المساعد الشخصي الرقمي

مشاهدة النسخة كاملة : المجموعة الكاملة لابداعاتlyrics) مصطفي سيد احمد (2)



خالد حمد موسى
21-12-2004, 11:42 PM
مدن عينيك
عبد القادر الكتيابي

لمحتك … قلت بر آمن بديت أحلم ..
ألملم قدرتي الباقية … وأشد ساعد على المقداف ..
تلوح لي مدن عينيك … وترفع لي منارة بسمتك سارية ..
كل ما الريح تطارد الموج ..
أزيد إصرار وألحق بيك ..
أغير سكة التيار ...
وأقول يا إنت يا أغرق !!
D D D D D
وتلوح لي مدن عينيك ..
أخاف الضفة ترجع بيك قبل ألحق ..
وأخاف غيم المنى الشايل تسوقوا الريح ويتفرق ..
وأشد ساعد على المقداف ..
وأجيك بي قدرتي الباقية ..
حطام إنسان موسم … بي شقى الدنيـــا ..
مقسم قليبو في الأحزان …
أجيك فنان ..
أشد أوتـــــاري … وأحكيلك حكاية إنسان ..
وهب لي سكتك نفسو ..
ورسم صورتك علي حسو ..
وربط ساعد على المجداف ..
وقال … يا إنتي يا أغرق !!
أخاف … أخاف غيم المنى الشايل ..
تسوقو الريح ويتفرق ..
والاقيك يا أماني سراب ..
مواهبي عليه تتدفق ..

D D D D D



أيـام زمـان
التجاني حاج موسى

والله أيام يا زمان … ببكي وأتحسر عليك
ومابيقولو العشناه كان … وأرمي حبت لومي فيك
والله أيام يا زمان ..
لسه راجيك يازمان … بحبة الذكرى المعاي
عايشه في وجداني جوة … ولسة بتدغدغ حشاي
ويمكن الحبيتو مرة … ألقاه في كلمات غناي
أصلو بتصحي المشاعر … ويمكن الطول سهاي
D D D D D
تغشى ليلاتو البشاير .. ويمكن الفرح الزمان ..
لسة أصداه بترن .. غنوة حاضناها الضفاير
والله أيام يا زمان ..
D D D D D
جايز الأيام تحن … وتصحي فيك نبل المشاعر
ويمكن المجروح يئن … وتغشى ليلاتو البشاير
ويمكن الفرح الزمان ... لسة أصداه بترن ...
غنوة حاضناها الضفاير ..

D D D D D


وجيدة
قريب الله عبد الواحد

بعيد عني ..
خطاك ما لامست وجه الطريق ..
ومشيتي لا فوق غيمه لا ظني ..
كأنك من وراء صفحة زجاج مبلول ...
وراك الريح ..
وقدامك مدى السكة وندا المجهول ..
وأنادي ليك ..
وجيدة ... وجيدة
لا إلتفتي ولا لوحتي بي إيدك ..
وأنادي ليك ..
يجاوبني المدى الفاتح مدارج الهم ..
بتبقى وجيده طعنة سيف ..
موسدة في شق السماء المرسوم ..
وسادة دم ...
وتبقى إيدنا في إيديك ..
وفي شعرك ..
وفي المنديل ..
D D D D D
وضاحة
أزهري محمد علي

الصباح الباهي لونك .. وضاحة يا فجر المشارق ..
غابة الأبنوس عيونك .. يا بنية من خبز الفنادق ..
D D D D D
شيدت في جواي صوامع للفرح ..
وفتحت في دنياي مسارح للمرح ..
وبقيت لي سكة وعيون .. لا قدرت اطولك شان أجيك ..
لا قدرت من غيرك أكون .. وأنا بيك ماليني الكلام ..
حركت بيك عصب السكون ..
جلبت ليك الغيم رحط .. طرزت ليك النيل زفاف ..
حرقت ليك الشوق بخور .. و فرشت ليك الريد لحاف ..
D D D D D
لا السكة بيك بتنتهي .. ولا معاك مليت طواف ..
ياريتني لو أقدر أكون .. وضاحة يا فجر المشارق ..
الصباح الباهي لونك .. يا بنية من خبز الفنادق ..
غابة الأبنوس عيونك ..

D D D D D

يا مطر عز الحريق
محمد الحسن سالم حميد

من الواسوق أبت تطلع !!
من الأبرول أبت تطلع !!
من الأقلام أبت تطلع !!
من المدفع طلع خازوق .. خوازيق البلد زادت
يفيض النيل نحيض نحنَ .. يظل حال البلد واقف
تقع محنه ولا النيل القديم ياهو … ولا يانا
نعاين في الجروف تنهد … ولا يانا
رقاب تمر الجدود تنقص … ولا يانا
متين إيد الغبش تتمد لا قدام … لا قدام
تتش عين الظلام بالضو .. تفرهد شتلة لا هدام ..
ولا فيضاً يفوت الحد .. عقب يانيل تكون ياك ..
ونكون أهل البلد بالجد ...
D D D D D
يا مطر عز الحريق ..
يا مصابيح الطريق ..
يا المراكبية البتجبد ..
من فك الموج الغريق ..
جينا ليك والشوق دفرنا ..
يا نشوق روحنا ودمرنا ..
يا المحطات الحنينة ..
القصرت مشوار سفرنا ..
D D D D D
يا ما شايلك فيني حايم .. لا اليالي المخملية
لا العمارات السوامق .. لا الأسامي الأجنبية
بتمحى من عيني ملامحك ..
وإنتِ جايهِ المغربيهِ .. داقسهِ دايشهِ المغربيهِ
وشك المكبوت مكندك .. سمصونايتك زمزميهِ
كون شبر طوريه منجل ..
سبحه فانوساً مدردح ..
قلتي بيهن لي زمانك ..
يا زمان الآهه حدك ..
يا زمان الحاجة عندك ..
لا تطي الوردة الصبيه ..

D D D D D


يا سر مكتوم
سيف الدين محمد صالح

يا سر مكتوم في جوف أصداف …
فتشت عليك بقليب نزاف .. أبحرت ليك بلا مجداف
لا خبير يهدي ولا دليل وصاف .. يا سر مكتوم في جوف أصداف
D D D D D
راجياها الريح وكتين ما تطل .. على موجه تمرجح زهرة فل
تشيلها تروح والدنيا تنوح .. على قمراً مات في مطر الليل
يتم نجمات بكاها السيل ..
D D D D D
يا عمر مرسوم في كف أقدار .. ياخطايا الطال بيها المشوار ..
محسوب ليك تمشي براك خطى الأحزان ..
مكتوب ليك آه ودمعة شوق ظمأن ..
مرسوم ليك سهر العاشقين وليك سهران ..
D D D D D
ياسر مكتوم في جوف أصداف ... الريح القاسية عنيدة تمام
طفت القنديل الكان مقدوح من دمع الليل
رمت القنديل الكان نديان في جوف النيل
رسمت أحزان وسؤال حيران في عيون أيتام ..
يا سر مكتوم في جوف أصداف ..

