المساعد الشخصي الرقمي

مشاهدة النسخة كاملة : من اشعار اسماعيل حسن


mahagoub
11-12-2010, 11:43 PM
لو بإيدي ..
لو بإيدي كنت طوعت الليالي
لو بإيدي ..
لو بإيدي كنت زللت المحال
والأماني الدايرة في دنياي ماكانت محال
دي الإرادة ونحن ما بنقدر نجابه المستحيل
دي الإرادة والمقدر ما بنجيب ليه بديل
دي الإرادة أجبرتني في هواكم من قبيل

غصبا عني وغصبا عنك
انت حبيتني وهويتك
لو بإيدنا من زمان
كنت خليتني ونسيتك
والنهاية ..
انت عارف وانا عارف
لو بإيدي كان هديتك

أصلو حبي أقوى وأكبر من إرادتي
وانا حاسس في جحيم نارك سعادتي
والهيب البكوي في روحي
في ذاتي
هو إنت
قلبي دايرك
حبي عارفك
في شبابك في صباك
في جمالك في وفاك
في شبابك في وفاك
يا المسير وماك مخير
انت ياصابر عند الله جزاك
mahagoub
11-12-2010, 11:45 PM
في دروب البنـات يا يمة
أنا اتبشتنت ..اتبهدلت .. اتغربت دأبي ..!
أنا أتوكرت في بلدن .. بناتها بلا الخيول الجامحة .. فوق الريح تشابي
وجوهن يمة ..
كان شُفتي القمر لجلج .. يضاحك .. في الروابي ..!
عُـيُونن يمة..
زي بحر الشمال,,, الموج يولول والعرق لا فحني فايت .. واخرابي
سنيناتن..
سنيناتن بلا شخب الحليب الصافي .. يرهج في الكبابي ..!
وريقن يمة ..
زي خمر التمور المن زمان طامرنو في جوف الخوابي ..!
رقابن .. وين رقاب الريل على الحدب البعيد
شرفن .. على هوهيو .. كلابي ..!
وعودن يمة
مثل الخيزران .. فدعوهو.. لي وجعي .. وعذابي ..!
ولونن يمة
زي لون القمح ضروهوُ شوف .. ضراني كيف الله بيضاريك .. يا الضرر .. صوابي ..!
دريباتن..
عُقاب التيه,, ومافي خبير يشق الليل على بلد الدوابي ..!
مُهورن ..
غالي ..ما بقدر عليهن .. وحاتك انتي مـابقدر عليهن ..!
كمان شوفي المصيبة !!! نفيستي فيهن ..
منو البقدر يمد ايديهو لي كيس المـُرابي ..
دحين يا يمة راجع لى دريبك ..
أنا الغرقان وفى الموجات أشابى ..
اصارع في الهلاك يا يمة قاسي
وبعد قربَّتَّ لى قيف الشرق .. تلفحنى شيمة كاسحى مغربابى ..
والخبر المهم ..ما قلت ليكن قبل ما أنسى.. في آخر جوابي ..!
دا شيتن .. اصلي ما فكرت فيهم ..وحاتك ضُمة ما كان في حسابي
إرادة المولى ..مُو خافي عليكن .. !!
وكان دستيها لا بد يوم .. تجيكن ..
خبيري مع البنات
والليل يهو ..
اهز ضرعاتي
وارفع في حجابي ..!!
أنا بقيت غناي .. ألعلع فى البنادر ..
متل ناس ود صليليح طنبرابى..
mahagoub
11-12-2010, 11:48 PM
قلبي الحابيك ما خان لياليك
ما ناسي الماضي ماتقول ناسيك
ما بدل حبو ابدا ماتنكر ليك
لكن الأشواك والنار حواليك
يانور العين
يانور العين انت وينك وين
في اللون الأسمر ذوبت شبابي
وعشقت الجنة وفي الجنة عذابي
صابر وبتألم والمر دا شرابي
ياحليل الراحو ياحليل احبابي
يا نور العين
يا نور العين انت وينك وين
الشعر الناعم بي عطرو اسرني
والوجه الناير بي نورو غمرني
عيونو النعسانة برموش تجرحني
خلتني متيم وين راحت مني
يا نور العين
يا نور العين انت وينك وين
انا والأنغام والعود في ايدي
بحكيلو حكايتي ويعيد ترديدي
واشكيلو همسة أو عذب نشيدي
ياما الأوتار تفضحني من ريدي
يا نور العين
يا نور العين انت وينك وين
mahagoub
11-12-2010, 11:50 PM
وحياة الأحلام القلبي سقاها
وحياة أجمل بسمة عرف معناها
وحياة سمر اللون وحاة محياها
وحياتك
وحياتي عندك
وحياة حبي
النهار صدك
وحياة أول نظرة لمحتك بيها
وحياة أجمل صدفة عرفتك فيها
وحياة الآمال العشت حياتي عليها
وحياتك
وحياتي عندك
وحياة حبي
النهار صدك
وحياة الأيام الجايرة وظالمة
وحياة حبي الكاتمو براك العالمة
أملي وكل منايا هناك يا حالمة
وحياتك
وحياتي عندك
وحياة حبي
النهار صدك
وحياة لونك انتي وحاة السمرة
وحاة حبي اليك من أول نظرة
وحياة طهر غرامي انتي القمرة
وحياتك
وحياتي عندك
وحياة حبي
النهار صدك
وحياة صمتك انتي وحاة الشامة
الشامة الفوق خدك نايمة دليل وعلامة
تزيد حسنك بهجة تزيدو وسامة
وحياة أجمل ريد في الكون يا حمامة
خالد علونى
12-12-2010, 12:07 AM
عمنا محجوب
متعك الله بالصحة والعافية
وانت ترسم كلمات شاعر سطر تاريخ الفن السوداني الجميل
تعيدنا إلي الثنائيات المتفردة
والنغم الطروب







تخريمة:
النبق النبق النبق
mahagoub
13-12-2010, 04:11 AM
وما اجمل اسماعيل حسن وما اجمل ما شدا به
رحمة الله عليه
محمد الجزولى
14-12-2010, 09:11 PM
يكفيه من القول هذه الابيات
بلادي أنا بتشيل الناس وكل الناس

وساع بخيرها لينا يسع،

وتدفق مياه النيل علي الوديان

بياض الفضة في وهج الهجير بتشع،،،

فهو شاعر الحب والجمال .. والوطن
تسلم الحبيب محجوب أن أدخلتنا في عوالم شاعرنا( اسماعين ود حسن) كما يحلو للبعض أن يناديه
mahagoub
15-12-2010, 09:13 PM
ومن ابداعاته قصيده القاها فى عهد نميرى
فى قاعة الصداقة وبعدها توفى رحمهما الله
فمن يذكرها كاملة فليكيبها
وله الشكر