشارع البيرشح في مسام رمل التوقع ..
وما إتعرف قانون نهايتو ...
غايتوا أمشى في الدرب البطابق ..
فيه خطوك صوت حوافرك ...
يا فرس كل القبيلة تلجموا ..
ويكسر قناعاتا ..
ويفر يسكن مع البدو في الخلا ..
ما برضى غير الريح تجادلهُ وتقنعهُ ..
D D D D D
إفترضتك لون أساسي ...
يمنح اللوحة إزدواجية القراية ..
ويفتح الضوء بين خطوط الريشة والخط الإضافي ..
الجاي من شبكية الزول البشاهد ..
وإكتشفنا الرسمك وأنا برضو التوارد في الخواطر ..
نفس أرقام التذاكر ..
البيها سافرنا وشهدنا ...
إنفجارك في الأرض ..
يا سمرة يا واضحة ..
D D D D D
ما غنيت يوم جيتك صدفة ..
قبل أبداك كان غصنك بشر ..
يوم ما كان إحساسك مسى ..
عرج غيمك فيني ومطر ..
لحظة طار عصفور من صدرك ..
رتب فينا إحساس بالإلفة ..
ودوزن عصب الزمن الأشتر ..
وإتوكلت عليك وقلت ..
المارق منك داخل جرح الوردة ..
وراسم فوقه غناوي الطل ..
المارق منك ...
رجع للغابات العرب العاربة ..
وللعتمور الزنج الهاربة ..
وأدى الكون مفتاح الحل ..
المارق منك ...
شادد عصب الورقة وحرفي وراصد ..
في اللاوعي سكون مواعيد ..
صحوة ... وحلمه... ولونه ..
وشاري يقينك في زندي ...
وسارق لحظة إني أفكر ..
المارق منك ... مارق منك ..
أو مت شهيد ...
D D D D D
ما تتضاري ورى الدعوات ... وما تتلبسي فرح الفات
يسكن فيك النغم الزايف ... ويسرق حاسة شوفنا الواقفة
على رجلين جوانا ..
ونحن الهاويه والمطامن من الأرض ..
آه من نحلك ساعة يرحل ..
ولمن يكتب فينا الحنضل ..
ويختم عمره بفعل الشهد ..
D D D D D
قال الجدول :
طلوع النخلة مرور الريح واحد
لاكين الريح بتعانق حقل ..
ونحنا بنطلع نخلة وننزل ..
ونكتب في ذاكرة الصفق الأخضر ..
سجنا الريح في الورق الأبيض ..
وجهناها ضد التمر الناعس ..
يسقط زي قبعة الحارس ..
زي الكان بيناتنا وفات ..
D D D D D
قالت غيمة (غيمة لئيمة) :
أولاد الشارع فهرس لي كل المدن ..
التهرس جوفك بالأسمنت ..
قالت ريح :
شوف الناس قنديل ..
لو ما نور يحرق كوخ ... وباقي الحلة تنور ..
أو جبة جوخ أو ينزل بوخ ... يقول للنسمة الزايفة أقيفي ..
لو تتفرد ريح ... تتشرد ريح ... ريح الخوف ... لو تتفرد ريح
تبدأ تفرتق ضفائر المدن الكاذبة ... تعيد تسريحتك ..
D D D D D
يوم سمايتك شكل قامتك ..
كيف تموتي وتحي تاني ..
ويوم قيامتك ..
هو البيدينا الثبات ..
يا مجلوبه في قافلة رق ..
ما بستحمل صدرك رصاصة ظلم ..
يا صابت رحم الفال يا قطعت حبل الحلم ..
يا كنا نبيعك يا نسرق ..
إخترنا النار الضلها بيحرق ..
طمناك إنو الدنيا بخشها ضو ..
يجرح جلد العتمة ..
لما الليل قربان فجرك ..
D D D D D
يا بت يا نيل ... يا بت يا نيل ..
لو نامت قمحة على الأبيض ... تتشرد زيه ..
وزاد الأبيض في غية ..
ومدد رجلة اليسرى ..
ما كان الكسرة جاتك من بره .... صفرا ومنكسرة
D D D D D
زوجناك الشهداء أولاد الكد ..
الماتو عشان الشعب ..
زوجناك ما عندك ضرة ..
زوجناك ما جاتك ضرة ..
ما إنشاف ماعونك ... في الحلة يساسق
ويلقى فتات ...
D D D D D
قال الأبيض للأزرق :
يبقى ضد الانتباه ..
وضد تواريخ التمازج ..
بيني بينك ..
وده البشوفك في مراهقة الخرائط ..
وفينا من وجع المسافرين ..
واطه مالاقت هوية ..
D D D D D
رد الأزرق :
مطر الحبش لو كان نبش ... جواك سقف
وهد حيلك في الدواخل ... وشد عصبك في المداخل
صوت مراكبي ويد بتسأل في القمح ..
وفينا من فرح المسافرين ..
قصة الشمس القضية ..
D D D D D
يا أعشاب النيل الأبيض ..
ماتتضاري ورى الدعوات ..
أقرا تاريخك ... أخاف ..
أقرا تاريخي … أخاف ..
أسأل جبين الفجر ...
ألقى الفجر مطعون في القفا ..
هل سافرت في دمعك المحقون جفا ..
حبة غضب ..
ما شلنا جمرك وإنطفا ..
جوانا نارك والمطر ..
جايين بالكتابة ..
وضربة الناس المهابة ..
لو هز نخلك باشبزق ..
ما فارق التمر السبيط ..
وما سارو الطورية شك ..
إنو الأرض أنثي ... وبتحمل بالحلال
مين القال إنو المسافة ..
البينا بين الشمس طاقة ..
أو مياه النيل بتدخل ..
في عروق السنبلة ..
المسقية بي عرق ..
الجعانين والمساهرين بالبطاقة ..
D D D D D
أقرى تاريخي وأقيف ..
أقرا تاريخك وأقيف ..
جواك والزمن النضيف ..
جواي من جواك غضب ..
سلم مفاتيح السؤال ..
جيل الشمس موكب حريق ..
واقف على باب الدخول ..
بيناتو بينات الوصول ...
لحظة شهيق ... لحظة شهيق

