قصــة مُنتدانا [الأرشيف] - منتديات ودمدني

محمد الجزولى

27-07-2010, 11:14 PM

اطرق الباهى بنظره قليلا قبل أن يرفع رأسه وهو يجلس بين يدي أمه وأبوه
المكان عبارة عن غرفه صغيره شيدت بالطين اللزج يتوسطها باب خشبي يفتح مباشره في الشارع
يقع المنزل في طرف قصي في تلك القرية الوادعة التي تبعد حوالي 100 كيلو متر عن المدينه
أساسها البساطة وقوامها الطيبة والتعاضد والتواد بين سكانها
ساد الصمت لفترة قطعه الباهى مخاطبا والده
الباهى: شنو الحكاية يا ابوى ؟؟؟ ما اديتنى رأيك ؟؟؟
الأب: رايى !!!! رأى شنو يا ولدى... انت خليت لي رأى.. ما خلاص قررت براك وجيت جاهز بقرارك بس عاوز تقنع نفسك انك عملت الواجب.
الباهى: الكلام ده ما صاح يا ابوى.. رأيكم مهم عندي
الأب: يعنى لو قلت ليك رأيي بتعمل بيهو ؟؟؟
تردد الباهى قليلا.. فقد خشي أن يأتي رأى والده خلاف رغبته ولكنه تمالك نفسه ثم أجاب
الباهى: إن شاء الله يا ابوى
الأب: أنا يشوف تنسى الموضوع ده يا ولدى.. الناس ديل لا من توبنا ولا نحن من توبهم
الباهى وقد بدأ عليه الامتعاض : كيفن يا ابوى ؟؟؟ أنا خلاص اديت الناس كلمه وربطت لساني معاهم...
سكت قليلا ثم أردف وحددت معاهم المواعيد بعد اسبوعين إن شاء الله
الأب: يعنى زى ما قلت ليك أنت خلاص قررت وحددت مواعيدك... تانى داير رأينا في شنو ؟؟؟!!

فى انتظار الفارس القادم

صلاح ودالطاهر

28-07-2010, 12:01 AM

الباهي :- لكن يا بوي ما تاخد الحكايه كده انا قررت عشان تعش انت وامي في عز ونعيم بعد العمر ده
الاب :- نان يا وليدي كيفن نان ما اخده كده يعني انت عائز نعمل برائك ولا اخدت براي امك امي زمان قالت لي كلام احسن راي في النسوان راي امك وراي امك بيعوسك الكسره دحين خليني امشي اصلي الضهر وبرجع ليك بروقه تكن حبوبتك السعده سوت لنا قهوة الضحي

ابو عبد الرحمن

28-07-2010, 12:05 AM

أبو الباهي صلي وجاء ، وقعد للقهوة معاهو ، الباهي والباهي عندو كلام
كتير في بطنو ، داير اقولو لابوه لكن خائف من البحصل ،،،،،،،،،،،
قرية ناس الباهي ليست ببعيدة من النيل والنيل كاسيها جمال
ومدي القرية منظر جميل من بعيد والواحد يقول والله الجنه بزاتها
يسكنها خليط من الحسانية والبطاحين ، وقليل من قبائل الجعليين ،،،
تقع القرية بالقرب من نهر النيل الازرق ويعمل اهلها بالزراعة والرعي
في هذه القرية تسكن اسرة الباهي ،، الباهي شاب وسيم ، اكمل
الباهي الثانوية ولم يدخل الجامعة بالرغم من المجموع العالى الجابو
وبدا يعمل بالزراعة مع والده ، عشان في القرية الجنبهم قرية ( السلت )،
فيها ( الساره ) والساره بسموها ست البنات لانها جميلة والبنات منها غيرانات
الباهي خاتي الساره في عيونو عشان الحب قتال وقال والله غير الساره ما بدور
ازوج هي البحلم بيها من زمان وانا ولهان بيها يا ابوي ،،،،،،، الباهي له اخوين
وبنتان ،، وأخوين أثنين ليس بالاشقاء من زوجة ابوه الثانية ( البتول )
وعلى مسافة غير بعيدة تقع قرية (السليت ) وبين القريتين حقول
ومزارع جميلة تسر الناظرين ،،، وابقار ترعي واعنام تسرح وتمرح
وبين اهل القريتين خلافات اسرية قديمة ومشاكل حول الرعي والماء

محمد الجزولى

28-07-2010, 09:45 PM

كانت الساره تنحدر من اسرة حباها الله بالثراء والرزق الوفير
عاشت طفولتها فى المدينه قبل ان تنتقل الى قريتها تلك مع اسرتها الكريمه
فوالدها اراد ان يكون بالقرب من املاكه واطيانه التى ورثها عن جدوده
تشبعت الساره بعادات المدينه مما ترك اثرا حتى فى لبسها الذى يخالف لبس اهل القريه وحتى فى طريقة حديثها العصريه بعض الشئ
انجذب اليها الباهى اول ما وقعت عيناه عليها ... هام بها حبا وعشقا ... رغما من انه يعى جيدا الفوارق الكبيره بين اسرته واسرتها
ولذلك كان يخاف جدا من ردة فعل والده عند مفاتحته له فى هذا الامر
الباهى : قلته شنو يا ابوى فى الموضوع الكلمتك عنو

تدخلت والدة الباهى قائله : بالسرعه دى يا ولدى .. قبل ما نقعد مع اهل البنيه ونتعود عليهم
رد الباهى باستنكار : ده كلام شنو يمه ؟؟؟ انا شفت العروس وقعدته مع اهله وعرفتهم .. عاوزين شنو اكثر من كده
كويس انهم قبلو بى يا امى وهم عارفين حالتنه وكده .. وو
الاب : ما تكمل !!! مالك سكته .. ولا اكمل ليك انا ... عاوز تقول انو اهلك ناس مساكين وما عندهم قروش ... يا خساره بعد التعب التعبناهو فيك طلعنا ولا شئ وما قدر المستوى
عاوز تغير جلدك واسمك واهلك... امشى اعمل الدايرو ومن اليوم ده لا انت ولدى ولا بعرفك ...

صلاح ودالطاهر

28-07-2010, 10:04 PM

الباهي :- انت يا ابوي دائماً ظالمني انا ما في نفسك الكلام الفكرت فيهو تعرف يابوي نحن نصاح ذي واطاتنا الا انت عارف البحصل كل صباح ابوي موش المعنى انا فكرت في الساره عشان اغير جلدي انا من شبت صغير بعتز بيك وباهلي واهلنا زمان قالوا العز اهل لكن يابوي انت براك عارف انو زمنا ده بيختلف من زمنكم زمان

الاب :- انت ياولد صحي زمنكم بيختلف من زمنا انا وكت فكرت اتزوج ما شاورني ابوي مشى خطب لي بدون ما يشاورني

في لحظه دي ام الباهي طرقت راسها لافوق واتمنت ان تكون في زمن ناس الباهي وسرحة بخيالها بعيد

أشرف صلاح السعيد

29-07-2010, 03:46 AM

الباهى : يا ابوى أكان أمى ما هدية و رضيّة كنتا عشت معاها السنين دى كلها ؟؟..
أبو الباهى : و هدايتا و رضايتا دى أكان ما شافوها ناس أبوى زمان أكان بلم فيها ؟؟.. ما ياهو دا هسع الدايرنو ليك .. و المرة يا ولدى ما بتعرفا إلا المرة ..
الباهى : خلاص يا أبوى أمى لما نمشى ليهم التحكم عليها .. وإن البت ما عجبتا بخليها " و متأكد الباهى بأن جمال سارة سيطوع حتى قلب أبيه و يرضيه ناهيك عن أمه المرأة البسيطة"..
أبو الباهى : و بعدين تعال هنا كيفن أهل البنية الدايرا ديل يدوك من غير ما تجيهم بعزوتك و أهلك ؟؟.. من يوم ما قمنا بنعرف الواجب علا أهل بنيتك ديل يظهر البندر خربم تب و نساهم الإصول .. أها زى ما أدوك من غير أبواتك و أعمامك أمشى تم عرستك براك .. و أكان هم عندهم المال و الطين أنحنا عندنا الأصول و بنعرف الواجب .. و القريشات العاجبنك ما لازمانا و الحمد لله ضراعاتنا خدرانة ..سوق أمك و امشى وقت بقن النسوان هن البحكمن ..
أم الباهى : يا حاج عباس ما عاش البحكم و إنتى فى راسنا .. بس يا اخوى الزمن اتغيّر .. و هسع كدى إستهدى بالله وامشى مع الولد و إن ما عجبك الحال البتدورو ببقى ..
أبو الباهى : من متين يا مرة شفتى ليا كلمة وقعت أرض ؟؟.. الولد دا يا إنسى البنية دى يا زى ما قلت يمشى براهو ولا هو ولدى و لا بعرفو ..
تضيق الدنيا بعين الباهى .. ماذا يفعل لكى يصبو بمن أرادها فؤاده ؟؟.. ثم .. فكر بالإلتجاء بحاج الضو كبير القرية .. فهو رجل رغم كبر سنه إلا أنه أكثر تفتحا من أبو الباهى و الكل يمشى برأيه لحكمته و حسن مشورته .. رجل يحمل من الوقار كثيرا حتى دعاباته مع الجميع لم تسلبه أو تقلل من ذاك الوقار .. رجل خليط ما بين الحكمة و المواكبة نادرا ما يخرج من مجلسه الخصوم غير مرضيين ..

انور النور محمد

29-07-2010, 07:56 AM

وذهب الباهي الى حاج الضو الديوانو فاتح للبعاد والقراب ولكن للاسف وجد عنده زحمة خلق بتكلموا في موضوع الموية الوقفوها الاتتدفع القروش القديمة المن السنة الفاتت
الباهي يخرج من الدار لايلوي على شي لا يملك الا انفاسه المتعبة مستعينا على نفسه بنفسه يمشي في الارض كانه قطار لا تخرج عجلاته عن دربها ولايتوقف الا في محطات الفها حتي لقبه اهل الحلة الباهي قطر والباهي لايقم الافي ارض قد فلحها بخطاويه واقامها سرابات بكثرة المجي اليها لاينقص الارض التي يمشي عليها غير ان تبزرفيها بزور الزرع فهو يسقيها كل يوم دموعه ويسمدها بالامه وتوجعاته ويوانسها بغناه في البت البريده وبعيدة منو
ساره الولف الاحلى
سارة بنيت فرع الدغش الاخدر
طالع من بينات الغبش الختر
طالعة ونازلة قراين
تحمي رموش النوم تتلاقة مساير
ويظل هكذا حتى اذا نادت الطيور الصباح ونسج الضياء لحمة الفجر سداها الباهي بالدعوات وسكت عن البكاء

ابو عبد الرحمن

30-07-2010, 02:03 AM

وسكت الباهي من بكاهو ، لكن الحال في حالو ، ا
و القلب هيمان بالساره شديد . وقدر ما يلقي الناس طوالي يقول
في شعرو ، الكاتبو في الساره ، ويقول في سرو . والله يا ناس
كانت شفتوها ، تقولو الباهي مو غلطان كان جنيت الجن بداوي لكن
الساره ، عليها حلاوه ، الساره العيون الفوقه زي فنجان امي ولا الرقبه
الطول عمري ما شفت مثيلها . وشعر الساره ما هو زي شعر بنات الحله
مره اشوفو احمر ومره اشوفو دهبي ومره اشوفو اسود زي توب( الزراق)
العند امي . (أبو ) الباهي "" يا ولد انسي الساره . نحن خلاص اتفقنا
نعرس ليك بت عمك ( الزين )، منو فوق من بنات عمي الزين ؟ ما تقول يا ابوي
( التايه ) ايو التايه .ماله (التايه ) والله ستهم كلهم وهادية ورضية ، ماني بدوره
يا ابوي , انا ماني عاوز التايه يا ابوي ما هي في عيوني من ما تبيت كان
بدوره كان خبرتكم بيها، وخرج الباهي يقول في شعرو ، وصورة الساره في
عيونو ما زاحت . وقال والله الليلة ماني بنوم في بيتي لو ما لاقيت الساره .
والباهي زمن ما شاف الساره وشوقو عليها كتير بلحيل . حاميه النوم
مشي الباهي عشان احكي للساره كلام ابوه واعمامو .وكمان يملى عينو شويه
من عينيها . ما الشوق قتال والحب بدون الشوفه ببقي قاسي شويه ، بيت الساره
في القرية التانية قرية (السليت ) وماشي الباهي وصورة الساره في عيونو
ما راحت ويقول في شعرو،،،،،،،،،،،،،،،،،،،،،،،،،،
السارة يا ناس ما بنســــــــــــــــــاها
سارة الســــــــــــــــرقت قلبي براها
والله بحبها اكتر من روحــــــــــــــي
يا أبوي أديني رضـــــــــــــاك خليني
يا أبوي الســــــــاره دي روح قلبي
من ما تبيت يا أبوي هي في بالــــــي
يا أبوي عليك الله ألخلقك وخلقني
امشي معاي لا تكسر حلمي وخاطري
عرفت الحب بين ايديها احلى قصيده وشفت الدنيا بين عينيها
كان الحب بقتل خلوني شهيدا ،،، الحب يا ابوي بجي كم مره ،
والطيبه الفي عينيها ؟ ؟؟؟؟؟؟؟؟ آه يا أبوي ؟
وفي الطريق الي بيت الساره صراع عنيف مع نفسو الباهي
قال والله بالسيف الساره ما ني مخليها لو حتي رقبتي تفديها
كيفن العيشه براها . ما هي الجنه وما فيها . وقال الباهي في داخلو .
لو اهلي ما وافقوا بالساره اهرب بالساره واخلي الدنيا والفيها ,
شن العيشه براها والله الدنيا مسيخه .