D D D D D

مزيكة الحواري
محمد المهدي عبدالوهاب

ماني غرقان في التمني .. ولاني سارح بالأماني
زارني خاطراً بله شوقي واحتواني ..
النخل إتلاقى غنى .. وردد النيل الأغاني
النجوم لامع بريقها .. الورود النايمة فاقت
عطرت كل الجزاير بحريقها .. الندى الراقد بفوقها
صفقت جنحاتو غنت لي هواي ..
D D D D D
دقوا مزيكة الحواري .. رقصوا البنوت أعرضوا
النخل زائد في عرضو وفي علاهو ..
يحكي للدنيا الجميلة .. سر ثباتو وسر بهاهه
ضي عيونك يا بنية .. يضوي لي بلداً بعيدة
تحملك لينا الغمامة .. ويكتمل للروح نشيدها
للدروب الليك تودي .. بنسرج الخيل العنيدة
والحزن من ضي عيونك .. يلبس الفرحة الجديدة
D D D D D
وأنا راكب يا مراكب .. لا الرياح توقف خطاي
لا الجبال تحجب رؤاي .. سر شموس الكون مناي
ليك مسافر من كتير الزاد ..
مسافر بي غناي ..
نوصل الشمس البعيدة ..
نبقى عيدها ..
نزرع الحب البيوقد للنهاية ...

D D D D D


عم عبد الرحيم
محمد الحسن سالم حميد

فتاح يا عليم .. رزاق يا كريم ..
صلى على عجل ..
همهم .. همهمات ..
حصن للعباد ... وهوزز سبحتو ..
ودنقر للتراب .. هم فوق هم همات ..
صنقع للمسا ..
وكان في الجو في غيم ..
وكم نجمات بُعاد ..
وكان الدنيا صيف ..
لا قالتلو كيف ..
كيف أصبحت كيف ؟..
لا لمسة حنان .. لا لمسة وداد ..
لا رمشة طريق من قلباً وفي ..
زي أيام زمان ..
أيام الدفي ..
D D D D D
وكانت ماها في .. كانت في المراح ..
شدتلو الحمار ..
تحلب في الغنم لي شاي الصباح ..
والطير ما نضم ... ما رسل نغم ..
D D D D D
عم عبد الرحيم أتوكل نزل ..
في المشرع لقى .. زملان الشقى
الجأ من الجريف .. الجأ من الجبل
عله الناس بخير .. صبح هاظرم
نقنق ناقرم .. غاظوه ونعل
وعم عبد الرحيم ما يخبر زعل ..
كل الناس هنا ما بتخبر زعل ..
تزعل من منو .. وتزعل في شِنو ..
كل الناس هنا .. كل الناس صحاب ..كل الناس أهل
والماهم قراب .. قربم العمل ..
D D D D D
الطاق اليطق عشت أبو الزمل ..
بالحالة العليك بالفال بالأمل ..
عبد الرحيم كُت فلاح في يوم ..
في أيدك تنوم .. على كيفك تقوم ..
لا دفتر حضور .. لا حصة فطور ..
تقرع بالقمر .. تزرع بالنجوم ..
لكن الزمن دوار آبدوم ...
D D D D D
وعم عبد الرحيم ماشي على الشغل ..
في البال القديم إتعارض تُكل ..
تنشايح جراح يا ..
كيف الغسل ..
الدِنيا أم صلاح .. تبدأ من التُكل ..
في حق الملاح .. في اللبس الجديد ..
في القصد القديم .. وبيناتن عشم ..
في الفرج البعيد ..
D D D D D
أمونه الصباح قالتلو النعال ..
والطِرق إنهرن ..ما قالتلو جيب
شيلن يا الحبيب .. غشهن النقُلتي والترزي القريب
بس يا أم الحسن ..
طقهن آبفيد .. طقن آبزيد ..
وإنطقن زمن ..
وإنطق الزمن لازم توب جديد ..
وبأية تمن ..
غصباً للظروف والحال الحرن ..
شان يا أم الرحوم .. ما تنكسفي يوم
لو جارتنا جن .. مارقات لي صفاح
أو بيريك نجاح .. ده الواجب إذن
وإيه الدنيا غير .. لمت ناس في خير
أو ساعة حزن ..
D D D D D
عم عبد الرحيم يا حر ..
ماك حر ..
ياريت التمر ياريت لو يشيل كل تلات اشر ..
ولا أيام زمان كانت ما تمر ..
كان ما جاك هوان وما لاقاك ضر ..
كان لا ضقتي ضيق لا اتغرغر صبر ..
لا شابيت غريق لا طوح فقر ..
وكان ما كان ... وكان اكسيكي در ..
D D D D D
والماهية أُف .. عيشة هاك وكُف
في هذا الزمن .. تُف يا دنيا تُف
يا العبد الشقي .. ما إتعود شكِي
لكن الكفاف فوقك مُنتكي
والسوق فيك يسوق ..حالك ما بتسر ..
إلا كمان في ناس فايتاك بالصبر ..
ساكنين بالإيجار لا طين لا تمر ..
واحدين بالإيجار ما لاقين جُحر ..
سعلتم الضراع والعرق اليخر ..
عمال المدن .. كلات المواني ..
الغبش التعاني ..
بحارة السفن .. حشاشة القِصون ..
لقاطة القطن .. الجالب الحُبال
الفِطن الفرن .. الشغلانتو نار ..
والجو كيف سُخن ..
فرقاً شتى بين .. ناساً عيشه دين ..
مجرورة وتجر ..
تقدح بالأجر .. ومرة بلا أجر ..
عيشن كم هو .. وديشن هانقدر ..
D D D D D
وناساً حاله زين ..
مصنع .. مصنعين ..
طين في طين وين ..
ما مرابه مُر ..
بارد همها .. لا يعرق جبين ..
لا وشاً يصُر ..
عين والله عين ..
كلها كمها .. وعزها هانقدر ..
في الجنة أم نعيم .. في الجنة أم قصُر ..
يا عبد الرحيم إلا وراء القبر ..
ويُلكد في الحُمار .. لا تسرح كُتر
فتاح يا عليم ..
وإن كان القفر يا عبد الرحيم ..
أشبه بالكفر ..
D D D D D
حيكومات تجي .. وحيكومات تغور ..
تحكُم بالحُجي .. بالدجل الكجُور ..
ومرة العسكري كسار الجبُور ..
يوم باسم النبي تحكمك القبور ..
تعرف يا صبي ..
مرة تلف تدور .. ولا تقول برِي ..
أو تحرق بخور ..
هِم يا الفنجري .. يالجرف الصبور ..
كل السقتو مات .. باقي على التمور
وأرضك راقدي بُور ..
لا تيراب وصل .. لا بابور يدور
ونقرط للحمار .. ونقريطة الحمار
لا تنسى النعال ..
الطِرقي .. الخضار .. اللبس الجديد
تسريح السفر للماشي الصعيد .. ماشي الديش نفر
والبال إشتغل .. والبال إشتعل بالآبى ما يعيد
الحول ما إشتغل ..
الغُبن الشديد .. السابا ورحل ..
الضيق المحل .. والفرج القريب ..
الجأ وما وصل ..
زي الحال ده يوم لا كان لا حصل .. والبال إشتغل
D D D D D
السكة الحديد يا عمو القطر ..
يا عبد الرحيم قدامك قطر ..
وسال الدم مطر ..
وطارت دمعتين ..وإنشايح وتر
يا طاحن الخبر ما بين القضا ومرحاكة القدر
الشهدوا الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..
الخبر اليقين بوّخ وإنتشر ..
أطفال القرى وعمال الحضر ..
أدوه الطيور ودنو البحر ..
إنصاعد سحاب وإندافق مطر ..
عم عبد الرحيم في الشارع عَصر ..
لي تاله اليسار متفادي الكجر ..
دورية الكجر .. عربية الكجر ..
جفلت الحمار وطوّح زي حجر ..
وعم عبد الرحيم إتلافا القطر ..
D D D D D
فتاح يا عليم .. سال الدم مطر ..
جرتق بالتراب .. منشور بي كتاب ..
روشتة وجواب .. وماهية شهر ..
مفتاح آب غراب .. أورنيكين سهر ..
جنب لبدة الحمار مقطوعين ضهر ..
عم عبد الرحيم يا كمين بشر ..
صحي الموت سلام ..
ما يغشاك شر ..
D D D D D
جواز سفر
حافظ عباس

