ياها دي مدني !!!

[ضياء الدين احمد]

ودمدني هي مدينة هادئة البال تستريح علي ضفاف النيل الازرق تجتذب الغريب القادم اليها بقوة ميغناطيسية كبيره حيث لا يستطيع فكاكا من مجالها الميغناطيسي وإن خرج فحتما سيعود اليها دافعه في هذه المرة شوقا وحنينا اليها الي تلك الفاتنة مدني بكل ألقها وزخمها بكل سكونها وفوضويتها بكل وقارها و مجونها بكل مدنيتها وبداوتها ‘ وهنالك اللذين يتحدثون عنها في انها مدينة لاهيه و ........ نعم نحن لا ننفي ذلك البته فأنها مدينة تحمل التضاد في اي شئ وهذا هو سر تميزها فالكون نفسه قائم علي الثنائيه في اي شئ فهذه هي مدني بطبولها وبنوبتها بغنائها وبمدائحها حتي الشخصيه الشريرة في مدني تحمل في دواخلها نفحات بل جينات من الادب الصوفي والنبوي هذا هو انسان هذه المدينة الطيبة من حيث تركيبته الاجتماعية والنفسية سافرت كثيرا الي مدن متنوعة من مدن السودان الجميل لكنني لم اجد انسانا يشبه انسان مدينتي فتجده ودودا بصورة مدهشه طيبا لدرجة العبط و السذاجة نقي السريره دائم الإيثار عن نفسه يحب التعارف والتواصل مجامل الي أبعد الحدود خاصة عندما يتعلق الأمر بالموت ‘ فما ان يسمع الواحد منهم بوفاة أحد سكان المدينه حتي يتساءل عن المتوفى وتجده في حالة من الاستعجال كل ذلك ليلحق الدافنه وكأن الدفن لايتم الا بحضوره وتجده قد أخبر الكثيرين اثناء سيره حتي يبرء زمته من اللوم ‘ كما يبدو عليه بعض الاضطراب ويكسو سحنته شئ من الاسى والحزن رغم ان المتوفى قد لا يمت له بصلة قربى اودم وربما حتى ملامحه لايتزكرها بوضوح لكنه هو حال إنسان هذه المدينة او القرية الكبيره كما يحلو لي ان اسميها .
اما اذا عرجنا بالحديث عن الافراح فحدث ولا حرج فما ان تعلن ان لديك مناسبة زواج مثلا حتى يتدافع ابناء الفريق او الحي كلٍ حاضر اليك ليعرض خدماته بكل اريحية وطيب خاطر حيث يقومون بتقسيم المهام فيما بينهم فمنهم من يقوم بكتابة كروت الدعوة ومنهم من يقوم بتوزيعها ومنهم الذين يعملون على طلاء المنزل وهؤلاء ذهبوا لاحضار ( التور) وفلان مشى اجيب ( العيش) ويا هشام واسامه انتو امشوا جيبوا ( التلج ) من ناس حسين عوض المهم البيت (زي خلية النحل ) وطبعا يا اخوانا كل ناس عندهم تخصص معين بتلقاهم في كل مناسبه بقوموا بنفس العمل يعني الماسكين برميل البارد بتلقاهم بحبوا ( الجكس ) وناس دمهم خفيف وفي الجماعه ( البسدو العرض) وديل البوزعوا الاكل وبقعدوا الضيوف وديل بتلقاهم ناس هميمين وصارمين بعض الشئ وفي جماعه تانيه ديل ما بتشوفهم الا باليل وديل ناس البهجه البظبتو الساون سيستم وبجيبوا الفنان وبقدموهو كمان. وسبحان الله كل مسخر لما خلق له رغم الاختلاف في هذه المجموعات الا انك تجد نوع من التنسيق والعمل الجيد وكل مجموعه تقوم بما كلفت به علي اكمل وجه واخيرا تجمعهم حلقة الرقص كيف لا والعروس اخت الجميع واذا كان عريسا فهو اخيهم ايضا وانت صاحب المناسبه لاتحمل الهم وحدك لان الجميع قد تقاسم معك الهموم فما عليك الا ان تتفرغ لضيوفك توانسهم وتضاحكهم وبين الفينة والاخري تعطي بعض التوجيهات لفلان او علان لفعل كذا او كذا فهل هنالك اجمل واحلى من هذا المجتمع المترابط الجميل .
فطوبى لمدني بساكنيها الودودون وطوبى لساكنيها بودمدني الرائعه ودمتم .