محمد الجزولى

30-07-2010, 10:15 PM

كانت قرية الساره لا تختلف عن قرية الباهى فى شئ الا فى بعض التفاصيل غير المحسوسه
ولكن ساره كانت تختلف عن باقى البنات فى حديثها ومشيتها ولبسها بالاضافه الى جمالها الذى اخذ بألباب كل شباب قريتها والقرى المجاوره
وهذا ما كان يدفع بالباهى للتمسك بها حتى اخر زفره فى نفسه
آآآآه .. مالها الدنيا ومالى ... كل ما اقول خلاص القدر بدأ يبتسم لى الاقى متاريس فى طريقى
عل الساره ما بخليها ولو سبت امى وابوى واهلى كلهم الساره ما بخليها
هكذا كان الباهى يحدث نفسه وهو فى طريقه الى قرية الساره ليبثها همومه وتشاركه الامه
كانت الساره تجلس مع صاحباتها وضحكاتها تشنف مسامع الباهى
احس بان الدنيا كلها تضحك مع ضحكاتها ... والنجوم تتراقص طربا فرحا لفرحها
احس بقناديل الذره تتمايل طربا ... وصوت المياه وهى تجرى فى الحقول كأنها تعزف سمفونيه حبه الابدى
اقترب منها وهو ينادى : الساره ... هوووى يا الساره
التفتت الساره لمصدر الصوت فقامت بدلال ظاهر ناحية الباهى الذى تسمر فى مكانه وهو يرى القمر مقبلا عليه .....

haroun ahmed

31-07-2010, 03:47 AM

التحية لك اخى محمد الجزولى
على هذا الفكرة الجميلة لمشاركة وتكملة هذى القصة
من المبدعين فى سرد وتكملة هذى القصة , وبصراحة
انا خاشي معجب اقراء فى كل جزء يكتب لانى مالى
تجربة فى كتابة القصص لكن من المتزوقين للمتابعة
يلا بالتوفيق انتم اكتبوا ونحن نقراء . ولكن احاول
التحية لكل مبدع وذو قلم يكتب ..

أشرف صلاح السعيد

31-07-2010, 08:01 PM

تسارعت دقات قليب الباهى كلما دنت السارة بخطاها و بهاها إليه .. أذابت حلو ات بسمها كل مرارات ممانعة حاج عباس والد الباهى لزواجه بها و عمقت فكرة أخذ السارة و لو عنوة من وسط فريقا و العيش معها أينما كان ..
السارة : سارح وين يا الباهى ؟؟..
الباهى : سارح فى صيدة عصية .. لا هى بغزالن لا قمرية .. سبحان الصور و أبدع فيها .. خلى قليبى معلق بيها ..
السارة : الصياد يا ود العم مابهيم بصيدو .. و لا حتى بخلى يرعى بقيدو .. ومانى بصيدة ولانى طريدة .. بنيتن حرة غالية شديدة .. كل الشافا بهيم فى ريدا ..
الباهى : صادقة يا السمحة صادقة ..
السارة : خير يا الباهى شن جابك و الجية قريبة مع أحبابك ..
الباهى : يا السمحة بدورو يفرقو بينا .. ماعرفو الريد المزروع فينا ..
و أخذ الباهى يحدث السارة عن خوفه من عدم إتمام مراده بدعوى عمه الزين غير موافق و بأن التاية ابنته منذ اللفة هى للباهى .. خشى من إعلامها بالحقيقة و بأن الرفض من والده عباس ..

ابو عبد الرحمن

03-08-2010, 01:26 AM

الساره ؛؛؛ التايه بت عمك ،، الباهي ايوي يا الساره ،،،،
الساره ؛؛ الواطه دارت بيها وراسها وده وجاب ، والحيل ما شال كورعيها ،،
قعدت في الواطه والدمعه ما فارقت عينيها ،،،،،
الباهي " قال الساره ارح للجدول نسيب الناس ، راح الباهي والساره
للجداول والمزارع والجو كان جميل ، والليلة قمرية ، وهم رايحين للجدول
والباهي بالو بعيد ، قال الباهي للساره ايه الحل يا ست الناس ،،،
الساره ؛؛ انت يا الباهي ايه بتقول ؛؛ ودي يا ساره دايره القول ،،، والله
رقاب الحله كلها باسيفي ،، وانت تعيشي معاي سعيده ،،
جلس الباهي في الجدول مع الساره والمويه كابه عليهم ( شووو)في رجليهم ، والجلسه
كانت فيها الحنيه ، والمويه فوق الرجلين والرجلين تحت الميه حاجة عجيبه ،، نفسي
اشوف عينيك في القمره يالساره ،،، شوفي القمره يا الساره ايه الفرق بينك وبينها
غير هي في سماء الله ، وانت هنا في الواطه ، كلام الباهي
من الخجله خلي خدود الساره محمره شويه، لكن مبسوطه ، وقالت ليهو يا الباهي كلامك
حلو بالحيل لكنوا كتير علّيا ،ومسك الباهي الساره من خديها ، وعاين ليها ،، وقال يالقمره
ما تمشي تفوتي خليني املي عيني من عينها ، ومسك الباهي ايدين الساره وقال للساره
ارحكي الحله الوقت اتاخر عشان الناس ما يقولوا الشينه ،، الساره قالت للباهي اشوف عينيك
ماليهاالخوف ، ما تخاف يالباهي براك الدنيا ماني بدوره ، انت ما ياكه فارس الحوبه ، ،،،،،
الباهي فرح فرحه شديدة كانوا عريس الليلة ،،، وعاين للساره شديد في خديها ،، و قال
في نفسو اتوكل واقول ليها ،، قال الباهي للساره ، انا بدور يالساره ،،، وسكت الباهي ،،
وما قال الفي نفسو ،، الساره ؛؛؛ شن بدور يالباهي ،، وعاين ليها في خديها ،،
اتكلم يالباهي شن بدور عرفت ساره طلب الباهي ،،، من عينيهو وهي بتعاين ليها ،
ضحكت ساره وقالت اصبر يا الباهي هانت ، لمن ابوك يقابل ابوي وتاني كلي لك
من راسي لكورعيا

محمد الجزولى

03-08-2010, 09:46 PM

وتتواصل الحكايه
وتنداح الاقلام ابداعا وحكاوى
دعوه لسكب المداد هنا
ودعونا نكتب قصة منتدانا

محمد الجزولى

04-08-2010, 09:46 PM

ذاعت حكاية الباهى والساره ... واصبح عشقهم يحكى به الركبان ويردد اشعارهم العشاق وطالبى الهوى
وكان الرفض هو سيد الموقف من ناحية اسرة الباهى ثم شاركهم فى الرفض اسرة الساره عندما علموا بان سيره عشق بنتهم اصبحت على كل لسان
كان اخوة الساره اقل حدة من موقف ابيهم بحكم تربيتهم فى المدينه الا ان اشعار الباهى فى اختهم الساره جعل الدم يغلى فى عروقهم
دخل حمد شقيق الساره مسرعا الى حيث تجلس الساره مع والدتها وصاح فيها
اسمعى هنا يا بت انتى ... من الليله دى ما اشوف رجلك عتيت بره البيت ده ... والاسمو الباهى ده تنسيهو نهائى
جزعت الساره من حديث اخوها وصاحت فيه
يا حمد لكن الامور ما بعالجوها كدى
حمد : اسمعى الكلام البقولو ليك والا ح يكون لى كلام تانى معاك ... اما الباهى ده فعندى تصرف تانى معاهو
خرج حمد لا يلوى على شىء بينما ارتمت الساره على امها وانخرطت فى بكاء مرير ...
امتطى حمد عربته البوكس وانطلق الى قرية الباهى لا يلوى على شئ وقد اضمر فى نفسه امرا ....

ابو عبد الرحمن

06-08-2010, 05:10 AM

فتحسس السكين في ضراعو للتأكد وقال الحمد لله السكين موجوده ،
الليلة يا الباهي ود عباس الموت جايك والسكين دي إلا تابيك ، انت
يا الباهي تخلي عرضي يتكلمو بيه الناس ، انا الليلة بخليي الناس
تحكي بموتك وتكون عظه لغيرك واريح بالي واريح الناس من الكلام في
أختي ،،، في الوقت ده الباهي راح خارج الحله هيمان بالساره ،،،
ويقول في أشعارو ،،،،،،،،،،،،،،،،،،،،
السارة يا ناس ما بنســــــــــــــــــاها
سارة الســــــــــــــــرقت قلبي براها
والله بحبها اكتر من روحــــــــــــــي
يا أبوي أديني رضـــــــــــــاك خليني
يا أبوي الســــــــاره دي روح قلبي
من ما تبيت يا أبوي هي في بالــــــي
يا أبوي عليك الله ألخلقك وخلقني
امشي معاي لا تكسر حلمي وخاطري
عرفت الحب بين ايديها احلى قصيده وشفت الدنيا بين عينيها
كان الحب بقتل خلوني شهيدا ،،، الحب يا ابوي بجي كم مره ،
والطيبه الفي عينيها ؟ ؟؟؟؟؟؟؟؟ آه يا أبوي ؟ حمد دخل اطراف
الحله ويراقب في الموقف . وقف العربة بعيد ، ووجد صبيان الحله. وين
يا اولاد بيت الباهي ؟ والشر في عيونو شراره ، الشفع قالوا ليهو
منو في الباهى ، الباهي كتير في الحله ؟ في الباهي ود الحاج
ده مسافر دايما في بلد الله مره شرق ومره غرب كايس رزق الله .
وفي الباهي ود النور الاخبش صاحب الطاحونه اليوم من صبحات
الله سافر للبندر ايجب السير للطاحونه عطلانه شويه ،،، وفي
الباهي ود عباس الهيمان بالساره ،، والكلمة دي زادت من غيظو
زيادة حتي الصبيان يتكلوا بسيرة اختي ،، اه يالباهي اليوم اخر
لك في الحلة ، بدور بيت الباهي الهيمان بالساره ،، شايف البيت
الفوقو الشجرة هناك مربوطه فوقوها حماره، واعمل حسابك
يا الضيف عندهم كلبه صعبه شويه ،، نعم بالحيل شايفوا.
داك ياهو بيت الباهي . ومشي عند البيت والشيطان خلاص
عمي عينيهو . وقال والله الباهي وكليبو سكيني إلا تاباهوم
الليلة ،،، دق الباب وقف بجنب الباب مضاري من الناس . أبو الباهي
قال . حباب الضيف ، قوم يا ولد شوف الجاي مينو بالليل ودخلوا
على الديوان وقوم بالواجب لحد ما أجي ابدل هدوم البيت في
الوقت داك اخو الباهي غير الشقيق للباهي قاعد مع أبوه بشوفوا
حلل للمويه ، عشان المويه بقيت ما تصل الحواشات الاخيره ،،،
مشي يفتح الباب . وحمد الغضب خالص حاميهو القعده دق الباب
تالت مره ،، فتح اخو الباهي الباب ، حمد قال ليهو وين الباهي ؟
وحمد من قبل ما شاف الباهي وما بعرفوا .. اخو الباهي . حيى الله الضيف
أتفضل لداخل الديوان خطوه عزيزه علينا ,, وسله السكين من ضراعو
وطعن ( الدكين ) اخو الباهي بحرقه شديدة واحده وتانية وتالته .
شوف الموت يالباهي ، انا كنت بموت في اليوم ميه مره من كلام
الناس ،،، وهرب حمد باطراف الحله وركب العربه بتاعتو مسرع
للحلة ابشر أبوه بموت الباهي ،،،،

ابو عبد الرحمن

13-08-2010, 11:50 AM

رجع حمد متجهاً إلى القربة ، وخائف يترقب الطريق ، ويفكر في ما أقدم عليه
ويقول في نفسه نادماً الله يلعن الشيطان ،قتلت روح يا حمد ، كيف
تقابل ربك تقول لربك شنو ، قتلتو عشان بحب أختي ،،آه آه آه اعمل شنو
لو خبرت أبوي الخبر بعم الحلة والشرطة ما ترحم ، آه يا حمد القاتل
يقتل ، وكان الشرطة ما عرفت وأهل الباهي ما بخلو دم ولدهم أروح ساي
أحسن حاجة يا حمد تسكت ساي ،ولا توسوس حتي لنفسك وفكر تاني
أخير اكلم أبوي ؟ ما هو أبوي غيرو منو البسترني واضاري علّي ،،،، خش
حمد الحلة ، والليلة كانت مطرية شويه ،،،، وبقي حمد صاحي للفجرية النوم
ما جاهو ،،، الروح يا ناس ،، بتطارد قاتلها ، لو كان تحت الواطه. أذن الآذن
وأبو حمد قام للفرض اصليهو في بيت الله وحمد يعاين ليهو بعين فيها غرابه ،
ما تقدر تسميها شنو ،، فيها القول للوالد يا أبوي كان ربيت الساره ما كان
الحاصل دى حصل ليّا ،، ما كان عرفت الخوف والرهبه ،، ومره عيونو فيها الحنيه
فيها كلام بالقول ما ياكه ، أبوي من ما تبيت انت الحاميني ،،، رجع أبوه من
الجامع يحمد سيدو يذكر ،، وسبحان الله ، الله الرازق يا رزاق ارزق
بالخير ،،،، قوم يا حمد اذكر ربك صلي صلاتك ،، واطري الموت ،،وصحي
الساره . الفجر طلع والوقت متسارع ،، صلو صلاتكم ، وساره ما زي الناس
في الطاعة صايمة وقايمة نص الليل بتناجي المولي يا رب الفي مراضي ،
ما هو كتير غير الباهي عريس وتغتيهو علّيا ،

ابو عبد الرحمن

15-08-2010, 12:51 PM

السارة" صلت ورقدت بس لسه ما نامت ، أبو حمد قوم يا حمد صحي
السارة تصلي معاك ..حمد " خليها يا أبوي الساره تنوم في نومها ،
انا دايرك في كلمة بيني وبينك ،، قول يا ولدي شن بدور تقول ،،،،،،،
سمح القول منك يا ولدي . أنا يا أبوي ،، وسكت حمد ما قدر أكمل
باقي القول ، أبو حمد ،، انته مالك يا ولدي ،،،حمد أنا وسكت تالت مره
غلبوا القول قول يا حمد ،،وساره هنا تسمع في القول . حمد أنا يا أبوي
قتلت الباهي والسكين في ضراعي تشهد لي ،،، شن بتقول يا حمد ؟
ايو القلتو سمعتو يا أبوي ؟ أنا قتلت الباهي ود عباس ،، ساره صرخة صرخة شديدة
وقعت من الفراش ،،، يا ود ألحق أختك ماتت من قولك قتلت الباهي وقتلت
السارة معاك ،، يا ود اجري جيب حكيم الحلة ،قبل الساره ما ضيع من ايدينا
أبو حمد . انشل تفكيرو من الصدمة ؟ جاب المويه ورشه الساره وجاب الريحه
رشوها عليها . هنا الساره بدأت تفوق من الصدمة شويه ،، وقعدت تبكي
وتبكي بحرقة شديدة ،، يا حمد قتلت الباهي ليه يا حمد قتلت الباهي كان
تقتلني معه أنا ما ني بدور العيشة براه ، شيل السكين يا حمد ، شيل روحي
معه ،، مالوا الباهي شن سوي الباهي ،،،غير قال بدور الساره بالسنة وكتاب الله
اسمعي يا بت خالص الحصل حصل ، وياهو قدر الله ، الباهي مائة بدالو بجوك .
دلحين نحن في المصيبة الباقية علينا ،،، اسمعي يا الساره ،، موت الباهي
حتي روحك ما تحدسها بيهو , ،،، سمعتي القول يا ساره ؟
قتلتو الباهي وقتلتو قليبي معه ،،، اه الفائدة من القول . القول بجيب الباهي علّيا....

