روائع حقيبة الفن

[montaser kabaly]

http://www.sudani.cc/music/moubarakhassanbarakat/ya_molay_zawja.html
وجدان الشعب السودانى رسخ فيه مفهوم حقيبة الفن للاغانى واشعار حقبة زمنية معينة وثرة من تاريخ الغناء بشكل مورخ من العقد الثانى الى بدايات العقد الخامس وفى بعض الرويات العقد السادس (حسن نجيلة)ملامح من المجتمع السودانى واستمر الاسم لياخذه فى معيته شعراء وفنانى الحقيبة من رواد الفن الاوائل فبتنا نردد فى عفوية شعراء الحقيبة وفنانى الحقيبة حتى ارتضوه اصحابه.

فنجد فى ديوان الشاعر عبدالرحمن الريح رايعته بعنوان (شعراء الحقيبة) التى فى مطلعها

ياحقيبة الفن الاصيل أنت راقية وشعرك جميل

ماهى حقيبة الفن؟

للوصول للايجابة للتعريف لابد من اليجابة على عدة اسئلة تفرض نفسها بشكل ملح.

هل تعنى اغنية الحقيبة تلك الاغانى التى صاغ كلماتها شعراء الحقيبة امثال صالح ابوالسيدوسيد عبد العزيز وخليل فرح وعلى المساحو ودالرضى ومحمد بشير عتيق والعبادى .طيب الاجابة بنعم ليست شافية لان بعض هولاء الشعراء امتدا بهم العمر فتغنى لهم فنانون حديثون مثل الكاشف وحسن عطية وعثمان الشفيع احمد الجابرى ورمضان حسن ومنى الخير والفلاتية.

كذلك هل تعنى اغنية الحقيبة تلك الاغانى التى قام بتلحنها وادائها وتسجيلها على الاسطوانات والاذاعة ميعرف بفنانى الحقيبة أمثال سرور(محمد أحمد سرور)وعبدالله الماحى والأمين برهان وخليل فرح وكرومة(عبدالكريم عبدالله مختار) والايجابة برضو ماتشفى لسبب الاول؟

لذا اتفق النقاد على ان أغانى الحقيبة تبدا بالنقلة التى قام بها سرور فى عام 1920 عندما استغنى عن الطنبارة وأعتمد على الكورس(الشيالين)وادخاله الة الرق والمثلث وتنتهى بالنقلة الحديثة التى ادخلها العبقرى الكاشف فى مطلع الاربعينيات فالبعض يعرفها بأغنية مابين الحربين العالميتين 1918-1945 والبعض يعرفها باغنية امدرمان وانكان هذا الراى فيه سجال جدل فالبعض يقول ان معظمهم كانوا من ام درمان واخرين يقولوا نزوحهم الى ام درمان .

لاكن لاأعتقد ان اغانى الحقيبة تمثل بداية الغناء فى السودان لانها توجد اغانى من قبلها مثل السيرات والدوبيت والحداء واغانى التراث كالمناحات والحماسة واهازيج العمل الجماعى والحصاد واغانى المهد للاطفال والمديح وايقاعات الطار والدلوكة والنؤبة تذكروا زمان الحبوبات بقولوا عند المبالغة فى القدم أى الحاجة القديمة الشئ اقدم من العديل والزين كاشارة واضحة للمسيرات الضاربة فى حضارات وجذور التاريخ السودانى.

قد تكون اغانى الحقيبة هى بداية الغناء الحديث فى ام درمان فالاستاذ والشاعر والاعلامى صلاح احمد محمد صالح خشى على هذا التراث الجميل من الاندثار فكان بنامجه الجميل باذاعة أم درمان فأطلق عليه اسم(حقيبة الفن)1954 وظل البرنامج حتى اليوم يقدم باذعة أم درمان وكذلك تعاقب على تقديمه عدد من الاعلامين المشاهير امثال الاستاذ محمد شمو والمبارك ابراهيم والسر محمد عوض والاستاذ عوض بابكر .