والله نحن مع الطيور .. الما بنعرف ليها خرطة
ولا في إيدها جواز سفر .. نمشي في كل المدائن
نبني عشنا بالغناوي ..وننثر الأفراح دُرر
الربيع يسكن جوارنا .. والسنابل تملا دارنا
والرياحين والمطر ..
D D D D D
والحبيبة تغني لينا .. لا هموم تسكن دروبنا
ولا يلاقينا الخطر .. وين يلاقينا الخطر
لو بقينا مع الطيور الما بتعرف ليها خرطة ..
ولا باكر يا حليوه .. لما أولادنا السمُر
يبقوا أفراحنا البنمسح بيها أحزان الزمن ..
نمشي في كل الدروب الواسعة ديك ..
والرواكيب الصغيرة .. تبقى أكبر من مُدن
إيدي في إيدك نغني ..
والله نحن مع الطيور .. الما بنعرف ليها خرطة ..
ولا في إيدها جواز سفر ..
D D D D D

زمناً متمنية
محمد المهدي عبد الوهاب

ما بين زمناً متمنية ..
وزمناً منك زادني أسية ..
طفت الدنيا عشان أنساكي ..
وأنسى الحزن الطارد لي ..
D D D D D
كان البحر الما خلاني ..
وكان أخوان في الإنسانية ..
قعدن معاهم وإتفاكرنا ..
كم لفينا وكم ساهرنا ..
وكم مازحنا ليالي الصيف ..
وكم غنينا للحرية ..
وكم دارينا الحزن الأكبر ..
بين الصيف وجمال المنظر ...
D D D D D
كنتي بتطلعي من عينيهم ..
وكتين يفرحوا أو يندهشوا ..
أو يفترشوا سواعد بعض ..
أو يتكلموا عن الأرض وسلام العالم ..
D D D D D
ما أحلاهم ..
شالوا معاي الهم بالجملة ..
هتفو ..
البحر .. البحر .. البحر ..
وجوه المركب فضلوا يغنوا ..
شوية .. شوية ..
سكت المركب ..
كل الناس إثنين .. إثنين ..
فرح يتكلم بي لغتين ..
D D D D D
وكنت براي وجاني حنين الكون إتكوم ..
غور جوه صدري ..
وأتمنيت لو معاي ..
ما بين زمناً متمنية ..
وزمناً زادني أسية ...

D D D D D
المسافة
صلاح حاج سعيد

لسة بيناتنا المسافة والعيون ..
واللهفة والخوف والسكون ..
رنة الحزن البخافها ..
تعدي بالفرحة وتفوت ...
وأبكي بالحسرة وأموت ..
D D D D D
الأماني الفي السفر ..
قبل الزمن كايس المواني ..
يوم تجيبني عليك بصدق ..
إنو مرة الحظ طراني ..
واحتواني معاك شجن ..
عذبني قبلك ولسه منك جاي تاني ..
تمشي وين الخطوة منك ..
ما الزمن بالحب بلاك وابتلاني ..
D D D D D
يا عيونك يا مدائن ..
الفرحة والحب والجسارة ..
عندي ليك مليون بشارة ..
ألف طيف .. والكلمة شارة ..
وأنت لما الحب يهون في عيوني ..
وفي عيونك يبقي حائر بالأمارة ..
الفرح منك يجيني ..
ويعتريني الخوف عليك ..
خطوة منك .. خطوة ليك ..
راجي منك بس إشارة ...
كلمة تديني البشارة ...