D D D D D



الرسالة
عبدالرحمن مكاوي

الرسالة الحلوة ريدك ما بريدك
الخطاب النمقت كلماتوا إيدك
قبل ساعات قبل مدة ..
جاني مرسال المودة ..
ياما شال وقلبي أدى ..
إحتفلت وعمري عدى ..
D D D D D
كل كلمة بتكتبيها ..
يا حلوة إنت تنمقيها ...
تضوي بيها فرح عيونك ...
لوحه زاهية بترسميها ..
قبل ساعات قبل مدة ..
جاني مرسال المودة ..
ياما شلت وقلبي أدى ..
إحتفلت وعمري عدى ..
D D D D D
كل كلمة ندية واحة ...
كل همسه شجية راحه ..
والحقيقة الرائعة إنت ..
شن بدورك صورة بنت ..
شلت رسمك والأناقة ..
إنبهرت وغبت ساعة ..
يا ماهل وعما عيدك ..
ما بريدك وزي ريدك ..
الخطاب النمقت كلماتوا إيدك..
قبل ساعات قبل مد ...

D D D D D


تاني تاني
الصادق اليأس

تاني .. تاني ..
تاني راجعين مـــرة تاني للقديم الإتنسى ..
مالو عـاد الشوق علينـا ..
بعـد مــا روح مشى ..
D D D D D
مالو جرح الحب ده عاود ..
بعد ما فرقنا عاد ..
قلنا داب الراحة جاتنا ...
ليه تفارق غير ميعاد يا زمـان مالك علينـا ..
القديم خليتو عــــــــاد .. نحن مـا فكـــرنا مــــرة ..
نمشي للـــــروح نعيــــده ...
إلا عــــــــاد القسمة قالت ...
مافي زول يختار بــــــيده ...
يــــــــوم رجعنا لقينا فينا ...
الفؤاد ما خلى ريـــــده ..

D D D D D

حسنك بديع
خليفة الصادق

حسنك بديع معدوم مثالك ...
حير قلوبنا وصف جمالك ..
يا بهجة يا فرح الحزين ...
آمنت زيك ما بكون ..
خطوك نغم يوحي الأغاني ..
تتهادى زي الناس مكانك ..
عليك قليل كلمة جميل ..
وصفك تحتار فيه المعاني ...
حسنك بديع معدوم مثالك ...
حير قلوبنا وصف جمالك ...
D D D D D
يا بهجة يا فرح الحزين ...
آمنت زيك ما بكون ...
أجمل عيون فيك شفتها ...
عيون المها مابتشبها ...
مني الكلام بيضيع دوام ...
قدامك ألقاهو إنتهى ...
حسنك بديع معدوم مثالك ..
حير قلوبنا وصف جمالك ..
أمرك مطاع أبداً يا زينه ..
إنتي الجمال والناس علينا ..
بسمك سنا ولفظك غنى ..
كم بيهو يا سمحة إنتشينا ..
حسنك بديع معدوم مثالك ..
حير قلوبنا وصف جمالك ..

