مرثية للراحل مصطفى سيد احمد

[اسلام فرح]

في زولا بنى المركب

عشان نرحل نعود لي ديارنا

ولكن وقت العوده

كان رحل قائد المركب

ورحلة معاه الاحلام السندسيه

وكان الحزن النبيل طريق العوده

للعمارات السماوي والاسامي الاجنيه

والاماني العشنى ديما فيها لليالي المخمليه

يا بلد روح دليلك

وما بقت للعوده سكه

نحنا ضعنا

والبعاد حيطول ويبقى

والعوده لى ربوعك

خوفي تكون جو صندوق مقفل

لا نسيمك يرضى بي

ولا عيوني تشوف سناكي

ما خلاص الروح دي راحت

والنفس مقطوع مبدد

والعيون مسبوله نايمه

يابلد الوداع مكتوب مسطر

من بداية حبي ليكي

وكلما فكرت ارجع القدر باعد دروبنا


ان هذه المرثيه تشمل كل من فارقو الحياة وكان لديهم حلم العوده للسودان

[محمد الجزولى]

رحم الله الفنان مصطفى سيد احمد
وكل الذين فارقوا دنيانا الى دار الخلود
وشكرا لك الحبيب اسلام فرح على هذا الاحساس الراقى

[اسلام فرح]

رحم الله الفنان مصطفى سيد احمد
وكل الذين فارقوا دنيانا الى دار الخلود
وشكرا لك الحبيب اسلام فرح على هذا الاحساس الراقى


الجزولي اشكرك على المرور الراقي دمت بخير اخي محمد

[الباشا السوداني]

سيظل مصطفى سيد احمد عنوان عريض في كل الايام

اسلام فرح مشكور

[اسلام فرح]

سيظل مصطفى سيد احمد عنوان عريض في كل الايام

اسلام فرح مشكور


طبعا سيبقى ود سلفاب قامه من قامات الفن السوداني اشكرك الباشا على المرور

[مهدي عبد الله]

مصطفي حاجه محفوره في دواخلنا

[اسلام فرح]

مصطفي حاجه محفوره في دواخلنا

رحم الله مصطفى سيد احمد وشكرا مهدي على المرور

[عبد الحفيظ علقم]

من حقه علينا ان نبكية مثلما زرع فينا البسمة وجب ان ننعيه

عزيزنا مصطفى سيد احمد المقبول( ودسلفاب) عبق الارض ونسايم الوطن ودندنة الافراح

تراتيل الوداع الاخير

خلاص رحتا وراحت معاك

كل الامانى الحلوة ياوجع الزمان

راحت معاك كل النوارس

والطيور الفاقدة ليها جواز سفر

ونحن منتظرين عيونك

وطلة افراح غنية جايه

ونغمة الزول البردد

(الحبيبة تغنى لينا لا هموم تسكن

دروبنا ولا بلاقينا الخطر)

والليلة مسكونين جراح

ونحن خايفين الخطر

ولسه منتظرين تجينا

او خيالك يطل علينا


مرة زى المجدلية

ومرة زى بنتا حديقة

ومرة استاذا بعلم

فى الحروف الابجدية


ومرة زى طير النوارس

طار وباريهو الجفاف

كل الموانى اتقفلت

فى وشو واتمسح العفاف


واصبحنا عمانا الحريق

واتكسر المقداف على ساعد الطريق


يا مطارات الوداع

اتقفلى اليوم فى سواد

مافيش رحيل من البقاع

ولمن يجى الزمن الفلانى

نحن بنغنيك سعادة

وكل زول فى اللحظة ديك

بكسر كمان زيف القناع


لكن ؟؟؟؟؟

وينوالزمن الفلانى

ده لسه راجى المجدلية

ولسة منتظر الصغار

يبقو السعادة السرمدية


ونحن منتظرين وحاتك

الجايي من رام الله

لى جوف الزمان

والودع الاحزان براهو

وختا فى قلبو الامان

نحن نبقالو القضية

ونحن نبقالو الاسم

وبرضو نديهو الهويه


الغالى وجع الكل

يافرحة الاطفال

ياغنية عربية

يارحلة النورس

لى غابة منسية

يا ونسة الحبان

فى ليلة قمرية

يا انت يا نور الامانى

ويا بطاقاتنا الخريفية


شفع العرب الفقارى

لسه بجرو ورا القطارا

وبرضو مستنين عيونك

حقيقة ماقصة خيال

يا نورة يا طيبة الامانى

السمحة راجياك بالمحال

راجياك معاها احلام طفولة

شادين عليك امل الرحال


والليلة دونا الكلام

ورجع فاضى الكلام مليان

مصفح بى حلم عودة

مسطر اسمو فى الاحزان

مصبر بى كلام طفلة

تصبر فينا بالقران


كل الامانى وراك ضاعت

والكلام القلنا ليك قبل السفر

ما اظنو يومنا سواك يفوت

ما اظنو ميعادنا بيصل

كل الامانى سواك تقيف

كل الحديث الكان جميل

الباقى من انسان فضل


ولمحتك!!!!!!!!!

انت انسان وحيد

واقف براك والهم عصف

الملم قدرتى الباقية

واجمع شتات قلبى الحزين

الدون عيونك كان رجف


واجيك بى قدرتى الباقية

حطام انسان!!!

موشح بى شقى الدنيا

واجيك فنان

اصارع موجة الالحان



اجر النمة والدوبيت

اشد اوتارى واحكيلك

حكاية الشفع البمحو

خطاهم ديمة فى الزحمة

حكاية زول فى تسفارو

فقد تذكرتو للرحمة


واخيرا يا غرام الروح

رحل صوت المغنى حزين

وفاتت فرحة الاشواق

وعاد لى متين تعود لى متين

ويوت راجين نسيمة الدنيا تلفحنا

نقابلك- وبس نصد راجعين

ولسه وبرضو مستنين


له الرحمة بقدر ما فرح واسعد له الرحمة بعدد الحصى والرمل

اسالك ايها القارى الكريم الفاتحة لروحة والاخلاص 11مرة

[عبد الحفيظ علقم]

شكرا اخي اسلام علي هذة القصيدة الرائعة كما روعة ذلك الرجل المرهف والدافئ الاحساس والبسيط كمابساطة هذا الشعب العظيم

[اسلام فرح]

شكرا اختي اسلام علي هذة القصيدة الرائعة كما روعة ذلك الرجل المرهف والدافئ الاحساس والبسيط كمابساطة هذا الشعب العظيم


اخي علقم اشكرك على مرثيتك الفخمه على روح الاستاذ مصطفى سيد احمد ولك مني اجمل تحيه واشكرك على المداخله العذبه لك مني كل الشكر عبد الحفيظ اخوك اسلام فرح

[عبد الحفيظ علقم]

معليش الاخ اسلام فرح علي الغلطه الطباعية
وتشرفت بمعرفتك يارايع