فى ...وفى...فى الغربه

[الاميره]

لما نتكلم عن قصص الغربه ..بنتكلم عن واقع معاش محتاج لى وقفة تأمل فيما يفعله الاخرين لتحقيق مصالحهم سواء اضروا بغيرهم او لا..دا كلام حسب نظريات اصحاب المواضيع..

لو وقفنا قليلا امام كل قصه سنكتشف مدى تردى الاخلاق وقوة وجبروت مفتعليها ببراعه وتمثيل منقطع النظير ..ولكن ما النتيجه؟ ولماذا تظهر تلك الاموروينجرف ورأءها اصحابها؟ اهو لتغيير الروتين ام لعدم قناعة بالاخر؟ او طفاسه وحب تغيير حتى ولو فى الارواح؟ والنتيجه..النتيجه فادحه ومروعه..اما انغلاق للمحافظه على ما تبقى ..او الهروب من المواجهه والرجوع الى ارض الوطن..او مشاكل وفضايح وطلاق بالكوم والردوم....

قصه اولى..
فى ناس عامله فيها ما بتدخل فى خصوصيات الغير لكن فى الحقيقه كلام....وهم متدخلين فى كثير من امورالغير...
ودى اهم نقطه فى الموضوع..عدم التدخل فى خصوصيات الغير ,,وللاسف نحنا كسودانيين فينا الحاجه دى بكثره..الواحده ولا الواحد لما يتعرف على ناس فى الغربه بحبوا يعرفوا عنوا كل حاجه ولو ما قدروا يكجنوا ويسفهو..ويقطعوا العلاقه,,
وحتى لو النوايا الطيبه فى وبقت الحاله واحده دخله وطلعه وونسه وشيل هموم مع بعض ..بس فى نقاط ما بتتحكى تلقى ليك الطرف التانى حنبك والدم غلى فى عروقو والحكايه بقى فيها دس ديس..وخبيث...وعدم ثقه ..ويطلع منو يكسى بيه العرايا بقصصو العارفها عنهم...يا جماعه دى حاله دى..اصلو عزر مافى ..تعزر الزول عشان خصوصيتو.. بقت عدم ثقه..
انا فى رأى البعمل كده دا فعلا انسان لا يمكن الوثوق فيه....ياجماعه كل شىء له حدود..والواحده او الواحد يضبط نفسو لحدى ما يبان سر النوايا وبعدين الناس معادن وبتختلف وما كل ما يلمع ذهبآ..ولا شنو؟....

نرجع لى قصتنا الاولى..

فى ناس عايشه عيشه آخر تحضر ولما الضيوف تجى ما عندهم قشه مره,,كلو مع بعض رجال على نسوان..طبعا فى الاول ونسه خجل ..وربكه..وهدوء..ومرتين تلاته الناس تاخد على بعض إشى كلام وونسه وضحك والعيون شغاله والحركات.....ولا حد جايب خبر فى نوايا التانى لحدى ما تبقى قصة الفيلم المصرى علشان ربنا يحبك...بس السودانيه والفيلم السودانى سيكتمل للاخر وناس عمليين ودغرييين ولما يحس بأنه عايز مرة صاحبو ... يختلقوا مشكله وبكده راجلا يسفرها السودان وهناك تترتب حاجات كتيره وتفتعل مشاكل تؤدى الى الطلاق..وبعد فتره ترجع زولتنا عروس لصاحب الراجل القديم..

او تحصل مشاكل بين الزوجين وشكوك وعدم احترام وبرضوا مصريين على عيشة التحضر والاختلاط...عيشه ولا احلى من كده ولا شنو؟

وسأعود

[مايسة]

الأميرة - صباحك ولا أحلى

موضوع متشعب جدا وحساس

والغربة وما يحصل بها من اشياء غريبة - داخل الاسر والجيران وغيره

اولا

صدقتي في قولك بأننا نحن السودانيين نفتقر لجزئية الخصوصية هذه -

ولكن من منطلق تاني - وعلى حسب تجربة شخصية - لاحظت أن السودانيين او السودانيين الذين صادفتهم من الصعوبة بمكان ان تخلق صداقات معهم - لا ادري اهو خوف ام ماذا - انغلاق - ياخ حتى السلام (صعب صعوبية)

سآتي اليك مرة ثانية لباقي الحديث :)

[Ehab.G]

اذا كان دا البحصل ليك في الغربه من ود بلدك او يمكن يكون ود اهلك


علي الدنيا السلام والله

[الاميره]

الاخت ميسو..

مساك الله بالخير..

البحصل فى المجتمع كثير..وكل مره بنكتشف الجديد..ونتعلم..

تسلمى على المرور..

[الاميره]

اذا كان دا البحصل ليك في الغربه من ود بلدك او يمكن يكون ود اهلك


علي الدنيا السلام والله



الأخ/Ehab.G

فعلا هذا نوع من البحصل ..واعتقد ضعف النفس وكثرة الامراض النفسيه ..وكمان الانغلاق وروتين الغربه الفتاك اسباب لكل ما يحدث.واهم شىءالبعد عن الالتزام بالعباده الصحيحه والطاعات وكذلك البعد عن طريق محمد صلى الله عليه وسلم والذى وضع صحيح وواضح ليكون مسلكنافى كل زمان

[الاميره]

القصه الثانيه:
سروره عايشه فى هدوء وسعاده .. وعندها من العيال ثلاثه..يا دوب فى مرحلة النموء.. ومرة السنين وجات سكنت جاره جديده فى الشقه القصادهم طوالى...اخر ونسات وسهرات الاربع والخميس مره فى البيت ومره فى البر او نزهات....

لحدى ما الجاره جابت اختها زياره,وطبعا الاخت فرص الزواج بقت بين ...بين...وشربكت ليك ونسه مع راجل المسكينه سروره..ولما عرف ما يريد سفر العيال السودان اجازه ..ورسل لاخت الجاره الشيله وتمم العرس وجات عروس وفى بيت سروره..

ملاحظه:


لو عايزين نحلل الاسباب حا يكون العيب فى منو؟؟....انا بفتكر العيب فى راجل الست سروره..خائن وبلا اخلاق وطول السنين العاشها مع سروره عباره عن روتين متكرر كل يوم ومظهر اجتماعى واهو اسمو ملتزم...مع انو فى الاصل انانى ..ولا شنو؟...

