المساعد الشخصي الرقمي

مشاهدة النسخة كاملة : الليلة تنقنقي يا السرة تنقنقي



حسن سادة
14-04-2010, 04:55 AM
Nagging fuss
رقدت السرة بت التوم في مركز هيلث كير الجديد في الصحافة،
ذلك المركز الفندقي الذي تم تجهيزه بأحدث المعدات المتطورة التي
توصل إليها مجال الطب والرعاية الصحية في عالم اليوم....
إثر آلام مبرحة في فم المعدة ظلت تلازمها طويلاً وقد أجريت لها كافة الفحوصات المجهرية
والمختبرية وتبين أنها تعاني من قرحة في المعدة وقد دخلت هذا المركز الطبي الراقي
لتتلقى العلاج رغم التكلفة الباهظة التي تكبدها زوجها الماحي.
دخلت صفية جارتها في مواعيد الزيارة لتتفقد أحوالها
بمعية جارتها الأخرى ثريا الفكي
وأول ما إقتربن منها حتى وضعت كل واحدة منهن
أغراضهن فوق الطاولة المجاورة
وأخذن يتفقدن أحوالها وهن يرددن:
" سلامتك يا السرة وكل المركز كرامتك،،
كفارة يا بت أمي،، إن شاء عدوينك
أها كيف حالتك الليلة؟؟؟
إن شاء الله شديدة وبي عافية
والدكاترة إن شاء الله طمنوكي عن حالتك؟
إن شاء الله تكون مستقرة وفي تحسن؟
فقالت لهن السرة:
" الحمد والشكر على الله
ها يا أخواتي ما تقعدن،،،
عليكي الله يا ثريا
قربي الكرسي ده وشيلن من الحلاوة اللي في العلبة دي
آآآي ووب علي إستغفرتك يا مالك روحي
والله الألم لي حسع تاعبني الله يدي القوة والعافية
السيستارة المجنونة دي أقول ليها مية مرة
الدواء البتديني ليهو ده بيطمم بطني ما بتسمع الكلام،،
كل مرة تقول لي كلمي الدكتورة سوزي"
فقالت لها صفية وهي تطلع على التقرير المثبت على حافة السرير:
" كلامها صاح مية المية،،
ما بتنلام المسكينة،،
هي المفروض ما تغير الدواء اللي كتبته الدكتورة،،
ثم أعقبت تسأل السرة قائلة:
" إنتي تعالي دكتورة سوزي دي سودانية"
فقالت السرة وهي تبتلع الدواء:
" سودانية مية المية وفي السودان كمان محسية
لكين تقولي شنو في أسماء آخر الزمن ده
وأزيدك من الشعر بيت يا صفية
في دكتورة تانية شايقية إسمها جوان وممرضة جعلية
حسع مرقت من هنا أنقري إسمها منو يا صفية؟
فقالت صفية ساخرة:
" أنا عارفة!!
حيكون إسمها منو يعني!!
مارجريت السماني؟
فقالت السرة:
أخير مارجريت على الأقل إسم موسيقي وليه رنين ،،،
تخيلي إسمها سابنا أتقول أمها هندية
ثم أعقبت تقول وهي تلقي بنظرة إلى الأغراض التي جلبنها وقالت لهن:
" ها يا نساوين مكلفات نفسكن مالكن؟
جايبات لي أكل وأنا مرضي من الأكل؟
فقالت صفية وهي تناولها البستلة:
" لا لا أكل شنو يا بت الحلال
دي فضلة خيرك شوربة خفيفة عاملاها بالخضار المشكل
تشربيهو بالهناء والعافية وتبقي ذي الحصان"
ثم دنت ثريا وهي تناولها وعائها البلاستيكي:
" أها أيه رأيك الحاجة اللي أنا جايباها جات في الجرح
حسع إنتي مش كنتي بتشتكي من السيستارة
وقلتي عايزة يغيروا ليكي الدواء
أها أنا جيهتك تب،، مش كدة؟
شوفي ،،عملت ليكي دواء عديل كدة"
فقاطعتها صفية ساخرة:
" ووب علي ألحقوني
ثريا دي أظنها بقت صيدلانية في آخر الزمن"
ثم واصلت ثريا في وصف دوائها وهي تقول:
" ها يا صفية يا بت أمي!!
يعني هي شغلانة الدواء ده كلو ما عبارة عن أعشاب مصنعة ،،،
يلللا أنا خلطت ليكي يا السرة حبيبتي تنوم مع حرجل مع ينسون وهيل،،،
أشربي منها نص كباية إنتي تمرقي من المركز ده بكرة القريبة دي"
فقالت السرة وهي تلفت يمنة ويسرى:
ووب علي دسوا البتاعة دي
حسع الدكتورة سوزي ولا السيستارة لو شافتني
تطردني من المستشفى ثم أقدمت الدكتورة سوزي -
التي تشتهر بين المرضى بصرامتها وكلماتها الإنجليزية التي تحتاج إلى مترجم
فهي قد درست الطب في جامعة هارفاد حيث هاجر والدها قبل ردح من الزمان –
وما أن دخلت عنبر المرضى حتى قالت متأففة:
“Oh my God Aim getting sick of these patients”
" يا إلهي لقد سئمت من هولاء المرضى"
فقالت السرة:
" أها شوفوا العجب العجاب
الخواجاية جات وعوجت لسانها يا كاف البلاء
عليكي الله يا صفية دسي البستلات دي"
ثم جاء ورائها الدكتور ياسر وكشف على السرة
وترك حرم المريضة التي كانت ترقد جوار السرة
ثم خرج فجأة فقالت صفية متهكمة:
" ووب علي شوفن الدكتور الكشف السرة وخلى حرم ،،
والله ظلم علينا ظلم يا ناس القوز علينا ظلم كشف الثلاثاء ده والله عدم"
فقالت السرة وقد ماتت من الضحك:
" الليلة تنقنقي يا صفية تنقنقي"
نواصل في نفس المركز الطبي لاحقا

