المساعد الشخصي الرقمي

مشاهدة النسخة كاملة : العفريته ملك المحل



خالد هاشم علي
16-01-2005, 01:15 AM
(العفريته ملك المحل)هذة العبارة التي تجدها دائماًوبالبنط العريض في إيصال إستلام الصور(اقصد الصور التي تلتقطها بالأستديو)وللذين لا يعرفون ماهي العفريته من أبناء الجيل الجديد فهي(نيجاتيف الصور)وسميت بالعفريته لانو صورة الواحد فيها بتشبه العفريت.
يعني النيجاتيف ملك المحل.عجبي.كيف الكلام ده وكيف يكون ملك المحل والصورة المطبوعة عليه صورتي أو صورة أي شخص آخر.
كنت بتمشي في السوق الكبير وبتفرج يمين وشمال وفجاة لفت إنتباهي أستديو(لا داعي لذكر الأسماء)وعلي بترينة العرض صورة مكبرة وبالحجم العائلي لواحدة قريبتي .فدخلت الأستديو وتكلمت مع الراجل (وعملت معاهو شمطة كبيرة)وطلبت منه النيجاتيف وطبعاًرفض.فمشيت ورجعت مرة تانية ومعاي صاحبة الصورة لانها إنزعجت جداًمن الموضوع(وتاني عملنا شمطة)وبرضة رفض تسيمنا النيجاتيف ( لأن العفريته ملك المحل)وبعد شد وجذب وأجاويد مزق الصورة أمامنا بدون أن يسلمنا النيجاتيف.
فمن الذي أعطاهم الحق بعرض صور الناس بدون إذنهم وحتي بدون علمهم.وأنا كمان كنت من المستسلمين بهذا الحق( العفريتة ملك المحل) لغاية ماراس السوط هبشني.(وهكذانحن ..).
فأنا أخاطب عبركم وعبر موقع مدني الجهة التي تتبع لها هذة الأستديوهات واظنها وزارة الثقافة والأعلام وأناشدهم بالتدخل وسن قانون لحماية خصوصية الموطن (فالعفريتةمن حق العميل).وهذامعمول به في كل دول العالم(تسلم النيجاتيف بدون أي نقاش حتي ولو لم تطلب ذلك فهو من حقك.فياوزارة الثقافة والإعلام أعيدوا لنا الفريته وجزاكم الله خير.
أبو هاشم

امير عبدالباقي
16-01-2005, 07:30 AM
الاخ خالد
فعلا هذا الموضوع خطير جدا وتحتاج الي وقفه كبيره من المسئولين ؛ وكثيرا من الصور تخص الاخوات نجدها معلقه في الفترينه وتعرض للماشي والجاي وصور الاعراس ؛ العفريته ملك المحل هي قانون سنه اصحاب الاستديوهات لكي يجعلك تحت رحمته لكي تطلع نسخه من عنده ويجعلك ترجع له ليكسب منك لوي دراع عديل كده نرجو كما قلت من المسئولين اتخاذ للازم
مشكور

أبوبكرحامد
17-01-2005, 12:09 AM
الغالى خالد ................................سلامات

الموضوع المثار يفتح الباب أمام العديد من التساؤلات حول العلاقة بين المنتج

والمستهلك ، وهنالك دوماً لجنة لحماية المستهلك فى كل دول العالم تقريباً

وربما تختلف التسمية ، وهدف هذه اللجنة حماية المستهلك بإعتباره الطرف

الضعيف فى علاقته مع التاجر الذى يحتكر الخدمة فى أغلب الأحيان ، فمن

يحمى البسطاء فى السودان.

موضوع العفريتة فعلاً شرط غريب ذاك الذى يفرض علينا الأحتفاظ بالعفريتة

ولو رغب فى الحفاظ على الزبون توجب عمل تخفيض ، ويمكن المحافظة على

الزبون بالكلمة الطيبة فنحن شعب تأسره الكلمة الطيبة وتفعل فينا مفعول السحر

مع مودتى

ود الماذون

أبوريلان
17-01-2005, 04:44 AM
أديك العافية يا خالد جار طارق التوم ، بقى معلم طارق التوم يعنى بوصفوا بيه كمان سلامى للأخ العزيز طارق التوم ، وموضوعك يا خالد جميل شديد وياريت القائمين بأمر هذه الإستديوهات يلتفتوا لهذا التلاعب بعروض الناس ، وزى ماقلت العفريته ملك المحل دا فى السودان فقط ونحن فى هذه الغربة نستلم العفريته مع الصور وبدون طلب لها وهذا هو المتعارف عليه فى جميع بلدان العالم ، أرجو من المواطنين المطالبة بحقوقهم المهدرة وسلمت يداك أخ خالد ولا عدمناك .

ضياء الدين احمد
17-01-2005, 01:01 PM
صح فمك يا ابو هاشم
دحين انت ما خالد هاشم اخو محمد هاشم جنب ناس محمد موسى
والله لو طلعت انت تكون بالغت

خالد هاشم علي
28-05-2006, 09:05 AM
ده كان أول موضوع أشترك به في منتديات ودمدني وبالصدفة اليوم أم هاشم أدتني مجموعة من صور العرس حقتنا عشان أكبرها ...
مشيت للأستديو عشان التكبير ... أول حاجة سألني منها ( وين النيجاتيف ؟؟؟؟؟؟؟؟؟؟؟) ماعرفت أقول ليهو شنو ... أقول ليهو بتاعين الأستديو في السودان مابدوك العفريته؟؟؟؟؟؟؟؟؟؟؟؟؟ أضحك الهندي فيني كمان؟؟؟؟؟؟؟؟ قلت ليهو النيجاتيف ده ضاع مني وياريت تجتهد لينا في توضيح الصور وهي مكبره .... الراجل قال لي أنا ح أكبر ليك الصور لكن مابوعدك إنها تكون واضحة لأنها حتكون ( صورة من صورة) لأنو النيجاتيف ماعندو.
شفتو جنس الناس بتاعين الأستديوهات في السودان ديل ... المشكلة لو رجعت ليهو بعد يومين عشان تكبر صورة ولا تطلع صورة جديدة ماح تلقي عندو العفريته... طيب ياخي طالما إنك ماعايز تحتفظ بيها ماتديها للعميل ( يديك عكازين في نص راسك).

