تكية مع آسيا بت الصافي 000 وجلسة مع الطيب ود أبقرجة ( علي الهواء مباشرة ) 000

[خالد 000 ابقرجة]

أول حاجة رمضان كريم وكل عام وأنتم بخير 000

تاني حاجة علي الهواء مباشرة دي عشان ما تبقي كضبة في نهار رمضان 000
خلونا نقول أنها زي (بث مباشر ) بتاعة تلفزيون السودان للمباريات المسجلة من قنوات تانية بي ضبانتا 000


قبال التكية الرمضانية عاوز أرجع لنبوءة للسيد الوالد أيام كنتا في تالتة متوسط ( ممنوع السؤال عن التواريخ ) 000

المهم في يوم من أيام المتوسطة والواحد بتغدي علي الواقف علي عجل عشان الحق الدافوري لقيت الحاج بقول لي
أقعد في الواطة وأشبع في حلة أمك لأنها إمكن تكون آخر سنة ليك معاها 000
الحاجة استنكرت الموضوع بشدة 000
لكن الحاج واصل ( السنة دي ان شاء الله تمتحن الثانوي 000 وامكن تمشي مدرسة داخلية 000 وبعدها الجامعة 000 وبعدها تشتغل وتبقي من ميز لي ميز لغاية ما تجي واحدة بت حلال تخطفك من أمك ) 000
والكلام طبعا كان بلمز في محاولة لمناكفة الوالدة ويومها ما كملتا باقي الحوار وجري علي الدافوري 000

المهم في الموضوع أنو نبوءة السيد الوالد تحققت بحذافيرها 000 بس الحاج ما ضمن موضوع الإغتراب ده في كلامو 000
ومن يوما وحلة آسيا بت الصافي الا في اجازات متباعدة 000

بس في طوال فترة التغرب الداخلي والخارجي ، ما كانت حلة الوالدة هي الفارق الوحيد 000
لكن تكيتي الضحوية معاها وجرجرة الحديث معاها الذي كان يطول وما أحلاها من تكية 000
متشعب حديثها في النسب والإقتصاد والسياسة والذكريات التي تحوم علي كل ماهو جميل في مدني القديمة 000

الأيام دي الواحد شغال تكيات مكثفة صباحية ومسائية في محاولة لتعويض عقدين من التكيات الضائعة ( أماااااك ما قلنا تواريخ ما معانا ) 000

[خالد 000 ابقرجة]

تكية أولي 000 حاجة خديجة عبقرية إقتصادية سبقت عصرها 000

تكية ام بارح كانت في الإقتصاد 000 وحاجة خديجة بت فاطنة بت عبد القادر ود سراج النور 000
ده طبعا الإسم المحبب لي وابن الخالة ياسر يوسف لمناداة جدتنا رحمها الله في بعض شقاوة كانت تحبها منا 000
جاء ذكرها بالأمس وترحمنا عليها في تكيتنا الرمضانية وبدأ حديث آسيا بت الصافي عن أمها حاجة خديجة 000

--- عارف الحاجة دي كان تنفع وزير مالية في زمننا التعبان ده 000
زمااااان زمن الزمن زين والشعر مغطي الإضنين 000 ( وده التعبير المحبب للسيدة الوالدة حين تريد أن تنعي أيام الزمن السمح ) 000
لمن كانت أم سويقو دي بتفور بالناس والحياة زي قدرة الفول 000
الزمن داكا كانت حاجات البيوت كووولها بتجي باليومية من دكان اليماني ولا دكان حاج المبارك 000
ربع رطل زيت 000 نص ملوة بصل 000 حبة ملح 000 شوية شمار 000 نص رطل سكر 000 ربع رطل شاي 0000
الناس كانت عايشة علي قدر حالا 000 ولقمة اليوم باليوم 000 وبالكتييييير كدي تكون لقمة فايضة تترفع للحبان بالحيطة 000
أو تترسل مع أصغر زول بالنفاج 000
أها في الفترة ديكي حاجة خديجة عليها رحمة ربنا قعدت ليها تلاااااتة شهور تحسب في الحاجات اليومية لغاية ما عرفت صفيحة الزيت بتكفيها كم 000
وشوال الفحم بكفيها كم 000 وكيلة العيش يتكفيها كم 000
وعملت ميزانيتا 000 وطلبت سلفية من حاج محمد الصافي الله يرحمو 000
واشترت حاجاتا بالجملة 000
لغاية هنا مافي أي حاجة جديدة في كتير من الناس البوسعا عليهم ربنا كانو بعملو كدة 000
بس الجديد أنو الحاجة جابت ليها (برطمانيات ) كتيرة 000
واحدة لي قروش الزيت 000 والتانية لي قروش الشاي 000 والتالتة للسكر 000
وكل يوم تشيل مصاريفو زي ما كانت بتعمل أول 000 ولمن تشيل ربع رطل زيت من الصفيحة 000
تخت قروشو في برطمانية الزيت (بي سعر القطاعي ) 000
ولمن تشل نص رطل سكر 000 تخت قروشو في برطمانية السكر 000 وكدة لي كووول الحاجات 000
لمن أي حاجة تقرب تخلص 000شوال الفحم مثلاً تفتح برطمانية الفحم 000 وتطلع تمن شوال الفحم000 وباقي القروش أرباح تربطا في صرة 000
وفي أول مناسبة في البيت الكبير 000 لمن الحال ضاق والناس احتاجت لي قروش 000 حاجة خديجة فتكت صرتا 000 وطلعت أرباحا من تجارتا مع نفسها 000
وكان يوم مشهود 000 لأنو الحاج بعد داك اعتمد الموضوع رسمي وعمل ليها دواليب صغيرة بي نفسو في المنطقة عشان تخت فيها الحاجات 000

أها دي عبقرية حاجة خديجة أمي ( والكلام ما زال للآسيا بت الصافي ) موش زي وزير ماليتكم الميزانيتو بتضرب من أول شهر 000

وضحكة عاااالية مني شماتة في وزير المالية الميزانيتو ضربت 000

- لكن يا حاجة وزير ماليتنا ميزانيتو ضربت في تلاتة شهور ما شهر واحد 000

- يعني جات علي الشهرين ديل 000 ما جرايدكم كووول يوم بتلفق وبتبالغ في أخبار بايتة 000 مشيها لي شهر واحد المهم ضربت وخلاس 0000

[معتز الريح]

مهندسنا الحبيب ..
التحية ليك وللوالده ..
أنتو اتونسو ونحنا منصتين ..
رغم موضوع تكية أمبارح ده بجيب الحسرات ..
لكن .. لا بد منه ..

[ابو عبد الرحمن]

ده حجري ( أول واحد ) وجايك برواقه أخي خالد ابو قرجة
وجاي لعمك الصافي رحمة الله عليه من فوق سبع سموات
وجاي لياسر ( كديسو ) وحاجة اسيا والحبوبة خديجة وجميع
عائلة الصافي ،،، وهي غنية عن التعريف ،،، ،،،،،،
واصل خالد الصافي بدون فواصل ونحن متابعين

[خالد 000 ابقرجة]

جلسة أولي سياسة زمان 000 سياسيون صادقون 000 وتميز خاص لمجتمع مدني السياسي 000

والفرق بين التكية والجلسة هو الفرق بين مزاج الونسة بين الوالد والوالدة 000

حاج الطيب ود ابقرجة 000 هذا الرجل الذي يعشق الحديث عن الخدمة المدنية أيام كانت خدمة مدنية 000
وحين يستهويه الحديث والحكاوي يتقرفص وسط السرير في جلسة محببة الي نفسي ويبدأ سرده المرتب لوقائع تاريخية 000
ومشاريع عمل فلسفته فيها أن خبرات الأقدمين يمكن أن تنقل بالحكاوي طالما أن مضابط الخدمة المدنية قد ذهبت الي المزابل 000

في قعدتنا في الصالون بعد التعليق علي تكيتنا مع الحاجة 000 وعبقرية حاجة خديجة والخاتمة التي انتهت بفاول متعمد مع وزير المالية
علق الحاج علي كسرة الحاجة بتاعة الميزانية بأنها كانت سياسية من الدرجة الأولي 000 وأيام الإنتخابات زمان لمن كان جدنا عمر محمد عبد الله رحمه الله 000
مرشحا عن الوطني الإتحادي كان وكيله حاج محمد الصافي 000 وكانت أسيا بت الصافي ممن يتولون توعية جيلها من الفتيات بالإنتخابات 000

وعرج الكلام علي العصر الذهبي للمارسة الديمقراطية 000 وخصوصية ود مدني 000

عارف زمان ( والحديث للطيب ود أبقرجة ) كان مستوي الوعي عالي في الأحزاب وبالتالي في عامة الشعب 000
يعني بالإضافة للحملات الإنتخابية للمرشحين 000 كان بتكون في لقاءات تنويرية يشارك فيها مرشحو جميع الأحزاب مجتمعين 000
كل الهدف توعية الناخبين وحثهم علي الذهاب لصناديق الإنتخابات بغض النظر عن الشخص الذي ينوون ترشيحه 000
لأنو الناس كانت صادقة مع نفسها 000 وتعتقد جازمة أن من يستطيع تقديم نفسه جيدا وترتيب برامجه هو الأولي بصوت الناخبين 000

وتخلل الحديث أمثلة كثيرة وردت فيها كثير من أسماء مدني القديمة السياسية بمختلف توجهاتها وبمواقف مشرفة 000

حين خلوت لنفسي قبل النوم 000 سرحت في حالنا اليوم 000 والمكايدات والمزايدات 000
والوطن الذي أصبح وليمة كبيرة يتصارع الكل للفوز بأكبر قدر منها 000 وينسون أو يتناسون أن مصير كل وليمة فضلات تصرف عبر آبار السايفون ( غير الحضارية ) 000

[خالد 000 ابقرجة]

مهندسنا الحبيبة ..


