الغربه

[ساريه]

الغربه هذه الكلمه رغم قلة حروفها الا انها تحمل كل الوجع الموجود ............ وحش ينهش ايامكم ويبدد احلامكم ويجعل كل ايامكم شتاء بارد قارس البروده ويذهب خريف العمر وانت تنهك من تعب المشوار احترسو فمدنى تحديا والسودان تعميما هم احوج لخبراتكم ومواهبكم واحيو حسكم الوطنى وحبو هذه الارض الطيبه فهى قادره على العطاء

[سيف الدين الامين]

الأخت سـارية :
لقد اختصرتي الغـربة في كلمة ( الوجـع ) ولا اظن ان الكثيرين يمكن ان يتخيلو هذا الوجـع المختزل في في هذه الأحرف البسيطة بقدرنا نحن الذين عايشناه ومازلنا نهرب منه احياناً بالمسكنات والتي تتمثل في لحظات الاتصال التلفوني التي لا تغني ولا تسمن من شوق وأحياناً اخرى بالزيارات لبعضنا البعض ثم .... ثم نخلو للألم والوجع الحقيقي عندما نكون مع انفسنا وحيدين الا مع الزكريات التي تعصر قلوبنا عصراً ونتمنى حينها من كل دواخلنا وبكل جوارحنا لو نكون .... هناك في الوطن مع الأهل مع كل ماهو جميل ورائع لكن ... ماذا عسانا نفعل ؟ أما مدني العشق الكبير فهي مصدر سعادتنا بقدر ما هي مصدر شقانا ... مصدر سعادتنا لأننا ونحن بين ظهرانيها نحس وكاننا نملك الدنيا وما فيها ... ومصدر شقانا لأننا وبمجرد الخروج منها لأي نقطة داخل السودان تنقبض قلوبنا ونحس الم الفراق كمن خرج من الجنة الي الجحيم وحقيقة جل ما نتمناه من العلي القدير ان يرد غربتنا وأن نضع بالفعل كل مواهبنا وخبراتنا للعشق الاول والوحيد ..... الوطن .

[mahagoub]

الاخت ساريه والاخ سيف
لمستوا وتر حساس
الغربه تنخر فى الجسم
اصابته بالتسمم فلا علاج له الا بالبتر
كل سنه نقول دى الاخيره
جرت الايام والسنين ونحن فى نفس الموقع والمكان
نسأل الله الفكاك

[الجندي المجهول]

صباح الخير ،،،،،

الاخت سارية مرحباً بك في بيتك ،،


بالنسبة لموضوع الغربة طويل وشائك وتاكدي ان كل مغترب لو اتيحت له الفرصة للعودة لعاد ولكن يظل هاجس ( تامين المستقبل) والمدارس والجامعات والمعيشة هم يسبق تفكيره للعودة خاصة في ظل ارتفاع مستوى المعيشة (الجبار) والخيالي ...

تخريمة : لعمرى ما ضاقت البلاد باهلها .... ولكن اخلاق ( ......) تضيق ؟

من منكم يملأ النقاط بكلمة وردت في خاطري وايى قلمي ان يكتبها !!!!!!!

[خالد حسن احمد يوسف]

الغربة هي التي تبعدك عن اهلك ومعارفك وفعلا بلدنا جميلة ومحتاجة لينا
لكن هناك ظروف تحتم عليك بالغربة ونحن معشوقين لهذه الارض الطاهره

[مدنيّة]

مرحب بيك سارية
ومنورة المنتدي
-----------
الغربة حااااااااااااارة ياسارية
لكن الناس بتكون مجبورة عليها
------------
شكرا سارية

[hadi salih]

يا غربة .. يا غشاشة .. يا بكاية .. يا مستهبلة





تغرينا بي درهم قروش وراه قنطار بهدله
جيناك سنة .. أو قول سنين بنكمله
نبني البيوت في العاصمة

وبي كوم أثاث بنجمله
وكرولا حاره نرسله أصلو التنقل مشكله
ونكمل الدين بي مهل والسمحة جاهزة نحصله
غير القروش اللي الأهل عبر الشهور حا نرسلا
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصلا
أحلام كتيره وشيقه وآمال كبيرة نأملا
لكن حساباتنا الغلط في كل عام بنرحله
مرت سنين من العمر بنعزها وبنفضله
والحسبة وصلت طاشرات يمكن نعيش وندبلا
وتعال نحاسبك يا وهم من غير رقم أو أمثله
كان للقروش نجري ونحوش لكن تقول بنشاكلا
ما راضية تقعد في الجيوب وتقول حرامي بينشلا
لكن بترقد في الضهور بديون تقيله متلتلا
ممحوقة ما بتقضي الغرض وأقل حاجة تكملا
كملانه سفرة وحق وزن ومجاملات مستفحله
ضرائب أبعاج المشي وإلزامي حمدي نحولا
وأحلامنا صبحت زي سراب نمشي ونجري ما نحصلا
يا ريت يكون هم القروش يا غربة فيك هو المعضله
لكن تعال شوف الهموم الما إفتكرنا نقابلا
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبله
أشغالو شاقة ومؤلمه ودايما تكون مستعجله
ما عاد يكفيها النهار تحتاج ليالي مليله
أمراض كتيره بدت معاك عايزه الفحوص مستعجله
ناس الضغط والسكري ومرض القلب مع الكلى
ومصران وقرحة وإكتئاب ونفوسنا ما متحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عاملا
عدم الرياضة والكونديشن لابد يكون ليهم صــــــلا
وكمان تعال لمعادلة ما قدرنا أصلا نعدلا
سجن العيال جوه الشقق وفراق الأهل والعائله
جيب العيال بي جيبنا مال وجيوبنا غيرو مميله
وصغارنا صبحت بالزهج متوحشة ومتجفله
لا قادرة تلعب في خلا ولا ضل شديره يضللا
لا قادرة تدرس بي نفس من الدروس المترهله
تلقي الولد غالبو الكلام والبت كبيرة ومريله
كل الضغوط سوا ما قدرنا حتى نقللا
في كل طرف تلقي القرف تلقي الخيوط مداخله
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدلا
آمالنا فيك بدري إتنست إلاّ الرجول متوحله
وبقينا زي أهل القبور لا البره عارف يدخلا
لا الجوه يرجع لي ورا يحكي الحقيقة يوصلا
لكن خلاص هان الخلاص عندك نزل مهما علا
وإن شاء الله نحيا نودعك وتكوني ذكرى نغازلا
يا غربة .. يا بكاية .. يا غشاشة .. يا مستهبله

[ساريه]

اولا وقبل كل شى اود ان اشكر كل من ساهم معى فى دق جرس الانذار الاول والبقيه تأتى واشاده خاصه لتلك الكلمات التى خطاها هادى صالح وتحيه له

[ابو لوزة]

الغربة صعبة

[samia]

الغربة آهه بطتلع من الجوف وملانستطيع عاها نفس حار جدا،،،،،،، ولكن ان نضحك ونكون قاسيين في نفس الوقت لأن هنالك فرق كبير بين من يمسح دموعك وبين من يبعدك عن البكاء ،، لااله الا أنت سبحانك إني كنت من الظالمين ،،