[الاميره]

القصه الثالثه
انغام...عندها اسره بغاية الرقة والجمال...والهدوء تربية عز...وربت عيالها على طباهم الهادئه والمهزبه..
بس الراجل مفطوم على قعدات الونسه مع الحروم..وكل مره تلاقيه عن ناس فلانه بت خالتو وعلانه بت جدو..وانسان هميم بيساعد ويجامل كويس... خاصه لو وقع فى طريقو واحده شغاله ولوحدها.. ومحرمها للاسف رجع للسودان عشان يكمل اشغالوويشوف مصالحو..واخونا راجل انغام ما مقصر ..توصيل وقضاء حوائج وداخلين خارجين مع بعض..والفتره البقيب فيها الراجل.. بقعدوا معاها احد معارفهم وزوجته..والحجه ما عندو عربيه...

الحكايه دى خلقت مشاكل لا حد لها بين انغام وراجلها ..وعندا فيها ..الراجل ما بطل عمايلوا ومصر انو ما عامل شى غلط..مع ان الشخصيه دى لاعلاقة لها بهم لا من قريب او بعيد..وكل المعرفه انها صاحبة بنت جدو البزورهم عشان يتونس معاهم..
ملاحظه:
طبعا راجل الشخصيه موقفو ما معروف...هل هو مستفيد ماديا وساكت على الاوضاع دى..ولا نايم فى العسل وما جايب خبر ولا حتى ما عارف من يكون راجل انغام؟ ولا ياربى الحاصل شنو؟...

[الاميره]

القصه الرابعه

انتقلوا للعيش فى شقه جديده..واهو من باب التجديد اشرف حب يجدد ...اصلوا لما اتعرفوا بالجيران طلعوا طيبين وناس بلد وقمه فى الاخلاق والانضباط..بس عندهم بتهم شغاله وراتبها مغرى..وكمان جميله ورقيقه..فحب يغير وبدون اسباب..وعامل حسابو لما ينزل الاجازه يخلى العيال شويه فى السودان..وهو ياخد راحتو مع العروس الجديده..


ملحوظه:

هل العروسه منحتوا راتبها او حتى نصفه او القليل منه ؟..ما معروف الحاصل..والنتيجه حا تكون كيف؟ ولا شنو؟...

[بدرالدين أحمد موسى]

هاكم التقيل بقى

واحد من أخوننا المغتربين انتو مابتعرفوه من الأقاليم اشترى قطعة أرض فى الخرطوم و اجتهد كثيرا فى اعمارها . و بالفعل تمكن من انجاز بيت العمر خلال 10 أعوام حرم خلالها نفسه و أسرته من الأجازات و الكثير من مباهج الحياة التى كانت فى متناول يده .

المهم صاحبنا المكلوم جاب والده ووالدته و معاهم أخوه الأصغر من الأقاليم و سكنهم فى بيت العمر . ومع مرور الأيام كبر الأخ الأصغر و تزوج و طبعا صاحبنا قام بى واجب الشيلة و الذى منه , ودارت الأيام و امتلأ البيت بى أولاد الأخ و أصبح لصاحبنا يادوبك منزلة تسعه و أولاده خلال الأجازات و طبعا هى منزلة مؤقته تعود الأمور الى مجاريها مباشرة بعد سفره . و مجاريها دى معناها يرجعوا الجماعة يتوسعوا فيها كما كانوا.

صاحبنا المسكين لازال بيحلم بالعودة و باله مرتاح انه بيته جاهز و مفروش . و فى يوم جاءه اتصال من السودان و دار الحوار التالى :

المتصل : ياولدى والله جيراننا ديل عاوزين يبيعوا بيتهم .
صاحبنا : طيب أهه و أنا مطلوب منى أعمل شنو
المتصل : لازم تعمل المستحيل عشان تشترى البيت ده عشان تكون جمبنا .

تخيلوا هو صاحب البيت و عاوزينه يشترى بيت جارهم عشان يكون جنبهم .

عليكم الله زى النموذج ده ماعندكم ؟؟؟ . عندكم و عندكم النت يلا اتحفونا.

أخوكم بدرالدين

[محمد النور محمد يوسف]

فى ناس عامله فيها ما بتدخل فى خصوصيات الغير لكن فى الحقيقه كلام....وهم متدخلين فى كثير من امورالغير...
ودى اهم نقطه فى الموضوع..عدم التدخل فى خصوصيات الغير ,,وللاسف نحنا كسودانيين فينا الحاجه دى بكثره..





الأخت أميرة
أصدقكي الوقول فيما أفضتي به من حديث إزتفز فيني ذاك الشعور بالحنقة
في أن كثير من الصفات الرديئة في مجتمعنا السوداني توصف بالعفوية ولكني أسميها باهمجية والفوضى
فأنا أرى ان الشخصية السودانية وللاسف تعودت على التدخل في خصوصيات الغير مبررة ذلك بالحنية وغيرها
ولكن من أين يأتي الخلل؟

[الاميره]

الاخ / بدر الدين احمد موسى

الانانيه وحب التملك بيعمى البصيرة ..لدرجه تجعل الاب والام يستوليا على ما يملكه الابناء وحتى الاخوة والاخوات يعملوا نفس الشى..والسبب بسيط..لانو مغترب ومرطب وعايش فى نعيم هم فى رأيهم فاقدينو..والحقيقه المره ما عارفين المقترب دا بيتذلل ويطفح المر عشان يرجع السودان بمستوى يريح اسرتو..


لنا قريبه زوجها فى الغربه امن ليهم بيت..بس عندو اخوانو فى العاصمة..واحد متزوج وآخر يدرس فى الجامعه..


والبيت كبير وفيه دكان كمان..المهم قسمو البيت واجروه..واجروالدكان..وللاسف اخوهم المقترب المسكين بره القسمه دى..لحدى ما الطالب اشتغل وكمان اتزوج..والمنتزوج بنى بيت..يعنى بقوا افلح من المغترب ...وآخرته قاموا اجروا البيت كلو ..ولما المغترب حب يرجع اولادو للاستقرار مالقى بيتو واضطر يرجع بى عيالو من جديد للغربه..

[الاميره]

القصه السادسه


فى نوع غريب الاطوار...الزوج يكون عندو صاحبو وهوواحد من كثيرين من معارفو..


لا من الاهل ولا حتى نسيب...المهم زول...


يزور هذا الصديق ذلك الزوج فى بيتو..تلقى الزوجه قامت بواجبات الضيافه وهى لاحس لها..ومرات تعمل مس كول عشان زوجها يدخل ويأخذ واجبات الضيافه ومرات ترسل صغيرها لينادى على الاب..


لكن..

لما لما يجى طالع يلغى التحيه على المدام ويقيف..ويقيف..وفى الحاله دى يا اما الزوج بذكاوه وسرعة تصرف وبسرعه يفتح الباب لصديقه ويتخارج معاه مونسا ...او يظل واقف!.......وواقف ..او فى نوع من السيدات على طول تجرى وتسلم ...وعلى اى زول دخل عليهم..