ده باص قون من بتاعينك للجندي وأبو مازن ولو دخل واحد من عرسان جدة برضو ما مشكلة


مهندسنا الحبيبة ..
التحية ليك وللوالده ..
أنتو اتونسو ونحنا منصتين ..
رغم موضوع تكية أمبارح ده بجيب الحسرات ..
لكن .. لا بد منه ..


ود الريح كل سنة وانت طيب ياخ 000
مرحب بيك في التكية وأول فنجان قهوة ان شاء الله من نصيبك 000
الحسرات كتيييرة بس المهم نستفيد منها بدل الندب واللطم 000
والله كريم 000

[خالد 000 ابقرجة]

ده حجري ( أول واحد ) وجايك برواقه أخي خالد ابو قرجة
وجاي لعمك الصافي رحمة الله عليه من فوق سبع سموات
وجاي لياسر ( كديسو ) وحاجة اسيا والحبوبة خديجة وجميع
عائلة الصافي ،،، وهي غنية عن التعريف ،،، ،،،،،،
واصل خالد الصافي بدون فواصل ونحن متابعين


أبو عبد الرحمن الرجل الخلوق 000
وفار (زنقو) اللفتاوي الحريف 000

رمضان كريم وكل سنة وانت طيب 000
عرف كديسو دي رجعتني لي عهد المزاد الجميل 000
والأسماء العجيبة 000
كديسو 000 وغدوووو 000 أبسم 000 تلية 000 خونجلي 000 بارا 000 جاكو 000

وبالتأكيد تكيات حاجة آسيا فيها الكثير عن المزاد في عصره الذهبي 000
من أول شارع بعد المصرف من ناس حسين العبيد وحاجة سكينة 000
مروراً بالطيب الملح وحاجة المتن والفكمي وعقلي وحاجة شامة لغااااااية ناس كشان 000
ياخ أقول ليك مبالغة من زمن ناس عم مراد رحمه الله 000
بس خليك قريب 000
وحجرك في الحفظ والصون 000

من تحت النضارة 000

ده حجري دي قديمة خلاس ياخي 000 انتا شكلك من زمن طابونة محمود وفرن مكرنجة 000

[عثمان جلالة]

حبيبنا أب قرجه .... بختك والله أيامك ساكوبيس هههههههه ... رمضانك السنه ح يمرق تكيات بس ياسلااااااااااام ياااااخ علي الكلام الطاعم والحكم الكتيره ... وحاجه خديجه يعلم الله وزير ماليه معتبر،،، مش زي الوزرا الفي زمنا ده الواحد ميزانية بيتو ما قادر يضبتها خليك من ميزانية الدوله أححححححححححححححححححح .. يا حبيب القسا ... كدي كب لي فنجان قهوه من قهوة أمنا آسيا دي .... وهدي قعده في إنتظار الدرر:):):)

[بنت الرفاعي]

ما شاء الله وتبارك الله، الله يحفظهما لك ويطول في عمريهما.:)
وكثر لينا من التكيات والجلسات لو سمحت، على الأقل نحِّن أكثر وأكثر للماضي والوطن، ولو إنو بيكون فيها شيء من الأسى على ما مضى، وعلى ماقد يكون فاتنا، لكن كل زول بيعيش زمنو والمكتوب ليهو ويحمد ربهُ على ما أعطاه وسيعطيه من سعادة فائتة أو قادمة.:rolleyes::)

كل التحايا لك وللأسرة الكريمة.:)

[خالد 000 ابقرجة]

جلسة ثانية الصافي جعفر 000 مشروع سندس 000 والحزام الأخضر 000

في أحد زيارات الأصدقاء للسيد الوالد 000
وواضح أنه من أبطال مسلسل ( ناس نجيضون ) للرائع بد الدين 000
صاحبنا تحدث عن كل النجاض بتاع المغتربين ووقف عند أكبر جمرة منجضاهو هو شخصياً 000
مشروع سندس أو ( موهوم سندس ) كما يسميه وذكر تفاصيل محبطة وبدأ في السب واللعن الذي طال الصافي جعفر 000

وكانت شهادة الطيب ود ابقرجة كعادة جيله الذين يضعون كل مكيال في كفته 000

أنه شهد للدكتور الصافي جعفر رغم خلافه السياسي معه بأنه من شباب المعهد الفني عفيفي اليد 000
وأصحاب اللسان العذب منذ عهد الدراسة 000 وأنه بالرغم من اختلافه التنظيمي عنهم من أيامها 000
الا أنهم كانوا يحبون الجلوس اليه والاستماع الي حديثه 000

لكن 000

والحديث له 000

أظن أن المكان الحقيقي للصافي جعفر هو ما شغله مؤخراً برئاسة جمعية الذكر والذاكرين لحلاوة وطلاوة حديثه 000

أما مشروع سندس فأعتبره سقطة في اختيار الموقع وطريقة الري 000

واستطرد أن منطقة بين النيلين هذه قد تم عمل خرطة كنتورية متكاملة لها أيام تنفيذ مشروع الحزام الأخضر 000
وأصغر موظف في الغابات أو وزارة الزراعة في تلك الفترة يعرف صعوبة الري من النيل الأبيض في هذه المنطقة لطبيعتها الكنتورية 000

ثم انتقل بحرفنته في الحديث من نجاضات المغتربين وسندس واسترسل في مشروع الحزام الأخضر الذي شارك في تنفيذه 000
والدراسات التي تم اعدادها قبل البدء في المشروع 000
والخرط الكنتورية التي ساعدت علي تصميم شبكة ري جعلت أشجار الحزام تنعم بالمياه في سهولة وتكاليف قليلة 000

ومشروع الحزام الأخضر حسب روايته جعل من إدارة الغابات بالسودان إدارة تصنف باحترام من قبل منظمات الأمم المتحدة 000
وذلك لإهتمامها بواحد من أكبر المشاريع غير المنتجة 000 والتي تصنف من ضمن المشاريع البيئية 000
والتي لم تكن دول المنطقة أيامها توليها أي إهتمام 000
الشئ الذي جلب كثير من التمويل من منظمات تابعة للفاو ومنظمات الأمم المتحدة المختلفة لمشاريع بيئية وانتاجية 000
وعدد أمثلة كثيرة لذلك وأهمها مشاريع هشاب الصمغ 000


وحين خلوت الي نفسي قبل النوم 000
قلت لنفسي
جميل الحديث عن الماضي 000
حينما يكون لإستنباط التجارب 000

والوقوف علي حقائق لا بد لها أن تكون متاحة عند التخطيط وقرارات التنفيذ 000

كم من الوقفات نحتاج فعلا لنعود الي ما قد مضي 000
ليس في مجال الإمكانيات 000
ولكن في مجال تسخير الإمكانيات 000

[خالد 000 ابقرجة]

حبيبنا أب قرجه .... بختك والله أيامك ساكوبيس هههههههه ... رمضانك السنه ح يمرق تكيات بس ياسلااااااااااام ياااااخ علي الكلام الطاعم والحكم الكتيره ... وحاجه خديجه يعلم الله وزير ماليه معتبر،،، مش زي الوزرا الفي زمنا ده الواحد ميزانية بيتو ما قادر يضبتها خليك من ميزانية الدوله أححححححححححححححححححح .. يا حبيب القسا ... كدي كب لي فنجان قهوه من قهوة أمنا آسيا دي .... وهدي قعده في إنتظار الدرر:):):)


أبو منة ( مع الإعتذار لمشمش ) 000
شهد الله مشتاقين ليكم عديل كدي 000
وما منعنا من هنا الا الشديد القوي 000
بس في رمضان ان شاء الله معاكم 000
بين تكية وجلسة 000 وبينهما أمور مشتبهات 000

ومشتبهات دي لازم نقيف عندها هنا بعد كل تكية 000
وأحلي فنجان لأحلي أبو بنات 000
هلا هلا آ الهمباتي أب دبرة 000

[خالد 000 ابقرجة]

ما شاء الله وتبارك الله، الله يحفظهما لك ويطول في عمريهما.:)
وكثر لينا من التكيات والجلسات لو سمحت، على الأقل نحِّن أكثر وأكثر للماضي والوطن، ولو إنو بيكون فيها شيء من الأسى على ما مضى، وعلى ماقد يكون فاتنا، لكن كل زول بيعيش زمنو والمكتوب ليهو ويحمد ربهُ على ما أعطاه وسيعطيه من سعادة فائتة أو قادمة.:rolleyes::)

كل التحايا لك وللأسرة الكريمة.:)

مرام العند الناس قدام 000

تصومي وتفطري علي خير 000
ياخي حديث الذكريات ده أنا قمتا لقيت روحي بحبو 000
أجمل حاجة أنك تفتشي في الماضي 000
بجي معاها تفاصيل أنساب كتيرة بتخليك علي صلة بأرحام يمكن أن تقطع 000
وبتجي معاها تجارب كتيرة لازم الوقوف عندها 000
ناهيك عن كثير من الفكاهات المرحة 000
يعني الموضوع ما بس أسي وبكاء علي الماضي 000
ممكن تقولي بعض الشجن علي ذكر أماكن وشخوص نحن لذكرها 000

وتحيتك موصولة 000

[مدنيّة]

خالد
رمضان مبارك عليك
وتصوم وتفطر علي الف خير يارب

-----------------
من كلامك علي حجة آسيا حسيت اني بعرفها
زي ما بعرف حجة محاسن بت الصافي
ياخ ديل موسوعة
---------------
متابعين البث المباشر
--------------

حكايتكم مع تكرار خالد دي شنوووو ؟!!