اذن أن اسم حقيبة الفن ليس تصنيفا لاغانى تلك الحقبة كما اشار الراحل الفريق الاستاذ ابراهيم احمد عبد الكريم صاحب برننامج نسائم الليل لاكنه اس خطر على بال مبتدعه الاستاذ صلاح محمد صالح أما التصنيف العلمى والفنى لاغانى تلك الفترة هو(المدرسة الفنية الأولى) كما يقول بروفيسر الفاتح الطاهر فى كتابه(أنا أمدرمان تاريخ الموسيقى فى السودان) ونواصل

[montaser kabaly]

ياحقيبة الفن العظيم

للشاعر عبد المحمود سلمان

لحن وغناء:عوض شمبات واحمد يوسف

ياحقبة الفن العظيم أنت راقية ومعناك جسيم

من(أبوالريح) فاح نسيم يلفت افكارنا عشان تهيم 1

أنت حبك بنا مستديم حلوة تفرح قلبا كليم



فيك(سيد)فاض سن قول من عجائب شعره المهول 2

بالطرب ماخلاله زول فى نفوس شبان أو كهول

ليك(عبيد) أبدع فى النظام أجاد درر من افصح كلام 3

صح لقلوب كل الانام أسكر الافكار غير مدام



لله در(العبادى) قال فى معانيك أفسح مجال 4

هو العميد الشاد الظلال فيك مدح ربات الجمال



فيكى(صالح) نظم الكتير فيكى يالقلعة بدر منير 5

غافية هزت قلب الصغير سارة زى تقرير مصير



ياحليل ايام ناس (على) كان مقالو الشيق جلى 6

(الخليل) علما معتلى شعره كان فى المعنى الملى 7





أذكر (العمرابى) الرسم شعرو كالزهر الأبتسم 8

ثم(ودالرضى) القسم فى سهيل يوضع ليك سهم 9



خلى عرج على (ودعتيق) كم سبك فيك شعرو العريق 10

كان(بطران)11 نور الطريق سامى(جاغريو) شعرو الرقيق 12



الشاعر الفى تجديد غناك أفتخر بى مجدك وثناك

فى الضمير(حدباى)13 مانساك أنت وين فى الفرقد (علاك)







هوامش :

1/ أبو الريح الشاعر والملحن عبد الرحمن الريح

2/سيد الشاعر سيد عبد العزيز

3/ عبيد الشاعر عبيد عبد الرحمن

4/العبادى الشاعر ابراهيم العبادى

5/صالح أمير شعراء الحقيبة صالح عبد السيد ابوصلاح

6/على الشاعر على المساح

7/ الخليل الشاعر والفنان والملحن خليل فرح

8/العمرابى الشاعر احمد حسين العمرابى

9/ ود الرضى الشاعر محمد ود الرضى

10/ ود عتيق الشاعر محمد بشير عتيق

11/بطران الشاعر مصطفى بطران

12/ جاغريو الشاعر احمد محمدالشيخ الملقب بالجاغريو

13/ حدباى الشاعر احمد عبد المطلب حدباى



ونواصل

[مدنيّة]

اجمل الاغاني السودانية

-------
مرحبا منتصر
ومتابعين معك

[montaser kabaly]

أغنية رسائل ويسميحها البعض حبيبى اكتب لى وأنا اكتب ليك من روائع الشاعر عبيد عبد الرحمن لحن وغناء الكاشف من اغانى عام 1954 ومناسبة القصيدة كما قال شاعرها(عبارة عن رسالة ارسلت لصديقى الشاعر سيد عبد العزيز عندم تم نقله الى مدينة الابيضhttp://www.sudani.cc/music/ibrahimalkashif/habiby_aktib_lay.html

[montaser kabaly]

الشال منام عينى وفؤادى جارحو كلمات عبيد عبد الرحمن لحن وغناء الكاشفhttp://www.sudani.cc/music/ibrahimalkashif/alshal_manam_eynai.html

[montaser kabaly]

كما تغنى له الكاشف الليل مابنومو-ازاك يايونى من اغانى 1956 وكانت الاغنية احساس خفى تسببت فيه العيون ومااكثر ما تسبب العيون وبتقول فى مطلعها أزاك ياعيونى...جزاك
درت السهر للروحك براك



ورينى كيف زتى انهمال
ورينى ليه شفت الجمال

الى ناهية الاغنية....ونواصل

[montaser kabaly]

