ثلاث سنوات تجربة وزاد في عالم المنتديات [الأرشيف]

عثمان جلالة

09-07-2010, 11:53 PM

كانت علاقتي بالعالم الاسفيري أو الانترنت ايها السادة الكرام .. قبل هذا التاريخ أواخر يونيو من العام 2007م .. ... تعتمد فقط على المشاهدة أو الاطلاع بشكل عام سواءا أكان هذا الإطلاع لصحف يومية أو منتديات تسبقها سمعتها وسودانية خالصة مثل سودانيز أون لاين والراكوبة وغيرها.

لم تكن لدي أي نيه للمشاركة في منتديات .. لعدم وجود وقت كافي .. ولأن المواضيع المطروحة كانت تطرح وتعالج مشاكل عامة أو مشاكل لمناطق كثيرة في وطننا الكبير السودان ... نعم الوطن يهمنا جميعا .. ولكن كما يقول اهلنا في أمثلتهم أن "الجمره تحرق الواطيها" عادة ... لذلك كنت أنا من المحروقين بجمرة التهميش الذي تعاني منه جزيرة العطاء .. و ودمدني أم المدائن .. وإنزعجت بشدة .. لموضوع طرح في سودانيز أون لاين .. يتناول أهل الجزيرة بشيء من السخرية ... وأن أهم اسباب تهميشهم من قبل الدولة أتى لأنهم استكانوا لهذا التهميش.

حاولت وقتها أن أشترك في هذه المنتديات .. وعلمت لاحقاً أن عملية التسجيل تأخد وقتا طويلا ... وفكرت لابد أن يكون هنالك منتدى باسم الجزيرة أو ود مدني يعبر عن أهل المنطقة أو الولاية ... لأن كل شرارت الحركة الثقافية .. والسياسية والفنيه في السودان أنطلقت من ود مدني ومن الجزيرة ... فقمت بالبحث في محرك قوقل ... وجاءت النتيجة .. منتديات ود مدني دوت كوم .. قمت بعملية التسجيل .. ثم إنتظرت ليومين ثم جاءتني الرسالة .. تم قبولك كـ عضو بمنتديات ود مدني .. وقد كان تسجيلي باسم جلالة أو عثمان جلالة .. لأن الكثيرين ممن درست معهم في المرحلة الثانوية والجامعية تحديدا يعرفوني بهذا الاسم.

عثمان جلالة

10-07-2010, 12:12 AM

بعد قبولي كـ عضو في المنتدى .. دخلت إلى المنتدى وفي أول صفحة وجدتها .. "المنتدى العام" .. ذهبت إلى موضوع جديد .. وكتبت أولى مشاركاتي وكانت بعنوان "من الرياض المملكة العربية السعودية" .. وكانت تتضمن سعادتي بأنضمامي لكوكبة منتديات ود مدني .. وشكري للإدارة ورجائي بالترحيب بي .. بعد مشاركتي بخمس دقائق .. ردت علي مدنيه ... أهلا ومرحبا بك .. وهكذا .. أحسست بسعادة كبيرة كوني محل ترحيب في هذا الصرح.:)

ثم دخلت في اليوم الثاني لأجد رسالة من "مدناوي" ... وهو يحمل شنطته المعروفة :o ... وكان نص الرسالة أهلا ومرحبا بك في منتديات ود مدني .. ونفيدكم بأن موضوعك بعنوان "....." قد تم نقله لمنتدى المناسبات والترحيب لأنه المنتدى المناسب ... ولك العتبى حتى ترضى :p ... طبعن أكتر حاجه زعلتني كلمة لك العتبى حتى ترضى دي ههههههههه :confused:يعني الواحد من الأول دخل غلط .. المهم رديت على حبيبنا مدناوي .. بما معناه .. أعملوا البتشوفوهو مناسب ونحنا من إيدكم دي لـ دي.

ما رجعت لموضوعي تاني .. لأنو أصلا ما عرفت درب المناسبات بـ وين ... كنت بفتح المنتدى ع العام .. وبتصفح وبقفلوا على كده.

ولا أنسى أحد البوستات التي كانت بقلم ضياء الدين "الفارس البنفسجي" والتي تشرح كيفية تصفح المنتديات .. وبوست بقلم أنيس التوم يشرح كيف تفعل موضوعك ، وكيف ترد على المشاركين .. عندها فهمت أن ما يطرحه العضو من مواضيع يجب أن يراجعه العضو ويرد على مشاركات الآخرين .. ويناقشهم ويتفاعل معهم .. وكأنهم ضيوف .. تحرص على خدمتهم واحترامهم .. وعندها عرفت أن المنتديات بيتك .. وأن البوست غرفتك .. التي تسع للجميع ردا .. وودا .. وتسامحا واحترامنا ونقاشا هادفا.

عثمان جلالة

10-07-2010, 12:26 AM

كان أكثر المواضيع ... ردودا .. ومداخلات في ذلك الوقت .. موضوع لـ مدنيه بعنوان "إنتو يا المغتربين بري منكم" موضوع شهد تداخلا من الجميع لما يحمله من طابع شيق وفكاهي .. ويعالج واقع المغتربين ومن يعيش في السودان على صيغة منلوج "حوار بين بنت المدينة وبنت القريه" والذي كنا نسمعه صغارا .. عندما تقول بنت القريه يا ربي متين نشوف الخرطوم هههههههههه " وصل هذا الموضوع لمدنيه للصفحة العاشرة .. وكل ما فتحت المنتدى وجدته في الأول.

وطبعن لانو أنا خاشي لي في شخصية مثقفاتي وكده .. قلت الناس ديل إنصرافيين .. ما معقول نحنا بنعاني من سوء في الخدمات في الجزيرة وو دمدني ... وهنا الناس كلهم في موضوع ما بحمل أي معنى.

قلت هذا قبل ان أدخل للموضوع .. ولكن عندما قرأته وجدته يناقش نفس القضايا ولكن من زاوية أخرى .. زاوية المغترب الذي أضطرته الظروف للهجره .. ومن يعيش في السودان يكابد هم المعيشه .. وجدت قامات وأقلام تكتب بمداد من نور .. وعندها تعلمت .. أن لا أحكم على أي موضوع أو طرح بالمنتدى من عنوانه فقط.

عثمان جلالة

10-07-2010, 01:15 AM

وفي أثناء مشاهدتي لشاشة المواضيع المكتوبة في احد الأيام ... وجدت موضوع بقلم ود ام تريبات .. وقلت في نفسي من هذا الرجل :o الذي يحمل اسم أم تريبات ؟؟!! .. وعندما دخلت لموضوعه نقلني لمنتدى اسمه النفاج ... ياااااااااااااا سلااااااااااام .. قلت في نفسي النفاج ده يااااهو زيتنا في بيتنا زااااااااااتو .. وعرفت من بيانات صاحب البوست أنه المعز محمد أحمد ... وقد كان يبارك في البوست افتتاح القسم الجديد النفاج

كان أول الردود بعد مشاركته مباشرة مشرف النفاج صلاح ود الطاهر

ثم من بعده مباشرة مشرف النفاج ود المطامير

مشرقين بابتسامتهم وبردودهم التي تلامس القلب ... ساعتها كانت أولى مراحل حبي للنفاج :o

كانت المشاركة تحتوى على الأبيات التالية

النفاجو فاتح ما بين دين ودين

نفحة محمدية دفئاً كالضريح

ميضنة كم تلالي
جيداً في اليالي مجداً في الاعالي

مريم والمسيح

عثمان جلالة

10-07-2010, 01:26 AM

دخلت في نفس الموضوع وشاركتهم .. وهاتفت المعز .. وعاتبته لانه لم ينبهني من وقت طويل على هذا الابداع في منتديات ود مدني .. وهذه الأقلام لأنهل من فيضها

بعدها بـ نصف ساعة رن هاتفي برقم غريب

وكان هذا نص الحوار

عثمان : ألو

الطرف الآخر : معاي عثمان جاد الله

عثمان : نعم أي خدمة ؟

الطرف الآخر : معاك سفارة جمهورية السودان :confused:

قلت في نفسي يااااااربي ما دفعت الضريبه .. ولا شنو ؟؟ ما لهم ناس السفارة معاي

الطرف الآخر : نحنا يا عثمان متابعين .. وراصدين كل تحركاتك .. إنت جبت مرتك زيارة وإشتركت في منتديات ود مدني .. أعمل حسابك :mad:

وقفل الخط ...... وأنا ما عرفت أمشي وين ؟؟؟

بعد شويه رن الهاتف تاااااااااني ونفس الرقم .. قلت ما أرد عليهو في الآخر .. قلت موت موت حياه حياه

أول ما قلت ألو : جاتني في الطرف الآخر ضحكة مجلجله ... وصوت يقول لي تخاااااااااف يا كبير :o

معاك صلاح ود الطاهر .. وكنت معانا في الكمرا الخفيه هههههههههههههه :mad:

عندها وضعت تصوري للأستاذ صلاح ود الطاهر .. أستاذ صاااارم ... ولدرجة شايل سوطو معاهو ههههههههه .. لكن بعد ما قابلت ود الطاهر .. لقيتو زول أخو أخوان .. وأصغر من عمرو الأديتو ليهو في الخيال بعشرة سنوات .. رجل لا تمل الحديث معه أبدا .. ولا زلت حتى هذه اللحظة كل ما ضاقت بي الغربة .. وزحمة العمل أهاتف ود الطاهر إن لم تسعفني ظروف لقائه .. ليجعلني أضحك كما الأطفال... له مني كل تحية وتقدير واحترام

ود المطامير

10-07-2010, 01:27 AM

حبيب الشعب

رائع كعهدى بكل رائع فى كل شئ

نفس طريقة تسجيلك كانت طريقة تسجيلى

ختيت ليك بردعتى فوق ضهر قوقل وقلت ليهو مدنى راس

أكان لقيت ليك نفسى فى نص الناس الطيبين وسمحين دول

الحبيب جلاله .. لك منى كل الحب والإحترام والتقدير .. واصل .. الروائع

الجندي المجهول

10-07-2010, 01:36 AM

مدنيّة

10-07-2010, 01:47 AM

ياسلاااااااااااااام ياجلالة

هسي الواحد يتداخل معك يقول شنوووو زاتووووو ؟!!!

غايتو انا بث بقرا وانت واااااصل الذكريات الجميلة دي

------------
ماشاء الله ذاكرتك هديد

------------
حدد لينا ياخ سجلت بمنو
باسم جلالة أو عثمان جلالة
افرز لينا ياخ
ولا دي ما متذكرها ؟!!

-------------
سبحان الله ياجلالة لكن سبقتني عشان انت من مواليد شهر ستة وانا مواليد شهر سبعة
لكن ما مشكلة بنحصلك باذن الله :cool:

ود ام تريبات

10-07-2010, 02:15 AM

الرائع دوماً عثمان لك كل الحب وانت تحلق بذاكرتنا الى تلك الايام الرائعات ..

خالص التحيا للحبيب ود الطاهر عمدة عموم النفاج وشيخ العرب العمدة ود المطامير ..
ياااا سلاااام علي ايام دكان النفاج ... كا ن اسم البوست داك يا عثمان دكان النفاج .. لكن تمت مصادرته وفق قانون التأميم والمصادرة
هههههههههههههه .. لكن دفعوا لي تعويضات ناس مدنية وبكري كسلا ..

ضفااااري :
بالمناسبة المقلب بتاعك ده ومقالب تانية كانت من من تدبير ود الطاهر لكن تحت تحت كنت بحرشو وبوفر ليهو الدعم اللوجستي .

دمتم جميعاً كما ارض الجزيرة الطيبة طيبين متحابين متفقين ..

مدنيّة

10-07-2010, 02:21 AM

يامعز
بركة في بوست جلالة دا الخلاك تظهر لينا

----------------
العود احمد ياخ

---------------
تبعا بعد اذنك ياجلالة

عثمان جلالة

10-07-2010, 03:08 AM

وتصفحت النفاج .. تصفحته جيداً .. وجدت أبو علا وهو يمخر عباب النضم الزين والوصف المبدع في كل شيء مبدع لدرجة أنك لا تستطيع مفارقة البوست .. وجدت حبيب الكل ود المطامير .. وهو يحكي عن الشرفه بركات .. عن البحر .. عن الزراعة .. وحتى عن أكل الكدايس هههههههه ... وجدت رضا ود حسن في منااااااااااظره حامية الوطيس مع دعوب أكال اللقيمات .. في بوست شهي اسمه جني وجن .... وجدت ود البشير أو عمر البشير يحكي كيفية عمل دعوب للقيمات .. ومداخلات محمد باسطه .. وتعليقات هشام السمين على كل ما يحدث .. كان دخلولك للنفاج كـ دخولك لقرية كبيره لا توجد فيها فواصل أو حواجز أو حيشان .. نفاج مليان حنيه .. يسوقك نفاج لـ نفاج آخر .. وبين كل نفاج وآخر تعجز عن المغادره .. ويغمرك أهل البيت بالكلام الطيب ... والحكاوي الطاعمه .... والشاي والقهوة .. والفطور .. والمكان الوحيد الـ بتضطر فيهو في النفاج تدفع كاش أو تدين كان دكان وود أم تريبات ... الجنى الممسوخ معز :)

عثمان جلالة

10-07-2010, 03:36 AM

وأصبحت مدمنا لمنتديات ود مدني .. ووضعتها في المفضلة .. للهفة قبل الدخول .. تصدقوا .. يعني إختصارا للوقت .. بحث ثم اسم الدخول ورمز الدخول ... وضعتها مفضله عشان طوااااااالي تدخل بدون استئذان

مختار باااااااازي كان أكثر الأعضاء نشاطا ما شاء الله ... يتدخل في جميع المواضيع .. ويطرح الكثير من المواضيع في بوستات منفرده ... تجده في كل أقسام المنتدى ... أما المواضيع التي تخص الجزيرة المشروع الغبن الأسئلة المشروعه .. والطرح للقضايا كان يتناولها أبوبكر ود المأذون .. ومرتضى ود العركي .. ود الصول ... عمر سعيد النور ... مجدي سنجر .. أبو ريلان ... عصمت بالانجليزي وكثيرون لا تسمح ذاكرتي لتذكرهم الآن .

وفي حال أصاتك التخمه من مواضيع العام ... تتصفح الثقافي لتجد إبداعات .. سوباوي ... والنور محمد يوسف .. وود علقم .. ولاعاقب مصباح ... وكثيرون لا استطيع تذكرهم "أرجو المساعدة" :)

ثم تذهب لـ ود مدنيات .. وتكون أب ديتد مع ود مدني هذا الصباح .. وكتابات المستشار هيثم والمستشار شبندر ... وتختم المتعه بزيارة قسم الأغاني والفنون الجميلة .. وأبداعات بدرالدين .. وسامبا

وإنت على وشك المغادره ... قبل أن يقول لك المراقب ضع القلم ... تجادع رضا ود عوب بـ مسدار مسدارين في جني وجن. :)

عثمان جلالة

10-07-2010, 03:46 AM

كنت أعتقد أن الآدمن أبوبكر المبارك .. لا يمكن أن يرد على أي بوست .. أو يتداخل مع ناس برالمه زي كدا .. لأنو ناس الإدارة ديل ... ناس من عالم آخر ههههههههه .. كيف أبوبكر ده يتواضع ويجي يرد علي واحد لسه مكتوب بقلم الرصاص .... لكن كلامي طلع فشنك والله العظيم

في تاريخ 07/07/2007م وبعد تسجيلي بأيام فقط .. نزلت موضوع بعنوان 07/07/2007م

وكتبت داخل الموضوع نفس التاريخ ونقطه .. فقط

بعدها بـ 5 دقائق .. لقيت الآدمن رادي علي ... بكلمة واحده فقط ... "مربوطه" هههههههههههههههههههههههههه:o:o

من ديك عرفت إنو أبوبكر ده حبوب .. وزيو زينا ... ممكن يرد عليك في بوست بلغة كوشتينه .. وكانك زميلو في قيم .. ودا كا أول خيط في تلخيصي لشخصية الحبيب أبوبكر الآدمن.