[ابو عبد الرحمن]

ومع هذا السرد الجميل من الرائع خالد الصافي
لا ننسي المراة ،، التي تساوي أمة في فكرها
وفي ثقافتها وفي تربيتها إلا وهي الخالة ( مفيدة )
اطال الله عمرها ،، زوجة موسي الصافي رحمة الله
عليه ،،، توفي موسي وهو عنها راضي ، ودفن وهو
عنها راضي ،، مات موسي وهي شابة ،، ولكن أثرت
علي نفسها ، تربية اولادها فكانت نعم الام ونعم الأب
في وقت واحد ،،، ربت وخرجت ،،،والان كلهم ماشاء الله
عليهم بنبن وبنات في احسن ما يكون ،،،،،،،،،،،،،،،،،

لمســــــــــــــــــــــــــةمرة طبعاً كنا بنذاكر لإمتحانات الشهادة الثانوية أنا وياسر
( كديسو ) ونحن بنذاكر في الصالون العامر بتاع عمك
الصافي ،،،وأنا برضو زي خالد بدون ( تواريخ ) سنة كم مافي ؟؟؟
كدسيو خواف جداً من الحرامية ،، والمزاد لانو اخر مدني معروف عنه
بكثرة الحرامية ،،، المهم ،، الحرامي ( تلوب ) بالحيطة ،،،،، وتعال شوف
كديسو الرجفة كيف ،،، ( العكاز ) عند ياسر ( كديسو ) قلت ليهو
ياسر قومو الحرامي جاء والعكاز تحتك ،،، فكر ونظر وعبس وبظر (قال لي
والعكاز ده اشيلو براي )هههههههههه
والله ذكريات جميلة ولذيذة في بيت عمك الصافي رحمة الله عليه ،،،

[معتز الريح]

ده باص قون من بتاعينك للجندي وأبو مازن ولو دخل واحد من عرسان جدة برضو ما مشكلة


ههههههههههههههههههههه ..
كل شي ولا الفهم الغلط ..

[بت مارنجان]

مهندسنا الحبيبة ..
.


قالو جدة مسخنة ...
لكن للدرجة دي :o:o:o:o:o:o

[معتز الريح]

قالو جدة مسخنة ...
لكن للدرجة دي :o:o:o:o:o:o

جده سخانة واحده ما فيها ..
ومغيمة وشغالة رزاز من أمس ..
---------------------------------
غايتو يا أبقرجة بت مرنجان بشماتتها
ضيعت ليك موضوع البوست ..
حقك عليها ..

[بت مارنجان]

باشمهندسنا ود اب قرجة
حب الوالدة هي غريزة تجمع جميع البشر فكل يحب والدته
ولا يدري لماذا ربما لانو المفترض ان نكن بهذه المشاعر تجاهم ...
لكن حينما التقيتك في اجازتك الاخير للسودان اخذ منحي الحديث
ناحية آسيا بت الصافي فرأيت بشئ لم اره في احد وهو يتحدث عن والدته
ايقنت تمامآ انها ليست علاقة عادية مابين ابن ووالدته
انما هي عمرآ ومحورآ لحياتك القديمة والمستقبلية ...

قرأت هذه الاتكائة عن الوالدة متعها الله بالصحة والعافية واخترت الي نفسي
مقعدآ خلفيآ وانا استمتع بهذه التكية وهذه الكلمات ...
لكني لم استطع ووجدت نفسي اقاطع المتواجدين واخذ مقعدي ناحية
الامام ...


همسة : اياك تقولي طالبك منقة :mad:

[الجندي المجهول]

اخوووي ود اب قرجة ،،،
اجيك من الاخر كدا (والله العظيم ) القلم ما قادر (يعبر) بس اتمنى واتشرف ان تديني فرصة ( القى نفسي مع اهلي ديل) يا ريت ما تحرمنا من الفرصة دي واقرب زيارة ( انت واعدني ) بان تكونوا حضوراً معي في جدة .....
تخريمة : لا يوجد مكان للاعذار (لا بد من الزيارة) وانا منتظر وعلى احر من الجمر .....

تحويل مكالمة : انت عارف انو معتز الريح (احسن من يلعب باص القون ) وهو من جعل (عصمت ومحمد النور) هدافين للدوري الممتاز من الاسبوع الاول

[خالد 000 ابقرجة]

خالد
رمضان مبارك عليك
وتصوم وتفطر علي الف خير يارب

-----------------
من كلامك علي حجة آسيا حسيت اني بعرفها
زي ما بعرف حجة محاسن بت الصافي
ياخ ديل موسوعة
---------------
متابعين البث المباشر
--------------

حكايتكم مع تكرار خالد دي شنوووو ؟!!


مدنية 000
رمضان كريم وإيد أم بارا ألينا أليكم كل سنة تيبين تيبين 000

عارفة يا مدنية حكاية كأنك بتعرفيها دي ما لأنك بتعرفي حاجة محاسن 000
بس لأنو ده نموذج موجود في كل بيت مع اختلاف بسيط في التفاصيل 000


برة التكية

التوقيع بتاعك بتاع لا تنحني 0000
أحد الخبثاء علق عليهو ( بتلقط دموعا واقفة بدون ما تنحني بالمقشاشة أم قناية ) 000 هاهاهاهاااااااااي 000
بس أوووووعك تقولي لي أحد الخبثاء ده منو 000 ورمضان كريم

[خالد 000 ابقرجة]

ومع هذا السرد الجميل من الرائع خالد الصافي
لا ننسي المراة ،، التي تساوي أمة في فكرها
وفي ثقافتها وفي تربيتها إلا وهي الخالة ( مفيدة )
اطال الله عمرها ،، زوجة موسي الصافي رحمة الله
عليه ،،، توفي موسي وهو عنها راضي ، ودفن وهو
عنها راضي ،، مات موسي وهي شابة ،، ولكن أثرت
علي نفسها ، تربية اولادها فكانت نعم الام ونعم الأب
في وقت واحد ،،، ربت وخرجت ،،،والان كلهم ماشاء الله
عليهم بنبن وبنات في احسن ما يكون ،،،،،،،،،،،،،،،،،


عارف يا حاتم 000
مفيدة كلما زول يقول قداما الإطراء ده بتقول شنو ؟؟؟
بتقول ربوهم معاي ناس المزاد 000
لأنهم بيت واحد وحنين علي بعض 000
وأي زول ماشي في الشارع بعتبر الأولاد الفي الشارع كوووولهم أولادو 000

وده كلام حقيقي 000
نحنا عندنا قيم عالية بس لو ما استرجعناها وذاكرناها جهراً زي ما بنعمل مع بعض هنا في تكيتنا دي 000
ما أظن ابقي فيها شئ 000
زماااااااااان 000 ( وزي ما متفقين بدون تواريخ ) 000
لمن كنا بنلعب دافوري نهاري في شارعنا القدامي 000
وتحصل الخرخرة والمشاكل 000
أي واحد كبير امد راسو من باب بيت وينهر يااااااااولد 000
كوووولنا بنسكت وبنعتبر يا ولد دي موجهة لأي واحد مننا 000
لأنو عاااادي ممكن اطلع اجلد من طرف 000
والبشتكي في بيتو بطبقوا ليهو الجلدة لامن تشيل زي حنة العريس 000

بس عاين معاي اليوم 000أصبح عندنا بعض اللا مبالاة من الكبار بنظرية ( وأنا مااااالي جايب لي نفسي الهوا ليييي ييه) ده مننا نحنا الكبار 000
وأصبح عندنا قلاصة وقلة حيا ( بي نظرية ماااااالك وماااالي دخلك بي شنو ) ده من عيالنا الصغار 000

بس لسع في بواقي ممكن التأسيس عليها لبعض الترميمات 000
وخلينا هنا في تكياتنا دي نحاول أن نداوي بعض ما أفسده الدهر (علي قول الجندي ) 000