ملحوظه:

واقف دى ممكن يكون فيها نوع من الاحراج للشخصين الصديق والزوج..

لان وفى رأى ما ممكن كل زول يدخل البيت ..ست البيت لازم تعمل ليه تشريفه وكمان يشوفها.....ولا شنو

[الاميره]

الأخت أميرة
أصدقكي الوقول فيما أفضتي به من حديث إزتفز فيني ذاك الشعور بالحنقة
في أن كثير من الصفات الرديئة في مجتمعنا السوداني توصف بالعفوية ولكني أسميها باهمجية والفوضى
فأنا أرى ان الشخصية السودانية وللاسف تعودت على التدخل في خصوصيات الغير مبررة ذلك بالحنية وغيرها
ولكن من أين يأتي الخلل؟





الاخ / محمد النور محمد يوسف


انا فى اعتقادى الناس لازم تتعلم وتعى النقطه دى..وهى الخصوصيه...ولازم كمان تحترمها ..وحكاية الحنية دى ذاتها اكبر مشكله جعلت حياة الناس مفعمه بالمشاكل وتسرب الاخبار للغير..


اكيد الخلل فى الناس..التى تتعامل بحنيه..وطيبه..وعندها ثقه فى كل الناس..

[الاميره]

حاواصل واكتب وانتو اقرو ..بس.

[الاميره]

القصه السابعة:


فى حاجه محتاجه لى وقفه وتصحيح..

عند القيام بزياره لبعض المعارف..فى اخر الزيارة والناس واقفه وعايزه تطلع..الونسه بتحلى والمنسى كل يحضر فى اخر لحظه..يكون الازواج ..وقوفا ...فى طرف الباب بالخارج.. والحروم مازلن ..يتونسن..

ملحوظه:

طبعا ما ممكن الواحده تحرج التانيه وتقطع تواصل افكارها..وونستها...بتبقى شينه..

وفى رأى عند الخروج نكتفى بإنهاء اى حوار داخل غرفة الحريم .. ولا نستمر بالحديث ونحنا ماشين لحدى خشم الباب..ومن اى ونسه..ولان ونسة الحريم اصلا ما بتخلص..المفروض نضبط الحته دى صاح ولا شنو...

[الاميره]

القصه الثامنه:

انغام...عندها اسره بغاية الرقة والجمال...والهدوء تربية عز...وربت عيالها على طباهم الهادئه والمهزبه..
بس الراجل مفطوم على قعدات الونسه مع الحروم..وكل مره تلاقيه عن ناس فلانه بت خالتو وعلانه بت جدو..وانسان هميم بيساعد ويجامل كويس خاصه لو وقع فى طريقو واحده شغاله ولوحدها.. ومحرمها للاسف رجع للسودان عشان يكمل اشغالو ويشوف الحال ..واخونا راجل انغام ما مقصر ..توصيل وقضاء حوائج وداخلين خارجين مع بعض..والفتره البقيب فيها الراجل.. بقعدوا معاها قريبها .ومرتوا والحجه القريب ما عندو عربيه...

الحكايه دى خلقت مشاكل لا حد لها بين انغام وراجلها وعندا فيها الراجل ما بطل عمايلوا ومصر انو ما عامل شى غلط..مع ان الشخصيه دى لاعلاقة لها بهم لا من قريب او بعيد..وكل المعرفه انها صاحبة بنت جدو البزوهم عشان يتونس معاهم..
ملاحظه:
طبعا راجل الشخصيه موقفو ما معروف...هل هو مستفيد ماديا وساكت على الاوضاع دى..ولا نايم فى العسل وما جايب خبر ولا حتى عارف من يكون راجل انغام؟ ولا ياربى الحاصل شنو؟...

[ود المطامير]

أميرة المنتدى

والله الحق .. لامست أناملك أوتار جد حسّاسه ومعاشه فى الغربه

وإمور ينفطر لها القلب ويدُمى

واصلى ومتابعين

وفيما بعد ح ندخل معاك بعدّة أمثله إن شاء الله

[ابن المدينة]

من اجل ذلك لابد للشخص من اختصار نفسه بقدر الامكان ويحدد علاقاته في الغربه في اضيق الحدود ( من اتقى الشبهات )بحكم المشهادات والمتابعه للمجتمع السوداني في الغربه تجعل الانسان يتقوقع حول نفسه.

[مايسة]

حاواصل واكتب وانتو اقرو ..بس.


غايتو متابعة جنس متابعة :)

[الجابرابى]

حسن النيه فى امور كثيره تاتى بعواقب وخيمه نتمنى من الله اللطف

[سواااح]

الاميرة ..
عشان كده واقول ذلك من واقع اني مهاجر
ليس لنا علاقات بمن ليس لنا معرفة به من السودان
مع العلم ان التغيرات الاجتماعية هنا اسرع واخطر
ولكن عندما توجد لديك الخلفية خير من ان تكون لا تعرف شيئاً
* مع العلم هناك بعض الاخوة تعرفنا بهم هنا
ولكن وجدناهم خير من الاهل في الاحترام وحفظ الحقوق.

[الاميره]

الأخ/ ود المطامير


المطامير جمع (مطموره) وهى حفره تحفر (زمان )...فى قرانا الحبيبه .. وخيلانا واجدادنا المزارعين ..يطمرون اى يضعون فيها العيش( الذره حق الكسره )..وغيره من الحبوب لفتره من الزمن...ولا ما ياهو المعنى..مداخله كتعريف بهذا اللقب العريق..

لامست أناملك أوتار جد حسّاسه ومعاشه فى الغربه

وإمور ينفطر لها القلب ويدُمى
كل امنياتى ان تصحح من مكتسباتنا الباليه والسازجه حتى تقوى عزيمتنا ونخرج منها..بفوائد تتيح لنا ان بقى فى العمر بقيه مواصلة باقى مشوار الحياة صحيحا..

وضعت هذه الامثله للوقوف عليها ومعالجتها بقدر الامكان.... ان كان فى... هذا القدر لدى الكثيرون

[الاميره]

من اجل ذلك لابد للشخص من اختصار نفسه بقدر الامكان ويحدد علاقاته في الغربه في اضيق الحدود ( من اتقى الشبهات )بحكم المشهادات والمتابعه للمجتمع السوداني في الغربه تجعل الانسان يتقوقع حول نفسه.




الأخ/ ابن المدينه



اتمنى الا اكون اقعتك فى شباك الاسقاط النفسى السىء..



