المساعد الشخصي الرقمي

مشاهدة النسخة كاملة : الماسورة اللفظ الجديد الذي ادخلته الصحافة الرياضية على المجتمع السوداني



الجندي المجهول
04-04-2010, 08:51 PM
باختلاف الزمان والمكان يعتبر استحداث الالفاظ والعباراة مجاراة لما يحدث من حولنا من متغيرات في المجتمع (......) وغالباً ما تظهر الاسماء والمسميات على حسب الزمان والمكان .. ودون سابق انذار ظهر إلينا في الاونة الاخيرة على السطح عبارة (ماسورة) كناية عن الفشل أو عدم الصلاحية (ولا اعرف لماذا بالتحديد تم اختيار كلمة (ماسورة) هل لأنها بتتحلج وما بتقدر تمسك موية ؟.....
على العموم استحدث أو قام باطلاق هذه العباراة هم أهل (السخافة الرياضية) وهم المنوط عليهم الارتفاع بفهم الرياضة وعمل التوعية وزرع الوطنية .. ولكن بكل اسف تخرج عبارات غريبة عجيبة فأصبحوا بلغتهم كلهم ( مواسير) ..
وحتى لم يسلم المجتمع من تلك تلك العبارة فمثلاً الشخص الذي يكون مرتبط وعلى وشك الزواج وفجأة يتم الاختلاف وعندما يتم سؤاله لماذا فركشت الخطوبة (يرد بقوله ) والله طلعت ماسورة .... والله تسأل شخص من مديريه العام وسبب مشاكله معه يقول لك والله دا اكبر ماسورة ... وحتى الجامعات لم تسلم من الاذى فحتى المحاضر (البروف) تلقى مجموعة من الطلاب الحانقين عليه يقولون لك دا دكتور ماسورة ساكت ... ( معقولة ببس) ... وحتى الانتخابات لم تسلم من تلك المواسير فأنصار المؤتمر يطلقون على الاحزاب عبارة تلك الماسورة وكذلك احزاب المعارضة والحركة يطلقون على المؤتمر الوطني بأنه (أكبر ماسورة) وطبعاً ناس الكورة هم الاصل في الشغلانة وناس الهلال (بقولوا وارغووو ماسورة) وناس المريخ بيقولوا (اسامة التعاون ماسورة) وهكذا عبارات ..

السؤال هنا لماذا أصبحت العبارات الركيكة تتواصل وتتعمق فينا وأصبحت جزء مهم من حواراتنا ما هي الحلول والاعلام يكتب تلك العبارات ... من ينقذنا من هذا العبث؟
تخريمة : الفينا مشهودة ................ إلى آخر الأغنية

تخريمة بطعم الفرح : الف مبرووك تاهل الهلال والمريخ والامل لدور ال16 وبركة الشعب كله نام مبسوط خاصة ناس الحديد والنار ..................

النويري
04-04-2010, 09:07 PM
جندينا الهمام صباحك ورد وياسمين

لكل جيل من الأجيال طريقة في الكلام والمنطق وهذا الجيل الذي نراهو اليوم هو جيل يحاول إختصار كل شيء بمعنى إستنباط مصطلحات تعبر عن أراءه دون التطويل والشرح في الحديث وعندما تتداول العبارات بصورة مكثفة في الشارع تجد الجميع إصيب بهذه الصدمة وصارت هي اللغة المسيطرة على الساحة وحتى تتحدث في كافة المنابر بلغة مفهومة للمتلقى عليك إتباع اللغة السائدة حتى لا تكون بتنقذ بره الحلبة يعني كلام الطير في الباقير وتكون لغتك غير مفهومة ولكن صدقني إن فترة صلاحية هذه اللغة ليست بالطويلة وسرعان ما تنجلي ويحل محلها مصطلح أخر فهناك شريحة من المجتمع تنتج في كل يوم عبارات تستطيع تغذية المجتمع فكل بيئة لها عباراتها على سبيل المثال عند الفنانين اليومين ديل عندهم مصطلح ( ماشة معاك باسطة ) وما شة معاك عسل وخليهم يقولوا ذي ما الناس بيقولوا حلاة الجمعة يومها وحلو شمبات مقيلا.