محمد الجزولى

23-08-2010, 10:38 PM

فى الجانب الاخر وفى حلة الباهى كانت الحلة وكأنها قد غزاها سكان من كوكب اخر ساد الهرج والمرج
وعلا الصياح والنحيب
توافد الناس من القرى المجاوره لمواساة اسرة الباهى فى مصابها الجلل
جاءت قوة من الشرطه من المدينه المجاوره للتحقيق فى مقتل الدكين
كان حدثا غير عاديا فى تلك المدينه الوادعه التى ترقد بين احضان الخضره وصفحات التلال المرتفعه
لذلك كان تفاعل الناس غير عاديا مع هذا الحدث العظيم
كان الباهى اكثر الناس تاثرا بموت اخيه الدكين وقد استطاع ان يعرف شيئا من مجريات الاحداث عن موت اخيه الدكين ولكنه أثر التريث لحين هدوء الاحوال وظهور نتيجة التحقيق
انت يا الباهى لسه ما عرفتو القتل الدكين منو؟؟؟
الباهى : لسه يا حاج المهل لكن مصيرو يتعرف!!!
الا يا الباهى الدكين ده ما زول الله ساااهى ... دحين القتلو ده ما بميز !!!
اليوم يا حاج اليسع ... اليوم تمه ... وكلنا ح نموت !!
الله يرحمه يا رب ... الا موته زى دى ما بنرضاها يا الباهى يا اخوى!!!
حاج المهل يا اخوى الكلام ده ما وقتو .. !!!
وقتو بتين يا الباهى ...؟؟؟؟ داير كمان سيرتنا تبقى بين الحّلال ؟؟
الزول فى خشم بابو يقتلوهو .. دى ما ياها الذله زاتها
يا اخوانا كدى روقو وشيلو الفاتحه على روح المرحوم !!!!
الفاتحه بى نشيله يا حاج الخضر ... اها الفاتحه ...
رفع الجميع اكفهم وتحركت السنتهم بقراءة سوره الفاتحه بينما القلوب تغلى كالمرجل ايذانا بتفجر بركان رهيب فى تلك القريه الوادعه

ود المطامير

24-08-2010, 07:23 AM

هيييييييع عفيت منكم والله

يعنى الواحد لو عاوز يبنى غرفه يجى الثقافى ويقول يا أبومرووووه

يوم واحد بتعرشوها ليهو

( متابعين )

محمد الجزولى

24-08-2010, 09:11 AM

هيييييييع عفيت منكم والله

يعنى الواحد لو عاوز يبنى غرفه يجى الثقافى ويقول يا أبومرووووه

يوم واحد بتعرشوها ليهو

( متابعين )

اها يا و د المطامير ورينا ابداعك القصصى هنا
وضيف للقصه من روحك الحلوه وانا متأكد من ملكتك فى السرد ( وحياكة ) السيناريو

مايسة

11-09-2010, 11:46 PM

التحية لكل المتداخلين وراويين القصة -

قصة ممتعة جدا - كيف وهى بقلم ومشاركة امهر واروع النااس -

ويا حليل الساره والباهي -

في الاول كان المانع - الفارق الطبقي والاجتماعي بين الاسرتين -

اما الآن اصبح الدم والروح - فهل يا ترى سيكونون لبعضهم البعض -

من المنتظرين - فأبدعو

محمد الجزولى

12-09-2010, 11:44 PM

التحية لكل المتداخلين وراويين القصة -

من المنتظرين - فأبدعو

وتحية ندية لك اختى مايسة وعيدك مبارك
فى انتظار كل المبدعين لتكملة القصه
وانت من هؤلاء المبدعين يا مايسة

ود المطامير

15-09-2010, 05:10 AM

إنطلق خبر وفاة دكين بين القرى كالنار فى الهشيم
سمعت الرساله والدة حمد طرقاً قوياً على الباب , لفحت توبها وفتحت الباب
فوجدتها جارتهم أم العوض التى بادرتها باكيه
_ أوووووب على يا الرساله قالولك دكين أخو الباهى كتلوه فوق خشم بيتم
_ وووب على ووووووووووووووووب , دكين المبروك ؟
_ أى والله قالولك بسكين بعجو بعيج

دخلت أم حمد وهى تولول وتصيح , خرج حمد وأبوه وسألوها فأخبرتهم بالخبر
شعر حمد بالأرض تميد تحت قدميه وسأل أمه بجزع
_ قالتلك دكين ولأ الباهى ؟
_ دكين يا ولدى , دكين المبروك البريدوه الناس جت ,
الناس طالعين أبقو مارقين

صاحت ساره لسماع الخبر
_ يعنى الباهى حى ؟ يعنى الباهى حى .. لكن أحىىىىى دكين المبروك وجعتو حاره بالحيل
نظر لها والدها نظره تجمدت على إثرها الحروف على طرف لسانها

ولم يتمالك حمد نفسه فتهالك على أقرب عنقريب بينما كان أبوه يضرب كف بكف
وهو يتمتم .. لا حولا ولا قوة إلا بالله ... لا حولا ولا قوة إلا بالله
وأمسك ولده من يده وأخبره أن يتمالك نفسه ويذهبوا مع الناس للعزاء لإبعاد الشبهه

فى الطريق كان ذهن حمد يضرب أخماس فى أسداس , ويرى حبل المشنقه يتدلى أمام عينيه طيلة مسافة الطريق
ترجلوا عند مكان العزاء بينما كانت أمه تشق طريقها بين النساء وهى تولول وتصيح

وقف حمد بجوار والده وهو يرفع كفيه المرتعشتين أمام الباهى ووالده وبقية أهل القريه
ثم جلس الجميع , وجلس حمد وهو مطأطأ الرأس
وسمع من يجلسون على يمينه يتجاذبون أطراف الحديث

_ إتا آعوض , تفتكر منو الكتل دكين المبروك دا ؟
_ والله يا حسب الرسول آخوى إلا يكون جن أحمر لاكن أى زول
لو أدوهو مال قارون مابطعن دكين بيشوكه خلّى سكين
_ إى والله صدقت .. أنا ود حجيلان دا بريدو أكتر من أولادى
_ الله يرحمو ..كان صلاى وصوّام وزول الله سااااى
_ إنتو عارفين آجماعه يكون الزول الكتلو دا ما قاصدو هو يكون قاصد الباهى

دقّ قلب حمد بقوّه وهو يسمع حكيم الشفخانه يقول كلامه الأخير
وكاد يُغمى عليه وهو يسمع إبراهيم الخدرجى يقول
_ والله ما بعيد , خصوصاً والباهى مسويلو دريبات ريده بعرفها براهو يكون د....

صمت عندما وصل وفد جديد للعزاء وهم يهتفون
_ الفاتحه آاااااااااناس

ود المطامير

15-09-2010, 06:47 PM

مرّت ثلاث ليالى ومقتل دكين يخيّم على القريه والقرى المجاوره
وكان السؤال المُلِح على كل لسان
_ منو الكتل دكين المبروك ؟ والكاتل كتلو لشنو ؟

بدأت تحريات الشرطه تنشط فى كل مكان , إلتقط أحد المخبرين خيط رفيع من معلومه وصلت إلى مسامعه فى بيارة القريه

_ علويه ما تدفرى لى صفيحتى دى بره الصف آمانة الله أقوم ألحقكك دكين
_ بسم الله يا حواء مالك من الصباح ؟
_ برى , لكن سمعت لى قولاً طشاش طشاش كدى
_ قول شنو ؟ يكفينا الله شر القوالات

إتلفتت حواء يمين شمال وهمست فى أذن علويه
_ قالوا يا بت أمى يوم الجريمه شافو الماحى الجزار مارى جمب بيت ناس دكين وسكينو أم سيور مدلدله من ضراعو قدر كدا وهو يتلولح سااااى وعينو شرار شرار
_ أجى يا بت أمى ؟ الماحى صُح مشاكلو كتيره مع أبوالباهى فى شان الجروف لكن ماظنيتها تصل الكتل
_ يابت أمى إبليس شاطر , وشان أبوالباهى كسب قضية الجروف قال يحرق قليبو فى ولدو
_ أسكتى ... أسكتى .. سيد البياره جا

ملأت علويه الوداعيه وعائها وذهبت إلى منزلها وبعد فتره خرجت وهى تحمل صُرة الودع ومن بيت لبيت كانت تنشر حكاية الماحى الجزار إلى أن وصل إلى أذن المخبر الذى إنطلق وأخبر ضابطه

تم إستدعاء أبوالباهى للمركز وعرض عليه ما توصلوا له من معلومات , نهض من كرسيه بغضب وهو يقول للضابط بحّده وغضب وإستنكار
_ الماحى ؟ على الطلاق الماحى رغم مشاكلى المعاهو يضبح واحد من جنياتو ولا يكتل دكين

لم يقتنع الضابط بكلام أبو الباهى وصرفه وأرسل فى طلب الماحى الجزار

الذى فاقت شهرته فى كل القرى بأنه شديد القوّه قاسى الطبع ولكنه أمين فى تجارته ويواصل الرحم وزول واجب
دخل مركز الشرطه وسلم وجلس أمام الضابط الذى سأله
_ الماحى إنت عارف الجريمه اللى حصلت وعشان كدا نحنا بنحقق مع كل الناس
_ أيّا بالحيل , على الطلاق أكان عرفت الكتل دكين منو أكان سكينى دى تاباهو
_ ياراجل دا كلام شنو ؟ هسى إتا فى مركز شرطه
_ خابر , عِلا موت دكين موساهل علينا
_ بقولوا عندك مشاكل مع أبوه ووصلت المحاكم
_ صُح , بالحيل
_ وقالوا شافوك يوم الجريمه مارى جمب بيتهم
_ قصدك شنو يا سعاتو ؟
_ حصل ولأ ما حصل
_ مانى متزكر يا جنابك
_ كيف يعنى ؟
_ مانى متزكر تب .. اليوم داك من المغيرب كنت أنا وصاموله العربجى مدورين بالطريقه الصاح
_ مدورين يعنى شنو ؟

إنحنى شرطى وهمس فى أذن الضابط الذى إبتسم إبتسامه عريضه كأنها إبتسامة نصر

_ أيوااا .. قلت لى كنت مدورين ؟ وبعداك طلعت منو طاشم .. وماعارف نفسك سويت شنو ؟
_ هازول ها اا إنت بتقول فى شنو على الطلاق أنا صفيحه ما بتغبّى بى
_ يعنى إنت بتعترف إنو اليوم داك كنت طاشم ؟
_ بالحيل , أصلو الجنا صاموله عليهو العرقى وأنا على كراويش باقى الجزاره
_ يا عسكري
_ نعم سياتك
_ أرمو الزول دا فى الحجز

ايمن عبد الله

18-09-2010, 08:33 AM

بجيكم هسة ..

ود المطامير

18-09-2010, 09:16 AM

تهافت جميع أهل القريه على مركز الشرطه بعد أن علموا بخبر القبض على الماحى الجزار
غاصت باحة المركز بهم وهم غير مصديق أن يكون الماحى هو الجانى لعلمهم التام بالمحبّه التى يكنها الماحى لدكين كسائر أهل القريه
تجمهر الناس وهم يرون بكسى الشرطه يتوقف وبعض العساكر يقتادون صاموله العربجى
حيث أرداد ضابط المركز التحقيق معه علّ وعسى أن يلتقط منه معلومات يكون تفوّه بها الماحى فى ليالى العربده
_ إسمك وعمرك وعنوانك
تململ صاموله فى مقعده ونظر حوله بعيون زائقه وفكر مشتت من بقايا خمر
_ إسمى صاموله العربجى
_ دا إسم السوق نحنا عاوزين إسمك الحقيقى كامل
_ يعنى يا ود عوض الله ماك بتعرفنى ؟
_ يازول نحنا بنحقق فى جريمة قتل ولازم كل شئ يكون مثبّت
_ موسى ود حجيلان ود الباترا
_ عمرك ؟
_ أكان 43 ولأ 47 ما عارف
_ طيب .. علاقتك شنو بالماحى الجزار ؟
_ خاطبو يعنى ؟ ما صاحبى وفردتى
_ الماحى قال يوم كتلوا دكين كان معاك الكلام دا صاح ؟
_ هو قاعد يفارقنى ؟ من يخلص من الجزاره يلم الكراويش ويجينى
_ طيب .. الماحى دا أصلو ما جاب ليك سيرة أبوالباهى كدا وكدا

نظر صاموله عبر النافذه وسرح ثم قال
_ جابها .. من يشعشع .. طوالى ينونى فوق جروفو القلعها منو أبالباهى
جلس الضابط بقربه وناوله سجاره وأشعلها له وسأله
_ أهااا ... كان بقول ليك شنو ؟
_ كان بقول لى يا صاموله يا أخوى والله أبوالباهى لهف جروفى الكنت عاوز أسيب الجزاره وأبقى عليها عِلا هو جاب ليهو محامى مفعوص وأثبت إنو أبوى باعها ليهو قبل وفاته
_ أهاا ... وبعدين
_ وبعدين مره قال لى , مره كنت بضبح فى خروف إتخيلتو أبوالباهى وحات الله فرد ضبحه أكان شلت راس الخروف فى يدى

وقهقه صالونه بأعلى صوت وهو يردف
_ اليجيب إسمى تانى .