هنا فى تغيير لمكتسبات ...ووقفه مع النفس لترى اى مجتمع تعايشه وتتعايش معه ...وتصحيح سبل ..لتكون طريق معبد لحياة سليمه..

[الاميره]

غايتو متابعة جنس متابعه

العزيزه/ ميسو
مساك الله بالخير وجمعه سعيده..

سعيده باهتمامك ومتابعتك..

وياريت يكون عندك ملاحظات محتاجه وقفه وتصحيح... لنستفيد ونغير..

[الاميره]

القصه العاشره:

التايه من النوع البحب اتبوبر كتير...واصلها ما بتحب واحده تكون احسن منها ..كل ما تمشى لى ناس وتلاقى فى بيتهم شى ملفت للنظر لازم تجرى السوق وتشترى...

وكمان لازم تفرض شخصيتها وتقود الكل ..ولو لقت ليك كلام بخالفها .طوالى مابلزمها ناس فلانه ديل.وتطلع فيهم مية عيب...والعجيب زوجها ماشى فى هواها..الاتكون مرضتو هو كمان ولا شنو؟

[الاميره]

القصه الحادية عشر:


ونواصل فى البوبار ..

السره وصويحباتها...اختلاف اجتماعى ومادى...لكن فى الغربه مافى الاختلاف دا..كلو واحد..مادام فى فلوس ...

السره زوجها مرتبه بقضى الشهر بالعافيه ..ولكن البريستيج الاجتماعى ..لازم ..كل ما فلانه صاحبتها تغير فى الديكور هى لازم والبقيه يكونّ مثلها...
لو اشترت اسره من الحجم الكبير ومع ان هذه الاسرة (دبل بيد)ارى ان الكثير يتفاخرن بوجودها كنوع من الفخامه...وهى اساسا للنوم..او لغرف الضيوف.كلهن يشترن متلها..ولو اشترت طقم عده هن لازم يشترن ..ولو كثيره...

ملحوظه:
المثل بقول ياخواتى ..مد رجليك على قدر لحافك...والعين صحى ما بملاها الا التراب..

والمفروض المرة تاخد وقفه مع نفسها والبتعمل فيهو..ولا حتى زوجها يوقفها بالاقناع وعدم المجاراة..والبيمشى مع المظاهر بندفن قبلو فى الغربه دى...

العين الضيقه دى ما ليها حد ولا بتنقهر.. الا نقهرا بالقناعة..ممكن نجدد الشىء التالف وبعد كل فترات...و نغير كنوع من تغيير الروتين والتجديد لكن على طول تكديس ولمليم كل شىء معروض فى السوق..كلام ما منطقى حتى شكل البيت ما بظهر جمالو..

وكمان فى نوع ما بحب يرمى الاغراض القديمه او حتى يتبرع بيها للجمعيات الخيريه فى الغربه كثيره.او يعطها لى زول محتاج..

وتلقى البيت كلو كراتين وصناديق حديد..التقول الناس راحلا هسع دى...ولا شنو

[الاميره]

القصه الثانية عشر:

فى الغربه تتوفر مقومات كثيره وكماليات تجعل الحياة سهلة ومستوى لرفاهيه مناسب...

ومن هذه الكماليات هذا الكمبيوتر وهذا النت..جعل التواصل مع الاهل اقرب للواقع المعاش واصبحنا نشوفهم ونطمن عليهم فى كل انحاء العالم ...وليس فقط فى السودان..انواع كثيرة من وسائل المشاهدة يطرح فى الاسواق..

وفى عالم النت..مواقع ومنتديات ..يستفاد منها فى شتى المجالات... وحققيقه..وفى الغربه وجوده مهم لثقل الثقافة وتغيير الكثير من السلوكيات والمعتقدات الباليه..فقط...هنالك نقطه محتاجه لوقفه جاده وصادقه..وتغيير واعى ..للفكر المهزوم...

كلتوم انسانه بسيطه .كل مره بتشوف جارتها فاتحه الكمبيوتر.وحب الاستطلاع .؟؟سألتها ..واجابتها الجاره وعرفتها وكانت الونسه فى اليوم داك بين صفحات النت...

بعد ايام جاتها راجعه بفكر وهو ليس تفكير كلتوم فقط.. بل يتلبس الكثيرين داخل المنتديات...وهو ان البتفتح النت ما عندها شغله...والبتتونس وتكتب فى المنتديات اى كانت عانس ولا مطلقه او ارمله او زوجه..كل يبحث على اهواءه وما يشبع نواقصه...وتتكلم مع الكل..



ملحوظه:

فى رأى ليس بعيب ان تكون حواء لها وجود فى المنتديات...وحزنت جدا لما وجدت فى المجتمع فئه بتفكر بالاسلوب دا..وللاسف فى كثيرون لا يتيحون لاخواتهم وزوجاتهم فرصة اظهار فكرهم واخراج كنوز دفينه فيهن..وصحيح فى الصالح وفى الطالح..لكن هنلك قوانين تحكم المنتدياتوتلزم الناس بالاخلاق....واعتقد وفى رأى برضو اخراج الافكار والتجارب نوع م عمل المعروف والذى نستطيع ان نغيره بأضعف الايمان..وهو الكتابه..مادام ه متاحه وفى متناول الايد...وفى المنتديات تغيير لكثير من السسلوكيات الكان الواحده مننا متمسكه بيها وبتشوف انها.. بيها هى احسن من كل الناس..والكل يكتب فى الموضوع البيوجد نفسه فيه والكل يحاوره ليخرج بفكر واكثر قوة ووعى يعينه لينظر للحياة بمنظار يرى من خلاله ابعاد طريقه فى الحياة...

زمن عهد الرسالة كانت ام المؤمنين تدرس للناس من وراء حجاب..رجالا ونساء..
ما الضير اذا لو تحاورت ..حواء اختك او زوجتك وبكل ادب واحترام مع الكل..

الكثيرات يدخلن باسماء مستعارة حفاظا لاشياء كثيره وهذا من حق الكل..ولكن...

ولكن لما تسنح الفرصه لاحد الافراد حواء او ادم ويعرف او يكتشف الاسم الحقيقى .تجد اول هام التلفونات اشتغلت..وعرفت الماعرف...وبكل سذاجه وعدم وعى يتجرا ويكتب الحقيقه عبر الاثير..طيب...ما فى ملف خاص..وفى بريد يحمل معلومات صاحبالاشتراك كل ذلك يوضح معلومات الشخص..وما محتاج الاعضاء تفتش وراه ولا شنو..

وحقيقى كلما كتبنا وعصرنا وعملنا عقلنا لنخرج ما فيه تصح نفوسنا وارواحنا...