D D D D D


يا بت يا نيل
مصطفي سيد أحمد

رسمت بوجيه بسيم الضوء ...
بتغالط في الزمن القاسـي ..
بتعاتب في الغنية الصعبة ...
ولحن حزين ..
ووتر موجوع بيحكي إحساسي ..
تسأل عن شدو الأفـراح …
يمكن لجراحنا يكون أسـي ..
ما بيشبع روحنا فرح زايف ...
لو كـان تتناسي وتتناسـي ..
D D D D D
يا بت يا نيل ...
العاشقك عاشق كل الفيك ..
غنايك في كـل ظروفك ..
في الفرح البيدق وعد وفال ..
والحزن الـودر ضي شوفك ..
في السجن القهرك في خوفك ..
في النبض الصامد في البركان ...
الساعدو يرمرم في جوفك ..
يا بت يا نيل ...
D D D D D
جرحـنا عتابك ياباكيــه ..
وعايزانا نغني غنى الأفراح ..
ما الغنوة الناشفة لبن ضرعك ..
والفرح الفيـك خلانا وراح ..
ولقينا فرحنــا وإنتي حزينة …
يكون أشتر ويزيدنا جراح ..
خلينا من الفــرح الكاذب ..
بتعود أفراحنا وتبقى براح ..
رسمت بوجيه بسيم الضوء ..

D D D D D

سافــــــر
قاسم أبو زيد

سافر مطارات الوداع ..
ضجة قدامك وراك ..... وسماك غناي
مساحات الأسى الفي عيونا ..
تتفجر مدينة وناي ..
بطاقات دعوة الرجعة ..
تساب عينين من الفرحة ..
دموع للحاضرين فجة ..
زغاريد غطت الدنيا ..
وعاد فرح الرجوع منية ..
صداك الريف ... ومن السنبل الغناي
D D D D D
كثير بنعاتب الماضي ..
ولا أسفاً على الحاضر ... صد الرية من قلبك
نغم فنان يعيش راضي ..
مداك إتعدى حد الشوق ..
دخلت على الشعر إنسان ..
هواك إتخت جوة الجوف ،، وإنتحر النهار هسه ..
نغنيك لي مدن شاخت ..
معاك أحلامي ما تنسى ..
تغنيك القرى الراحت ..
خلاص يا غربة ما ترسى ..
غنيناك وبنغني ..
ويتحدى الزمن فنان ..

D D D D D


شعاع شمس الأغاني

مدني يوسف النخلي

زي شعاع شمس الأغاني ..
جا الحنين عاودني تاني ..
كنت راجيك لو تضلي ..
وكنت ليك كل المواني ...
داير أصارحك بالبحسو ...
وبالأسى وزمن الكآبة ..
D D D D D
القصايد سألة عنك ...
في الحروف باين عتابه ..
جاني الحنين عاودني ...
تاني ليك للغنى والكتابة ..
زي شعاع شمس الأماني ..
جا الحنين عاودني تاني ..
D D D D D
لما سبت هواك رحلت ... لي دروب بالحب بخيلة ..
للضياع سلمت عمري ... وقــلت مـا بـالـيـد حـيـلة ..
وزي شعاع شمس الأماني ... ساقني لي كل المواني ..
إنتي يا الراجع صباحك ..
بي بشاشتك وبي سماحك ..
بعد ما الأيام شقتني ..
وإنتي كم نزفت جراحك ..
وزي شعاع شمس الأماني ..
كنت ليك كل المواني ..

D D D D D



صابرين
محمد طه القدال

يا حزن الغنى ... صابرين ..
من بعد الضنى ... صابرين ..
على وعد المنى ... صابرين ..
برجاك يا وعد الحبيبة ..
بلقاك في الفرحة القريبة ..
بشراك يا أم الثنى ... صابرين ..
يا حزن الغنى ... صابرين ..
من بعد الضنى ... صابرين ..
على وعد المنى ... صابرين ..
D D D D D
لا ليل ولا حزن طايل ..
لا صد ولا دمع سايل ..
لا هم جاك يا أم نفايل ..
النيل فاض وإنحنا ..
نيلين وحزنك وحلمك أنا ..
فرعين شايلين جنى ... صابرين ..
ســـــــــــــلامات ..
عشرات حبابك ... سلامات ..
يسلم شبابك ... سلامات ..
شايل سحابك ... سلامات ..
القبلي شابك ... سلامات ..
وهواك هنا ... صابـــــــــرين ..
عاشقين ترابك ... سلامـــات ..
يا حزن الغنى … صابـــــــــرين ..