مع الإعتذار لشاعر رائعة الكابلي (مروي)

بدر الدين محمد
14-04-2010, 05:07 AM
انا جاييك من بعيد .. والله لو ما حسن سادة البذكرنا الكلام المعتق المنمق لم استطاعت اصابعنا على مداعبة الحروف

والله ليك وحشة ...
قافل كل النوافذ

محب
14-04-2010, 05:49 AM
الاستاذ حسن السادة
لك فائق الاحترام وانت تبحر بنا بين السرة وجاراتها صفية و ثريا في حوار شيق منسق بالعبارات التي طالما تقرأها فرضا علنا رسم الابتسامة علي وجوهنا وانت تسرد لنا



دمت بود
(( في الانتظار البقية )) معااااااااااااااااك للنهاية بس ما تتاخر علينا

حسن سادة
14-04-2010, 08:28 PM
الأحبة الغالين صديقي الغائب عن العين الفنان بدر الدين
والأخ العزيز محب
شكراً لطوق الياسمين الذي وضعتموه في ساحتي
فإزدانت ألقاً وبهاء
وشكراً لعنفوان الود الذي أحطموني به

كلام برة الخط
بدر الدين راجع بريدك الخاص

حسن سادة
14-04-2010, 08:37 PM
ضجيج قد أخذ يعلو بين المرضى والفراشات في العنبر الذي
ترقد فيه السرة فأخذت بوادر الفضول
وحب الإستطلاع تدب في أوصال السرة
خاصة وأنها سمعتهن يرددن هتافات من هذا القبيل:
" فوق فوق سودانا فوق
فوق فوق أبو بكر كاكي فوق
آآآآي يا هو ده الشغل
والجوة وجداني بريدو سوداني"
فزغردت السرة زغرودة أغرودة دوت أرجاء
العنبر وإمتد صداها إلى أروقة وردهات المركز
وأخذت تسألهن:
" هوووي يا حريم قولن لي البشرى
الهلال سيد البلد غلب منو؟
وأبو بكر كاكي ده جاب الهدف من كورة ثابتة
ولا راوغ القواني ولا القصة شنو؟
فأخذت إحدى النسوة تطلق ضحكة عالية وهي تعلق ساخرة:
ها يا ولية ربنا يقومك بالسلامة من فراش المرض
إنتي زولة الله ساااي
ما ناقشة لا كورة ولا رياضة
أبو بكر ده يا بت أمي أحرز الميداليات الذهبية
في بطولة العالم في ألقاب القوى"
فقالت السرة وقد شهرت بالإحراج وقالت:
" صدقي يا بنت الحلال أنا إفتكرته من اللعيبة السجلوا
جداد في الهلال أتاري الرجل طلع مصارع
والله ملاكم ما عارفة حكمتك يا رب"
فقالت إمرأة أخرى وقد أطلقت العنان لهستيريا الضحك:
" لا وإنتي الصادقة الراجل عداء يعني جراي"
فقالت السرة متهكمة:
أجي يا إخوتي!!!
ووب علي !!
يا حليل الرجال الماتوا في كرري!!!
عليكم الله في راجل بيجري؟؟؟
يا إخواتي البنات الجري ده ما حقي
حقي المشنقة والمدفعة أب ثكلي
وحالف اليمين أعز بنات أهلي"
وفجأة دخلت الدكتورة سوزي
ولعلها سمعت الهرج والمرج الذي علا العنبر
فقالت صائحة:
What a hell is this noise and mess up
اللعنة!!! ما هذا الضجيج والفوضى الذي يدور هنا؟
فجرت كل واحدة إلى سريرها ترتجف من الخوف والذعر:
فأخذت تسأل الممرضات والفراشات مستفسرة:
There is a stinking smell over here
" أنا شامة لي ريحة كريهة في العنبر ده"
فأمرت الممرضات بتفتيش أمتعة وأغراض كل المرضى
وفي غضون دقائق قليلة وجدوا أن آمنة الدنقلاوية التي ترقد بجوار
السرة قد جلبت لها أختها إبان الزيارة فسيخاً
فوبختها الدكتورة سوزي وهي تقول
Incredible!!" I just can’t believe it”
شيء لا يصدق،، أكاد لا أصدق"
ثم أعقبت تقول وهي تخاطب المريضة التي دخلت المستشفى
لعلاج إرتفاع الضغط :
" يا خالة آمنة المريضات ديل كلهن لو طفحن الفسيخ
ما عندي مشكلة،،
لكين إنتي بالذات ضغطك مرتفع وأنا مانعك من الملح والحوادق
والأكلات المملحة تقومي تجيبي لي فسيخ يا خالة آمنة؟
لكين الغلط ما منك إنتي
الغلط من الممرضات وناس الأمن الواقفين برة في باب المركز
المفروض يفتشوا كل أغراض الزوار"
ثم خرجت وهي تزمجر غاضبة
وما إن خرجت الدكتورة سوزي حتى إلتفتت السرة
لجارتها في العنبر آمنة وقالت لها معاتبة:
" شكيتك على الله يا آمنة بنت أمي
شكيتك على الله شكية لا بتتعطل ولا بتتبطل
يخشي عليكي ما عارفك خاينة وظالمة كدة
أنا لمان جابوا في الزيارة مش وجبنة بلدي
ما نسيتك قسمتها معاكي النص بالنص
ولمان الروضة جابت لي معاها عسل نيالا
قلت أختي وحبيبتي
تقومي تدسي الفسيخ مني
وإنتي عارفاني بمون موت في الفسيخ
بالشطة والبصل
أحسن ينصر دينها بتي دكتورة سوزي
ست اللهيج المعوج ده وما قصرت تب
لمان صادرت منك الفسيخ
فقالت آمنة وهي ميتة من الضحك:
" والله وما طالبة مني حليفة
كنت ناوية أقسمي ليكي
لكين لقيتك بتتكلمي عن الرياضة
مع الممرضات والفراشات
قلت خليها تخلص النضم
وبعدين أقسم ليها
لكين ملحوقة يا بت أمي
عزيزة وغالية وماك هينة ولينة
بكرة ست النساء جايبة كيلو فسيخ
بقسم ليكي منو