واعتقد من يسىء لاى انثى تدخل المنتديات يسقط عيوبه..هو شخصيا او هى شخصيا..على حد سواء...فى الاخرين...ولا شنو؟..

[عوض صقير]

محاضرة أروع ما يكون


أختنا الأميرة


متابعين ومستمتعين بهذا القلم الهادف

[مايسة]

العزيزه/ ميسو
مساك الله بالخير وجمعه سعيده..

سعيده باهتمامك ومتابعتك..

وياريت يكون عندك ملاحظات محتاجه وقفه وتصحيح... لنستفيد ونغير..


تسلمي الاميرة

صراحة كلامك كلو في محلو - وتقريبا حالات عايشنها


لو ما كل يوم - بتمر علينا بين فترة وفترة
واصلي ومتابعين معاك - وحا نجيك :)

[الاميره]

القصه الخامسة عشر:

حنينه وضعت مولودها..والكل سعيد بالضيف الجديد..

والاهل والمعارف كلهم زائرين لحنينه..

حنينه يادوب ليها ثلاثه او اربعة ايام واضعه..

واكيد ما كل شويه يدخل عليها ضيف مع زوجته تستطسع ان تقف او تجلس حتى تتقبل التهانى..

ملحوظه:

اكيد نحنا كسودانيين فينا سممة الطيبه الذايده.والبساطه فى التعامل..ويقفل علينا ابسط الامور.

وفى رأى ..الزيارات الاسريه لغير الاهل والاقريبن..واقصد الاصدقاء والمعارف..المفروض فى المناسبات دى ..الزوج يكتفى بتقديم التهنئه لزوج حنينه..ويبارك ويدعو بما تجود به نفسه من دعوات..اما الزوجه فى فقط من تدخل على حنينهوتقوم بالواجب على اكمل وجه..

يعنى لازم حنينه منتكيه)او بصعوبه تقوم عشان تقابل راجل عشان يبارك..كفايه انو وصل وقدم تبريكاته للزوج.ولا شنو النظام؟..

علينا ان نغير شى بسيط من تصرفاتنا وافتكرها خطوه نحو الاحسن ..ولا شنو...

[الاميره]

قالوا غيروا الاستايل واخترت موبايلى

وياها دى النتيجه..وللاسف ما قادره اطلع واغير الاستايل كل مربعات الحوار فيه عير موجوده..

اعمل شنو ؟

[الاميره]

القصه السادسة عشر:

هنونه عندها عيال يادوبك فى اول مرهم عيال اخر شقاوه..

وعدوله كمان ساكنه فى العماره المقابله ليهم.. وتعرفت على هنونه..

وكل ما تحصل لعيالها مشكله صحيه تجرى وتتصل على هنونه..

هنونه حسب درايتها البسيطه وفهمها ..

بتختصر الطريق امام عدوله وتقول ليه لازم دكتور..

لازم متخصص..وتحاول تشرح ليها ان الامراض مهما اتشابهت الا ان علاجها قد يختلف وهى لا تستطيع منحها وصفة دواء اوحتى جرعه لولدها..فما كان من عدوله الا ..ان نبشتها للجاراتها..ونعتتها بالمتعجرفه والمتكبره.

ملحوظه:

يعنى الواحده لما تشوف عيال جارتها مرضهم قليل وحيويين..لازم تعطى عيالها من نفس الادويه البستعملوهااولاد الجاره؟ !!ولا شنو؟..
وفى كمان حاجه لما النسوان يتلمن كل واحده تعطى وصفات لفلانه وعلانه..لان هذه الوصفات الطبيه نفعت فى علاج كذا وكذا..وللاسف الكثير بسمع نصايح الاخريات ويستعملن تلك الادويه..وافتكر هنونه مش متكبره بقدر ما هى مسئوله من تصرفها واقوالها..ولا شنو؟

[الاميره]

القصه السابعة عشر:
ناس هيفاء ليهم اجتماعيات كثيره وجميله..وهيفاء واسرتها ساكنيين فى بيت كلو غرفتين وصاله..وما عندها مانع خميس وجمعه تنسق مع بعض قريباتها للمبيت مع انو المشوار من هنا لى هنا كله ربع ساعه اوتلت ساعه او عشره دقايق..حسب البيوت..
ملحوظه:
طبعا الغربه دى هى فعلا زى السجن ..لكن ممكن نكسر قضبان السجن بالترفيه المباح والمعتدل..والمغالاة فى اشياء كثيره قد تكون مضره..
يعنى المبيت فى بيت ناس هيفاء بالطريقه دى جايز وجادى ؟!..
طبعا ما ممكن..والمفروض الناس ترفه لاخر ساعه وترجع بيتها ..يعنى خلاص بقى النوم مشكله .لحدى ما تضيق على الناس ..ولا المحنه ما تكمل الا بالمبيت فى الضيق..ولا شنوالنظام...

[الاميره]

القصه الثامنة عشر:

بيت ناس عيوش كمان صغير غرفتين وصاله..وطبعا اهلنا السودانيين حنان وطيبه مكمله.مافى شك..الواحد يرسل لى اخوه او اخو زوجته..
ولما يوصل بالسلامه اكيد وطبيعى ينزل معاهم فى البيت لحين ما تتيسر الاحوال..
وتيسر الحال والجماعه ما معرف ضاربين طناش ولا ماعارفين ايه النظام والا الحاصل شنو؟
المفروض يمشوا يسكنوا مع عزابه..وطبعا متوفره وكثيره..
عشان يتعودوا على تحمل المسؤليه ويقدرو يفهموا الحياةصاح لحدى ما يجيبو زوجاتهم او يتزوجوا..وفى نهاية الاسبوع تتلم الاسرة ..ولا شنو؟

[الاميره]

عشان كده واقول ذلك من واقع اني مهاجر
ليس لنا علاقات بمن ليس لنا معرفة به من السودان
مع العلم ان التغيرات الاجتماعية هنا اسرع واخطر
ولكن عندما توجد لديك الخلفية خير من ان تكون لا تعرف شيئاً
* مع العلم هناك بعض الاخوة تعرفنا بهم هنا
ولكن وجدناهم خير من الاهل في الاحترام وحفظ الحقوق.