D D D D D


العشق الخرافي
مصطفي سيد أحمد

في عينيك عشم باكر ..
ما إنــت العـــمر كلــــــــه ... والشـمـس الـوشـاحـة ورود
وزغـرودة بـتـزف للناس ... خـبـر زمنــاً جــديد مـولـود
لقيت غيرك بضيع إسمي ... وأكون أنا حي وزي مفقـود
وفي عينيك عشم باكر ..
D D D D D
لاقيني يا عشقي الخرافي ... لاقـيـنـي قـبــال الـزوال ..
لاقيني في كل المـرافئ …
دقات ربيع وفرح قوافي ..
وإنشرى في حزن السنابل ... غيمة يا كل المشاعر ..
وأمـشـي قـبـال الـصـبـاح ... وزعي الطل للأزاهر
D D D D D
لاقيني يا شوقي الخرافي ... لاقيني قبال الزوال
غنوة من أزمان بعيدة ... طالعة من زمن الرميدة
تلقيني راجيك بالآماسي ...
في المراسي والملمات الغفيرة ..

D D D D D

على بابك
عبد القادر الكتيابي

على بابك نهارات الصبر واقفات ..
بداية الدنيا هن واقفات .. وكم لهفان وكم طاير
بعد نتف جناح ندامتو ودار ..
نفض هم ندامتو وفات .. قطع شامة هواك من قلبو
إلا هواك نبت تاني ..
وعــــــــلى بــــــــابــــــك ..
وقف تاني الغمايم .. فاجة قطن الليل
مسافر فيها وحداني ... وبدون جنحات
يغنيك الزمن المافي .. يغنيك رهافة حسو
يغني على جليد آماله ... و يحلم بالشتاء الدافئ
وقدر ما يمشي في سور الزمن ... خطوات ..
يلاقي خطى السنين ... واقفات ..
عــــــــلى بــــــــابــــــك ..
يلاقي هواك نبت تاني ..
ومــلا الساحــات ...

D D D D D

صفوة عاشقيك
صلاح حاج سعيد

قلت ليها ..
إيدي في إيديها ..
دمعة حزن سالت ..
جاي منك وماشي ليك ..
يا مداين غربة طالت ..
لو مدارات نجمي ضلت ..
سكة السفر إستحالت ...
كوني في دربي الحقيقة ..
الدايمة ليها مشاعري مالت ..
D D D D D
قلت ليها ..
وكنت راجع لي عينيها ..
من أسى الزمن المسافر ..
في المشاوير العصيبه ..
من متاهات الأماسي ..
من متاهات الحزن ..
مضمناها وحبيبه ..
بيني لا بينك مسار ..
لا محطات إنتظار ..
لا مواعيد قريبة ..
إنتي يا الفرح الحقيقي ..
المستحيل ...
هدهدي الصبر الجميل ...
وأمسحي الألم المخيم ..
في مدارات الرحيل ...
D D D D D
قلت ليها ..
الحقيقة الضائعة ..
بين قلبي وعيونك ..
إني لا قادر أفوتك ..
لا أجيك ..
وإني عارف بدونك ..
أبقى كلمة حب تزف ..
البشرى في ساعة مجيك ..
وإنت عارفة ..
ياني أكثر زول بريدك ..
ياني صفوة عاشقيك ..
ياني أكثر زول بحبك ..
ولسه بحبك متيم ومبتلى ..
وريدك زادني حيرة على العلي ..
لا مراكب القدرة خبت قلبي عنك ..
وإنت لا قلبك نساني ..
ولا خلاني ..
وقلت ليها ..

D D D D D



أديني إحساس بالأمل
مدني يوسف النخلي

أديني إحساس بالأمل .. في كل رحلة شوق تطول
وأدي الخطاوي الراجعة ليك .. في سكتك عشم الوصول
ما الدنيا كلها إرتحال …
والإنتظار قدر الوصول ..
الموجة تحلم بالضفاف …
والغيمة تحلم بالهطول ..
D D D D D
راحل معاي ضي الأماني ...
وذكري للأيام هناك ..
لحظات بتذخر بالمعاني ..
وكيف أنسى تذكارات هواك ..
نتحمل الغربة ونعاني ...
ونصبر عشان نكسب رضاك ...
ونغني لو زاد الحنين ...
ياريتو كان سفراً معاك ..

