مشلحس و مرندش

[بدرالدين أحمد موسى]

مشلحس و مرندش

مشلحس و مرندش ليست من لغة الرندوك المستخدمة هذه الأيام من الجيل الحالى بلا استثناء . و بلا استثناء يعنى من الجنسين مع الاحتفاظ بالفوارق الواقعية .

مشلحس هى اندماج كلمتين معبرتين عن واقع معاش الأولى من الدارجة السودانية وهى مشلهت و الثانية من العربية الفصحى و هى نحس بفتح النون و تسكين الحاء و السين . أما مرندش فهى نتاج اندماج طبيعى لوضعين متلازمين و الشرح يغنى عن التعبير عن الحالة . فالأولى بالفصحى مرطب و الثانية بالدارجة مكندش .

مشلحس بعد صراع طويل مع ظروف الحياة التى وجد نفسه ترسا من تروسها استطاع أ ن يكمل تعليمه و يدخل فى دوامة البحث عن الوظيفة كما هو حال كل البشر . و بما له من طموح أيضا مشروع لكل البشر فقد تقدم الى لجنة الأختيار للمرة الخامسة و الستون مكرر للحصول على وظيفة الضابط الأدارى الوحيدة المتاحة فى ذلك الزمن . و من ضمن الاستعدادات لشغل الوظيفة فقد اجتهد فى زيادة المعرفة من العلوم الشرعية و ما فى حكمها تماشيا مع طبيعة المرحلة عله يتمكن من إقناع أعضاء لجنة الاختيار المنتمين افتراضا لنفس المجال . قصر البنطلون و لبس القميص من بره و اجتهد لإعفاء اللحية لإسباغ صورة الشاب الوقور الملتزم . شال جواله فى الجيب و دخل على لجنة الاختيار .

دخل على اللجنة و بسم الله ماشاء الله أجاب على جميع الأسئلة و لم يبقى سوى أن يسمع كلمة مبروك من رئيس اللجنة . و هنا رن هاتفه النقال أو قول الموبايل و كانت ساعة النحس و انطلقت النغمة ( البنسلين ياتمرجى ) طبعا الباقى انتو عارفينو ... آآى لسه ساكى الوظيفة .

مرندش ماكان محتاج للكثير للتنافس على نفس الوظيفة و من خلال ذات اللجنة . دخل على أعضاء اللجنة و أجاب على جميع الأسئلة لسبب بسيط هو أن الأسئلة بسيطة , تقليدية و مكشوفة . و باركو ليهو الوظيفة و لكن دق جرس الموبايل ( هى زى كده .... حلو حلا ) و برضه أخد الوظيفة لأن أعضاء اللجنة أصلا من جماعة مثنى و ثلاث و رباع . و اعتبروا الأغنية متسقة مع النهج الحضارى السائد . و عشان كده اعفاءات عفش المغتربين فى العودة النهائية معفى من الجمارك مثنى مثنى تحسبا للزوجة الثانية .

و نلقاكم فى شلحسة قادمة .

أخوكم بدرالدين

[نزار حسن محمد]

بدرالين حبابك
بوست برائحة الدعاش والمطر
واصل ياجميل ونحن فى انتظارك

[بدرالدين أحمد موسى]

بدرالين حبابك
بوست برائحة الدعاش والمطر
واصل ياجميل ونحن فى انتظارك

شكرا على مرورك الجميل و المطر التقيل قدام

[عوض صقير]

الحبيب بدر الدين


نحييك على هذه الشلحسة المرندشة التى تشبه كورتك فى دافورى مدرسة النهر عندما تكون مغلوب


سعداء بهذه الدردشة المهضومة وفى إنتظار المزيد ... يا حبيب

[ABUZAID]

استاذنا الغالي
بدر الدين احمد موسى

كل الود

تصور واقعا معاشا للكثير

بكل ما فيه من روعة الحرف
ومرارة الحال والموقف


فلم يكن التخصص مقياسا ولا معيارا

بل كانت عوامل اخرى تلعب دورا
وتتحكم في اختيار صاحب الوظيفة


وكما فعل الكثير غيره
سيفر هذا المشلحس
بلا رجعة

ليقدم خلاصته لغيره
فيبدع ويتفنن ويقنع


تحياتي

[بدرالدين أحمد موسى]

