يسن عبد العظيم .. الطائر الغريد

[محمد الجزولى]

تتميز اغانى الطبور بالحنيه الشديده .. والمفرده الموسيقيه
وقد استطاعت ان تتغلغل فى وجدان جميع الشعب السودانى بمختلف اطيافه
وهنالك الكثير من فنانى الطمبور الذين ابدعو واجادو مثل النعام ادم وعثمان اليمنى ومحمد جباره وعبد القيوم الشريق وغيرهم الكثير...
فى هذه المساحه سوف نتناول واحد من اؤلئل الذين احدثوا نقله نوعيه فى اغنية الطمبور الا وهو المبدع يسين عبد العظيم
ولد يسن عبد العظيم بمنطقة العفاض فى شمال السودان فى منطقة البديريه من اسرة فنيه ..جده الشاعر المعروف عبد الله ود الكعيد ...وخاله الفنان حسن جديله الذى تغنى باغانى الطمبور فى المنطقه فى الستينات
وقد كان يسن منذ صغره مثالا للادب واحترام الجميع
وقد كان لموته صدمه كبرى لعشاق ومحبى فنه فقد عشق فنه الكثيرين
سقط يسن فجاءه على خشبة المسرح وهو يتغنى فى حفل عرس فى منطقة منصور كتى فى شمال السودان سافر بعدها الى الخرطوم لاجراء الفحوصات الطبيه لتبدأ رحلته مع مرض سرطان الدم الذى لم يمهله طويله فقد فارق الحياه وهو فى عز شبابه
وقد رثاه الكثير من الشعراء مثل حميد وابنعوف وغيرهم
يعتبر يسن من المجددين وصاحب نهج خاص فى اغانى الطمبور
وسوف نتاول بعضا من اعماله فى هذا البوست

[محمد الجزولى]

تعتبر مرثية الشاعر ابراهيم ابنعوف من اكثر المرثيات التى تمتلئ حزنا والما لموت يسن عبد العظيم
وهى مرثية احى وا وحيح


ان كان مالاجل بدرى إتكتب فى اللوح
أوكان النفوس تتفدى روح بروح
ماكنت مـٌـت ياغريد بلابل الدوح
وا حى وا وحيح قلباً عليك مجروح
***
بنوت الشعر الليلة ليه ساكتات
هيّلن الرماد كبن علي القافيات
ابكن ومنحن ونوحن مع النايحات
واثكلن الجنا الما بيتولد لمات
فى ليل الغلابة وحمتو والشافعات
يالله سون الحى ووب عريسكن مات
وماتت طيبة الوجه التملى صبوح
وا حى واوحيح قلباً عليك مجروح
***
قولو ليه يالنجم السطع فى سماك
قبت بلا خبر شن شفتا فى دنياك
صغير مابقيت مالو القبير ضماك
لاشفتا الجديد لانحن سيرناك
واسفى الشديد واسفاً عليه صباك
يالقطع قلوباً كانت عزاها غناك
قطع كبد ابوك وامك الرجاك
اخواتك يجرن فى المناحة نباك
واخوانك منو الفيهم عليك مابنوح
واحى واوحيح قلباً عليك مجروح
***
ماكت داير اجامل فيك يوم الشين
قصدى القاك عريس بين العديل والزين
قصدى تهزو صوتك والجنات راكزين
وقصدى غنى البنات والسيرة ليسين
ضجه الفرحة فوق عتب الفريق عرزين
كربة وابكر والعفاض شمال ويمين
راجين يوم جديدك وكلهم دايرين
يردولك جمايلك يالوليد الزين
وياريت كت عشت وكل الامانى تروح
وحى واوحيح قلباتً عليك مجروح
***
ليشن يالرميلة شمالنا مايحزن
باينة احزانو فوق نخلو الانتنى ودندن
فى النيل والجروف وفى الصوبن وعدن
فى وش البنيات الملن وماجن
حزين اداك وليدو المافي ليه ثمن
ويابخت التراب الضمه كل الفن
وضمه اجمل رسالة شموخ
وحى واوحيح قلباً عليك مجروح
***
يسن جاك غريب اغفرلو يامولاى
غفران زلت العبد الدوام نساى
سحاب الرحمة فوق قبرو اليكب بكاى
ودخلو منزلة عبداً تقى صلاى
وعوضو فى شبابو الجنة ياعطاى
وزوجو من حسان كان للحسان غناى
وانت الباقى ازل وكل الخليقة تروح
وحى واوحيح قلباً عليك مجروح