D D D D D


أظنك عرفتي
جمال حسن سعيد


أظنك عـرفتي عواصفك مهبـي يسارق خيالك يسوقني ويــــــودي
ونهـرك يعـدي ويجهـل مصبـــي هواجسي البتزرع وظني البيربـي
D D D D D
بديتك خواطر بتصحى وتسـاور وطيفك يـزاور وروحـك تحــــــاور
تجيني في زمانـك موشـح أساور أقـول بس نسيتك وجرحـك يتـاور
D D D D D
أظنك عـرفتي عـذاب المغـني وطبلـوا المجـدع شظايـــا التمـني
حروفوا البتجزع في لحظة تـجني خطـاه البتـهــــرع متيــن تطمئـني
D D D D D
مسـرج خيـالك حصاني القبيــل معربــد غبــــاره وخـلى الصهيــــل
مسـافر مســـافر وفـــــاقد دليــــــل أظـنـــك عـرفتي همـــوم الرحيـــل

D D D D D


الحاج ود عجبنا
الفرجوني

عمنا الحاج ود عجبنا ...
في الفريق ياهو الركيز ...
هو البشيل حمل الرباعة ...
عندو كلمة على الجماعة ...
في الفريق باقيلينا آية ...
للضعيف تلقاهو ساند ...
ويقهر الكعب المعاند ...
للضيوف ديوانو فاتح ...
ديل يقوموا وديل يدخلوا ...
يا ولد جيب الرتاين ...
جيهوا الديوان فراشو ...
وأفرشوا الفرشة الكبيرة ...
والأباريق والتباريق ...
وأضبحوا الحمل المدوعل ...
D D D D D
عمنا الحاج ود عجبنا ...
من سنين أيام جهلتو ...
ديمة في دعوة صلاتو ...
بسأل المولى السلامة ...
وسترة الحال والكرامة ...
وعمنا الحاج ود عجبنا ...
في ليلة من ذات الليالي ...
في زمن حظر التجول ...
جاهو ضيف فوق راس حداشر ...
رحب الحاج بيهو جداً ...
فرشولو ونزلوه ...
وكاسو للعشا ما تلقالو ...
ما الرغيف ممحوق مقصر ...
والبلد في حال معسر ...
وعمنا الحاج فيما بالو ...
وجبة الضيف زي فريضة ...
وهسي ضاقت بي العريضة ...
وضيفوا كيف إترك عشاهو ...
D D D D D
وجاتلو فكرة ...
يمشى للفرن المجاور ...
للجان العيش يشاور ...
بس عشا الضيف يا جماعة ...
ضيفي نازل ليهو ساعة ...
شاكلوه ... ودفروه ... ونهرهوه ...
وجاتو دورية الطوري ...
وأمسى بايت في الحراسة ...
D D D D D
وناسو جنو للصباح ما عرفوا حاجة ...
وين ده روح ؟؟؟
وجاهن الخبر المؤكد ...
ود عجبنا في الحراسة ...
ماشى دورية الطواري ...
ناسو ... أولادو ... وبناتو ...
راحوا دورين محكمة الطواري ...
فيها في نص الخلايق ...
شافو حالاً ما هو لايق ...
عمنا الحاج بي جلالو ...
فوقوا حس السوط يولول ...
فوق قفاهو ... فوق ذنودو ...
فوق رجولوا ...
ومره فوق فججاً حشايل ...
أصلو ما قيل بهوناً ...
حتى كان نزان عجايب ...
إلا لكن الليالي هي البترخص كل غالي ...
D D D D D
حاكموا الولد المنصب ...
كتفوا بالدبور مقصب ...
أنت يا حاج يا مخالف ...
زول مخرف وعقولوا تالف ...
أنت يا زول ما كا داري ...
زلة الناس في الطوارئ ...
أ جلدوه ... غرموه ...
ونفذوا الحكم البهينوا ...
شان يفتح تاني عينو ...
D D D D D
تسمع الصوت صيحتو داوية ...
تسمع السوط ليهو خاوية ...
فوق قفة الشيخ صيحتوا داوية ...
وفجأة رفع الحاج عيونو ...
شاف بنات ولدو وبناتو ...
كلهن واقفات يعاينن ...
دمعتين في العين ترقرق ...
والحزن بينن مفرق ...
ده النجوم الفي سماهن ...
ده الزمان الكان حماهن ...
كل سوط نازل عليهو ...
من شعاع الضو عماهن ...
عمك الحاج دمعوا سرف ...
سيلوا فوق اشنابو سرب ...
تمه حكموا وراح بيوتو ...
نفسوا مكسورة وذليلة ...
كيف ملاقاة الحليلة ...
وصحوة الروح العليلة ...
في البيوت الجوه غادي ...
عمك الحاج ما إعتيادي ...
فوقو متلمين جماعتو ...
والسكيلي ضرب حزايني ...
قالوا ناداهو المنادي ...
فارق الدنيا المسيئة ...
يقطع الزلة وسنينها ...
فوق فراش حاج ود عجبنا ...
بسمع الزول البوصي ...
أقفلوا الحوش يا جماعة ...
وطفوا أنوار الرتاين ...
داك حرس حظر التجول ...
من بعيد ليكم بعاين ...
يا زمن حظر التجول ...
يا زمن حظر التجول ...