الحبيب بدر الدين


نحييك على هذه الشلحسة المرندشة التى تشبه كورتك فى دافورى مدرسة النهر عندما تكون مغلوب


سعداء بهذه الدردشة المهضومة وفى إنتظار المزيد ... يا حبيب

تعرف يا عوض لا زلت أذكر ثنائية تكل و عوض صقير . و جرية علاء الدين الفانتوم .. أيام يا رجل .
للمناسبة الحلقة الجايه ان شاء قصة واقعية حصلت مع أخونا عاطف عابدين .
لكن انتظرنى فى بوست ( ناس نجيضون )

[بدرالدين أحمد موسى]

استاذنا الغالي
بدر الدين احمد موسى

كل الود

تصور واقعا معاشا للكثير

بكل ما فيه من روعة الحرف
ومرارة الحال والموقف


فلم يكن التخصص مقياسا ولا معيارا

بل كانت عوامل اخرى تلعب دورا
وتتحكم في اختيار صاحب الوظيفة


وكما فعل الكثير غيره
سيفر هذا المشلحس
بلا رجعة

ليقدم خلاصته لغيره
فيبدع ويتفنن ويقنع


تحياتي



بالفعل واقع معاش و أليم و ما عرفين حدو وين .. شكرا لمرورك

[بدرالدين أحمد موسى]

2
مشلحس و مرندش

مشلحس عارف امكانياته كويس و عشان كده مده كرعيه على قدر لحافه . أخد خطيبته و مشى كورنيش مقدر الظروف . يعنى حدائق 6 أبريل و اشتراها ليهو كمية لا بأس بها من التسالى لزوم قراية الجرايد و التقاط الأنفاس . و على أية الأحوال الأثنين راضين بى نصيبهم فى ظل الظروف القاسية و مكتفين بالونسة الى أن يقضى الله أمرا كان مفعولا .

و هم فى عز الونسة و بعض الهيام و الآمال جوهم 3 من ناس الأمن أيام ما استحدث ما سمى بقانون العدالة الناجزة . رئيسهم طلب من صاحبنا اثبات العلاقة .و بما أن الخطوبة صعبة الأثبات لغياب الأسانيد المكتوبة فصاحبنا لم يتمكن من اثبات أى رابط سوى أن التى معه خطيبته التى اختارها للزواج عندما تتحسن الظروف . لكن بتقنع مين !! ناس الأمن ؟؟
واحد منهم مد يده عليه و تعاركوا عراكا أفضى الى قسم الشرطة .

صاحبنا فى قسم الشرطة شايل باقى تساليه فى جيبو شاف ليك الحراسة ( يعنى التوقيف ) و تفوح منه تلك الروائح الكريستالية ممزوجة بعرق ناشف مع رطوبة ( شرحه يطول ) . يعنى ما فيش أسوأ من كده و اللى زاد الطين بله ممنوع الخروج حتى للحمام اللى هو أصلا حوش غرفة الحراسة

حبيبى شاف بى عينه و بحدة قال لى الضابط انت عاوزنى أبيت هنا ؟؟. الضابط قال ليه يعنى حتبيت فى الهيلتون . مشلحس قال ليه انت عارفنى أنا وود منو . الضابط قال ليه يعنى حتكون ود منو . قال ليه أنا ود ابراهيم عبد الكريم . انت دخلنى الحراسة دى و بكرة تشوف اللى بيحصل ليك شنو.

الضابط قال فى نفسه يمكن ابراهيم عبدالكريم ده يكون لواء فى الجيش فى الجنوب ولا حاجة و مافى داعى أخاطر بى مستقبلى . المهم خلاهو بيت فى غرفة الضابط .

تانى يوم من الصباح عمك ود عبد الكريم جاء سايق ليهو عجلة بدون رفارف و لا فرامل و خاشى القسم . أول ما شاف مشلحس . ايه يا ابنى خير ان شاء الله . ياجنابو الولد ده مالوا . عمل شنو . الضابط التفت لى مشلحس و قال ليهو : ياهو ده أبوك . قال ليه أيوة . و أحلى كف من زول مغبون و غضبان : وماسكنى من امس انت ماعارف أنا ود منو . انت دخلنى و شوف البيحصل ليك . قاطع قلبى من أمس فى الفاضى . المهم مشلحس طلع من الورطة بأقل الخسائر . عرض على القاضى و غرامة 5 ألف و انتهى الموضوع .