[محمد الجزولى]

مقطع من مرثية الشاعر حميد
وغنّيت في كل الساحات
بالنفَس الحار الإنــساني
بردت حشا أولاد الف،قرا
رقّصت بناتنا السّمـــحات
أبـشِر يا باشر من تـــاني
عُـــقب رجعت الرايــحات
ياالله عليـــك يا ياســـين
أقْفُر خُطا غيمتاً ما جات
فاض نهر قضيتك فــاض
ضد سكة عرق الإجـهاض
مركب شــــهدانا الجايـين
هدّن بنا قَبل العـــفَـــاض
نلقاك يا قاعــد تــــتـــوضا
فوق قيف الغبش الفياض
يا واقــف حيــلك وتِنـقـضّ
على آفةْ الزمن الرضراض
ويا إمّا رتــوتــيكْ والعرضة
وقــدّامك عــرب العــفّاض
الزّحف الصحراوي الأرضة
المرض.. الهـــدام العاض
تاريخ الجُــــزر المنــقرضة
الفــقر الهتــــك الأعراض
عينيك تطشّشْ منقبضة
العالم ينشرّ بياضْ
تتلفّحُو خالي من الفوضى
والعسكر وكل الأمـــراض
زي زيَّكْ زيّك ماب نـرضى
الموت يا عريس العـفّاضْ
يا مقدّم باطفال الــروضة
شُويِمْ يا عريس العفّاض
يا سبحةْ أُسُر الطمبــارة
والأيدي الشهرت جيتارا
للآخر نــازفة محـــاجرنا
بالغضب الديـــنو دفاترنا
والطبقة وأمي وجيفارا

[محمد الجزولى]

يسن عبد الرحمن يرثى يسن عبد العظيم
عنوان المرثية من يسن الي يسن
غريبة الدنـــبا وعجيــبــة
تصيك مــتي ما تصيــبك
وما بترجي رحيل حبيبك
حين يرحل عنقريبك
تغني تحاكي البليبة
***
يامراكب المحس المسافري
شقي العــرق انتي باصـري
رغم الهــوي مــافي باصري
كلمي ناس الدبيبة
***
لاتنـــسي تنوحيـــلو
عريسا مــات بـعــيلو
لاشبـــــال يتــكيـــلو
لاضاقلو خجل نسيبة
***
يا خــلاي شن نــسوي
اي شمــعة تـــضـــوي
يبقي الموت من نصيبة
***
البـــــــاسا الفيـــها ناسي
واوسلي اليكا ماها ناسي
تومليك بتويبة
***
يا صـــديق في غنـاك
في طمبور ارقي داك
فتش نبراتو جيبة
***
كان ما الردة الخبـيـســة
اعانق دين سيدناعيسي
امنح جوي الكنــيـــــسة
واصلي واعلق صـليــبة
***
العـــــفاض حالتــــو مُـــرة
يقـّيب ويدوش م،،رة مــرة
اذا في حــــالتو استــــمرّ
خشيمو اتكمدت ليه حيبة

[بت مارنجان]

بعض من كلمات الاغاني للمرحوم يسن عبد العظيم

[بت مارنجان]