D D D D D


عينيك
صلاح حاج سعيد

عينيك مدن منسية ..
في كتب التواريخ والزمن ..
عينيك وطن مشدود ..
على وتر التباريح والشجن ..
ممدود على حروف الكتابة ..
مكدود عنا ومكتول صبابة ..
فيه حطّ النيل سكن ...
D D D D D
عينيك سفر مكتوب أعيش في غربته ..
واعشق عذابه وحرقته .. وليله الطويل ..
أتخيلك يا حلوة زي نسمة سحر ..
جيتي ومعاك حلمي المطول منتظر ..
وعدو الجميل ...
عشقك زمان جواي رحل ..
يتناها في الأعماق أمل ..
ضمخ رؤاي إحساس نبيل ..
أذهل طيوف خاطري القبيل ..
جاشت ملامح روعته ..
وضج السكون في وحشته ..
والكان أمل في عيوني لاح ..
زورق مدرات فرح الوهج النضير المزدهر ..
فجأة إنحصد قبضة رياح ..
وسكت الكلام يا حلوة في القول المباح ..
وقام الصباح بعدك رحل ...
والكان أمل في غيم سماك ..
أيقنت أنه عدم بلاك ..
وأنه البيحلم بي علاك ..
بختار ظروف أحلاها مُر ..
D D D D D
عينيكي لو تصدق معاي الأمنية ..
عينيك لو أعرف ختام الأغنية ..
بدأ الكلام والمنتهى والمستطاب والمشتهى ..
كل المباهج في المواويل والغناء ..
والعاشقين قلبي وأنا ..
هزتنا في عينيك تصاوير المنى ..
يا أمنيات من كم سنة ..
ويا أغنيات كل الأماسي المستحيلة وممكنة ..
المستحيل عينيك تهون ..
والمستحيل قلبك يخون ..
ما القدر ما طبع الوفاء والصدق ما شرط إنتفا ...
وأنا حالي في بعدك كفي ..
وأنا حالي من بعدك كفاهو ..
المغنى والحب والشجن ..
والوحشة والشوق للوطن ..
العمر قبلك ضاع سُداً ..
والعمر بعدك أية يكون ..
لو يبقى بي إحساس الزمن ...

D D D D D




عـــز المــــزار
عبد العال السيد

من بعد ما عز المزار ..
والليل سها وملت نجومو الإنتظار ..
والشوق شرب حزن المواويل ..
وإنجرح خاطر النهار ..
وبقيت أعاين في الوجوه ..
وأسال عليك وسط الزحام ..
قبال أتوه ..
يمكن ألاقى البشبهك ..
ما الليل براح ..
والشوق تعالي بيندهك ..
D D D D D
شايلاهو وين النيل معاك ..
عصفورة جناحتها النجوم ..
وأنا بي وراك ..
بسأل عليك مُدن .. مُدن ..
وأعصر سلافة الليل حزن ..
بسأل عليك في المنفي ..
في مرفأ السفن ..
إمكن طيوفك أخريات الليل تمر ..
تملأ البراحات للحزين طول العُمر ..
D D D D D
ما نحن بين الأمنيات والتضحية ..
بين المعزات والعذابات في الحياة ..
بينا الهوى إخلاص على قلبي إنكوى ..
وكلام كثير قلناهو آخر الليل سو ى ..
إنو راح نتلاقى لو طال النوى ..
لكن كلامنا الكان وكان ..
خايف يكون شالو الهوى ...

D D D D D


واقف بـراك
مدني يوسف النخلي

وافق براك والهم عصف .. ريحاً كسح زهرة صباك
ليلاً فتح شرفة وجع .. قمراً رحل فارقك سماك
مطر الحُزن عاود هطل .. جدد عذاب الأرصفة
ضئ المصابيح البعيد .. أتعب عيونك وإنطفأ
لمتين مواعيدك سراب .. والريد شقا وحرقه وجفا
وافـــق بـــــــــراك ...
D D D D D
بعد المشاوير البقت .. ممدودة في نبض التعب
بتعود وتلقى رجاك زول .. حفظ الوداد زمناً صعب
والباقي من ليل الهوى ..
عطر الصبابة الما إنسكب
والباقي من كل الغنى ..
سيل الكتابة الما نضب ..
واقـــــــف بـــــــــــــــراك ...
واقـــــــف بـــــــــــــــراك ...

D D D D D


سفر العمر
مدني يوسف النخلي

ما بان عليك سفر العمر ..
لسة الربيع يا دابو زار ..
لسة الضفاف المترعة بتفيض ندى ..
وتدفق ثمار ...
الناس عليك ناداها فال ..
في عيون تناغم الإنتظار ..
وأنا جوه قلبي المشتهيك ..
نزفت جراحات الودار ...
D D D D D
جوه العيون أطفال فرح لمة زفاف ...
جوه العيون تشرق شموس يرحل جفاف ..
أزمان بتغرق في النعيم ..
وحنان غمر عاشقين رهاف ...
وأنا جوه قلبي المشتهيك ..
نزفت جراحات الودار ...
D D D D D
يا زهرة طلت بالفرح ..
بتراقص أنوار المسا ...
ما بان عليك أثر القطاف ..
ولا جاتك أيام القسا ..
ما أروعك وإنتي الشباب ...
بي حمرة الريد إكتسى ...

D D D D D


الممشى العريض
عبد العزيز العميري

مكتوبة في الممشى العريض ...
شيلة خطوتك للبنية .. مرسومة بالخط العنيد
في ذمة الحاضر وصية ... شاهدة التواريخ والسير والإنتظار
أدوني من قبلك مناديل الوصول .. وفردت أجنحة العشم
في ساحة الوطن البتول ..
وضحكت ما هماني شئ .. وبكيت ولا هماني شئ
عندك وقفت من المشي .. وغرقت في ضوء النهار
D D D D D
كانوا بتمنوك لو ترتاحي لحظة على الدرب ..
حبوك حب قدر الحروف الحائمة في بطن الكتب ..
قدر الخيال ما مد يدو على السحب .. كل خاطر قال بريدك
إلا ريدك كان رسول الدهشة في كل الديار .. وأنا زي عوائد الشعر فارس شد خيل الكلمة ليك .. مصلوب على ظهر البداية القالوا آخره بين يديك قلت يا مهون تهون شان أجيك كنت بريدك وبتشتيهك
أنكسر فيني الترجي ونلت من سفري الخسار .. بس دائر أقولك يا أصلية لو تعب فيني التمني وإنهتك وتر المغني ..
لو تسدي علينا طاقات البشائر وأنهزم يوم التجني

D D D D D
صرخة
مدني يوسف النخلي

مردودة من صرخة وصدى ..
مولودة في الزمن العقيم ..
رغم المسافة .. الدهشة ...
والشوق والندم ...
أدمنت تحديق السراب ..
هدمت في ليل الحزن ..
أوغلت في الزمن الغياب ..
أدمنت فيك عشق الحروف ...
رغم إنهزامي مع الظروف ..
D D D D D
لا المدرات المسافر فيها لعيونك مداي ..
لا هواك كان مبتداي .. لا مداك كان منتهاي ..
كنت فارد للحلم في ليل رحيل مليون جناح
كنت فاتح صدري ديمة ..
وما بخاف في الزمن الخرافي ..
ودمي كان باقي المداد ...
نبضي في حزن القوافي ..
وصبري في الليل الودار ..
وديمة أنسج في الغناوي ..
والتواشيح القديمة ..
أعشق الأمل البعاين ..
في المسافات الأليمة ..
تسخر أقداري العنيدة ...
وتبكي أحزانها القصيدة ...
لا زفافك كان مطاف .. للأماني وللعفاف ..
وخاصمت عيني الغمامة ..
وداس فرح عمري الجفاف ...