نشكرك جندينا الهمام وتقبل مروري

الجندي المجهول
04-04-2010, 09:19 PM
جندينا الهمام صباحك ورد وياسمين

لكل جيل من الأجيال طريقة في الكلام والمنطق وهذا الجيل الذي نراهو اليوم هو جيل يحاول إختصار كل شيء بمعنى إستنباط مصطلحات تعبر عن أراءه دون التطويل والشرح في الحديث وعندما تتداول العبارات بصورة مكثفة في الشارع تجد الجميع إصيب بهذه الصدمة وصارت هي اللغة المسيطرة على الساحة وحتى تتحدث في كافة المنابر بلغة مفهومة للمتلقى عليك إتباع اللغة السائدة حتى لا تكون بتنقذ بره الحلبة يعني كلام الطير في الباقير وتكون لغتك غير مفهومة ولكن صدقني إن فترة صلاحية هذه اللغة ليست بالطويلة وسرعان ما تنجلي ويحل محلها مصطلح أخر فهناك شريحة من المجتمع تنتج في كل يوم عبارات تستطيع تغذية المجتمع فكل بيئة لها عباراتها على سبيل المثال عند الفنانين اليومين ديل عندهم مصطلح ( ماشة معاك باسطة ) وما شة معاك عسل وخليهم يقولوا ذي ما الناس بيقولوا حلاة الجمعة يومها وحلو شمبات مقيلا.

نشكرك جندينا الهمام وتقبل مروري

النويري صباحك (باسطة)
اتفق معك فما ذكرت وفعلا لكل فئة أو مجال مصطلحاته التي يتناولها ببساطة ،، ولكنني انا اعيب على ان يتم تناولها في الاعلام (الجرايد) فهذه انحطاط وات تعلم اخي الكريم أن الجرايد دي في ناس ببتعلم منها وتأخذ منها جرعاتها الثقافية ..... ها المشكلة ....

قلت لي اتقبل مرورك ...... والله المراد والمنى اشوفك عديل ..
تخرمية : الف مبروك للسودان تأهل (الهلال المريخ اللامل) لدور ال16 وهاردلك الخرطوم .

الفخيييم
04-04-2010, 09:35 PM
جندينا الهمام لك التحية،،،
للأسف ان المجتمع تأثر
بعبارات الشارع وهي مصطلحات
اطلقتها فئة معينة من الغير متعلمين
وقدروا يسوقوها داخل ارقي الشرائح
ولهم التحية في ذلك.. تأثيرات الفئة
او الشريحة المستنيرة اضحت ضعيفة
او ممكن نقول ملت الناس العبارات
المنمقة والجميلة التي لا تغير شيئاً
ولا تضيف لهم الكثير في امور حياتهم
الأصبحت اكثر تعاسة لذا لجأوا لاستخدام
مصطلحات ماسورة وماشة معاك باسطة
والراندوق وغيرها لاقحام جانب الطرفة
في ما يتناولونه من مواضيع...


تخريمة: مبروووك لكل الفرق السودانية
التأهل ونتمني في فترة تسجيلات يونيو
تجنب (المواسير) حتي نستطيع احراز بطولة
يسعد بها هذا الشعب الصابر....

النويري
04-04-2010, 09:37 PM
النويري صباحك (باسطة)
اتفق معك فما ذكرت وفعلا لكل فئة أو مجال مصطلحاته التي يتناولها ببساطة ،، ولكنني انا اعيب على ان يتم تناولها في الاعلام (الجرايد) فهذه انحطاط وات تعلم اخي الكريم أن الجرايد دي في ناس ببتعلم منها وتأخذ منها جرعاتها الثقافية ..... ها المشكلة ....