abomazeen

10-07-2010, 05:32 AM

حبيبنا جلالة واصل بدون فواصل بصراحة روعة في السرد

تخريمة :
تتذكر زمان ايام جامعة جوبا اتعملت فيك كاميرا خفية وجاك ( جواب) ومشيت الكافتريا .............. ولقيت ( شباب الداخلية كلهم موجودين) اتذكر تلك الايام الجميلة وايام الفرقة (ايام بتغنوا اغاني ساورا ) ويوم الحفلة الدكاكينية في المنشية ( يوم اتحديت ) بتاع عقد الجلاد داك وانت غنيت بعدو ( واحسن منو) ابداااع يا جلالة ( واللقب بتاع جلالة ) الجاك من الدفاع الشعبي دا ( برضو معاهو ذكريات جميلة )

الجندي ... الزول ده قال اعترافاااااات في أول كلامه
كدي خليه يكمل الاعترافات بتاعتو دي ولو ما اعتراف
بعدين عندنا معاهو كلام تاااااني ... كلو مسجل ومرصود
وأزيدك من الشعر بيت يا ود جلالة اللقب ده عارفيين مصدروو
ويوم الهروب من معسكر جبل أولياء برضو بنعرف التفاصيل الدقيقة
لكن زي ما بقول المثل (حلو الحكي في خشم سيدو ) ااها أحكي أحكي
ولو زغت كده ولا كده أنا ( ملفك بالكاااامل عندي ) وصلتني العديد من الملفات

ود المطامير

10-07-2010, 05:50 AM

naz_imam

10-07-2010, 11:46 PM

الحبيب الرائع وحبيب القسا كيفنك والله ليك وحشة كتيرة وتسلم ياغالي والله رجعتنا للزمن الجميل البنتمني انو نرجع ليه تاني تبداها من العام تلف اليوم كلو بعد ماتزهج تعرج علي الثقافي ناس بت عشرية وتلقاهم مع اولاد ام تريبات وناس ودتابر كاتبين كلام كبار اغلبك ترد عليه زاتو طوالي تعصر ضنبك وعلي الاقتراحات والمناسبات اها نبارك للناس ونعزي ونرحب وندعو للعيانين واقرب رقشة علي النفاج تلقي ناس عمك محجوب ودعوب وسواق الهايس خاتين اللقيمات وتبداء المناكفات اجيك ود المطامير الممسوخ طاير ليهو بي رابط لي موضوع ملطوش اشيل حال الناس تلف يمين تلف شمال تلقي مدنية واقفه ليك في حلقك لزوم الاختساس والعجب ام رقبة طويلة ديك محل ماتمش تعتر ليك بعد داك اجوك الخواجات بتاعين امريكا ديك واعملوها ليك لغة الرندوك وود المأذون قاعد اتفرج بعد شوية تجي انت زاتك تشكر في روحك (ابوات البنات زايدين حنية ) نقعد نكسر معاك التلج علشان راس السوط واصلنا وكان لابو نضارات داك ود الجاك خلي ساكت لابس كرفتتو الواحده ديك ومن محل بروستد لي محل بروستد دا جاء جدة استقبلوا ود سافر من جدة ودعوا شفت الادمن مهاه كم مره لاكن ماعارف البدفع الفاتورة منو (دي ارجعوا فيها للسيد المدير المالي) وكان لي اولاد الحسن الفي جدة والفي الامارات شي زاندية وشي (مابتقال) والتاني مهوس عسكرية كل سنتين امرق ليك بي انقلاب اما ود الصول داك مرتو هارشاهو عديل مرة يخيت ومرة يورق الخدره من يجيبوا سيرة الصفاح تقول ليه(السيف اللواسي صفحتك) اعصر ضنبو وطوالي ودمدني هذا الصباح فكني ياخي.

اها العزابة ناس ودالعاقب ومن لف لفه ديل خليهم ساي كل يوم داخلين في شخصية جديدة علي حسب مود الكفيل هههههههههه زي ياسر فقيري كان مشرف هنا من يومو العرس لحدي هسه مادخل المنتدي تاني برضوا تقولوا لي ديمقراطية واها بالنسبة للنواعم كل يوم في حالة ذي محلات قدر ظروفك كل يوم خلطه جديدة حلو (خلطة) دي موش

اها المسافر داك كمان حكاية براهو كان كويس هدي ورضي وماشي جنب الحيط تاكل وتقش فيه من يومو الاتلم مع ود المطامير بداء التمرد ودخل الغابة لامن الادمن وداهو غوانتانامو بس مادي المشكلة المشكلة من يومو النزل السودان بالعربية 2008 وكان داير يعرس وناس الجمارك ادوهو ماسورة وقضي اجازتو كلها بين مكاتب الجمارك ولحسو قروش العرس ركب مكنة متمرد.

ياخوي فترت والله بجيك راجع بعدين

عثمان جلالة

11-07-2010, 01:07 AM

مؤكد أن كل أعضاء منتديات ود مدني نجوم .. ولكن لن استطيع أن أنسى الروائع التي كان يتحفنا بها شبارقه وشبرقيه .. وود بورتبيل ... المجادعات والحكم التي ننلها من عمنا المحجوب .. وتعليقات سواق الهايس وود الأمام .. والبوستات التي تكون في شكل روشتات .. زي وصفة الدكتور والتي يبدع فيها ود الريح .. كما لا أنسى ... حبيب الكل أبو مازن .. رغم إشرافه على الإسلامي إلا أنه كان مشاركا في كل المنتديات .... ولعل أكثر الموضوعات التي ادهشتنا في ذلك الوقت غير كتابات شبارقه .. قصة جميلة كتبها المبدع حسن ساده .. بعنوان "ياليل الكلاكله " وكانت هذه القصة في حلقات ... ندخل يوميا لنرى ما كتب فيها ... ونعلق .. تماما كما كتب الدكتور طارق جبريل .. عن يوميات طلبه ... ولعل أسمي في ذلك الوقت كان يسبب لدى الكثيرين .. شوية لخطبه ... لأنه كان "جلالة" فقط .. وفي بوست نجوم المنتدى .. قمت بمنح الكاتب المبدع حسن سادة وساما من الذهب الخالص ... فكان رده لي على النحو التالي هههههههههه .. تحياتي له بلا حدود :):):)

يا لجلال ذلك الوشاح الذي طرز من الدمقس والحرير

وتضمخ بأغلى العطور الباريسية ووضع على صدري

من إنسانة جليلة قد إكتست ألقاً وجلالة

أسأل الله العلي القدير أن أكون بحسن ظنها

وكافة المنتدين في هذا المنتدى الأغر منتدى أرض المحنة

ودمدني المجد والعزة والفخار

فما أسعدني بهذا الإكليل الذي أضاء هامتي

وما أروع اللقاء بكم عبر هذه الكوة الإسفيرية

التي كانت سبباً في تواصلنا مع بعض

وإلى الأمام ودمدني مدينة وأناساً ومنتدى

وسدد الله خطاكم

اللهم آمين

عثمان جلالة

11-07-2010, 02:37 AM

الغالي ود المطامير .. كان زمنا جميلا .. وكان دخولك لأي من بوستاتي وأنا برلوم شرف لا يدانيه شرف .. وإنت يا يابا تقدل بـ العراقي والسديري .. والطاقيه المشنقه هع هع هع .. هلا هلا .. زمن ... والبكتر كلامو معاك في النفاج.. يمين إلا سكينك الـ في ضراعك تاااااااباهو هع هع هع .. زمن .. أسي بقيت بالبنطلون والقميص .. وعامل ساونا ههههههههه :):):)

عثمان جلالة

11-07-2010, 02:39 AM

:):):):) الجندي يا حبيب .. يا زول إنتا أتهكرت ب واحد من أصحابي في جامعة جوبا .. دي ملفات سريه للغايه كيف وصلت عندك؟؟؟ :mad::):) ... البوست ده عن ذكريات المنتدى مش ذكريات جامعة جوبا هههههههه

عثمان جلالة

11-07-2010, 02:44 AM

مدنيه ههههههههههه .. تتذكري لا من كتبت البوست بتاع 07/07/2007م ... دخلت إنتي وقلت لي ... جايه من الصباح عشان أكتب الموضوع ده لقيتك كاتبه يا جلالة :o:o