كذلك من الاغنيات لعبيد عبد الرحمن حليل زمن الصبا (الكاشف)-أنا مابقطف زهورك-الزيارة-الشال منام عينى-الجمعة فى شمبات-رحلة-أناياطير بشوفك-غزال البرى هذه القصيدة فى اواخر الثلاثينات لسفر حبيب الشاعر وكان سفره فجاة على الشاعر مما ترك الاثر واضح وصوره فى هذه القصيدة غزال البرى ياراحل حرام من بعدك الساحل......كذلك اغنية افكر فيه واتاملومناسبتها حسب الشاعر( كنت اسكن المسالمة واحببت فتاة مسيحية تسكن فى نفس الحى فاحبتهها بجنون وفوجئت بزواجها زواجا مبكرا للشعور بما يكنه كل منا الى الاخر من حب والخوف من ان يتم الزواج بيننا لانه محرم لاختلاف الديانة ودعتنى للحفلة الاكليل فى الكنيسة وكان مع الشاعر سيد عبد العزيز والاتستاذ/خالد بن الخياط وكان اكبر يوم حسرة فى حياتى.وقال فى مطلعها أفكر فيه وأتامل اراه اتجلى واتجمل هلالى الهل وأتكمل ...زالى نهاية الاغنية-كذلك حجبوه من عينى-اسمعته تغريدى بالمناسبة هذه القصيدة خماسية خرج بها الشاعر عبيد من المالوف الذى كان قائما فى اغانى الحقيبة وهوالوضع الرباعى ويبتدرها
اسمعتو تغريدى
وريتوتجديدى
فى فن الاغانى
قابلتو بى ريدى
وسالمتو بى ايدى -واغنية الفنى فى البرهة القليلة ولها قصة سارويها لاحقا ونواصل مع الشاعر المخضرم الفنان الملحن خليل فرح

[montaser kabaly]

قبل تناول الشاعر خليل فرح نحكى قصة اغنية ألفنى التى شدى بها الكاشف فى رايعة عبيد عبدالرحمن كانت هذه الاغنية فى يوم شم النسيم وكان يوم عطلة فخرج الشاعر من منزله من غير هدف معلوم فقالركبت الترام وعندما وصلت الى المكان الذى به حدائق المقرن الان فى انتظار الترام الثانى فاذا باحد الاصدقاء وهو حامد حسين بكير يركب عربة فنادى على وركبت معه ذهبنا الى حدائق الحيوان وفى اول مكان وقفنا فيه وجدنا فتاتين لم تكن لنا بهم سابق معرفة وكن يعلقن على كلامنا ومكان ما وقفنا يقفن معانا فاحسيت نحوهم بألفة فخرجت انا وصديقى وتركناهم ذهبنا الى عدة اماكن واخيرا ذهبنا الى شمبات فوجدنا مجموعة من معارف حامد فوجدنا معهم نفس البنات اللاتى وجدناهم فى الحديقة فجلسنا بالقرب منهن فنادى على حامد وطلعو من اهله فمكثنا معهم الى ان حان وقت الرحيل وطلبن من حامد توصيلهم الى ابروف فالما كانت العربة صغيرة تخلفت انا وذهب حامد معهم الى المعدية فشعرت باكتاب ولم انتظر عودة حامد فذهبت الى أم درمان ونظمت هذه القصيدة ) مطلعها
ألفنى فى البرهة القليلة
وفارقنى البريدو مابين يوم وليلة
صادفنى فى داخل خميلة
هتن الطل سقاها
بعيونو الهميلة............................
فارقنى وماباليد حيلة
ساب الروح يتطلب رحيله
هل من شوفة لى
أم هى مستحيلة

[montaser kabaly]