نواصل لاحقاًَ

الجندي المجهول
14-04-2010, 08:44 PM
يا رائع واصل من غير فواصل ،،،،
في انتظار المثير المدهش يا مدهش

حسن سادة
14-04-2010, 08:44 PM
دخل الدكتور علي عنبر السرة النقناقة
وأخذ يتفحص المرضي ويتفقد أحوالهم
وحينما دنا من السرة وقف هنيهة
وإطلع على التقرير المثبت على طرف السرير وقال لها:
" لا لا الحمد الله الليلة إنتي عال العال
وحالتك ما شاء الله في تحسن مستمر"
ثم إلتفت فجأة إلى الممرضة نعمات وقال لها:
" جهزي الحقنة يا نعمات"
فصاحت السرة مذعورة ومتذمرة:
" لا لا عليك الله والرسول يا دكتور علي
أنا ما دايرة الحقنة دي كلو كلو
عندي حساسية ضدها وما بريدها خير شر"
ثم أردفت وهي تعتدل في رقدتها فوق السرير ثم قالت:
" وبعدين تعال هنا يا دكتور علي!!!
إيش معنى أنا اللي بيدوني حقنة يوماتي!!
يعنى شايفني أنا شقية الحال!!
وإيش معنى رقية الراقدة جنبي دي بتدلعوها عديل
يوم تدوها إيشي برشامة وكبسولة
وكان بهدلتوها شديد تدوها سفوف قلوي
يعني حتى المرض حق الله ده كمان فوقه خيار وفقوس ومقامات
والله يعني شايفني هينة ومقطوعة لينة
بري منكم يا تيم المركز"
فقاطعاتها رقية غاضبة وقالت لها:
" إنتي هيييي !!!
يا المهجومة يا المرجومة!!
حتى المرض عملتي فوقو نقة وشكية
بتغيري مني عشان ما قاعدين يدوني إبر
شكيتي على الله يا زولة يا فقرية
عملتي ليكي شنو أنا عشان تغيري مني
ده جزاي أنا يا ولية يا مفترية!!!
" من أكلي أديتك كتير،،،
وغرفت ليكي وإنتي بتغيري
والغيرة كم فرقت قلوب
وطريقها كان مخضر نضير"
فقالت السرة بعد أن تناولت الحقنة عنوة:
" يخس عليكي يا رقية
بتعيريني بي اللقمة اللي قاعدين
نتقاسمها سوى!!! بري منك يا إنتي!!
ما قايلك شيالة حس كدة
يعني خلاص هنت عليكي
ونسيتي عشرة كام يوم
ما إنتي ضيعتي الهناء
كل السعادة العندنا
وكتبتي لي عشرتنا الفنى
وبقت النهاية المحزنة"
فضحكت رقية وقالت لها:
ها يا أختي الواحدة مننا عيانة
وخلقها ضائق
حقو نستحمل بعضنا شوية
كلام زعل أنا ما بقصدو
وعشان ما تقولي رقية زعلانة وشايلة في نفسها
هاكي المهلبية دي جابتها لي روان بتي حسع"
ولكن السرة كانت لا تزال منفعلة
ثم قالت لها:
" الليلة بتقول نبتدي
لازم أنا ،، أنسى الحصل وأشيل منك أكل
يفرح عمرنا وينتشي
كنت فاكر حبي ليك لسع ندي
أنا علاقتي بيك بدري إنتهت
وذي اللي ما كان بيناتنا شيء"""
وفجأة دخلت الدكتورة سوزي وبمعيتها
مجموعة من السيستارات وأخذت تحوم بين
أسرة المرضى في زيارة تفقدية خاطفة قبل أن تنتهي
نبطشيتها ثم دنت من السرة وقالت تخاطب السستر
وهي تتفقد حالتها:
" أسمعي جبتي لي نتيجة اليورين كلشر؟
فقالت السستر:
" أيوة يا دكتورة"
فسألتها الدكتورة سوزي مجدداً:
Was is clean
هل كانت نتيجة فحص زراعة البول نظيفة
فقالت السستر:
"Oh Ya Doc
" أيوة يا دكتورة كانت تمام"
فضحكت رقية التي كانت ترقد بجوار السرة
وقالت للسرة هامسة:
" ووب علي يا السرة
أنا قريت في الثانوي كلشر يعني ثقافة
طلع للبول كمان كلشر؟
فقالت لها السرة وهي تنظر نحو طبق المهلبية وقالت:
" بطلي الفلسفة بتاعك دي وناوليني المهلبية الأبيتها قبل شوية"
فقالت لها رقية وهي تناوليها طبق المهلبية:
" من حسع وبقيتي تنسي
ومن حسع بقيتي تنسي
فستق المهلبية وقت تظهر
وحياتك ما بتتدسى"
فقالت السرة وهي تلتهم المهلبية بشراهة ونهم:
" من يوم عشقت مهلبيتك
جيوش هواك غزوني
تزيد علي في دلالك
وأزيد عليك في جنوني الليلة:

المعذرة للشاعرة الأمدرمانية
القامة السامية حكمت يس

ولشعراء الأغنيات الأخرى

نواصل لاحقاً

مدنيّة
14-04-2010, 10:22 PM
ياسلااااام علي الدرر المنثورة هنا دي

واصل يانجم واحنا مستمعين

حسن سادة
14-04-2010, 11:33 PM
العزيز الغالي الجندي المجهول
وصاحبة الصون والعفاف أستاذتنا الغالية مدنية
غمرني حضوركما الكثيف المعطر بعطر الصندل
حين إشتقت لى ضحكة صباحك .
والدعاش عطر رزاز مطر الخريف
أنا وإنتو والدنيا الزمان
الناس وفـاx وخلة صفـاx
ودفء المشاعر الشاتية صيف

حسن سادة
14-04-2010, 11:51 PM
صاحت السرة وهي تنادي ست النساء التي ترقد على بعد قصي منها
وهي تقول: "ست النساء هوووي
هييي يا إنتي ما تردي علي!!
طرشاء ولا حكايتك شنو؟
فقالت لها ست النساء وقد إنتبهت لندائها:
" مالك يا السرة بتدوري مني شنو؟
والله ما سمعتك كنت مشغولة
وأنا قاعدة أقرأ في الدواء
الكتبتو لي دكتورة سهام
دايرة شنو؟ شمار جديد
ولا نقة من نقاتك؟
فقالت السرة: " نقة التنقك إن شاء الله
قولي آمين"
" إنتي سمية جارتكم ما جاية تزورك الليلة؟
فقالت ست النساء وهي تضع وصفة الدواء
فوق الطاولة المجاورة لسريرها:
" ما عارافة والله
يمكن!! وإحتمال!! وغايتو!! وكووود بي
Who knows
ليه إن شاء الله خير
دايرة منها شنو الولية دي؟
فقالت السرة وهي تتمتم بصوت خفيض:
" عاينو المرة دي بالله!!
عوجت لسانها ذي دكتورة سوزي
ثم قالت لها:
" يا مرة إنتي مالك ومالي
بس إنتي كلميها بالموبايل
خليها تجي ضروري
أنا دايراها في موضوع
خصوصي وسري للغاية"
فقالت ست النساء متهكمة:
يعني كيفن خصوصي؟
وبعدين أنا ما عندي كرديت (رصيد)
عشان أكلمها هاكي رقمها إنتي ومسكليها"
فقالت السرة وهي تخرج موبايلها من درج الطاولة:
" حلوة مسكليها دي مفردة جديدة
مليني الرقم بالراحة وواحدة واحدة"
فصاحت كلثومة التي ترقد بجانبها وقالت:
والله غايتو يا ست النساء إنتي على نياتك
ومسكينة وغلبانة!!
معقولة إنتي ما عارفة
السرة دايرة سمية لي شنو؟
فقاطعتها ست النساء وقالت:
"لا يا بت أمي!!!
بري !!! يقطعني ويحتني!!!
ما عارفة وما ناقشة الحكاية
طيب ما تنقشيني إنتي
ونوريني يا شاطرة إنتي"
فقالت كلثومة :
" شاطرة دي ولا بجميلتك
لكين أكان أنا ما غلطانة وساهية ولاهية
سمية دي ما ست الكريمات الخطيرة
والتركيبات والخلطات العجيبة
أكيد السرة دي عندها طلبية خصوصية"
فقاطعتها السرة وقد ماتت من الضحك:
" بري منك يا كلثومة يا فقرية إنتي
والله أنا فعلاً كنتي عايزاها عشان كدة"
فصاحت فيهن الممرضة وهي تقول:
" يا نساوين إنتن جنيتن أتقولي بالعات راديو
ما تسكتن شوية اللي تسمعكن تقول
قاعدات في بيت عرس
حسع دكتور علي يجي يسيبكم إنتو
ويهرش فيني ويكرهني العيشة"
لم تأبه النسوة بزجر الممرضة وضربهن بها عرض الحائط
وفجأة لاحظت السرة أن بلقيس ونفيسة أخن يتهامسن في أمر ما
حينما وجدن أن النسوة قد إنشغلت بأمر الكريمات وست الخلطات
فقالت لهن:
" الحكاية شنو يا بلقيس ما تشركونا
وتعالوا بادلونا الوداد وقاسمونا السهاد
شغالات قطيعة ونميمة في خلق الله؟
الضحية منو يا كاف البلاء؟
فقالت بلقيس وهي مستغرقة في الضحك:
أعوذ بالله منك ومن فضولك الشمار حيقتلك
وعشان أريحك بس
نفيسة قالت لي دكتور علي طلق مرته الكبيرة
أها إرتحتي خلاص ولا لسع"
فقالت السرة :
" لا حول ولا قوة إلا بالله"
لكين برضو نقول أبغض الحلال
والشمار ده مصدره منو؟
أكيد ست النساء المهجومة
دي تقول بس وكالة أنباء"
فقالت ست النساء:
" حرام عليكي يا ولية
والله ما عندي خبر"
فجأة دخلت السستارة نهى
وزجرت رقية التي نزعت من يدها الدرب
وقالت لها: يا إنتي هههي
قلعتيه مالك؟ على كيفك إنتي؟
فقالت رقية:
أنا طلبت من الممرضة عشان تغير مكان الإبرة
من محل نقشة الحنة شوية لسع عاملاها قبل يومين بالشيء الفلاني
مبلغ وقدره أقوم أخربها بالدرب!!
وبعدين تعالي هنا أنا قاعدة آكل عادي
وما عندي عوجة مركبين لي الدرب ده لي شنو:
فقالت لها السسترة:
" عشان عندك هايدريشين يا مدام"
فقالت رقية:
وده يطلع شنو كمان؟
رنة موبايل جديدة"
فقالت لها السرة.
" لا يا خفيفة الظل والدم
يعني عندك جفاف وتصحر
فهمتي !! وقع ليكي ولا لسع؟