كانت دايما مداخلاتك .. في كل البوستات الكتبتها في وقتها .. وبتدي البوست دفعه للأمام .. ما عدا بوست المشاركات ههههههههه .. كان أسمي أول ما سجلت "جلالة" .. قبل ما يقوم ود الريح بحملة التغيير :o

عثمان جلالة

11-07-2010, 02:51 AM

المعز يا ود المدينة المنورة ... بركه البوست الجابك لينا يااااااااااخ .. طلتك بالدنيا .. ويا كافي البلا ويا حايد المحن زول ساااااي في المنتدى بقى يدينا مااافي بعد ما قفلت دكانك في النفاج ... :):):)

تتذكر بوست الدكان .. وبوست جني وجن كانن في اليوم الواحد بعملن كم صفحة ؟؟:confused:

زي شجرة العاقب في الزمن العلينا ده .. كان غبت خمس دقايق عشان تشرب مويه علي قول ترباس تجي تلقى الناس فاتتك تب :):):)

عثمان جلالة

11-07-2010, 02:55 AM

أبو مازن هههههههههه والله خوفتونا تب إنت والجندي بـ ملفاتكم دي :):) .. لكن برضو عندنا ملفات هنا ... موضوعك داااك الـ كنت منزلوا في النواعم تتذكروا والكان في شكل حلقات .. كان موضوع ممتع والله ... ومؤثر وشغل بال الكثيرين من النواعم .. وإنت كنت شغال حلقه حلقه إسمو شنو بالله ؟؟؟ :o:o

أحمد عمر ( MOODY )

11-07-2010, 02:56 AM

الرائع جلالة ... عندما تكتب من القلب
لا ينقطع حبل التواصل ... و بكل الحواس

متااااااااااااااااااابعك ...
و يا ريت لو كل الناس تسترجع معاك أيامها الخوالي في منتديات ود مدني

باص قون : يا الجندي ... ما تشوف لينا طريقة تثبيت

عثمان جلالة

11-07-2010, 04:17 AM

ههههههههههههه حبيب القلب أبو ريم .. نزار ود الإمام .. زمن جميل والله وزي ما حكيت بالضبط .. والبوست حق أبوات البنات ده أنا لامن كتبتو كنت قيل أنا وأخوي الكاشف بس هههههههه "أنت" لكن لقيت ليك الجماعة كلهم معانا في الصف .. أبو علا ، ونزار ود حسن، وود تابر، وبورتبيل .. وأبو شوارب .. كميات من الناس الحنان والزيدين حنيه ... طبعن ناس مدناويه كانوا بجو يزيدو البوست حلاوه .. تتذكر بوست ابو علا عن حلتهم ووصفها ؟؟ والبوست العملوا ود لمطامير عن الشرفه بركات .. يا سلاااااااام .. بالله تجي تحكي لينا أكتر :):)

عثمان جلالة

11-07-2010, 04:22 AM

كنت إنت وقتها "مودي" بس .. :):) بدون أحمد عمر .. وبتتداخل مع الناس في كل موضوعاتهم .. وتشاركهم السمح والشين ... وتكتب بحرقه عن الغربه والشوق لود مدني وأهلها وكل شبر في السودان :)

ود المطامير

11-07-2010, 06:58 AM

كنت إنت وقتها "مودي" بس .. :):) بدون أحمد عمر .. وبتتداخل مع الناس في كل موضوعاتهم .. وتشاركهم السمح والشين ... وتكتب بحرقه عن الغربه والشوق لود مدني وأهلها وكل شبر في السودان :)
يوم كان ( مودى بس .. شالو السيل )

وهسّى قلّع بعد التكينه .. بعاتى .. بإسم أحمد عمر ... وختّ مودى بالجمبه

ود المطامير

11-07-2010, 07:02 AM

نزار حسن محمد

11-07-2010, 08:37 PM

ياحليلك يابلدنا حليلى شريرى يابلدنا
واصل بدون فواصل ..
ماشى دكانك بتاع العيش اجيب اردب فتريته للزريعه
وبجيك الرسول اتوصى فينا ..والا بجيب الحتياطى المركزى
وبقلبا...ههههههههههه

عثمان جلالة

11-07-2010, 09:00 PM

7-9-2007

الساعة 2 ونصف ظهرا - ظهر في هذا التاريخ بوست نجوم المنتدى .. وهو يوضح العدد الكبير من النجوم الذين تم منحهم في البوست أوسمه معنوية لعطائهم ونشاطهم .. بعض الأسماء غائبة الآن .. نتمنى أن يعودوا من جديد .. لهم التحية أينما ما كانوا :

وسام ماسي .. بطعم الرعاية والحضور ... وقلب الشباب ...وروح المشاركة
للرائعين .... الآدمن .... 114 .... نزار ... مدناوي .. ود المطامير ..ود الطاهر .. أبو شوارب وبقية العقد الفريد ...... أقلام للتعليق بالرزانة .. والحكمة ... والتشجيع

وسام ذهبي عيار (24) ... بطعم التفرد والمواضيع (البتخلي شعرة جلدك تكلب) يعني بالعربي توقف شعر راسك ... من المتعة
الرائعين .... شبارقة ... مدنية .... حسن ساده .... غيداء .... أقلام مبدعة ومتجددة

وسام ذهبي عيار (18) ... بطعم المواضيع الهادفة
بدرينا .... سمر طه .... عوض كواكب ... معتز ... أبو الأمجاد ..... ود أم تريبات .... هاني .. بسطاوي ... معزة .... والبقية
أقلام ...هادفة ... مواضيع ... قيمة ... لتطوير المنتدى

وسام ذهبي فقط مطرز بروح الشباب .. والتخريم خارج النص
مختار بازي .... هشام ... أبو النور ... أبو رانيا ... ماس 88 أبو شوتال دوم 99والبقية

بت مارنجان

11-07-2010, 09:22 PM

تعرف ياابو عفان
الليلة المزاج رايق وجميـــــــــــــــــــل ..

لي سببين الاول : من امس مغيمة عندنا مع وجود رشات متفرقة ...
وفوز الاحمر الاسباني زاد المزاج متعة ...

وبوستيك دة يخلي الواح مزاجو يبقي الف
زكرني بي "اسماء في حياتنا" لود الجزولي "

يديك العافية ياابو عفان وواصل حديث من الاعماق ...

esmat

11-07-2010, 09:46 PM

من إنسانة جليلة قد إكتست ألقاً وجلالة
[b]
واااصل
(ما تتلفت كانوا بشاغلوك وكداb]

بنت الرفاعي

12-07-2010, 12:32 AM

ماشاءالله رجعتنا لأيام بالرغم من أن حضوري لم يكن متواصلاً، لكن اللحظات التي كنت أتواجد فيها كانت جميلة بكل الذين ذكرتهم.:)
نحن متابعين معاك.:)

أحمد عمر ( MOODY )

12-07-2010, 12:52 AM

يوم كان ( مودى بس .. شالو السيل )

وهسّى قلّع بعد التكينه .. بعاتى .. بإسم أحمد عمر ... وختّ مودى بالجمبه

دي قوية منّك ... الله يجازي مِحنك
طبعاً الوقت داك حضرتك كُنت موقوف ... و المسافر مقوّم المنتدى قرون .. قرون
و نجي نحنا داخلين المنتدى ( أها رأيك شنو في الإملاء يا دكتورة مرام ..؟ ما شاطر !!! )
مُكفكفين ومُشمِّرين ... فكِّوهم من الحظر ... و لّلا ورّونا السبب
و ما عارفين ذاتو المطرة صآبة بي وين

و الله أيام يا زمان

بنت الرفاعي

12-07-2010, 01:01 AM

دي قوية منّك ... الله يجازي مِحنك
طبعاً الوقت داك حضرتك كُنت موقوف ... و المسافر مقوّم المنتدى قرون .. قرون
و نجي نحنا داخلين المنتدى ( أها رأيك شنو في الإملاء يا دكتورة مرام ..؟ ما شاطر !!! )
مُكفكفين ومُشمِّرين ... فكِّوهم من الحظر ... و لّلا ورّونا السبب
و ما عارفين ذاتو المطرة صآبة بي وين

و الله أيام يا زمان

ماشاءالله تشكيلك تمام بس ما تلخبط بين الفتحة والكسرة مع الشدّة زيي مرّات:rolleyes:، لكن صابة دي شكلها كيف كيف!!:rolleyes: :D

أحمد عمر ( MOODY )

12-07-2010, 02:14 AM

ماشاءالله تشكيلك تمام بس ما تلخبط بين الفتحة والكسرة مع الشدّة زيي مرّات:rolleyes:، لكن صابة دي شكلها كيف كيف!!:rolleyes: :D

يا جلالة معليش بس نعمل شنو للمصحح اللغوي بتاع المناهل
أها صآبّة ( كده / كدا كويس ... ولّلا برضو كيف ... كيف )

محمد الجزولى

12-07-2010, 03:37 AM

بوست برائحة الصندل عزيزى عثمان جلاله
متابعين .... متابعين

أبوريلان

12-07-2010, 04:44 AM

دا الزمن الجميل ياجميل يا مدلل
واصل متكيء بفنجان قهوة .