_ طيب ... تفتكر يكون الماحى هو الكتل دكين ؟
_ والله يا جنابو اليوم داك طلع من عندى مولّع وغايتو الله أعلم

_ يا عسكرى أرمو الزول دا فى الحجز

ود المطامير

18-09-2010, 10:02 AM

فى صبيحة اليوم التالى كان كل من له صداقه بالماحى الجزار وصاموله العربجى قد حزم أمتعته وإستقل أقرب وسيلة مواصلات تحمله إلى مدن السودان بعيد عن هذه البلده التى أصابتها لعنه بين ليله وضحاها , فما بين يوم ويوم تبدل حالها بمقتل دكين المبروك كان صيوان العزاء كخلية نحل .. والكل يأتى بما يستطيع من أكل وشُرب وأكواب الشاى الأحمر
تدور على المُعزّيين وبين فتره وفتره ينهضوا رافعين أكفّهم لتقبل العزاء
أحسّ الباهى بأن الأرض قد ضاقت به , فنهض متسللا إلى خارج القريه , كان الحزن يعصف بقلبه لفقد أخيه والحيره تأخذ بلُب عقله إلى حد الوجع ولم ينس فى خضم أحزانه شوقه ووله للسمحه
ياترى هى عامله شنو ؟ قالوا عيانه ألف بعد الشر عليها
قادته قدماه إلى الحفير التى تتوسط قريتيهما فتوقف عند الشجره التى تحت ظلها كان ميلاد الحب الطاهر .. نظر إلى ساقها حيث القلبين المتشابكين والسهم يخترقهما وقال لنفسه
.. آااااه يا الساره .. لو الفى بالى يطلع صُح
واخوفى يا الساره لو الأفكار السوداء المعشعشه فى مخى تكون هى الحقيقه
لو كان البفكر فيهو دا صُح إبقى يا الس....
إنقطع حبل تفكيره عندما سمع أحد صبيان القريه يناديه
_ الباهى .. الباهى
_ مرحب حباب ود البلوله
_ الباهى أحوى , بدور أسعلك
_ بالحيل أسعل
_ إتا ود الحلتوم تان دايل منك سنو ؟
_ ود الخرطوم منو يا جنا ؟
_ ود الحلتوم العندو بكسى 83 المن السلت
_ قصدك حمد ؟
_ أيّا
_ ومالو دا
_ تُنا داعدين أنا وعثمان بليه وسعلنا من بيتكم
_ متين الكلام دا ؟
_ الوتت التتلو فيهو دتين , هو جاب ليت حاجه من الحلتوم ؟

عندها رأى الباهى القلبين المنحوتين على لحاء ساق الشجره يفترقان ويفترقان ويفترقان

ايمن عبد الله

18-09-2010, 11:29 AM

الله ارضى عليك يا ايمن زح من البوست ده

محمد الجزولى

20-09-2010, 09:36 PM

الله ارضى عليك يا ايمن زح من البوست ده

ايمن صباح الخير
اتحزم وخش ساااااى يا اخوي
( ما عندك طريقة )

محمد الجزولى

20-09-2010, 09:37 PM

في تلك الربوة التي تفصل ما بين الزراعة والنهر جلست السارة وهى ساهمة واجمة وقد سرح خيالها بعيدا
نظرت إلى تلك المياه المنسابة وهى تختار طريقها غير عابئة بما يعترضها من أنواء او مطيات طبيعية
تمنت أن تكون مثل تلك المياه.. تختار مسارها لوحدها.. لتصل إلى مبتغاها.. ولكن كيف السبيل إلى ذلك وقد كثرت العوائق وتعقدت الأمور أكثر مما كانت عليه..
أخذت بيدها حجرا صغيرا.. نظرت إليه طويلا كأنما تحمله سرا ما وهى تعبث به بين أصابعها ثم ألقت به فجأة في عمق النهر وهى تتابعه بنظراتها
مشاعر متباينة انتابتها في تلك اللحظة... فقد انقبض قلبها وهى ترى ذلك الحجر يهوى إلى أعماق مجهولة في لجة البحر الغامض وقد تطايرت فقاعات متتابعة سرعان ما تلاشت في الهواء..بينما يغوص الحجر عميقا عميقا ... . كثيرا من الأشياء الملموسة تختفي سريعا برغم جمالها الآسر وكثيرا هي الأحلام التي تتلاشى من حياتنا وتتسرب من بين أيدينا ونحن لا ندرى
نهضت السارة ودموعا غزيرة انسابت من أعينها.. ألقت نظرة أخيره إلى ذلك الكائن الغامض الذي يسمى ( البحر ) مجازا تراءت لها صورة الباهى تطل من بين صفحات الماء الرقراق... تمنت لو ضمته إليها وأخذته بين يديهــا... عادت مسرعة إلى حيث تراءت لها صورة الباهى... غرست كلتا يديها في الماء وغرفت منه قدر استطاعتها ثم نثرته على جسمها كله حتى تبلل تماما بماء النهر وهى تصيح
يعلم الله بحبك يا الباهى ... حب قدر البحر ده كلو وأكثر...
قدر الكون ده كلو.. واكتر
ووعد منى ليك يا الباهى انو ما ح اسيبك مهما حصل.. ومهما باعد بيننا الزمان والحاسدين...
فجأة انتبهت على صوت صديقتها وهى تناديها
السارة.. اظنك جنيتي.. مالك بتكلمي نفسك
ااااااااه يا فوزيه يا اختى.. من العلى.. وقلبي العاوزين يقتلوة بدون سبب
كدي تعالى يا السارة شوفي المصيبة البقت فوق الحلة دي
ردت السارة بفزع: مصيبة شنو يا فوزيه قولي بسراع
الحلة مليانه عساكر... والدنيا مقلوبة هناك
انقبض قلب السارة وهى تصيح في فوزيه
ارحكى بسرعة يا فوزيه.. الله يجيب العواقب سليمة................

محمد الجزولى

20-09-2010, 09:44 PM

انتشر رجال الشرطة في قرية السارة والقرى المجاورة واندســوا وسط المزارع والحقول.. في تلك الأثناء كان حمد شقيق السارة يرتعد من الخوف وهو يرى الخطر قد اقترب منه.. إذ ربما يكون أفراد الشرطة قد توصلوا لخيط ما يؤدى إلى لف حبل المشنقة حول رقبته... دخل والد حمد بسرعة وهو يقول :
يا ولد يا حمد... حمد
انتفض حمد جزعا وهو يقول:
نعم يا ابوى أنا هنا
شوف يا حمد يا ولدى.. أنت غلطت غلطت... وقتلك للدكين ما كان في ليهو داعي.. ولا حتى التفكير في قتل الباهى.. عشان كده يا ولدى أخير تسافر بسراع قبل ما يقع الفأس في الرأس
أسافر كيف يا ابوى... وأمشى وبن ؟؟؟؟
هاجر يا ولدى...!!! أمشى اى بلدا تانى... أخير تكون بعيد وحى ولا أشوف حبل المشنقة ملتف حوليك ...
طيب يا ابوى العساكر الفى الحلة ديل مالهم... أكيد زولا قالهم انو أنا كنت في الحلة يوم قتل ود دكين
هو في زول شافك يا ولدى ؟؟؟؟
كيف مافى زول شافني؟؟؟... أنا أصلا كنت بعرف بين الباهى قبل ....إلا سالت منو جنيات الفريق هم الدلونى عليهو ...
كده خوفتني يا ولدى واكيد العساكر ديل جايين يحققوا في الموضوع ده !!
دخلت عليهم السارة وهى ترتعد من الخوف وهى تنادى :
ابوى.. ابوى ...
قولي بسم الله يا بتي.. مالك في شنو؟؟؟؟
العساكر ماليين الحلة يا ابوى.. وحول المزارع كمان!!!
ما تخافي يا بتي... حمد ما تطلع بره... أنا بمشي يشوف الحاصل وبرجع
حمل والد حمد عصاته ولبس عمامته وخرج وهو في حالة يرثى لها من الهلع والخوف
كان كل ما يتذكر ان مصير ابنه حمد هو الشنق ترتجف أطرافه وينتابه ما يشبه الحمى
استوقف احد رجال الشرطة وقال له :
خير يا جماعة الحاصل شنو ؟؟؟
أخذه رجل الشرطة بعيدا وهمس له ببضعة كلمات بانت على أثرها علامات الارتياح على وجه والد حمد
رجع مسرعا ودخل منزله وهو ينادى على حمد
نعم يا ابوى
اسمع يا ولد من دربك ده سافر الخرطوم وأبدا في إجراءات سفرك ومن ناحية القروش ما تشيل هم
إلا يا ابوى العساكر البرة ديل خايف لو طلعت يقبضوا على
ما تخاف يا ولدى قالو قبضو على قاتل ود دكين من أمس
ارتمى حمد على الأرض وهو يصيح
كيف الكلام ده يا ابوى وأنت عارف القصة.. وده منو القبضوهو ده
ده الماحى الجزار
طيب والعسكر البرة ديل شن بدورو؟؟؟
أصلهم بعد ما قبضوا على الجزار وهم بحققو معاهو اتضح إن في ناس بي تزرع البنقو وسط الزراعات والجزار واحد من الناس ديل عشان كده العساكر ديل بفتشو في كل الفري المجاورة عن مزارع البنقو دى
نظر حمد إلى أبيه بذهول تام وهو غير مصدق ما يسمعه بينما ارتمت السارة في حضن أبيها وهى تبكى بكاءا مرا.............

ابو عبد الرحمن

28-09-2010, 10:01 PM

وتوالت الأحداث مسارعة جداً ،، مرض أبو الساره مرض شديد
فقد كان الحمل عليه ثقيلاً ،، بت عاشقة ليها زول غريب الباهي أخ قتيل أخوها وإبن حبل المشنقة يحوم حول رقبتو ،، وضميرو معذبو بالتستر على ولدو ،،نادي أبو الساره لأولادو تعال يا حمد تعال ونادي أخوك محمود ،، نادي حمد لمحمود وجات الساره وهي تمشي على وجل خائفة تترقب مفاجأة ،،، أبو الساره أقعدو يا اولادي أنا حاسي خلاص ايامي في الدنيا بقيت معدوة . وبدور أطمن عليكم قبل ما أموت ، اول هام انت يا حمد تسيب الحلة وتسافر خارج السودان كان عشت وكان موت ، وانت يا محمود يا كه الكبير بعد سفر أخوك حمد ، تخلى اخوانك في عينك وتراعيهم ، عشان ما يحصل ليهم زي ما حصل لأخوك واختك ، وأهم شي الحواشات ما تهملها يا ها البيها عيشتكم ، وإنتي يا الساره بدورك تنسي الباهي خلاص ، وود عمك طه بدورك وخاتيك في عيونوا من وانتي صغيرة .. لكن يا أبوي انا غير الباهي ماني بدور. كيف اسيب الباهي الساب الدنيا كلها عشاني ، ، حمد يا بت بدوري تكسيري وصية أبوي ،،ساره " لا والله ابوي من فوق رأس , بس انا غير الباهي ما بزوج . ابو حمد اها يا خسارة تربيتي فيك انا بين الحياة والموت وانتي تكسري كلامي ،،، حمد " يا بت اسكتي ،،سكتت روحك ،،، مشت ساره مسرعة الى الغرفة وقفلت باب الغرفة عليها وهي تبكي وتبكي بحرقة شديدة . وتندب حظها لفراق حبيبها ودنو آجل أبوها ،،، وبقيت ساره تفكر في كلام ووصية أبوها ،، وتعيد شريط الذكريات الجميلة وكلامها مع الباهي ،، وغزلوا فيها واشاعروا الكتبها فيها ،، وينك يا الباهي الاسد الحر وينك يا الباهي الساكن قلبي ، تعال شوف الحاصل ليّ ، وساره على هذا الحال الى أن أذن الفجر ،، صلت ساره كعادتها الصبح حاضراً ،،، وبعد قليل من طلوع الفجر ، سمعت ساره صوت البكاء ،، وجات مهرولة لتجد أن أباها قد فارق الحياة ،،، مات أبو حمد ، بعد مرض لم يمهله كثير ، ولكن الهم والمصائب كانت أكبر من ما يتحمله هذا الأب التقي ، بعدها والصبح أصبح بدأ ناس الحلة يتوافدون الى بيت العزاء ، والكل لا يصدق ما حدث فقد كانت الموتة مفأجاة للجميع ،،، وبدأ كذلك ناس الحلاّل المجاورة في التوافد لبيت العزاء وكل يهمس بشي في نفسه ،، منهم من يقول مات والله بالهم ،، قتلتوا بتو الساره ، ومنهم من يقول مات بالحسرة ،،،
وفي هذا الوقت خرج الباهي من داره صباحاً الى المزارع والي النيل ، يستشم منها ذكريات ساره
ويستنشق من عبيرها الفواح نسائم الفرح ليزيل قليل من همومو ،،، وينشد الشعر ،،،،،،،،،،،،،،،،،،،،،،،،،،،،،،،،،،،،،،،،
العيشة الساره براها سراب العيشة الساره براها خراب
كان شوفتو كلامها حكاوي وأغــــــــــــــــــــــاني فريدة
وعيون الساره عيون غزلان للصيد شـــــــــاردة بليلة
ولو شفتو سنونها درر منضوم تضـــــــــــــــوي قبيلة
وديل نهديها الفيها عذابي من تبيت ما شــــــفت مثيلها
ووجنة ساره البين خديها زي نجمة في ليلة قــــــمرية
تضوي شموع تضوي قلوب بالحب حـــــــــيرانه دليلة
والبحه الطالعة من شفتيها زي طنبور يغني نشـــــــيده
خلاص صبري اتعده حدودو وشوقي للساره ذاد الــــــبيّه
..............................................