فى الجهة المقابلة من حدائق مقدر الظروف مرندش نزل من العربية معاهو خطيبته و دخلوا الهيلتون اتعشوا و أكلوا آيس كريم و غنوا لى بعض . و معزز مكرم أخد خطيبته متشابكى الأيدى و ركبو عربيتهم قدام بتاعين الأمن . و قبل ما تنزل كيس هديه بمناسبة اللامناسبة

و نلقاكم فى شلحسة قادمة .

أخوكم بدرالدين

[عوض صقير]

بدر الدين ذكرتنى قيدومة أخونا جمال أبكيس

يا زول كانت قيدومة كاربة جداً وعربات الحضور كانت كلها فارهة

المهم جمال عنده صاحبه جاء بى عجلة بدون رفارف وعندما ذهب جمال لتقديمه نظر إليه ولعجلته وقال له إنت ما شايف العربات الواقفة دى جايينى بى عجلة وكمان ما فيها رفارف

صاحبنا سريع البديهة طوالى قال لى جمال ياخى أعتبرنى واحد من أعمامك



واصل ياحبيب مستمتعين بالسرد الممتع

[معتز الريح]

متابعين ومستمتعين ..
واصل يا رائع ..

[بدرالدين أحمد موسى]

بدر الدين ذكرتنى قيدومة أخونا جمال أبكيس

يا زول كانت قيدومة كاربة جداً وعربات الحضور كانت كلها فارهة

المهم جمال عنده صاحبه جاء بى عجلة بدون رفارف وعندما ذهب جمال لتقديمه نظر إليه ولعجلته وقال له إنت ما شايف العربات الواقفة دى جايينى بى عجلة وكمان ما فيها رفارف

صاحبنا سريع البديهة طوالى قال لى جمال ياخى أعتبرنى واحد من أعمامك



واصل ياحبيب مستمتعين بالسرد الممتع

قيدومة أبكيس . ملعوبة يا ود صقير

[بدرالدين أحمد موسى]

متابعين ومستمتعين ..
واصل يا رائع ..

شكرا على مرورك يا معتز

[بدرالدين أحمد موسى]

مشلحس و مرندش

الحلقة الثالثة


مشلحس عنده قطعة أرض من زمن الخطة السكنية للعام 1950 م فى بحرى و ماقادر يعمل فيها حاجة . مؤخرا جاتهم التكسيرة . و التكسيرة مصطلح استخدم سابقا لتعديل المخططات السكنية القديمة بغرض خلق مساحات لتنفيس الأحياء القديمة بهدف خلق بيئة صحية جيدة . و دى برضوا راحو فيها ناس مشلحس و اغتنوا منها ناس مرندش .