لمســــــــــــــــــــــــــةمرة طبعاً كنا بنذاكر لإمتحانات الشهادة الثانوية أنا وياسر
( كديسو ) ونحن بنذاكر في الصالون العامر بتاع عمك
الصافي ،،،وأنا برضو زي خالد بدون ( تواريخ ) سنة كم مافي ؟؟؟
كدسيو خواف جداً من الحرامية ،، والمزاد لانو اخر مدني معروف عنه
بكثرة الحرامية ،،، المهم ،، الحرامي ( تلوب ) بالحيطة ،،،،، وتعال شوف
كديسو الرجفة كيف ،،، ( العكاز ) عند ياسر ( كديسو ) قلت ليهو
ياسر قومو الحرامي جاء والعكاز تحتك ،،، فكر ونظر وعبس وبظر (قال لي
والعكاز ده اشيلو براي )هههههههههه
والله ذكريات جميلة ولذيذة في بيت عمك الصافي رحمة الله عليه ،،،



هاهاهااااي 000
طبعا صاحبك ياسر ده عندو تكية براااااهو لأنو الحاجة عندها ليهو قصص كتيييييرة مع جدنا محمد الصافي أيام نط الحيطة للحفلات 000

[خالد 000 ابقرجة]

ههههههههههههههههههههه ..
كل شي ولا الفهم الغلط ..



قالو جدة مسخنة ...
لكن للدرجة دي :o:o:o:o:o:o



جده سخانة واحده ما فيها ..
ومغيمة وشغالة رزاز من أمس ..
---------------------------------
غايتو يا أبقرجة بت مرنجان بشماتتها
ضيعت ليك موضوع البوست ..
حقك عليها ..


ود الريح وبت مارنجان 000
نسيت أقول ليكم ام بارح في السحور 000
أكلتا لي مديدة حااااااااارة لااااامن حرقتني 000
ماااا تتفضلوا ياخ 000

[خالد 000 ابقرجة]

باشمهندسنا ود اب قرجة
حب الوالدة هي غريزة تجمع جميع البشر فكل يحب والدته
ولا يدري لماذا ربما لانو المفترض ان نكن بهذه المشاعر تجاهم ...
لكن حينما التقيتك في اجازتك الاخير للسودان اخذ منحي الحديث
ناحية آسيا بت الصافي فرأيت بشئ لم اره في احد وهو يتحدث عن والدته
ايقنت تمامآ انها ليست علاقة عادية مابين ابن ووالدته
انما هي عمرآ ومحورآ لحياتك القديمة والمستقبلية ...

قرأت هذه الاتكائة عن الوالدة متعها الله بالصحة والعافية واخترت الي نفسي
مقعدآ خلفيآ وانا استمتع بهذه التكية وهذه الكلمات ...
لكني لم استطع ووجدت نفسي اقاطع المتواجدين واخذ مقعدي ناحية
الامام ...


همسة : اياك تقولي طالبك منقة :mad:


إبنتنا الهميمة بت مارنجان 000
صدقيني ليس هناك من له تميز علي آخر في هذا الرباط 000
فقط هناك من يمارسه في صمت 000
وهناك من يثرثر به مثلي هنا 000
فلو كنت معي حين قابلت صديقنا المميز بجدة ودار سؤالنا عن والدته للإطمئنان عليها 000
لكنت قد علمت تواضع هذه التكيات ووهن رباطها 000
ولو كنت حضوراً لزيارة صديقنا الجندي للمدينة برفقة والدته الفاضلة 000
لكنت قد علمت عن أي صنف من الموسوعية يمكن أ، نتحدث 000
فبعد إجابة واحدة عن سؤال لها ود ناس أبقرجة وناس الصافي ) 000
كانت قائمة بجميع الأسر الصغيرة المتفرعة من هذين الأصلين انسدلت من لسان يفيض بالإلفة 000
وقد تشعبت منها (القائمة ) قصص وقرائن 000
وأيقنت يومها أن حقبة كبيرة من تاريخ مدينتنا يجب أن تدون من أفواههن 000
لذلك كم تمنيت أن الا تقتصر هذه التكييات علي آسيا بت الصافي 000
ولا الجلسات علي الطيب ود أبقرجة 000 فمدني والجزيرة حبلي بهم وبأقرانهم 000

-------

وعودة لحديثنا بالسودان 000
أذكر جيداً أن أساس الحديث كان موضوع أولاد الشوارع 000
وفرعيته عن دور الرعاية والمتطوعين المفترضين 000
وأذكر يومها حين تحدثت أن آسيا بت الصافي 000
كان حديثاً لضرب مثال بالقيم التي تملأ مجتمعنا 000
وأن قييمنا هذه موجودة لا زالت لكنها مستترة ببعض حياء من الحديث عنها 000
وخوفاً من اتهامات النرجسية عند كل حديث عن الذات 000
وأقترحت يومها أن الحديث عنها يجعل منها مذاكرة جهرية لتثبيتها (كما قلت لصديقنا أبو عبد الرحمن )
بت مارنجان 000
سعدت بك هنا 000
ودعوة عبرك للجميع لتوسيع ماعون تكياتي وجلساتي 000
لنأتي بكل الأمهات والآباء هنا 000
والذين يستحقون منا وقتاً نخصصه للدرس علي قاعة حكاويهم 000


رد الهمسة 000
كباية المنقة بتاعتي وييييييييييييييييييييييييييينا يا مراكبية
قال عزومة قال

[خالد 000 ابقرجة]

اخوووي ود اب قرجة ،،،
اجيك من الاخر كدا (والله العظيم ) القلم ما قادر (يعبر) بس اتمنى واتشرف ان تديني فرصة ( القى نفسي مع اهلي ديل) يا ريت ما تحرمنا من الفرصة دي واقرب زيارة ( انت واعدني ) بان تكونوا حضوراً معي في جدة .....
تخريمة : لا يوجد مكان للاعذار (لا بد من الزيارة) وانا منتظر وعلى احر من الجمر .....

تحويل مكالمة : انت عارف انو معتز الريح (احسن من يلعب باص القون ) وهو من جعل (عصمت ومحمد النور) هدافين للدوري الممتاز من الاسبوع الاول



جندينا 000
تصوم وتفطر علي خير 000
وربنا اجعل المطار القديم عامر 000

عارف من أول تكية هنا 000
كان في راسي جلستنا في الحرم مع السيد الفضلي والدتك 000
والحديث الجزل عن أهل مدني والعائلة الواحدة ) التي يعرف أقصاها أقصاها 000
وحديثها المفصل عن كل أقاربي حاج علي والدلقان والجودلية وست البنات بت التومة 000
وأبشر عبد الرحمن والطيب عبد الرحمن من جهة السبابة 000 وكوول آل الصافي 000
لكن أكثر حديث انطبع في ذاكرتي حديثها عن الخال جمالع لي 000
دعني أخصص هذه الإتكاءة لها 000

عارف يا خالد يا ولدي 000
جمال ده كان ولدي أنا ما ولد الدلقان ولا ولد حاج علي 000
ولمن تقوم عليهو الأزمة كنتا بسوقو من بيتم طوالي 000
واقعد عندي أكان ما بقي كويس ما بخليهو ارجع بيتم 000
يقعد معاي زي ما يقعد أكان بقي أسبوع أو اسبوعين 000
وأمو وأبوهو بزوروهو عندي زيهم وزي أي جار من الفريق 000
حليييييييلو الزمن السمح داكا 000
زمن كان النفوس طيبة علي بعض والقلوب مليانة محنة 000
والله يا ولدي ما طالبني حليفة 000
كنا عايشين بي فرد قلب 000

يا اللـــــــــــــــــــــه 000
عليك الله أمانة في زمتك سيب الكلام كوووووولو وركز علي فرد قلب دي 000
ياخي دي لو شافا واحد من المنظراتية بتاعين القصة القصيرة ديلك 000
يكتب ليك فيها مقالتين ودراسة نقدية 000

جميلة يا جندينا حكاويهن 000
ومليانة بالحكم زي ما قال جلالة 000
ربنا يخليهم كوووولهم 000
ويجعلنا ممن يستمعون الحكي 000 ويستنبطون ما بين سطوره 000



رد مكالمة 000
باصات ود الريح دي يا حبيبنا لمن تترد ليهو عكسية بتبقي خطييييرة 000
طبعا ما قاصد باصي بتاع هنا 000
ولا عاوز اضرب ليك مثل بي باص رضا ودحسن بتاع ( عزو الحارس ) :d:d:d:d

[خالد 000 ابقرجة]

التكية أمبارح كانت بطلتها رقية بت حسن رحمها الله 000
ورقية بت حسن والدة جدي ابقرجة رحمهما الله 000
وشقيقة جد والدتي حاج الصافي وربيبته 000
إمرأة معمرة 000
وتوفت ونحن أحفاد إبنها كبارا نرتاد المدارس ونعي ما يقال حولنا 000
وعهدناها إمرأة صارمة 000
حين تتحدث يسمع الصغير والكبير الرجل والمرأة 000
وحين تداعب يضحك الجميع حتي تدمع الأعين 000
وأشهر القصص التي كنا نحفظها عنها أنها كانت توزع ملايقة الويكة علي بناتها (عمات والدي )
ولو واحدة يوم زادت ملح ولا نقصت بكون نصيبة كمشة كبييييييرة من الملاح تشربها قسراً وكعة بالفاضي في الراس 000