نواصل فيما بعد

محب
15-04-2010, 12:24 AM
حبيبنا حسن سادة
واصل من دون فواصل



همسة ؛ وقع ليك ولا لسع

حسن سادة
15-04-2010, 12:37 AM
حبيبنا حسن سادة
واصل من دون فواصل

همسة ؛ وقع ليك ولا لسع

عزيزي محب
شكراً للطلة
آآآآي وقع لي
والله إنت وبس
إنت في قلب المحب

محب
17-04-2010, 10:07 PM
حسن سادة وين البقية

والله الوقفة طالت

مدناوية
18-04-2010, 01:44 AM
حسن سادة ...


واصل ..

في إنتظار بقية الإبداع ...

حسن سادة
18-04-2010, 04:58 AM
أحبتي الغالين
العزيز محب
والأستاذة المرموقوة مدناوية
حضوركما حافز يدفعني للمزيد من الأبداع
وهو يهبني الضياء وبها أذق طعم الحياة
شكراً لتواجدكما الثر

حسن سادة
18-04-2010, 05:02 AM
الهرج والمرج والضوضاء قد علت أصداؤها بين النسوة المرضى في عنبر السرة النقناقة
ويبدو أنها كانت مواعيد الزيارة وفجأة دخلت العنبر سيدة في منتصف العمر
يبدو عليها آثار النعمة والرخاء جلية وقد حملت بيمناها حقيبة غاية في الأناقة
وتأبطت رزمة من الأوراق وما إن رأت هذه السيدة السرة وهي منهمكة
في هرجها بدت على محياها علامات الإستغراب
ثم قالت وهي تملكتها الدهشة:
" ووب علي ووبين!!
أجي يا أخواتي!!!
صحبتي السرة بت الفكي بي جاي؟؟؟
أريتو يوم السعد يا يابا
والله كنت زغردت حسع لو ما حادة سكينة خالتي الله يرحمها
فنهضت السرة مندهشة هي الأخرى وقالت:
" سجمي وكر علي كرين
روضة الطيب هنا!!!!
عليكن الله عاينن جنس الصدف دي كيفنها!!
الليلة كم تم المنى بهجة بي الروضة الهنا"
ثم أعقبت وهي تعانقها وترحب بها بحرارة ولهفة بالغتين:
" مركز واحد يلمنا وأخطف الجلكوس أنا
وبالسعادة أبشرها"
فقالت لها روضة مستفسرة عن حالتها الصحية:
" سلامتك يا ندى العنبر!!
مالك بي جاي يا حبيبتي نان ما في عوجة؟
فقالت السرة وهي تتناول منها الحقيبة
وتضعها إلى جانب السرير:
" ما عارفة مالي!!
آلام في المعدة طوالي
لكين حسع بعد ما خشيت هنا
بقيت شديدة ومعافية
الحمد والشكر لي الله "
وإنتي الجابك هنا شنو يا شقية الحال؟
فقالت روضة متهكمة وساخرة:
" جابنا ليكي الريد وجينا
الحصل جابتنا إلفة"
فقالت لها السرة:
" حلوة الصدفة البيك جمعتنا
وخلت عينا تلاقي صباحو"
ثم أردفت وهي تقول:
" لا بالجد عليكي الله مالك؟
عندك شنو؟
فقالت الروضة:
" صدقيني أنا ما عندي أي حاجة تب،،
بس جاية نظام نقاهة وإستجمام وريلاكسيشن
من تنشن البيت ودبرسة الأولاد وأبوهم"
فقالت السرة:
" ووب علي !!
عليكم الله شوفوا المرة المجنونة دي
أكان أخير ليكي برج الفاتح وفندق السلام
جاي في مركز صحي عشان إستجمام وما عارفة شنو؟
فقالت الروضة وهي تجلس فوق السرير:
" عليكن الله شوفن جنس الراحات دي
والترطيبة دي والأبهة دي كيفنها
عليكي الله حسع الرفاهية والبهرجة الهنا دي
بتلاقيهو في الهوتيلات
عايين النظافة دي كيفنها؟
والتكييف الما خمج والأمبيانس (الجو المحيط)
عليكي الله ده شكلو مركز صحي؟
عشان وشفنا المراكز في طرف المدائن
والكواريك والمولد والزيطة والعيطة"
فقالت لها السرة في محاولة منها لتغيير محور الموضوع:
" إنتي صحي الشمارات الوصلتني دي
قالوا شنو
الروضة نازلة في الإنتخابات مع ناس هناي وهناي
وقالوا ناس هنااي إنسحبوا إلا الروضة بت الماحي
صامدة والأصوات نازلة عليها ذي المطرة؟
فإسترسلت الروضة في ضحكة هستيرية عريضة ثم قالت:
" إستغفرتك يا مالك روحي
بري منكن وكر عليكن يا ناس الشمارات
إنتخابات وين مع الناس الفاتحين
وراجين الخمسين ويرموا الجوكر بايظ
أسكتي خليها على الله بس
فقالت إحدى المرضى:
يا جماعة الخير أنا ما شفت لي دكتور من صباح الرحمن
وينهم الناس ديل نازلين الإنتخابات هم كمان والله الحكاية شنو؟
فقالت لها إحداهن:
" الدكاترة قالوا مضربين يا أختي
إنتي ما قاعدة تقري جرايد؟
فقالت السائلة:
دكتورة سوزي كمان معاهم؟
فأجابتها الأخرى:
" طبعاً حتكون معاهم شايفاها مهندسة ما طبيبة برضها"
فقالت الأولى:
That is really incredible and hilarious
أي
(شيء لا يصدق ومضحك)
فقالت السرة:
ووب علي شوفوا الولية دي إتعادت من الدكتورة سوزي"
ثم إلتفتت السرة إلى الممرضة التي كانت وعدتها بأنها ستحضر لها الدواء
ثم ستعود مسرعة:
" تعالي يا زينات يا بتي
ما قلتي بتجينا يا حليل مجيكا

سنعود مجدداَ

محب
18-04-2010, 10:22 PM
حسن سادة
قلتي المرطبة دي منو
تسلم يا صاحب الانامل الرقيقة والخيال الخصب



دمت بود

حسن سادة
19-04-2010, 10:07 PM
المحب محب
تخجلني وتخجل تواضعي بطلاتك الأنيقة
التي تتحفني بها يا صديق البوست
شكراً لإشراقتك المنيرة
ولك الود والشوق