خليل فرح بدرى 1894-1932
يعتبر من مجددى فى الشعر الغنائى السودانى وهومن مواليد قرية (دبروسة)بمنطقة حلفا من أب محسى من جهة عبرى ودرس على يد الشيخ احمد هاشم بخلوته فى جزيرة صاى ثم الكتاب فى دنقلا ثم العاصمة كلية غردون القديمة (الهندسة الميكانيكية)وعمل بابوستة والتلغراف وقد استوثق البروفيسر الراحل على المك فى توثيق وتحقيق ديوان خليل فرح بملف خدمته زتوفى 30/يونيو1932 بمستشفى النهر بالخرطوم ودفن بمقابر أحمد شرفى.بالرغم من انه لسانه غير فصيح الا ان عبقريته استوعبت بشكل مذهل اللغة العربية فكانت مفرداته القحة التى لايستوعبها كل الناس وكان لابنه فرح خليل فرح الفضل فى جمع وحفظ شعر والده
كما توجد مخطوطة اودعها صالح عكاشة دار الوثائق المركزية كانت بمثابة المصدر فى توثيق ديوان الخليل
ويعتبر خليل فرح الاب والعميد لجميع الشعراء الوطنيين لنضاله ضد المستعر والهاب الحس الوطنى ضد المستعمر وكذلك تغنى للمراة وتعليمها كما جاء فى كتاب(نقوش على قبر الخليل)للاستاذ عبد الهادى الصديق
فالعمل الفنى يخرج من الخليل متكاملا كلمات ولحن وغناء فى لحظة ابداع واحدة.
للمعلومة يعتبر الخليل اول فنان سودانى يلحن الشعر العربى الفصيح ويغنيه فى رائعة عمر بن ابى ربيعة
أعبدة ماينسى مودتك القلب
ولاهو يسليه رخاء ولاكرب
فالذا يعتبر الخليل مدرسة فنية قائمة بذاتها برغم معاصرته شعراء وفنانى الحقيبة .ونواصل

[montaser kabaly]

ومن رواعه التى تغنى بها العديد من الفنانين عزة فى هواك-ماهو عارف قدمه المفارق-فى الضواحى وطرف المداين-فلق الصباح-تم دوار وأدوار-اذكر بقة ام درمان-ودمدنى وتغنى بها الموسيقار محمد الامين -الشرف الباذخ-زاهى فرعك-بين ها القصون -بين جناين الشاطى -يانيلنا يانيل الحياة
فلق الصباح
فلق الصباح قولي
اهو نورك لاح خلي
ياحبيب الروح هو هذا نداك ام ندى الازهار

صبح البستان شايل
شجر الرمان النومان مايل
الضميروالعود والعيون السود في البطانة كنار

عزة قومي كفاك نومك وكفانا دلال يومك
انت يالكبرتوك البنات فاتوك في القطار المار

صبغ الخدين حمرة
وبعد ساعة تشوف صفرة
الاصفرار دا كتير
اخجلوك يا امير ولا نمت نهار

ادبك عنوان ظرفك
صونيه يصون الفك
زعلك يا ام خدود
سوي ليهو حدود منه ياستار

عزة شوفي بنات قومك سابقوك على كومك
انت الولدوك للقبيلة هدوك
انت عز وبطار

[montaser kabaly]

بين جناين الشاطىء وبين قصور الروم


حي زهرة روما وأبكي يا مغروم

دره سالبه عقولنا لبسوها طقوم

ملكة باسطة قلوبنا تبين عليها تقوم

في الطريق ان مرت بالخلوق مزحوم

كالهلال الهل الناس عليها تحوم

شوف عناقد ديسها تقول عنب في كروم

شوف وريدا الماثل زي زجاجة روم

القوام اللادن والحشا المبروم

والصدير الطامح زي خليج الروم

خلي جات متبوعة الصافية كالدينار

في القوام مربوعة شوفا عالية منار

موضة آخر موضة هيفا غير زنار

روضة داخل روضة غني فيها كنار

شوف جبينا الهل ضو فوقه فنار

منه هل الشارع منه بق ونار

طالعة ما بتقابل زي لهيب النار

تحرق البتهابل والبعيد في نار

[montaser kabaly]