أشرف صلاح السعيد

12-07-2010, 07:59 AM

جلالة و الجميع سلام ..
بوست فيو ريحة طينة المطر مريح و سلس ..
متابعين ..
بلمة أبوشوارب شفتك و انتا بتتغدى و قلتا اسلم عليك بعد الغدا بس لقيتك مشيت .. " واحد كان بالضلعة الجنبك" ..

عثمان جلالة

13-07-2010, 01:05 AM

عثمان جلالة

13-07-2010, 02:52 AM

وقبل أن أبدأ بتحليل الآخرين سأبدأ .. بنفسي بمسيرتي في المنتدى من أول بوست وحتى آخر بوست ما قبل السيل هههههههه ... كيف كنت أفكر .. وما الذي كان يؤرقني !!!

حنتوب ... كانت بوابة العلم في مدني، الجزيرة، السودان بتاريخ 26-6-2007
أنا يا سادتي من طلاب حنتوب الثانوية التي كانت في وقتها مثلها مثل مثيلاتها خور طقت ووادي سيدنا من المدارس الثانوية النموذجية في السودان .... وكانت قلعة للعلم والرياضة والثقافة، خرجت الكثير من الرؤساء والعلماء والأدباء والمفكرين والساسة والرياضيين الذين غيروا تاريخ السودان ووضعوا بصماتهم على الحراك الثقافي والسياسي والفكري ....
السؤال المطروح ... من المسئول عن غياب هذا الإرث التاريخي ممثلاً في حنتوب ومثيلاتها من المدارس الثانوية الأخرى ...
من المسئول عن تدني مستوى التعليم في البلد ...
أصبح من يستطيع الحصول على أعلى النتائج من يملك المال فقط ... وليس من يملك العقل المتعطش ولديه الرغبة القوية لتغيير واقعه بالعلم والتعلم ....
أصبح السواد الأعظم من (التعابة والغلابة) لا يستطيعون مواكبة الراهن المادي من مصاريف الآكل والسكن والصحة وفواتير الخدمات ..... والتعليم.
هل سيعود بنا التاريخ للوراء كما كانت تهدف سياسة الإنجليز أن يكون أبن المزارع مزارع .. وأبن العامل .. عامل ... وأبن الراعي ... راعي.
نريد مدارس مثل حنتوب في الجزيرة والسودان.
نريد نهضة التعليم لأنها عنوان تقدم الشعوب.
نريد أن يكون أبناء المزارع والعامل والراعي في صفوف العشرة الأوائل في نتائج الشهادة السودانية من كل عام.
هل يعقل أن يكون من بين 100 من الطلاب الأوائل فقط عدد (2 أو 3) من ولاية الجزيرة .
أنه نداء بالخطر .... ولنعمل على حل المشكلة ....
وين المسئولين ... وين قادة التعليم في الجزيرة الخضراء
وين المثقفين ... وين الحق؟؟؟؟ أفيدونا ...

وهذا كان ما قبل السيل مباشرة

حنين إلى الهمبته
ده آخر موضوع كتبته قبل ما يجي السيل
13-5-2009 الواحدة والنصف ظهرا

لأني بشر كباقي خلق الله ... عادة ما أكون متناقضاً ... ربما ما يميزني في هذه اللحظة هي محاولاتي لـــ كشف هذه التناقضات الكثيرة التي تعصف بي في كل عام .. وكثيرا ما سألت نفسي هل الجميع يحسون بما أحس به ؟؟؟ فأنا يا سادتي في كل عام .. ومع بشريات الخريف أو كما نحب أن نسميه نحن أهل الزراعة "الرشاش" أكون محاطاً بإحساس كبير "بالهمبته" وأعني هنا الهمبته بمعناها المعروف والنبيل وكما سمعناها من جدودنا وحكاويهم.

.... أأأأأأأأأأي الهمبته الواحده دي ... الواحد ... يكون لابس ليهو عراقي وسروال طويل وسديري وخاتي في ضراعو سكين طويلة لسان + طبنجه + بندقيه ام عشره .... ويكون ناقته أو حصانه على أهبة الاستعداد للإغارة على الــ كتلو الجداده وخمو بيضها ... على الــ شالو حقوق المزارعين وشردوهم .. وغربو وليداتهم وعلى البضحكو على عقول الناس ... لكن أكتر حاجه بتزيد استغرابي مش نزعة الهمبته .. توقيتها يا أخوانا توقيتها هو العامل لي مشكلة لييييييييه في هذا التوقيت من كل عام ؟؟؟؟ وما علاقة ذلك بحرفتنا الأساسية وهي الزراعة ... أنا سؤالي يا أخوانا جااااااااادي !!!

وإحساسي جاااااااااااااادي ... أقرب حاجه أمس القريبه دي غلبني ليك الإحساس ,, واتدرعت ليك بالعراقي والسروال والسديري وما لقيت سكين بالمواصفات المطلوبة .. المهم استعوضت بى سكين المطبخ .. مرقت على الشارع .. لكن للاسف لا لقيت حصان .. ولا بعير فقط شوارع تضحك في وجهي غربة وحنين .. وتقول لي بكل عنف ..... حليل زمن الهمبته !!!!!!!

آخر سؤال... في واحد عندو نفس الحالات الــ بتجيني دي ولا أمش أقابل دكتور ؟؟؟

لكم الود،،،

عثمان جلالة

13-07-2010, 11:42 AM

يا سادتي :

ود المطامير

نزار ود حسن

بت مارنجان

إسمت

مرام

مودي

ود الجزولي

أبو ريلان

أشرف صلاح

وجودكم هنا هو حققة ما يلهمني ويسعدني في هذا البوست و يمنحني القدرة على الغوص في الذكريات والعودة من الماضي الجميل بوشاح سيزين صدري على مر الأزمان .. شيء ما.. سأنظر إليه في زهو .. بعد زمن مع أحفادي لأقول لهم كان لي الشرف أن أكون مع هؤلاء :):)

ود المطامير

13-07-2010, 07:53 PM

الحبيب ... الهمباتى .. فارس الفرسان

بصراحه كدا .. وطبعاً إنت عارف ود المطامير ؟؟

أهااا ... يوم شفتك أول مره .. شمّيت من حروفك ود البلد .. ريحة البلد

دُعاش النيل , ومعاك أبحرت مراكبنا تمخر عُباب دواخل ( عثمان جلاله ) الجميل

ومن أول يوم بقيت فيهو إنت مشرف
حزنت ... تألمت .. وقلت والله ( ناس الحيكومه ) دول ما عملوا خير

لأن الإشراف ورغم إنه شرف وتكليف فى آن واحد إلا أنه بيسحب جزء غير هيّن من رصيد المحبّه

وسعدت يوم صرت ( الناطق الرسمى .. ومشرف المنتدى السياسى ) وح أسعد أكتر لو جا يوم وبقيت ( عثمان جلاله ) عضو ذهبى بس

وقتها .. أنا متأكد إنك راح تمتعنا بحلو الكلام .. والكلام كتير ولكن أختم وأقول

( حبّيناك من قلوبنا وردناك يا حلو )

مايسة

13-07-2010, 08:07 PM

غايتو يا عثمان جلالة يديك العافية :)

وذاكرة حديد ما شاء الله - بتاكل سمك شكلك كتير

وما اجمل شريط الزكريات - متابعين معك من بعيد

أحمد عمر ( MOODY )