الاخ/ سواح

كلام جميل
فى الغربه فى وفى..فى علاقات انسانيه بين اخوه فى الله لا تربطهم صله غير انهم سودانيين ولكن اصلهم واخلاقهم وتعاملهم معك احسن من الاهل ..ورب اخ لم تلده امك)
اتعرفت على دكتوره فى ملاهى مع صغيرتها.وكان بينا حوار وفى الكلام قلت ليها اهو كلنا من السودان..قالت لى اهو دا الكلام المابنفع زاتو!!؟...
اخذت من كلامها وقفه وتاملت الوضع .وقلت الصغار ديل ذنبهم شنو ما يشوفوا ليهم سودانيين ويعرفوا اللهجه العاميه ويكتسبوا خبرات عن واقعنا..ولاشنو

[الاميره]

القصه العشرين:
صورة ترسل او شريط قيديو..لتختار كلتوم عريس المستقبل المغترب...
وهو مغترب.التقول المغترب دا مل غارون مالى خزنتو..
صوره قد تكون قديمه لا تظهر الواقع..
وتجى العروس طرد...وما اكثر الطرود ..قد تكون زواجه بطيخه قرعا او تطلع حمرا..المهم اثنين ما بعرفو بعض واتلموا..المصيبه كلتوم لقتو كبير واشيب بالرقم من انه دكتور ...ولكنها عدلت فيه عشان تشوفوا صغير ..اشى صبغه واشى رياضه ورجيم..
لكنها بتعاين ...عدم القناعه بالواقع شىء مؤسف..
تعاين وتتونس بجرأةوبحركاتهادى كرهت وخوفت منها بهانه...
اصل بهانه شايفاها وفهمتها..معاها مسكينه وضلها ميت..ومن ما تشوف راجل بهانه داخل تعلى الساون وتضحك وتدخل وتطلع..ولو طلب كباية مويه تكبها وما باقى ليها الا تشربوليها ..
بالرقم من رحول ناس بهانه الا انها مصره تعرف بيتم وين وبالفعل وصلت .
ملحوظه:
الواحده عايزه تعرس وتسافر طرد ولا يعرفو كل الحقائق عن العريس ولا يهم غيرالسفر لبلد يتفاخرو بيه بتنا فى ..........المهم..اتخلصوا من فرده متقله فى الميزانيه المنزليه شويه..
وتكون الطامه الكبرى عدم اتزان وقناعه..ولا شنو

[مايسة]

القصه الثامنة عشر:

بيت ناس عيوش كمان صغير غرفتين وصاله..وطبعا اهلنا السودانيين حنان وطيبه مكمله.مافى شك..الواحد يرسل لى اخوه او اخو زوجته..
ولما يوصل بالسلامه اكيد وطبيعى ينزل معاهم فى البيت لحين ما تتيسر الاحوال..
وتيسر الحال والجماعه ما معرف ضاربين طناش ولا ماعارفين ايه النظام والا الحاصل شنو؟
المفروض يمشوا يسكنوا مع عزابه..وطبعا متوفره وكثيره..
عشان يتعودوا على تحمل المسؤليه ويقدرو يفهموا الحياةصاح لحدى ما يجيبو زوجاتهم او يتزوجوا..وفى نهاية الاسبوع تتلم الاسرة ..ولا شنو؟


ههههههههه

عاد دي كتيرة كترة - ويخلو الترطيبة وين يا الاميرة

ويخلو الحاجات الحلوة والعيشة الرقدة وين - يعني بس يعرفونا كيف احنا سودانيين - لو ما عملنا كدا :(


ولو كشرتي وشك - ولا علقتي - يقولو ليك ما بتحبي اهلي او العكس - :)

[الاميره]