وتكية ام بارح بعد استجاع قصص قوة شخصية حاجة رقية كوووولها 000
استرجعت والدتي قائلة 000

لكن شوف 000 عشان تعرف امهاتنا زمان كانوا كيف 000
حاجة رقية دي بي صعوبيتا دي 000
كان أخوها الكبير جدي حاج الصافي لمن يقول كلمة أصلها ما بترميها واطة حتي لو علي رقبتا 000
وعلي رقبتا دي جد جد ما مبالغة وأعقبتها بضحكة خفيفة وسكتت تسترجع 000

000 كيف يا حاجة يعني جد جد شكلها عندها قصة 000

000 ها الشفقان ده ما تصبر علي رزقك وضحكة تانية ومواصلة القفشة ( قول لي لو بصبر كان صبرتا جوة بطنك ) ها ها ها 000

وكادت آية تفسد مواصلة السرد بتدخلها ( إنتي يا حبوبة بابا كان جوة بطنك زي البيبي بتاع ماما الصعيروني هي هي والله لكن يا حبوبة ) والصعيروني دي بالعين ما غلطة املائية 000

أها نرجع لي تكية الحاجة 000

حاجة رقية طبعا رباها أخوها الكبير جدي حاج الصافي 000
000 أها 000
قالو يوم بت خالتا جاها وجع الولادة وما معاها زول 000
قامت أمها ساقتا ومشت لي بت اختا 000
وطبعا ما يفوتكم أمها دي ياها بت الحاج أم جدي الصافي زاتو 000
أول ما جاء جدي الصافي من الأشغال كان أول شئ بتطمن علي خيتو 000
رقية 000 بت يا رقية 000
ورقية ما بترد 000
لمن عرف بعد داكا الموضوع 000 مشا طوالي دقة ليهم الباب 000
فتحت ليهو رقية زااااتا 000
قال ليها أمك ما عندي عليها حكم خليها مع بت أختا علا انتي تعالي معاي 000
وجابا البيت 000
وتكاها في الواطة وختا السكين في رقبتا 000
وقال ليها تاني كان جيت لقيتك مافي البيت بدون ما أعرف سكيني دي ما برجعا الا غرقانة بي دمك 000

ومرت الأيام 000
ولمن جدك ود عبد المطلب عرس حبوبتك رقية وهو طبعا صاحب جدي الصافي ورفيقو ي النجارة 000
جاء البيت ود عبد المطلب عشان اسوق مرتو بعد ما بني أودتو 000
حبوبتك رقية حلفت بي راس أبوها ما بتطلع الا أخوها الصافي اجي 000
في طولك في عرضك مافي أي فايدة 000 وود عبد المطلب سارج حميرو ومستني لحدي ما جاء حاج الصافي 000
ها ناس انتو لي هسي دي ما مشيتو أكان كدي مكتوب ليكم لقمة معانا 000
قال ليهو ود عبد المطلب لقمة واحدة داير نها معاك مافي كدي امرق لي اختك دي لا برة 000
ولمن جدي الصافي عرف القصة قعد في الواطة وختا ايدينو في راسو لا حولا ولا قوة الا بالله 000
سألتك بالله يا رقية يا اختي السنين دي كووولها ما عتبتي باب البيت 000
قالت ليهو أبقي بت الحاج ما أمي كان كسرتا كلام ولي بيتي 000
وقام حاج الصافي سلم عليها في راسا ( عليك الله كان ما عفيتي لي يا خيتي ) 000
ومشت مع ود عبد المطلب 000 وعاشو في سبات ونبات 000 وولدوا صبيان وبنات 000 ناس جدك ابقرجة 000 وحبوباتك بنات عبد المطلب 000


يا سلاااام علي أمهاتنا 000
والكلام ليكن يا بناتنا 000
طبعا ما عاوزين نقول أقعدوا ما تعتبوا عتبة الباب 000
بس بنذكر بأصول أجدادنا 000
الخلتم فوق الناس بالأدب والأخلاق 000

[خالد 000 ابقرجة]

في الصالون 000
في جلسة تكميلية مع ود ابقرجة 000
اتقرفص في نص السرير وبدأ جلستو بالتعليق علي حاجة رقية 000


شفتا الناس دي كانو كيف 000
حاجة رقية دي بالمناسبة من صغرها صاحبة شخصية قوية 000
لكن عندها طاعة عجيبة لأخوانا الصافي واحمد حسين 000
بس بنات الزمن ده لو يفهمو الكلام ده 000
كان عرفوا الحد الفاصل بين الحرية مع قوة الشخصية وبين الطاعة الما بتنقص من الزول حاجة 000
لكن بتزيدوا أدب وزينة 000


وبالمناسبة مدني زمان نسوان وبنات تقدر تقول عليهن فوارس 000
أيام مكافحة الاستعمار وبدايات مؤتمر الخريجين والشرارة القامت من مدني 000
كان غنا البنات كووولوا غنا حماس ومأخود من المظاهرات اليومية 000
ولي هسي دي بتذكر لمن جدك عثمان أحمد حسين وعمر محمد عبد الله واحمد خير المحامي ومدثر البوشي وناس كتااااار الذاكرة الإتخربت دي صفتم ديل لمن قاموا بالمظاهرات 000
نحنا حضرنا لمن عثمان وعمر رفعوهم في الكومر 000
ونحن وصلنا الخبر 000
وكان موقف بطولي لأحمد خير لمن جاء المحكمة بي دمو كابي 000
بعد كام يوم بس كانت العروس برقصوها بي غنية هسي ما حافظ لي منها غير مقطعين بس 000


يا الفي المدرسة القدام 000
أخو نينة يا عثمان 000

وأحمد خير ما جرا 000
بي دمو شقا المحكمة 000

طبعا حاج عثمان كان ناظر مدرسة السكة حديد وشالوهم في المظاهرات دي 000

ياخي مدني دي تارخيا مفروض يتكتب بالدهب 000

كدي خليني آخد لي نومة 000
والملم حبة الذاكرة الفضلت 000
وبكرة أحكي ليك ناس مدني كانو بمارسوا السياسة كيف 000
وكيف الإتجاهات كوووولها كانت بتتوحد لمن تكون البلد هدف واحد للجميع 000

تصبح علي خير يا باش 000


بس طبعا طول الليل ما نمتا 000
بديت استرجع في أغاني البنات الجديدة كوووولها 000
ما لقيت لي غنية وااااحدة جاء فيها سيرة الأطباء الرجال الوقفوا عشان تتوفر لينا حبة تترا سايكلين وجهاز قياس ضغط في المستشفي الحكومي 000

[عاطف عولي]

تسجيل حضور مبدئي للغائب الحاضر في الوجدان صاحب الأصفار نسيبنا الضرس الأربعتاشري الأصم والمهندس الهمام جايك ومستمتع معاك حتي النخاع في تكية الوالدة العزيزة اسيا بت حاج الصافي

[abomazeen]

ومين زيك يا عم .... بختك بحسدك على الحاجات الحلوة
قلت لي: زمااااان زمن الزمن زين والشعر مغطي الإضنين
هسي اليومين ديل لا بقى في شعر ولا حتى
كمان
واصل واصل يا أبوهاشم .. قصدي يا أبوقرجة ...معاك حوّل

[سواااح]

خالد .. ابقرجة
وامنيات لا تحدها حدود
واشواق لا تعرف مراسي
قبلا .. تحيات معطرة بطعم العود
مع امنيات للوالد والوالدة بطيب الاقامة
وانا اتابع معك هذه التكية بالقهوة.
كن دوماً .. بخير.

[محمد الجزولى]

خطوط نار كثيره اثيرت فى هذه ( التكيه الرمضانيه )
واعادت الجدل حول من الذى تغير
هل الزمن هو الذى تغير ... ام حبوباتنا .. ام اطفالنا الصغار
الزمن هو الزمن .. بايامه وشهوره وسنينه
اما الحبوبات فقد صرن حبوبات بلاب توب وماسنجر وشات
وتفرق صغارنا ما بين سبيس تون واغانى فله وسبايدر مان
ولم يعد هنالك فاطمه السمحه ولا امنا الغول ولا ( بت ام بعلو )
(وضاع الحد الفاصل بين الحرية مع قوة الشخصية وبين الطاعة الما بتنقص من الزول حاجة)
تعرف يا باش مهندس حتى جلستك وتكيتك تلك صرنا نشتاق اليها ونتمنى ان تعود وتعود الحكاوى الطاعمه
حتى تتشبع نفوسنا بعبق الماضى وسماحة كبارنا ومواقفهم تجاه الحياة
(تكيه )بطعم الجنزبيل وريحة البن المقلى وحلاو سردك يا خالد
صراحة اشتقنا لهذه الاصفار الحبيبه الى نفوسنا
والتى تساوى ملايين بحساب متعتنا
تحياتى يا خالد وسلامى لك وللاسره الكريمه

[مدناوية]

ود أب قرجه ..