أعز إنسان

يا أعز إنسان لي أنا يا أعز إنسان
ماني غريب عليك يا عاشقك الهيمان
جيتك من سجون الريد بدور لي ضمان
ما تصارحيني وقولي لي بكل أمان
في قلبك دحين عاد تاني ياتو مكان
قربتك وبينك بينوا كان أزمان
طريتك وفكري في عالم من النسيان
خاشع مبتهل طالب الإله سبحان
يجمع روحي بي روحك ويعيشوا إخوان
بريدك وريتي ليك ريدت عيان وبيان
وقولت أجفا كي عندي بعيدة في الحسبان
كل الدنيا من غيرك بشوفا هوان
حتى أفراحي غيرك فيها تبقا احزان
أشيلك في عيوني عليك وأظل سهران
وأسكب زاتي في زاتك وأجيب اوزان
بردد في حروف إسمك براي نشوان
يعقب في صداهو معاي كل لسان
أخلي الكون فرح يرقص معاي طربان
تغني طيورو تتمايل على الأغصان
ليه بغناكي ما أبكي الوجود ألوان
انا المكتوب لي احبك وليك أعيش فنان
تعالي وضمي صدري عليكي بي تحنان
ورجعي عمري وكتين كت مع الحبيان
بيكي نسيت شقاي كل العزاب الكان
وفيكي لقيت حنان أمي الفقدتو زمان

[بت مارنجان]

الوداع
قربك حار وبعد حار ذاتك نور وحبك نار
بس قول لي متين شفناك متين في الحي بقيتلنا جار
متين الإلفة تمت بينا لما الإلفة تبقا حسار
ليه داير تسيبني تفوت لسع ما انتهى المشوار
اخاف انو الزمن ينسيك ذكراي والزمن غدار يا غدار
ولا اطمني بي لقياك تقولي الزمان دوار
لا توصيني كتم الريدة ما بقدر على الاسرار
خلي الفي علوم الغيب انا السافي الفراق محتار
وراكي ألقى الصبر من وين وكت صبري لي إنهار
بعد الفات ده كلو تسيبني في الدرب النهايتو دمار
لا كلمات تطمن قلبي او صورتك تكون لي تذكار
ول خلاص تودر ريدي فاكر حبي ليك هظار
صدق ول ما تصدق ده إحساسي البخم أشعار
أمشي هناك أهدى ونوم وسوبني اسهر مع السهار
عشان في عيونك أعبد ربي واتلو اسمك مع الزكار
وإن هاجت على زكراك بترجى النسيم المار
إن كان فيهو جيب رواية او منك يجيب اخبار
وداعا والإله يرعاك اما انا حالي يا ستار
ما بقدر اقول أرجاك مخير واحب الأعمار
ولا بقدر الومو زماني اقوليكي الزمان بي جار
ما دام السبب بي إيدي كيفن ألعن الأقدار

[بت مارنجان]

ليل الغلابة
كلمات :- إبراهيم أبنعوف
ألحان وغناء:- الراحل المقيم يسن عبد العظيم


ليل الغلابة
يالله يا ليل الغلابة ولمني
ولفني وأبلعني في جوفك هناك وضمني
بسألك بالفيك مسك قلبو وشهق
بالبيبكي وداير تشقو العبرة طق
بالكتم سر حبو لا باح لا نطق
قولو مخلوق حظي منك ول من حظي إتخلق
وإنتظر حدثني لا تعجل تفوت
يبقى ما تلقاني بكرة وراك اموت
وده إن حصل ألبس سوادك وحدني
ومالك إتحيرت يا ليل في الكلام
وماك شايف الدنيا في عيني ظلام
والقلب عميان يفتش في الزحام
لي قلوبا طيبة ما عرفت خصام
في زمنا الطيبة راحت ومتلقت
وفوق دريبا جريتا والكرعين حفن
البقول يمسح دموع عيني يزيدا يتمن
أه عزابي أنا...

