***** ووونسه حيشااااااااان وكـــــــلام نســـــــــــــوان ****

[Osama Alrasheed]

تشكرات للمرجع : الاستاذة / نادية حسن عمر
بنسمع كتير عند النسوان القدام والجيل الجديد برضو جمل تحيرك جات من وووين والجابه منو ؟؟؟ زي خلطة الحلو مر والدل.... وحاجات سودانية .. لكن لقيت النسوان عندهم ونسة غريبه وعجيبه وخاصة لما تونسك حبوبه :


فلانه جارتي برفع ليها تضوووق اكلي بترفع لي الماعون فاااااااااااااااضي غايتو جنس جبرنه عليها.
غايتو فلانة ديك شفعا الاربعة وعشرين ساعة في الشارع ووسخانين وعراية.
من صيغة الونسة فلانة جااات كيفك بت امي اسي في سيرتك قلنا تضوقينا جبنتك الرهيبة وكدي بتك حلاتااااااااااااا.

الحجر وقع فى الموية جمبلغ.
فنيت ليك الحجر جنس فنة
وفنيتو فننننننن
فلان ادى فلان كف طااااخ
وقع فى الواطة تراااااح.


فى كلمات كتيرة الواحد بسمعها وبرددها بكترة لكن ماعارف مصدرها:
نغمة الزغاريد: ايوى يوى يوووووووىيوووووووووووووووووووووووووووووووووووووووو وي.
وليه بتتكرر.

والجمل والكلمات الآتيه:

وووب على وووب على وكر كر علي واااا مغستي مات متين( فى البكيات.)

الكلام ده برى ماسمعتا بيه يطرشنى طرش اماتى الفى القبور: (عند اماتنا).

وبنقول برضو:لو اتكلمت معاها قامت فوقى وشبت لى فى حلقى:


رمضان قرب:
وجينا للشرموط ونحمر البصل وشقاوة الخدمة والغسيل والرجال لاقنها باردة صوم ونوم واكل جاهز

والبيت معولق و ما مضاير

واكان شفتا
هناية ديك مـــــــــــــــــــــــــــاجابوا سد مالا


سجم خشمك ..

سجم امك الراجياك ...

والتراب في خشمي...

كُر على ؟
سجم امو المتل قدومو.
اتشكلن ختنو قرض.
لحق امات طه.
وقع اندرش.
يخربنى. ماعندى. (عند الشحدة.)

[Osama Alrasheed]

دقيت الباب كو كو كو ومرات بندخل الكلمة دى قبال الكلام كوكوت ليك الباب كو كو كو......

وعند جر الشوال او اى حاجة تقيلة بنقول.
جريتو كرررررررررر..

وفى حالة تدفق الحاجات السائلة بنقول انكشح او اندفق منى شووووووو...
ولمن ينزلق زول ويقع بنقول... انزلق زييييييط

وقلبي قاااااااال شححح
وفى الكلام السودانى الكتير والكتير من الكلمات والجمل الغريبة ذات المعنى غير معروفة الجذور:
وفى ذلك يقال:

ان العاميه السودانيه لديها جزور عربيه ولكن حدث لها نوع من التغيير مثل عبارة (كر علي ) وهي تاتي من الكره
(وبري )عند النسوان)من البراءة .

حتى كلمة ( زول كلمه عربيه اصيله من الزوال اي التحرك وهي تعني الشخص ولكن السودانين الذين استخدموها من دون العرب عشان كده اشتهروا بيها ومن النادر تأنيث كلمة زول يعنى نقول ( زولة) الكلمة دى ما بنلقاها متداولة الاعند السودانين.

بنقول الكلام برضو بعد مرات معكوس
ومع انو غير منطقي نحنا برضو بنقولوا مثلا: ( يا بتاع الحمار ) او بتاع الدكان ) (وبتاع الغسال ) وهي في المعني الضمني للدلالة علي ان الرجل يملك حمارا او دكان او غسال ولكن في السياق تظهر..... وكأن الحمار يملك الرجل.

بنقول برضو كلمات بتجمع الكلمة وعكسها فى وقت واحد مثلا (قمت قعدت ليك) فمن المستحيل ان يرافق فعل القيام لفعل القعود في ان واحد وبرضو:

( بتكلم ساكت ) الواقع لا يمكن ان نصف الزول يتكلم وهو ساكت .

وحتى كلمة ليك بتخش فى نص الكلام بدون لازم او معنى....

[Osama Alrasheed]

لو زول اداك تشرب الموية وبزعل او عدم رضا يقول ليك( اها هاك اتجوغر) وبتقابلها بنفس الصورة فى الاكل كلمة( اندعس).

وبصف الموية الباردة بالساقطة.

وعند القول لك ان تترك هذا الشىء ( ادمسها)
او
اقعد اندمس هنا دا.......

تر لاجاى. قنب صنقر.

____________

عند الشباب تسمع:
خمشو ليك.....
وقبقبو ليك.

رصعو ليك جنس كف.

[Osama Alrasheed]

الجيل الجديد :

[Osama Alrasheed]

نحن الغدا ريجييم و التحلية إيسكريييم.....
متعلّمييين.. من ما قمنا بين الكراريييس ... الفطور فى لندن و العشا فى باريس ..
سمعتنا و مصاريف جامعتنا .. حبّونا وفى الحدائق ما شرّونا ...!!
.. لابسين الموضات و راكبين العربات , مقاعدنا سوستة وسواقنا اوسطى !!
البيابانا بنوصّف ليهو غلط.. و البريدنا بنقطّعو الزلط.........
قناااابل فى محطّة البلابل..