[أبوبكرحامد]

عزيزنا ضياء .................. تحية وسلاماً

شكراً لهذا التوصيف الأنيق لمحبوبتنا مدنى ، ولاأعتقد أن هنالك مايمكن إضافته

سوى بعض الذكريات التى تتقافز معلنةً غبطتها بتوصيفك الجميل .

موضوع التدافع للمقابر ذكرنى عمى عبد العظيم الأمين حامد وقد كان يرأس

قسم الحسابات العمومية بالهيئة القومية للكهرباء بجانب العم ميرغنى مدنى ،

ورغماً عن مسئولياته الوظيفية إلا أنه لم يكن يتوانى عن الذهاب للمقابر متى ما

علم أن هنالك حالة وفاة بمدنى ولايعود للمكتب إلا بعد انتهاء مراسم الدفن ،

والحال كذلك خلال ساعات اليوم وفى العطل الرسمية ، فأن تخلف عن الحضور

لموعد ضربته معه ، فذلك يعنى أن هنالك متوفى بالمدينة .

تلك هى مدنى وهؤلاء هم بنوها ، وليتنا ننشر هذا الأدب وسط الناشئة ليدركوا

كم أنعم الله عليهم بهذه الهبة الربانية.

مع مودتى

ود الماذون

[امير عبدالباقي]

ضياء حقيقه هذه العادات لاتجدها الافي مدني وهناك عادات كثيره غيره؛
مجتمع مدني مترابط وتجده اكثر تماسكنا في الفرح والكره لاتعرف اذا دخلت الفريق الفرح او الكره لمنو حتي تسال لان جميع اولاد ورجال وشباب الحي تجدهم هنا الكل يعمل باجتهاد كمازكرت المهام تجدها مقسمه بعفويه هذا هو مجتمع مدني

[ضياء الدين احمد]

مشكور اخي ابوبكر وزي ما قلت ياهم ديل ابناء مدني وياهم ديل ابواتنا الواحد (عمتو ) نصها في الواطه والباقي بكرب فيها وتلقاهو مستعجل والنسوان طبعا في واحدة بتكون متخصصه في لمة الباقيات وايجار الحافلة البتوديهم لو الوفاة في حي تاني وطبعا مسألة التكافل الاجتماعي اهم شئ وهي متمثلة فيما يسمى (بالنقطه )
ومشكور اخي امير علي زيارتك الجميله وما عدمناك

[أبوبكرحامد]

نفتقدك عزيزنا ضياء فهل من إطلالة وتسجيل خاطرة عن زواجك المبارك ووقفة الإخوان وسعادتهم بعودتك وزواجك؟؟

[مكتول مدنى]

عزيزنا ضياء .................. تحية وسلاماً

شكراً لهذا التوصيف الأنيق لمحبوبتنا مدنى ، ولاأعتقد أن هنالك مايمكن إضافته

لما قلت لان هذه هى مدنى المعروفة بعظمتها وعظمه انسانها على مر التاريخ
وحقيقة اخى ضياء كما قال الاخ امير هذه العادات لا تجدها الا فى مدنى وبس

[سوار الياسمين]

المراقب الكبير ضياء

اسوق لك التحايا يا اخي ضياء على تقليبك للمواجع لينا

وادعي لينا الله انه يجري الايام عشان تجي الاجازة بسرعة

ونرجع لايام الهجيج تاني في مدني

قولو آآآآآآآآآآآآآآآآآآآمين


وعارفة اولكم الحيقوها مكتول مدني

[سواااح]

لم اجد كلمة مناسبة تصل لمقامك سوي ان اقول :

.. صـدقــــت ..