قلت لي اتقبل مرورك ...... والله المراد والمنى اشوفك عديل ..
تخرمية : الف مبروك للسودان تأهل (الهلال المريخ اللامل) لدور ال16 وهاردلك الخرطوم .

مبروك للسودا ن ومبروك الإشراف حاولت أرسل لك في الخاص تهنئة لكن يبدو أن البريد حقك مليان فل حاول تفضيهوا عشان نراسلك ياخي وبنتلاقى في الرملة الدقاقة إذا مد الله في الآجال ( دي طبعاً جمع أجل )هههههههههه

مهيد ود السفاح
04-04-2010, 10:51 PM
الاعلام هو اهم الوسائل لنقل المعلومة بالسرعة الفائقه ولاكبر عدد ممكن من المتلقين لها , لذلك فأن اي كلمة او مصطلح يأخذ حقه في النشر عبر وسائل الاعلام بمختلف الوانها وانواعها فستجده متداول , لكن تبقى المصيبة في القبح الذي يلون المصطلح او اللفظ , فالاعلام الذي يتناول هذا القبح يمارس دوره السلبي دون محاسبة , وتأتي المصيبة الاعظم في مساهمة بعض المجتمع في تداول المصطلح رغم قبحه , اذن الخطا مشترك ما بين الاعلام صاحب الفكرة والنشر وفئة من المجتمع التي تتكفل بالتداول .
لكن اخي الجندي كل هذه المصطلحات والمسميات بجميلها وقبحها تأخذ وقتاً ثم تندثر بعد حين , بمعنى انها تأخذ حظها من التداول ثم تختفي , والدليل على ذلك اختفاء مصطلحات كثيره ( ده زول فار بمعنى زول دقوسه ) ( وده مفتح وده نمس ) وحتى وقت قريب كان للمال والفلوس العديد من المصطحات ( قنذب وشرتيت وضحاكات ونكتتوت ) بدات الان تختفي .
عن نفسي ارشح ان يظهر في في الساحة مصطلح مشتق من ( يا خلف الله عذبتنا )
ويعود ذلك لكثرة التداول بوسائل الاعلام هذه الايام , فقط لا تنسى ان الاعلام قصد من (يا خلف الله عذبتنا ) شئ محدد .
ولك ودي جندينا

سواااح
04-04-2010, 11:48 PM
تعرف يا جندي ..
الموضوع اكبر من كده بكتير
و ح تكون ليهو اثار في المدي القريب والبعيد
لكن الطلع كلمة ماسورة ده
الله يسامحو اتلوم مع مع وارغو
والاهم من كده انا شايف انو لما قال كلمة ماسورة
ما اتوقع انو كان في كامل وعيو

بنت الرفاعي
05-04-2010, 12:15 AM
في الأسبوع الماضي كانوا معانا ضيفتين, وكانوا بيشكروا في حاجة مامتذكراها المهم واحدة فيهم قالت لي التانية عفنة (طبعاً هنا مدح للشيء المُتَحَدَث عنه) أمي راسها شطب كيف بيشكروا وفي نفس الوقت بيدخلوا كلمة زي دي, حسيت بأمي محتارة على طول وضحت ليها إنو دي بقت كلمة مدح!!!!
مع العلم إنهم الإثنين خريجات جامعيات!!

وعلى ما أذكر كلمة ماسورة دي طلعت أول حتى بعدها أطلقوها على وارقو, وبعدين بقى عادي إستخدام المصطلحات أو كما يُقال كلام الشماسة في أغلب المجتمعات, واللي ما بيعرفها بيشوفوهو ما متطور مع العالم, بالله يا عالم !!!!
وكلام الشماسة ده مافي السودان وبس في دول عديدة عندهم, لكن الفرق في طريقة تناول الناس له,
وربما الناس علشان بتحب التغيير, فحبت حتى في الكلام تغيّر, وكل شيء بقى عادي وعادي زي ماهو عادي.