أمبقيت ما عرفت إسمي تعالي جاي
في معنا الزول المسطر فوق جدار صمتك غناي
في معنى الروح المعذبة في منامي وفي صحاي
في معنى الفي الواطة قاعد وشايفو فوق نجمك مناي
لي حق لو ما عرفت مين انا انا ما الوليد الشفتو قبال كم سنا
وأسي جيتو لقيتو شايب وفوق عصي الريد متحني
ما غريبة الحب يقرض الزول قرض
انا ياني واحة من حطاما على الأرض
والغريب انو الظروف تفرض فرض
اللي يعيش في دنيا لا طول لا عرض
القدر يلببي بين يمنا وشمال
وأبقا زي عصفور كسير في إيد عيال
وكيف يطير وجناحو مكسور متني
أه عزابي أنا...

وليلي أسري بي تعال شد الرحال
ولي عوالم بي نجومك من خيال
أجيهو وأرجع ألقى ظلم الدنيا زال
يالله قبال تطفى شمعاتي الرياح
وقبل ما ينزل على الدنيا الصباح
وقبل ما تنزل مصيبة تطبني
أه عزابي انا...

[نزار احمد كوارتي]

حزين اداك وليدو المافي ليه ثمن
ويابخت التراب الضمه كل الفن

حقيقه والله كان فقد عجيب وما أظن ننسي هذا الإنسان الإنسان كما لن ينساه العفاض
عرب ونوبه فوق وتحت قبلي وبحري من أبكر ولا حد القصر وأب سعيد, فقد غني لحمتو ونورا
وكل الغلابه الغبش من أهلنا الطيبين
وما ظنيت أقدر أنسي صينية الغداء الطارت في الهوا لحظة نطق الرادي
خبر وفاة القامه يس بعد نشرة الأخبار

يسن جاك غريب اغفرلو يامولاى
غفران زلت العبد الدوام نساى
سحاب الرحمة فوق قبرو اليكب بكاى
ودخلو منزلة عبداً تقى صلاى
وعوضو فى شبابو الجنة ياعطاى
وزوجو من حسان كان للحسان غناى

اللهم أغفر له وأرحمه وتقبله قبولاً حسن

الشكر كل الشكر للرائعين محمد الجزولي وبتنا بت مارنجان
علي التوثيق الجميل ونعدكم بمحاولة المشاركه قريباً

[نزار احمد كوارتي]

الرائع محمد الجزولي
كبدأ وإنطلاقه
خليني أبدا بي صورة الطائر الغريد العجيبه دي

http://tungasi.com/uploader/uploads/yaseeen.gif

[نزار احمد كوارتي]

بكتب ليك

غناء المرحوم المبدع / يس عبد العظيم له الرحمه والمغفره
كلمات الأستاذ الرائع إبراهيم أبنعوف
*******
مالى أنا كل ما أقول فى نفسى إتلمينا
ألقى أقدارى تضحك .. لى تقول كضِّاب
وكل ما أعمل حساب لظروفى
زى الما عملت حساب
مالو فراقنا مترقبنا .. دون خلق الله
واقف ديمة عند الباب
وأعمل إيه .. عشان يختانا جاى أو جاى
وبينَّا وبينو يبقى حجاب
ونشوف الدنيا موكب فرحة
لينا تغنى بى ترحاب
وتدنى عليِّا آمالن .. بشوفا سراب
ويهل سعدى .. ونجم سعدى ..
بعد ما منِّى طوَّل غاب
وأقيف خاشع .. وأقول يا الله
كل النَّاس يكونوا أحباب
***************
بكتب ليك وأطوِّل فى كتاباتى
يفيض إحساسى وأملا الدنيا
بى كلمات خطاباتى
بجمع ليك لغات الدنيا وأكتب ليك
بى لغة العجم مرات ..
وبالعربى الشديد وفصيح ..
وبى لغة الملايكة أحيان ..
وبالسريانى والتسبيح ..
وفوق كل ذرة فى ها الكون ..
بكتبا ليكى وارسلا فوق بساط الريح