13-07-2010, 10:56 PM

لكل مأساة ... جانب مشرق
بدون خوض في السبب ... كانت مكالمة جلالة أكثر الجوانب إشراقاً

عندها فقط ... ترسخ مفهوم البيت الكبير ... و الأخ الكبير
و زي ما بقولو المصريين : الكبير ... كبير
و جلالة يا اخوانّا كبير ... لكن حنيّن - أبو بنات و كده -

مشقاقة بالزقاق في نص النهار : أخوك ملازم أول و كده ( عندي دبورتين أقصد بنتين )
و منتظر الترقية عشان أبقى نقيب كان الله يدخّلنا بيهن الجّنة
و مدناوية تلقى ليها سبب للمباركة والتهنئة
:o:o:o:o:o

دُمت هانئاً بوّد ... و ألف خير

عثمان جلالة

15-07-2010, 03:38 AM

اول عهدي بالاشراف كان في دورة 2008م في الربع الثاني (ابريل)

وكان زملائي في الاشراف على المنتدى العام
معتز الريح و محمد النور

وكان حينها الضباط الثلاثة هم: المشرف العام مدناوي ونائبيه بكري كسلا ومدنية

والربع الاول لدورة 2008م كان كالتالي:

ضياء الدين محمد يوسف – المشرف العام
مدناوى نائب المشرف العام
مدنية - نائب المشرف العام

نزار حسن - مشرف المنتدى العام
سواااح - مشرف المنتدى العام
زول فردة - مشرف المنتدى العام

ابوبكر حامد - ود مدنيات
خالد الصول - ودمدنيات
هيثم عبدالعال - ودمدنيات

صلاح الطاهر - مشرف منتدى النفاج
عمر البشير - مشرف منتدى النفاج

بدر الدين محمد - الفنون الجميلة والصور

عوض صقير - الإسلامي
ابومازن بالإنجليزي- الإسلامي

عمر غلام الله - الثقافي
سوباوي - الثقافي
مدثر بورتبيل - الثقافي

امير عبدالباقي - الرياضي
ناصر عمر دبيب - الرياضي

أبوبكر محمد المبارك - المدير المالي ومشرف منتدى المشرفين

مرتضي يوسف العركى - مشرف قسم الجمعيات والمتحدث الرسمي باسم المنتدى
معتز الريح - مشرف قسم الجمعيات

بكرى كسلا - الكمبيوتر
ابوزيد محمد نور - الكمبيوتر

أنيس التوم - الإقتراحات والمناسبات
صالح ابوشوارب - الإقتراحات والمناسبات

عثمان جلالة

15-07-2010, 03:41 AM

وفي دورة 2009م اصبحت اداري ومشرف كما جاء في بيان مجلس الادارة التالي:

بسم الله الرحمن الرحيم

الاخوان والاخوات اعضاء منتديات ودمدني
السلام عليكم ورحمة الله تعالى وبركاته

إيمانا منا باهمية دور المشرفين كرقباء ومتابعين لجميع المواضيع التي تنزل خلال اليوم...
وفي سبيل زيادة النشاط في المنتدى واعطاء روح جديدة له .......
فقد تم تكوين مجلس الادارة والمشرفين لدورة عام 2009م ....
كما نتمنى ان يقوم كل مشرف بواجبه الاشرافي على اكمل وجه.....

وسيكون مجلس الادارة والمشرفين على هذا النحو:

أبوبكر محمد المبارك (رئيس مجلس الادارة )
نبيل حمدتو ( نائب رئيس مجلس الادارة )

بكري كسلا ( المدير الفني + المشرف العام )
مدنية ( المدير المالي + نائب المشرف العام )
سوااح (نائب المشرف العام)

ابومازن (مشرف المنتدى الاسلامي)

عثمان جلاله (الناطق الرسمي + مشرف المنتدى العام)
محمد النور ( مشرف المنتدى العام)

خالد أحمد الصول (مشرف ودمدنيات)

معتز الريح (السكرتير التنفيذي + مشرف الجمعيات)

إيهاب الامين (مشرف المنتدى الثقافي)
اسماء محمد الشريف (مشرف المنتدى الثقافي)

بدر الدين محمد (مشرف منتدى الفنون الجميلة)

هيثم عبد العال (مشرف المنتدى الرياضي)

اسامه الرشيد (مشرف منتدى الكمبيوتر)

صلاح ود الطاهر (مشرف منتدى النفاج)

ناصر عمر دبيب (مشرف منتدى الاقتراحات والمناسبات)

عثمان جلالة

15-07-2010, 03:42 AM

وفي دورة 2010 اصبحت الناطق الرسمي فقط
الى ان تم افتتاح المنتدى السياسي الذى ناد به عدد الاعضاء في الربع الثاني من دورة 2010

واصبحت الناطق الرسمي ومشرف المنتدى السياسي

عثمان جلالة

15-07-2010, 03:44 AM

تحية تقدير واكبار أوجهها من شخصي الضعيف لكل من خدم منتديات ود مدني منذ تأسيسها

عاجزون عاجزون عاجزون عن الشكر

سواااح

16-07-2010, 04:48 PM

العزيز .. عثمان جلالة
مررت بهذه المساحة كثيراً
ووجدت انه من التقصير ان اكون ضيفاً خفياً
فتحية سلام وتقدير لشخصك الغالي الجميل
والامنيات ان نرتقي .. لنلتقي.

ابوالنور

16-07-2010, 11:15 PM

مساء الخير صباح النور كيف قيلتو اي واحده من ديل تعجبكم شيلوها شيلة
دخلت البوست وانا متنشن من احساس جديد علي ولا من الدرش في الشغل ولا من شنو ما عارف المهم اني جد حاسي اني مكتوم
لقيت نفسي بضحك واضحك واضحك اتزكرت واحد صاحبي اسمو منو ما عارف كان بمشي البحر وموضوع البحر دا اسألو منو بكري فاروق لانو جارهم بمشي البحر
تسلم حبيبنا علي الفكرة الجميلة دي وواصل
اخر الكلام
الجاني منك ومن تنقش تنتقش تن قش وصفو بظهر يا فريد

عثمان جلالة

20-07-2010, 11:34 PM

الأعزاء .. الأحباء

ود المطامير

مايسه

مودي

سوااح

أبو النور

شكرا ... لانكم اديتو البوست نكهة وطعم .. ... من مجموعتكم المتفرده دي أنا لاقيت .. سوااح وود العم أبو النور ... أخونا مودي لاقيت صوتو في التلفون .. وكانت أجمل مكالمة رغم إنو سببها كان حزين زي ما ذكر ليكم .. وبصراحة كده من حديثو معاي عرفت معدنو زول اخو إخوان ... ويختوهو فوق الجرح يبرا:)

سوااح .. قابلتو قبل أبو النور .. وطبعا سوااح زي ما عارفنو .. راااااااقي شديد وأنيق .. ورومانسي .. وفي أثناء كلامو معاك .. ممكن يسرح بعيد . ... لكن رغم دا بكون مركز في كلامك .... ود عمي أبو النور .. إتلاقينا أنا وهو في قهوة أدروب في ود مدني .. ولقينا نفسنا أصحاب زي وكأنو بعرفو من سنين .. وتجولنا أنا وهو على الأحباب في ود مدني ليوم كامل

وعشمي لقاء ود المطامير و مايسه أم البنات .. وكل أعضاء المنتدى .. ونشوفهم كلهم في ساعة خير .. وتامين ولامين.:):):)

معتز الريح

21-07-2010, 12:07 AM

هذا البوست التوثيقي .. مرجع يا عثمان ..
ما تقيف .. وطلع لينا الدرر ..