ربك رب الخير طلع لى مشلحس مبلغ لا بأس به من ورثة جده من جهة أمه و قرر يبنى القطعة بتاعة بحرى على قدر حاله . يعنى غرفتين مع برنده و حمام و مطبخ . جاره بانى 3 طوابق و مكيفاته كلها اسبيليت ما بتقيف . المهم صاحبنا بدأ حفر الأساسات و طلعت ليهو موية فى أثناء الحفر . المعلم عمل ليهو مس كول . مشلحس جرى جاب ليهو رصيد بى ألفين و ضرب للمعلم . المعلم قال ليهو يا شيخنا طلعت لينا موية و لو ما عالجنا مشكلة الموية الأساسات دى بعدين بتنهار .
تانى يوم من الصباح ساق ليهو سباك و مشوا للموقع . السباك قال ليهو الموية دى جايه من جارك المرطب ده . مشلحس بيدق فى الجرس و الباب لى الساعة 11 صباحا . مشى فطر و رجع و للساعة 2 لاحياة لمن تنادى بس سامع ليك صوت كلاب الحراسة تنبح و المكيفات تنبح . قدر انو الناس ديل نايمين دفع للسباك اليومية و اتفقوا يجو بكره . رجع تانى يوم الصباح شايل فطوره معاه . و كلاكيت مكرر حتى الساعة 3 . و برضك دفع للسباك اليومية و قال ليهو أنا بكره بجى براى و كان لقيتهم باكلمك .
ثالث يوم جاهم بى فطوره و غداه و مويتو . و بيضرب فى الجرس من الصباح . الساعة 5 مساءا فتح باب الجراج . بى ام دبليو على كيف كيفك . نزل القزاز الأتوماتيك و أطل عليه وجه ندى و رطب متورد الخدود . بس تقول مغترب فى أول يومين من اجازته. قال ليهو شنو يا أخينا ليك 3 يوم عامل لينا ازعاج لحدى ما فصلنا الجرس . الحكاية شنو . قال ليهو ياخى أنا جاركم و قاعد أبنى و لقينا فى موية جايه من عندكم . سباكى جاهز بس أفتحو لينا عشان نشتغل .
قال ليهو : خلاص نحن بنجيب سباك يصلحها و لو سمحت تانى ما تضرب الجرس ده . رجع زجاجه و رجع للكندشة . شفتو الرندشة كيف .


و نلقاكم فى شلحسة قادمة .

أخوكم بدرالدين

[عثمان جلالة]

حبيبنا بدر الدين .. واصل متابعين .. ومستمتعين .. وممحنين من عجايب الزمن .. ومن هنا ومن خلال هذا البوست .. كل التحايا للمرطبين .. المرندشين .. والمشلحسين .. الـ لي فرج الله منتظرين :o

[ابوالنور]

عارف يا بدر الدين بدرالدين ... دواك عندي لكن ما بديك ليهو
عشان تقعد تهترش لينا كدا لمن روحك تطلع
معليش ما غتاتة مني ...
لكن بتكيف للزول البدور براهو بدون لزه (افتح اللام عليك الله)
وبالمره فتّح عينك عشان كلمة الهترشة دي بتجيب ليك الهوا
الجماعة حايمين وبنخاف عليك من البلاك لست (هنا اكسر لي اللام عليك الله)
علي اي حال ... عديها فتح وكسر لغاية ما يرفسك حصان
تحياتي يا الز زول

[عوض صقير]

بدرالدين

الخوف من مرندشة زوجة مرندش تقوم تزعل من تصرفات مشلحس المزعجة فى ضرب الجرس

وتطلب من مرندش شراء قطعة مشلحس بأى ثمن

وجعلها حديقة وإمتداد لمنزلهم المكندش


وطبعاً فى الحالة دى وزى ما أنت عارف قرارات مرندشة تعتبر نهائية وغير قابلة للأستئناف أو الطعن



واصل وفى إنتظار المزيد من الشلحسة والرندشة ....

[بدرالدين أحمد موسى]

كله وارد يا شيخ عوض و برضه القرار نهائى !!!!!!!!!!

[عوض صقير]

مرندش ده طبعاً ما بنسأل عنه , لأننا عارفينو من ترطيبة لى ترطيبة وماعنده عوجة تب


لكن حبيبنا مشلحس قلبنا عليهو إن شاء الله تكون أموره إستعدلت شوية ...

[بنت الرفاعي]

مرندش ده طبعاً ما بنسأل عنه , لأننا عارفينو من ترطيبة لى ترطيبة وماعنده عوجة تب


لكن حبيبنا مشلحس قلبنا عليهو إن شاء الله تكون أموره إستعدلت شوية ...

لازم نعرف ترطيبة مرندش دي من وين، من وراء ظهر وعرق مشلحس:(، ولّا بأخوي وأخوك؟؟!!!:confused:.

[بدرالدين أحمد موسى]

لازم نعرف ترطيبة مرندش دي من وين، من وراء ظهر وعرق مشلحس:(، ولّا بأخوي وأخوك؟؟!!!:confused:.


سؤال مشروع يا مرام و يقبل كل الأحتمالات لكييييييين . باقى ليك كان ضاربوا فيها حجر دغش كان بترندش قدر ده .