تغريدا

29-09-2010, 12:26 AM

أتلمن النسوان فى لمح البصر فى بيت البكا وعين تبكى وعين تعاين واتلمن حليمة وبت أدريس وختن راسن سوى همست بت أدريس فى أضان حليمة براحة :ماعرفتى الراجل الكتله شنو ردت حليمة:براحة برى ماعرفت ردت بت أدريس وكانت اتصلحت فى قعدتها ديك قالوا والقول أطير وبعيد عن السامعين لقوا السارة مع الباهى والله كلام شين مابقدر أقوله ياحليمة شين بالحيل وابوها سمع طب واقع من طوله ردت حليمه: سجمى سجمى ليه حق أطب واموت شوفيها عليك الله بتبكى كيفن كأنها ماسوت حاجة وهنـــــــــــــــــــــــــــــــــــــــــــــــ ــــــــاك كانت السارة تجلس على الأرض مبعثرة الشعر والثياب ولابسة فردة سفنجه واحدة وتبكى دموعها نازلة زى المطرة لكن من غير أى صوت وسارحه هنـــــــــاك فى ألمها ووجعها التلم كله عليها فى وقت واحد

تغريدا

09-10-2010, 10:06 PM

كانت الساعة حوالى الثانية ظهراً وكعادة أهلنا الطيبين الحنان أسياد الكرم والفى الحارة تلقاهم قدام أتت صوانى الغداء من كل حدب وصوب وكل زول جاد بالموجود وحليمة وبت أدريس فى قعدتن ديك راميات راسن سوى فى الكلام الدقاق قامت بت أدريس تصلح توبا التكرفس من كتر القعاد تقول ماكلاهو بقرة وفى نفس اللحظة ديك من هنـــــــــــــاك جات فاطمة بت الجاك داخله وقدامه حبشية شايلة صينية (فاطمة بت الجاك بت أحد أغنياء الحلة وأعيانها أتزوجا واحد من الخرطوم ورحلت معاه وكانت فى زيارة لأهلها وصادفت البكا) فى اللحظة ديك أتنفضت حليمة تقول قرصتا عقرب تلكز فى بت أدريس شوفى شوفى الجا منو أتلفتت بت أدريس وكلها عجب وعوجت خشما يمين وشمال وقالت قادر الله!! دى قايله روحا فى الخرتوم ولا فاكرة أنها جاية بيت عرس؟؟ ( كانت فاطمة بت الجاك سمحة سماحة البنات لى حدهن ولابسة داك ياالدهب فى يدها اليمين سته غوايش وحباستين وفى الشمال أحفظ مالك والاصابع الثمانية خواتم ماعدا الابهام وداك يالكرسى جابر الماخمج فى الرقبة وناقشة ديك يالحنة وتوب الحرير يولع) نطت ليها حليمة وانتى هسى مالك مغيوظة منها كدى يختى مابحقها وفى صوبا وبقت بت أدريس تعاين لفاطمة عزت السارة ولمن قعدت ما شالت عينا منها والسارة حبيبتى فى عالم تانى تارة تسرح فى أبوها الحنين وكلامة وهيبته وتنزل منها دموع حاااااااارات ومريرات وتتنهد وتتأوه كأنها أنسان يعانى مرض عضال عجز عنه الطب وتارة تانى تسرح فى الباهى وكلامة المتل البلسم على الجرح المتل الموية لمن تترش فى النار وتبتسم بسمة خفيفة وتســــــــــــــــــــــرح لكن سرعان ماتفوق وتتلاشى البسمة وتتذكر الواقع المرير الباهى الفى المجهول وأبوها الفارف الديار وترجع من تانى تبكى وتبكى وتمسك حشاها الموجوع وتتلوى يمين وشمال (ماأفظعهه من ألم) ودا كله فى صمت من غير اى صوت.
وفى اللحظة عارفين الجا منو؟؟؟؟

محمد الجزولى

09-10-2010, 10:15 PM

وفى اللحظة عارفين الجا منو؟؟؟؟

قمة الابداع اختى تغريد
كنت نويت ان اكتب فصلا هنا ولكن امسكت يدي عندما رايت الكلمات الاخيرة
فى اتنظار المفاجاة .....

بنت الرفاعي

10-10-2010, 12:21 AM

ما شاء الله
ما شاء الله
ما شاء الله
إبداع جماعي لا محدود،
حفظكم الله ورعاكم.:)

وفي إنتظار البقية.:)

تغريدا

14-10-2010, 12:58 AM

جات التاية أيوة التايه بت عم الباهى طبعاً الساعة ديك الماشى وقف والواقف قعد والبتكلم سكت والمشغول أتلفت والدهشة كست الوجوه والعيون !!!!!!!!!!!!!!!!!!
وبراحة أتلفتت حليمة على بت أدريس وهمست ليها دى الجابها هنا شنو؟؟؟؟وبنفس الهمس ردت بت أدريس أكيد جاية تشمت فى المسكينة دى وهو عليك النبى الموت دا فيه شماته!! وتابعوا التاية لمن وصلت مكان السارة القاعدة فى الواطة تحت الشجرة وعينها هنــــــــــــاك سارحة فى عالم تانى ؟؟؟
وكانت المفاجأة أنه التاية جات تعزى السارة وتتطيب خاطرها وتساندا فى محنتا العصيبة وحتى السارة فاقت من سرحتا وأندهشت لجية التاية وعارفة أنه القاعدة قدامها دى عروس الباهى المرتقبة لكن التاية الأصيلة سرعان ماصححت للسارة دهشتا وأفصحت عن سبب جيتا وقربت من السارة ومسكت يدها بحنان وقالت ليها السارة خيتى أن بدور أقولك حاجة! أتعدلت السارة فى قعدتا وقالت ليها قولى يالتاية ردت التاية: أكيد بتكونى سمعت أنه أبو الباهى قال للباهى يعرسنى أنا لكن يالسارة أعرفى أنه الباهى دا زى أخوى وأكتر أتربينا سوى وقمنا سوى وأنا ماشايفة غير خوته لى مابتخيلوا شئ تانى يعنى من الناحية دى أطمئنى؟؟؟؟ ساد الصمت والسكون للحظات وطفرت من عيون السارة دميعات فرح من وصط الحزن العميق ومسكت التاية وأتقالدن.
والدهشة تكسو وجوه الجميع وماعارفين الداير بين السارة والتاية.

ود المطامير

16-10-2010, 08:15 PM

بعد موت أبو الساره بعدة أيام كان الباهى يهم على غير هُدى فى فى مزارع القريه المطريه
كان يتجول بين عيدان الذره بلا هدف وذهنه يفكر بسرعة ألف ميل فى الساعه

_ آااااه يا الساره لو لو كلام الجنيات طلع صُح ويكون حمد أخوك سواها

_ يكون آزينة البنات سوات أخوك سبب موت أبوك ؟

أظلمت الدنيا فى نظره وهو ينغمس فى الهواجس السوداء ، توقف حينما رأى ثعبانين يتقاتلان بكل شراسه ، أحدهما أبيض كالحليب والآخر أسود كالليل ، نظر لهما وهما يتقاتلان لأكثر من ساعه وبعدها تمدد كل منهما فاقد الروح
فهمس لنفسه وهو يبتعد
_ طلّق ظنيتها دى آخرتى مع حمد
على مشارف القريه رأى صبى على حماره فناداه
_ الشقيان .. الشقيان تعال
_ أيّا الباهى
_ شيل الشلن دا وبى وشك على قرية السليت بدورك براااحه تلاقى الساره
قول ليها الباهى بعد المغيرب بدورك تلاقيهو حدا شدرة النص

وإنطلق الشقيان بحماره وهو يغنّى

ردناهو ورغم المحن ما نسيناهو
حبيبى دا

تسلل الشقيان إلى ديار الساره بخفه وحينما شاهدها أطلق صفيراً خفيفاً فنظرت إليه وأشار لها فذهبت إليه .. وأخبرها بطلب الباهى ، دقّ قلبها بقوّه وعنف وكل المشاعر المختلطه عصفت بها
الفرح والسعاده والخوف والتوتر أخذوا بلب فؤادها الرقيق كل مأخذ
عند الغروب توشحت بالسواد وتسللت بين الأزقّه قاصده شجرة النص وسُمّيت بهذا الإسم لتوسطها القريتين ، رأته من بعيد ، همّت أن تجرى نحوه ولكن حيائها منعها وشاهدها وهرع نحوها
أمسك بيديها ونظرا لبعض طويلاً رأى دمعه كبيره تنساب من عينها على خدها الأسيل
مسحها بإبهامه وهمس لها
_ الساره
_ أيّا يا روح الساره

ود المطامير

16-10-2010, 08:48 PM

_ الساره القلب موجوع بالحيل
_ سلامة قلبك يا الباهى
_ الساره يا نور العيون الدنيا تكالبت علينا والمحن رادمنا ردم
_ كلو بهون يا سيد الشباب
_ آااه يا الساره كيفن عاد بس ؟
_ ربنا كريم بفرجها من عندو
_ ونعم بالله ، لكن يا زينة البنات قلبى ماكلنى باللحيل

أحسّت بقلبها ينغبض وشعرت بخوف سخّن على إثره جسدها وبادرته بخوف
_ الباهى كلامك خوّفنى بالحيل
_ الساره
_ عيون الساره
_ أنا بريدك قدر شنو ؟
_ قدر الكون دا كلو
_ وإنتى بتريدينى قدر شنو ؟
_ قدرالكون دا كلو وأكتر كمان

ضغط على يديها بقّوه ونظر فى عينيها نظرات تاهت لها روحها وذاب على إثرها قلبها
_ الساره
_ عيون الساره
_ ذى ما قال طه فوق ريا ، لو كل الدنيا جات على منكبه فوت من ريا ما بقى
أها .. لو كل الدنيا إتردمت على ما بفوتك تب
سحبت يديها من يديه وإرتمت على صدره تبكى بكاءاً مُر وهى تقول فى دواخلها
إاااه يا حبيبى لو عرفت الحقيقه ، لو عرفت أخوى كاتل أخوك ح تعمل شنو ؟ ح تضمنى على زياده ولأ ح تدفرنى هنااااك ؟
تركها تبكى على صدره ودموعها الحاره تبلل أضلعه ويكاد يحسُّ بها تُبرد لهيب قلبه

تحاملت على قواها المنهاره ورفعت نفسها من صدره ونظرت إليه طويلاً وهمست وهى دامعه

_ الباهى
_ أيّا يا روحى الباهى
_ بدور أقولك سر كبير
_ سر شنو يا زينة البنات ؟
_ يعلم الله سر بكتلنى كل يوم ألف مره
_ ياتو سر دا ؟ خوّفتينى
_ بقولو ليك تب وبخلص ضميرى والبتبقى عليهو رضيانه بيهو
_ الساره قولى
_ الباهى ، أنا كاتله ومكتوله فى وقت واحد
_ كيفن يعنى ؟
_ حمد أخوى هو ال...

وضع يده على شفتيها لكى لا تكمل وهمس لها

_ عارف يا الساره عارف

شهقت ونظرت إليه جاحظة عينيها الواسعتين وصرخت به

_ عاااارف ؟ ومن متين ؟
_ أيّا باللحيل عارف من يوم كلمونى الجنيات وقالوا حمد سالهم من بيتنا يوم كتل دكين
_ و.. وبع .. وبعد .. دا كل..كلو لسه رايدنى ؟

إبتسم لها برقّه متناهيه وأمسك يديها بحنان بالغ وهمس لها
_ مُش الغناى بقول

هو إنتى ذنبك إيه ؟ وأنا ذنبى إيه ؟ جنو عليك وجنو عليا

فما كان منها إلا وأن وضعت رأسها على كتفه وشعرت بأمان وسعاده لم تشعر بها قبل اليوم قط

ابو عبد الرحمن

16-10-2010, 09:18 PM

والله وربنا يعلم ( بكيتنا ) يا ود المطامير ،، وخليتنا زي البنتفرج
في مسلسل ( قمة الروعة والابداع يا ودالمطامير ) واصل عليك
الله ،،،، وما توقف ،،، وسير سير يا مطاميرو ونحن معاك ،، لحدي
يوم الدخلة ،،،،،

ود المطامير

16-10-2010, 09:38 PM

محمد الجزولى

18-10-2010, 10:07 PM

الله ارضى عليك يا ايمن زح من البوست ده

ود المطامير عليك الله اتر لينا الزول ده
البوست ده طفشو من المنتدي مره واحده....
يا ايمن ياخى تعال وليك الامان

محمد الجزولى

18-10-2010, 10:09 PM

وتتواصل قصة الباهى والساره
وفى انتظار فارس قادم
ليضيف الي ابداع هذه الكوكبة التي ابدعت هنا ....