حسن سادة
19-04-2010, 10:08 PM
نظرت السرة نظرة ملؤها الشفقة إلى لولة المحسية
الذين يطلقون عليها إختصاراً " لولي المحسية"
وقد ربطت رأسها بمنديل وأخذت تئن وتشتكي من الصداع
كعادتها ودأبها صبيحة كل يوم فسألتها السرة
مستفسرة:
" سلامتك يا لولي برضو صداع كل صباح
إنتي ما جربتي البندول الطالع جديد ده " إكسترا"
فقالت لولي وهي لا تزال تتألم من ويلاء الصداع:
" بري يا السرة يا أختي
لا خليت بندول لا إسبرين لا كافينول
الجبنة وشربتها
الشاي السادة ما خليتها
وسألت الدكتورة مريم عملت لي الفحوصات كلها
وقالت لي ما عارفة سبب الصداع ده من شنو"
فقالت لها آمنة التي كانت ترقد في سرير قريب من لولي:
" لولي يا بت أمي!!
كان نفسي أقول لك من زمان بي الكاتمو في سري
ومكتم في حشاي مدسوس سنين"
فقاطعتها لولي قائلة:
شنو يا آمنة يا أختي عاد الصداع الواحد ده
كمان جاب ليها أسرار وحكايات؟
فأجابت آمنة بقولها:
" أنا عندي ليك سر من زمان داير أقواو ومنكسف
كل ما أقول قربت ليك ألقاني بادي من الألف"
فزجرتها السرة قائلة:
" شنو آمنة حكايتك حكاية
ما تكلميها وتخلصينا
إن شاء الله تبدي من الهاء
ولا لسان الحال غلب؟
فقالت آمنة وهي تدنو من لولي:
" إنتي صداعك ده ما صداع دكاترة
إنتي علاجك عند الفكي أبكر
وموبايلو مسجل عندى
بس جرة تلفون ويجيكي هواء
أصلو سامعة إنو عندو خدمات خارجية من الباب للباب"
فقالت السرة وقد كتمت غيظها وحنقها:
يطلع فكي ده ولا دي إتش إل؟
وبعدين تعالي هنا أول مرة أسمع إنو في فكي زائر!!!!
فقالت لولي وقد ماتت من الضحك:
" الله يجازي محنك يا آمنة
يعني شايفتني مدسترة ولا قاعدة أكلم نفسي
فكي شنو إنتي كمان؟
فقالت آمنة:
عليكن الله عايين المرة دي
مش إحتمال يكونوا حاسدنك ومدينك عين؟
فقالت لولي:
" أجي يا أخواتي حيسدوني على شنو بس
ثم سكتت برهة وهي تضع يديها على رأسها
ثم قالت مستطردة:
آآآآي والله كلامك صح يا أمونة أختي
الأسبوع الفات روان صحبتي أهدتني همر في عيد زواجي
يمكن يكونوا سحروني وحسدوني عشان الهمر 2010
" حتى على الهمر لا أخلو من الحسد"
ثم إستعدلت رقية في قعدتها وأخذت تغني:
" اللولي اللولي المحسية
بسحروك يا لولي المحسية
لولية أنا ما تعبانة
أنا بحب مشكيلا وأردوان"
فقالت السرة وقد تجاهلت غناء رقية:
" أنا غايتو جني وجن السيارة الإسمها همر دي
العاملة ذي عربات المدرعات والجياشة