D D D D D


البت الحديقة
خطاب حسن أحمد

حاتجي البت الحديقة ..
فاردة أنسام في طريقة ..
وشاتلة ألوان ..
حتجي البحدث بريقة ...
ضجة الضو في المكان ...
D D D D D
حتجي المن بدري جات ..
من ضلامات السكات ..
شايلة قمرين في عيونه ..
وفاتحة ليلين بي جنونا ..
وضاوية ساحات إنتمت ..
لي فجر فات ...
وبتنتمي لعصور جديدة ...
D D D D D
حاتجي البت البريدا ..
ضاحكة منتصرة وعنيدة ..
آملة مزدهرة و شديدة ..
وناقشة في الزول أغنيات ..
حتجي المن بدري جات ..
ناسفة أزمان الثبات ..
واصفة للناس الطريقة ..
وللعصافير الجهات ..

D D D D D



الحزن النبيل
صلاح حاج سعيد

وبقيت أغني عليك ..
غناوي الحسرة والأسف الطويل ..
وعشان أجيب ليك الفرح ..
رضيان مشيت للمستحيل
ومعاك في آخر المدى ..
فتيني ياهجعة مواعيدي القبيل ..
بعتيني لي حضن الأسى ..
وسبتيني للحزن النبيل ..
D D D D D
ومشيت معاك كل الخطاوي الممكنة ..
وبقدر عليها وبعرفها ..
أوفيت وما قصرت في حقك ولا كان..
عرفة غيرك أصادفها ..
وقدر هواك يجيبني ليك ..
جمع قلوبنا وولفها ..
وكتين بقيتي معاي في أعماقي ..
في أعماق مشاعري المرهفة ..
لا منك إبتدت الظروف ...
لا بيك إنتهت الأماني المترفه
D D D D D
ندمان أنا ..
أبداً وحاتك عمري ما شلت الندم ..
ما أصلوا حال الدنيا ..
تسرق مُنية في لحظة عشم ..
وأنا عندي ليك كان الفرح ..
رغم إحتمالي أساكي يا جرح الألم ..
كان خوفي منك جاي .. من لهفة خطاك على المواعيد الوهم
أهوه نحن في الآخر سوى ..
باعنا الهوى...
ماشين على سكة عشم !!
وبقيت أغني عليك ..
عناوي الحسرة والأسف الطويل ...

D D D D D


الغربة
عبد العال السيد

الدنيا ليل غربة ومطر ... وفرح حزين وجع تقاسيم الوتر ..
شرب الزمن فرح سنين .. والباقي هداه السفر ..
D D D D D
يا روح غناي الغربة ملت من شقاي ..
وغربتي يا روح غناي ... الغربة ملت من غناي ..
وغربتي وبقيت برأي … حاضن أساي
الوحشة ملت من أساي .. وحدتي لا غنوة لا موال ..
يبدد حسرتي غير الدموع … يا ملهمه .. الغربة مرة ومؤلمة
D D D D D
قولي للنيل ضفة ضفة .. والعشيات لما تصفي ..
والنسيمات البتــاخد من عفاف ريدتنـا عفة ..
إنو شوقي يفيض بحر ...
شوقي شوق إنسان مضيع .. ضيعوا الليل والسفر
شوقي شوق إنسان معذب .. عذبوا الليل والسفر
لا ينابيع ريدي جفت لا و لا أشواقـي خفـت ..
كل يوم في غربة زايده .. بيها كل الدنيا عرفت
الدنيا ليل غربة ومطر ...
D D D D D
صفوة محاسنك
صلاح حاج سعيد

كان نفسي أقولك من زمان …
بالكاتمو في سري ومكتم … في حشاي مدسوس سنين
كان نفسي أقولك من زمان ...
بالشايلو في عيني معزة وفي القلب … ريداً يخاف الغربة والشوق والحنين
زاملني زي خاطر الفرح … وكتين يقاسم الريد حنان
وكتين مدامعي تكون جزى … وتفتح مباهج الليل ظنون ..
D D D D D
كان نفسي أقولك من زمان ..
صفوة محاسنك عندي ما كثرة جفون …
وقت العيون تعبرني زي خاطر المساء
صفوة محاسنك ما الرخام الفي الحرير …
وقت الثغير يفجعني بي حـرفاً قسا
صفوة محاسنك عندي وقتين … كبريائك ينهزم لي طيبتي بلفظة حنان
وقتين مشاعرك تنسجم … في عمري تلفح قلبي بي رعشة أمان
صفوة محاسنك عندي وقتين شوقي …
صبح في هواك للعزة ما بتعرف هوان ..
D D D D D
كان نفسي أقولك من زمان ..
عينيك وحاتك دنيتي وأهلي … ودياري الفيها ضايع لي زمن
عينيك وحاتك شوقي لي زولاً … ولوف من بعد ساب عيني سهن
وأنا كنت داير من زمان … أشرح حكايتي معاك ألف
أحكيك وأزيد الكون ولف … وأتمنى لو قلبك عرف كان من زمان
من قبل ما في قلبي يتحكر … زمان الحرقه في جرح الأسى
من قبل ما حرف الحقيقة الحلوة يتبدل عسى ..
وأصبح أماني كثيرة في خاطر الحنان ..
كان نفسي قولك من زمان ..