[ضياء الدين احمد]

اسوق كل الشوق والحب لاخواني في هذا الموقع الرائع والي امير الفرسان الكولونيل ود المأذون والف الف مبروك الزواج ومشكور علي سؤالك عنا
كما يشرفني ويسعدني ان تكرموا اخواني مكتول مدني وسوار الياسمين وسوا7 فقد ادخلوا الفرحه الي بيتي المتواضع وشكرا جزيلا

[أبوبكرحامد]

الليلة جيت شايل الفرح .......... قصدك تعوضنى اللى راح
سعداء بطلتك وعودتك ياضياء ونعشم فى التواصل

[ضياء الدين احمد]

وانا ايضا سعيد اخي ود المأذوون ان ان اكون في معيتكم بعد طول غياب

[اسامة]

سمحة الصدف حلوه الظروف
طبعا انا لافنان ولاشى بس اجمل صدفة جمعتنى بان خالتى واخى ضياء الدين احمد . لقد طالت الغيبة فمنذ سنين لم نلتقى وقد لقيتة اليوم على هذا الموقع الرائع . اخى ضياء كيف حالك انشاء طيب اخى لااستطيع ان اعبر لك عن سعادتى بزواجك

[ضياء الدين احمد]

من اروع الاشياء حينما تجد اشخاص تحبهم ويكون الدم صلة بينك وبينهم التحيه لابن الخاله العزيز اسامه وانشاءالله عقبالك

[سمل الحلفاوى]

عزيزنا ضياء .................. تحية وسلاماً

شكراً لهذا التوصيف الأنيق لمحبوبتنا مدنى ، ولاأعتقد أن هنالك مايمكن إضافته

لما قلت لان هذه هى مدنى المعروفة بعظمتها وعظمه انسانها على مر التاريخ
وحقيقة اخى ضياء كما قال الاخ امير هذه العادات لا تجدها الا فى مدنى وبس حلفا مدنى سوا سوا

[ضياء الدين احمد]

حينما يكون الزائر سمل الحلفاوي يجب ان يتأنق المنزل لانه شخص جدير بالاحترام

[elfatih61]

أحلى ما فيكم يا ناس مدنــــي ما بتتغيروا 00 معزتكم بمدني هي هي وبتزيد كلو ما بعيتوا عنها 00 وصحى القال ما بنرضى في مدني كلمة 00 طبعا لانو الإشياء الذكرها الأخ ضياء دى فعلا حقائق وبل أكثر من ذلك 000 وطبعا دى هي الأخوة وهي دى الرجولة ودى الوقفة مع الناس وفي ناس كثيرين إتعلموا الحاجات دى من ناس مدني 00 وح نفضل نعز ونفتكر بعضنا الى يوم الدين 00 والله فوقكم يا شباب مدني 00

الفاتح 61/ السهران

[ضياء الدين احمد]

تسلم والله يا اخونا الفاتح وزي ما قلت الكلام عن مدني كتييييييييييييييير ودايرلو مجلدات

[معتز حمدتو]

اخي الحبيب ضياء الدين
يكفي روعة مدني جمعتنا في هذا المنتدي المنور بكل صديق وحبيب حتي الكان بعيد قربُ المنتدي

[ضياء الدين احمد]

شنو يامعتز من يوم كبدة الابل ديك وعيك ابقي اظهر وبين

[elfatih61]

يا ضياء شنو يا أبوي 00 كبدة أبل 00 أقاشى 00 فول 000 يا حبيب كده أنا إبتديت أخاف عليك
(الكرسترول)
علاجو صعب وغالي 00 حاسب شديد في العضــة
خاصة ذي السمعتا لي سيرة عرس وكده !!

