سمك فى بحر

[بدرالدين أحمد موسى]

يا أخوننا ده نحس شنو من الصباح نرمى الشبكة تطلع فاضية .. الرماى نص ساعة ترسلوا مليان يجيك فاضى ... انا بعد ده الا أنزل أشوف الجماعة ديل بيعملوا شنو تحت الموية ..
*****
هم ديل قايلننا عويرين .. يجيب الكسرة و عاوز يصطاد .. و الله غير القرموط مايلموا فى حاجة.. أنا غايتو و صاحبتى الكوارة بى جنبها ما بنجى .. ياخى ديل بشر غريبين .. ولو كانو بيصطادوا المحتاجين ياكلوهوا ما كان فى مشكلة .. ديل بشر ما يستاهلوا أى حاجة من البحر ..

*****

ياخى ديل عاوزين يشيلوا مننا يأكلوا ..و يبيعوا .. و يرقدوا فسيخ .. و يأكله الكدايس .. و بعد ده كله .. كان واحد طعنتوا شوكة يسب فينا و يلعن ..
******
لكن كمان انت يا القرقور ما عذبت الناس ديل عذاب شديد . يا أخى انت جوة الحلة شوكتك دى تجيب الدم .. لكن بالله هسه نحن كان قالوا لينا أكلوا من البشر ديل باقى ليك دمهم التقيل لده بنقدر نهضمه ..
*******
غايتوا أنا أخير لى ياكلونى كبارنا و لا ياكلنى زول .. أنا عشان مليانة شوك .. قدر ما ياكل و يمزمز و يشتم .. أنا أخير لى أهلى الكبار ديل يبلعونى طوالى .. البشر ديل يقبضوك و يخلوك فى الهوا ده لمان نفسك ينكتم و تقطع الحركة .. و يشيلوك يفتحوا بطنك ..و يهردوا جنباتك دى هرد بالسكين .. و يقطعوا الماعوزينو .. و بعد ده كله .. يغلوا الزيت ويرموك فيه .. يعنى عذاب .. و فى نوع كدى .. بعد ما ياكلوا يقول ليك القصة دايرة مراجعة .. و على قولك كان طعنتو شوكة .. تقول ضربوهوا رصاص .. أنا غيتوا كان خيرونى ياكلنى التمساح و لا يعذبونى العذاب ده . ونواصل التماسيح