تم دور وأدور


تم دور وادور

عم نوره شال

فات الحله نور

زي بدر التمام



واحدين قالوا نور

واحدين قالوا دوب

مروي ما بتنور

زي بدر التمام



مين يقوم يتهور

يبري القيف هناك

تحته الدابي كور

زي بدر التمام



قالوا الكون اتطور

لا عاشق عفيف

لا جميل إتصور

زي بدر التمام



الحسود يتضور

ناره ماكله لسانه

كله زور ومزور

زي بدر التمام



الطريق الحور

دمي ما بروح

سيدة ليش يتجور

زي بدر التمام



هز شوقي وتور

يا نديم إزاي

جرحي المخفي غور

زي بدر التمام



يا قليب إتجبر

قوم وريني كيف

الكرام تتصبر

زي بدر التمام



نحن ما بنتعبر

النفوس أن حبت

تستحى وتتكبر

زي بدر التمام



ما خبير أتخبر

في الزمان الفات

والجديد إدبر

زي بدر التمام



أوعي لا تتشبر

هل رأيت لك عاشق

بالغرام يتنبر

زي بدر التمام



نحن ما بنطفر

ما بنهاب سفيه

إلا ما بنتزفر

زي بدر التمام



قولوا لي البتنفر

ما شالن قناع

المعاك تتوفر

زي بدر التمام



يا زميل إتشطر

شن بتشوف حداك

إلا حور مبطر

زي بدر التمام



يبقي يومنا مطر

ماله الكون دهين

والفريق معطر

زي بدر التمام



النحر مغمر

والسباته حارة

والمجال مضمر

زي بدر التمام



الشعر مخمر

يرشح كله ند

عردب المجمر

زي بدر التمام



قام محمد بشر

هز فوق تيجانن

سل سيفه وكشر

زي بدر التمام



قول معاي وإتفشر

نحن سياج عروضن

نحن يوم المحشر

زي بدر التمام



يا حسن اتذكر

طيب ليلتنا ديك

والصباح السكر

زي بدر التمام



المدام ما اتنكر

لا من ديكنا صاح

فوق رؤوسنا اتحكر

زي بدر التمام



كل شىء مفسر

ما في شىء غريب

والعسير ميسر

زي بدر التمام



ما في عين تتحسر

دام عريسنا دام

والحسود إتحسر

زي بدر التمام

[montaser kabaly]

ود مدنى


ما له اعياه النضال بدني

روحي ليه مشتهيه ود مدني

ليت حظي سمح واسعدني

طوفه فد يوم بي ربوع مدني

كنت أزوره ابويا ود مدني

واشكي ليه الحضري والمدني

آه علي حشاشتي ودجني

وحنيني ولوعتي وشجنى

دار ابويا ومتعتي وعجني

يا سعادتي وثروتي ومجني

حين سألنا حاوي الوصب

من خمايل قرية القصب

قالوا جات سيرتك علي النصب

ونحن بين الروضة والقصب

صنفه بعرها قالن إن تصب

تربط الأحلام مع الخصب

كان حبيبنا وحاشا ما نصبي

ومن زمان فارقنا وهو صبي

تاني ما سمعنا انقطع خبره

يا حليلم طشوا ما اتخبروا

واحدة فيهن قالت انجبروا

فقر ابونا

وخدمة النبرو

الكنانة أكرمت نزلي

واغدقت من خيره كل زلي

إن حييت أو مت في الازل

ده مقدر طبعه في الازل

غايته بختم نفثتي الخطرت

بي تحية من حشاي شطرت

للتدور والطايره والما طارت

وسلاما ما الغصون خطرت

[montaser kabaly]

مقيلكم زين
مشكورة الاخت مدنية على المرور وشكرا للذين راسلونا على الخاص وناسف للانقطاع عن مواصلة البوست ولاكن ساعاود المواصلة ريثما انتهى من بعض التفاصيل الحياتية كل الود وابقو عافية

[محمد الجزولى]

بوست ممتع جدا ورائع بروعة اغاني الحقيبة
لك كل الشكر اخي منتصر علي هذه السياحة الجميلة
همسة : في اعتقادي ان البوست مكانه الثقافي فهو انسب له

[montaser kabaly]

بوست ممتع جدا ورائع بروعة اغاني الحقيبة
لك كل الشكر اخي منتصر علي هذه السياحة الجميلة
همسة : في اعتقادي ان البوست مكانه الثقافي فهو انسب له

تحياتى ودالجزولى ومشكور على المرور الانيق واعتقد ان فى رقابنا دين لذالك النفر الكريم من عمالقة الحقيبة الذين هذبوا اذاننا بذلك الشدو الجميل والمتفرد لذا نحاول ان نوثق لهم بقدر مانستطع وان يكن برضو لانعطهم حقهم اما بالنسبة للهمسة دا كلام جيد لاكن حاولت رفعها على العام باعتبارية ولوج الحوار لتعم الفائدة باعتبارية الاراء فى فكرة الحقيبة وتاريخها ومسالة الاجيال واحقيتهم فى منتوجم الثقافى واعتزازهم به فالذالك تعشمت بالطرق هنا وقنب عافية اخوى انا