رومانسية حالمة بين فار وجدادة [الأرشيف]

مشاهدة النسخة كاملة : رومانسية حالمة بين فار وجدادة

ابراهيم

18-01-2005, 01:05 AM

قصة فار فكر يتزوج من جدادة فكان مصيرو الشاكوش العاتي

الى القصة
http://www.tias.com/stores/jpc/pictures/d3925a.jpg

الفار وقف.....
جنب القفص ...
سافر خيالو سرح بعيد
لو اكرمو رب العباد
جكسوية فاتنة من الجداد
يتزوجا .. ويكون سعيد
تحميهو لا شركاً يصيدو
ولا كديس
تحميه من حظو التعيس
وفطورو بيض
وغداهو بيض
أحلامو بيض
صاحبنا ما اتردد وقال:
قال يا الجدادة تعالى جاي
انا عندي ليكي كلام كتير
قالتلو هاي يالفار اخوى
انشاء الله خير
قال ليها خير
بس منكسف
قالتلو قول ما تنكسف
الفار رجف
طقطق اصابعينو ووقف
قال للأسف
انا ما بقول
احساسي وضاح
ومشاعرى ما عايزة الفضول
الجدادة استغربت
اتنفضت واتهوززت
قاتليهو ياخ ما تقول يا فار
صاحبنا قام
قال ليها طمعان في الجوار
الجدادة اتدللت
قاتليهو هيي ما انت جار
الفار سرح
راح الكلام منو ووقع
قال يالجدادة بلاش دلع
لو جاكي فار طالب القرب
طالب ايديك
طالب الغرام من مقلتيك
رايك شنو؟
قاتليهو اييييييييييك
ما يسمعك في الحلة ديك
الفار كضم شم الوضع
شتت مشى
وعيونو من كتر الزعل
ما شايفة حاجة مطششة
ومشاعرو كيف متخربشة
حرد الفطور
حرد العشا
ورسم على جدار الزمن
صورة الجدادة ونقشة
وقال الجدادة قست علي
وبقت علي متحنكشة
باكر بعرس ستها
وتمسح دموعي تقشقشة

على فكرة القصة مع طرافتا بتناقش موضوع اجتماعي هام جداً

ولكم التحية

أبوبكرحامد

18-01-2005, 04:36 AM

أخونا أبو خليل ............ شاكوش افوت ولاحد يموت .....

عموماً فاركم راقى وروحو رياضية ، ويتضح ذلك من المقطع التالى :

وقال الجدادة قست علي
وبقت علي متحنكشة
باكر بعرس ستها
وتمسح دموعي تقشقشة .

وهاك رد من فار حاقد :

أنا مالى بيك يا أم شعيراتن منكشة
يالحايمة فوق كرعيك
من الصباح لى العشا
إلهى أشوفك يوم
فى التلاجة مكرفسة
أو فى داخل شواية متشتشة.

ود الماذون

ابراهيم

18-01-2005, 05:03 AM

آود الماذون

فارك دا اظنو جقر

لكن دا حاقد جد جد

وشكلو هنا ممثل الدفاع للفار المشوكش من بنى جنسو

لكن الفار قنوع يعني قبل الرفض بروح رياضية رغم الانكسار وقسوة الجدادة
وعمل بقاعدة (القناعة كنز لا يفنى) وكان لازم يقتنع لأنو دق باب ما بابو..

لك التحية عزيز ابو بكر

أبوريلان

18-01-2005, 07:00 AM

أبراهيم

والله فارك مسكين داير الجداد ياكل عقل الجداده ، بس طلعت جداده تفتيحه ، لكن الببارى الجداد بوديه الكوشه ، لك شكرى وتقدير أخونا أبراهيم وربنا ما يحرمنا من ظرافتك .

امير عبدالباقي

18-01-2005, 07:09 AM

ابراهيم

18-01-2005, 07:20 AM

أبراهيم

والله فارك مسكين داير الجداد ياكل عقل الجداده ، بس طلعت جداده تفتيحه ، لكن الببارى الجداد بوديه الكوشه ، لك شكرى وتقدير أخونا أبراهيم وربنا ما يحرمنا من ظرافتك .

تصدق يا ابو ريلان
انا غايظني الفار دا خفيف ولفيف رومانسيتو وقعتو

اما الجدادة فعرفت مقامة كويس وما كانت عايزة تحرجو على باب المجاملة يعني

لكن وكت شافتو اتمادي جابتة ليو من الآخر وريحيتو

تسلم ابو ريلان يديك العافية

ابراهيم

18-01-2005, 07:22 AM

والله ياتلش ابداع هو ماله الفارده شليق كده
ود خالي اضافتك جد رهيبه يديكم العافيه

من دي كمان

نحن جيران وعشمتيني بالونسه
حبك من زمان سكن في الحشه
ياجداده ليه قلبك علي قسه
انشاءالله اشوفك في صينيه العشا

تخيل يا امير الفار بس ما قيم نفسو عشان كدا الجدادة ما احترمتو
والاضافة عملت شغل جامد والفار الجقر دا لو كان لم في الجدادة كان عملا كنتاكي

واضافتك برضو جميلة يا امير تسلم

أبوبكرحامد

18-01-2005, 10:59 PM

الغالى أمير .......... سلامات

انشاءالله اشوفك في صينيه العشا!!!!!!

يبدو ياأمير انت مغترب من زمن الناس بتتعشى وكمان جداد ياحليلك ياخوى

والله الزمن ده لو لقيت ليك صحن فتة بى موية فول تكون سعيد.