[بدرالدين أحمد موسى]

مشلحس و مرندش

الحلقة الرابعة

خلص الدراسة و لأنه أكبر واحد فى البيت و أهله تعبوا فيه و هو ذاته تعذب الى أن أنهى دراسته فقد كان حافظا للجميل و أخذ على نفسه عهدا أن يجتهد قدر الأمكان لمساعدة أسرته ..

عندما سمع بفرصة الوظيفة الجديدة المعلن عنها لم يتردد فى تعبئة الطلب ..و عانى ما عانى للحصول على نموذج الطلب .. و لأنو الوظيفة ممتازة .. وضعت لها ضوابط من ضمنها أن يزكى المتقدم من قبل شخصين , و مش أى شخصين . يعنى انا و انت توقيعنا ما ليهو أى قيمة .

خاله أخو أمه لزم شخصية نافذه فى المجتمع و تزكيته مضمونة .. مشى لى خاله و شرح ليه الأمر ... وقع الخال فى خانة المزكى الأول .. و لأنه حبيبى ماعندو معارف كثير .. طلب من خاله ترشيح واحد ثانى .. و بالفعل الخال قال ليه أمشى لى فلان و قول ليه أنا جاييك من طرف علان ..

يامؤمن .. يا مصدق .. مشى للراجل و طلب تزكيته .. الراجل قال ليه : انت متأكد انو فلان ده خالك ..؟ قال ليه طبعا و أخو أمى لزم.. الراجل قال ليه : وهو نفسه اللى وقع التوقيع ده .. ؟ صاحبنا قال ليه : أيوه خالى و وقع قدامى ..

قال ليهو : أرجع لى خالك و قول ليهو التوقيع ده تستعمله عندك فى المصلحة .. عندنا نحن ما بيمشى ..

و طبعا حبيبى .. قفل راجعا ليس الى خاله و لكن من حيث أتى و ربنا وفقه فى فيزا للسعوديه .. نسأل الله أن يجعله من المرندشين بعد شلحسة السنين ..و لازال محتفظا بالطلب ..

أما الوظيفة .. فقد ذهبت لأحد المرندشين .. بتزكية من اثنين من فئة الأكثر رندشة ... و المؤلم المرندش بعد شهرين .. ترك الوظيفة الى أخرى أكثر كندشة


و نلقاكم فى شلحسة قادمة .

أخوكم بدرالدين

[عوض صقير]

لازم نعرف ترطيبة مرندش دي من وين، من وراء ظهر وعرق مشلحس:(، ولّا بأخوي وأخوك؟؟!!!:confused:.


أختنا مرام هناك قانون يبدو أنه مجمد أو صلاحيته أصبحت منتهية يسمى ( من أين لك هذا ) ... لو أى وواحد دق صدره من الجماعة الطيبين وعمل على تفعيل هذا القانون سوف يظهر العجب العجاب ... وما خفى أعظم ...

[الاميره]

ونسه ظريفه.. عن واقع اعتبره طبيعى بين طبقات المجتمع..فقط لو كان تعامل المرندشين باحترام للمشلحس..والعكس.
تحضرنى قصه واقعيه
مشلحس خلص الجامعه وجاتو فرصة لوترى لاميريكا..وبعد سنه استقرار رجع وتزوج مشلحسه وعاد لاميريكا ولحقته مشلحسه واكملو دراستهم الجامعيه وعملوا وربنا فتحا عليهم بالعيال والمال..وبعد غربه عشر سنين عادا واستقرا فى المنشيه وكانت يادوب خراب وغفارى ..لكن اصبحا من اوائل المرندشين فى المنطقه..وبفكره الواعى للمتطلبات المنطقه عمر وعمر..ولما عمرت الرياض كمان عمر فيها واصبح من المعروفين بين المرندشين الاخرين..لكن فى فرق بين مرندش بعقلو وووعيو..وبين مرندش ابا عن جد ( عاش وفى فمه ملعقة دهب )حتى لوكان جاهل..