[ضياء الدين احمد]

والله يالفاتح الكلسترول في السماء وببلع ليهو (ذكور) لكن تقول شنو النفس دنّيه

[elfatih61]

عزيزنا ضياء الديــن 00 أعرف إننى لن أضيف شيئا لمعلوماتك 00 ولكن الذكرى تنفع المؤمن
أولا 00 شفاك الله ولا تستسلم وعليك بمارسة رياضة المشى يوميا 0 أو أقلها ثلاث مرات بالاسبوع ولمدة (45) دقيقة
عند قصر المنهل بالخالديــة (لفة واحدة) تكلفي
وعليك الإبتعاد عن الدسم وركز على الأشياء الغالية من الدسم 0%
وركز على اللحوم الحمراء 00 والدجاج (بدون إنفلونزا) 00
وعندك لحم التونا الأبيض بالماء (متوفر) مع طماطم وليمون والله أحلى أكله
الاقاشى ده ، كده خليهو مرة كل أسبوعين
والكبدة حاول تنساها 00 !!

وشفاك الله 00 وأسمع رأيك !
ورأي أخونا الغالي 00 أبوبكر حامـد لاني متأكد ليه رأي وكلام !!


أخوكم/ الفاتح 61

[أبوبكرحامد]

انا ماعندى راى بعد رايك يافتوح ......... سيد الفهم والراى
مرة قمت بفحص شامل لقيت عندى سكرى وتبين انو الكوليسترول عالى واندهش الدكتور ونصحنى بالإبتعاد عن الدهون وتناول حليب قليل الدسم وفى قلبى قلتا ليهو :
وكان عرفتا يالحبيب اننا زمان بناكل الربيت تقول شنو " مافى زول اقول لى الربيت ده شنو !!
كلما اشتريت حليب قليل الدسم ضحك زميلى بالشقة وقال لى " خلاص اشتريت قليل الفهم بتاعك ده "

[elfatih61]

الغالي أبوبكر حامد 000 عيــن وصابت والمؤمن مصاب والعندك ده بقى من أمراض العصر
بالمناسبة (الربيت) الأكلتو زمان 00 لو أكلت منو هسـه مرة واحده ح تدخل في (كوما)
ولو مشيت السودان وأكلت كل يوم ما ح يصيبك شىء 00 ودى حكمتوا ولا تسألنى كيف
وإنت عارف وأنا كمان !!

طبعاً أنا ما دكتور ذي ما عارف لكن السكر الأبيض ده فارقوا فراق الطريفي لي جملوا
لا مع الشاي ولا مع تحليـة ولا بي أي طريقة 00 ولو لابد للأمر (إستعمل كاندرييل مع الشاي)
منقة - موز - بلح - عنب (من قليل جدا - أو ممنوع)
برتقال (أكل) عصير لا 00 تفاح (أخضر بس ) 00 كيوي - (ديل كلهم ممكن ومسموح)

والأهم من ده كلوا تناول الدواء في مواعيده بالإضافة للمشى والفحص الدوري
للعيون 0 الشبكية - وفحص الدهون الثلاثيـة والكلوليسترول - كل (6) أشهر
ولازم كل يوم تأخذ (حبة واحدة من إسبرين برودكشن)
ودى وقاية وحماية للقلب وبتمنع الجلطات لا سمح الله

أنا متأكد كل اللي ذكرته إنت عارفوا وإمكن وزيادة
لكن حبيت أعمم الموضوع على الجميع - وللفايدة العامة والعندو يا جماعة الخير
يزيدنا ويدلوا لينا بدلوه

وشفاكم وشفانا اللـه
أخوكم/ الفاتح الضو

[خالد هاشم علي]

الفاتح.... ضياء....ابوبكر.....سلااااااااااااام شديد وحب ازيد............ لكن والله يالفاتح لقيت كلامك زي كلام أم هاشم ( كلوسترول وكاندريل وشنو كده ماعارف) هووووووووووي ياناس هسة لو الشباب القاعدين في مدني قروا كلامكم ده يقولوا ( شوفوا المغتربين الحناكيش ديل) هههههههههههه وكمان يابكري جابت ليها حليب قليل الدسم ( ياحليل اللبن المقنن أبو جمادة .... جمادة يعني قشطة للحناكيش)..... والله ياشباب كلو من الغربة الفقر دي .... في السودان كان أكلت ليك زول ماتجيك الحبة دي... لكن اول ماتخت كراعك في الغربة... تعال شوف ...انتفاخ والتهابات مصران وزيادة كلسترول زي ماقال الفاتح.... يعني تاكل مسيخ وتشرب مسيخ وكل حاجة في الغربة مسيخة وماعندها طعم......... الله لينا نحن..... وبعد ده كلو الشباب في السودان يقولوا علينا مرتاحين ويابختنا مين زينا.............. الله غالب