الجندي المجهول
05-04-2010, 12:55 AM
جندينا الهمام لك التحية،،،
للأسف ان المجتمع تأثر
بعبارات الشارع وهي مصطلحات
اطلقتها فئة معينة من الغير متعلمين
وقدروا يسوقوها داخل ارقي الشرائح
ولهم التحية في ذلك.. تأثيرات الفئة
او الشريحة المستنيرة اضحت ضعيفة
او ممكن نقول ملت الناس العبارات
المنمقة والجميلة التي لا تغير شيئاً
ولا تضيف لهم الكثير في امور حياتهم
الأصبحت اكثر تعاسة لذا لجأوا لاستخدام
مصطلحات ماسورة وماشة معاك باسطة
والراندوق وغيرها لاقحام جانب الطرفة
في ما يتناولونه من مواضيع...


تخريمة: مبروووك لكل الفرق السودانية
التأهل ونتمني في فترة تسجيلات يونيو
تجنب (المواسير) حتي نستطيع احراز بطولة
يسعد بها هذا الشعب الصابر....

الفخييييييييييم تحياتنا
ماذا نقول والاعلام يفعل ما يشاء متى ما شاء واينما شاء

تخرمية : امس الهلال مية مية والامل برضو ميةمية

الجندي المجهول
05-04-2010, 12:55 AM
مبروك للسودا ن ومبروك الإشراف حاولت أرسل لك في الخاص تهنئة لكن يبدو أن البريد حقك مليان فل حاول تفضيهوا عشان نراسلك ياخي وبنتلاقى في الرملة الدقاقة إذا مد الله في الآجال ( دي طبعاً جمع أجل )هههههههههه

من دربي دا ماشي احذف اي رسالة تقابلني عشان نستقبل (بريدك) يا حبيبنا

الجندي المجهول
05-04-2010, 12:57 AM
الاعلام هو اهم الوسائل لنقل المعلومة بالسرعة الفائقه ولاكبر عدد ممكن من المتلقين لها , لذلك فأن اي كلمة او مصطلح يأخذ حقه في النشر عبر وسائل الاعلام بمختلف الوانها وانواعها فستجده متداول , لكن تبقى المصيبة في القبح الذي يلون المصطلح او اللفظ , فالاعلام الذي يتناول هذا القبح يمارس دوره السلبي دون محاسبة , وتأتي المصيبة الاعظم في مساهمة بعض المجتمع في تداول المصطلح رغم قبحه , اذن الخطا مشترك ما بين الاعلام صاحب الفكرة والنشر وفئة من المجتمع التي تتكفل بالتداول .
لكن اخي الجندي كل هذه المصطلحات والمسميات بجميلها وقبحها تأخذ وقتاً ثم تندثر بعد حين , بمعنى انها تأخذ حظها من التداول ثم تختفي , والدليل على ذلك اختفاء مصطلحات كثيره ( ده زول فار بمعنى زول دقوسه ) ( وده مفتح وده نمس ) وحتى وقت قريب كان للمال والفلوس العديد من المصطحات ( قنذب وشرتيت وضحاكات ونكتتوت ) بدات الان تختفي .
عن نفسي ارشح ان يظهر في في الساحة مصطلح مشتق من ( يا خلف الله عذبتنا )
ويعود ذلك لكثرة التداول بوسائل الاعلام هذه الايام , فقط لا تنسى ان الاعلام قصد من (يا خلف الله عذبتنا ) شئ محدد .
ولك ودي جندينا

مهيد السفاح ياريت مت طول الغيبة يااخ
حقيقة كلامك صاح فيما ذكرت خاصة في موضوع المصطلحات ولكن يجب ان لا يتداولها الاعلام وكأنها شئ مثبت ،،، ولا شنو

تخرمية : امس هلال هلا يا ود عبد الله وعقبال دوري ال8 (المجموعات) ومزيد من الانتصارات