D D D D D


الأمل المفقود
مدني يوسف النخلي

أملنا الباقي يسرح بي ...
وأهاجر لي زمن تاني ..
وتبقى الدنيا في عيني ..
هداة موجة ..
في بحر الأسى المدود ..
هجعة خطوة ..
في سكة فرح مفقود ..
رجعة غنوة ..
من درب الضنى المهدود ..
D D D D D
وأفتش ليك حناني معاي ..
أماني تصارع المكتوب ..
عشانك لا مسافة تطول ..
ولا تصعب معاك دروب ..
وقلبي عليك ...
وعلى الوعد الحزين مصلوب ..
وراجع ليك ..
أجيك فارساً يشق صمت المتاهة الطال ..
مواعدك بي حكاوي الشوق ..
وبي شمساً وراها منال ..
وبي فرحاً يغرد في سماك ألحان ..
ويجيب الفرحة للأطفال ...

D D D D D



نشوة ريد
قاسم أبو زيد

نشوة ريد ..
إحساس إكليل ..
وردة وصلك .. جنة أصلك
نجم الليل .. الوصل جميل
D D D D D
نحن مشينا الخطوة الأولى ..
أنت معاي مشوارنا بيقصر ..
بكرة بنحكي الشوق للذكرى ...
نار الريد الغابت تظهر ...
D D D D D
الأطفال يا بنية بغنوا ..
الأفراح لا بد من ترجع ..
الأحلام الدونك فاتت ..
لو واصلنا صباحها بيطلع ..

D D D D D

الشوق والهواجس
أبو ذر الغفاري

في عيونك ضجة الشوق والهواجس ..
ريحة الموج البنحلم فوقو بي جية النوارس ..
ياما شان زفة خريفك ..
كل عاشق أدى فرضو ..
ما في شمساً طالعة طلت ..
إلا تضحك ليها برضو ..
والغمام الفيك راحل ..
في الصنوبر يلقى أرضو ..
والصباح إمتد ياما ..
كل ما جاوبتي نبضو ..
D D D D D
نشتهيك ...
ياما نحلم نحكي ليك ..
عن المسافة ونشتهيك ..
عن سفن بالشوق بترسم ..
في بحيراتك ضفاف ونشتهيك ..
عن ملامح غنوة طلت ..
في عيويناتك هتافها وبنشتهيك ...
عن حقيقة نهاتي بيها ..
وفي أساطير الخرافة ..
D D D D D
يا صباحات المواني ..
حتى لو دربك ترنح ...
في مشاوير الأغاني ..
والجرح إرتد بينا ..
لي زمان الآهة تاني ..
D D D D D
يانا لا بنتحاشي صدك ..
لا بتموت فينا الأغاني ..
يا غنانا المشتهنو ..
ياني موعود بي زمانك ..
بي إرتعاش صرخة وجودك ..
يوم يطل ميلادي منو ..
لما إتوسد صباحك ..
ياتوا ليل يفصلني عنو ..

D D D D D


مريم الأخرى والمجدلية
محمد ابراهيم شمو

هاهي الأرض تغطت بالتعب ..
والبحار اتخذت شكل الفراغ ..
وأنا مقياس رسماً ..
للتواصل والرحيل ..
وأنا الآن الترقب و انتظار المستحيل ..
أنجبتني مريم الأخرى ..
قطاراً وحقيبة ..
أرضعتني مريم الأخرى ..
قوافي .. ثم أهدتني المنافي ..
هكذا قد خبروني ..
ثم قالوا لي ترجل ..
D D D D D
وأنا لست أدري ..
ما الذي يدفعني دفعاً إليك ؟
ما الذي يجعلني أبدو حزيناً ..
حين أرتاد التسكع في مرايا وجنتيك ..؟
لا عليك ..
فعلى هذه السفوح المطمئنة ..
نحن قاتلنا سنيناً وإقتتلنا ..
نحن سجلنا التآلف في إنفعالات الأجنة ..
وإحتوانا البحر والمد اليقاوم والشراع ..
يا هذه البنت التي تمتد في ديناي ..
سهلاً وربوعاً وبقاع ..
ما الذي قد صب في عينيك شيئاً ..
من تراجيديا الصراع ..
D D D D D
والمدى يمتد وجداً عابراً هذى المدينة ..
خبريني هل أنا أبدو حزيناً .. ؟
هل أنا القاتل والمقتول حيناً والرهينة ..؟
هل أنا البحر الذي لا يأمن الآن السفينة ..؟
خبئني بين جدران المسام ..
قبليني مرة في كل عام ..
وأنا أشتاق أن أولد ..
في عينيك طفلاً من جديد ..
أرتدي اللون البنفسج ..
أعتلي شكل الهوية ..
ضيعتي مريم الأخرى سنيناً ..
في إنتظار المجدلية ..
آه لو تأتين ..
من عميق الموج من صلب المياه ..
كالرحيل كالترقب وإنتظار المستحيل ..
هاهي الأرض تغطت بالتعب ..
والبحار إتخذت شكل الفراغ ...

D D D D D


سحابات الهموم
عمر الطيب الدوش

سحابات الهموم يا ليل ...
بكن بين السكات والقول ...
وباقات النجوم ...
الجن يعزن في المطر ...
فاتن عزاك رجعن ...
وشوق رؤياك زمان مشدود ...
وصوت ذكراك ...
مكان يجرى يلاقي السيل ...
وسر مدفون بصدر النيل ...
ولولا الذكرى ما في أسف ...
ولا كان التجني وقف ...
وصوت ذكراك رزاز صفق ...
على خطوات بنات سجعن ...
وشوق رؤياك حنين لي رحلة في المجهول ...
لولا الذكرى ما في وصول ...
ولولا الذكرى ما في شجن ...
D D D D D
طوريتـــــك
مصطفي+ محمدالمهدي+ صلاح حاج سعيد

حتى الفصول صابه الجفاف ...
لا غيمة لا زفة هرع ...
والسنمبر البفرح صغيرة ...
غشانا وإتقاطر رجع ...
وشجرنا من لفح السموم ...
عطشان وقع ...
لاشابا لريحة دعاش لا هش لى برقاً لمع ...
D D D D D
طوريتك في الطين مرمية ...
وكوريتك يابسة ومجدوعة ...
لاغيبتك كانت مرضية ...
ولا فوتك كانت مبلوعة ...
D D D D D
اللهب الضوى الليل قناديل ...
في عيون النجمة القطبية ...
والتعب المد ضراع النيل ...
سجادة فقراء مزاورية ...
سائلين عنك ويوماتي رحيل ...
لمواني المدن النفحاية ...
وشقيش ما تقبل يا أبو الحيل ...
في قلوبنا مواجعك متكية ...
تايهين في بحرو مراكبية ...
أطفال عمال ومزارعية ...
D D D D D
كيف حال يا أبوي ...
كيف حال يا خال ...
بتمسي بيوتنا الكاكية ...
حزنانة بتبكي مال الحال ...
والزمن الساقكم عيدية ...
طوريتك في الطين مرمية ...
وكوريتك يابسة ومجدوعة ...