[عماد الصادق]

ناس مدني اللُذاذ.. عليكم جنس حاجات تخوف..
حب ذاتو قدر ده يخوف.. يعني خليتونا في الصقيعة..
يعني يا مدني .. يا مدني ..

مدني صراحة لها نكهة خاصة.. ومحبة خاصة.. وهي مدينة خاصة أيضاً..

لكن شكر لي قدر ده بخلينا مرات نقيف بعيد!!

يسعدني وأناأدخل الموقع بعد غيبة أن أرى يراع أخي الفاتح الضو..
وليك وحشة.. وبالمناسبة يافاتح معاي بجدة بدر الصوفي وعبداللطيف ابوستة.. وإن شاء الله نسمع صوتك..

مع الشكر للاخ العريس ضياء (مبروك وحمدا لله على السلامة) لإتاحة الفرصة

وتحياتنا لكل الحلوين..

[عزيز عيسى]

الآخ ضياء الدين،
أنت حقا متميز وتعجبني دائما مواضيعك الشيقة المتميزة خاصة عن مجنونتا (مدني)
لأن الكلام عن مدني وروعة أهل مدني الطيبين قد يطول ويطول
ومهما قلنا من وصف لن نفي هذه المدينة حقها
فهي أمنا الحنينة التي تمد يديها لتحضننا حينما نشعر بالغربة..
خرجنا من مدني مرغمين.. ضربنا شتى بقاع الأرض متغربين..
قارنا بين إنسان مدني مع إنسان الغربة..
إنسان مدني فيه الحنية.. فيه الطيبة..
فيه الكرامة والأصالة والشهامة..
صفات لم ولن نجد مثيل لها في أي مكان..
مدني لديها سحر عجيب.. طعم ومذاق خاص..
يجتذب كل من زارها أو أقام فيها..

وتسلم

[elfatih61]

عزيـزي الغالي 00 عماد الصادق 00 ايا سلام ما أجملها فرصة وسعادة لا توصف بلقاء الاصدقاء الاحباب لقد أعدت لي
شريط عجيب وذكريات حلوة بناس أعزهم لحد الثمالة 00 أيام قاهرة المعز 00 التي جمعتنا بأروع الناس
أيام (الماجـــي) والرفاهية المطلقة حين نأكل (الفراخ)
كيف أخى عماد 00 وتحياتي للعزيز بدر الدين الصوفي وللغالي عبداللطيف أبوسته 00 والزول ده نظارتو بقت قدر
شنو ! لحدى هســه 00 ولازم تغريهم سلام شديد جدا جدا 000 وبتمنى التواصل معهم 00 كما أتمنى أن
تمدوني بأي أخبار عن زملائنا بالقاهــرة 00 لانني بجد تسعدنى سماع أخبارهم الطيبــة0

أخوكم/ الفاتح الضو علي

[أبوبكرحامد]

حبيبنا فتوح ............ انا شامى فيك ريحة ناس مدنى الدرسوا فى مصر كدى ورينا قريت وين " قِريت بكسر القاف تميز زول مدنى عن غيرو وكانت ايام الدراسة بالزقازيق مصدر تندر الأصدقاء من بقية مدن سوداننا الحبيب "

[الجندي المجهول]

والله اللمة حلوة والتعاون احلي بالذات في مدني لانو لما تجي المناسبة وانت ما من اهل البيت او الحلة ما حا تعرف سيد المناسبة منو لانو الكل مهموم سواء كان فرح او كره والله يديم الافراح وعقبال جميع الشباب الما كملوا نصف دينهم واخص الاخ ؟؟؟؟؟؟؟؟
ولنا رجعة يا ضياء الدين ومفأجاة