القصه العشرين:
حكايه
حليمه جارة ام خلف سنه وبعدها رحلت الىداخل الحى...وسكنت حليمه فى نفس العماره الفيها مسره زوجة الاستاذ
طبعا الغربه بتخل الازواج يتعارفو بزملائهم وجيرانهم فىالحى.ومجبورات النسوان يجاملن ويصاحبن نسوان اصحاب رجالهم..
الاستاذ عمل حادث ووق معاه ابو خلف فى المشفى.وطلب من ام خلف تمشى تكفر لزوجة الاستاذ..وبعد اسبوع اتصل ابوخلف بالاستاذ وعرف انوفى البيت لمة حريم وممكن ام خلف تنضم ليهن..
وكانت ام خلف فى بيت حليمه يحضرو بعض الاغراض لزوم سهرة النسوان..
ودخلت فى هرج وصراخ وضحكاتالجميع..وسلمت عليهن وجلست وساد الهدوء ...واحده من النسوان كانت داخل ورجعتللنسوان..رقيه: اها كملن لى باقى قصة ام خلف وصلتو وين..وساد الوجوم.وسالتها ست النفر الاخت من وين
ام خلف سكنه فى اول الشارع..وتفحصها الكل بتعجب.فقالت كلتوم: شكلك ما مالوف اول مره نشوفك..
واحدهاسمها
سعاد: ولا فى الحديقة دى ما شفتك
ودت ام خلف اصلو الحديقة دى زحمه فبنطر نمشى حديقة الحى .....اصلها مسوره ولبها كثيره...
رقيه: واسمك منو..بخبث ردت ام خلف اسمى رحاب.
مريم انتى شغاله ولا شنواصلو بعرف الناس والسودانييم من اول الشارع للاخر الحى..
ولا شغاله ولا شىء..اهوفى البيت والعيال ودوشة المدارس
رقيه باينها ملك القعده اصلها زوجة فنى المختبر ومسمينها زوجة الدكتور.اصلو كل من هب ودب فى البلد دى مدنو لقب يعيشو طاووس زمانو؟؟
ست النفر:انتى يارقيه حليمه ماقالت عليها دمها تقيل ومابتتعاشر.ورجع الجميع للضحك والونسه المقطوعه.
مريم: والله راجلى مجننى ..ابوخلف ابوخلف .وفال لى النمشى نزورهم فى البيت..لكن انتوطممتوا بطنى وهى ناقصه تلامه ودم تقيل اخير لى ونستكن دى..
رقيه:ومسرها زارتها لقتا تطقطق فى ملايلتها بالمكنه..ماكان احسن ليها الجاهز بدل كسرةالضهر والتعب..
ام خلف تدخل فى الحوار: ما يمكن عندها هوايه..وبتحب تبدع فى مملكتها
مريم: عليك الله هوايات شنو وابداع شنو واحده دلمه ومسيخه بتعمل شى سمح؟
ام خلف:انتىقلتى ماشفتيها ولا زرتيها بتحكمى عليها كيف؟
والله الشافو قبلى عرفو احسن منى
ام خلف بس كل زول بيعيش تجربتو ويمكن تشوفى فيها الماقدرو يشوفوه
ام خلف :مايمكن ام خلف دى ما بتحب تدخل فى الخصوصيات وليها بالعام
سعادوالله انا زاتى زوجى يمدح فى ابوخلف لكن حليمه دى سكنت جارتها سنه ماشافت منها مايسر ويبسط
هديه:انا شفت ابوخلف دا فى المشفى يوم الحادث.والله شباب وياين عليهو ظريفونى..
مريم :ماشفتى عربيتو كاسره فى زوجى كسر وقال لازم يشترى زيها..
هديه اى والله بوبار وفك زرار
ام خلف : يعنى العندو عربيه كبيره وسمحه بتبوبر
مريم :مالو مابتبور ويشوف نفسو اعلى من الناس..طغى على قول مسره..
ام خلف :
ياجماعه انتو شانين كروهيه وحرب على ناس ابوخلف وانتو ماشفتوهم والله اسمحو لى اقول ليكم كده ماجاى الكلام دا
رقيه:هى يا حريم هى كدى اقيفن.انتى بتعرف ام خلف ولاشنو؟
ام خلف : لابعرفها ولا شفتها بس انا ما معاكنفى الكلام مع انى ضيفه وجديده فى اللمه دى.وونستكن ظريفه كلها فرفشف(نوع من البكش) لكن مابحب احكم على الناس بدون ما اعايشهم واعرف طباعهم ..وبعدين ساعة رجالكم بحترموا ابوخلف كان تجاملوهم وتشوفوا الحاصل شنو مايمكن الصورة تطلع حلوه..
يامى خليا النشوف حليمه ومسره ديل اتاخرن مالن..وتتصل عليهن وتعرف انو زوج حليمه طلب منها تلبس العيال عشان يمشوا الحديقه.
رقيه وفلانه وعلانه من منطقه واحده وعلانه مسافره نهائى بعد ماسفرت عفشها..ام خلف والله كويس انكم قررتم ترجعوا اصلو الغربه مابتندار..
علانه: والله خلاص مالينا قعاد هنا
ام خلف ان شاء الله عملتو بيت
علانه اصلونسيبتى قسمت لينا البيت وسورتو..
ام خلف..وزوجك مستقر وعندو مصدر دخل.
والله نحنا عشمانين يقسمو الورثه ونعمل لينا مشروع ان شاء الله بقاله..
تتتصل مريم على مشره شنو يعنى نقوم نمشى .
ويعرف الجميع انو خلاص الجماعه حاينزلو..
تتصل ام خلف بابو خلف وهو قريب من البيت وتطلب منالحضور عشان ترجع البيت..
ابو خلف خلاص دقيقتين وكون جنب الباب ..
ام خلف خلاص دقيقتي وبنزل
ربيعه ودى اول مره تفتح خشمها وتتكلم .مالسه بدرى استنى ناس مسره.
ام خلف:اااى بسلم عليهم وبجى مره تانى
سعاد :ياختى ساعة اتعارفنا ايقى اتلمى معانا نحنا كل اسبوع فى بيت زول..
ام خلف : ماعندى مانع.وانتوكلكم تعالو زورونى ..البيت بيتكم..
وتنزل ام خلف وتلاقى مسره وحليمه..طالعات السلم وضحك وونسه مابعدها..ويسلمن على ام خلف وتعتزر ام خلف بان ابوخلف مستعجل..بس تقول لهن
ام خلف :والله لمتكم حلوه جد والواحد اتعلم منها الكتير.
وتضحك مسره وترد ليها تعالى المره الجايه بدرى اصلو الونسه معاهن صحى حلوه.تنظرليهن ام خلف بغيظ وتتبرم وتواصل نزولها..

ملحوظه

دا حال كثييييير من اخواتنا فى الغربه..اصلو القفله والنوم الكثير عمل ليهن انفصام فى الشخصيه معاها قلة قيمه..ولاشنو
ومن سنة 2006 وحتى هذة اللحظه ام خلف مابتعرف عن التيم ولا اى خبر..ليها حق ولا شنو..

[بنت الرفاعي]

القصه الحادية عشر:




ونواصل فى البوبار ..


السره وصويحباتها...اختلاف اجتماعى ومادى...لكن فى الغربه مافى الاختلاف دا..كلو واحد..مادام فى فلوس ...


السره زوجها مرتبه بقضى الشهر بالعافيه ..ولكن البريستيج الاجتماعى ..لازم ..كل ما فلانه صاحبتها تغير فى الديكور هى لازم والبقيه يكونّ مثلها...
لو اشترت اسره من الحجم الكبير ومع ان هذه الاسرة (دبل بيد)ارى ان الكثير يتفاخرن بوجودها كنوع من الفخامه...وهى اساسا للنوم..او لغرف الضيوف.كلهن يشترن متلها..ولو اشترت طقم عده هن لازم يشترن ..ولو كثيره...


ملحوظه:
المثل بقول ياخواتى ..مد رجليك على قدر لحافك...والعين صحى ما بملاها الا التراب..


والمفروض المرة تاخد وقفه مع نفسها والبتعمل فيهو..ولا حتى زوجها يوقفها بالاقناع وعدم المجاراة..والبيمشى مع المظاهر بندفن قبلو فى الغربه دى...


العين الضيقه دى ما ليها حد ولا بتنقهر.. الا نقهرا بالقناعة..ممكن نجدد الشىء التالف وبعد كل فترات...و نغير كنوع من تغيير الروتين والتجديد لكن على طول تكديس ولمليم كل شىء معروض فى السوق..كلام ما منطقى حتى شكل البيت ما بظهر جمالو..







المؤسف أنو البعض بيعيش في بلاد الغربة، وكأن البلد بلدُه، فينسى ما ينتظره في بلاده، ويكون قضّاها بوبار طول السنة، مُتناسي أنو في يوم من الأيام حيرجع لوطنه، وحيكون محتاج لبيت لأبنائه، فالمغترب مفروض يوازن بمعنى أنو يعيش حياته عادي في بلاد الغربة، لكن يحسب حسابه للمستقبل المجهول، وكمان ما يقترها على نفسه، فيكون لا عاش في الغربة ولا في الوطن!!

[الاميره]

عاد دي كتيرة كترة - ويخلو الترطيبة وين يا الاميرة

ويخلو الحاجات الحلوة والعيشة الرقدة وين - يعني بس يعرفونا كيف احنا سودانيين - لو ما عملنا كدا


ولو كشرتي وشك - ولا علقتي - يقولو ليك ما بتحبي اهلي او العكس -


مساك الله بالخير ميسو
كلامك صحيح ..بس فى نقطه مهمه وهى ادارة الحوار الجاد والصادق بعيد عن المجامله
وحتىلو الناس مااقتنعت..تكون وجهة نظر طرحت..ولا شنو..