قمة الإستمتاع بالمتابعة ...


واصل من غير فواصل ..


تكيات وجلسات جميلة من زمن جميل ...

[الاميره]

الاخ/ خالد ابقرجه
رمضان كريم
وربنا يخلى ليك الوالدين ويديم عليكم نعمة الصحة والعافيةويحفظكم..
عدت بنا للزمن الاصيل.زمن الترابط والالفة..زمن اللمه والونسه ..زمناكان جميل بالحيل..
واصل وامنتعنا بجميل الكلام..

[بدرالدين أحمد موسى]

أبو قرجة .. تصوم و تفطر على خير .. كدى يا أخى ما تحكى لينا شوية كمان عن حبوبتك زينب بت الصافى ..

[خالد 000 ابقرجة]

تسجيل حضور مبدئي للغائب الحاضر في الوجدان صاحب الأصفار نسيبنا الضرس الأربعتاشري الأصم والمهندس الهمام جايك ومستمتع معاك حتي النخاع في تكية الوالدة العزيزة اسيا بت حاج الصافي



صاحب المرايا 000
الراجل المرايا 000
مشتاقين والله 000
عارف يا عولي 000
زمااااان لمن الواحد يغيب ليهو يومين من المدرسة000
في أساتذة كدة بخلوك تكتب الدرس عشرين مرة 000
وتلقي واجبات كتييييرة مستنياك 000
والحصص كل يوم واجب جديد 000
ببقي واحد من حلين 000
إما تشتغل بي نظرية إذا كترت عليك الهموم 000
أو تسيب صفحات بعدد الواجبات فاضية وتبدأ تواكب الواجبات الجديدة 000
وكل يوم تاخد ليك جكة في القديم 000
أها لمن نغيب من هنا 000
بنجي نلقي حاجات كتيييرة حلوة فاتتنا 000
وتقعد اسبوع كاااامل قراءة صامتة 000
وتحتاج أسابيع وأسابيع للد علي كل ما قرأته 000

عاطف عولي دعني أقول لك 000
أتابع عن قرب 000
مرايتك كلما رفعتها لنري أنفسنا 000
ومنبرك كلما علا صوتك فيه بالحق 000
وقاماتك كلما سمقت منها قامة أعلي من الأخريات 000
ولي عودة هناك معك 000
ومع قامة بت أم الدر 000
التي تحوم أحرفها حول مخيلتي منذ أن مررت علي تداعيها 000
مع مربي الأجيال والدها رحمه الله 000
ود عولي 000
أراني قد حولت هذه المشاركة لتكية معك 000
وجلسة مع بت أم در 000
ومستنيك 000

[خالد 000 ابقرجة]

ومين زيك يا عم .... بختك بحسدك على الحاجات الحلوة
قلت لي: زمااااان زمن الزمن زين والشعر مغطي الإضنين
هسي اليومين ديل لا بقى في شعر ولا حتى
كمان
واصل واصل يا أبوهاشم .. قصدي يا أبوقرجة ...معاك حوّل




أبو هاشم 000 قصدي أبو مازن 000
صاحب الفاولات التكتيكية 000
التي تضبط إيقاع اللعب 000
دون أن تؤذي أحد 000
رمضانك كريم 000
وصيامك مقبول 000
بس عارف يا صاحب 000
كنتا عاوزك تكمل حكاية الإضنين المافي دي 000
لأنو الشعر موجود 000
بس قدر ما يطول 000
ما بلقي إضنين عشان اغطيهم 000
أصعب حاجة لمن يكون الناس كووولهم شعرم طويل 000
لكن زوووول اسمع من كلامك حاجة مافي 000 زمن صعب ياخي 000
وأسمعت إن ناديت حيا 000 ولا بقولوها كيف يا ربي 000

[خالد 000 ابقرجة]

خالد .. ابقرجة
وامنيات لا تحدها حدود
واشواق لا تعرف مراسي
قبلا .. تحيات معطرة بطعم العود
مع امنيات للوالد والوالدة بطيب الاقامة
وانا اتابع معك هذه التكية بالقهوة.
كن دوماً .. بخير.


سواح 000
أمامك وصديقك سوباوي 000
دوماً أجد نفسي عاجزاً عن المجاراة 000
لا أدري ربما تكون عقدة قلم علي نسق ( هضربة قلم ) لود الجزولي 000
كل عام وأنت بألف خير 000
وتبريكات بعبق هذا الشهر الفضيل بقدوم مولودك 000

[ابراهيم]

جميل الحديث
ود ابو قرجة ....

رمضان كريم ... وإنشاءالله تصوم وتفطر على خير

الظاهر في توارد خواطر في مسألة التعويضات دي

جيث إن ولو وكيف ....!!!

نفس التفاصيل والتزامن واحذف منها حكاية التنبؤ دي

حديثك عزف على وتر قاعد اغني على أنغامه هذه الايام

وزي كأني كنت متوجس من بوستك دة،

إلا إنه لقيت لا مفر منه

لك ولكل إمهات العالم كل الود والإحترام

[خالد 000 ابقرجة]

خطوط نار كثيره اثيرت فى هذه ( التكيه الرمضانيه )
واعادت الجدل حول من الذى تغير
هل الزمن هو الذى تغير ... ام حبوباتنا .. ام اطفالنا الصغار
الزمن هو الزمن .. بايامه وشهوره وسنينه
اما الحبوبات فقد صرن حبوبات بلاب توب وماسنجر وشات
وتفرق صغارنا ما بين سبيس تون واغانى فله وسبايدر مان
ولم يعد هنالك فاطمه السمحه ولا امنا الغول ولا ( بت ام بعلو )
(وضاع الحد الفاصل بين الحرية مع قوة الشخصية وبين الطاعة الما بتنقص من الزول حاجة)
تعرف يا باش مهندس حتى جلستك وتكيتك تلك صرنا نشتاق اليها ونتمنى ان تعود وتعود الحكاوى الطاعمه
حتى تتشبع نفوسنا بعبق الماضى وسماحة كبارنا ومواقفهم تجاه الحياة
(تكيه )بطعم الجنزبيل وريحة البن المقلى وحلاو سردك يا خالد
صراحة اشتقنا لهذه الاصفار الحبيبه الى نفوسنا
والتى تساوى ملايين بحساب متعتنا
تحياتى يا خالد وسلامى لك وللاسره الكريمه


ود الجزولي 000
صاحب الهضربات المموسقة 000
الشوق يا حبيبنا عامل زي السلك الطويييييييل بين اتنين 000
أبداً ما بسخن بي طرف واحد 000
أما خطوط النار التي حزمتها بطريقتك الدسمة 000
بالفعل تحتاج منا الي وقفات 000
لا لنكثر حولها الحكي 000
ولكن نحتاج فقط أن نقف أمامها وقفة تأمل 000
عارف موضوع الزمن المتغير ده 000
خالتي محاسن كانت معجبة بمقولة لجدي الصافي رحمه الله 000
قالت كان دايماً بقول لينا زمنكم أخير من أصلكم 000
نقول ليهو كيف ياجدي أصلنا مالو 000
بقول لينا أصلكم ثابت ما بتغير ومعروووووف أولو وآخرو 000
علا زمنكم متغير 000 وكان عرفتو أولو مااااا بتعرفو ليهو آخر 000
أها ود الجزولي 000
جدي الصافي كان بلمح لي تطور الزمن ومحدثاتو لمن كان الطاحونة حلت مكان المرحاكة 000
وفرامة الخدرة محل الصفيحة 000
والأفران البلدية مكان فرن الزبالة 000
أها لو كان شاف ناس سبيس تون والخلاتات والمايكرويف بتاع التسخين كان قال شنو 000
تعال فلفل معاي الحاجات دي يا ود الجزولي ياخ 000
ونجيب لي ختوت النار بتاعتنا خراتيش موية 000

مرورك جميل في أي أرض 000
وسنة حضورك بتبقي فرض 000

برة التكية 000
المطلع ده لو قدرتا تميتو قصيدة بجيك بيهو في الثقافي 000

[خالد 000 ابقرجة]

ود أب قرجه ..

قمة الإستمتاع بالمتابعة ...


واصل من غير فواصل ..


تكيات وجلسات جميلة من زمن جميل ...





مدناوية المدناوية 000
منورة التكية 000
ودايماً رافعة (رقبتنا) فووووووووق 000
التكيات والجلسات مزدانة بحضورحم البهي 000


من تحت النضارة

عزوماتكم ما فيها تيك أوي ؟؟؟؟؟

[خالد 000 ابقرجة]

الاخ/ خالد ابقرجه
رمضان كريم
وربنا يخلى ليك الوالدين ويديم عليكم نعمة الصحة والعافيةويحفظكم..
عدت بنا للزمن الاصيل.زمن الترابط والالفة..زمن اللمه والونسه ..زمناكان جميل بالحيل..
واصل وامنتعنا بجميل الكلام..