D D D D D





حاجة فيك
هاشم صديق

حاجة فيك ...
تقطع نفس خيل القصائد ...
تشده أجراس المعابد ...
توهتني ... عذبتني ... جننتني ...
جننت حرف الكلام ...
وبرضو أدتني السلام ...
D D D D D
حاجة في شرف المدائن ...
في غرف كل السفائن ...
جوه في عمق المناجم والعيون ...
حاجة زي ما تكون محلق في العواصف ...
فجأة تهبط للسكون ...
حاجة زي نقر الأصابع لما ترتاح للموسيقى ...
حاجة زي أخبار تناغم في جريدة ...
حاجة زي وتر المواني لما يصدح لي سفينة ...
D D D D D
لابتبدي ... لا بتنتهي
خلتني أرجع للقلم وأتحدى بالحرف الألم ...
وأضحك مع الزمن العريض ...
وأنسف متاريس الطريق ...
وأعرف متين أبقى المطر ...
وافهم متين أصبح حريق ...
حاجة فيك ...

D D D D D


الشجن الأليم
صلاح حاج سعيد

يبقى بعدك في الأسى ...
وتبقى أنت الظالم القاسي النسى ...
وغصب عني أزيح ظنوني ...
وأقول عليك أنت المسامح ...
وفوق شجوني أعيش زمان بالفرقة جارح ...
عارفني منك ...
D D D D D
لا الزمن بقدر يحول قلبي عنك ...
لا المسافة ولا الخيال يشغلني منك ...
تحرمني منك ...
لا الزمن بقدر يحول قلبي عنك ...
لا المسافة ولا الخيال يشغلني منك ...
تحرمني منك ...
D D D D D
المواعيد لا بتجيب منك تودي ...
لا رسالة تجبني منك ...
لا خبر طمني عنك ...
وأنت سايق فيني ظنك ...
رغم إنك أنت عارف إنو منك ...
لا الزمن بقدر يحول قلبي عنك ...
D D D D D
يا هوى الشجن الأليم ...
خليتني في الألم النعيم ...
وأبقي في كل المدائن ...
سكتي وسفري الجحيم ...
وأنت سايق فيني ظنك ...
رغم إنك إنت عارف إنو منك ...
لا الزمن بقدر يحول قلبي عنك ...
لا المسافة ولا الخيال يبعدني عنك ...

D D D D D


غـــذار دموعــك
مصطفى سيد أحمد

لا تنبش الماضي البعيد ...
ألم تكن يوماً لقلبي واقعاً مجهولا ...
لا تنكا الجرح القديم ...
فأنني ودعت ليلا مظلماً وثقيلا ...
وحملت روحي في فؤاد نازف ...
ما زال يحمل نصفه مشلولا ...
وخلعت أثواب الحداد ...
أما كفي إذ صار قلبك في الهوى ظليلا ...
D D D D D
غزار دموعك ما بتفيد ...
في زوال حواسه إتحجرت ...
جرب معك كل السبل ...
وإيديه ليك ما قصرت ...
حطمت في قلبو الأمل ...
كل الأماني الخضرت ...
كلماته ليك ضاعت عبس ... لا قدمت لا أخرت
D D D D D
ما كنا وكت الليل يضيع ...
تشرق نجومه وتنكتم ...
ويضئ شعاع يكشف قناع ...
والظلمة ترحل وتنهزم ...
وجفونه من طول السهر ...
تلبس وشاح فرقه وألم ...
نستبشر اليوم الجديد ...
ونقول تعود إنت العشم ...
كيف العشم وكتين يموت ...
والغصه تطعن في الحلق ...
كيف الحنين وكتين يهز ...
لي زول بعيد ما بتلحق ...
كيف الرجوع لزول قنع ...
شايل رفات قلبو الحرق ...
سيب الندم وانسى الدموع ...
ما فات زمان ما بستحق ...
D D D D D
غذار دموعك ما بتفيد ...
في ظلمة ما بتعرف شعاع ...
أشباحها زي موج العدم ...
كسر المقاديف والقلاع ...
ونزلنا في طوف الفشل ..
وأبحرنا في بحر الضياع ...
ونسينا دنياك الزمان ...
عشناها في زيف القناع ...

D D D D D














يــــا ضُلنـــا
يحي فضل الله

يا ضُلنا المرسوم على رمل المسافة ...
وشاكي من طول الطريق ...
قول للبنية الخايفة من نار الحروف ...
تحرق بيوتات الفريق ... قول ليها ما تتخوفي
دي النسمة بتجيب الأمل ... والأمل بصبح رفيق
والأصلو في الجوف أندفن ... لا بتنسي لا بنمحي
لا بنتهي منو الحريق ...
يا ضلنا ...
D D D D D
والفينا من أهات أليمة ... في حكاوينا القديمة
لا بيرحل من عيونا ... لا بتنعشاه الهزيمة
والقبيل راجينو نحن ... يوم تبشر بيهو غيمة
لما تمطر يوم علينا ... والفرح يملا المدينة
والبيوتات الحزينة ...
يا ضلنا ...

D D D D D

تعالي نشوف
يحي فضل الله

حبالنا الجوة ما تخنت ...
حبال السما المدود ...
حبال الصوت وكت يرجع ...
يجيب الخاطر المردود ...
تعالى نشوف ...
غنيواتنا البقت الدنيا ما بتشوف ...
تعالى نشوف ...
حروف البكا الجواها ما في حروف ...
تعالى نشوف ... تعالى نطوف ...
على المدن البقت أشباح ...
علي الجوع القعيد مرتاح ...
على الكلمة البقت في الجوف ...
تفتش سكة الأفراح ...
D D D D D
منو البقدر ...
يخاصم طفلة صبحت هازلة ...
فوق مد الأسى الحراق ...
يا غنوتنا ما تفوتي ...
يا كلمتنا ما تموتي ...
ونتمشي فوق ضمير الكلمة ...
عن وترا رحل فراق ...
وعن بلدا رحل فراق ...
وعن ولدا رحل فراق ...