D D D D D


كوني النجمة
قاسم أبو زيد

قولي الكلمة لصمت الليل ..
وكوني النجمة ..
وامشي معانا الدرب طويل ..
وكوني النجمة ..
D D D D D
وأدي الفرح إمتد مساحة ..
نادي الأمل الجوه عيونا ..
شوق الشوق أتجدد تاني ..
باقي أحلامنا جدار من كونا ..
قولي الكلمة لصمت الليل ..
وكوني النجمة ...
وامشي معانا الدرب طويل ...
وكوني النجمة ...
D D D D D
إيد مبسوطة تقابل الحنة ..
نغم الليل السال شبال ..
نخلة تغازل في عيون طفلة ..
وحفلة ورقصة فال ..
قولي الكلمة لصمت الليل ..
وكوني النجمة ...
وامشي معانا الدرب طويل ..
وكوني النجمة ...

D D D D D

[marwa]

ydeeeeeek al3afya '7aled

[medo]

خالد حمد موسي ده انت الزوقك جميل وحلو واحساسك مرهف ومصطفي سيد احمد استاهل اكتر من كده الله ارحمو----------------

[خالد حمد موسى]

مشكورحبااايبي

مرووه

ميدو

شكرا ليك ميدو

علي الكلماات وفعلا

ابوسيد يستااهل اكثر

اديكم العافيه....

[زيكو منيب]

الفنان الرائع ابو السيد

[خالد حمد موسى]

مشكوريازيكوعلي المروراديك العافيه....

[عصام عبدالرحمن]

كاتب الرسالة الأصلية medo
خالد حمد موسي ده انت الزوقك جميل وحلو واحساسك مرهف ومصطفي سيد احمد استاهل اكتر من كده الله ارحمو----------------

[خالد حمد موسى]

مشكورياعصاااام علي المروراديك العافيه....

[ياسر فقيري]

أخي لك التحية .. هناك بعض الأغنيات التي لم تكتب أو لعل من سمعها قليل تغنى بها استاذنا الراحل المقيم مصطفى سيد أحمد سأحاول أن أنشرها في المنتدى .. ولكن بعد الحج إن شاء الله

[خالد حمد موسى]

مشــــــــــــــــــكور اخـــــــــي ياســـــــــــــــر

عــــــــــــلي المــــــــــــروراوبانســــــــــــــبــــة لي بااااقي الاغاااااني

كـلــــــــــــــــها مــــــــــــــــوجــــــــــــوده

لك الشكر ياغالي ....

[خالد حمد موسى]

راحل معاي ضي الأماني ...

وذكري للأيام هناك ..

لحظات بتذخر بالمعاني ..

وكيف أنسى تذكارات هواك ..

نتحمل الغربة ونعاني ...

ونصبر عشان نكسب رضاك ...

ونغني لو زاد الحنين ...

ياريتو كان سفراً معاك

[ابواليقظان]

قيل لبشار بينما تكتب أجود أنواع الشعر (الثمين)

قفا بنكي من ذكر حبيب ومنزل * بسقط اللوي بين الدخول فحومل

فاذا بك تتبعه بالغثّ منها : ربابة ربة البيت ** تصبّ الخلّ في الزيت

قال : لكل من مقامه فهي إجابة تستحسن ولكنها غير مقنعه

قفد حزوت يـا أخي حزوه ، تتحدث عن مصطفي سيد احمد

ثم تأتي لتتحدث عن محمود عبدالعزيز مع كامل احترامي لإختلاف

وجهات النظر فمحمود في خارطة الغناء السوداني مثل عرب رحّــل

نصبوا خيامهم في أرض عما قريب راحلون عنها ، فكيف من رسخ

رسوخ النيل في ذاكرة الشعب السوداني.

فحرية الرأي تسع الجميع/ ولكم العتبي يأيها المحموديين.