كل سنة وانتو طيبين

ود الماذون

saleh farah

19-01-2005, 06:45 AM

الاخ ابراهيم كل سنه وانت طيب

بالجد حاجه هادفه جدا وقريبه الى النفوس لانها ماخده الشكل الحلمنتيشى ، وان كان فيها نوع من التطاول حيث ان الفار فى هذه القصه يعبر عن الطرف الاضعف والدجاجه هى تلك الحسناء المتدلله وبالجد ده حال الظرف النحن بنعيش فيو دالوقت .
اشكرك كثيرا على هذه الرمزيه الحلوه
وكل سنه والجميع بخير

ابراهيم

19-01-2005, 12:28 PM

ابو بكر صدقت والله

الجداد طلع العلالي وبقى كنتاكي .. هارديز ... ماكدونالدز وحاجات تانية كتيرة

وكل عام وانتم بخير

اخى العزيز ود جزيرة الفيل صالح فضل ليك التحية

وانت اصبت لب الموضوع ... فالفار والجدادة كانت رموز

وشكراً لمرورك الذي اسعدني

aborawan

23-01-2005, 03:57 AM

لكن الرومانسية يخلوها ليهم هم بس :):)

ruby

23-01-2005, 05:44 AM

مع اني ياابراهيم مافهمتها كلها لكن
حلووووووووووووووووووووووووووووه

ابراهيم

27-01-2005, 06:24 AM

ابو روان

روبي

تسلمو على التعقيب
تحياتي ليكم

نيازى كشك

28-01-2005, 06:17 AM

انا حزين اشد الحزن لان الدجاجة ماوافقت
وحرام يتعزب قلب الفار
تخيل لو وافقت على العرس
حيخلفو شنو ممكن نسل الفار يتحسن

ابراهيم

28-01-2005, 09:20 AM

كلامك صح مية المية يا نيازي لو الجدادة وافقت كان النسل يتحسن

وكان جمعوا بين كبرياء ورقة الجدادة ولباغة وطموح الفار

ضياء الدين احمد

28-01-2005, 12:31 PM

اهل الجداده ما حأوافقو حأكوها شديد واشوفوا حبوبتو الخرتميته جنسها شنو

ابراهيم

28-01-2005, 01:27 PM

لكن يا ضياء قالو الاشكالات العرقية انتهت في عالم الجداد في ظل العولمة

داك كان زمن الدجاجة الصغيرة الحمراء ...

:D :D

ابراهيم

03-05-2005, 04:50 PM

كاتب الرسالة الأصلية نيازى كشك
انا حزين اشد الحزن لان الدجاجة ماوافقت
وحرام يتعزب قلب الفار
تخيل لو وافقت على العرس
حيخلفو شنو ممكن نسل الفار يتحسن

كان بيخلفو يا فار متجدد

وجدادة مفرفرة

:D :D

عزت الهادي

09-05-2005, 02:06 AM

كاتب الرسالة الأصلية myrelan
أبراهيم

والله فارك مسكين داير الجداد ياكل عقل الجداده ، بس طلعت جداده تفتيحه ، لكن الببارى الجداد بوديه الكوشه ، لك شكرى وتقدير أخونا أبراهيم وربنا ما يحرمنا من ظرافتك .

madaniboy

13-05-2005, 10:28 AM

كاتب الرسالة الأصلية نيازى كشك
انا حزين اشد الحزن لان الدجاجة ماوافقت
وحرام يتعزب قلب الفار
تخيل لو وافقت على العرس
حيخلفو شنو ممكن نسل الفار يتحسن

ابراهيم

19-05-2005, 06:15 PM

العزيز ............. عزت الهادي
الغالي ............ فاقد حنان

لكما مني كل الحب

سعدت بمروركم

تحيــــــــــــــاتي

باسم الدولية

06-06-2005, 08:28 AM

تعرف يا ابراهيم إنو موضوع عرس الفيران من الجداد نوقش سرا في نيفاشا قال أحد أصحاب الجداد يا فيران ما تستعجلو الحكاية حكاية زمن بس ، قيل ان الفأر الكبير ضحك بخبث وتمتم بس أنا عاوز جداد المتمة .
أخي العزيز إبراهيم رغم أن الموضوع قديم إلأ أنه شدني فكانت هذه الكلمات

ابراهيم

08-06-2005, 02:05 PM

وفي رواية أخرى قال احد اصحاب الجداد مستجعلاً "علي الطلاق شندي ما تحصلا" وما زال الجدل قائماً بين الجداد والفيران .. الذين اصبحو ملوك الغابة

لك التحية اخي باسم الدولية
والشكر والتقدير

فدوى الحسن

09-06-2005, 11:00 AM

لكن الرومانسية يخلوها ليهم هم بس
:) :) :)

صائغ الحروف

09-06-2005, 12:18 PM

ده فار الجديد وله شنو ياشباب

باسم الدولية

10-06-2005, 10:03 AM

ابراهيم الطلاق كان كسروا ليهو- إنت نيست الديك ماعندو دجاجتين - خلي إعز حلفو في واحدة . لكن يا زول قالوا الدجاجة الجديدة كاربينو عديل كدة ، ده لو ما الفأر الكبير صدقت مفاجأته ...

ابراهيم

12-10-2005, 05:27 AM

يا باسم رمضان كريم
وكل سنة وانت طيب

لكن يا زول قالوا الدجاجة الجديدة كاربينو عديل كدة ، ده لو ما الفأر الكبير صدقت مفاجأته ... 

هههههههههههههه

التيمان

12-10-2005, 10:02 AM

دى الرومانسيه ولا بلاش

saly

17-10-2005, 10:54 PM

ههههههههههههههههه كلام عجيب والله جداد وفئران اخر زمن

تسلم ابراهيم علي الطرفه الحلوه