مشاهدة النسخة كاملة : لله يامحسنين....زكريات
Wad Aker
27-12-2004, 07:10 AM
الى كل الناس الطيبين الموجودين على الهواء مباشرة ....احتاج لكى استعيد ذاكرتى وطفولتى منكم فقط اسطر اشتم من خلالها رائحة الحواشات والخضروات واى محصول يتم حصادة او زراعتة هذه الايام ...وهل العنكوليب لسع موجود وتبش الجناين والشريك للطيركمان ..... اتمنى ان تعيدوا لى بعض الزكريات الجميلة لان الشوق والبعد والبرد قتلنى فهل من جميل يستجيب ... اهه انا راجيكم!!
امير عبدالباقي
27-12-2004, 08:11 AM
اخي Wad Aker
لك الف تحيه ؛ والله الموضوع ده طويل عاوز صفحات كتيره
انا زمان كنت بمشي مع جدي الحوشات ونفتح الجداول ونجري بين العيش والقطن والفول ديل كانو بنزرعو مع بعض وكنا بنشيل قندول العيش لسه هو ني ونولع نار ونخت قناديل العيش فيها وتشم الرائحه وتسمع تقطقه العيش في النار؛ وكل مايعملو الان في البيت الفشار اتزكر قلي العيش في النار ؛ وتقطع في اخر النهار الموليته ومااجمل الموليته بالفول المسحون والبصل الابيض والشطه والليمون ياه ... ياه .... زمان والله . وانت خارج اخر النهار تاخذ معاك ربطه عنكوليب وانت ولا الملك .
اما في هذا الوقت بالزات وقت البرد يكون استوي القمح وماعندنا دخل كتير به لانه بكون في برد شديد والقمح يزرع في الشتاء فقط
طبعا انا من فريق الحلبه كنت بمشي مع اولاد الحلبه المقابر وتكون معانا شبكات ونصيد الطير من كل الانواع قدوم احمر والله خانتني الزاكره باسماء الطيور
وللموضوع بقيه
ابو المهتــدي
27-12-2004, 10:53 AM
الله الرحمن الرحيم
اخي الكريم 0ود عكر 0 لك التحية ماذكرتة هو موروثنا وحياتنا 0 نشانا فيها وبزتنا نمت من تلك المزروعات
بكل الوانها قصبية كانت او ورقية او وقرعية 0 خضروات بانواعها مزروعة او قايمة برزس
كبارا او صغارا نقيم الاهازيج لتك المزروعات 0وكل ماذكرتة يوجد منه الكثير بس اختلاف بعض الشي
القنقر موجود 0بس بدل ود عكر بقي معاه0 وداحمد0 وطابت د 0 ( العيش الاخضر ) الموليتة الفول الاخضر ام بقبق (بامية الخلاء أي البروس ) وايضا الخضرة 0 وايضا مازال الصغار ينصبون شراكهم لقدوم احمر 0 ومازالت الذكريات تشدنا لها وصدقني اخي في أي فرصة اجدها وانا في لبلد تجدني في قلب الارض نحتفي بكل تلك حتي العنكوليب لنا معة مداعبات 0 تحية لك ولاهل الفريق تحية فريق الحلبة او ألديم الفوق كما يحلو لاهله فكثيرمنهم اهل زراعة
ليت تلك الايام تعود 0لتقيم لنا المحاحكم لما الم بنا وبارضنا وتعيد لنا مافقد من المورث 0بها سوف نصلح الحال وتنصلح الديار 0وترجع الطيور الي اعشاشها من ترحال الغربة 0 ومهما كان الجزيرة ومورثها حضن يعرفه اهلها 0ومزاق رضعتة حلم يراد الجميع بالرجوع ليه تحياتي 0
ضياء الدين احمد
27-12-2004, 02:16 PM
التحيه لك ودعكر وانت تهيج الذكريات جدي ايضا كانت له حواشات وقد كانت في آخر الدرجه جوراها توجد حلة محجوب وحلة رضوان للفلاته فقد كانوا يزرعون معه وكنا نذهب مع ابي كل يوم جمعه ونعود محملين ببعض الخضروات اما العنكوليب فكثيرا ما كانوا يزجروننا بسببه بزعم انه يسبب الحمى
اما قصب السكر فلا يمناعون فيه ولكني كنت لا اميل اليه لانه يحتاج الي تقشير وهذا ما لا اريده وخصوصا في البرد لانه يحتاج الي اسنان قويه
اما الطير فنذهب مع اخي الكبير لنأتي بالشبكه وهي ملئية فنأكل منه كفايتنا ثم نبيع ماتبقي ولحدي هنا ياود عكر كفايه دموعنا بدت تجري انت الليلة السلطك علينا منو ؟ اه من الذكريات لو السنين بترجع ياودعكر
أبوبكرحامد
28-12-2004, 12:49 AM
الأخ ضياء ............
قلت كنت بتبيع الطير دى مفهومة ، لكن المامفهومة إنو واحد ساكن الدرجة ببيع الطير معناها ناس حى المدنيين إبيعوا ناس عديل كده ؟؟
ود الماذون
Wad Aker
28-12-2004, 06:37 AM
الى المميزين
امير
ابو المهتدى
ضياء
والمجتهد ابوبكر
ما اجمل الوصف عندما ياتى صادقا دافئا من رجال زرعوا وحصدوا
عذرا فالخروج كان باكرا والرد جاء متاخرا
شممت عبركم رائحة اللوبيا وتزوقت معكم شواء الفول ....ياه ...كم انتم سعداء ومااجمل صورةابو المهتدى..... لكم كل الحب
فلا يجيد الوصف الامن عايش الحدث ....
احبكم واحسدكم ولكنه حسدا حميدا....مزيدا من التواصل
والتحايا لكل احياء مدنىhttp://
ضياء الدين احمد
28-12-2004, 12:28 PM
يا ابوبكر بالمناسبه ناس الدرجه كلهم من المدنين والقسم الاول والعشير ونحنا بيتنا الكبير في مربع 11 وفي الاجازات قعادنا كلو تحت كبري ودقيحه بنسن في السيوف للحرب مع اولاد الحلبه في الميدان بتاع المدرسه الاهليه وطبعا هم جيشهم منظم عديل كده بجوا راكبين حمير الرمله اقتنعت ولا ازيدك
أبوبكرحامد
28-12-2004, 10:22 PM
ضياء .....................
أعتقد ماذكرته كافى للغاية وأكثر من ذلك بوديك فى ستين داهية لذا أرجو عدم الإسترسال فى التفاصيل حتى لاتتورط فى حكاوى تجيب الهوا .
مع مودتى
ود الماذون
ضياء الدين احمد
29-12-2004, 03:07 PM
اوعي تكون يا ابوبكر من اللذين يمتطون حمير الرمله؟
اها ده خشمي سكت مادام بتجيب ليها هوا
أبوبكرحامد
29-12-2004, 11:07 PM
ضياء ....... سلام
نحمد الله أننا من سكنة بانت " حى الزهور " فلم يسبق لنا امتطاء " الخمير الحمر " ، ومازال تحذيرى بالبعد عن التفاصيل التى ربما تستدعى ثأرات قديمة أو ماإلى ذلك .
ود الماذون
Powered by vBulletin® Version 4.2.5 Copyright © 2025 vBulletin Solutions, Inc. All rights reserved, TranZ by Almuhajir