ما عندها أي ملامح أنثوية
ما تنفع إلا للرجال"
فضحكت خديجة متهكمة
فقالت لها السرة ساخرة:
أجي !!!
بتضحكي مالك يا ست الكومر
ما تضحكينا معاكي!!!
فقالت خديجة:
وبعدين معاكي إنتي هييييي
أنا خديجة بنت الفكي على سن ورمح
ما دايرة واحدة فيكن تاني تناديني ست الكومر
مفهوم الكلام ده؟
فقالت لها السرة وقد أمعنت في سخريتها:
" يناودكي منو يا إنتي؟
ست اللهيج السكري
ومات الحسود بالسكري؟
فقالت خديجة:
وبعدين تعالن هنا
مالها كومري
هداك واقف تحت الشجرة
قيمة وسيمة
وهيبة وجبرة"
فقالت لولي المحسية:
"جبرة ولا أركويت"
فقالت السيدة:
" الكومر ده يا خديجة لي ناس الأقاليم والخلاء"
فقالت خديجة وهي تعقب على كلامها:
" يا سيدة لا
لولا الأقاليم والخلاء
الدولة عاد متبشتنة ومتبهدلة
لا فيها طب لا صيدلة
ولا فيها هيبة ومرجلة"
ثم قالت السيدة وهي تغازل كومر خديجة:
" صعيب وصفك لأنك كومر كلك ياي
جمالك في الحديد معدوم
شبيهك ما كحل عيني
أقدلي وسكتي الهمرات
وأنزلي في البكاسي كي"
ثم دخلت السستارة وقالت لهن:
" أنا سامعة فوضى وهرجلة
كوراك شديد وجلجلة

نواصل فيما بعد

مع الإعتذار لشعراء الأغاني

ورابطة الحلمنتيش بجامعة الخرطوم سابقاً

نزار حسن محمد
19-04-2010, 11:15 PM
حسن ساده ... سكر سياده
مسكا كرو...
وكيفنك يالعشا
وحبابك يالحبيب
يشهد الله مشتاقين
يالطال علينا فراقكم سنه وزياده

حسن سادة
20-04-2010, 03:07 AM
عزيزي الغالي نزار
وين يا حبيبنا
من ديك وعيك
(ليك مدة ما بنتَ يا حبيبي وين إنت)
بركة الجيت
وبي طلتك ساحاتنا نورت
وزهت أيامنا
شكراً للطلة الأنيقة يا أنيق

حسن سادة
03-06-2010, 04:21 AM
الساعة تشير إلى التاسعة صباحاً بتوقيت الخرطوم وعنبر الحريم في المركز يسوده هدوء
يشوبه الحذر والترقب من مداهمة أحد الأطباء على حين غرة فيما فتحت السرة
بستلتها العامرة بالخيرات من أطايب الطعام وأخذت تنادي في المرضي بصوت عال:
" يا نساوين هييي
واحدة بس تقوم تمشي تقعد لي عند الباب
تراقب الدكاترة والسيستارات والباقيات
يتفضلن بي جاي صحة وعافية فضلة خيركن الليلة الفطور حاجة مبالغة تعالن جاي يا حريم
فإجتمعن النسوة بجانبها فمنهن من جلست بجانبها ومنهن من جذبت كرسياً صغيراً
وأخذت تتهاتفت إلى محتويات البستلة فيما كان على رقية مهمة المراقبة
ريثما يفرغن باقي النسوة من الأكل حتى تتناول هي إفطارها فيما بعد.