[الاميره]

المؤسف أنو البعض بيعيش في بلاد الغربة، وكأن البلد بلدُه، فينسى ما ينتظره في بلاده، ويكون قضّاها بوبار طول السنة، مُتناسي أنو في يوم من الأيام حيرجع لوطنه، وحيكون محتاج لبيت لأبنائه، فالمغترب مفروض يوازن بمعنى أنو يعيش حياته عادي في بلاد الغربة، لكن يحسب حسابه للمستقبل المجهول، وكمان ما يقترها على نفسه، فيكون لا عاش في الغربة ولا في الوطن!!



مساك الله بالخير مرام بالانقليزى

كلامك دا زى القصه الواحد والعشرين:
كريم وزوجته من اكثر الناس بوبار ..كل اجازة لو ما فى السودان فى دبى ومره سوريا ومره ........و
وغير البوبار بتاع زوجته حنو..اخر صيحة ثياب وموضات فى الذهب...والاكل .ديليفرى ..ومطاعم .واخر ترطيبه.ومفتكرها دايمه..ولو سألت الزوجه عن البيت فى السودان..المفاجأه ماعندهم حتى قطعة ارض...
ملحوظه

موضع ذى دا فلوس بدل ما تذهب فى اضعف الايمان قطعة ارض بدل بيت..تذهب فى رفاهيه زايله وتصبح ذكرى ..ولاشنو
والمصيبه الشقه مانحاها ليهم الشركه..يعنى..لوانفنش من الشقل حايسيب الشقه الفارهه دى..لغيرو واحتمال كبير ما يدوه مستحقات نهاية الخدمة..وتبقى عليه مقولة المثل بوبار وخراب ديار..

[الاميره]

القصه الثانيه والعشرون:
هنا فى الغربه اسر مقيمه بعشرات السنين .حتى اولادهم كبروا وعاشوا متغربين .والسودان دا عندهم فقط زيارة ضيف ويرجعوا..
نادين جاها عريس..ود قبايل وعاش عمرو وحياتو كلها فى السودان .واغترب وكون نفسه..وعايز يستقر..واختار بت العز واكل الدجاج..
وطبعا بقت موضه عرس واحده مغتربه لا تكلفك إقامه ولا تكلفك حفلات بالملاييين ذى فى السودان..ويتم الزواج
وبعد سنه الوضع يبقى ماشى بالشقلوب ولا تفاهم ولا درايه باى شىء..والطامه الكبرى يبدأء عى حضور الزوار احباب الله(الاطفال) ويرزقوا باول مولود..وتبداء التعاسه لما تتكشف الامور للطرفين انهم مافى شى لاميهم على بعض لاقيم ولا موروث حضارى وثقافى اسمو السودان الا الاسم وبس..والكارثه تتفاقم ويكون الطلاق..

ملحوظه:

يعنى لو مشى الشودان واختارها بنفسو وعايش كل الاحاسيس السودانيه مش كان ارحم .ولا طيارة عين..ولا شنو..

[الاميره]

القصه الثالثة والعشرين:
حاح البخيت عندو تلاته بنات واحده قطرها صفر من زمان والتانيه عرسوها وطلقوها ورجعت بيتهم والتالته اتخرجت من الجامعه وانضمت للفريق البايركس..والام قصتا قصه..شايفه حجمها القليل دا وممنجه رويحتا للاخر حنن..وشعر مسبسب..وعطور اخر فوحان...
والظاهر والله اعلم اتفقت مع ابو البنات يصطادوا ليهم عرسان لبناتهم ..ولو..ولو راجل مره..ما المهم ضل راجل ولا ضل حيطه...

وبدأ مسلسل حاج البخيت فى الظهور لم بقى يتصيد الشباب فى الجامع او فو المخبز او فى البقاله..وأخر ظرف وبشاشه...مع جاد المولى وهو نتزوج وله تلاثه عيال صغار السن...
وكانت زياره منوا والاسره ..احاج البخيت ما الغربه بتخلى الناس تتعارف لله فى لله..وام البنات ما صدقت مسكت طرف الشارع ..وكل يومين تلاته ماخدى البنت الصغرى الجامعيه وآخر قشره على بيت ناس جادو..ومرة جاد المسكينه طاشه فى عالم تانى ..ضيافه وفرحانه بالمعارف الجداد..وما لاحظت انهم ونستهم وجيتهم الا وقت ما يرجع جاد من الشغل ..موقتين صاح..والعجب لما يدخل جاد .اخر كبكبه وونسه وفرفشه معاه..اصلهم عرفو بيت القصيد فى المره المسكينه ....وعرفوا مداخل لى جاد..
ومرة الايام وجاد يفكر فى الراجل الاختفى وفكى حريموا عليهم لحدى ما فهم القصه..
وبقى يتهرب منهم..واصبح الكثير من اهل الحى بتهرب منهم..
اصلو ضل راجل ولا ضل حيطه ..وسايره الايام دى قصة راجل المره حلو حلا..ولاشنو

[الاميره]

القصه الرابعة والعشرون:
اصلو الظاهره مابتبقى ظاهره .الا لما تظهر فى الشارع العام..
كارات كارات النسوان فى محلات واسواق اكثر شى فى منطقة قبيرا ومنفوحه
كميات وبجن ومعاهن راجل واحد قاطرن..لا تعرفو جاء لوحدو .لا تعرفو جاء معاهن..ولامعروف تبع منو فيهن..واحد وقف بره المحل مربع ايديهو وراء ظهره ومنتظر كشة الحريم تطلع.وخشمو عندو وعاين بس..
المهم
طريقة الشرا :ياود اعمى دا كلام شنو دا ماتقول كلام غير دا..طبعا مفاصلات اسعار)اهاياالاخو نشيل ولانمشى لغيرك..طيب مالسوق كبير وملان ..من سكات امشى شوفى مكان احسن الا اللسان ..والاصوات لعلعه فى السما..وواحده تقول للتانيه :كدى ارح نشوف فلان داك ببايعنا كويس..
والتكشف والحنن ماتديك الدرب وكمان فى المعطرات بالعطور السودانيه..والموبايلات شغاله .::اها ياحاج خلاص قربنا نخلص ماجايين شتو ياخ ..وطريقة تفاهم وسط السوق تعرفه من بعد مليون ميل دى سودانيه..
ملحوظه
يعنى فيها شنو لو الزوج اخذ زوجته والعيال ومشو اتسوقوا مع بعض.وبى منتهى الهدوء والسرعه تختار اغراضها وتتخارج
مش احس من كشف الحال دا..ولا الراجل زاتو ماعارف الحاصل شنو..ولاشنو..