بكتب ليك على الأشجار .. وفى الأنهار ..
ومحل ما تمشى قدامك
تلاقى حروف رسالاتى
لأنك إنتى من ذاتى .. وفى ذاتى .. يا ذاتى
ومهما كتبت ما بقدر أعبر ليك عن الجوايا
مهما طاوعت أقلامى كلماتى

وليه ما أكتب وإنتى الماضى بى أحزانو
بى أفراحو والمستقبل الآتى
كتاباتك شوية خلاص .. ورسالاتك شوية خلاص
علىَّ الفى منامى أحلام .. علىّ الفى صحاى وسواس
وأنا الراجيكى تكتبى لىَّ .. كم دفتر وكم كرَّاس
منَّها داير أفصِّل جبة وانْدروشْ ..
وكمان طاقيِّى فوق الراس
ومن كلماتا أسوى السبحى والبخرات وكم حجبات
أداريبن عيون النَّاس
كمان تقروقة .. وفى محراب هواكى اجلس مع الجُلاّس
واخلى الباقى واتغتابو .. لو بعدك غشانى نُعاس

أنا الراجيكى تكتبى لى ..
كتاباتك تكون فى الظلمة لى نبراس
أنا العايش فراقك لى ..
بشوفك فى عيون النَّاس
وعازرك لو كتبتى قليل ..رضيان بيهو
ما دام بى وفا وإخلاص
أريت يومن فرقنى معاك ..
يكون محذوف من التاريخ ..
وتبقى أيامنا ستة .. ونبقى فيها قراب
أريت بلدن تحرمك منى ..
لو ما إنتى تبقى خراب
يسكن فى خرابا البوم ..
ويتصايح عليها غراب
تولِّع فيها نار الله ..
وتصبح كوم رماد وهباب
وتمرقى إنتى والنَّاس المعاكى قراب..
وما دعيت خاتي الا الفراق اسباب ..

[نزار احمد كوارتي]

والآن يا حبايبنا

هاكم حروف من زول بريدكم

الأغنيه المجنناني جن ولأذم أختها ليكم صوت قريب جداً


هاك حروف من زول بريدك ... ريده صادقه بحسن نيه

ريده من آخر ضميري .. ولي اعز عزيز لديه

قَلِّبي الريد صفحه صفحه ...وغوصي في عمق القضيه

باري من آخِر حِروفو ... ولي الحِروف الاوليه

عيدي تاني وتاني عيدي ...راجعي نَفسِك الف وميه

خُتي بين قوسين أحِبَك ... قبلِ ماترُديها ليََّّه

زول يردد ديمه بسمك ... لم تصبح للعشيه

وقبل مايتوضي يركع ... يبده بالفاتحه ورُقَيَه

إنتي لوحه أنيقه ساحره ... خُضره ريانه ونديه

زي قوام البان قوامك .. زي زهور في مزهريه

انتي الطف من وزيزين ... من غزاله ومن ظِبَيَه

قلنا عُُنق وِزين خشيمك ...السنون رقاشه لامعه

الشفايف عجوه هشه ... زي جرادل زبده مايعه

الشعر زي ليل مِضَلِم ... الدبابيس نجمه ساطعه

روعه من ديكور منسق ... الوِشيش زي قمره طالعه

[محمد الجزولى]

والآن يا حبايبنا

هاكم حروف من زول بريدكم

الأغنيه المجنناني جن ولأذم أختها ليكم صوت قريب جداً

[/COLOR]
الحبيب نزار
شكرا لهذه المساحه العطره
تصدق فتشت عن الاغنية دى بالصوت ما لقيته ابدا
ياخى لو عندك نزلها هنا ياخى
مع ودى واحترامى

[نزار احمد كوارتي]

الحبيب نزار
شكرا لهذه المساحه العطره
تصدق فتشت عن الاغنية دى بالصوت ما لقيته ابدا
ياخى لو عندك نزلها هنا ياخى
مع ودى واحترامى

تُكرم آآآ الحبيب
أجيبه ليك من أضانه
إتوقعه مني قريب إنشاء الله