المهم:
فى يوم اهل مشلحسه البقت مرندشهزاروهم فى فيلتم الجديده ..الفى الرياض..وكان جنبها قلعه .وطبعا القلعه دى منو الماعارفها..
ضربوا الجرس..وهم منتظرين من ياتى لفتح الباب ..فجأه..تتفتح بوابه لوحدهالاغفير ولاخدام فتحا..وسبحان الله..من تحت الارض(الواطه)طلعت عربيه لاند كروزر..وناس مشلحس مندهشين ويعاينو للعربيه تنزل الزجاج اتوماتكلى وتغفل البوابه..والمرندش بدل السلام رفع اصبعه عليهم ووجه يده فى شكل مسدس للمشلحسيه وبش طاخ فى وشهم وطار.. دا مستوى بعض المرندشين..
بس كان المشلحسيه ديل ما يعاينو ليه برضو ولا ينبهروا للدرجه دى .

[ود نقد]

الموضوع وصل وين شوقتنا يا راجل

[بنت الرفاعي]

سؤال مشروع يا مرام و يقبل كل الأحتمالات لكييييييين . باقى ليك كان ضاربوا فيها حجر دغش كان بترندش قدر ده .

:(الله يعين اللي زي ناس مشلحس!!:(

مُشلحس لو جاتو فرصة يبقى زي مرندش ويبقى من المُرندِشين، وبطريقة مرندش حَ يوافق؟؟؟!!!:confused:

[بنت الرفاعي]

أختنا مرام هناك قانون يبدو أنه مجمد أو صلاحيته أصبحت منتهية يسمى ( من أين لك هذا ) ... لو أى وواحد دق صدره من الجماعة الطيبين وعمل على تفعيل هذا القانون سوف يظهر العجب العجاب ... وما خفى أعظم ...

إذا كان أغلب الجماعة الطيبين مُرتاحين للتجميد ده، حيجي واحد منهم ويفعلوا كيف، ويفتح جبهات على نفسو هو في غنى عنها (حيقول أحسن يكون طابقو وطابق غيرو مستور)؟؟؟!!!:(

الله يعينك يا بلد، ويحفظك من بعض من حُسبوا من أبنائك!!

[بدرالدين أحمد موسى]

ونسه ظريفه.. عن واقع اعتبره طبيعى بين طبقات المجتمع..فقط لو كان تعامل المرندشين باحترام للمشلحس..والعكس.
تحضرنى قصه واقعيه
مشلحس خلص الجامعه وجاتو فرصة لوترى لاميريكا..وبعد سنه استقرار رجع وتزوج مشلحسه وعاد لاميريكا ولحقته مشلحسه واكملو دراستهم الجامعيه وعملوا وربنا فتحا عليهم بالعيال والمال..وبعد غربه عشر سنين عادا واستقرا فى المنشيه وكانت يادوب خراب وغفارى ..لكن اصبحا من اوائل المرندشين فى المنطقه..وبفكره الواعى للمتطلبات المنطقه عمر وعمر..ولما عمرت الرياض كمان عمر فيها واصبح من المعروفين بين المرندشين الاخرين..لكن فى فرق بين مرندش بعقلو وووعيو..وبين مرندش ابا عن جد ( عاش وفى فمه ملعقة دهب )حتى لوكان جاهل..

المهم:
فى يوم اهل مشلحسه البقت مرندشهزاروهم فى فيلتم الجديده ..الفى الرياض..وكان جنبها قلعه .وطبعا القلعه دى منو الماعارفها..
ضربوا الجرس..وهم منتظرين من ياتى لفتح الباب ..فجأه..تتفتح بوابه لوحدهالاغفير ولاخدام فتحا..وسبحان الله..من تحت الارض(الواطه)طلعت عربيه لاند كروزر..وناس مشلحس مندهشين ويعاينو للعربيه تنزل الزجاج اتوماتكلى وتغفل البوابه..والمرندش بدل السلام رفع اصبعه عليهم ووجه يده فى شكل مسدس للمشلحسيه وبش طاخ فى وشهم وطار.. دا مستوى بعض المرندشين..
بس كان المشلحسيه ديل ما يعاينو ليه برضو ولا ينبهروا للدرجه دى .

أيتها الأميرة الفوارق الطبيقة وردة و لكن الواسطة أقل درجات الفساد .أما الحديث عن احترام المرندشين فدى مسألة تربية . خليك متابعة و جاييك ( ناس نجيضون ) عشان تعرفى حاجة .