محمد الجزولى

20-10-2010, 11:20 PM

نامت الساره فى تلك الليله وهى تشعر بامان الدنيا كله .... لم تنم منذ مده طويله كتلك النومه المستقره فقد انزاح جبل من الهم عن كاهلها ... كانت ابتسامة عــذبه مرسومه على فمها وهى تغط فى نوم عميق ...
جاءها الباهي واخذ بيدها بعدما اتمت لبس الزفاف الذى صمم خصيصا لها لكى تلبسه فى تلك المناسبه السعيده ... جلست بالقرب من الباهى وهى تنظر بسعادة الي تلك الجموع التى اتت لحضور حفل زفافها ... حانت منها التفاته سريعه الى وسط الساحه حيث كانت التايه بنت عم الباهى ترقص بسعاده ... كان الجميع فى فرح غامر .. اما هى فقد كانت تحلق باجنحه من السعاده وهى تحقق حلم عمرها بزفافها من الباهى ....
تمنت فى تلك اللحظه ان يكون والدها حاضرا تلك المناسبه السعيده ولكن هى الاقدار ....
كان الفنان يشدو باغنية جميله وقد عجت الساحه بالراقصين ....
همس لها الباهى وهو يطبع قبلة على راحة يدها
* مبسوطه يا الساره
* مبسوطه الشويه دى يا الباهى ... انا الليله اسعد انسانه فى الدنيا دى ...
* ان شاء الله دائما اخليك مبسوطه يا الساره ....
* وانا كمان يا الباهي ... ح اخليك اسعد انسان فى الدنيا دى
جاءت اخت الباهى وهمست للعروسين ان الاغنيه القادمه لهم
امسك الباهى بيد الساره بكل حنان ثم رقصا على انغام اغنيه جميله

النصيحة دي
انا بريدو
والبريد الشيخ
انا يا ناس بريدو
الشيخ سيرو

سبعة قدور محلبية
سبعة قدور صندلية
سبعة قدور ريحة نيه
نسيبتو قالت شويه
حرمان ما بدخلن علىّ
الشيخ سيرو
تلاته ارادب غدى
تلاته ارادب عشى
ده الشيخ ود مصطفى
الولاده من بعده كفى
الشيخ سيرو
كانت السعاده تشع من عين الساره وهى تنظر الى الباهى بكل الحب والحنان ....
جاءت اخت الباهى مره اخرى الى الباهى وهمست له ببعض الكلمات .. بان الانزعاج على وجهه الباهى ثم امسك بيد الساره وجرها بسرعة بينما تمتمت الساره ... خير يا الباهى خير ...
واذا بيد ام الساره تهزها هزا وهي تصيح ...
* سجم خشمى يا الساره .. مالك ... بى تهضربى مالك ..؟؟؟!!!
صحت الساره على صوت والدتها وهى تقول : خير يا امى ان شاءالله خير ... الظاهر كنت بحلم حلم جميل .....

تغريدا

24-10-2010, 02:22 AM

وعل آثار ذلك الحلم الجميل وفى يوم مشمس والجو جميل صحت السارة وهى فى قمة نشاطها وحيويتها وهى طبعاً كانت بايته مع أحلامها الوردية التى كانت سبب نشاطها وحيويتها فى ذلك الصباح فقررت أنها تمشى تشترى الخضار مع بعض مستلزمات المنزل الأخرى وشالت السبت بتاعا ومرقت. وفى بداية الشارع جنب زاوية الشيخ حمد ودحمدتو لاقاها شيخ أدريس مدرس الخلوة وبكل فرحة وبشاشة قالت ليه: السلام عليك ياشيخنا
أتلفت عليها وعاين ليها عين أستفزاز وأستنكار وأبى يرد ودخل وطااااااااخ سد الباب . حست السارة بشئ من الحزن وراحت تحدث نفسها ياربى الشيخ دا ليه سوى معاى كدى؟؟؟؟وواصلت سيرها ولمن وصلت شجرة التبلدى الكبيرة لقت حليمة وبت أدريس واقفات وأول ماشافنها قامن يتغامزن وأشروا ليها ويهمسن لبعض بكلام هى ماقدرة تسمعوا زاد حجم الألم والسؤال فى جواها الناس ديل ليه بيعاملونى كده أنا سويت شنو؟؟؟؟؟؟؟ لأنى حبيت حب صادق من جوه قلبى ؟؟؟؟؟؟؟ وياربى أصبح الحب الصادق جريمة فى زمن أتعدمت فيه القلوب الصادقة وجات محلها قلوب مريضة مليانة حقد وضغينة !!!!!!!!! وواصلت سيرها وهى تحدث نفسها بهذه الكلمات وكانت مارة بالحواشات فى اللحظة ديك جا مارق ود أحيمر( بيكون ولد العمدة) راكب حماره لاقاها وش لوش وقال كدى نزل من حماره وقرب عليها وقال ليها: أنت ليك عين ونفس تمرقى يافاجره يالوسخت شرف ابوك وكتلتيه بالحسرة والعار على الطلاق بالتلاته كما رجعت بيتك وقفلت بابك البسويه فيك الله وخلقه يتفرجوا فيك يلا يلا أمشى تمشى فيك دبابة وسخت الحلة وناسها.
الكلام نزل على رأس السارة متل القنابل فى ليلة سوداء مظلمة وقع السبت من يدها وجرت جرت من غير وعى وهى بتبكى بمرارة وألم .

صابرحسين

26-10-2010, 10:15 AM

إبداع حقيقي وأقلام تستحق المتابعة ، وكل إضافة تعطي القصة تشويق ومتابعة أحلى .....

بس يا ود المطامير ود أحيمر دا البهدل السارة ما تخليه أكيد فاهم المسألة غلط هههههههههههه

ود المطامير

26-10-2010, 10:44 AM

إبداع حقيقي وأقلام تستحق المتابعة ، وكل إضافة تعطي القصة تشويق ومتابعة أحلى .....

بس يا ود المطامير ود أحيمر دا البهدل السارة ما تخليه أكيد فاهم المسألة غلط هههههههههههه
قلت كدا يا الحبيب ؟

خلاص ليك على هسى أقبل ليك عليهو ;)

ود المطامير

26-10-2010, 11:10 AM

محكمه

وقف جميع الحضور بقاعة المحكمه وهم يسمعون صيحة إعلان قدوم القاضى
جلس القاضى وجلس الحضور الذين إمتلأت بهم قاعة المحكمه

وقف المتهمان .. الماحى الجزار وصاموله العربجى ونظر إليهما القاضى من فوق نظارته السميكه
ووجّه نظره لما أمامه من أوراق وقال بصوت جهورى قوى

_ حسين ساتى أبو كراع بين قوسين ( صاموله العربجى )
_ نعم سيدى القاضى
_ حكمت عليك المحكمه بالسجن سنتين لتعاطيك وبيع الخمور البلديه

_ الماحى درويش أبضريس .. بين قوسين ( الجزار )
_ نعم سيدى القاضى
_ حكمت عليك المحكمه بالإعدام شن...
_ لا لا يا سيدى القاضى ، حمد أخوى كتل واحد وما بخليهو يكتل التانى

عمّ الزهول كل من فى القاعه وهم يسمعون الساره وهى تشق المقاعد وتصيح بأعلى صوتها
_ نعم يا سيدى القاضى ، حمد أخوى هو كاتل دكين
_ إتى متأكده من الكلام دا ؟
_ أيّا يا سيدى القاضى
_ ترفع الجلسه ليوم 15 / 4 للبت فى المعلوات الجديده

خرج أهل القريه وهم يضربون أسداس فى أخماس ، بينما كان الباهى ينظر إلى الساره وهو يغالب دموع عينيه ، وإنتشر الخبر كالنار فى الهشيم .
فى مدينة بورسودان كان حمد فى أحد المقاهى يرتشف كوب شاى ويهمس بالهاتف النقال
_ ألو
_ ألو حمد
_ كيفك حبيبتى ؟
_ بخير والحمد لله
_ والله مشتااااق ليك شوق أسكتى ساااى
_ وأنا والله كمان ، إتا ح تجى الخرطوم متين ؟
_ إن شاء الله بس أستلم ال..
ماتت الكلمات على لسانه وهو يجد نفسه محاط بقوّة من شرطة بورسودان
وسرعان ما تم نقله للعاصمه الخرطوم حيث تجرى المحكمه

ودتابر

26-10-2010, 08:29 PM

الأخ الأستاذ الأديب .. محمد الجزولي ..

وبقية الكوكبة الرائعة المتداخلون ..

ما هذا الإنهمار الجميل .. والإبداع الراقي .. لقد أنخت رحالي هنا كثيرا .. وهجعت بين الحروف أسافر معكم عبر الفكرة والابداع المستنير . والحوار .. والحدث .. والحبكة .. .. ولكم استمعت بما نثرتموه لنا هنا .

أحبتي الأعزاء ..

ليس ذلك بغريب على مبدعي هذا النهر الدافق .. فأنتم دوما تدهشونا بالرائع الجميل .. فنجلس نتابعكم .. وننتظر المزيد .. وحتما سوف نشارككم فلن نطيل الغياب بإذن الله .

لكم جميعا حبي وتقديري ومودتي .

محمد الجزولى

26-10-2010, 08:48 PM

[/SIZE][/B]

وحبنا لك وشوقنا لحرفكم الجميل لا يحده حدود
استاذى واخي ود تابر
فى انتظار( همساتكم ) النبيلة التي أدمنا الاستماع لها
لك كل الاحترام اديبنا الرائع ود تابر

تغريد

26-10-2010, 09:15 PM

محمد الجزولى

29-10-2010, 09:06 AM

يا لأقلام منتداي حين تتهادي عبر مراكب الحروف

ويا لسحر الكلمة حين يجبرنا علي مناداة الخواطر أن هلم الينا

عادة يفعل القلم فعل السحر فينا

يجعلنا بلا أرادة

لا ادري ماذا اكتب لأصف هذا البوست يا محمد

كل قلم نزف مداده هنا يستحق ألا يمر به الشخص مرور عادي

لأن النص هو في حد ذاته نص غير عادي

لي عودة يا محمد وبقية الاخوة

لنستمتع معا من جديد بحلاوة الحرف

ولنستظل بقليل من ادبكم الرفيع

في قصة منتدانا

هي اقلام نزفت حرفها ابداعا مموسقا
ولا زالت ترسم الدهشة وهي ترسم لوحة مكتملة الأركان
ولا شك ان قلمك سيضيف لهذه اللوحة لونا خاصا بك اختي تغريد
ونحن فى اشد الشوق لاضافتك هنا
ونحن نعلم مدي براعة قلمك
وجمال حرفك
دمتي بكل الخير رفيقة القلم تغريد

انور النور محمد

31-10-2010, 07:56 AM

وما زال الامتاع حاضرا بيننا باقلام مدهشة

محمد الجزولى

20-11-2010, 10:23 PM

وما زال الامتاع حاضرا بيننا باقلام مدهشة

ويلا نكتب للحكاية
شويه منى وشويه منك
يبقي خطينا الرواية
وتبقي قصة منتدانا
قصة مختارة بعناية

تغريدا

21-11-2010, 11:46 PM

ويلا نكتب للحكاية
شويه منى وشويه منك
يبقي خطينا الرواية
وتبقي قصة منتدانا

قصة مختارة بعناية

فيها روعة الكلمة والدهشة من البداية
فيها الرقة والأحساس والبساطة حتى النهاية

ود المطامير

28-11-2010, 07:31 PM

أمام قاضى محكمة جنايات الخرطوم
وقف حمد مكبل اليدين وقد غاصت بهم مقاعد صالة المحكمه
أخذت المداولات ما يقارب الأربعه ساعات وبعدها أعلن القاضى الحكم بعد إعتراف حمد

حكمت المحكمه حضورياً على المتهم بالإعدام شنقاً حتى الموت
هلل أقرباء الضحيه بالتكبير وعلت الهتافت .. يحيا العدل ... يحيا العد
وفى الطرف الآخر أغمى على والدة حمد بينما كانت الساره تنظر إلى اللا شئ
بعيون دامعه باكيه

وبعد إسبوع تجمهر جمع غفير فى ساحة الإعدام ، أقارب الضحيه وأقارب المتهم
وكل من سمع بخبر الإعدام إزدحمت الساحه وإمتلأت عن بكرة أبيها
إكتملت عملية الإعدام ووقف حمد تحت حبل المشنقه وتم تلقينه الشهاده
ووضع على رأسه غطاء أسود اللون ، صمت الجميع عندما سمعوا بصوت جهورى قوى
يأمر بتنفيذ الحكم وفى اللحظه التى أمسك فيها منفذ الحكم بالعصى التى تفتح بوابة
الشنق التى يقف عليها حمد ، سمع الجميع أبوالباهى يهتف بأعلى صوته

_ سيدى القاضى .. لقد عفونا عنه لوجه الله تعالى

خيم صمت رهيييييب على الحضور وأمر القاضى بإنزال حمد من على المنصّه
وعلت الهتافات والتكبير وعلت الزغاريد ، وبين الحشد كانت خيوط الليزر
تنطلق ما بين عينى الباهى والساره

ولأن الحشد كان يضم شتى ألوان الطيف ، مال أحد الشماسه على صاحبه
وقال له وهو يشفط شفطه كبيره من قطعة قماش مبلله بالسيلسيون

_ عمك الشايب دا ، فوّت علينا نشوف الزول بموت كيف ؟

محمد الجزولى

28-11-2010, 10:58 PM

ولأن الحشد كان يضم شتى ألوان الطيف ، مال أحد الشماسه على صاحبه
وقال له وهو يشفط شفطه كبيره من قطعة قماش مبلله بالسيلسيون

_ عمك الشايب دا ، فوّت علينا نشوف الزول بموت كيف ؟

ههههههههههه
ياخى بصراحة يا ود المطامير عمك ده فوت علينا نحن زاتو نشوف الساره دي وهي بين نارين بعد اعدام اخوها
بجيك راجع للقصة اكيد

ود المطامير

28-11-2010, 11:11 PM

ههههههههههه
ياخى بصراحة يا ود المطامير عمك ده فوت علينا نحن زاتو نشوف الساره دي وهي بين نارين بعد اعدام اخوها
بجيك راجع للقصة اكيد
هع هع هع ;)

محمد الجزولى

08-12-2010, 10:46 PM

علا الهتاف والتكبير فناء المحكمة وتجمهر اهالى القرية والقرى المجاورة وهم يلهجون بالشكر والثناء لابو الباهي علي هذا الموقف البطولي..
لم يكن هذا الموقف غريبا علي أبو الباهي فقد كان مشهودا له في القرية بالطيبة والسماحة وحب الخير لكل الناس.. كانت السارة أكثر الناس غبطة بموقف أبو الباهي واجتاحتها فرحة غامرة بالعفو عن أخوها وأحست بأن الدنيا قد ابتسمت لها أخيرا... نظرت إلي الباهي وهي تجرجر أذيالها خلف عائلتها وبثتة كلاما كثيرا أذابت في نفس الباهي بعض الأحزان التي كانت تخيم علي قلبه