D D D D D


الزمن الفلاني
نجاة عثمان

لمن يجي الزمن الفلاني ...
سمانا بتقطر مطر ...
درى وتمازج برتاكني ...
نسطر إسمك يا حبيبنا ...
في رموش غيم أرجواني ...
ندمن الضحك المعافي ...
نحيا في الفرح المورد ...
ياسميني واقحواني ...
يا حبينا ...
D D D D D
جوه عينيك عايشة ناس ...
بتسجل الأيام أغاني ...
والطريق ما يبقى ساهل ...
ليك بالمعنى المكاني ...
لما يتحقق زماني ...
بمسح الحزن العشعش في عيونك أسمراني ...
يا حبيبنا ...
D D D D D
بتحيا في حلم الترابلة وفي العلاقات المعاني ...
وفي البقاسي شقى المسافة ...
وعياشة في داخله وبعاني ...
لما يتحقق زماني ...
والصباح الأبيضاني ...
وعن علماً رحل فراق ...
غنانا الفينا ما يشفع ...
حديثنا الجوه ما بنفع ...
تعالي نشوف ... تعالي نطوف ...
تعالي نعلم الشفع ...

D D D D D


السمحة قالوا مرحلة
المقبول سيد احمد المقبول

بعدك الفريق أصبح خلا ...
والسمحة قالوا مرحلة ...
جاني الخبر جاني البلا ...
والسمحة قالوا مرحلة ...
قول يا لسان في الراحلة ...
صوغ المعاني وجملا ...
نافر وما عارف العلي ...
حال العلي حال الخلا ...
D D D D D
يا عيني جافيني المنام ...
وخدودي دمعك بللا ...
وين بعدك ألقي عطوف ...
يلم أفكاري بعد البهدلا ...
روح يا نسيم روح قابلا ...
تلقاها نايمة وغافلة ...
داعب بخصلات شعرها ...
وألثم ضفايرا مسدله ...
وأرفع كتيفها الهادلا ...
وكال خدودها وقبلا ...
وقول ليها من بعدك ...
خلاص شفت الرفيق أصبح خلا ...
D D D D D
يا ربي لحظات الوداع ...
أمثالي كيف يتحملا ...
الليلة بوصيك بالحبيب ...
عندك أمانة تحملا ...
وتديم على الخير والهناء ...
وكل يوم تضاعفلوا الحلا ...
قلبي الحنين من قام صغير ...
طول عمره لا جفا لا سلا ...
والسمحة قالوا مرحلة ...

D D D D D


كيــــف أنســـاك
محمــد مريخــه

كيف أنساك .. وأنت الجرح النازف منو خريف العته
خريف المحل المابتدارك .. ونجم الطالع شيَل خته
رحل الديره وهج وديره .. وفرع الحنه النور حته
جرحك نيره وسيره طويلة .. وشافي البلسم أبا يتخته
D D D D D
ستر العاشق كتر الليمه .. ولم الشمل الرَوح شته
ستر الروح الكلمة الزينه .. ونفساً طيب مالي الجته
غلب الراوى تملا حكاوى .. وغلباً زيك ما أتعودت
أهه حزينه وآنه دفينه .. تخفف عنى لماماً حتَى
D D D D D
كيف أنساك وليل الشارع .. رمى ستايروا وقفل الحته
وبرق الدالي أنشر بدالي .. حوَش ليك أيامي الستة
يوم الليلة يمر بي صبروا .. أحلام باكر كيف تتأتى
يا مغلوبة وغالبه زمانك ..
كيف أنساك محال البتة !!

D D D D D



--------------------------------------------

marwa
22-12-2004, 12:15 PM
wallahy ma gsrta ya '7aled

خالد حمد موسى
22-12-2004, 08:26 PM
مشكوره اخت مرووه علي المروراديك العافيه...

ابو الزعيم
24-12-2004, 10:09 AM
مشكور يا ابو الخلد على هذه التحف ونحن في انتظار المزيد


مات الكان بدينا احساس بالالفة

فات .. الباكي جرحنا وناسي جراحو

ماشي ورانا مدينة... مدينة

فات الصاحي ...

ونحن نغط في النومة السابعة ولا حسينا

حتحت فينا غناه الطاعم داك

فات قنعان من خيراً فينا

عصام عبدالرحمن
25-12-2004, 12:00 AM
كيف أنساك .. وأنت الجرح النازف منو خريف العته
خريف المحل المابتدارك .. ونجم الطالع شيَل خته
رحل الديره وهج وديره .. وفرع الحنه النور حته
جرحك نيره وسيره طويلة .. وشافي البلسم أبا يتخته
مشكورياغاااالي ماقصرته والله اديك العافيه...

خالد حمد موسى
25-12-2004, 04:33 AM
مشكورياعصاااام علي المروراديك العافيه....

الزمن المريح
25-12-2004, 05:45 AM
الله يعطيك العافية خالد

و الله اباعات مصطفى من اجمل ابداع الانسان السودانى و نحن متيمون بها ربنا يرحمه و يغفر له و مصطفى نسخة صعبة التكرار

و ياريت الناس تخلى مصطفى للكل كما كان الكاشف من غير الوان

خالد حمد موسى
25-12-2004, 09:08 PM
مشكوريالزمن المريح علي الطله البهيه....

خالد حمد موسى
19-01-2005, 04:12 AM
لسه راجيك يازمان … بحبة الذكرى المعاي

عايشه في وجداني جوة … ولسة بتدغدغ حشاي

ويمكن الحبيتو مرة … ألقاه في كلمات غناي

أصلو بتصحي المشاعر … ويمكن الطول سهاي

خالد حمد موسى
13-06-2005, 01:40 AM
منو البقدر ...

يخاصم طفلة صبحت هازلة ...

فوق مد الأسى الحراق ...

يا غنوتنا ما تفوتي ...

يا كلمتنا ما تموتي ...

ونتمشي فوق ضمير الكلمة ...

عن وترا رحل فراق ...

وعن بلدا رحل فراق ...

وعن ولدا رحل فراق ...

ابومرام
13-06-2005, 02:54 AM
يبقى بعدك في الأسى ...
وتبقى أنت الظالم القاسي النسى ...
وغصب عني أزيح ظنوني ...
وأقول عليك أنت المسامح ...
وفوق شجوني أعيش زمان بالفرقة جارح ...
عارفني منك ...