الجندي المجهول
05-04-2010, 01:01 AM
تعرف يا جندي ..
الموضوع اكبر من كده بكتير
و ح تكون ليهو اثار في المدي القريب والبعيد
لكن الطلع كلمة ماسورة ده
الله يسامحو اتلوم مع مع وارغو
والاهم من كده انا شايف انو لما قال كلمة ماسورة
ما اتوقع انو كان في كامل وعيو
حبيبنا سوااااااااااح
الكلمة دي انا اول مرة اسمعها قبل 2005م وتقريبا وتحديدا في امدرمان في الشهداء والله العظيم ولكن تم تداولها كثيرا ايام تسجيل وارقوووو لاذلك اصبحت مستهلكة ولكن هي ليها اكتر من 5 سنين .....
تخرمية : الله يسهل

الجندي المجهول
05-04-2010, 01:04 AM
في الأسبوع الماضي كانوا معانا ضيفتين, وكانوا بيشكروا في حاجة مامتذكراها المهم واحدة فيهم قالت لي التانية عفنة (طبعاً هنا مدح للشيء المُتَحَدَث عنه) أمي راسها شطب كيف بيشكروا وفي نفس الوقت بيدخلوا كلمة زي دي, حسيت بأمي محتارة على طول وضحت ليها إنو دي بقت كلمة مدح!!!!
مع العلم إنهم الإثنين خريجات جامعيات!!

وعلى ما أذكر كلمة ماسورة دي طلعت أول حتى بعدها أطلقوها على وارقو, وبعدين بقى عادي إستخدام المصطلحات أو كما يُقال كلام الشماسة في أغلب المجتمعات, واللي ما بيعرفها بيشوفوهو ما متطور مع العالم, بالله يا عالم !!!!
وكلام الشماسة ده مافي السودان وبس في دول عديدة عندهم, لكن الفرق في طريقة تناول الناس له,
وربما الناس علشان بتحب التغيير, فحبت حتى في الكلام تغيّر, وكل شيء بقى عادي وعادي زي ماهو عادي.

اختي مرام تحياتي ،،
انت عارفة ان ام المشاكل في جامعاتنا نفسها التي اصبحت هشة وليست كالسابق ،،، وطبعا الحاجة (الله يطول في عمرها ) ويديه الصحة والعافية نشات في زمن (الادب والحياء) فيه كالماء والهواء لذلك لها الحق في أن تستغرب لهذه العبارات ويا حليل زمن امهاتنا الجميل ( الكلام بحساب وبي ادب وكل وقار)

تخريمة : زمنهم دا ما بتكرر الله يحفظهم ونتعلم منهم ولو جزء بسيط

عبدالرحمن مدثر
05-04-2010, 01:17 AM
طبعا الكلمة تحديدا بتعلم لى انبعاج وجدانى وترهل كبير

وذلك لارتباطى (بالمواسير ) فى سوقنا الكبير فى السجانة

بين مواسير القلفنايز (الحديد ) فى توصيلات المياه التى انتهت صلاحيتها

ثم مواسير ال pvc كتقنية جديدة تعتمد على اللصق

ثم اخيرا وليس آخرا مواسير ال ppr ودى الكمدة بالرمدة من خلال التسخين واللحام بماكينة كهربائية

كحل ناجعة لمشاكل المياه

اها تانى نجى لقصة الصرف الصحى الكلام الفوق دا لموية الشرب

وبين اليو بى فى سى والسى بى فى سى

والهاى دينستى والبولى اثيلين

وايييييييييييييك



خربشة

داير احكى ليك عن محاضرة فى الجامعة سمعتها من استاذه تبكى على حال طلابنا

الاستاذة كانت بتتحدث عن موضوع بعينه فى اللغة العربية وجاءت قصة تحكى عن الحب والانتظار

فى العصر القديم .. (عصر قفا نبكى من ذكرى حبيب ومنزل )

اها القصة بتحكى عن معاناة انتظار فتاة لحبيبها

واصرارها بنفس اصرار حوتة فى اغنيته

انتظرتو لما ماجاء رحت زرتو

وانداحت الاستاذة فى التفاصيل

لياتيها تعليق حارق من احد الطلاب من البينش الخلفى





يعنى يااستاااااذة البناااات ديل من زمااااااااااااان موااااسير ....!!!!