مضت عدة أيام علي هذا الحدث الذي هز القرية وأثرت تجمعات أهلها الذين لم تكن لهم سيرة غير موقف أبو الباهي من إعدام حمد.. جلس الباهي أمام أبيه وقد عقد العزم علي مخاطبة أبيه بالموضوع القديم الجديد ( زواجه من السارة )... كان يعلم إن الوقت غير ملائم لهذا الموضوع سيما وان الأحزان لا زالت تخيم علي القرية بأكملها لفقد اخية ولكن ما شجعه هو موقف العفو الذي اتخذه والده وكان عشمه كبير في أن يكون هذا العفو بابا للتصالح وتغيير رأي أبيه من زواجه من السارة.....
الباهي: أبوي كنت عاوز أتكلم معاك في موضوع.... ؟؟؟؟
أبو الباهي: كويس انك جيت يا الباهي !!! .. أنا العاوزك في موضوع !!
الباهي: خير يا ابوى.. أنا تحت أمرك ؟؟؟
أبو الباهي: كدي قبل ما افتح ليك موضوعي أنت عاوز تقول شنو؟؟؟
الباهي: لا يا أبوي موضوعي ما مهم.. ممكن يتأجل... وأنا تراني سامعك.. الموضوع شنو عاد ؟؟؟!!!!
أبو الباهي: شوف يا ولدى أنت عارف انو المرحوم أخوك كان زينة الرجال والحلة كلها بتحترمو وتقدرو
الباهي: بلحيل يا ابوى... والحلة كلها حزنانة عليهو ....
أبو الباهي: وزى ما شفت أنا عفيت حمد من حبل المشنقة برغم من انو يستاهل الموت في شان قتل أخوك
الباهي: ايوه يا أبوي... والحلة كلها بى تتكلم عن موقفك ده والصغير قبل الكبير بشكر فيك
أبو الباهي: اها عاد يا ولدي عاوزك تبقي راجل أنت كمان... وترفع راسى بين الناس!!!!
راسك دايما مرفوع يا ابوى... إلا بس ما فهمتك عاوز شنو... ؟؟؟؟!!!!
أبو الباهي: موت الدكين حااااااااار بلحيل يا الباهي ودخل علي دخلة شديدة خلاص !!
الباهي: الله يرحمو يا ابوى.. الدكين كان زولا ما ساهل ....
أبو الباهي: عشان كده أنا عاوز أخوك يرتاح في قبرو يا الباهى !!!!
الباهي: ربنا يتولاهو بي رحمتو ان شاء الله.. إلا برضو ما فهمتك يا ابوى !!!
أبو الباهي: عاو تفهم شنو يا ولد.؟؟؟.. أوعك تكون فاكر عفوي عن حمد قاتل أخوك ببرد ناري...؟؟!!! .
. دم أخوك ما بروح هدر يا ولد....
الباهي يعني يا ابوى تقصد........؟؟؟؟؟
أبو الباهي: اااااااي يا ولدى... دم أخوك ما ببرد إلا تاخد بي تارك من حمد... وكما تدين تدان
الباهي: ااا ا..قت....للل ح..م..د يا أبوي ؟؟؟؟؟؟؟؟
أبو الباهي: ااااااى... دم أخوك في رقبتك وماني عافي منك لو ما جبت لي راس حمد قدامي هنا ده...
نزل كلام أبو الباهي علي قلب الباهي كالصاعقة وبردت اطرافه وقد تصبب عرقا وهو لا يدري ما يقول لأبيه.......

مايسة

08-12-2010, 11:29 PM

متااابعين -

نزار حسن محمد

09-12-2010, 12:56 AM

قام الباهى من امام ابوه وساره على غير هدى وجد نفسه يسير نحو الحوشات وجلس والحزن يخيم عليه وعقله شبه مشلول وهو الذى كان يمنى نفسه بالفرح ..ماذا يفعل وماذا يقول لوالده وهل اصبحت المسلسلات المصريه والعادات الصعيديه عاداتنا ..كيف يطلب منه ابـــوه مثل هذا الطلب ..
وهو فى هذا الموقف اذا بيد تهزه التفت الباهى واذا به يجد الجزار واقفاً خلفه وساله مالك يازول قاعد فى الظلم ده ..وقف الباهى وسلم على الجزار وحمد له سلامة الخروج من السجن ..جلس الجزار على الارض وقال للباهى اسمعنى كويس يالباهى ياولدى انا فى مقام ابوك ..وبرغم اتهامى فى قتل اخوك علا انا ما زعلان من ابوك علا زعلان على باقى الحوشه فدحين بدور منك طلب بدورك تكلم ابوك ابيع لى القطعه الاشتراه زمان من ابوى عشان انا خلاص كبرته على الجزاره بدور باقى عمرى اشتغل فى المزرعه قبل ان يرد الباهى.. فاذا بهم يسمعون صوت عوووويل وسكاليب من داخل القريه قما مسرعين اتجه القريه فاذا بهم يسمعون البكاء اتى من ناحية شفخانة القريه قابلهم صاموله العربجى وبكل حسن نيه مدا يده بالفاتحه اتجه الباهى وهو يقول لاحول ولاقوة الا بالله البركه فيكم يازول والله قالوووا العقرب العضت ابوك قدر المركوب انا ماعارف الخلى ابوك اكابس مع المغربيه جهة الحطب القدام بيتكم ..
تجمع اهل القريه على الباهى والكل يرفع فى الفاتحه وكبار رجال القريه يآمرون باحضار العنقريب ويوجهون بالشباب بالذهاب لحفر القبر بالرتاين والبطاريات ..

تغريدا

09-12-2010, 01:33 AM

الله الله الله عليكم فتحتوا شهيتنا من تانى

تغريدا

11-12-2010, 03:37 AM

أها قبروا المرحوم أبو الباهى والناس رجعت من الدافنه على وش الفجركدى وتعبانين دخلو على البيت والنسوان جهزن الشربات والشاى والقهوة وكبسوا الرجال التقول عليهم عطش السنين وحالاً نصبوا الصيوان قدام الباب ورصوا الكراسى والباهى قاعد هنااااااااااك يعاين للناس دى وكأنه بعاين فى فيلم أسود وأبيض وبلاصوت ناس ماشة وناس جاية وناس ترفع فى الفاتحة وعيونه متل تايه غريب حيران بيه الدليل ومايفوق من غيبوبة دى إلا أجى واحد صوته ذى الرعد يكورك من هناااااك الفاتحة هاااااا ناس حتى يقوم يرفع أيديه بالفاتحة وسرعان مايرجع فى حالة الذهول والسرحى تانى ويغيب بعقله عن الناس وأتزكر السارة أم ضحكة باشة والوش القمر وفجأة يتزكر موت أبوه والوصية الخلاه ليه ويقوم يجعر بعلووووو صوته ويقوموا عليه الرجال يازوول أستغفر يازول دا حال الدنيا .................... مضت تلاته يوم والفراش خلاص أترفع والباهى حالته زايدة سؤ والنار فى قلبه وروحة لاقادر يرضى أبوه فى تربته ولاقادر يرضى قلبه وبين نااااااااااارين نار كل واحدة ألعن من التانية وحاسى بسدره كأنه عليه ضخور تقييييييييلة وماقادر يفت لى زول؟؟؟؟!!!
فى ساعة كدى من سواعى العصارى كده مرق على الجروف كان يقدر يشيل نفسه شوية وأثناء ماهو ماشى جاتوا فكرة طق وقعت فى راسو العامل ذى قدرة الفول المختوتة فى جمر كبااااااار تغلى بق بق بق بق بق
ماعندوا زول غير حبيبة الروح والقلب السارة يفت ويفتفت معاها وخلاص عاد مسكته أم هلا هلا أها يلاقى السارة وين وكيف؟؟؟؟؟؟؟؟؟

ود المطامير

11-12-2010, 09:35 PM

رجع الباهى وبحث عن ود حميدان إلى أن وجده يلعب البلّى مع الأطفال
ناداه وقال له
_ المبروك بدورك فى مشوار ضرورى
تبسم ود حجيلان وإنفرجت أساريره لإحساسه بأن الباهى يرد منه أن يذهب لقرية السليت
وقطع شك يا ود حجيلان بدورك تمشى للسمحه وبيديك طراده تضرب بيها فتّه بموية فول مع بصله كااااااااااااربه
_ أيّا يا الباهى .. بدورنى أمشى للسمحه ؟
_ أيّا يا الممسوخ ، أمشيلها وبراحه قول ليها الباهى منتظرك حدا الشدره المسكونه

عند الغروب كانت الساره تتوشح السواد وتتوكأ على عكاز كأنها عجوز أكل الدهر
عليها وشرب ، وإلتقيا و تحت ضوء القمر تأمل العيون الحزينه
أمسك بيديها ودمعه حااااره طفرت على خده
_ لامتين الدنيا معاكسانا آلسمحه ؟
_ الصبر ، الصبر سمح آنور عيونى
_ لامتين لكن ؟
_ لحد ما يفرجها ربنا ، وإت شايف كلما تفرج الموت يشيل مننا عزيز
وأولهم عمى أبوالباهى عتق روح أخوى حمد من الموت

نظر إلها طويلاً وهو يغالب دموعه فسألته بلهفه
_ مالك آنور عيونى
_ شن أقولك آلسمحه النار قايده فى جواى
_ نار ، نار شنو آزينة الشباب خوفتنى
_ أبوى ما عفى حمد فى شان حق الله
_ وووووب على وفى شان شنو عاد
_ فى شان أكتلو أنا بيدينى ديل

وأغمى على الساره وأمسك بها قبل أن تسقط على الأرض
وعندها مر بجانبهما الشقيان ورأى الباهى يمسك بالساره فلكز حماره وهو يصيح

آناس الحله الترابه فى خشيمكم آناس الحله الترابه فى خشيمكم

محمد الجزولى

12-12-2010, 09:23 PM

آناس الحله الترابه فى خشيمكم آناس الحله الترابه فى خشيمكم

الحكاية باين عليها سخنت شديد
وزاد تعاطفنا مع الباهي والسارة لكثرة الضربات الموجعة التي تلقوها ...
في انتظار فارس آخر ليسطر حدثا جديدا في سياق القصة
همسة : منور البوست يا نزار ياخ

محمد الجزولى

27-12-2010, 10:49 PM

الحكاية باين عليها سخنت شديد
وزاد تعاطفنا مع الباهي والسارة لكثرة الضربات الموجعة التي تلقوها ...
في انتظار فارس آخر ليسطر حدثا جديدا في سياق القصة

في انتظار فارس يروض الحروف ليضيف الي هذا الجمال بعدا آخر
لكي نكمل قصة مّنتدانا

محمد الجزولى

04-01-2011, 10:01 PM

ترقبوا الحلقات الاخيره من قصة مُنتدانا
هل سيتزوج الباهي من السارة ؟؟؟؟؟
أم هناك مفاجآت ؟؟؟؟
ترقــبونا ......

ود المطامير

05-01-2011, 06:12 AM

علا صياح الشقيان وتجمهر أهالى القريه مستطلعين الخبر
وأخبرهم بأن الباهى والساره يختليان ببعضهما فى مكان يبعث على الشبهات
وصل الخبر لأخيها حمد فحمل مسدسه وإستقل سيارته وركب معه عدّة أشخاص
وهو يضمُر فى نفسه شرّاً ، وإنتشر الخبر فى قرية الباهى فخرج أهل القريه عن بكرة
أبيهم صوب مكان تواجدهما عند الشجره المسكونه

_ الباهى .. الباهى ، ترانى شايفه هناااك لمبات ماليه السكه ، أخير لى أتراوح
_ لا لاا السياره تتراوحى وين ؟ ديل قاصدننا ، أكيد ود الشقيان توّر علينا علال الحِلّتين
خافت الساره خوف شديد وصاحت به
_ سجمى ، سجمى ، خلاص آلباهى أنكرب حِدا شدر السدر وأنا بشاقق باللعوت
أصلو الشدره المسكونه دى قلبى ماكلنى منها

_ أنكرب وين آزينة السمحات ؟ .. وكيف أقوم جااارى وأفوت
قلبى الشايلو بين ضلعى رادك تب .. وما راد غيرك فى البنوت
يمين بالله آلساره ، يا نعيش سوا ... يا وحاتك آلغاليه سوا نموت

وأمسك بيدها وسار بها قاصداً تلك الأضواء التى ملأت الشارع ، أوقف حمد
سيارته بعنف مما أثار غباراً كثيف ، وأخرج مسدسه ولوّح به فى وجه الباهى وهو يجذب
الساره من يدها بعنف ، وقال وهو يصيح به
_ وكت بدور تنتقم كان المفروض تنتقم من الرجال
نظر إليه الباهى طويلاً فى اللحظه التى إمتلأ المكان بأهل القريتين وقال له
_ آحمد آخوى قدام خلق الله ديل ، أنا بطلب منك يد الساره على سنّة الله ورسوله .