وقالت السرة لسميرة المايقوما :
" ها يا سميرة بري منك جيتي بي دربك!!
عليكي الله ناوليني شطة الدكوة من قدام التومة
الدكاترة مانعنها من الحاجات دي وهي ما بتسمع الكلام
وإنتي يا إخلاص ناوليني حتة مش من الصحن داك
وهاكي حتة الطرشي دي شكلك نفسك قافلة ومسدودة
فجأة قالت نفيسة بت الفكي:

" ووب علي يا السرة شيلي من قدامي

صحن الفسيخ ده

الملح مركز فوقه مبالغة

سجمي ما يرفع لي الضغط زيادة

فقالت السرة وهي تتناول منها الفسيخ

: هاكي يا السيدة ناوليها برطمتنة المرى ده

خليها تتغذى وترمم عظمها الغلبانة دي

وفجأة قالت السيدة في همس وغمز ولمز:

" ووب علي يا السرة يا أختي

سجمنا ويا عيب الشوم"

فقالت لها السرة:

" مالك يا السيدة يا أختي

بتولولي فوق كم؟

مالك يا المهجومة

عاد المربى كمان طلع فوقو ملح زيادة"

فقالت السيدة وهي مستغرقة في الضحك:

" مربى شنو يا بنت الحلال

عايني الممرضة القاعدة جنبنا دي

ما عزمناها تسفسف معانا"

فقالت السرة وهي تخاطب الممرضة المعنية:

" يا بتي ما تجي تأكلي معانا العيش والملح

فطور الصباح ده زيو ما في"

فقالت الممرضة:

" شكراً يا خالتي الحمد لله

أنا سبقتكن، إن شاء الله صحتين وعافية

عليكن يا خالات"

فقالت السرة

سجمي ووب ووبين علي!!

أجي يا أخواتي!!

عاينوا البنية دي!

إنتي من صباح الرحمن قاعدة في مكانك ده

ما شفناكي قاعدة تأكلي حاجة خير شر

كيفن سبقتينا يا بنت الحلال

ولا الأكل ما عاجبك؟

فقالت الممرضة:

" لا لا يا خالة
كيفن ما عاجبني،، العفو
بس أنا أخذت الحبة بتاعة الفطور"
فقالت لها السيدة وقد قتلتها الشمار:
" حبة شنو يا بتي
الولية قاعدة تقول ليكي
تعالي أكلي تقومي تقولي ليها
أنا بلعت حبة ولا برشامة
ما عارفة شنو!!!!
إنتي عيانة زينا بعد الشر عليكي
حبة شنو الأخدتيها دي؟؟؟
فقالت الممرضة وهي تخرج علبة من جيبها:
العلبة دي يا جحة فيها وجبات متكاملة
فوقها كل الفيتامينات والعناصر الغذائية المكملة
وفيها كمان المعادن والألياف وكل المكونات الغذائية"
وفجأة أطلقت السرة ضحكة مفاجأة كادت أن تخنقها
وقالت للممرضة سالفة الذكر:
" والحبة البتأخدينها بدل الوجبات دي بتشبعك؟
فقالت الممرضة:
" كيفن ما يشبعني؟
الحمد والشكر لله
يشبعني ويلأ معدتي بالحيل
صدقي يا خالة المكملات الغذائية دي بتشبع أكتر
من الأكل وفيها فوائد غذائية أكتر من الأكل "
فقالت السرة وقد أعجبتها الفكرة وراقت لها:
" صدقي يا السيدة يا أختي
أريتها حبوب الهناء والسرور يا يابا
أمانة ما حاجة خطيرة وهائلة
والله علم وتكنولوجيا جديدة
يعني تكوني مشغولة في البيت
عندك غسيل ولا خياطة
تجيبي علبة من دي
ولامن الراجل يجي من الشغل
والأولاد يجوا من مدارسهم
تقسمي ليهم الحبوب دي
ولا فيها غسيل عدة
ولا دخان ولا نار
والجوطة والكبسيبة والكركبة
بتاعة المطبخ دي
البتجيب ليكي الصداع من ما في"
وإستمتعت السرة أكثر فأكثر بالفكرة فقالت:
" يعني أكون عازمة صاحباتي في العشاء
وألمهن كلهن وأفتح العلبة
وهاكي يا فلانة وهاكي يا علانة
ولو فيهن واحدة لهاطة وبتاعة سفاسف
أديها حبتين وتلاتة
ولما الراجل يجي من الشغل
ويقول لي يا السرة أنا ميت من الجوع
أديه علبه كاملة خلي يشبع ويملأ بطنه
والله فكرة تجنن"
وفجأة صاحت رقية من برج المراقبة
وقالت لهن في ذعر وهلع:
" الليلة!!!! سجمكن يا نساوين
دكتورة سوزي جاية علينا
ومعاها السيستارة منى
يلا بي سرعة كل واحدة تجري لي سريرها

يلا قوام

ما تعاينن لي كدي