[ابوقيس]

خالد حمد موسي ده انت الزوقك جميل وحلو

واحساسك مرهف ومصطفي سيد احمد استاهل اكتر من كده الله ارحمو----------------

[خالد حمد موسى]

مشكورين ياشباب علي المرور

ابواليقظان

ابوقيس

لكم كل الود احبائي...

[عزت الهادي]

خالد حمد موسي ده انت الزوقك جميل وحلو

واحساسك مرهف ومصطفي سيد احمد استاهل اكتر من كده الله ارحمو----------------

[خالد حمد موسى]

مشكور عزت علي المرور

لك كل الود عزيزي....

[كاظم]

شكرا لجهدك يا استاذ بس في ملاحظة بسيطة اللي هي انو قصيدة عجاج البحر لشاعر مصري لو ما خانتني الذاكرة اسمو مين كده بيومي وعلى العمومبعدك انو اجيب ليك الاسم كامل وانا شخصيا لاقيتو في مطلع العام الفين وواحد في القاهرة.. وعلى كل شكرا جميلا لجهدكم

[خالد حمد موسى]

مشكور كاظم علي المرور والملاحظة

وفعلا عجاج البحر للشاعر المصري حسن بيومي

ووجدها الاستاذ مصطفي في مجلة دورية

لك الشكر ياغالي....

[كاظم]

مشكور يا خالد ياجميل وعليك الله ما تزهج من جمع وتوثيق اغنيات مصطفى لانو شكلو المشوار حيطول وعلى العموم انا بضم صوتي لى صوتك وبتمنى من اي زول عندو اغنية لمصطفى انو ما يبخل بيها علي القراء المتعطشين لروايع مصطفي البنعتقد انوملك للجميع

[خالد حمد موسى]

مشكور ياعزيزي علي مرورك

وان شاء الله مافي زهج من الثوثيق

وهزا شي بسيط جدا نقدمه للراحل مطصفي

ذالك الانسان الرايع الزي خلدة الكثير من اغانيه

ومهما اكتب وااوثق مااقدر اوفي له ذالك الاستاذ الرايع

لك كل الشكر عزيزي....

[كاظم]

هذه مشاركة بأغنية سفر العمر للراحل مصطفي
وهي من كلمات مدني يوسف النخلي

ما بان عليك سفر العمر
لسة الربيع يا دابو زار
لسة الضفاف المترعة
بتفيض ندى وتطرح ثمار
الناس عليك ناداها فال
في عيونها نام الانبهار
وانا جوة قلبي المشتهيك نزفت جراحات الودار

جوة العيون اطفال فرح
لمة زفاف
جوة العيون تشرق شموس
ويرحل جفاف
ازمان بتغرق في النعيم
وحنان غمر عاشقين رهاف
وانا جوة قلبي الكلو ليك
نزفت جراحات الودار

يا زهرة طالت بالفرح
بتراقص انوار المسا
ما بان عليك اثر القطاف
ولا جاتك أيام القسا
ما أروعك وانتي الشباب
بخمرة الريد اكتسى
وانا جوة قلبي المشتهيك نزفت جراحات الودار

[ابو الرجال]

خالد حمد موسي تقف عندك الروعة وتكمل فيك الزوقنة وجدد العهد والمزيد من الابداع
واسف لتاخير المرور نسبة لحداثة اشتراكي بالمتدي

[كاظم]

وينك ياخالد
ان شا الله داعي الغيبة خير...

[خالد حمد موسى]

مشكورين ياشباب علي المرور الكريم

كاظم

ابو الرجال

لكم كل التحايا..

اخي كاظم مشكور علي المشاركة بس طبعا

في شي انت يمكن مامريت عليه الهو انو اغاني الراحل

كلها منزله علي جزئين يمكن تشوف الجزء الثاني منزل

اومافي غيبه ان شاءالله تجدنا دايما موجدين

لك كل الشكرعزيزي....

[كاظم]

خالد شكرا جميلا يا صديق .. وفعلا انا ما كنت منتبه للجزء التاني لحد
ااثة مشاركتنا اصلا ولغيبوبة الغربة ...
تسلم ياخالد وربنا يقويك

[خالد حمد موسى]

مشكور كاظم علي المرور

لك كل الشكر ياغالي...

[Mr Lonely]

يديك الف عافيه يا رائع

والله والله والله والله تستاهل احلى تصفيقه يا زوق

لك كل الود
Mr Lonely

[sandra]

يديك ألف عافيه يا راااااااائع..

بالجد أنا من زماااان بفتش على الإبداعات دي.. تسلم يدك..

ســـــاندرا..

[خالد حمد موسى]

مشكورين ياشباب علي المرور

Mr Lonely

ساندرا

لكم كل الود احبائي...