نزار حسن محمد

13-01-2011, 12:27 AM

كانت كلمات الباهى قويه خرجت كالرصاص على راس حمد ..ساد الصمت كل الحضور الى ان صاح رجلاً من حلة الباهى مبروك عليك
وتحدثت من الطرف الثانى حاجه كبيره من قرية الساره وقالت يابتى يالساره الان الملائكه ببنو ليك فى بيتك فى السماء واطلقت زغروته طويله
هاج الحضور مهللين وبداء حمد محتار عندما مد له الباهى يده يطلب منه قراة الفاتحه ..وامام فرحة الحضور ما كان من حمد الا ان مد يده مصافحاً الباهى لتعلوا مرة ثانيه الزغاريد وتحرك الجميع على قرية الساره وتجهوا نحو مسجد القريه فى مسيره احتفاليه خرجت لها كل القريه جلس الباهى امام الماذون وفى الطرف الاخر جلس حمد شقيق الساره وحولهم التفوا رجال القريتين وبعد ان اعلان زواج الباهى من الساره انطلقت من بندقية عم الساره طلقه اعلاناً عن بداء الافراح والليالى الملاح

تغريدا

16-01-2011, 07:32 AM

الكل فرحان وساد نوع من الفرح القرية بعد أن كان يكسوها السواد وعاد السارة خليها ساااااااااى طايرة طيييييييير من الفرح والبسمة المن عيونا تنطط ويكسو وجهها نور نور الفرح بعد الحزن المر وبيتها ملييييان نسوان مجموعة بى هنا يسون فى الدلكة وجماعة بى جاى يسوا فى الريحة وجماعة بهناك يجهزن فى ملابس العروس وجماعة بى هنا يجهزن فى العروس زاتها وقاعدة زهرة المشاطة فووووووووق تفتل فى السلة علشان تمشط السارة إلا فى نفرين قاعدين يعاينوا ساااااااى لا مع الببنوا ولا البناولوا فى الطين تفتكروا منوا؟؟؟؟؟؟!!!!
حليمة وبت أدريس قامت حليمه وخلاص حرقا السكات همست لى بت أدريس وقالت ليها: هسى عليك الله البت المطيورة دى فى داعى للتكشم والتبسم دا وأبوها تربته مابردت؟؟؟؟ردت ليهابت أدريس: يابت أمى العرس ضحك الفار فى جحره فى اللحظة ديك جن داخلات بنات خالة السارة وهااااااااااااااك يازغاريد شقت الحلة شق وقالن كدى ختن الدلوكة وياداك الغنا ومبروك عليك الليلة ياسرورة (دلع السارة)

محمد الجزولى

16-01-2011, 11:36 PM

لا نملك إلا أن نرفع القبعات إحتراما لهذه الاقلام التي نزفت مدادها جمالا هنا
وأصبحت القصة تحمل بصمات أيادي تخضبت بلون الابداع والدهشة

تغريدا

24-01-2011, 01:39 AM

أستاذ الجزولى الجماعة ديل لى هسى مالقوا ليهم صالة ولا نادى يعملوا فيه العرس دا؟؟؟؟؟؟

محمد الجزولى

24-01-2011, 03:42 AM

أستاذ الجزولى الجماعة ديل لى هسى مالقوا ليهم صالة ولا نادى يعملوا فيه العرس دا؟؟؟؟؟؟
هههههههههه
جاييك يا تغريد
فعلا عاوزين نكمل القصة ... اصبري لي بس يومين كده

تغريدا

24-01-2011, 04:01 AM

[QUOTE=محمد الجزولى;568728]هههههههههه
جاييك يا تغريد
فعلا عاوزين نكمل القصة ... اصبري لي بس يومين كده[/QUOTE

صااااااااااااااااااااااااااااابريييييييييييييييييي يييين:D:o:cool:

محمد الجزولى

25-01-2011, 09:47 PM

(فى اللحظة ديك جن داخلات بنات خالة السارة وهااااااااااااااك يازغاريد شقت الحلة شق وقالن كدى ختن الدلوكة وياداك الغنا ومبروك عليك الليلة ياسرورة (دلع السارة))
بينما كانت الزغاريد تعلو من حوش النسوان فرحة بزواج السارة من الباهي
كان الموقف علي النقيض في الطرف الآخر ... حيث يجلس الرجال وهم يكملون مراسيم عقد زواج الباهي من الساره ...
كان للفرحة الطاغية التي عاشها الكل بهذا الزواج قد انست الناس انفسهم .. فصاروا يعبرون عن فرحتهم بشتى الطرق ... وبينما كان عم الساره فرحا بهذا الزواج اطلق بندقيته تلك وهو في غمرة فرحه ولم يدرك ان البندقية كانت مصوبة حيث يجلس المعازيم ... واذا بتلك الطلقه تذهب مباشرة لتستقر في قلب حمد اخو الساره ...
علا النحيب والنياح وسرعان ما وصل الخبر الي ركن النساء اللاتي كن يرقصن ويغنين وانقلب هذا الغناء الي عويل وصياح مرتفع شق عنان النساء حتى عم الخبر ووصل الى القري المجاورة ...
تجمع اهل القرية والقري المجاورة امام باحة المستشفي التي نقل اليها حمد علي عجل .... مرت الساعات بطيئة وحمد داخل غرفة العمليات .. والكل في تلهف وانتظار ... خرج الدكتور الذي كان يقوم باجراء استخراج الرصاصة من قلب الباهي ليعلن الخبر الحزين ... وفاة حمد جراء الطلق الناري الذي اصابة ........

مايسة

08-02-2011, 10:33 PM

فكرتو فأجدتو
كتبتو فأمتعتو
اجتمعتو فختمتو

قصة منتدانا

كل يأخذ نصيبه وما زرع من هذه الحياة

محمد الجزولى

09-02-2011, 09:47 PM

فكرتو فأجدتو
كتبتو فأمتعتو
اجتمعتو فختمتو

قصة منتدانا

كل يأخذ نصيبه وما زرع من هذه الحياة
شكرا مايسة
فقد أبدع الجميع هنا
فمرحى لهذه المدينة التي تنجب المبدعين

محمد الجزولى

09-02-2011, 09:56 PM

....النـــــــــــــهـــــــــــــــــــــايــــــ ــــــــــــــــــة ...

عم الحزن أرجاء القرية والقرى المجاورة... أقيمت سرادق ضخمة للعزاء...
أتي أهل البندر وتجمع الناس من كل مكان... هكذا هم أولئك البسطاء.. المعجونون من طينة الطيبة والوفاء... والخُلق الكريم .... تجدهم دائما في الملمات بقلب واحد.... يتناسون خلافاتهم ومشاكلهم.... تنظر إليهم فتحسبهم جميعا أشقاء المتوفى او أولاد عمومتهم...
مضت أيام الحداد سريعا وتفرق أهل القرى ولملمت الشرطة بقية أفرادها حيث إن موت حمد كان واضحا لا لبس فيه... فقد كان ضحية القتل الخطاء برصاصة طائشة أطلقها عمة....
إنها تصريفات الأقدار وعدالة السماء... فكأنما أراد القدر أن يموت حمد كما مات شقيق الباهي من قبل... وكأنما أراد القدر للباهي أن يكون في حِل من غضب والدة عندما أمره بأخذ ثأره من حمد... فقد مات حمد برصاصة طائشة ورفع الحرج عن الباهي...
وفي ذات يوم قمري في ليلة صيفية جلس الباهي والسارة في أطراف القرية والقمر بدرا يرسل باشعتة فتتناثر حول الرمال التي تحيط بالاثنين
الباهي: ما عارف أقول شنو يا السارة... كنت عاوز عرسك يكون حديث الحلة كلها... إلا بس القدر حكم... والأحزان قالت كلمتها
السارة: الحمد لله يا الباهي.. كفاية علي أنت يا الغالي... صبرنا كثير يا الباهي... باقي القليل
ولا يهمك يا السارة... باكر إن الله أراد بحيكم في بيتكم وباخدك في شهر عسل طويل...طويل ....
السارة : سمح يا الباهي . اسع خليني امشي ... العِشا أذن... والليل أمسي
الباهي : سمح يا السارة... يلا اروحك...
وبينما همّا بالنهوض إذا بجلبة عظيمة تأتي من الناحية الأخرى للقرية... وهي تقترب رويدا رويدا... وسرعان ما علا صوت الزغاريد والغناء... وهي تقترب حيث يقف الباهي والسارة...
تقدم الموكب أخوان الباهي وأهل السارة وهم يمسكون بأيدي بعضهم البعض والفرحة تغمرهم وصوت الغناء من خلفهم
تقدم عم السارة من الباهي وهو يخاطبه
شوف يا الباهي... السارة ياها ِبتنا ... وكان لفينه الدنيا دي كلها ما ح نلقي راجل يحب السارة قدرك.. كفاية أحزان يا الباهي... قررنا نعمل ليكم حفلا كبيرا ودعينا كل القرى القريبة والبعيدة
وبعد الحفلة يا الباهي الساره ياها ا مرتك... تسوقه وتسافر محل ما تريد ...
نظر الباهي الي إخوته بامتنان عظيم ثم حول نظرة إلي السارة التي كانت تغمرها دموع الفرحة ثم ضمها بحنان بالغ وهو يكاد يطير من الفرح....
ومضت السنون ........ولا زالت السعادة ترفرف على عش الباهي والسارة ويعيشون في ثبات ونبات... يجمعها حب كبير ... وعاطفة جياشه...وقد رزقا بإثنين من البنين ومثلهم من البنات.........

تــــــــــــــــمـــــــــــــــــــــت .........

تغريدا

12-02-2011, 12:06 AM

ابو عبد الرحمن

13-02-2011, 01:04 AM

محمد الجزولى

13-02-2011, 03:47 AM

حقيقة كانت قصة قمة فى الروعة والأمتاع رغم الألم الذى صاحب أبطالها والنهاية سعيدة التحية لكل قلم مبدع سطر أبداعه هنا ولك أستاذنا المبدع الجزولى ونتعشم فى قصة تانية كااااااااااااااااربة زى دى
فعلا والله يا تغريد
الكل ابدع واجاد
واضاف للقصة بعدا آخر
لهم كل الود والاحترام
ولك احتي تغريد كل الشكر والتقدير

محمد الجزولى

13-02-2011, 04:01 AM

والله حراام عليكم يا جماعة انا ما قلت ليكم انا حاجز النهاية
وشهر العسل وكدي ............. غايتو جنس خيانات ....
ما ممشكلة ننتظر اولادهم ........
ههههههههههههه
نعمل شنو يا ابو عبد الرحمن صيوان الفرح ليهو اسبوعين مدقوق والمعازيم كملو البارد كلو
قلنا ندي الفنان حقو ويمشي ياخ
نعمل شنو وانت فاتح لينة فتحا مبينا
تحياتي ابو عبد الرحمن

ود المطامير

13-02-2011, 04:04 AM

والله حراام عليكم يا جماعة انا ما قلت ليكم انا حاجز النهاية
وشهر العسل وكدي ............. غايتو جنس خيانات ....
ما ممشكلة ننتظر اولادهم ........
تاباها مملحه ، تكوس ليها قروض ;)

ود المطامير

13-02-2011, 04:05 AM

رائع أيها الحبيب الرائع

نهايه روعه والله

يلا عاوزين قصه تانيه يا الحبيب

محمد الجزولى

13-02-2011, 04:37 AM

رائع أيها الحبيب الرائع

نهايه روعه والله

يلا عاوزين قصه تانيه يا الحبيب
الروعة هي وجودكم فيها حبيبنا ود المطامير
فقد اضفت لها بعدا آخر
يعطيك الف عافية الحبيب ود المطامير

ابو عبد الرحمن

13-02-2011, 04:42 AM

ههههههههههههه
نعمل شنو يا ابو عبد الرحمن صيوان الفرح ليهو اسبوعين مدقوق والمعازيم كملو البارد كلو
قلنا ندي الفنان حقو ويمشي ياخ
نعمل شنو وانت فاتح لينة فتحا مبينا
تحياتي ابو عبد الرحمن
هي يا ود يا حماده اعمل شنو مع المحايات الشربوني ليها دي ؟؟؟
يقيت في النوم اذكر هناية اقوووم من النوم زي المجنون افتح النفاج
ولا هناي داااك والله التقول سقوني ليها مع الجبنه ... غايتو ادوني
اسبوع لو ما جيت غيرفكي عوض حصاحة ما عندكم حلل ...

ابو عبد الرحمن

13-02-2011, 04:55 AM

تاباها مملحه ، تكوس ليها قروض ;)
( ده شنو يا مطره مثل ايرلندي ولا شنو )
والله انا حاجز شهر العسل والدخل وحاجات تانية ،، انتو نسيتو
لا شنو ... لكن الظاهر الجماعة خافو مني افلت ،، قامو كلفتو العريس
سريع سريع قبل ما اجي انا ......
ساره يا ناس ما بنساها
ساره السرقت قلبي براها
والله بحبها اكتر من نفسي
يا ابوي اديني رضاك خليني
يا ابوي الساره دي روح قلبي
من ما تبت يا ابوي هي في بالي
يا ابوي عليك الله الخالقك وخالقني
امشي معاي لا تكسر حلمي وخاطري
........................................
وبعد ده تبيعوني ...................الله غالب
اها القصة الجاية من اسي انا حاجز شهر العسل
والحفلة سمح

محمد الجزولى

13-02-2011, 05:01 AM

هي يا ود يا حماده اعمل شنو مع المحايات الشربوني ليها دي ؟؟؟
يقيت في النوم اذكر هناية اقوووم من النوم زي المجنون افتح النفاج
ولا هناي داااك والله التقول سقوني ليها مع الجبنه ... غايتو ادوني
اسبوع لو ما جيت غيرفكي عوض حصاحة ما عندكم حلل ...

ههههههههههههه
كان كده يا ابو عبد الرحمن انا جاييك بى نفسي
ياخ انت هين ولا لين
عوض حصاصه شنو يا زول انا جايب ليك فكي ابو شحاطه زاتو ( هههههههه)

ابو عبد الرحمن

13-02-2011, 05:05 AM

ههههههههههههه
كان كده يا ابو عبد الرحمن انا جاييك بى نفسي
ياخ انت هين ولا لين
عوض حصاصه شنو يا زول انا جايب ليك فكي ابو شحاطه زاتو ( هههههههه)
ههههههههههههههههههههههههههههه
والله قتلتني من الضحك الله يسعد ايامك كلها يا محمد .
بس فكي شحاطه ده الظاهر ما نافع يا اخي ده اول مره
اسمع بيهو ... ده جاي من ( شحطه ) ههههههههههههه

ود المطامير

13-02-2011, 06:43 AM

( ده شنو يا مطره مثل ايرلندي ولا شنو )
والله انا حاجز شهر العسل والدخل وحاجات تانية ،، انتو نسيتو
لا شنو ... لكن الظاهر الجماعة خافو مني افلت ،، قامو كلفتو العريس
سريع سريع قبل ما اجي انا ......
ساره يا ناس ما بنساها
ساره السرقت قلبي براها
والله بحبها اكتر من نفسي
يا ابوي اديني رضاك خليني
يا ابوي الساره دي روح قلبي
من ما تبت يا ابوي هي في بالي
يا ابوي عليك الله الخالقك وخالقني
امشي معاي لا تكسر حلمي وخاطري
........................................
وبعد ده تبيعوني ...................الله غالب
اها القصة الجاية من اسي انا حاجز شهر العسل
والحفلة سمح
هع هع هع هع
ههههههههههههه
;););););)

الله يجازى محنك كتلتنى بالضحك