خالد أحمد الصول
28-05-2006, 10:32 PM
تحياتي الغاليات لك و شكري الجزيل لاثارتك هذا الموضوع الهام

جائني زميل دراسة عزيز علي من بورتسودان وهو عريس جديد و معاهو عروسو وقضي معنا يومين جميلين في هذه المدينة الجميلة و لانني أعلم أنني سوف لم أقابله ثانيا إلا بعد وقت طويل أخترحت عليهم توثيق هذه اللحظات السعيدة و مشينا أستديو مشهور في مدني و تصورنا و الوقت داك كانو بحمضوا الافلام في الخرطوم عشان كده قال لينا تعالوا يوم الثلاثاء و الراجل و زوجتوا سافروا علي أمل ان أبعث لهم الصور بالبص ,,, ذهبت يوم الثلاثاء لاستلام الصور و ببساطة قال لي بتاع الاستديو الصور دي ما لقيناهم جيب الناس ديل أصورهم ليك ثاني
أما بتاع أستديو الشماسة (اقصد السعادة) جبت أولادي عايز ليهم صور باسبورت لانهم مشتركين في مدرسه الكراتيه بمركز الشباب قام قال لي أحسن اقعدهم ليك كلهم سواء و أصورهم منها نطلع ليك صور الباسبورت و منها نطلع ليك بوستال صورة جماعية قلت دي فكرة كويسة توثق ليهم لمان يكبروا برضوا لمان جيت أستلم الصور و الكلام دة كان الاسبوع الفات قال لي ما لقينا العفريته إلا تجيب الاولاد ديل تاني نصورهم
و عجبي !!!!!!!!!!!!!

خالد عبدالماجد
29-05-2006, 08:45 AM
حكاوي ومحن يازمن
فعلاً الحكاية منتشرة بكثرة في السودان
وكثيرون يتفاجأوا بوجود صورهم مكبرة ومعلقة على واجهات الإستديوهات دون علمهم ....
أتمنى مثلكم أن تزول هذه الظواهر السلبية والتي تبين درجة التخلف الكبير الذي نعيشه في بعض الجوانب ...
من القصص التي جالت بخاطري وأنا أقرأ هذا البوست قصة طريفة أحب أن أرويها لكم وهي أن بعض أصدقائنا من شباب مدني قاموا برحلة للقاهرة وهناك قاموا بإلتقاط عدد من الصور لهم في استديوا قريب والصور طلعت حلوة شديد واحد من الجماعة شين شديد وبعد ماشاف صور أصحابوا راح وأتصور في نفس الأستديو المهم الصورة طلعت ماعليكم بيها فعند الإستلام صاحبنا زعل شديد وقال لي المصري ليه يعني دي شينة كدة فالمصري رد ليه : وأنا حاأقيب حاقة من عندي يابيه ...

نزار حسن محمد
01-06-2006, 08:28 PM
الاخ .. ود هاشم .. ياريت ناس وزارة الثقافه والاعلام ينتبهوا لمثل هذه الاشياه .. ولك الشكر لى اثارة موضوع بهذه الاهميه... ودمت

نور العيون
01-06-2006, 10:43 PM
الموضوع فعلا غريب و أنا ماعارفه الجماعه د حتستفيد من العفريته في شنو غايتوا شوفوا حل للموضوع د و الا نقول على الدنيا السلام

خالد هاشم علي
03-06-2006, 10:46 PM
الغالي صول سودان...
مشكور ياحبيب علي المرور وتسلم ياغالي...
تعرف الزول بتاع الأستديو ده قال ليك خليهم يقعدوا كلهم ليه؟؟؟ عشان مايضطر يعمل كم لقطة ( ويخسر عفريتات) عشان كده يعمل لقطة وااااااااحدة ويقعد يقصقص فيهم. بالله شوف جنس التخلف ده.
طيب أولادك تقدر تجيبهم تاني لكن هسة العريس صاحبك ده تاني تجيبو من وين؟؟؟؟؟؟؟؟؟ وكمان تلقاهو لغايه هسة يكون خلااااااااااااص ( كجن الوليه) وكان أديتو مليون جنيه مايتصور ليك ..ههههههههههههههههههه

خالد هاشم علي
03-06-2006, 10:48 PM
خالدونا...
مشكور علي المرور وعلي القصة الحلوة وياريت نلقي حل للقصة دي

خالد هاشم علي
03-06-2006, 10:52 PM
ود حسن...
تسلم ياغالي علي مرورك الباهي...
لكن تعرف يانزار أنا كان مااخاف الكضب بقول ناس وزارة الثقافة ديل يكونوا ذاتو ماعارفين إنو الأستديوهات دي تتبع ليهم... الله غالب

خالد هاشم علي
03-06-2006, 10:54 PM
يانور العين إنت إنت وينك وين...
سعيد بي مرورك وزي ماقلتي الخلق ديل دايرين بالعفريتة دي شنو؟؟؟؟
عفريت ياكلهم قولي آميييييييييييييييييييييييييييييين