مرحب بأميرتنا 000
وربنا يتقبل الدعوات 000
زمن الترابط والإلفة ما زال ممتداً 000
وإن وهن بعض الرباط 000
لكننا دوما نحتاج تجليته بجلسات تجعل الحياة تدب فيه 000

ما عندك لينا جلاي ؟؟؟ ;);)

[خالد 000 ابقرجة]

أبو قرجة .. تصوم و تفطر على خير .. كدى يا أخى ما تحكى لينا شوية كمان عن حبوبتك زينب بت الصافى ..


بدر الدين (نجاض) 000
منور التكية ياخ 000
لي كام يوم عاوز أجيك بي هناك وأقول ليك 000


يا خلف الله 000 ما نجضتنا 000

مرحب بيك تاني وبي نجاضك 000

وحبوبتنا زينب بت الصافي رحمها الله 000
من أجيال مدني الذهبية 000
لكن خلي تكيتنا الليلة مع بتها خالتي (ليلي بت زينب رحمها الله ) 000
عارف زماااااان ( بدون تواريخ برضو ) 000
لمن كنا في الإبتدائي 000
كنا بنعاين للناس الكبار بإعجاب شديد 00
كل يوم نحلق الشنب والدقن عشان يقوم وبرضو ما راضي 000
أها لمن الشنب كان يخذلنا 000
كنا بنتشبه بي حركات الرجال 000
عشان نشبع غرور الطفل فينا بأننا رجال ماليين أرديتنا 000

أها مرة في واحد من الأعياد الجميلة 000
والجيب مليان عيدية 000
كنتا جاي مع ود عمي وفردتي منتصر مصطفي من بيت جدنا ابقرجة في حي البان 000
راكبين بص سنكات جبرونا 000 ماشين بيت ناس جدي علي أحمد حسين
ونزلنا في محطة الصينية في ناصية التلفزيون ( منها البص بلف علي مدرسة المؤتمر بنات ) 000
شفتا ليك ناس خالتي ليلي بت زينب راكبين في نفس البص النزلنا منو 000
قمتا طلعتا ليك العيدية كووولها ودفعتا حق سبعة نسوان 000
المساعد أصر أني أطلع أوريهو ليهم 000
وطلعتا بي الباب القدام وقعدتا أعد ليهو من بعيد 000
ديكي وديكي وديكي والحاجة الهناك ديكي 000
ونزلتا بي سرعة ومشيت بي خطوات مغرورة بإحساس الراجل الكبييير 000

الموضوع كان بالنسبة لي بس شوية كوبار وكدة 000
لكن خالتك ليلة بت زينب رحمها الله 000
تاني يوم جات مخسووووووس المزاد بيت جدي حاج الصافي 000
وأعلنت أنو جيتها مخسوس للراجل الكلس ( العبد لله ) 000
وحكت كلام كتييير وشكرت شكيير كتييير 000


عارف يا بدر 000
اليوم داك كان يوم فاصل بالنسبة لي 000

وفهمتا من خالتي ليلي بت زينب المرة الراقية 000

أنو موضوع الدفع في المواصلات ده ما مجرد بوبار وكوبار 000
لكن رباط قوي بزيد الترابط 000
وضرب جميل من ضروب صلة الرحم بطريقتنا الأريحية 000


هيييييييييييه يا ود موسي 000

الله يرحم خالاتنا وحبوباتنا 000

[خالد 000 ابقرجة]

جميل الحديث
ود ابو قرجة ....

رمضان كريم ... وإنشاءالله تصوم وتفطر على خير

الظاهر في توارد خواطر في مسألة التعويضات دي

جيث إن ولو وكيف ....!!!

نفس التفاصيل والتزامن واحذف منها حكاية التنبؤ دي

حديثك عزف على وتر قاعد اغني على أنغامه هذه الايام

وزي كأني كنت متوجس من بوستك دة،

إلا إنه لقيت لا مفر منه

لك ولكل إمهات العالم كل الود والإحترام


برهوتة الراجل الراقي 000
بتاع المتاوقات الومضة والإختفاءات المتطاولة 000
كيفك يا خينا 000
عارف اليومين الفاتت دي كيفني (سواااح) لمن نكت ليك نكتتك بتاعة سنة مافي ديكي 000
بنفس الحركة الحلوة بتاعتك بتاعة نكتوت البوستات القديييييييمة 000

ربنا يخلي ليك تكياتك وينور بيتك بي ست الحبايب 000
وكندا منورة بأم أبراهيم 000

[خالد 000 ابقرجة]

ود أبقرجة مغرم بفترة مناهضة الإستعمار 000
إحتمال لأنو الأحداث مربوطة بذاكرة الطفولة بالنسبة له 000
والتي دوماً تكون غضة وواضحة المعالم 000
بدأ جلسته بقرفصته وسط السرير كالعادة 000

عارف مدني أيام مناهضة الإستعمار في نهاية الأربعينات 000
كان السياسين فيها مثال للوعي 000
ولم تكن المصالح الشخصية قد عرفت طريقها اليهم 000
والأمثلة الحية المعروفة لي ناس مدني كانت كتيييرة 000
لكن أكتر قصة كانت بتملاني إحترام للناس ديلك قصة شيخ الجيلي صلاح رحمه الله 000
في الفترة ديكي كانت المنشورات سلاح جديد وفعال لإشعال الشعب 000
وكانت ماكينات الرونيو بتاعة الطباعة أو النسخ باللف ظهرت 000
لكن كان مشكلتها أنها بتصدر صوت عالي ومميز بكشف مكان طباعة المنشورات 000

أها شيخ الجيلي إبتدع طريقة ضللت شرطة المستعمر 000

لأنو كان عندو مديح إسبوعي في الزاوية بتاعتو 000
بالنوبة والطار 000
وكانو بحرروا النوبة شديييييد 000
وأصوات المديح تملأ السما 000

في اللحظة ديكي 000
وفي غرفة خلف الزاوية 000

كانت ماكينة (الرونيو ) بتلف المنشورات للتنظيمات المختلفة 000
وتملأ شوارع مدني 000
واتحير معاها الإنجليز 000
والشرطة 000

وبمناسبة المنشورات دي 000
أشهر وأطرف قصة لتوزيع المنشورات 000.
كان بطلها الأستاذ بخيت عبد الرحمن 000
قالوا مرة كان البوليس مشدد حملات شديدة للقبض علي موزعي المنشورات 000
وكان الكومندان أيامها قبطي سوداني إسمو (لويس سيدرا )

أها عمك بخيت جاتو فكرة عجيبة خلاس 000
شال المنشورات بالليل 000
واتدبا بالراحة جنب الأساسا 000
وختاها في عربية الكومندان المكشوفة وثبتا بي حجر 000
الصباح بدريييي 000
الكمندان ركب عربيتو كالعادة وعمل جولة في شوارع مدني 000
والمنشورات تتطاير منها 000
يعني وزعوا المنشورات بي عربية الكومندان 000


بس الفترة بتاعة التفاهم وتوحد الهدف دي 000
للأسف الشديد ما استمرت بعد الإستقلال كتير 000
وده في ظني هو أهم أسباب انتكاساتنا الجات بعد كدة 000


الحتة الأخيرة لي ود أبقرجة دي 000
ان شاء الله حا نرجع ليها مع بعض عشان نفلفلا شوية 000

[خالد 000 ابقرجة]

تكية أم بارح كانت عن حبوبتي بت شرف الدين حفيدة الشيخ يوسف رحمها الله 000
المرة صاحبة الكلمة السيف 000
والبيت المفتوح للضيف 000
إن برداً قاسي أو حراً صيف 000

أها بت شرف الدين زي ما قالت لي آسيا بت الصافي 000
كانت مرة ولوفة ومواصلة 000
ما بمر يوم الا تكون مرت علي كل الحبان 000
ومافي زول في ام سويقو زعل مع أخوهو الا لقاه قدامو 000
وأصلحت بينو 000

أها قالوا كان عندها قصة طريفة بتحكيها لتحبيب الجنيات في صلة الرحم 000
وبتختما بي عبارتا الشهيرة 000 ( الناس بالناس والكل بي رب العالمين ) 000

والقصة كانت 000

قالوا ( الرواية علي لسان بت شرف الدين عبر آسيا بت الصافي ) 000

قالو كان في حلة فيها تاجر كبيييير 000
ومرتو كانت ولية تقيانة 000
أصلو ما حصل مشت ليها مناسبة 000
لمن يكون في زواج 000
بترسل الخادم حقتا وترسل شبشبا عشان اختوهو مع الشباشب وتقول ليهم ستي بتبارك ليكم 000

ولمن يكون في بكاء بترسل الشبشب حقها برضو مع الخادم 000
تختو في أوضة المرة المحبوسة مع الناس وتقول ليهم ستي قالت ليكم ان شاء الله البركة فيكم 000
وكانت قايلا الناس في المناسبات بس بتكون محتاجة لي حبة القريشات البترسلا مع الشبشب ( ممثلها الرسمس ) دي من عندي طبعا ً