الجندي المجهول
05-04-2010, 01:40 AM
طبعا الكلمة تحديدا بتعلم لى انبعاج وجدانى وترهل كبير

وذلك لارتباطى (بالمواسير ) فى سوقنا الكبير فى السجانة

بين مواسير القلفنايز (الحديد ) فى توصيلات المياه التى انتهت صلاحيتها

ثم مواسير ال pvc كتقنية جديدة تعتمد على اللصق

ثم اخيرا وليس آخرا مواسير ال ppr ودى الكمدة بالرمدة من خلال التسخين واللحام بماكينة كهربائية

كحل ناجعة لمشاكل المياه

اها تانى نجى لقصة الصرف الصحى الكلام الفوق دا لموية الشرب

وبين اليو بى فى سى والسى بى فى سى

والهاى دينستى والبولى اثيلين

وايييييييييييييك



خربشة

داير احكى ليك عن محاضرة فى الجامعة سمعتها من استاذه تبكى على حال طلابنا

الاستاذة كانت بتتحدث عن موضوع بعينه فى اللغة العربية وجاءت قصة تحكى عن الحب والانتظار

فى العصر القديم .. (عصر قفا نبكى من ذكرى حبيب ومنزل )

اها القصة بتحكى عن معاناة انتظار فتاة لحبيبها

واصرارها بنفس اصرار حوتة فى اغنيته

انتظرتو لما ماجاء رحت زرتو

وانداحت الاستاذة فى التفاصيل

لياتيها تعليق حارق من احد الطلاب من البينش الخلفى





يعنى يااستاااااذة البناااات ديل من زمااااااااااااان موااااسير ....!!!!

الرائع وفارس الكلمة مرحب بيك

ياخ بالغت عديل ما خليت لينا ماسورة في السجانة وإلا جبتها معااااااااك ،،
لكن الاستاذة بالغت في الاندياااح في داعي هسع للكلام دا

ترخريمة : انحنا هنا شغالين مع استشاري هندسي مشرف على مقاول وكل مشاكل المقاول دا في المواصفات والمقاييس بتاعت المواسير ،، البولي ايثلين علاقتو شنو بي صابون كلين

عثمان جلالة
05-04-2010, 01:50 AM
خربشة

داير احكى ليك عن محاضرة فى الجامعة سمعتها من استاذه تبكى على حال طلابنا

الاستاذة كانت بتتحدث عن موضوع بعينه فى اللغة العربية وجاءت قصة تحكى عن الحب والانتظار

فى العصر القديم .. (عصر قفا نبكى من ذكرى حبيب ومنزل )

اها القصة بتحكى عن معاناة انتظار فتاة لحبيبها

واصرارها بنفس اصرار حوتة فى اغنيته

انتظرتو لما ماجاء رحت زرتو

وانداحت الاستاذة فى التفاصيل

لياتيها تعليق حارق من احد الطلاب من البينش الخلفى





يعنى يااستاااااذة البناااات ديل من زمااااااااااااان موااااسير ....!!!!

;););):confused::(:):cool:

مشتاقين يا أبوهاااااااا ... والله كتلتني بالضحك .. أضحكك الله في كل صباح


تحياتي يا جندينا الهمام .. وربنا يكفينا شر المواسير :D:D

بنت الرفاعي
05-04-2010, 02:21 AM
اختي مرام تحياتي ،،
انت عارفة ان ام المشاكل في جامعاتنا نفسها التي اصبحت هشة وليست كالسابق ،،، وطبعا الحاجة (الله يطول في عمرها ) ويديه الصحة والعافية نشات في زمن (الادب والحياء) فيه كالماء والهواء لذلك لها الحق في أن تستغرب لهذه العبارات ويا حليل زمن امهاتنا الجميل ( الكلام بحساب وبي ادب وكل وقار)