[بدرالدين أحمد موسى]

الموضوع وصل وين شوقتنا يا راجل

وييين يا ود نقد نحن يادوبك فى البداية . التقيل قدام .. و ناس نجيضون دى حقتنا برانا . و بعدين يا شيخنا شايفك من حى الثورة . دحين الثورة دى يا ها حلتنا اللى فى مدنى و لا غيرها . !!! أهو طلعنا جيران .

[واصل]

السلام عليكم ورحمة الله موضوع لذيذ يامرطب , المهم الراجل فتح السعوديه وخلا الشباب مصيرم شنو

[محمد علي شقدي]

تحياتي يا بدر الدين شوف جيد لواقع معاش

شكرا للتعبير الجميل

[بدرالدين أحمد موسى]

5
مشلحس و مرندش
فى مربع 30 تلقوا ليكم بيت من 5 طوابق و قبل منه بيت من طابق أرضى لكن الأساسات بتاعته معمولة على 4 طوابق لأنو المهندس التفتيحة قال لى ناخد تصريح البناء على طابقين و بعد كده بتبقى الأضافة هينة . طبعا صدقته على اعتبار أن أهل مكة أدرى بشعابها.
ضربت ليهو تليفون وطلبت منه يعمل لى اضافة للطابقين الساهلين . رسم الخرط و قدم الطلب حولوهوا لى حاجة اسمها لجنة الأرتفاعات . و دى شكلها عاملينها للمشلحسين عشان يتعذبوا شوية .

ناس لجنة الأرتفاعات قالوا ليهو تدفع 4 مليون رسوم عن كل طابق اضافى و تلتزم بالأبتعاد عن جارك مترين و نص . طبعا أنا زعلت شديد لأنو جارى البانى 5 طوابق ده ما يبعد عنى أكثر من متر . يعنى كان مديت ايدى من البلكونه بتناول الملح .
صممت أنوا لازم أقابل ناس الأرتفاعات و أحتج بشده و أطلب المعاملة بالمثل . و فعلا ركبت ليك طيارتى .. أقصد طيارة السعودية . و يوم الثلاثاء موعد اجتماعاتهم .

اتلبست ليك من الصباح و مشيت للمهندس . قال لى : شوف يا بدرالدين . نحن ممكن نمشى هسه لى ناس الأرتفاعات و نبلغهم انو جارك بانى 5 طوابق و بدون الألتزام بالمسافة المطلوبة . و كل اللى حايحصل أنو حيدفعوا جارك غرامة حوالى 30 مليون .

قلت ليهو و بعد ما يدفع الغرامة البيحصل لى أنا شنو . قال لى ولا شىء . الغرامة حتدخل الخزنة و البيت حيبقى زى ماهو و انت ما حتعمل 4 طوابق الا اذا بعدت عن جارك مترين و نص.
رجعت لى جارى قلت أنبهوا على الموضوع . و الظاهر عليهو مرندش شديد. أتاريهو عندو تصريح بناء بى الطوابق الخمسة و بدون ما يبعد عنى المساحة المطلوبة .

و أنا أخير من صاحبى مصطفى . ده لمان خلص الأرضى و الأول راح عامل الأعمدة للثانى . و لما وصل مرحلة السقف اتذكر انو ما عمل تصريح البناء للطابق الثانى . بحسن نية مشى بى رجليه وقدم طلب اضافة طابق . رسلوا ليهو مهندس يكشف !!!... لقى ليك العمدان .

عليكم أمان الله شهرين تلتلة و 18 مليون غرامة ده غير الرسوم . دحين أنا ما أخير من مصطفى .


حكينا الموضوع لى أخونا سيد أحمد . قال لينا أنتوا ما بتعرفوا حاجة . على الطلاق أنا بنيت الطابق الثانى و ما اشتغلت بى زول . لكن كنت ببنى بالليل و تانى يوم الصباح لما يجوا ناس المواطر ديل طوبة ما بيلقوها لحد ما تميت بيتى و سكنت و كمان هسه مؤجر.




و نلقاكم فى شلحسة قادمة .

أخوكم بدرالدين