أها الولية دي زوجها التاجر الكبير مات 000

وعشان هم جلابة جابتم للحلة ديكي التجارة بس 000
ما كان عندها أي قرايب 000

وبقت محبوسا في أوضتا تبكي وتتمخت 000
ونفسها يجي زول يواسيها عشان تقالدو وتبكي معاهو 000

يقوم الباب يدق 000
تفتح الخادم حقتا 000
وتكتم الولية أنفاسا 000
تجي الخادم بعد ما تقفل الباب تخت ليها شبشب جنبها 000
وتقول ليها دي بتول بت بلة 000 الواجبتيها في أبوها 000 بتقول ربنا اجبر كسرك 000

وتاني الباب كو كو كو 000

وترجع الخادم شايلة كركب 000

دي الزينة بت الأرباب الواجبتيها في وليدا الويحيد 000 قالت ليكي خيرك سابق وربنا يعوضك 000

الولية لقت روحا قاعدة وسط شباشب نسوان الحلة 000
وما في زول يقالدا ولا يشيل حزنا 000
ولا يسمع مناحتا 000

والأكل الخلت الخدم يجهزوهو عشان ياكلوهو نسوان الحلة كووووولوا أدوها للكلاب 000

لأنها الوحيدة الكانت بتهوهو برة الحوش 000
يعني البكاء حق راجلا ما حروروهو ليها الا الكلاب 000

أها شفتن يا بناتي التقا بسوي شنو

صحي زي ما قالوا أهلنا 000
الناس بالناس 000 والكل بي رب العالمين 000

[خالد 000 ابقرجة]

أها سيرة بت شرف الدين دي صحصحت ذاكرة الحاج 000
ولمن قعدنا في الصالون بدأ يحكي ضاحكاً 000

بت شرف الدين دي طبعاً كانت مرة صالحة 000
وكانت جدها الشيخ يوسف ده لمن اتذكر الكلام بنقطع 000
وولدا خالي دفع الله أحمد النور رحمه الله كان مشهور رجل فكاهة 000
وبتاع مقالب 000
كان زمان حبوبتي كل يوم بترسلو العصر الطاحونة عشان ادقق 000
وطبعا المشوار ده كان بالخسارة معاهو لأنو وكت (التيوة ) الترجمة وكت الكورة 000
أها في يوم خالي دفع الله كان عندهم دافوري قوي وكان فيهو أساسي 000
بعد ما تغدي طوالي عمل فيها نايم 000

جات أمو بت شرف الدين تناديهو 000 عشان ترسلو الطاحونة
دفع الله 000 هوي يا دفع الله 000

ولمن هزت كتفو قام عامل فيها مخلوع ( بسم الله خير اللهم أجعلو خير ) 000

قالت ليهو يا ولد مالك قول بسم الله 000
قال ليها لا كنتا نايم وشفتا أبوي الشيخ يوسف 000
الوكت داك بت شرف الدين نست الطاحونة وركزت مع ولدا الشاف أبوها الشيخ يوسف 000

أها يا دفع الله قول لي الحصل شنو 000

كمل من خيالو الخصب 000

شفتا أبوي الشيخ يوسف ختاني في كرعيهو ( دقر دقر عيني ) عقبت بت شرف الدين وألحقت أها 000

وقال لي ياود يا دفع الله تاني أوعك تمشي الطاحونة 000

وقبال ما يتم حلمتو المنسوجة قاطعتو ويدها مرفوعة للسما 000

عاد تاني ما حرمت عليك 000

وتترب قام علي الدافوري 000

ومن اليوم داكا الود دفع الله حرمت عليهو الطاحونة 000

واتدبس فيها جدك يوسف ود أحمد 000
ودفع الله تاني ما غاب يوم من الدافوري 000

هاهاها هااااااا 0000

[خالد 000 ابقرجة]

الجلسة دي مع ود أبقرجة كانت من ذكريات القضارف 000
أيام مشينا ندفع معاه ضريبة الوطن تنفيذاً لكشف التنقلات بمصلحة الغابات 000
وكنا ساكنين في حي الموظفين 000
حيث علاقات الجوار تفوق صلات الرحم 000
مفتاح ذاكرة القضارف كان موضوع الحملة التي شنتها المساجد علي السر قدور 000
والتجريم والتكفير والدعاء عليه 000

قال لي الليلة اتذكرتا عمك إبراهيم درار رحمه الله جارنا في القضارف 000
لمن كان معانا في حي المظفين أيام كان في وقاية النباتات 000
كنا بنصلي الجمعة في جامع قشلاق البوليس (إشلاق) 000
وكان رجل ذو حضور جميل في الخطبة (الإمام ) وصوت ندي في التلاوة 000
ولمن رحل ابراهيم درار لحي ديم النور بعد المعاش 000
وديم النور لمن لا يعرف القضارف يفصله عن حي الموظفين وجامع اقشلاق ثلاثة أحياء 000
ورغم كدة كان بجي عمك ابراهيم درار يصلي الجمعة هناك 000
وذكر لي الوالد قصة هزتني ببساطتها
عارف يوم سأله ممازحاً شكلك بتجي هنا عشان تعيد الماضي 000
فأجابني بصفاء وجدية لم أحظها فيه طوال عملي معه 000

عارف يا الطيب يا خوي الإمام ده أنا مدين ليهو بتوبتي بعد هداية الله 000

عندو حديث بختم بيهو الخطبة الأولي عندما يدعو للإستغفار 000

التااااااااااااااااااااائب من الذنب كمن لا ذنب له 000

عارف الحديث ده بالذات كان من الأسباب الحقيقية الهدتني علي التوبة 000

عشان كدي أنا بقطع لي تلاتة جوامع واجي أصلي هنا عشان أسمع العبارة دي واستغفر بعدها بخشوع 000


هذه الجلسة أعادتني الي المنتدي مباشرة 000
وما يدور فيه من تشهير ومناكفة وسب وشتم بدعوي الأمر بالمعروف
ما أجمل الدعوة الي الله حينما تكون بالحكمة والموعظة الحسنة 000
وما أصعبها من مقدرة تلك التي لا يتقنها الا قليل بالجمع بين الترغيب والترهيب في توازن 000
وما أسماه هذا الدين الذي يسمو بنا فوق كل الصغائر والضغائن 000

وما أطيبها من دعوة 000 دعوة حبيبنا المصطفي بالحكمة والموعظة الحسنة 000

وما أعظم ذنب المتألهين علي الله 000
والذين جاء في تفسيرهم أنهم يحكمون علي الخلق بالنار والجحيم والخلود فيها 000
ويحكمون عليهم بسوء الخاتمة 000
كأنهم اطلعوا علي حكم الله فيهم 000

نسأل الله أن يهدينا الي الطريق القويم 000
ويرزقنا الدعوة الي سبيله بنهج المصطفي صلي الله عليه وسلم 000

[مدناوية]

ومن اليوم داكا الود دفع الله حرمت عليهو الطاحونة 000

واتدبس فيها جدك يوسف ود أحمد 000
ودفع الله تاني ما غاب يوم من الدافوري 000

هاهاها هااااااا 0000







صباح الخير يا ود أبقرجة ..

لكن خالك دفع الله دا طلع شفت كييييف ....




خليتنا نتمنى نكون موجودين ومتكيين معاكم ..

ونسمع الونسة البتخلي الواحد يحس بالحاجات الجميلة ..

الفاقدنها في زمنا دا ..




تسلم كتير يا ود أبقرجة ..


ومتابعين بشدة ... (أوعى زول يجي يقول لي شدة ولا تموت تخلي:o)

[عبدالرحمن مدثر]

ابو آية

ياسلام عليك ياقنانة شاى اللبن

التكيات ماعندك ياعمك .. جميلة هذه البوستات التى تعطيك بساط الريح

وتذهب بك الى حيث الاحباب

انا لسه بتذكر قعدة شاى المغربية فى بيتكم هناك فى (ابوادم ) مع فرحة آية الطفولية

ومع دهشة حاج (الطيب ابو قرجة ) البسيطة من ان الحروف ممكن تصنع لقيا اكيدة

وبحميمية زائدة .. وونسة عالم المنتديات .. وعلاقة التجمع المصغر للهدى بمدنى بالحرقة

بطابت .. والكريبة ..

ياصاحبى انا يادوب جيت

كل يوم يدى تحرقنى اقرررررب اخش ليكم

لكن انه عالم الباسورداااات .. واللابتوبات الديمة مسروقة

اجمل شىء اننا من خلال حروفك نسرق لنا فرحة تدوم طويلا

ونضحك بعدها بمل ء الفم فى وش الزمان الشين

وش الزمان الشين دى بتذكرنى (السر قدور ) بعد حملة شعواء ضده هذه الايام


واصل ياعمك نحن مستمتعين لدرجة بعييييييييييييييييييدة













خربشة

برررره الانتكاية



موش فى علاقة بين ضحكة الخواض المكتوبة .. وضحكة قدور المسموعة

بالمناسبة امس كان هناك سؤال للسر قدور عن سر ضحكته الكتيرة ومسيخة ديك

فقال انه يتعامل بعفوية .. وعندما يطرب ويحس بالسعادة تكون حالته هكذا