عثمان جلالة

23-07-2010, 11:06 PM

ود الريح يا حبيب .. إنت من الناس الما لاقيتهم وجها لوجه .. رغم ذلك نتحدث في الهاتف .. وكأننا أصدقاء من زمن بعيد .. نتحدث في كل شيء .. وبكل التفاصيل ... وإذا سألني أحد عن معتز الريح أجيبه بثقه عن شخص أعرفه .. وتمتد هذه المعرفة في الحديث ..لتتجاوز ... عدم اللقاء وجها لوجه .. أليست هذه نعمه من نعم المنتديات علينا ؟

حتى نلتقي لك الكثير من الود،،،

عثمان جلالة

25-07-2010, 10:07 PM

تحدثت في أول هذا البوست عن أن السبب المباشر لدخولي عالم المنتديات كان هو الضيم الذي أحسست به تجاه المشروع وأهل المشروع و مدينة ود مدني .. لأجد بعدها أن هذا السبب أدخلني بصدق في علاقات أخوه وصداقات جميله أعتز بها جدا .. وأسماء وأرقام هواتف .. أمتلاء بها هاتفي .. ثم أمتدت هذه العلاقات لتصل الأسر .. والفضل يرجع في ذلك لمنتديات ود مدني.

وليس هذا فحسب .. بل أن الفضل لمنتديات ود مدني .. في وجود منتديات أم تريبات .. وغيرها من المنتديات الكثيرة .. التي اتت بعدها .. وحملت نفس الطابع .. والرسالة .. والعضويه .. لذلك يمكنني القول ان منتديات ود مدني هي شيخ المنتديات التي تنبض باسم جزيرة الخير والعطاء .... هذا على المستوى العام .. أما فضل الإنتماء لمنتديات ود مدني لي على المستوى الشخصي .. فهو حديث شيق سأعود إليه في مرة أخرى.

naz_imam

25-07-2010, 10:30 PM

عثمان جلالة

26-07-2010, 11:56 PM

شكرا يا أبو ريم .. القلوب شواهد .. يا حبيب .. وكتر خيرك على الثقه الغاليه دي .. وعشمي أن نلتقي قريبا .. بإذنه تعالى

عثمان جلالة

30-07-2010, 10:46 PM

ولأن الراية لن تسقط

وسيحملها .. جيل بعد جيل

ولأن المسيرة حبلى دائما بالجديد والمفيد ... لذكريات جميلة من زمن بعيد

سنعيد ... ونعيد .. هذا التاريخ المجيد

أدعوكم .. للمزيد في هذا البوست المشوق .... مع شكري وتقديري لكاتبه .. وحتى يكون الختام مسكاً .. أدعوكم لنوااااااااصل .. ودائما تأكدوا أننا نلتقي لنرتقي :):):)

في ختام هذا البوست .. أشكر كل من ساهم في هذا التوثيق للتاريخ

كل الأخوه والأخوات أعضاء المنتدى .. والذين أثرو البوست

وشكري وتقديري الكبيرين .. لمخرج البوست حمدتو :)

ودعتكم الله

http://wadmadani.com/vb/showthread.php?36036-1-2-3-4-5-..........

مدنيّة

30-07-2010, 11:10 PM

1- شخصيات أدهشتني بعض أن إلتقيتها وجها لـ وجه؟؟
2- شخصيات تخفي حقيقتها من خلال مشاركاتها في المنتدى؟؟
3- ما نتصوره في الخيال عن بعض الأعضاء يدهشك بتصور مغاير تماما للواقع؟؟

والكثير من النقاط التي سأعود إليها بشيء من التفصيل:)

ياجلالة عايز تقول الروووووووووووب لكن مالقيت تريقة ولا شنوووو ؟

كدي رد علي الفوق دا وبرجع ليك بالباقي

بعدين النوريك
كيبورتيك مازي كيبورت الزول الختيت لنك بوستيه وقلت نتابع معه بهناك "كان ليك ياخ"

عثمان جلالة

01-08-2010, 09:14 PM

كلامك صاااااااح يا مدنيه .. حاولت أزوغ .. لكن قبضتيني بالثابته :):) .. كل ما في الأمر إنو حاولت أكون مساعد مخرج لأستاذنا حمدتو .. وعشان الختام يكون مسك وكده .. يكون البوست حقك رحلة ممتعه في قطر جديد .. لكن سأواصل حيثي مع شكري وتقديري الكبيرين لكل من أطلع على هذ البوست.:)

عثمان جلالة

01-08-2010, 09:19 PM

قبل أن أسرد ما عرفته وتعلمته .. وسعدت بصداقته من أعضاء المنتديات .. دعوني أنداح لكم فيما علمتني إياه الأدوار الإشرافيه والتنفيذيه خلال مسيرتي في منتديات ود مدني ... نعم صدقوني فإن منتديات ود مدني أسهمت بشكل كبير في عملي وبيتي ... وعلاقاتي مع الآخرين ... وليس للأمر علاقة وكما تعلمون بأي فائده ماديه .. لأن الآدمن لا يصرف رواتب ومخصصات للعاملين في الإشراف والإدارة في منتديات ود مدني :rolleyes::) .. ولكن الفائده المعنيه هنا على مستوى التجربة .. والزاد .. زاد السنين والعطاء .. والرغبة في مساعدة كل الناس.

عثمان جلالة

01-08-2010, 09:29 PM

تعلمت يا سادتي :

1- الصبر

2- الدبلوماسية

3- عدم قفل الباب في وجه أي نقاش

4- الحلم

5- البعد عن الغضب

6- أن أجد العذر لأخي أو أختي دائما

7- تقديم أي مساعده للآخرين ما دام ذلك ممكننا

8- التعامل بصدق مع الآخرين

9- خلافي مع أحد الأعضاء لا يعني خلافي مع الموقع

10- أن كل ما أكتبه أو أقوله من كلام ... لا يمكن تعديله في وجود خاصية الإقتباس :rolleyes:

11- الإحترام الكبير للجميع

12- عدم الحكم على الأشياء من ظاهرها.

13- الحب للجميع بدون شروط أو قيود ... أو عصبيه أو أنانية

esmat

01-08-2010, 10:33 PM

حبيبنا جلالة
بوست مفيد جداً لنتعلم منه آداب الحوار وآداب المنتديات سيكون شمعة تضئ لنا الطريق
خلافي مع أحد الأعضاء لا يعني خلافي مع الموقع

ولو كتبت هذا الخيط لكفي

أحمد عمر ( MOODY )

02-08-2010, 12:49 AM

مدنيّة

02-08-2010, 01:05 AM

جلالة
الزوغان خليه

كدي اتكلم لينا عن الاقتباس الجبته ليك انا

عثمان جلالة

03-08-2010, 12:30 AM

إسمت

مودي

مدنيه

من الشخصيات الأدهشتني بأريحتها .. و .. فهمها الراقي .. وتعاملها الطيب ... كل من قابلته من أخوة وأخوات أعزاء من أعضاء المنتديات ولكن سأبدأ أولا بالأعمام .. ههههه ... أول حاجه خلوني أقول ليكم .. أنا كنت فاكر المنتديات دي بشتركو فيها شباب بس من سن العشرين مثلا وحتى الأربعين .. لكن كونوا ألاقي ناس فوق الستين أعضاء واقلام محترمه .. ووجوه بهيه وصبوحه يسعدها خدمة الناس .. هذا ما جعلني أحترمهم أولا .. وأفخر بإنتمائي لهذا الصرح:

الأستاذ عمر سعيد النور

الأستاذ عمر غلام الله .. 114

حبيبنا ..مرتضى العركي

مجدي سنجر

مستشارنا عوض صقير

مستشارنا صابرحسين

مستشارنا ... شبندر (هههههههه معليش ختيتك مع الناس الكبار ديل مع إنك صغير وكده)

الأستاذ صالح أبو شوارب

الاستاذ عباس مدني

الاستاذ حاتم مرزوق

الحبيب محجوب المحبوب

وآخرين كثر .. إلتقيتهم ... وسعدت بلقياهم .. وأخجلوني بتواضعهم وتعاملهم الطيب .. وحفاوتهم البالغة بشخصي الضعيف .. ومنهم تعلمت أن العطاء ... لوطنك وإنسانه لا يرتبط بسن أو عمر محدد .. فأنت قادر على العطاء في كل مكان وأي زمان.

مدنيّة

03-08-2010, 12:36 AM

تصدق ياجلالة
لما مشينا زواج بت عمك تنقو
ابو جمال قال لي معاكم ناس بناتهم عايزين يتزوجوا ؟!!