[Osama Alrasheed]

شِن جدَّ فى المخدّة ؟؟... التنجيد ولّلا الكيس الجديد ؟؟؟
يا راجل يا كشَا مشَا.. يا العزموك فطور جيت عشَا....

[Osama Alrasheed]

وشّك كِدا ؟ وللا خَرَبو الشِتا ؟؟

[Osama Alrasheed]

الجبهة سبّّورة .. و النخرة ماسورة..

[Osama Alrasheed]

ناس بحرى البيخلطوا فى الكوبرى ..كوبرى شمبات المكسّر بالجمبات ,بى تحت موية و بى فوق عربات !!!.. عصيرهم أناناس و ما بيضايقوا الناس!!

[Osama Alrasheed]

سبع نسوان عملوا حادث سيارة كل واحده اتصلت بزوجها وهذه هي ردود الأزواج السبعة :


اللباني: بعيد الشر عنيك ...حبيبة ألبي..أنا هلأ جايي عالتريء

الفلسطيني : سلامة كلبك ياروح كلبي .. أنا جاي ركظ عالطريك

الكويتي : شنو امطلعج الظهر ... طلعت روحج ... ماوراج الا المصايب تغطي زين عن الرياييل لين اوصل

الأردني: ... إيش حادث الله لا يردك ... دبري حالك

المصري: يا ولية ...حادس ده لو حصل للعربية حاجة هيكون آخر يوم في حياتك

السعودي: قلتيلي معك خمس نسوان؟؟.. طيب ثواني وبكون عندك

السوداني : لا حول الله انتي كويسة خلاس جايك اسي ، الجيران والفريق كلو مشا معاهو

[Osama Alrasheed]

وكتب الاديب : الطيب صالح في ونسه النسوان وتحديداً (الحبوبات)



جلسة قهوة .. تجمعوا لشراب القهوة كل واحدة جابية معاها شوية بن

ودوا قهوة رابطاهو في طرف توبا ست البيت مرقت عدة القهـوة من

القور قلاى وفندك من خشب ( القفل ) شـرقرق مجـلا يلمـع



صينية رق جبنة كشة نديانة تحتها وقاية مشغولة بالسكسك

فناجين وسكرية صينى سكسونيا هبابة سعف مدورة اطرافها

حرير .. ولعت النار وختت البن فى القلاى وكختت فوقة الجمر

النسوان قعدن متقابلات لشم القلوة قلت البن ومررتـو عليهـن

اخدو نفسهم واخدو الكيف مرقت بخور تيمان وختته في المبخر

واحدة من النسوان كوركت العفو والرضا دستور بى ادب

وطلعت فتيل ريحة من قفتها وشربت منو وبدت ست البيت تدق في البـن

بايقاع وواحدة ماسكة فنجان وملعقة صغيرة تضرب فالفنجان

مع ايقاع الفندك وتهدهد ( ست المعجنة ست زبيدة المعجنة ) والمرة تتمايل

حتى راقت مرقت كل واحدة من قفتها قطن منفوش ومترار

وكشفت وركها وبدت تغزل وبدت الونسة النساجين

المرة دي طولو مشو يجيبو السدا والله خايفين يجى الصقت ومانسوى لينا فراد

الا نتقتا بى شمالنا قالو السرة مرقت من الاربعين الشقريب قبض قبض

من كترة الدخان وقالو راجلها جاب ليها توب زراق وملجة

للمروق اتى ياختى زينب ماكلمتكن قالو عاملة بربور

المرة جاية باكر تدق لى بتها شلوفتها وتعمل ليها نقرابي بري ماكلمتنا قالو السرة راجلها جا من الترس

جاب الفريك تاكلى نى وجاب اللوبة حلو وعفن ياختي

قالو وقة اللحم بقت بى ابخمسة ونحن ولافرطاقة

ماعندنا ولاتعريفة مقدودة ماعندنا شرموط انت يابت امى الحلة مافيها ريحة عرس

اضبحوا لينا تور نشبع لحم نفك القرمة دى ماسمعت شي

لاكن قالو بت مرضية جابو ليها قولة خير لكن لسة

مامسكو ليهن يوم .. دخلت اصبعا في خشما وختتو فى الواطة اتى بصح الرسالة

جاها المرض الكعب برا بعيد غادى وماودوها عزموليها برىبرى دا مو مرض

عزيمة الرسول يالسرة كان ماجيتى اديتنى كدة راسى ده كلو ياكلني الرسول عزيز بجيك

العصر حسة ماشة اسوى الغدا وحصل صاجن بت الشيخ اعوس لى طرقات قبل مايبرد

امس جونا بنات بتى قلت ليها تعالى يابت امى اشمك

قالت لى شامانى مالى لابسة عقد الجلاد وراسى ملان كركار

شوفى البت ديل ماعيال الزمن دا امس ولدى خلا الغنم رضعن

خلانا نمنا بى صمة خشمنا الله يديا خيرن خلاص قايمين

ودعناكم لى سيد الوداعة من كل بلا وساعة

[ahmed algam]

http://center.jeddahbikers.com/download.php?img=352929 (http://center.jeddahbikers.com/)

[ابوالنور]

هي سجمي يا ود الرشيد انت بتجيب الكلام ده من وين
كشيح موية وكلام نسوان وغايتو جنس غايتو علي قول خالتو

[princess of lov]

التحية لكل ناس مايو 40 تسلم ياود الرشيد