تخريمة : زمنهم دا ما بتكرر الله يحفظهم ونتعلم منهم ولو جزء بسيط


:rolleyes: لسة يا أخوي ما بقت حاجة أديها 15 , 20سنة كدة على الأقل علشان تبقى حاجة الله يطول في عمرها إن شاء, وفعلاً على زمنهم كان الأدب والوقار , وحتى عهد قريب كان ذلك, لكن دي الألفية الجديدة وتبعاتها.
تعرف الضيفتين ديل جايات من السودان قريب علشان كدة بيستخدموا في بعض المصطلحات دي من دون حتى ما ينتبهوا لها.

كاظم
05-04-2010, 03:17 AM
الجندي المجهول .. كيفنك يا حبيب وعساك طيب

مصطلح (ماسورة) من غرايب الأمور انو مربوط بنكتة غاية في الفحش والبذاءة .. ولا أدري تحديداً كيف تسربت حتى صار استخدامها عادياً للكبير والصغير والذكر و(الأنثى للأسف).
عارف يا جندي في بعض العبارات والمصطلحات الشائعة بين الناس في السودان وبرضو بيستخدمها جميع الفئات لو عرفو أصولها وجات كيف ما اظن في واحد تاني يقولها كده ببساطة في أي مجتمع .. ذي مثلاً كده (الماعارف يقول عدس) و (القالو حمد) وغيرها.

تخريمة برضو:

تمنياتنا للفرق السودانية بالتوفيق في المعارك المنتظرة؟

إهداء خاص:

سامحني غلطان (بعتذر).

كامل ودي حبيبنا الجندي وكن دوماً بخير.

الجندي المجهول
05-04-2010, 04:11 AM
;););):confused::(:):cool:

مشتاقين يا أبوهاااااااا ... والله كتلتني بالضحك .. أضحكك الله في كل صباح


تحياتي يا جندينا الهمام .. وربنا يكفينا شر المواسير :D:D

يا حبيبنا خليك ظاهر وطلتك زي ..... زي شنو اقول

ابو لوزة
05-04-2010, 06:27 AM
ابو حمزه
الزمن زمن السرعة وبقي ما وقت عشان توضح
لاحد ما اي شي عشان كده ظهرت المسميات الجديدة
لانها بتختصر كتير . انت عارف لما كنت في اجازة سمعت كلمة
ماسورة من بعض الشباب وغير ها كثير من العبارات الغربية
وكل ما اسمع منهم كلمة اسالهم من معناها يقولوا لي
دي اختصار لي كدة ولو اي كلمة انت بسال من معناها
احسن نقول الكلام القديم عشان ما تسال كل مرة ونقعد نشرح
وربنا يكون في العون

خالد أحمد الصول
06-04-2010, 11:18 PM
و كما لمجتمع الكورة مصطلحاته الغريبة ... هناك شريحة من سائقي سيارات الخدمة العامة لهم مصطلحات أستنبطوها من واقعهم المعاش يبسطون فيها فهمهم عن السيارات حتي يكون معقولا لهم ... فقديما كان اللوري داودي ... سفنجة ... فوردي كي ... أبيض ضميرك ... أنتقلت الي الحافلات ففيها ما يسمي (مرق) بكسر الميم و هي الحافلة ذات السعة الكبيرة 49 راكب و (طرادة) ذات السعة الاقل ... الي أن دخلت السوق سيارات الخدمة الصغيرة فسميت (أمجاد) علي أسم أول شركة مشغله لهذا النوع من السيارات و صارت أنواع فمنها (الجقر) و (أم جردل) وهي ذات الانار المدورة و (أم سفه) و هي الموديلات الجديدة التي تمتاز بنتؤ أمامي يشبه الرجل السافي ....