يعني نفس فهم انه المنتديات بشتركوا فيها الشباب وكدا عند ابوجمال برضو

عثمان جلالة

03-08-2010, 12:41 AM

في نفس الوقت .. كان في ناس .. من خلال أقلامهم وكتابتهم كنت فاكرهم كبار في السن لكن فاجأني النهار أقصد ... لقيت الفكره غير بعد لاقيتهم.

حبيبنا ود الطاهر

بكري قراي مان

مدنيه .. أسماء

اعتماد

وداد

ساميه عباس

ود المدثر

أبو عمرو

عثمان جلالة

03-08-2010, 12:53 AM

لكن بصراحه أكتر إتنين .. كنت خاتي عنهم فكره لقيتها الضد بعد لاقيتهم هم:

أمير عبد اللطيف .. ومدنيه أسماء

أمير عبد اللطيف .. زول كان قنصل في سفارة السودان بجده .. يجي مخصوص عشان يقابل شخصي الضعيف ويفضي وقتو الثمين عشان يقعد معاي ساعتين ... وكانت اجمل ساعتين .. كلها ضحك وفرفشه .. وكأننا أولاد دفعه والله .. له مني كل تحية وتقدير.

مدنيه .. أسماء ... إكتشفت إنها زوله مختلفه .. جدا ... يعني في المنتدى من خلال كتاباتها .. بتحس إنها زوله صعبه .. وما بتقدر تتكلم معاها كلمتين .. لكن بالجد بعد ما قابلتها إكتشفت الضد ... تماما .. زوله بت بلد .. وتجبرك على احترامها وتقديرها.

ودالعمدة

03-08-2010, 02:50 AM

دخلت في نفس الموضوع وشاركتهم .. وهاتفت المعز .. وعاتبته لانه لم ينبهني من وقت طويل على هذا الابداع في منتديات ود مدني .. وهذه الأقلام لأنهل من فيضها
بعدها بـ نصف ساعة رن هاتفي برقم غريب
وكان هذا نص الحوار
عثمان : ألو
الطرف الآخر : معاي عثمان جاد الله
عثمان : نعم أي خدمة ؟
الطرف الآخر : معاك سفارة جمهورية السودان :confused:
قلت في نفسي يااااااربي ما دفعت الضريبه .. ولا شنو ؟؟ ما لهم ناس السفارة معاي
الطرف الآخر : نحنا يا عثمان متابعين .. وراصدين كل تحركاتك .. إنت جبت مرتك زيارة وإشتركت في منتديات ود مدني .. أعمل حسابك :mad:
وقفل الخط ...... وأنا ما عرفت أمشي وين ؟؟؟
بعد شويه رن الهاتف تاااااااااني ونفس الرقم .. قلت ما أرد عليهو في الآخر .. قلت موت موت حياه حياه
أول ما قلت ألو : جاتني في الطرف الآخر ضحكة مجلجله ... وصوت يقول لي تخاااااااااف يا كبير :o
معاك صلاح ود الطاهر .. وكنت معانا في الكمرا الخفيه هههههههههههههه :mad:

العزيز الغالى عثمان جلالة
الفلم دا ماغريب على الظاهر انا خشيتوا مرتين !!
مرة معاك ومرة مع ود الطاهر له و لك اطيب التحايا
بعدين ياود جلالة موضوعك دا مالو يشبه لى ( اسماء فى حياتنا )
وحديث الذكريات دايما بيجى بعد تخطى ( الستينات )
موضوعك دا قمة الدسم ويستاهل نجومية العام وليس الشهر
احتراماتى القلبية

عثمان جلالة

03-08-2010, 11:32 PM

حبيب القلب ود العمده :):):) ........ ههههههههه والله كانت أجمل مكالمه ... والله ... أجمل ما فيها جرستك طبعن :rolleyes: .. الناس الصادقين دايما حساسين ومرهفين شديد .. ودي تسمى عند الأنصرافيين جرسه :o تعرف اليوم داك .. بقيت قدامي كتاب مفتوح .. وإظن إنو دا طبعك ... زول متصالح مع الكل ومع نفسك ... كتر خيرك يا حبيب .. وناس المدينه المنوره دايما متميزين والله ... إنت والعزيز أب قرجه ... لكن للأسف لسه ما ستوعبت السبب البودي الجنى الممسوخ ود أم تريبات "معز" المدينه المنوره شنو؟؟؟ .. أصلو ما مفروض يكون هناك :rolleyes:.... عليك الله إتواصلو معاهو الزول جاكم جديد في مدينة المصطفى صلى الله عليه وسلم .. ولو ما عندك تلفونو .. رسل لي في الخاص.

سعدت جدا بمداخلتك دي يا حبيب .. زي ما سعدت في ذلك اليوم الذي هاتفتك فيه.

لك الكثير من الود،،،

العاقب مصباح

08-08-2010, 06:57 AM

الجميل السادة وضاح المحيا

عثمان ود جاد الله
كيف حالك ياخى
وكيف الخطيبة العزيزة منة الله عساها بخير
رومضان كريم ياخ
جيت فى مكان الإندياح دا عشان عاجبنى شديد
وقلت أشد من أزرك وكدا

عثمان جلالة

08-08-2010, 09:44 PM

العاقب أخوي .. كيفنك آآآ ود المصباح .. ومشتاقين والله يا حبيب من كترة الشوق .. قميصك الوردي وردي ... ده ..يتوازى لي في كل حته وكل شارع وكل زول :) .. لدرجة إني لامن أشوف محمد وردي بتذكرك تصدق ... أمس جانا محمد وردي .. وترنم .. بـ "أقابلك في زمن ماشي .. وزمن جاي .. وزمن لسه" ..أشوف الماضي فيك باكر أريد باكر يكون هسه" ياسلام يا عقبه ... زمن النيمه ياااااااااااخ والإنداياحات .. والبراحات ... والإشارات الخضر هههههههههه ... ودي طبعن يا حبيب القسا عندها مقاييس خاصة .. يكون يمينك ود المدثر ... وشمالك ... مهندسنا أب قرجه ... ومعاك في كابينة القياده العاقب ... كل الإشارات ح تبقى خدر .... والإنداياحات الطاااااااااااعمه ح تنسيك عطش رمضان ... لو إنت نسيت أنا ما نسيت .. رمضان الفااات .. في نيمتنا الفتو خلتيتوها كلكم دي ... يوميا بنجي نفرش سباتاتنا .. ومشاعرنا وأحاسيسنا النبيلة ... ويجن البنوت الطاعمات الأصيلات .. مايسه ، والملكه، والزونيه ، وبت مارنجان ، ومرام ، وووووووووووو كتارهن ماشاء الله عليهن .. يجن بكل زوق .. يجهزن مويه الفطور .. ويعوسن العصيده .. وقبل الفطور ... نجري نحنا في شوارع المنتدى نفتش في الضهبان .. ونتقالع فيهو في شان يجي يفطر معانا ... ياااااااااخ زمن حلو ... وحياه كلها بساطه .. والفه وموده ... كتر خيرك يا حبيب .. ورمضان كريم ورمضان الجاي .. في بيتك مع مرتك بركة إلهي وجاهي .... يا ود المصباح ... ربنا يديك لاااااااامن يرضيك آآآآآمين.:):)

تغريدا

11-08-2010, 01:14 AM

[QUOTE=عثمان جلالة;517259]تعلمت يا سادتي :

1- الصبر

2- الدبلوماسية

3- عدم قفل الباب في وجه أي نقاش

4- الحلم

5- البعد عن الغضب

6- أن أجد العذر لأخي أو أختي دائما

7- تقديم أي مساعده للآخرين ما دام ذلك ممكننا

8- التعامل بصدق مع الآخرين

9- خلافي مع أحد الأعضاء لا يعني خلافي مع الموقع

10- أن كل ما أكتبه أو أقوله من كلام ... لا يمكن تعديله في وجود خاصية الإقتباس :rolleyes:

11- الإحترام الكبير للجميع

12- عدم الحكم على الأشياء من ظاهرها.

13- الحب للجميع بدون شروط أو قيود ... أو عصبيه أو أنانية[/

الأخ عثمان السلام عليكم تصوم وتفطر على خير بالجد بوست رائع ومأجمل الذكريات الجميلة عندما نتذكرها ونستنشق عبيرها ونتنسم هواها ومشكووووووور على الناصائح الجميلة دى وياريت تكون فى دواخل الجميع