*********************************
[ ياسلام عليك ابو حمد شنو الابداع دا كلو وين متخبي من زمان روعة بمعنى الروعة تسلم

خالد حمد موسى
13-06-2005, 10:51 PM
مشكور ياابومرام علي المرور

لك كل الود عزيزي...

زيكو منيب
15-06-2005, 07:57 AM
يديك العافية يا ابو حمد وما قصرت

صائغ الحروف
15-06-2005, 11:31 AM
اشكرك على هذه الاريحيه حقا انها رائعه
لموسيقارنا الراحل الذى ابدع وغنى
وفعلا انت فى قلوب محبيك يا مصطفى سيد احمد

نيازى كشك
15-06-2005, 01:05 PM
الاخ خالد حمد موسى
او عاشق الحروف الاصيلة
شكرا لهذة التحف الفنية
من الاشعار التى تغنى بها الراحل المقيم
الاستاز مصطفى سيد احمد

ولك من الود والاحترام ما يوفى شخصك الكريم حقة

مع تمنياتى باحلى الايام لك صديقى

114
16-06-2005, 12:36 AM
زينت المنتدى يا خالد
ولو كل قصيدة عملتها براها كان تكون افضل، عشان الزول نفسو ما يكمل، وعشان ترفع رصيدك (البوستي)
شكرا لك دوما

خالد حمد موسى
16-06-2005, 07:44 AM
مشكورين ياشباب علي المرور

زيكو

صائغ الحروف

نيازي

114

لكم كل الود احبائي...

خالد حمد موسى
01-07-2005, 06:19 AM
وأنا راكب يا مراكب .. لا الرياح توقف خطاي
لا الجبال تحجب رؤاي .. سر شموس الكون مناي
ليك مسافر من كتير الزاد ..
مسافر بي غناي ..
نوصل الشمس البعيدة ..
نبقى عيدها ..
نزرع الحب البيوقد للنهاية

عزت الهادي
02-09-2005, 02:01 AM
كاتب الرسالة الأصلية الزمن المريح
الله يعطيك العافية خالد

و الله اباعات مصطفى من اجمل ابداع الانسان السودانى و نحن متيمون بها ربنا يرحمه و يغفر له و مصطفى نسخة صعبة التكرار

و ياريت الناس تخلى مصطفى للكل كما كان الكاشف من غير الوان

خالد حمد موسى
19-11-2005, 12:37 AM
مشكور عزت علي المرور

لك كل الود ياغالي...

Mr Lonely
19-11-2005, 01:36 AM
الاخ خالد حمد موسى
او عاشق الحروف الاصيلة
شكرا لهذة التحف الفنية
من الاشعار التى تغنى بها الراحل المقيم
الاستاز مصطفى سيد احمد

ولك من الود والاحترام ما يوفى شخصك الكريم حقة

مع تمنياتى باحلى الايام لك صديقى

خالد حمد موسى
19-11-2005, 04:01 AM
مشكور عزيزي Mr Lonely علي المرور

لك كل الشكر ياغالي...

محمد احمد
19-11-2005, 11:26 AM
مريم الاخري
محمد عبدالله شمو
هاهي الارض تغطت بالتعب... والبحار اتخزت شكل الفراغ
وانا مقياس رسم للتواصل والرحيل
انجبتني مريم اخري قطاراً وحقيبة
ارضعتني مريم الاخري قوافي.... ثم اهدتني منافي
هكزا قد خبروني ثم قالوا لي ترجل
ثم انتي... انتي ياكل المحاور والدوائر... ياحكايات الصبا
تحفظين السر والمجد الزي مابين نهديك اختبأ
ليس يعنيك الزي قد ضاع من عمري هبأ
وانا لست ادري مالزي يدفعني دفعاً اليك؟
مالزي يجعلني ابدو حزيناً حين ارتاد التسكع في مرايا وجنتيك؟
لاعليك... لاعليك...فعلي هزي السفوح المطمئنة
نحن قاتلنا سنيناً... واقتتلنا
نحن سجلنا التآلف في انفعالات الاجنة
واحتواني البحر والمد اليقاوم والشراع
ياهزه البنت التي تمتد في دنياي سهلاً وربوعاً وبقاع
مالزي قد صب في عينيك شيئاً من تراجيديا الصراع ؟
والمدي يمتد وجداً عابراً هزي المدينة... خبريني هل انا ابدو حزينا
هل انا القاتل والمقتول حيناً والرهينة ؟
ام انا البحر الزي لا يأمن الان السفينة ؟
خبئيني بين جدران المسام... قبليني مرة في كل عام
فأنا اشتاق ان اولد في عينيك طفلاً من جديد
ارتدي اللون البنفسج... اعتلي شكل الهوية
ضيعتني مريم الاخري سنيناً في انتظار المجدلية
آه لو تأتين.................... آه لو تأتين
من عميق الموج من صلب المياه... كالرحيل كالترقب وانتظار المستحيل

**************
هاهي الارض تغطت بالتعب.... والبحار اتخزت شكل الفراغ

التحية اخ خالد لكل عشاق الرائع الاصيل مصطفي سيد احمد
هزا الفنان الزي اسراء الساحة الفنية بكثير من الروائع التي
تظل محفورة في دواخلنا
وتشكر اخ خالد لتوثيق عمل المقيم الراحل مصطفي سيد احمد
نسأل الله العلي القدير له الرحمة والمغفرة

ودالحوري
20-11-2005, 01:58 PM
ايديك العافيه ياخالد

خالد حمد موسى
20-11-2005, 10:38 PM
مشكورين ياشباب علي المرور

محمد احمد تشكر المشاركة

ودالحوري فقدناك ياغالي تاني طول علينا

لكم كل الشكر ايها الاحبة..

محمد احمد
21-11-2005, 09:47 AM
كم يعلم الله معزتنا الخاصة لك اخ خالد وتقديرنا الخاص ايضاً
لمجهوداتك القيمة للمنتدي والله كلمة شكر وحدها لن تفيك حقك
وتسلم بجد واديك الصحة

خالد حمد موسى
22-11-2005, 01:39 AM
مشكور محمد احمد علي كلماتك الجميله البتشبهك دوما

لك كل الشكر ياغالي ..

mohamed
10-12-2005, 04:56 AM
زينت المنتدى يا خالد
ولو كل قصيدة عملتها براها كان تكون افضل، عشان الزول نفسو ما يكمل، وعشان ترفع رصيدك (البوستي)
شكرا لك دوما

خالد حمد موسى
10-12-2005, 02:09 PM
مشكور mohamed علي المرور

لك خالص ودي وتقديري..