هيثم ابراهيم
06-04-2010, 11:34 PM
و كما لمجتمع الكورة مصطلحاته الغريبة ... هناك شريحة من سائقي سيارات الخدمة العامة لهم مصطلحات أستنبطوها من واقعهم المعاش يبسطون فيها فهمهم عن السيارات حتي يكون معقولا لهم ... فقديما كان اللوري داودي ... سفنجة ... فوردي كي ... أبيض ضميرك ... أنتقلت الي الحافلات ففيها ما يسمي (مرق) بكسر الميم و هي الحافلة ذات السعة الكبيرة 49 راكب و (طرادة) ذات السعة الاقل ... الي أن دخلت السوق سيارات الخدمة الصغيرة فسميت (أمجاد) علي أسم أول شركة مشغله لهذا النوع من السيارات و صارت أنواع فمنها (الجقر) و (أم جردل) وهي ذات الانار المدورة و (أم سفه) و هي الموديلات الجديدة التي تمتاز بنتؤ أمامي يشبه الرجل السافي ....

الله يديك الصحة والعافية اخوي خالد والله دائما ما أضحك كثيراً عندما أقرأء تعليقاتك الخفيفة الظل والتي تنقل بها وقعنا الحار والساخن في كل شئ

الجندي المجهول
07-04-2010, 01:04 AM
ابو حمزه
الزمن زمن السرعة وبقي ما وقت عشان توضح
لاحد ما اي شي عشان كده ظهرت المسميات الجديدة
لانها بتختصر كتير . انت عارف لما كنت في اجازة سمعت كلمة
ماسورة من بعض الشباب وغير ها كثير من العبارات الغربية
وكل ما اسمع منهم كلمة اسالهم من معناها يقولوا لي
دي اختصار لي كدة ولو اي كلمة انت بسال من معناها
احسن نقول الكلام القديم عشان ما تسال كل مرة ونقعد نشرح
وربنا يكون في العون
حبيبنا ابو لوزة __ بالحيل كلامك صاح
وكمان في مشكلة بالنسبة لينا انحنا المغتربين (بعدين وما ناقشين حاجة) والحمد لله

تخريمة :
حبيبنا اتخيل لي انت دخلت العشرة التانية (بس عاوز اعرف بي كم سنة) وربنا يطول في عمرك ويديك الصحة والعافية وتشوف اولاد اولاد لوزة ( يا عمنا كلنا)

الجندي المجهول
07-04-2010, 01:07 AM
و كما لمجتمع الكورة مصطلحاته الغريبة ... هناك شريحة من سائقي سيارات الخدمة العامة لهم مصطلحات أستنبطوها من واقعهم المعاش يبسطون فيها فهمهم عن السيارات حتي يكون معقولا لهم ... فقديما كان اللوري داودي ... سفنجة ... فوردي كي ... أبيض ضميرك ... أنتقلت الي الحافلات ففيها ما يسمي (مرق) بكسر الميم و هي الحافلة ذات السعة الكبيرة 49 راكب و (طرادة) ذات السعة الاقل ... الي أن دخلت السوق سيارات الخدمة الصغيرة فسميت (أمجاد) علي أسم أول شركة مشغله لهذا النوع من السيارات و صارت أنواع فمنها (الجقر) و (أم جردل) وهي ذات الانار المدورة و (أم سفه) و هي الموديلات الجديدة التي تمتاز بنتؤ أمامي يشبه الرجل السافي ....

الحبيب ( عاوز اطلق عليك لقب الخال ) لو تأذن لي ...
طبعا اهم ما يميز مداخلاتك الواقعية والمتابعة وبصراحة معلوماتك الحيايتة مليئة بالكثير المثير والمدهش ...
ابو سفة دي عجبتني (عندها علاقة بي ابو سفة بتاع الافلام الهندية )

لكن المسميات دي تدل على خبرتك وطول باعك ( اسال الله ان يعطيك الصحة والعافية والفي مرادك) قول امين (يا خال)